حلقات داروين المفقودة- موضوع فشة خلق [الأرشيـــــف]

yass

21/08/2008, 12:37

الأمس صار عنا حادث طيارة رهيب هون باسبانيا.. حصيلة القتلى حتى الآن 153 قتيل و 19 جريح بعضهم حالتو خطرة...

الخبر في موقع الجزيرة نت (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

الخبر في موقع بي بي سي آرابيك (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

المهم... بصراحة الحادث خلاني شوي نوك آوت نفسيا لأنو كان في بالطيارة زميلتين لألي بالكلية كانو رايحين ع جزر الكناري (وحدة منهون أهلا هنيك.. و التانية رايحة زيارة معها).. ما انو كانو من اصدقائي الأنتيم... لكن بعرفهون منيح و لسى من كام يوم صدفت وحدة منهون بالسوبر ماركت و حكينا مطوّلا و سبينالنا كم دكتور بالجامعة على هيك قصص... مبارح دريت انو توفو تنيناتهون بالطيارة...

اليوم عم شيك عالأخبار شو في مافي جديد... فدخلت على موقع الجزيرة نت و لقيت انو حاطين خبر الطيارة المحطمة.. فدخلتو, و ع اعتبار ما رح تحكيلي شي جديد الجزيرة كون من مبارح قاطعين برامج التلفزيون و الراديو و كل شي عنا هون و مدققين عالخبر طبعا.. فرأسا رحت عالتعليقات..

لازم أذكر انو في كتير من التعليقات طبيعية بهيك حالة و عادية, من ناس عاطين للخبر حقو و حافظين رهبة الموت ... يعني ردة الفعل اللي بتصوّر إي انسان سوي نفسيا و أخلاقيا يفترض تتولد عندو عند قراءة خبر...

لفت نظري هالمسطرتين.. و مو بس لفت نظري.. انرعبت الله وكيلكون..

واحد مسمي حالو "فلسطيني وين قدي": طلع معو هالجوهرة:

هذا بداية العقاب الرباني لدول الكفر الغربيه ...الاسلام قادم

و هاد التاني اسمو "المتوكل يوسف" طلع معو:

أأمنتم من فى السماء. هذه دعوة للتمسك بقيم السماءوالرجوع الى الله سبحانه وتعالى، ورد المظالم لاهلها . نترحم على الموتى من المسلمين اذا كان منهم احد بالطائرة المنكوبة ونسال الله لهم المغفرة.

عدا عن 3 سودانيين فرحانين عالخبر لأنو هيك ما يبدو انو بس بالسودان توقع الطيارات..

هلأ شيلونا من التعصب الديني الجاهل الموجود عندهون (بقول جاهل لأنو على حد علمي.. أو هيك درسنا بكتب الديانة.. انو الرسول عزّى بجارو اليهودي.. هيك بعرف أنا) .. يهمني اشير إلى هالعقلية المفتقدة لأدنى درجات الانسانية... ما بتفرق معي انو و الله شفت عنوان الخبر و ضمن الأخبار السيئة الكتيرة ما لفت نظرك و ما دخلت... لك لأ مكلف حالك و داخل و عم تعلّق.. و يا شمتان يا أما همّك هو انو اذا في مسلمين أو لأ.. الباقي مو فارق معك...

ما بعرف.. يجوز ما ذكرت شي جديد.. و كلنا نعرف انو هالحشاكل موجودين.. لكن عن جد انصدمت من انعدام الانسانية اللي ممكن ينوصللو بسبب التعصب الأعمى و التزمت الغبي...

was616im

21/08/2008, 12:46

والله يا ياس سمعت بالخبر و خبر بزعل عن جد ...الله يرحم الجميع و يصبر اهلن

من شان هالحمير المتعصبين ... يعني شو الواحد ما كتب بيكون قليل ع همجية و تعصب و التفكير المحدود و الاعمى تبعن ....

slim6486

21/08/2008, 13:07

عدا عن 3 سودانيين فرحانين عالخبر لأنو هيك ما يبدو انو بس بالسودان توقع الطيارات..

