حسني كباش
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
الحوار المتمدن - العدد: 1184 - 2005 / 5 / 1


إن ديكتاتورية البروليتاريا ليست ديكتاتورية بالمعنى الحرفي للكلمة
هذه العبارة قالها الرفيق لينين في كتابه ثورة البروليتاريا و المرتد كاوتسكي
و لكن في الوقت الحالي تعاني ديكتاتورية البروليتاريا من أزمتين
أولا قيام بعض السياسيين الرخيصين كبريجينيف و استالين بتشويه إسمها
ثانيا نفور البشر من كلمة ديكتاتوريا أينما استخدمت
و بما أن الماركسية متطورة فنحن علينا تخطين الأزمتين بالقيام بما يلي
أولا تغير طريقة الوصول إلى الحكم باستبدال الثورة المسلحة بالثورة السلمية
ُثانيا تقديم أهمية الديموقراطية على الاشتراكية
ثالثا تغيير إسم ديكتاتورية البروليتاريا إلى حكم العمال



حسني كباش عضو بحزب العمل الشيوعي
و عضو مستقل بالتجمع الوطني الديموقراطي

شباب في موضوع وعدتكون أنو رح ينشرولي إياه بالحوار المتمدن إسمو مطلب ملح أكثر من الاشتراكية و هني لسا ما نشرولي إياه بس نشرولي هادا المقال
و بتمنى يعجبكون
:D

مرحبا يا حسون

الرجاء تعريف و توضيح التعابير و المفردات التالية

-بروليتاريا
-ديكتاتورية البروليتاريا
-ما هو المعنى الغير حرفي للديكتاتورية الذي قصده لينين
-كيف تتم الثورة السلمية

شكرا

:D :D :D
شكرا حسون منو للأحسن :wink:

مرحبا يا حسون

الرجاء تعريف و توضيح التعابير و المفردات التالية

-بروليتاريا
-ديكتاتورية البروليتاريا
-ما هو المعنى الغير حرفي للديكتاتورية الذي قصده لينين
-كيف تتم الثورة السلمية

شكرا
البروليتاريا هم العمال
ديكتاتورية البروليتاريا هي حكم طبقة البروليتاريا على المجتمع
ألمعنى الغير حرفي أي أنها ليست حكم بوليسي
الثورة السلمية تتم عن طريق مظاهرات و اعتصامات و تحريض الرأي العام

البروليتاريا هم العمال

حسون صدقني ما عم بتثاقل عليك.................... سؤالي جدي مية بالمية



من هم العمال؟

لم تشرح لي ماذا تعني الديكتاتورية التي قصدها لينين... انت قلت لي ماذا لا تعني.. و لكن لم تقل ماذا تعني

فهمت انها حكم العمال للمجتمع.. و انه ليس حكم بوليسي (نشكر الله), و لكن ما هو هذا الحكم اذا كان ديكتاتورية؟ و كيف نرضى بهذه الديكتاتورية؟

و كما قال ياس, من هم العمال؟

لم تشرح لي ماذا تعني الديكتاتورية التي قصدها لينين... انت قلت لي ماذا لا تعني.. و لكن لم تقل ماذا تعني

فهمت انها حكم العمال للمجتمع.. و انه ليس حكم بوليسي (نشكر الله), و لكن ما هو هذا الحكم اذا كان ديكتاتورية؟ و كيف نرضى بهذه الديكتاتورية؟

و كما قال ياس, من هم العمال؟
ديكتاتورية البروليتاريا ليست ديكتاتورية و إنما هي قيادة العمال للمجتمع يعني الملكية العامة لوسائل الإنتاج

البروليتاريا هم العمال

حسون صدقني ما عم بتثاقل عليك.................... سؤالي جدي مية بالمية



من هم العمال؟
فيك تشوف بمقالي إلي بالموقع إسما العمال و القرن ال21

شكرا حسون ع الافكار التلاتة يلي طرحتها
والي فهمتوا انا انك بتقول ان الهجمة الشرسة يلي بتشدها المنطقة العربية والعالم ككل ماعاد فينا انواجهها بالطرق المعهودة لرد الظلم وان الافكار الاشتراكية صار بدها تطوير وتعديل لحتى تقدر تواجه هالمرحلة من الصراع والتشويه..... انا بشوف ان الفكرة يلي طرحتها اصبحت غالبية الاحزاب الشيوعية تتبعها من زمان ورمت السلاح واتبعت السياسة والعام الماضي شهد انتصار لكتير من الاحزاب الاشتراكية بالعالم :confo: :confo:
ولا شو رايك

والي فهمتوا انا انك بتقول ان الهجمة الشرسة يلي بتشدها المنطقة العربية والعالم ككل ماعاد فينا انواجهها بالطرق المعهودة لرد الظلم وان الافكار الاشتراكية صار بدها تطوير وتعديل لحتى تقدر تواجه هالمرحلة من الصراع والتشويه..... انا بشوف ان الفكرة يلي طرحتها اصبحت غالبية الاحزاب الشيوعية تتبعها من زمان ورمت السلاح واتبعت السياسة والعام الماضي شهد انتصار لكتير من الاحزاب الاشتراكية بالعالم
ولا شو رايك

فيها وجهة نظر...بس بصراحة أنا فكرتي أنو الفكر اليساري الحقيقي صعب جدا يتمثل بحزب, و الأحزاب الشيوعية الحالية رغم محاولتها التقدم و التطور....ما زالت تتبع الفكر اللينيني اللي ماعاد يمشي لتحديات العصر, بيجوز ما ظل في اقطاع.... بس هلأ في عولمة, و من الغباء انك تحاول تحارب العولمة بنفس الطرق و الوسائل اللي حاربت فيها الاقطاع.

كحركة يسارية عصرية أنا شخصيا كتير معجب بـ لولا دا سيلفا تبع البرازيل.... بدون ما يكون زعيم حزب و مؤتمرات و كذا....عم بيشتغل صح برأيي الشخصي, هاد هوي مفهومي عن اليسار و ليس الأحزاب الشيوعية

أنا أرى بأنه حاليا" الحركة أو الفكر اليساري ليس منزطا" بحزب أو حركة .. بل اني أرى أن اليسارية في هذه المرحلة ترقى لتكون أسلوب حياتي بجميع تفاصيل الحياة .. وأنا أطرح نفسي كمثال .. فانا ذو فكر يساري وأحاول تطبيقه وعيشه بمختلف جوانب الحياة (وليس فقط سياسيا") ورغم ذلك لست مقتنعا" بالانتماء لأية حزب .. حتى ولو أصبح لدينا تعددية سياسية حقيقية .. فانا سأكون سعيد بذلك .. وسيكون احد مطالبي (ومطالب الكثيرين) الملحة قد تحقق .. ولكن حتى عندها لا أعتقد بأني سوف أنتمي في حزب لأني أرى بأنه اذا كان هناك حزب يلائم افكاري فأن انتمائي اليه سيجعلنيي جامدا" فيه ... أي أني عندما سأنتمي اليه قد أتقوقع في مبادئه وأفكاره وقد لا أستطيع نقده (وخاصة في حال التعددية) لأني سأصبح محسوبا" عليه (لأنه على فرض حدوث تعددية سياسية ، سيستغرق حصول الشفافية بين الاحزاب ، وبين أعضاءها وقت كبير) وأنا برأيي بأني كمراقب خارجي أستطيع أن أساهم في الوصول الى هذه الشفافية أكثر .. لذا فأفضل أن أرى عمله ومشاريعه كمراقب خارجي حتى أستطيع أن أرى نقاطه السلبية أن وجدت .. وأن لم توجد وأثبت كفائته عندها قد أفكر بالانتساب اليه ..

