مرحبا AHMAD :Dهلا بمشاعر ...

1- في مثل مصري يقول: ( سبع صنايع والبخت ضايع ) هل تؤمن بهذا المثل ، وما الذي

يجعل البخت ضائع أهو عدم إنتهاز الموهوب الفرصة والوقت المناسب لإبراز موهبته أم هناك

عوامل أقوى منه أضاعت هذه الموهبة؟

ما بعرف .. بس انو ماني مع أبداً كل شي ينرمى عالحظ ... بالنهاية الانسان هوي عنده عقل وامكانات وقادر يتغلب ع هالوهم اللي اسمو حظ واذا كان الف صنعة بايدو فهاد ما بيعني انو مالو حظ انما اللي عمصير الواحد ما عميعرف شو بدو او عميحصل ع شي ماهوي مناسب الو ... وهون غلطة بشرية بحتة مالها علاقة لا بحظ ولا بقدر ولا هم يحزنون ، يمكن شغلة الوقت المناسب ما لازم كتير يعتمد عليها... لازم هوي يخلق الوقت المناسب.. المكان المناسب ممكن يعتمد عليها كتير لكن مش الوقت المناسب هوي اللي رح يحدد قدرتو ... وأخيراً الانسان هوي اللي بيصنع نفسه ...

2- هل تعتقد أن تميز الإنسان بأكثر من موهبة تخدم في الأخير الموهبة الأبرز لديه؟
ماني كتير مع تعدد المواهب ... يعني اي لا مانع بس يتم التركيز بالنهاية على شيء واحد يفوت فيه
لانو هي الشغلة بالذات ضرتني كتير بكتير مجالات ( لغات برمجة + غرافيك ديزاين + رسم + نحت + تصوير + كتابة ) كل هدول خضتهن سوا .. .ولقيت حالي ما عماتطور ابداً لحتى اضطريت اتخلى عن كتير شغلات وركز ع شغلة وحدة فيهن حالياً ألا وهي التصوير ومن بعدها الرسم
3- ألديك طموح لأن تصبح مصورعالمي يرصد أحداث العالم ؟ ولو كنت كذلك هل ستصمد في

تصوير لقطة كصورة محمد الدرة ؟

لما بفوت بأي شغلة بهالحياة ، ما بكون حاطط بمخيلتي انو بدي اوصل للقمة ولذلك ما أظن انو من ضمن طموحي اني صير مصور عالمي ... لساتني بسن ال 21 سنة ، عندي عالقليل 20 سنة تانيين .. ما بعرف ازا رح استمر فيها بالتصوير وتصير كـ مهنة ووقتها يمكن اتطلع للعالمية ، أم رح تصير صفحة من صفحات الماضي متلها متل أي شي تاني مر بحياتي من مهن او هوايات او مواهب .... بحب اتركها للزمن ، لكن بفرض عشرين سنة تانيين لقيت حالي لساتني بالتصوير ، فـ الي رح قولو انو صورة محمد الدرة مقابل اللي ممكن يكون صاير بعد عشرين سنة هوي اسوأ ظروفاً بكتير من اللي كان متعرضلو محمد الدرة وما بشوف اي مشكلة باني اتجرأ لآخد صورة بأي ظرف كان ، أول ما بلشت بالتصوير اكل قتل من العالم لحتى شبعان ... معرض حياتي للخطر مرتين ... مكسورة ايدي منهن مرة وشوية رضوض .... مكسور معي 3 كاميرات تكلفتهن ضخمة جداً بالنسبة لشب عمرو بس 21 سنة ..فـ ما أظن عندي مشكلة بالتقاط اي صورة تحت اي ظرف كان .

4- هل تنظر للحب بمنظارالأبيض والأسود أم بجميع ألوان الطيف ؟

ما بعرف ، يمكن الوضع الراهن اللي عمّر فيه حالياً والعلاقة اللي عمّر فيها بتجبرني اني قول عمانظر للحب بمنظار الأبيض والأسود ... لكن لو كنت بغير وضع كانتاختلفت النظرة كلياً يمكن ، وبالنهاية الواحد حسب ظروفه اللي عميمر فيها بيقيم الأمور كونو مافي شيئ مطلق

5- ما هي أجمل كلمة تؤثر فيك وتحب أن تسمعها بعد أن تنجز عملا مبدعا ؟ وممن تحب أن

تسمعها ؟

"مو زيادة"... هي الكلمة ممكن تكون مزعجة بدايةً قد ما كان عملي جيد ... لكن هالكلمة فيما بعد بتعطيني حافز لأنتج شيء أفضل ... بكره المديح بهالموضوع هاد بالزات ... وبحسو عميكزب عليي قد ما ما كان الشي الي انتجتو عالي الجودة ... بحس انو بحاجة لهالكلمة كتير ...
بحب اسمعها اكتر شي من حدا اله علاقة بالموضوع اللي عماشتغل فيه ، مو من عالم غير اختصاصية وتجي تنقد او تمدح لانو الأمرين سواسية بالنسبة الي ورأيه ما بيشكل عندي كتير فرق