خخخخخخخخخخخخ
اي اي بالفعل أخي ياس العالم هون صاروا يقولوا شفتوا كيف حتى طيارات اسبانيا بتوقع يا زول مش بس طياراتنا

بالنسبة للتعليقات التانية بالفعل أخي هاد تعصب اعمى و جاهل
الاسلام ابدا ما كان دين الاستهزاء و السخرية و لا حتى الشماتة باقوام و اديان اخرى
و مو معنى انو وقعت طيارة هادا عقاب رباني
معناها شو حكوا هالعالم عن تفجيرات 11 سبتمبر و ليكهم بعدهم الاميركيين عم يعيثوا فساد بهالارض
شكرا لك أخي على مشاركتنا بالاراء و اتمنى منك لا تاخد على هالحكي لأنو باين اشكرى انو تعصب

VivaSyria

21/08/2008, 13:28

ياس أول شي بدي عزيك بصديقتينك وقلك العمر إلك والله يرحمن:

منجي للموضوع:

هاد ياصاحبي وبسبب غياب المعجزات الإلهية المزعومة وغياب نصرة هالإله لفئة معينة من الأشخاص يلي معتقدين حالون شعب الله المختار وحاملين راية الحق بين البشر صارو مجبورين وكنوع من العزاء لأنفسن انو يستغلوا أي حادثة من أي نوع لإثبات هالمعتقدات هي بس للأسف عم تسخف نظرياتون أكتر ما عم تقويها...

من فترة وبعد موضوع تسونامي سمعت تعليق من أحد الأشخاص بيقلك انو شفتو الانتقام الرباني من السياح الأجانب وكيف خسف فين الأرض وطلع البحر عليون!!! (معروف انو ضحايا تسونامي بأول يوم كانو حوالي الأربعين سائح منهن 3 أمريكان و100 ألف أندونيسي "مسلم" وارتفعت الحصيلة بعدين حتى وصلت للـ 230 ألف قتيل وتدمرت قرى واتشرد الملايين)...

للأسف هيك عقليات هيه يلي عم ترجعنا لورا وهيك عليات هيه يلي عم تخلينا مضحكة بين البشر.. هدول الناس يلي ماعم يستوعبوا انو نحنا النا حق بالوجود وغيرنا الو حق بالوجود والفرق بينا وبين غيرنا هو شغلنا وعطائنا وحضارتنا وأبداً هالفرق مانو ديانتنا ولا انتمائنا...

هالعقليات هدول عار علينا وعار على الدين وعار على أوطانن وعار على الإنسانية جمعاء.

ـــــــــــــــــــــــــ ــــــــــــــــــــــ

هامش سؤال بدي اسئلك ياه من مبارح ونسيان: شو سبب التكتم الاعلامي "نوعاً ما" من السلطات الإسبانية؟

zen

21/08/2008, 14:14

أول اشي انا بأسف كتير على صار للناس كلون ولصحابك ياس
وانشالله بتكون أخر المأسي
اما بالنسبة لبقية الموضوع
فأنا برجع هالعقلية الموجود مو للدين
بل للي عم يدرسو الدين اذا فينا نقول أو تحديداً ما يسما برجل الدين
وبخص الشيوخ المسلمين
لانو بتشوف مفارقات غريبة عجيبة
وبيصير يخترعوا ويزيدو عكيفون
ومثال حي لهلشغلة
مرة كانو مجتمعين جماعة عم ياخدو درس دين
وراحو زيارة لعند واحد منون وطبعاً انا كنت موجود لانو السهر الدينية صارت عسطح بنايتنا
فكانوا عم يحكواوهيك قال بدون يغنوا اناشيد دينية
وطلع واحد غني نشيد غريب من نوعوا
فحوا هالنشيد انو راح يرحاو يفتحوا اسبانيا ويحرروها ويكسرو الصليب اللي عليها وهكذا
فشوف العقلية المتجذرة المتعصبة
انو اذا هني عم يتشربوا هالشي
فكيف بدون يفكروا
وانا من هون بنصح أي حدا عندو ولاد وهو من ذوي الفكر الديني المنفتح
انو قبل ما بخلي ولادو يتعلموا دين يعرف وين بدو يعلمون
وأكيد مو بمعاهد لأسد لتحفيظ القرآن
:D

رجل من ورق

21/08/2008, 14:24

العمر الك

هي العقلية الغريبة موجودة عند كتار من الناس
الف الحمد الله انو ماحدا معلق عالخبر بالعربية

black_iris

21/08/2008, 14:27

suryoyo

21/08/2008, 14:35

على قاعدة ما خفي كان أعظم ...