:D :D

[quote]بـ لولا دا سيلفا تبع البرازيل.... بدون ما يكون زعيم حزب و مؤتمرات و كذا
بس يا رفيق لولا ديسيلفا رئيس حزب إسمو حزب الشغيلي و رئيس التحالف الشعبي الموسع

شكرا حسون ع الافكار التلاتة يلي طرحتها
والي فهمتوا انا انك بتقول ان الهجمة الشرسة يلي بتشدها المنطقة العربية والعالم ككل ماعاد فينا انواجهها بالطرق المعهودة لرد الظلم وان الافكار الاشتراكية صار بدها تطوير وتعديل لحتى تقدر تواجه هالمرحلة من الصراع والتشويه..... انا بشوف ان الفكرة يلي طرحتها اصبحت غالبية الاحزاب الشيوعية تتبعها من زمان ورمت السلاح واتبعت السياسة والعام الماضي شهد انتصار لكتير من الاحزاب الاشتراكية بالعالم :confo: :confo:
ولا شو رايك
معك حق تماما رفق/رفيقة جيفارا

بس يا رفيق لولا ديسيلفا رئيس حزب إسمو حزب الشغيلي و رئيس التحالف الشعبي الموسع

صح , مزبوط....بس حزبو مانو الحزب التقليدي وكذا.... الفكراليساري اللي يعتمدو أكثر تحرر

انا اوافق ان الانضمام للاحزاب يؤدي الى نوع من التجمد لكن علينا ان نفهم ان الحزب هو تنظيم طوعي والمنضمين الى حزب (اي كان) يفعلون ذلك ايمانا منهم بضرورة التغيير ولذلك ينتظمون باحزاب لتحقيق ذلك ووجود الاحزاب عامل مهم جدا في النضال السياسي ، لكن في نهاية الامر ان هنالك نكان للعمل السياسي خارج نطاق الاحزاب وانا شخصيا لا ارى نفسي منتظما احد الاحزاب

على فكرة هل للحوار المتمدن موقع على الانترنت يمكنني الاطلاع على مقالاتك يا اخ حسون (اذ يتعذر الحصول عليها في بلادي) وشكرا.

بس يا رفيق لولا ديسيلفا رئيس حزب إسمو حزب الشغيلي و رئيس التحالف الشعبي الموسع

صح , مزبوط....بس حزبو مانو الحزب التقليدي وكذا.... الفكراليساري اللي يعتمدو أكثر تحرر
طيب و أنا ماني ضد هالشي
نحنا بحزب العمل الشيوعي بنهدف لنكون حزب يساري من طراز جديد

انا من خلال يلي قرأتو من رودوكم ع بعض لقيت انو نحن تقريبا كلنا عم نحكي بنفس المنطق ويمكن هالشي نتيجة تجربة الاحزاب العربية الفاشلة بكل المقاييس سواء كان هالشي نتيجة العوامل الداخلية او الخارجية بمنطقتنا وهالشي بينطبق ع كل الاحزاب يسارية كانت او يمينية و وجود الانسان كمراقب للتطورات بهالمرحلة اهم من انخراطوا بحزب وعملو كحزبي لان هالشي ممكن يعطيه مصداقية اكتر لكن اذا فكرنا للمستقبل شوي هل استقلاليتنا عن الاطر الحزبية ممكن تحققلنا طموحاتنا كشباب عربي ولاي حد هالشي ممكن يكون صح بظل تعددية حزبية مش تعددية مستقلين
:hart: :hart: رفيقتكم جيفارا :hart: :hart:

هلاء متل ما بعرف ( و ماني متأكد ) أنو البروليتاريا يعني الطبقات المسحوقة أو المهمشة , و تمت أستعارة التشبيه من قبل المفكرين اليساريين للتعبير عن الظلم اللي عم يصيب العماّل, و سؤال جو ( مين هنن العمال ) بيطرح سؤال مهم عن فكر الثورة البروليتارية و قابليتها للتجدد العملي , و بيرجع للواجهة الخلاف الصيني السوفييتي بها الخصوص .


إصلاح الشيوعية , أو تغيير المنهج الاشتراكي و تعديلوا ما بينفي عجز الاشتراكية اقتصاديا و فشلها على أرض الواقع العملي اللي هو السوق .



لهيك ما بتصور أنو اي عملية اصلاح رح تعطي نتيجة , ممكن تعطي نتائج سياسية وقتية , بس على المدى الطويل ( برأيي ) لا يمكن لأي فكر اشتراكي انو ينجح اقتصاديا .




و لليساريين في المنتدى فائق الاحترام .




تحياتي الخضراء

هلاء متل ما بعرف ( و ماني متأكد ) أنو البروليتاريا يعني الطبقات المسحوقة أو المهمشة , و تمت أستعارة التشبيه من قبل المفكرين اليساريين للتعبير عن الظلم اللي عم يصيب العماّل, و سؤال جو ( مين هنن العمال ) بيطرح سؤال مهم عن فكر الثورة البروليتارية و قابليتها للتجدد العملي , و بيرجع للواجهة الخلاف الصيني السوفييتي بها الخصوص .


إصلاح الشيوعية , أو تغيير المنهج الاشتراكي و تعديلوا ما بينفي عجز الاشتراكية اقتصاديا و فشلها على أرض الواقع العملي اللي هو السوق .



لهيك ما بتصور أنو اي عملية اصلاح رح تعطي نتيجة , ممكن تعطي نتائج سياسية وقتية , بس على المدى الطويل ( برأيي ) لا يمكن لأي فكر اشتراكي انو ينجح اقتصاديا .




و لليساريين في المنتدى فائق الاحترام .




تحياتي الخضراء
هادا رأيك و أنا بحترمو
:D

انا برايي ان القول بان الاشتراكية فشلت كنظام سوق ونظام اجتماعي هاد ظلم كبير ونحن بنعرف انو الانظمة الراسمالية تعرضت لازمة كساد وهالشي شجع اتباع هالفكر لتجديدو لحتى وصل للي وصلو اليوم يعني فينا انقول انو بعد التشويه يلي اتعرضلها النظام الاشتراكي وما شن على الانظمة الاشتراكية ومازال ادى الى تازمها ونحن لا ننكر ان التطبيق للانظمة الاشتراكية بحزافيراها لم يتح وكان هالشي اما نتيجة الهجمات الخارجية المتكررة او حتى نتيجة استغلال من اطراف داخلية ادعت الاشتراكية للوصول للسلطة ... فالاشتراكية لم تكن كما اريد لها ان تكون فمن حقنا الايمان بها حتى تكون كما نريدها ان تكون وبامكانك بنظرة بسيطة لواقع اليوم ان ترىكيف تحارب و تحاصر كل دولة تنتهج الاشتراكية لمنع انتشار هذا النظام كنظام اقتصادي في العالم وتطبيقه بالوجه الصحيح :!:
جنة في الارض جنة لجميع البشر
:hart: :hart: جيفارا :hart: :hart:

يا حسون ما معقول كل ما حدى يسألك سؤال او يعطي جواب و مشاركة تقله هادا رأيك و انا بحترمه او تقله روح شوف مدري وين... هل حركات بتعني إنك مانك عرفان تحكي بالموضوع يلي انت فتحته

حسون انا ما فهمت لهلأ مين العامل.. و يا ريت ما تقلي روح مدري وين لأنو ما بعرف وين روح و اصلا ما حلوة منك بنوب هيك تقول