6- أي هذه الصفات تنطبق على شخصك الكريم ؟

سريع النرفزة - معطاء لأبعد حد - مجادل - تستطيع أن تمسك بزمام أكثر من أمر في وقت

واحد.
يمكن الكل ما عدا اخر وحدة لذلك رح اعطيكي ياهن بالترتيب
1 - سريع النرفزة ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
2- معطاء .. الخ
3- مجادل ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

7- هل أنت على معرفة شخصية بهذه الطفلة ؟ وما هي الكلمة التي ذكرتها لها حتى تبتسم لك

هذه الابتسامة البريئة.


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////[/quote]

اسمها جودي ، صديقتي بالحارة ، مع انه ما سبق وحكيت معها بتاتاً ، لكن دايماً بحسب حسابي وانا راجع من الشغل انو رح شوفها ، وبحسب حسابها بشي شغلة .. ما منحكي بتاتاً ، لكن نظرتها الي كل ما مر خلقت نوع من الودّ ، وصراحةً ما حكيت شي .... كنت عمناديلها مشان صورها قام هربت عالباب لجوا وسكرتو .. رجعت طلعت وكانت العدسة باتجاهها مباشرةً فـ تم الأمر :lol:

النظرة اللي تركلي ياها عنو .... جعلتني ما اكنلو الاحترام بتاتاً ... مع الاعتزار مسبقاً عن التجحيش بالوصف يعني ... بس للأسف ولسوء حظك :lol:

:D

:na3san:

:?

تنشوف قبل النوم شو عم ينحكا عنا :?
:humm:

باللااااه عليك :?

والله يا حبيبي ما بعرف من وين بتشوف انت .. وبصراحة تفاجأت بحضرتكم عم تحكموا علينا بهالشكل ..

وليش يابا ؟ مسيناك بسوء حبيبي ؟؟!

بتعرفني شي يا خيي ... ؟؟

لعلمك ما تركت نظرة لحدا عن حالي ولا بترك نظرة ... بس عكلن نظرتك خاطئة عيني فتح عينك منيح :)

ماني سائل عن واحد او تنين بيحكوا عني هيك بس في الآلاف بيحكو عكس هيك ...

مارح روح اكتب موضوع عن حضرتكم المعظّمة بالبريد وقول تشهير و ذم بدون سبب ...

بس بتمنى ما تعيد هيد أحكام على غيري مشان ما تلاقي شي ما بيعجبك ..وبتمنى يكون كلامي مفهوم :)

ومارح انزع مساي هلأ عندي شغل مهم كتير بكرا ولفوق راسي ...

تصبحو على خير !

:na3san:

:sleeping:

مرحبا ابو حميد ..
خيو ..
كم سؤال هيكي عالماشي .. لبين ما ارجعلك على استرواء

ابو حميد .. عندو عرّاب " الله فاذر يعني " ؟

ابو حميد .. لقا نوع موسيقى معيّن .. يناسبو .. ويقول خيو انو انا هادا نوعي ؟

الحب .. ؟ " هلأ كشغل منتديات .. عرفلي الحب .. وكشغل صداقة .. الحبيبي .. اكيد ما تحكيلي عنها يعني :p.. بس انو شو بتمسّلك شو بتعنيلك .. خلص عاد


ازا هيك عطوك آلة زمن كويسة ورخيصة وبنت حلال " صنع سوري" انو تعيش بسنة معيّنة .. شو رح تكون .. وليماشا ؟

شو نوع دخّانك ؟

وشو رأيك باللوكي:gem:؟

شو رأيك فيي .. ما عجبتني هي شغلة الحمصي .. بدي شغلات اكتر .. شنو بصراحة .. وقت ما بتكون مجحش وقافعة معك .. والحالة تعبانة وعايف الله وعنمدك شغل وكل هدول الشغلات .. بيكون ما اشبك بلا .. يعني بيهمني انو اعرف رأيك فيي ..

يلا لنشوف .. برجعلك برجعلك

سؤال لاشريك له

وينا مروش ماعاد بينت؟؟

يا زلمة .. زكرني باسمك القديم حميد .. يحرق عرضك ما اسئلك كنت ..