أكيد اذا فتحنا الخبر بعد يومين .. رح نشوف نماذخ جديدة و اروع من هذي !

الله يرحم اصدقائك و كل اللي بالطيارة .. و لا نامت أعين الجبناء ... اللي فرحوا بموت الناس !

عدا عن 3 سودانيين فرحانين عالخبر لأنو هيك ما يبدو انو بس بالسودان توقع الطيارات..

السودانيين اكثر العرب اللي يتصلوا على BBC بفقرة شارك برأيك بنشرة أخبار الصباح ..

و كثير من تعليقات (بعضهم) ... على هذه شاكلة اعادة قراءة الخبر !

yass

21/08/2008, 14:37

لفتني العنوان كتير .. بس انو فعلا معك حق
هدول ناس افكارهم بزاتها صعب عليهم بفهموها
هلأ مثلا لو واحد من هدول الاشخاص يلي علقو بهيك عبارات .. شافو صور من الحادث
بشكل لا إرادي رح يتأثرو .. هيك الطبيعه الانسانيه
بس بشكل عام نحنا كعرب تشربنا فكرة انو مظلموين ..و كل مخاليق الله بدهم يضرونا
فأي شي بصير لحدا (غير عربي ) هو بالضروره عقاب اللهي
هاد الفكر مسيطر لدرجة انو طغى على انسانيتنا
هو فكر غبي جدا .. بس للاسف مسيطر
التعليقات من هالنوع مو غريبه .. سمعناها كتير وقت احدات 11 سبتمبر
مع اني بأكدلك في كتير من اصحاب هالتعليقات دمعو عيونهم وقت شافو ناس بيرمو حالهم من الشبابيك

الله يكون بعون كل من فقد انسان ويعطيه الصبر

للأسف ما بعتقد حتى انو منظر الصور ممكن يأثر فيهون.. هدول ناس عمى قلوبهون الحقد الأسود.. يعني هنن بذاتهون اللي معبين النت صور و مقاطع الاعدامات و الذبح بالعراق.. و فخورين فيهون و عاملين انتاج و ألوان و ولوغوهات و تعبانين على تقدمة هالمادة بشكل جيد -بمنظورهم- .

لما صارت أحداث مدريد ... في أفراد من الجالية المغربية هللو للي صار.. و عنا بالجامع هون بسانتياغو وصلت للضرب بقلب الجامع لأنو الفئة العاقلة من الجالية العربية و المسلمة ما قدرو يشوفو كيف هالسفلة هدول عم يحتفلو بمقتل أبرياء (أغلب اللي ماتو بهالأحداث عمال بسطاء و طلاب جامعة و مهاجرين .. و منهم مغاربة كمان) و يسكتو عليهم.. لأنو قديه ما كنت حانق و معبّي عالحكومة الاسبانية بهديك الأيام.. فما في شي يبرر قتل الأبرياء... و الشعب كان معبي عالحكومة أكتر من أي حدا .. و الدليل انو أسقطو هالحكومة بالانتخابات .. لكن بدك ناس تفهم... مو الهمج هدول

yass

21/08/2008, 14:39

أكيد اذا فتحنا الخبر بعد يومين .. رح نشوف نماذخ جديدة و اروع من هذي !

ابن العم .. مستغني عن فتح الخبر بعد يومين.. لأنو متوقع شو رح يكون.. هاي خبر ما صرلو كم ساعة و صار فيه هيك نماذج...

لحسن الحظ تجد من العقلاء من يزجرهم و يوبخهم... لكن الواقع هو انو وجود ناس بهيك عقلية شي يدعو لمزيج من الشفقة و الخوف...

شكرا للجميع على مشاعرهم الطيبة و الله لا يصيبنا بقريب أو عزيز أبد

رجل من ورق

21/08/2008, 14:41

في أفراد من الجالية المغربية هللو للي صار

وهني باسبانيا؟.
لعما شو هالمسخرة؟

yass

21/08/2008, 14:42

وهني باسبانيا؟.
لعما شو هالمسخرة؟

هيك نماذج تلاقيها بين الجاليات لسى ع أكتر ما تلاقيها ببلد المنشأ... ع مبدأ قاعد بحضننا و عم تنتف بدقننا