كل واحد بينتج عمل هو جزء من سوق العمل... ان كان عامل سوبر ماركت او مهندس او طبيب او عامل بناء او فلاح... على أي اساس عم تفصل العمل؟ و كيف رح يحكم العمال الدولة... يعني بدل مجلس وزراء بيكون في عندك مجلس عمالي مثلا مكون من البلاطين و الحدادين و المليثين... ؟؟؟

و بالمناسبة انتوا عن أي اشتراكية عم تحكوا... يعني شو هيي اشتراكيتكم و لأي درجة.. في درجات كتيرة... ممكن نعرف بالضبط عن شو عم تحكوا؟؟

يعني الدولة بتملك كل الصناعات و كل القطاعات؟ لما عم تحكوا عن شيوعية لينين لما عن "الشيوعية" الصينية... يلي طبعا مانا شيوعية الا بالدكتاتورية تبعها

انا برايي ان القول بان الاشتراكية فشلت كنظام سوق ونظام اجتماعي هاد ظلم كبير ونحن بنعرف انو الانظمة الراسمالية تعرضت لازمة كساد وهالشي شجع اتباع هالفكر لتجديدو لحتى وصل للي وصلو اليوم يعني فينا انقول انو بعد التشويه يلي اتعرضلها النظام الاشتراكي وما شن على الانظمة الاشتراكية ومازال ادى الى تازمها ونحن لا ننكر ان التطبيق للانظمة الاشتراكية بحزافيراها لم يتح وكان هالشي اما نتيجة الهجمات الخارجية المتكررة او حتى نتيجة استغلال من اطراف داخلية ادعت الاشتراكية للوصول للسلطة ... فالاشتراكية لم تكن كما اريد لها ان تكون فمن حقنا الايمان بها حتى تكون كما نريدها ان تكون وبامكانك بنظرة بسيطة لواقع اليوم ان ترىكيف تحارب و تحاصر كل دولة تنتهج الاشتراكية لمنع انتشار هذا النظام كنظام اقتصادي في العالم وتطبيقه بالوجه الصحيح :!:
جنة في الارض جنة لجميع البشر
:hart: :hart: جيفارا :hart: :hart:
:gem: :gem: معك للعضم

و بالمناسبة انتوا عن أي اشتراكية عم تحكوا... يعني شو هيي اشتراكيتكم و لأي درجة.. في درجات كتيرة... ممكن نعرف بالضبط عن شو عم تحكوا؟؟

يعني الدولة بتملك كل الصناعات و كل القطاعات؟ لما عم تحكوا عن شيوعية لينين لما عن "الشيوعية" الصينية... يلي طبعا مانا شيوعية الا بالدكتاتورية تبعها
أولا نحنا لا عم بنحكي عن الاشتراكيي الصينيي و لا الاشتراكيي الروسيي نحنا عم بندعو لتطوير الاشتراكيي
ثانيا الصين مانا اشتراكيي بنوب و لا كانت اشتراكيي و روسيا كمان :evil:

طيب وين الحكي بالموضوع؟
كله صف كلام جاهز من الكتب... لهلأ انا كفرد من أفراد الشعب السوري العتيد ما فهمت عليك و لا حرف!!!
يعني بدك تطور الاشتراكية صح؟؟؟ التطوير بيجي تطوير من اشتراكية جاهزة.. يعني عندك اشتراكية و بدك تطورها... قلي شو هيي الاشتراكية يلي بدك تطورها... اي وحدة منون؟

جو اهلا فيك اولا وبتمنى ما كون غلطانة باسمك انا معك بنقطة وهي لما تفتح حوار لازم تبدا تحكي فيه بالتدريج انت عم تسال مين هم العمال و سؤالك غريب شوي بخلينا نحس كانك عم تنفي وجود الطبقية بالمجتمع ووكان مافي طبقة بمجتمعنا مش عم تقدر تحصل على الحد الادنى من حقوقها وهالشي بيبدا من الفلاح وبيوصل للمفكر مرورا بكل الفئات بينهم وطبعا الفئة التانية غنية عن التعريف وانا هون بدي الفت نظرك لاني مش عم بحكي على بلد او منطقة بحد ذاتها انا عم بوصف وضع من وجهة نظري شايفتو والاشتراكية يلي انا بحكي فيها هي الاشتركية يلي رح تقدر تعطي لكل فئة حقها ولي من خلالها رح نقدر انواجه الظلم وهاد الحق رخ يخليها تتساوى مع غيرها بحيث مارح يكون في انسان مش لاقي ياكول ولا يحكي وانسان مو عرفان وين يروح بامواله هاي على صعيد داخلي وعلى صعيد خارجي نحن بحاجة لاشتركية نقدر نواجه فيها الهجمات العنيفة يلي عم بتشنا قوى الراسمالية على دول العالم الثالث... اشتراكية توقف بوجه العولمة والغزو الثقافي وتقدر تعيد التوازن للعالم يلي بدا يميل للخضوع لنظام القطب الواحد ويسيطر حتى على الاداة الوحيدة الي انوجدت للحفاظ ع السلم بالعالم وبقصد هون الامم المتحدة يلي اصبحت عبارة عن اداة لتبرير الظلم مش اكتر
:hart: :hart: جيفارا :hart: :hart:

سؤالك غريب شوي

يا جماعة حاجي دبحتو الزلمة :lol: :lol: أنا سألت أنو مين هنن العمال مو هوي

برأيي الشخصي, أنو جد السؤال مهم كتير ( مين هنن العمال ) ؟؟؟؟؟ ولازم حواليه مية اشارة استفهام
السوفييت حصروا العمال بطبقة وحدة, عمال المعامل و قالوا أنو هنن بس اللي ممكن يكونوا نواة الثورة الاشتراكية و هنن الطبقة المنتجة اللي لازم تتحكم بمقدرات البلاد , يعني الشعب كلوا لازم يصير من العمال مع نظرة تعاطف بالنسبة للفلاحين بس ما اي تعاطف, التعاطف الحذر المتحفظ , لأن متل ما بيقولوا انو الفلاحين رح ينزعوا بعد فترة من الاسنتقرار للملكية الخاصة و يسعوا لاعادة البرجوازية و هدم الاشتراكية, يعني السوفييت كان رأين انو هنن مع الفلاحين طالما الفلاحين فقرا, وها الشي ممكن يمشي بيروسيا لأنو الزراعة ولا شي بالنسبة للاقتصاد بهداك الوقت, ها الشي ممكن يكون كارثي من وجهة النظر الصينية, الصين كانت بعد انتصار الثورة الشيوعية بلد زراعي مية بالمية , و تخيلوا موقف القيادة الصينية قدام شعبا اذا الروس واللي هنن الحلفاء و الاصدقاء و حلم الوحدة( و البلد الام للثورة العالمية ) عم يقولوا عنهن أنتو ناس ما لازم تكونوا ؟؟؟؟؟؟
ها الشي خلق مشكلة بين البلدين, روسيا قالت انو الشيوعية بالصين لايمكن تستمر بايدن الفلاحين, الصين قالت نحنا عندنا شيوعيتنا الخاصة و ثورة الفلاحين رح تستمر ورح تحقق التطور الاقتصادي و العسكري, روسيا عندت خوفا من دولة فتية انتصرت فيها الشيوعية بدون مساعدة روسية تمتلك عدد هائل من السكان( ممكن نتذكر موقف ستالين هون من الحزب الشيوعي الالماني قبيل و بعد استلام هتلر للحكم )و خافت على مركز الاتحاد السوفييتي بالنسبة لقيادة المجتمع الشيوعي المقبل, و تطور الخلاف لتهديدات نووية مبطنة و استعدادات عسكرية سرية بين البلدين, وصلت للقطيعة شبه الرسمية .