:p


ولا .. لسّاتك عاساس ناوي تعزمني عشاورما بس انزل ؟ :gem:

هاد السوال مافهمتو كتير .. رجعي صيغيلي ياه

انو الصورة اللي حاططها انت بالفيس بوك "وانت زغير ومكشّر"
لو كنت حدن تاني وشاف هالصورة شو بيكون رأيك فيا يعني شو بتقول عنّا

كمان هاد ما فهمتو كتير .. عددهن يعني ؟ :?

لاءا اسماء بدي أسماء البيبول People اللي حبيتون وفاتو ع قلبك

نراكي في الجحيم خيتو :lol:

انتم السابقون ونحن اللاحقون شيري Chérie :o

مين هاد ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ما عاد تعرفني ابن ضيعتي

يا حوينت التفاح و الكرز فيك

وشو رأيك باللوكي////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////؟

أسوء انواع الدخان

قال شو الورق صار وطني

أسوء انواع الدخان

قال شو الورق صار وطني

ريحلي جمالك ..
اللوكي اسوء انواع الدخان ؟
يا زلمي انتي بتدخن انتي .. روح انتحر

مرحبا احمد
سؤال اولي ملحاح....
انو كيف قادر تجيب روابط لكل هالافلام؟؟؟ :shock:
وبسرعة هائلة كمان ؟؟
سؤال جانبي
انت حضرت الفلم يلي نزلتو ع طلبي شي ( الوصايا .. عفوا الخطايا السبعة)؟؟؟..اذا اي شو كان شعورك والفلم كل دقيقة بيعلق:sick:)

اه وهاكزا سؤال عالسريع..

شو رأيك بالمنافقين واللي بتقلبوا ..و بكونوا معك معك عليك عليك .. صادفت هيك اشخاص بلحياة العامة وبالاخوية هون؟ وشو كان موقفك؟

وهل ممكن تعتبر النفاق مشروع وتنافق؟!

(ويعني هيك للتنويه ..ما في اي سبب شخصي لوجيكي تكتيكي مؤامراتي اللي دفعني اسألو هيك سؤال تحديدا ..يعني الحمدلله لسا ما شفنا نفاق منو الزلمة :p .. شنو لأنو بعرف حُسن الظن بالعالم فايع :lol:)





مروى ام نجمتين
ديتش ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
يعدمني ياك :o

طيب كمان سؤال :

ليش انت هيك يعني :cry:

نزولا عند رغبة ضميري و تماشيا مع مشاعري .. رح اقليك بهداوة :lol:


احمد مشوارك بأخوية بدا فني و الكتروني طبعا ... وين صفي نشاطك الفني ؟

شفنا عندك حب للفن السريالي .. هل تحبو لانك تحب التحرر من الواقع ؟


باعتبارك ما تحب المصطلحات التنظيرية ... :pos:
شلون ترتبط .. الحياة و الحرية و الفكر ... عند احمد شخصيا

لو كنت بنت ... عن جد شو اللي بحياتك اليوم رح يتغير :lol:


ما في يوم .. حسيت بالندم على عنوديتك الزايدة !


--------
احمد شو اللي يجذبك بالعود و هل تفضلو على البزق ؟

مين أكثر عازف تحسو يعزف "بالروح" ..


ليش بعض المغنين مصرّين يغنوا ام كلثوم .. و هني مو قد الاغنية و صوتهم ما يساعد ابدا؟؟
و ليش ام كلثوم بالذات ؟

اعتبر هل سؤال من السيدة مباشرة .. هو صحيح الهوى غلاب ؟ :larg:



اكيد ... يتبع

مرحبا ابو حميد .. أهلين مصيو علاء
خيو ..أشو
كم سؤال هيكي عالماشي .. لبين ما ارجعلك على استرواءاي يلا

ابو حميد .. عندو عرّاب " الله فاذر يعني " ؟اي أكيد كل شخص اله عراب ، لكن بالنسبة الي انا شخصياً عرّابي كان فكر مش شخص، وطالما مافي شخص مثالي بهالكون النبي اللي هوي نبي " أي نبي .. ما عماحكي عن نبي محدد" بالنسبة الي شخصياً لا يخلو من الأخطاء " ولاحظو هون عمقول أخطاء من الخطيئة .. مش أغلاط يعني"... فـ لذلك بعتبر أي شخص بيتخذ شخص اله كـ عراب هوي شخص فارغ وماله هدف بالحياة ليكوّن ذاتو

ابو حميد .. لقا نوع موسيقى معيّن .. يناسبو .. ويقول خيو انو انا هادا نوعي ؟حالياً عماسمع اكتر شي بيانو ... وبالنهاية الموسيقى بالنسبة الي مافيني اعتمد ع نوع محدد لكن كل فترة بيكون المود شكل وهاكزا

الحب .. ؟ " هلأ كشغل منتديات .. عرفلي الحب .. وكشغل صداقة .. الحبيبي .. اكيد ما تحكيلي عنها يعني :p.. بس انو شو بتمسّلك شو بتعنيلك .. خلص عاد الحب : حرفين استعصوا عاللغات وبيشكلو محاولة _ يفترض انها تنجح بمرحلة ما - لوصل خيط نور ملائكي بين قلبين بيستحقو هالشي.