HashtNasht

21/08/2008, 14:46

الباحثة عن الحرية

21/08/2008, 14:49

اول شي الله يرحمهن
اسا للموضوع
لكان شفلي هالردود هي معك
الله يرحم المسلمين منهم فقط !!!
مستاهلين لكان شو متوقعين بس يحكمو بالناس ويكفرو ؟؟ هاي الله عاقبهن
هي عقاب من الله للكافرين وجهنم بانتظارهم
بطلت اعرف شو بدي قول بطل في احساس يعني ولو شو ما كان ما بيتاثرو بهيك بخبر ؟؟ ولا بحسو ؟؟
لك هذا غير الحلوين تبعون جماعة العقاب الجاي انشالله لامريكا :shock:
ما بدي قول شي احسن ما انزل مسبات اسا :jakoush:

yass

21/08/2008, 14:51

لاء شريك عادي ..ما هي الشماتة من شيم البشر بالاخر ...الحيوانات ( غالبيتا يعني ) ما بتشمت ...هو هيك ...يعني في حقد ...من الطرفين ...

وقت ساركوزي بيركض متل الارنب ع افغانستان لانو عشرة (10) جنود فرنسيين ماتو ببلد هو ما بلدن ...مع العلم انو ما حدا تحرك منوب وقت كان يموت مئات المدنين المعترين المشحرين المبهدلين الفايتين بالحيط بالقصف الجوي الاجدب لحلف شمال اخت الاطلسي !!!!!!

طيب انو هاي ما متل هاي ؟؟؟

قصدي انو هو نفس الموقف ...الله وكيلك ..بس لابس غير تياب !!!

عدم المؤاخذة يعني غالبية الايديولوجيات مبينة ع العصبية ...و العصبية لجماعتك ..بتعطيك احساس بانو بدك ياهن يموتو كلن ....اللي مانن من جماعتك يعني...و انو يلعن ابوهن ولاد كلب ..يخربيتن شو بقرفوا !!!

بقى عادي ...لا تدقق ...الشعو متبادل بين الطرفين ...و انا على قناعة بانو الجوز اضرب من بعض ....مع احترامي للجميع يعني

على حد علمي الشعب مانو بقيادة الناتو لحتى يتحمل مسؤولية أفعال الناتو... و الموقف من حروب أفغانستان و العراق واضح جدا من قبل الشعوب الأوربية و الاسباني خصوصا... لذلك ما بعتقد مساواتك للأفعال تنفع... لأنو لو الأوربيين يستعملو نفس العقلية كان ما ظل ولا عربي بأوربا بعد كل الأعمال الارهابية اللي صارت.. و ما حدا حمّل الجاليات العربية المسؤولية و لا حدا قام بأي اجراء انتقامي ضدها متل ما كان رح يصير لو الشغلة معكوسة..

بعدين الشغلة مانها شغلة ايديولوجيات... الشغلة شغلة شعور انساني.. و سبق و حكيت انو عدم الاكتراث شي.. و الشماتة شي تاني.. و ع اعتبار جبت سيرة افغانستان.. قارن كم منظمة اهلية اوربية عم تشتغل بافغانستان و عم تبني و تداوي و تساعد بأفغانستان.. و كم منظمة اهلية عربية في... لكن ما تشوف العربان الا و هنن عم ينبحو باسم افغانستان...

و ولو شمتانين بشي كم جندي اسباني ميتين بأفغانستان.. كان ما حكيت... لكن شمتانين بحادث طيارة لناس أبرياء مالهون علاقة برب الموضوع كلو ع بعضو يعني...

HashtNasht

21/08/2008, 15:18

على حد علمي الشعب مانو بقيادة الناتو لحتى يتحمل مسؤولية أفعال الناتو... و الموقف من حروب أفغانستان و العراق واضح جدا من قبل الشعوب الأوربية و الاسباني خصوصا... لذلك ما بعتقد مساواتك للأفعال تنفع... لأنو لو الأوربيين يستعملو نفس العقلية كان ما ظل ولا عربي بأوربا بعد كل الأعمال الارهابية اللي صارت.. و ما حدا حمّل الجاليات العربية المسؤولية و لا حدا قام بأي اجراء انتقامي ضدها متل ما كان رح يصير لو الشغلة معكوسة..