هلاء اصلاح الاشتراكية كلمة غير واضحة المعالم, يعني شو هي تحديدا النقاط اللي رح تتغير بالفكر الاشتراكي, هل هيي الموقف من الملكية الخاصة لوسائل الانتاج, أو من طبقية المجتمع ( هلاء أكيد ما عم احكي عن قبول واقع طبقي بالفكر النيتشاوي, و اكيد ما قصدي طبقات شاندالا و طبقات نخبة ) بس مافينا ننكر انو الطبقية بالمجتمع واقع لا هروب منو, هل رح تعيد الاشتراكية وجهة نظرا بملكية الدولة الحصرية لوسائل الانتاج, و رايها بالانتاج التعاوني, و منحى سعي الثورة نحو التحول الاشتراكي,و اقتصاد الخطة, موقفها من الثورة و طبيعة الثورات وهل هيي دائمة و متجددة, سلمية فكرية أو مسلحة, الموقف من الثورة العالمية و دعم الحركات الشيوعية بالبلدان التانية, بتصور هدول هنن الاسئلة اللي لازم يتجاوب عليهن بنطاق الحديث عن اصلاح بالفكر الاشتراكي, أما الحديث عن تبني للديمقراطية و عن اصلاح الفساد و تطوير المجتمع, فبتصور هاد حديث هدفوا الوحيد شوية تلميع صورة مشوهة بشدة , و مكاسب سياسية باللحظة الراهنة فقط .






وعلى روح غيفارا السلام


و لكم فائق الاحترام




تحياتي الخضراء :D

و سؤالك غريب شوي بخلينا نحس كانك عم تنفي وجود الطبقية بالمجتمع ووكان مافي طبقة بمجتمعنا مش عم تقدر تحصل على الحد الادنى من حقوقها وهالشي بيبدا من الفلاح وبيوصل للمفكر مرورا بكل الفئات بينهم وطبعا الفئة التانية غنية عن التعريف

مرحبا
ما لا أدري كيف جعلك السؤال تعتقدي اني أنفي وجود العمال؟ الأخ ياس (صاحب السؤال الأصلي و الذي يستحق البهدلة الأصلية و ليس انا :wink: ) سأل من هم العمال.. و لم يسأل هل يوجد عمال؟

ثم ما هي حقوقها بالضبط؟ ان تستولي على حقوق باقي الناس؟ هل من تعلم 10 سنوات و شقي 20 سنة مثل من خرج من المدرسة بعد الصف الرابع و اشتغل بالشارع مثلا؟ كل شخص يحصل حسب عمله و حسب تعليمه


والاشتراكية يلي انا بحكي فيها هي الاشتركية يلي رح تقدر تعطي لكل فئة حقها ولي من خلالها رح نقدر انواجه الظلم وهاد الحق رخ يخليها تتساوى مع غيرها بحيث مارح يكون في انسان مش لاقي ياكول ولا يحكي وانسان مو عرفان وين يروح بامواله

ما هي الاشتراكية يلي عم تحكي فيها؟ انتي قلتي لي ماذا ستصنع و لكن أريد ان أعرف الآلية... كل كلامي في هذا الموضوع عن هذه الألية السحرية و حتى الان انتظر الجواب
ثم بالمناسبة... لا أحد له علاقة لو كان معي الكثير من النقود و لا أدري ماذا أفعل بها.. هذا حقي ما دمت قد حصلت عليها بطريقة مشروعة
و الشخص الذي لا يملك ما يأكل.. لو كان مؤهلا للعمل فليعمل و سيملك ما يأكل. و لو لم يكن مؤهلا للعمل فهناك برامج تابعة للدولة ستساعده


هاي على صعيد داخلي وعلى صعيد خارجي نحن بحاجة لاشتركية نقدر نواجه فيها الهجمات العنيفة يلي عم بتشنا قوى الراسمالية على دول العالم الثالث

القوى الرأسمالية؟ أعتقد ان العدو الحقيقي لدول العالم الثالث هم أبناء دول العالم الثالث و تخلفهم الديني ! القوى الرأسمالية ليست شريرة بل هي رائد التقدم الحضاري و التقني على كوكب الأرض

اشتراكية توقف بوجه العولمة والغزو الثقافي وتقدر تعيد التوازن للعالم يلي بدا يميل للخضوع لنظام القطب الواحد ويسيطر حتى على الاداة الوحيدة الي انوجدت للحفاظ ع السلم بالعالم وبقصد هون الامم المتحدة يلي اصبحت عبارة عن اداة لتبرير الظلم مش اكتر

أولا العولمة شيء جيد
ثانيا الغزو الثقافي ليس غزو بل تمازج ثقافي يعني ضد الانغلاق الاشتراكي الخانق للمجتمع
و توازن العالم هدف غير واقعي لان أميركا تملك ثلث القوة الاقتصادية في العالم و حليفتاها اليابان و المانيا في المرتبة الثانية... فدعكم من هدف تحقيق التوازن العالمي و القضاء على الشر و الرأسمالية و خلونا في سوريا .. و بس نصلح سوريا و نبنيها خلينا نروح نحقق التوازن العالمي و ندمر القوى الرأسمالية و نسرق منهم مصرياتهم :P

تحياتي

و بالمناسبة.. و حتى لا تعتقدي اني من الطبقة البرجوازية الشريرة.. فأنا أعمل كعامل أحيانا و أفهم ما يعانيه العمال لاني عملت معهم... و لكن هذا لا يعني اني لو حصلت بعض النقود و درست في الجامعة ثم فتحت مصنعا ان يأتي هؤلاء العمال و يشفطوه مني باسم الاشتراكية و الحفاظ على التوازن العالمي!!

مدري ليش...أنا حاسس أنو هاد الموضوع انحكا في قبل هالمرة :?:


طيب أنا ما بدي ارجع احكي اللي حكيتو بالموضوع - المواضيع السابقة- بس فيني بلش من محل ما قال جو


لا أحد له علاقة لو كان معي الكثير من النقود و لا أدري ماذا أفعل بها.. هذا حقي ما دمت قد حصلت عليها بطريقة مشروعة
و الشخص الذي لا يملك ما يأكل.. لو كان مؤهلا للعمل فليعمل و سيملك ما يأكل. و لو لم يكن مؤهلا للعمل فهناك برامج تابعة للدولة ستساعده


بالدول الرأسمالية المتحضرة الفهمانة اللي هي رائدة التكنولوجيا و التقدم و التمدن يتم سنوياً اتلاف الاف الأطنان ( الفئضة ) من حليب الأطفال ( البودرة ) عن طريق رميها في البحر ..بهدف الحفاظ على استقرار سعر السلعة وظبط ميزان العرض و الطلب .