اما عن الحبيبة ... فـ ببساطة .. " هية عسلي المرّ" :)

ازا هيك عطوك آلة زمن كويسة ورخيصة وبنت حلال " صنع سوري" انو تعيش بسنة معيّنة .. شو رح تكون .. وليماشا ؟رح اعطيها للي محتاجها... رغم كل شي .. مبسوط بزمني هاد

شو نوع دخّانك ؟لوكي

وشو رأيك باللوكي:gem:؟دخاني :p

شو رأيك فيي .. ما عجبتني هي شغلة الحمصي .. بدي شغلات اكتر .. شنو بصراحة .. وقت ما بتكون مجحش وقافعة معك .. والحالة تعبانة وعايف الله وعنمدك شغل وكل هدول الشغلات .. بيكون ما اشبك بلا .. يعني بيهمني انو اعرف رأيك فيي .. يا زلمي شو بتحب تاكل بهادل .... سمج ودبج :lol:

يلا لنشوف .. برجعلك برجعلكتف من تمك :shock:

سؤال لاشريك له

وينا مروش ماعاد بينت؟؟

ما عندي فكرة تماماً ، إنما اللي بعرفو ظروف صعبة مو اكتر :D

يا زلمة .. زكرني باسمك القديم حميد .. يحرق عرضك ما اسئلك كنت ..

:p


ولا .. لسّاتك عاساس ناوي تعزمني عشاورما بس انزل ؟ :gem:

فشرت بنص عينك ... :jakoush:
ما حدا عازم التاني غيرك ... وغير من القصور ما برضى
بس لالقطك بالأول :lol:

انو الصورة اللي حاططها انت بالفيس بوك "وانت زغير ومكشّر"
لو كنت حدن تاني وشاف هالصورة شو بيكون رأيك فيا يعني شو بتقول عنّا

عادي .. ما كان تغير شي يعني غير انو يقبر عضامكن ما أحلاه :sosweet:
في احلى من التكشير بهالزمن :lol:




لاءا اسماء بدي أسماء البيبول People اللي حبيتون وفاتو ع قلبك
شخصيات عامة ما حضر ع بالي ابداً ، بس من الناس اللي صادفتن بحياتي ، بدايةً بأبي ، أشخاص بوسط العمل او الدراسة ، هون بأخوية في 4 أشخاص كتير بحترمهم وبعتبرهم حالة مستحيلة التكرر ( ياس - الحكيم - ابو نهلة - حسان ) ، بالإضافة لأشخاص تانيين لكنهن كانو أقل تأثيراً ، وخاصة فيهن ياسين
وبس

انتم السابقون ونحن اللاحقون شيري Chérie ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
آمين :lol:

:D

ما عاد تعرفني ابن ضيعتي

يا حوينت التفاح و الكرز فيك

يفضح كبرتك هاد انت :shock:
ايمتا غيرت اسمك ؟ :?

ابن العم .. ابو وليم ... وانو شو بدنا نحكي ... خيو بكفي ابن ضيعتي .... لينسب بما فيه الكفاية :p

مرحبا احمد
سؤال اولي ملحاح....
انو كيف قادر تجيب روابط لكل هالافلام؟؟؟ :shock:
وبسرعة هائلة كمان ؟؟
سؤال جانبي
انت حضرت الفلم يلي نزلتو ع طلبي شي ( الوصايا .. عفوا الخطايا السبعة)؟؟؟..اذا اي شو كان شعورك والفلم كل دقيقة بيعلق:sick:)

هلا سونا :lol:

هلئ هوي صراحة ما كتير بجرب الأفلام وقت جيبها
بالنسبة للروابط ببحبش بالنت بطرق الخاصة :cool:
بحال ما لقيت الفلم .. اكيد بكون تورنت مانو مترجم بجيب الترجمة بدمجو وبرجع برفعو ( لكن هي حالات نادرة )
بالنسبة للتقطيش فـ العطل مو من الفلم نفسو
هوي الصيغة RMVB بتستهلك كتير من الرامات ( الذواكر ) وهوي بيشتغل عالـ Real Player فـ لذلك يُنصح لتشغيلو برنامج Media Player Classic هاد بيخفف كتير من الضغط اللي بيعملو
هاد البرنامج بتلاقيه بقسم السينما والأفلام بموضوع اسمو برامج بتسهل عليك تصفح القسم ... موجود تحت اسم K-lite Codec Pack
وهاكزا