بعدين الشغلة مانها شغلة ايديولوجيات... الشغلة شغلة شعور انساني.. و سبق و حكيت انو عدم الاكتراث شي.. و الشماتة شي تاني.. و ع اعتبار جبت سيرة افغانستان.. قارن كم منظمة اهلية اوربية عم تشتغل بافغانستان و عم تبني و تداوي و تساعد بأفغانستان.. و كم منظمة اهلية عربية في... لكن ما تشوف العربان الا و هنن عم ينبحو باسم افغانستان...

و ولو شمتانين بشي كم جندي اسباني ميتين بأفغانستان.. كان ما حكيت... لكن شمتانين بحادث طيارة لناس أبرياء مالهون علاقة برب الموضوع كلو ع بعضو يعني...

شريك انا شخصيا معك تماما ...بس ع اساس في ديمقراطية ...يعني مثلا تركيا ..اللي هي تركيا يعني البرلمان التركي ما سمح للولايات المتسخة الاميريكة انو تضرب العراق من اراضيها !!! ...ليش لانو الشعب التركي ممثلا بالنواب قالو لاء...مع انو الحكومة مثلا ممكن يكون بدها توافق

هلأ الشعب البريطاني ممثلا بممثليه ايد الحرب على العراق ..و كذلك الاسباني !!!

هلأ ما تجي لعند المثقفين و تحكيلن ...هدول مثقفين يا اخي ..بس شوفلي الشعب المعتر ...يعني انو هلأ انو هالعراقي اللي قاعد تحت القصف ...مضطر يفكر بالفرق بين المواطن الاسباني و حكومتو !!! ...ليش هو قدران يفكر اصلاً !!!

من جهة تانية ...ما انو اذا طلعت مظاهرة بمدريد و وحدة بباريس ضد الحرب معناتا انو الشعب الاسباني واعي و فهمان واخد قرار...يا زلمي بيطلعوا مظاهرات مشان منع استخدام جلود الحيوانات يمكن اكتر من المظاهرات اللي ضد الحرب .

انو ب 11 ايلول ...فكرك يعني قديش نسبة اللي كانو مبسوطين , برأيك ..سكان هيروشيما هيك بينن و بين حالن..ما انبسطوا ؟؟؟ ..انا واثق انو كانت قلوبن عم تدق من الفرح ...مع انو اللي كانو واقعين برجين تجاريين , ما بارجتين حربيات يعني .

يا اخي في ناس ما بطيقوا الغرب بشكل عام ..و عندن اسبابن ..و ما قادرين يعملوا شي مع الغرب غير بالشماتة ...و بيتمنوا انو يشوفو الغربيين عم يموتو واحد واحد...اذا بصير حادث سيارة بينبسطوا ...مقهورين ...ترى معبايين قهر ...
من يومين كان طالع عالجزيرة بالاتجاه المعاكسالناطق الرسمي باسم الحكومة البريطانية مع دكتور ما بعرفو ..و شفت اخر خمس دقايق من الحلقة ...هاد البريطاني كان عم يقول انو نحنا بدنا الديمقراطية للعراق ...الدكتور قلو مين انتو ؟؟؟

يا اخي مين هني ؟؟ ....شو بدن بافغانستان و العراق و لبنان و سوريا و جورجيا ...يحلوا عن طيزنا يا زلمي و نحنا منعرف نعيش .

انو يعني الدول اللي ما بعد قومية باوروبا بتحب الخير للشعوب التانية ؟. ..اكيد لاء

انو هالدول الاستعمارية هلأ صارت دول موزعة للديمقراطية والحرية ؟؟ .....اي اكيد اكيد لاء

انو هالشعب الجحش اللي بعلق ع الانترنت و بيحكي بطريقة فظيعة ...هو هيك منو لحالو صار جحش و صار بيكره الغرب ؟؟؟.....اي كمان لاء ..يا اخي الغرب ما عطانا مجال نحبو منوب يعني ..و الناس اللي عم يعبروا عن هالحكي بتعليقات فطرية بمثلو ما يطفو على السطح بس..و بالعمق لسى في اكتر من هيك

تحياتي الغربية :D

yass

21/08/2008, 15:43

شريك انا شخصيا معك تماما ...بس ع اساس في ديمقراطية ...يعني مثلا تركيا ..اللي هي تركيا يعني البرلمان التركي ما سمح للولايات المتسخة الاميريكة انو تضرب العراق من اراضيها !!! ...ليش لانو الشعب التركي ممثلا بالنواب قالو لاء...مع انو الحكومة مثلا ممكن يكون بدها توافق

هلأ الشعب البريطاني ممثلا بممثليه ايد الحرب على العراق ..و كذلك الاسباني !!!