معادلة رأسمالية بسيطة جداً ...منكب الحليب و لا يرخص سعرو
- طيب في عالم عم تموت من الجوع !!
- المهم أنو الأسعار مستقرة
- في شعوب كاملة مهددة بالمجاعة !!
- مشكلتن ..هني أغبيا ...لو كانو بيفهمو ما كان صار عندن مجاعة
- في ناس ماتت ...و لو كان عندن الحليب كان ممكن يبقو عايشين !!
- لو دفعو حق الحليب كنا عطيناهن ..بتعرفو نحنا الزبون غالي علينا ...بس هني فقرا و ما بيفهمو ...و بضلو عاملين حروب طائفية و عشائرية .
================================================== ===

هلق هاد منطق الرأسمالية أو أنا غلطان ؟؟؟

ما ضروري كون شيوعي لحتى كون ضد الرأسمالية ...ما ضروري كون اشتراكي لحتى كون ضد الرأسمالية ....ما ضروري كون فقير لحتى كون ضد الرأسمالية

المهم يكون عندي شوية إحساس لحتى وقف ضد وحوش العصر ....
المهم يكون عندي شوية جرأة أني قول لا ..ما بدي كون شريك بالجريمة
المهم يكون عندي شوية شرف ...و شوية نظر..لحتى ققدر ميز اذا كان الدولار أخضر ....أو مصبوغ بدم البشر

================================================== ===

ملاحظة: احدى الاحصائيات الظريفة اللطيفة بتقول أنو في 375 بني آدم بالعالم بيملكو ما يعادل ممتلكات ربع سكان الأرض .

خيو...تعى نظلم هال 375 شوي....شو كم واحد من كون أنصفتا ؟؟

أنا من جهتي و بدون مصطلحات اقتصادية و بدون ما أعرف شو يعني عمال بقول ...

يلعن أبو الرأسمالية ع أبو الملك حسين :P

مرحبا ابو شريك

كلامك هذا غير صحيح و هذه الممارسات ليس لها علاقة بالرأسمالية. هذا تدخل سياسي بالسوق و هو ما ترفضه السوق الحرة ... هذه إحدى عواقب الديمقراطية و تدخل الحكومة بالسوق.. هذه رواسب أنظمة أخرى و لو ان شكلها تغير قليلا كونها مترافقة مع الدول الغربية

سأشرح الوضع بالتفصيل.. و قد بحثت فيه طويلا هذين اليومين حتى أتمكن من الرد

كبداية لا أعتقد ان كلامك صحيح عن رمي البودرة بالبحر لتحقيق توازن الأسعار. الأمر ليس كذلك و لو ان فكرة توازن الأسعار هي الفكرة الأساسية السيئة. يعني موضوع رمي بودرة الحليب في البحر أعتقد انه لن يسمح به ليس من منطلق اقتصادي او انساني... بل على أقل تقدير لن تسمح به وزراة البيئة و جمعيات الحفاظ على البيئة! و لكن لو لديك مثال حقيقي موجود حاليا و يوجد مقال حول الموضوع في مكان ما على الإنترنت فأتمنى ان تزودني به لاني بحثت و لم أجد شيئا

المشكلة بدأت فترة الحرب العالمية الأولى حيث أن الحكومة الأمريكية بدأت تعطي إعانات مالية للفلاحين (Subsidies) لزيادة الإنتاج الزراعي.. و استمرت الإعانات و استمرت زيادة الإنتاج بعد الحرب. و طبعا بعد الحرب تغيرت الأحوال و خف طلب الدول الأوروبية المدمرة للمزروعات الأمريكية. الإعانات المالية تسبب حافز لدى المزارع لزيادة إنتاجه و زيادة الإنتاج تتطلب المزيد من الإعانات.. يعني دوامة

الآن حصل زيادة إنتاج كبيرة و انخفاض سريع و كبير بأسعار السلع الزراعية في أميركا. هذا الامر لم يرق للحكومة لأنهم شعروا بضرورة حماية المزارع الأمريكي من انخفاض اسعار منتجاته. (لحد الآن عم نحكي عن الداخل بمعزل عن الأوضاع الخارجية و التجارة الخارجية).. بالتالي تم وضع عدة قوانين لمحاولة السيطرة على الإنتاج و تخفيف الإعانات و لكنها فشلت. الحكومة الأمريكية حينها رغبت بتثبيت سعر المواد الغذائية و الزراعية الأساسية لنظرتها انه من الخطر الكبير ترك هكذا سلع مهمة و حيوية في الدولة رهن تقلب السوق و هي مصدر حياة الناس.. و بالتالي لم تعد تخضع المنتجات الزراعية للسوق الحرة و للعرض و الطلب مثل أي منتج إقتصادي آخر... أي هنا لم يعد الموضوع له علاقة بالنظام الإقتصادي بل أصبح موضوع قرارات سياسية خاطئة... هنا الخطأ في الموضوع.. اول خطأ هو الدخول في دوامة الإعانات المالية الكريمة جدا للفلاحين و الثاني هو محاولة تثبيت سعر السوق طبعا بتثبيت كمية السلع التي تدخل السوق المحلي (اعتقد ان الحركتين أقرب للشيوعية منهما للرأسمالية اذا ماني غلطان)

الان يأتي الأمر المهم المتعلق بالدول النامية

-اولا الفلاح الأمريكي لديه من التكنولوجيا ما يسمح له بإنتاج الكثير + إعانات مالية و بالتالي أصبحت الخضار و الحبوب تباع في الأسواق الأمريكية بأسعار أرخص من كلفة إنتاجها! أحيانا بنسبة عالية جدا ك 40 بالمئة. الفلاح لم يعد يهمه السعر حيث انه يحصل على إعانات مالية من الدولة كي ينتج بهذا السعر و هذه الإعانات تأتي طبعا من جيوب المواطنين... مثلا ثمن كرتونة الحليب أرخص من كلفة إنتاجها بأربعين بالمئة و لكن الفرق ندفعه بدون أن نشعر من خلال الضرائب

-ثانيا و قبل أن يتم هناك أي نوع من التبادل التجاري بين دولة نامية ما في إفريقيا و دولة أوروبية أو أمريكية.. كان الفلاحون في تلك الدولة النامية ينتجون السلع و يصدرونها إلى الخارج... طبعا بدون مساعدات من الدولة و لا من يحزنون... الزراعة هي مصدر رزق تلك الشعوب الفقيرة

الآن يوجد زيادة الإنتاج الهائلة في الدول الكبيرة. ماذا حصل؟ هل تم رمي تلك السلع في البحر؟ كلا لا أعتقد هذا كما قلت لك ... بل الذي حصل هو أمران

-إما تصدير السلع هذه بسعر أرخص من سعر السوق المحلية للدولة النامية
-أو تقديمها كمساعدات إنسانية إما للدول النامية او كبرامج غذائية للفقراء في الدول الغربية

بالحالتين أصبح هناك منافسة شديدة جدا تواجه الفلاح الإفريقي الفقير... لم يعد قادرا على تصدير بضائعه... صادرات الدولة تراجعت بشكل كبير... حصل تدمير هائل لإقتصاد تلك الدول. فعلا كارثة كما تفضلت أنت

أين هي المشكلة؟ من المسؤول؟ هل نظام السوق الحرة و العولمة هي المسؤولة؟ هل هذا ذنب الرأسمالية؟ طبعا كلا... المسؤول هو تدخل السياسة في الإقتصاد و محاولة حماية الزراعة في الدول الكبيرة... محاولة تأمين الضمان الغذائي و تقليل الواردات الزراعية من وراء البحار (يعني تحقيق ما يسمى بالأمن البيولوجي)

الدول الغربية مدركة لهذا الأمر.. و الشعوب الغربية كلها ترفض هذا الامر و الكل يسعى لوقف هذه الإعانات المالية و جعل الحبوب و المواد الغذائية تخضع لسوق حرة حقيقية

و لكن هناك مقاومة شديدة من قبل الشركات الغذائية الضخمة (لم يعد هناك "فلاح" أمريكي كما نعرف نحن مثلا الفلاح السوري.. بل كلها مؤسسات ضخمة تستفيد من مساعدات الدولة و تخرب بتصديرها الكبير اقتصاد الدول النامية)