:D

شو رأيك بالمنافقين واللي بتقلبوا ..و بكونوا معك معك عليك عليك .. صادفت هيك اشخاص بلحياة العامة وبالاخوية هون؟ وشو كان موقفك؟
المنافقين بشكل عام وجودهن مرفوض بالمجتمع برأيي الشخصي
يعني في انماط من الشخصيات بلاقيها بالمجتمع وغلط كتير .. لكن ما بقدر انفي وجودها ( مثلاً اللي بيشتغل بالدعارة .. غلط بس ما بقدر انكر وجودو ، النصاب ما بقدر كمان ، الكذاب ، الندل ، ... الخ الخ )
كل هالأنماط فيها غلط ما بتكوينها النفسي والشخصي لكن ما بقدر اقصيها من المجتمع بعكس المنافق هاد اللي بقدر اعتبر حالي انو تخليت عن كل القيم والشعارات تبع حرية الأفراد وحقهم بالحياة ، واذا انوضع شخص منافق من الأنواع اللي صادفتها ما عندي أي مشكلة بأني اقتلو لانه آفة ع هالمجتمع
بالنسبة إن صادفت فـ دائماً بتعرض لهيك أنماط بحكم شغلي انو في كتير علاقات اجتماعية واختلاط مع الأشخاص أما بالنسبة لأخوية فـ للأسف وهاد الشي اللي ما كنت اتمنى انو يصير لكنه صار ، ويمكن اقدر اتغاضى عن أي تصرف لأي شخص ولأكتر الأشخاص عدائية معهن ممكن تتصلح الامور بيناتنا الا جماعة المنافقين أو معك معك عليك عليك.
والنظرة الوحيدة اللي ممكن يتركها عندي هية الاحتقار والاستخ***** لأبعد الحدود ، وأعتبره وصمة عار اني تعرفت عليه بيوم من الأيام .. وبس


وهل ممكن تعتبر النفاق مشروع وتنافق؟!
ردي أعلاه فيه الجواب يمكن ع هالتساؤل






(ويعني هيك للتنويه ..ما في اي سبب شخصي لوجيكي تكتيكي مؤامراتي اللي دفعني اسألو هيك سؤال تحديدا ..يعني الحمدلله لسا ما شفنا نفاق منو الزلمة :p .. شنو لأنو بعرف حُسن الظن بالعالم فايع :lol:)

:lol::lol:






يعدمني ياك :o

لك ليش :p

طيب كمان سؤال :

ليش انت هيك يعني :cry:

هيك ... حيونة :frown:


لساتك طرمبة ؟ :o

نزولا عند رغبة ضميري و تماشيا مع مشاعري .. رح اقليك بهداوة :lol:

اي مبلا .. مسدئك انا :lol:


احمد مشوارك بأخوية بدا فني و الكتروني طبعا ... وين صفي نشاطك الفني ؟
بدا فني ولا زال فني ومتل ما معروف احمد كان منتمي للمدرسة التجريدية ... بينما حالياً عماشتغل ع اسكيتشات من نوع اخر لا ينتمي لأي مدرسة وما عمقول انو عماخترع مدرسة فنية جديدة لكن عمحاول استقل باسلوبي.. فـ لهيك ما عمتشوفو شي جديد

شفنا عندك حب للفن السريالي .. هل تحبو لانك تحب التحرر من الواقع ؟
التجريدي وليس السريالي ، بكل الأحوال بحب التجريدي أكتر شي لاني بقدر اسرد فيه ... انو هيك اطرش الفرشاية واسرررررررررررررررررررررر ررررررررررررررح بدون ما لاقي حدود لشخصية او ل عنصر ما يحددلي لوحتي وين لازم تبلش ووين لازم تنتهي


باعتبارك ما تحب المصطلحات التنظيرية ... :pos:
شلون ترتبط .. الحياة و الحرية و الفكر ... عند احمد شخصيا

هي خليني ارجعلها بكرا الصبح .. لانو بدها صفنة وتعبان حالياً ... وهي علمناها بالأحمر :lol:

لو كنت بنت ... عن جد شو اللي بحياتك اليوم رح يتغير :lol:

مكياجي وقصة شعري ... ويمكن قياس صدري :o


ما في يوم .. حسيت بالندم على عنوديتك الزايدة !