هلأ ما تجي لعند المثقفين و تحكيلن ...هدول مثقفين يا اخي ..بس شوفلي الشعب المعتر ...يعني انو هلأ انو هالعراقي اللي قاعد تحت القصف ...مضطر يفكر بالفرق بين المواطن الاسباني و حكومتو !!! ...ليش هو قدران يفكر اصلاً !!!

من جهة تانية ...ما انو اذا طلعت مظاهرة بمدريد و وحدة بباريس ضد الحرب معناتا انو الشعب الاسباني واعي و فهمان واخد قرار...يا زلمي بيطلعوا مظاهرات مشان منع استخدام جلود الحيوانات يمكن اكتر من المظاهرات اللي ضد الحرب .في عندك التاريخ يحكيلك...

الجيش الاسباني فات بافغانستان بقرار من الأمم المتحدة ( و قرار وافقو عليه بالاجماع و من ضمن الموافقين كانت سوريا.. اللي بهديك الفترة كانت عضو مؤقت بمجلس الأمن) و ما شارك بعمليات قتالية أبدا

الحكومة الاسبانيا دعمت حرب العراق لكن ما قدرت تدعم غير معنويا كون ارسال الجيش لعمليات قتالية يتطلب اعلان حالة الحرب.. و اعلان حالة الحرب بدها ثلثين البرلمان و ما كان عندون ثلثين البرلمان..

استطلاعات الرأي الحكومية (مو شغل جرايد) أثبتت انو 94% كان ضد حرب العراق.. و بالأعمال ضد الحرب انشل البلد مو بس كام مظاهرة متل ما عم تقول

الحكومة الاسبانية سقطت بأول انتخابات بعد حرب العراق رغم تحقيقها معجزات اقتصادية ما صارت بحياتها.. و السبب الوحيد و الأوحد... حرب العراق (رغم انو أول من دعم الحرب هنن عرب... و القوات دخلت من دول عربية... و بموافقة حكومات عربية)

لليوم... لليوم ها... ازنار بالمحاكم بسبب حرب العراق... و قرار المحكمة تبع أحداث مدريد طعنوه الضحايا لأنو بدهون انو بقرار المحكمة يطلع انو حرب العراق كانت سبب غير مباشر للتفجيرات.. بس مشان تكون وصمة عار بتاريخ حزب الشعب (لو هالضحايا فيهون نزعة انتقامية كان بالعكس.. دعمو حزب الشعب مشان يرجع و يعمل حرب تانية و ينتقملهون).

انو ب 11 ايلول ...فكرك يعني قديش نسبة اللي كانو مبسوطين , برأيك ..سكان هيروشيما هيك بينن و بين حالن..ما انبسطوا ؟؟؟ ..انا واثق انو كانت قلوبن عم تدق من الفرح ...مع انو اللي كانو واقعين برجين تجاريين , ما بارجتين حربيات يعني .ما بعتقد حدا عندو شوية أخلاق انسانية ممكن يفرح لموت شخص برئ.. مهما كانت جنسية الشخص لتكون

يا اخي في ناس ما بطيقوا الغرب بشكل عام ..و عندن اسبابن ..و ما قادرين يعملوا شي مع الغرب غير بالشماتة ...و بيتمنوا انو يشوفو الغربيين عم يموتو واحد واحد...اذا بصير حادث سيارة بينبسطوا ...مقهورين ...ترى معبايين قهر ...
____________________

انو هالشعب الجحش اللي بعلق ع الانترنت و بيحكي بطريقة فظيعة ...هو هيك منو لحالو صار جحش و صار بيكره الغرب ؟؟؟.....اي كمان لاء ..يا اخي الغرب ما عطانا مجال نحبو منوب يعني ..و الناس اللي عم يعبروا عن هالحكي بتعليقات فطرية بمثلو ما يطفو على السطح بس..و بالعمق لسى في اكتر من هيك

هاد نتيجة الديماغوجيا تبع السياسيين العرب و رجال الدين.. اللي ما بيعرفو غير يعلقو فشلهون على شماعة الغرب...