يعني الموضوع موضوع سياسي بحت و ليس له أي علاقة بالاقتصاد او الرأسمالية.. على العكس الرأسمالية الصحيحة ضد هذه الممارسات و لا أحد بعقله السليم يمكنه تقبل هكذا أمر غير عادل و لا إنساني

الآن هناك دول كثيرة من كبار الدولة الزراعية الغنية بدأت ترفض هذه الممارسات من قبل منظمة التجارة العالمية و شكلوا جمعية اسمها Cairns Group

كندا و البرازيل و استراليا من هذه الدول

و لكن هناك معارضة شرسة من اليابان و الإتحاد الأوروبي على أساس حماية العامة في بلدهم (لم يتم ذكر أميركا كدول مقاومة و لا أدري ما هو موقفهم الحالي بالضبط)

يوجد أيضا حركة اسمها ظريف هو KICK AAS و هي اختصار ل Kick All Agricultural Subsidies

موقعهم هو
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////


هذا هو مصدر كل الكلام السابق لمن يرغب بمزيد من الاطلاع و المقال طويل و لكن مفيد جدا
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

اتمنى انه قد أصبح من الواضح بعد هذا الشرح أن سبب مشكلة الدول الفقيرة جاء بسبب محاولة الدول الغنية لدعم شعوبها .. و من ثم تقديم الغذاء للدول الفقيرة بأسعار رخيصة جدا أو مجانية مما سبب رد فعل عكسي على اقتصادهم الزراعي

:D

عفوا على طول الرد... بس ضروري الكل يقرأو و بتركيز لانها قضية عالمية مهمة جدا

جو ..يا غالي

أكتر شي مبسوط أنو عم أحكي معك ..كونك خبير جداً بلعبة مين قبل ..البيضة أو الجاجة

طيب سؤالي الك :

السياسة بتتحكم بالاقتصاد ولا الاقتصاد بيتحكم بالسياسة ...؟؟

نقطة تانية: و بدون ما أعمل ولا بحث لا ع الانترنت و لا بالكتب و المجلات ...هل اتلاف السلع الغذائية الفائضة بهدف تحقيق استقرار السعر ..وهم أم حقيقة ؟؟


يعني الموضوع موضوع سياسي بحت و ليس له أي علاقة بالاقتصاد او الرأسمالية.. على العكس الرأسمالية الصحيحة ضد هذه الممارسات و لا أحد بعقله السليم يمكنه تقبل هكذا أمر غير عادل و لا إنساني


هل بفهم من هالكلام أنو الرأسمالية الصحيحة مانا موجودة بالواقع ؟؟

الشباب اللي واقفين ع اليسار هون عم يقولو أنو الاشتراكية الصحيحة ما لقت مكان الها على الأرض بكل التجارب اللي سميت يسارية بالتاريخ

هلفقعم اسمع أنو كمان الرأسمالية الصحيحة غير موجودة؟؟؟

ممكن توضحلي ؟؟

:D

السياسة هي من يتحكم بالنظام الإقتصادي
و لكن الوضع الإقتصادي له تأثير على السياسة

لا أحب أبدا استخدام كلمة "الحقيقية" في وصف شيء كمحاولة لتغطية أمر ما (مثل مسلم حقيقي او مسيحي حقيقي او شيوعية حقيقية).. فهي لعبة فلسفية خاطئة... و لكن كأي نظرية او كاي مبدأ هناك تطبيقات صحيحة و هناك تطبيقات خاطئة.... التطبيقات الخاطئة تكون ببساطة بعدم تطبيق النظرية أساسا او تطبيقها منقوصة أو مغلوطة!

انا كل الذي أردت الوصول إليه بعد كل ذلك الكلام ان قرار تثبيت سعر بعض المواد الغذائية و حمايتها و إدخال المعونات المالية هو قرار غير نابع عن النظرية الرأسمالية و لكن نابع عن سياسيين.... هذا لا يعني ان الرأسمالية "الصحيحة" ليست موجودة على أرض الواقع... أنا لم أقل هذا أبدا.. هي موجودة و لكن ما أردت قوله في كلامي السابق أعلاه هو ان المثال الذي أعطيتنا إياه أنت ليس له علاقة بالرأسمالية...

و عن النقطة الثانية... سمعت عن هل شيء من زمان... و لكن لم اقرا و لم أجد و لا مثال حي عن الموضوع و لا أعتقد انه يمكننا ان نحكم بدون مثال و تفاصيل و لو انه لا يبدو من الحسن إتلاف الطعام لأي سبب... بما أنك انت من جلب الفكرة فهل لديك مثال معين حتى ننظر فيه؟

سلامات

:D :D

مرحبا شباب
بالنسبة للنقطة التانية فهيي موجودة بس مو ع الحليب البودرة ولا ع القمح
يعني يللي بيتم رميو بالبحر هوي الكاكاو و البن يللي بتنتجهون البرازيل
و يللي طبق هالطريقة أول مرة هيي اول حكومة برازيلية اشتراكية لحتى ما يموت الفلاح البرازيلي من الجوع
يعني متل مو شايفين اسعار الكاكاو من غير شي بالأرض، و الفكرة أنو بعد تطبيق مشاريع اصلاح زراعي بالبرازيل و جر مياه الأمازون ع مناطق زراعة الكاكاو صار في فائض ضخم من انتاج الكاكاو
و فوق هالشي عم تجيهون سنين فيها كتير مطر و مناخ ملائم للكاكاو قام ما عاد في أسواق لتصريف الانتاج (باعتبار انو الكاكاو مادة كمالية اكتر من غيرها) فهنين اضطروا يكبوا الكاكاو لأنو هيك هيك رح ينتزع اذا ضل عندون، فأحسن ما يدفعوا مصاريف تخزين صاروا يكبوا الكاكاو بالبحر
انا معك انو في كتير ناس جوعانة بس عندون بالبرازيل كمان في كتير ناس جوعانة يعني الموضوع بي الجوعانيين و مادخل النظم الاقتصادية بالقصة كلها


السياسة هي من يتحكم بالنظام الإقتصادي
و لكن الوضع الإقتصادي له تأثير على السياسة

هاد الكلام مو كتير دقيق
يعني فعلا الموضوع متل موضوع البيضة و الجاجة تبعك، بس الاقتصاديين اتفقوا ع اصطلاح انو الاقتصاد هوي القاعدة و السياسة هي القمة
يعني اتأكد انو 90% من سياسات بوش مثلا سببها اقتصادي و 10% فقط اخلاقي و اجتماعي و انتقامي و وقائي و ... الخ
و بالغرب كل ما يقولوا كلمة "لندن" بيلحقوها بـ"حيث التجارة سياسة، والسياسة تجارة"

و دمتم :D

مرحبا مان
صح معك حق و الله

الأدق أن أقول ان السياسة تتحكم بالقرارت الإقتصادية و ليس بكل النظام الإقتصادي... يعني هناك نظام اقتصادي عام للدولة و لكن أحداث السياسة اليومية و الانتخابات تؤثر على مدى تطبيق هذه القرارات

بس فعلا متل قصة الجاجة و البيضة... بس مين الطاجة قولك هون؟ :confo:

العولمة شيء جيد :frown:
الغزو الثقافي ( من الناحية السلبية للكلمة) ليس غزوا :confo: ما بحس
توازن قوى العالم غير واقعي...... فيها نوع من اليأس من الواقع
اصلاح سوريا وبناءا هدف كل مواطن سوري على ما اظن
والايام قادمة والتغير قادم
:hart: :hart: جيفارا :hart: :hart:

والايام قادمة والتغير قادم
:hart: :hart: جيفارا :hart: :hart:
:D :D :D :
:gem: :gem: :gem:

اسفة شباب عم رد ع فكرة قديمة بالوقت يلي صرتو انتو سابقيني باشواط ودخلتو بمواضيع كبيرة اكبر رجال السياسة و الاقتصاد ورجال القانون الدولي بيحكوا فيها وبالفو كتب ورغ هيك بكونو مش مقنعين انفسهم ولا مقنعين غيرهم وهون بقصد موضوع مين بيتحكم بمين الاقتصاد ولا السياسة ولا التكنولو جيا و سرعة تطورها يلي عم تخلق نمط جديد بالحياة ... المهم انو الفكرة يلي حكى عناHashtansht مش المهم شو الفكرة والعقيدة يلي بنؤمن فيها بكفي انو نكون انسانيين بمعنى الانسانية لحتى نرفض الظلم باي مكان بالعالم
جو سمعان غنية زياد الرحباني يلي بقول فيها(شو هالايام الي وصلنلا قال انو غني عم يعطي فقير كنو المصاري قشطت لحالا!!!! ع هيد نتفة وهيدا كتير!!!!

ويلعن ابو الراسمالية ع ابو الملك حسين (عجبتني هاي) :sosweet: :gem: :gem: :gem:
هييييييييييييي يلعن ابون كلن
:hart: :hart: جيفارا :hart: :hart:

مرحبا غيفارا
معك حق انوالمواضيع كبيرة بس هاد دليل اهتمامنا بالموضوع و انو نحنا مو آخدينو مسخرة
يعني بدل ما تقولي لـjoe يعطيك العافية؟ فوق ما تعب لترجم الموضوع و شرحو؟
كان ببساطة فينو يحط اللينك و يقلنا يللي بدو يفهم شو صاير يدخل

بعدين كل التجارب الاشتراكية بينت انسانية واضحة متل عين الشمس ..... و خصوصا بكوبا و كوريا الشمالية و الاتحاد السوفييتي و بولندا و بورما و الخمير الحمر
و لعلمك الدول الرأسمالية هيي اكتر الدول انسانية (حتى للحيوان) و بعدا عن الظلم (بالنسبة لمواطنيها)

اليوم يللي بدافع عن العولمة هيي الدول الفقيرة ويللي عم يقوم بمظاهرات ضد العولمة هنين مواطنين من دول رأسمالية، و الدليل المظاهرات يللي صارت بفانكوفر و سيدني و هانوفر و ....... بعد اجتماعات "منظمة التجارة العالمية"

و لعلمك الدول الرأسمالية هيي اكتر الدول انسانية (حتى للحيوان) و بعدا عن الظلم (بالنسبة لمواطنيها)

أوووووه !!! كلام خطير
الرأسمالية تعني اسمها , رأسمال , قيمتك تقدر بما تمللك , أو بما أنت قادر على الامتلاك...
العدالة الاجتماعية في المجتمعات الرأسمالية معدومة أو شبه معدومة, و أنا هنا لاأتكلم عن غنى و فقر , اتكلم عن حقوق اساسية ....
ضمان صحي مثلا
تعليم مجاني بدون استغلال ( و أقصد بدون استغلال اسلوب المنح في الولايات المتحدة)....

رأيي المتواضع أننا نظلم كوبا و بشدة....
كوبا أفضل من طبق الاشتراكية في العالم, و اتحدث عن الاشتراكية كنظام اجتماعي, اذا تركنا الحريات جانبا ( أعلم أنها جزء أساسي .... لكنني اتكلم الآن عن النظام الاجتماعي)

لو قارننا كوبا بدولها المجاورة ( هايتي, جامايكا, بورتوريكو...) و أخص بالذكر آخر دولتين لأنهما دول ذوات ارتباط بالولايات المتحدة, لوجدنا أن وضع كوبا ممتاز , بل ممتاز جدا.

كوبا ذات موارد اقتصادية ضعيفة جدا .... ومع ذلك تتمكن من العيش بكرامة نوعا ما رغم الحصار الحديدي الذي تفرضه الولايات المتحدة منذ أكثر من 40 عاما ( قانون جيمس بارلتون) ....

في كوبا قد لا يعيش الناس برخاء.... لكن لا أحد يموت من الجوع
في كوبا نظام ضمان صحي ممتاز جدا , حسب تقديرات منظمة الصحة العالمية فان نسبة الوفيات بين المواليد أقل بكثير من الولايات المتحدة, و تقترب جدا من نسب الدول الاسكندنافية !!!

في كوبا التعليم مجاني , حتى التعليم الجامعي , و بجودة عالية جدا ( حلم أي طالب طب بشري في اسبانيا هو أن يكمل اختصاصه بكوبا ...)

في كوبا رقي ثقافي رائع جدا , أدب , موسيقى , فنون .... حتى في مجال الرياضة ( قارن عدد ميداليات كوبا بأي دورة ألعاب أولمبية بدول أخرى بمثل عدد سكانها !!!

تبقى النقطة السوداء في صفحة كوبا هي مسألة الحريات العامة , لكنها بلا شك أفضل حالا من أي دولة عربية................





تحياتي

شكرا يا جيفارا على غنية زياد الرحباني... انا هلأ صابتني صحوة بالضمير و قررت انضم للحزب الشيوعي و اقتنعت انو الأيام قادمة بعد ما كنت مفكر انو الزمن رح يوقف :roll:

صديقي ياس
كلمة رأس مال لا تعني المال أبدا و صدق أو لا تصدق و لكن المال ليس جزءا من رأس المال أبدا :!:

رأس المال (Capital) هو الأجهزة و الأدوات و المصانع و الأرض.. و هناك ال human capital و هي القدرات البشرية... يعني مستوى تعليم الفرد و مدى كفائته المهنية و شطارته

و المجتمع الرأسمالي يعامل الناس لا حسب ما لديهم من نقود في البنك, فهذه معلومة لا يمكنهم ان يعرفوها بدون علم الشخص.. و لكن حسب كفائته المهنية و مدى انتاجه. من هذه الناحية يكون الإنسان الأمريكي له رأس مال بشري أكثر من الإنسان الماليزي... فالإنسان الماليزي غير قادر على العمل مع الأجهزة المتطورة لأنها تحتاج دراسة و تدريب مهني غير متوفر لديه في كثير من الأحيان

و لكن هذا لا يعني ان الإنسان الأمريكي أهم أو أثمن من الماليزي... لا يوجد هكذا معايير سوى عن الفاشية و القوميات المتطرفة... و لحسن الحظ ان أميركا كانت من قضى على هذه الفاشيات و خلص البشرية منها

الرأسمالية لا تقدر الإنسان بقدر ما يملك... بل بقدر ما هو... هل هناك اعتراض على هذه الطريقة؟؟

عدالة اجتماعية معدومة او شبه معدومة؟؟؟ ماذا حصل حتى تقول هذا؟؟

كيف يعني هل يأتي ابن مسؤول أمريكي و يضرب مواطن أمريكي بدون سبب؟ هذا اسمه نقص في العدالة الإجتماعية و هذا لا يحدث في الغرب بل فقط في الأنظمة القديمة و العربية

العدالة الإجتماعية ليس لها علاقة بالضمان الصحي!
الضمان الصحي مطلب للجميع و لكن لا يوجد شيء مجاني في النهاية... تريد ضمان صحي؟ ادفع ضريبة... او تخلى عن حرياتك السياسية ... صدقني لا يوجد شيء بالمجان ابدا... شيء مقابل شيء... انا أفضل أن أعيش بحرية