ابداً ... ولا رح يجي هاليوم :gem:


--------
احمد شو اللي يجذبك بالعود و هل تفضلو على البزق ؟

العود بحس صوته ازبط من البزق ... يعني كيف بدنا نشرحلك ياها
البزق ممكن اسمعو لمدة معينة لكن بعد فترة ممكن يصير يضرب عالعصب عندي .. بينما العود بالعكس
بالنهاية هي حالة نفسية مش تحليل موصيقي يعني

مين أكثر عازف تحسو يعزف "بالروح" ..

انا :angel:

نصير شمة - كمان هالفترة عماسمع لـ مالك جندلي .. رهيب هالزلمة


ليش بعض المغنين مصرّين يغنوا ام كلثوم .. و هني مو قد الاغنية و صوتهم ما يساعد ابدا؟؟

استغلال الاسم للشهرة مو اكتر

و ليش ام كلثوم بالذات ؟
لانه الأسهل على الشخص يحاول يضخم صوتو اكتر من انو ينعمو او يطلع بطبقة خاصة فيه

اعتبر هل سؤال من السيدة مباشرة .. هو صحيح الهوى غلاب ؟ :larg:

لك صحيح صحيح صحيح :sosweet:



اكيد ... يتبع

اي ماشي .. ناطرين :lol:

هيك ... حيونة :frown:


لساتك طرمبة ؟ :o

تضرب منك لعبد اي و الله :p..

خيو هاي الطرمبة تركناها من زمان ..:larg: نقلنا ع شي تاني :gem:

اها:larg:..

احمد بحكم عملك بالديزاين..
كيف بتشوف مستوى الذوق العام؟؟
وكيف بتشوف مستوى الاعلان بسوريا؟؟

احمد ابن ضيعة..
كيف انتئلت عالشام وليش؟؟ وشو هيي الصعوبات والحيطان يلي فتت فيها:pos:؟؟
وين بترتاح اكتر؟؟وين لقيت حالك اكتر؟؟

احمد والتصوير..
كمرتك نيكون ما:cry:؟؟
جبتها من الشام؟؟من وين:cry:؟؟
قلت انو كسرت تلت كميرات؟؟ العمى بسعدو تبعك:shock: ؟؟انو شلون:?؟؟
هل بتظن انو التصوير هواية جيدة بظل المجتمع الدمشقي؟وهل بتلاحظ انو بغير محلات عمل المصور اسهل ولا كلو متل بعضو؟؟

احمد وسوريا..
هلئ نحنا...لوين رايحين؟؟
المعارضة السورية..شو رأيك فيها؟؟
والمولاة كمان:lol:؟؟
يقال: انو أمل اتجوزت..انو زوجها حلم ببنامو انو عم تخونو وراحت بجريمة شرف؟؟برأيك صحي هالحكي:?؟؟
يقال ايضا:سوريا الله حمايها..شلون بتقيم شغلو للزلمي:larg:؟
كمان رأيك بالله؟؟ وشلونك مع سعدو؟؟

شو رأيك بحمص وبالحماصني:sosweet:؟؟
وشو رأيك بالوادي:gem:؟؟

احمد والميوزيك..
شو أحلى غنية لفيروز؟؟
شلونك مع لينا شماميان؟
وشلون بتشوف المطربين السورين هالايام؟

شلونك مع طاهر مامللي؟؟


To Be Counted:D<<

اها:larg:..

لاع :?

احمد بحكم عملك بالديزاين..

كيف بتشوف مستوى الذوق العام؟؟

قصدك بالنسبة لمتلقي الإعلان ؟
هون عنا .... في المُعلن ... والمستهلك ، وصاحب وسيلة الإعلان
المعلن .. تجاري بحت .. آخر همه إن كان إعلانه يُسمى إعلان أو لاء ، لأنه الموجود حالياً بالوسط هوي عبارة عن ملصقات وليس إعلانات ، الملصق عبارة عن صورة لمنتج وعبارة تجارية فقط
منجي للمستهلك .. المستهلك بيدور على شي بسيط كونو للأسف هالمستهلك عبارة عن أشخاص نمط حياتهن الي انفرض عليهن ... منعهن من النظر لـ موضوع الفن بشكل عام بنظرة موضوعية لذلك أي ملصق جديد ... بيروح اللي قبلو وهكذا ... مع تواجد الفكرة ذاتها يعني ( باستثناء انو في افكار حلوة عمتصير عنا بالاعلان لكنها نادرة الحدوث )
اما بالنسبة لـ صاحب وسيلة هالاعلان فـ :lol: ببساطة يعني ... بتتخيل لكن واحد دارس اقتصاد او حقوق او طب او هندسة كهربا ... صار معو شوية مصاري .. فتح مكتب ميديا وادفرتايزمنت ( حابب حس حالي مثقف شوي .. لهيك بدكن تتحملو هالشوية مصطلحات :p )
وكيف بتشوف مستوى الاعلان بسوريا؟؟

يمكن حكيت هالنقطة فوق ، لكن برجع بعيد انو عنا بالبلد مافي اعلان بمعنى الإعلان
وخريجي كلية الفنون - قسم الإعلان معظمهم إما بتلاقيهم بالصحف والمجلات ووكالات الاعلان بالخليج او باوروبا ، او بتلاقيهن مدفونين كل 4 او 5 سوا بمكتب منفصل ... عيارو سنتين او تلاتة وبيفرط قدام المافيات اللي بالعة البلد

احمد ابن ضيعة..