ثم كيف يعني تعليم مجاني بدون استغلال؟ هل تقوم أميركا بتشغيل طلاب المدارس العامة بالسخرة مثلا؟ الرجاء التوضيح؟؟؟ هل المنحة الدراسية استغلال ام تحفيز؟؟

أوووووه !!! كلام خطير
الرأسمالية تعني اسمها , رأسمال , قيمتك تقدر بما تمللك , أو بما أنت قادر على الامتلاك...
العدالة الاجتماعية في المجتمعات الرأسمالية معدومة أو شبه معدومة, و أنا هنا لاأتكلم عن غنى و فقر , اتكلم عن حقوق اساسية ....
ضمان صحي مثلا
تعليم مجاني بدون استغلال ( و أقصد بدون استغلال اسلوب المنح في الولايات المتحدة)....

yass الدول الرأسمالية هيي يللي عندها رأس مال كبير متل كندا و أميركا و انكلترا و فرنسا و الدول الاسكندنافية
و أكيد أكيد هي الدول هيي يللي اخترعت الضمان الاجتماعي و التعليم بهي الدول كمان مجاني و الصحة عندون مجانية (ما عدا اميركا)
و حتى بأميركا اذا صار معك مرض عضال (متل السرطان) و حتى لو ما كنت اميركي بتتعالج ع حساب الدولة
انا بشتغل بالبورصة و أهم المؤشرات الاقتصادية يللي بتأثر ع اسعار الأسهم هيي تعويضات البطالة
و بالفترة الأخيرة كان الصراع بين الاحتياكي الفدرالي الاميركي (البنك المركزي تبعون) و بين الكونغرس حول تغطية العجز الاميركي بالتعويضات الاجتماعية لأنها عبارة عن كتلة رهيبة من الاموال المدخرة الغير مستثمرة(هي الخناقة تبع الـnational security )
رح أشرحلك الموضوع شوي:
اي دولة لما يصير في عندها عجز موازنة بتدين من دول تانية لتغطية العجز (و من جملة هالدول أميركا) طبعا بفوائد (أذون خزينة)
آلان غرينسبان (رئيس الاحتياطي الفدرالي) اقترح انو بدل ما يتم تغطية العجز عن طريق الاستدانة الخارجية انو يستفيدوا من الاموال المجمدة كتأمينات اجتماعية بتغطية العجز و بالتالي الفائدة ما بتروح لبرا ......

بينما دول متل جامايكا و بورتوريكو و حتى الامارات والسعودية هي دول "نامية" وليست رأسمالية (نامية يعني يا أما بدها تصير رأسمالية يا أما اشتراكية)

الفرق بين الغني و الفقير بالدول الرأسمالية يكاد لا يلاحظ (طبعا في فرق بنمط الحياة بس مقارنة بغير دول صغير كتير)
قصدي انو كل شي فينو يعملو الغني بحياتو بالدول الرأسمالية فينو يعملو الفقير
و كذلك الأمر بين المسؤول و المواطن العادي

المشكلة أنو مع أول أزمة اقتصادية بالنظام الشيوعي انهار النظام بكل اركانو (سياسيا و اجتماعيا و اقتصاديا وعسكريا و .... )
اما النظام الرأسمالي على الرغم من تعرضو لكل الأزمات السابقة إلا انو ما زال موجود و حاليا هوي عم يعاني من أزمة خانقة بس الموضوع موضوع وقت لحتى يتعالج
بعدين الحلو بهالنظام انو انهيار الجزء الاقتصادي ما بيعني ابدا انهيار باقي الأجزاء
و انهيار الجزء السياسي قد يكون دعامة للجزء الاقتصادي او العسكري
و الشي الحلو كمان الضمانات يللي بيقدمها النظام الرأسمالي ضد الوصول لمرحلة الامبريالية
متل أزمة "بيبي بيل" تبع التلفونات و "مايكروسوفت"

:D

شكرا krimbow


:D

ثم كيف يعني تعليم مجاني بدون استغلال؟ هل تقوم أميركا بتشغيل طلاب المدارس العامة بالسخرة مثلا؟ الرجاء التوضيح؟؟؟ هل المنحة الدراسية استغلال ام تحفيز؟؟



المنحة الدراسية الجامعية في الولايات المتحدة استغلال ............. وهالكلام موجايبو من عندي , حكي زملاءي الامريكان هون .
الاقساط الجامعية بالجامعات الاميريكية عالية جداااا ........ في نظام منح للرياضيين وكذا , بس خلينا واقعيين , اذا شب من الطبقة الوسطى بأمريكا بدو يدرس طب مثلا.... القسط بأرخص جامعة لا يقل عن 25000 دولار سنويا............ اي بحياتو ما بيحلم يدرس
اللي بيصير أنو بس هالشب يخلص ثانوي يجيه ضابط عالبيت, هيك زيارة...يعرض عليه الخدمة لمدة كذا سنة, و الجيش بيدفعلو الجامعة الفلانية, فرضا 3 سنين بندفعلك الجامعة الفلانية , خمس سنين بندفعلك جامعة أحسن...................و هيك !!! هاد شو اسمو؟؟

و انت لاحظ اعمار أغلب الجنود في العراق :wink:

الفرق بين الغني و الفقير بالدول الرأسمالية يكاد لا يلاحظ (طبعا في فرق بنمط الحياة بس مقارنة بغير دول صغير كتير)
قصدي انو كل شي فينو يعملو الغني بحياتو بالدول الرأسمالية فينو يعملو الفقير
و كذلك الأمر بين المسؤول و المواطن العادي


Joe الله يخليك شو هالحكي؟؟؟


يا شيخ انا عايش بدولة رأسمالية و بعرف شو عم بحكي........... اي لو عندك مليون شهادة صعب جدا تتقدم..........اذا ما عندك "بابا" مليونير يا أما تدبر راسك بطرق أخرى ملتوية


عم بحكي كطبيعة و أسلوب و سوية حياة , اتركلي آلان غرينسبان ع طرف هلق

ع فكرة الكلام التاني ل krimbow ... :wink:
هلأ عندي مقابلة شغل مهمة دعولنا شباب... بس ارجع منكمل

يا شيخ انا عايش بدولة رأسمالية و بعرف شو عم بحكي........... اي لو عندك مليون شهادة صعب جدا تتقدم..........اذا ما عندك "بابا" مليونير يا أما تدبر راسك بطرق أخرى ملتوية

أبو مارال الموضوع أنو وين ما كان هالحكي موجود يعني مو بس بالدول يللي بتعتمد نظام السوق، و الدليل انو الهجرة بتتم من كوبا ع اميركا مو العكس
المشكلة انو حتى بالنظام الاشتراكي ما دخل الشهادات بالارتقاء لا المادي و لا الاجتماعي
نحنا بسوريا انفطمنا ع الاشتراكية مشان هيك منحبها....
بس الواقع المر انو الاشتراكية فشلت فشل ذريع (نتيجة ميل الانسان لعدم تحمل المسؤولية و طمعو الغريزي)
هلأ نظام السوق نظام وحشي و اقرب لشريعة الغاب مزبوط، و انا كمان بفضل النظرية الاشتراكية، بس لازم نفتح عيوننا ع الواقع
النظام الرأسمالي قام بكذا ثورة (تكنولوجية و اتصالات و مواصلات و بنوك و ....) و قدر يتغلب ع النظام الاشتراكي يللي بقي جامد غير قادر على مواكب تطور منافسه
طالما بيعتمد النظام الاشتراكي على المركزية ما رح يقدر يلحق النظام الرأسمالي
:D