:lol:

كيف انتئلت عالشام وليش؟؟ وشو هيي الصعوبات والحيطان يلي فتت فيها:pos:؟؟

بدايةً كنا باللاذقية / 13 سنة .. واول 13 سنة بحياتي / وبعدين انتقلنا عالشام لظروف خارجة عن الارادة كانت بتتطلب تواجد دائم بالشام :)
وين بترتاح اكتر؟؟وين لقيت حالك اكتر؟؟
لادقية يا رووح :cry:

احمد والتصوير..

يلعن رب التصوير .. بآخر الفقرة منحكي ليش :lol:

كمرتك نيكون ما:cry:؟؟
ما ما

جبتها من الشام؟؟من وين:cry:؟؟

لا ما من الشام ... الكاميرات عمجيبها من السعودية

قلت انو كسرت تلت كميرات؟؟ العمى بسعدو تبعك:shock: ؟؟انو شلون:?؟؟

هون قلنا انو بدنا نحكي باخر الفقرة ليش يلعن رب التصوير فـ يا عظيظي خلال ال 48 ساعة الماضيات كسرنا الرابعة بالإضافة لـ عدسة يساوي حقها 3 اضعاف الكاميرا والكاميرا حقها شي 20 الف ... احسبها لحالك
اول كاميرا انكسرت بـ بناء كنا بالطابق التاني عالشباك فـ لقينا كشة حمام :o مطينا راسنا بدنا نجيبها :sosweet: فـ إذ منتفاجئ انو الحزام تبعها فلتان وبتنزل هال 7 متار المحروسة .. ومنلمها قطع
تاني كاميرا راحت بنفس الموقف تقريباً لكن ع اوتوستراد الديماس ووقعت من الشباك وراحت تحت دولاب سيارة
تالت كاميرا نفس موقف اول كاميرا، وبرضو كشة حمام :frown:

هل بتظن انو التصوير هواية جيدة بظل المجتمع الدمشقي؟وهل بتلاحظ انو بغير محلات عمل المصور اسهل ولا كلو متل بعضو؟؟

بالنسبة الي .. كل ما كانت ظروف التصوير أصعب ( من حيث المحيط المتواجد فيه ) ، بتحس بمتعة أكبر .. بتحس بالتحدي والأمل ... وبتحس انك عمتعمل شي وعمتتعب لتطلع شي رائع جداً ، بينما لو كان كل شي مسهّل بالبيئة الي عمتصور فيها فـ أي مصور قادر يجيب نفس النتيجة الي انت عمتجيبها
بينما بالحالة الأولى انت عمتخلق اللحظة والزمان والمكان .. لتطلع هالصورة
اي هلئ أظن بغير دمشق أسهل التصوير وبشكل عام بغير سوريا ( عماحكي عن الدول غير العربية يعني ) أسهل
بالنسبة لسوريا .. تتساوى مع كم دولة +/- شوي .... حسب المنطقة ... بالأريحية

احمد وسوريا..

هلئ نحنا...لوين رايحين؟؟
رايحين نقطع فيزا .... لنقدر نكمل حياة بهالبلد :)

المعارضة السورية..شو رأيك فيها؟؟
لما بنسئل هالسوال بحسو متل انو هيك بينطلك واحد من نص الدنية وبيسالك "شو؟" لك شو شو يا عمي .. أنو شو بدك :lol:

يعني سوال بحسو عاجز عن الاجابة عنو
هلئ النقطة هون ... اللي مقتنع فيها ... سوريا تُقسم لـ 3 أطياف من الناس
معارضون ، وموالون ، ووطنيون تحت درجة الصفر أو تحت البسطار .. أيهما أقرب
وبظن صارت الفكرة واضحة عن أي معارضة رح احكي
فـ بشكل عام ، المعارضة السورية يفترض انو تكون موجودة ب هالكمية ، لكن مو بهالنوعية ، وللأسف تصرفاتها خلت الشعب يقتنع بانه المجتمع السوري طيفين فقط .. موالاة .. ومعارضة ( واللي انشمل معهن الطيف التالت اللي حكيت عنو )
والمولاة كمان:lol:؟؟

بالنسبة ما بقدر قول في موالي عقلاني وموالي غير عقلاني، العقلانية بدايةً ما بتجي بدرجات ، انما هية درجة وحدة لا شريك لها ...
فـ الموالاة عندي هية كلها لا عقلانية ، ورؤية البعض منهم الصالح فقط ، ورؤية البعض منهم الطالح فقط ، ورؤية البعض الأخير الصالح والطالح ، ما بيشكل أي فرق طالما في عدم مصداقية بالتعامل منهم ...
لكن بالنهاية .. انا عماحكي عن التعامل سياسية ومجتمعاتياً ...
وبيضل الموالي سوري .. والمعارض سوري ... والوطني سوري ... وهالشعب عاختلاف اطيافو وعقائده .... بيضل اسمه سوري ... شاؤوا أم أبوا..

يقال: انو أمل اتجوزت..انو زوجها حلم ببنامو انو عم تخونو وراحت بجريمة شرف؟؟برأيك صحي هالحكي:?؟؟

أمل لا زالت بالأبيض ، ونقلاً عن أبو مارال فـ اللباس الأبيض بالأعراس حسب عادات في منطقة ما بهالكون يعبر عن انه العروس فيرجن ... فـ اشاعات .. والأمــــــــــل باقـــــــي :)

يقال ايضا:سوريا الله حمايها..شلون بتقيم شغلو للزلمي:larg:؟
سوريا مانها بحاجة الله ، ولا أنبياؤه ولا ملائكته لـ تكون محميّة


سوريا ... الأسد حاميها :p
اي والله ما بزل عليك بحرف ترى :lol:

كمان رأيك بالله؟؟ وشلونك مع سعدو؟؟

حالياً بحالة سلام مع الله ، سعدو من البداية ماكان عندي اختلاط زايد فيه كوني بكره الانتمائات الحزبية :p
شو رأيك بحمص وبالحماصني:sosweet:؟؟

احلى شي فيهن ... الحمصيات :p

وشو رأيك بالوادي:gem:؟؟

الوادي شغلي رائعة يعني .. فوق ما تتخيل ...
لكن حسب ما اتخيل انا ... بير عجم :p

احمد والميوزيك..

ازا بتريد .. صارت وصارت .. الموصيئار ... وشحرور الأخوية .. احمد :frown:
شو أحلى غنية لفيروز؟؟

احكيلي عن بلدي :hart:

شلونك مع لينا شماميان؟

رائعة .. لكن بنظري في افضل منها كتير عالساحة حالياً
وشلون بتشوف المطربين السورين هالايام؟

مافيني اجزم كـ كل .. يعني الي بدو عالرقيّ ، بيلاقيه ... واللي بيدور عالشوينة ( وينو ياس :p ) كمان بيلاقي وبكثرة

بس بشكل عام ... سوريا حالياً مليئة بالمواهب الشابة اللي بتضاهي العمالقة :gem:

شلونك مع طاهر مامللي؟؟

زلمة شغيل .. ومبدع .. لكن أظن الأفضل اله ولمستقبل أعماله .. يطلع من الدراما السورية ويستقل بحالو شوي


To Be Counted:D<<

ذكرتني بالكابتن ماجد :o


اي وبالنهاي

:akh:

قبل ما تروح خليني لحقك بسؤال واحد بس اولا
i am sam
ما حكينا .. بس بيفرض احترامو بالصرماية عالواحد ... زلمة اكابر كتير :D
:D هي لالك وشكرا للطفك
تانيا
اول كاميرا انكسرت بـ بناء كنا بالطابق التاني عالشباك فـ لقينا كشة حمام ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// مطينا راسنا بدنا نجيبها ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// فـ إذ منتفاجئ انو الحزام تبعها فلتان وبتنزل هال 7 متار المحروسة .. ومنلمها قطع
تاني كاميرا راحت بنفس الموقف تقريباً لكن ع اوتوستراد الديماس ووقعت من الشباك وراحت تحت دولاب سيارة
تالت كاميرا نفس موقف اول كاميرا، وبرضو كشة حمام ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
انو انت كشيش حمام ولا مصور :lol:
سؤال هادي بآخر التقلاية متل وقت بتطفي تحت الرز مشان يهدو :lol:
السؤال هو انو ليه الحمام؟؟
ياترى لانو للاسف بالشام ماعاد في طيور غيرو ولا في شي مميز بالحمام بالذات يخليك تجازف كل هاد .

اظن يا احمد انك صدمتني برأيكـ بس ببقى رأيك :D

سؤال حتى ما اخرج من الموضوع لساتك عند التحدي يللي زكرتو بيوم من الايام؟