مورد أساسي لأغلب الدول الاسلامية هي مساعدات الغرب.. و مهاجرين الدول العربية عايشين بالغرب عيشة بحياتهون ما حلموها ببلادهون... لك يا زلمة هون وزارة الداخلية الاسبانية بتتوسط عند السفارة السورية مشان تمشّي أمور المهاجرين السوريين و ليس العكس..

في ناس هون بدل ما تاخد اجازات تروح تتطوع شهر بالصليب الاحمر مشان يساعدو هالمهاجرين غير الشرعيين المساكين وقت يوصلو عالسواحل الاسبانية.. شو ألله جابرو لهاد؟؟

بالزمانات joe حط موضوع نقلو من منتدى سوري عن شخص كان يطالب بهدم كنائس سوريا كلها.. تتذكرو للموضوع؟ هاد الشخص محمل حقد و كراهية.. طيب هاد كمان عندو أسبابو؟؟ سببو الوحيد هو انو حشولو راسو جماعة مجرمين...

الصيفية الماضية طلع وزير الكهربا و قال انو قطع الكهربا بسبب الضغوطات الامبريالية... مثلا يعني.. و كأنو سد الفرات مبني بنيويورك و للا المحطات الحرارية مانها بحلب انما بتكساس لحتى قاطعينها عنا... كلو عالغرب.. نحنا ملائكة و مافي منا بس الزلمة أخو *****

من يومين كان طالع عالجزيرة بالاتجاه المعاكسالناطق الرسمي باسم الحكومة البريطانية مع دكتور ما بعرفو ..و شفت اخر خمس دقايق من الحلقة ...هاد البريطاني كان عم يقول انو نحنا بدنا الديمقراطية للعراق ...الدكتور قلو مين انتو ؟؟؟

يا اخي مين هني ؟؟ ....شو بدن بافغانستان و العراق و لبنان و سوريا و جورجيا ...يحلوا عن طيزنا يا زلمي و نحنا منعرف نعيش .

انو يعني الدول اللي ما بعد قومية باوروبا بتحب الخير للشعوب التانية ؟. ..اكيد لاء

انو هالدول الاستعمارية هلأ صارت دول موزعة للديمقراطية والحرية ؟؟ .....اي اكيد اكيد لاء
يا أخي هلأ شو دخل هاي بهاي؟

هاد موقف سياسي ناجم عن تناغم مصالح, و الشعوب غالبا يكون يا غافلة يا أما مغفلة...

كيف بدك مثلا شعب أميركا يكون حاقد ع حكومتو عاللي عم تعملو بالشرق الأوسط.. لما أوثق حلفاء أميركا هنن حكام هالمنطقة؟ و مع ذلك.. و مع ذلك.. هاد أمر تاني مالو علاقة فيه...

يعني كمان هاي شماعة تانية... بيتناسو مثلا انو باسبانيا و بلجيكا و النرويج و السويد في مذكرة توقيف بحق 47 ضابط اسرائيلي لجرائم ضد الانسانية.. يعني هالضباط هدول مافيهون يدخلو أوربا (و لسى من فترة ببريطانيا واحد من الضباط كان بدو يروح ع بريطانيا و وصل ع بريطانيا و ما استرجى ينزل من الطيارة تبعيت شركة العال.. و رجع بنفس الطيارة لأنو كان رح يتوقف لو نازل..

هدول المطلوبين بأوربا.. لجرائم ضد الفلسطينيين... تلاقيهون يروحو يتغدو و يتعشو و حبايب و تبويس و حبحبة مع مسؤولين فلسطينيين... أو تلاقيهون هلأ عم يصيفو بشرم الشيخ يا عم يتفسحو بالأردن يا بالمغرب... كيف بدك تشرح للأوربي اللي يشوف هالأمور انو نحنا مظلومين؟؟ ما رح يقول انو طلعو من راسي ماني مجبور فيكون؟

اسبانيا تبادلت سفراء مع اسرائيل بالـ 86.. يعني بعد مصر و بعد الأردن... المجانين تبعون مصر و الأردن ينزلو سبسبة بالغرب و عمالة الغرب... لكن و لا واحد يسترجي يفتح تمو مع مبارك أو الملك عبد الله...

كل المساعدات اللي عم تفوت على غزة على قلتها جاية من أوربا, البنية التحتية البسيطة الموجودة بالأراضي الفلسطينية بتمويل أوربي.. و تلاقي العربان يلومو الغرب على تقصيره بدعم الفلسطينيين لما أي واحد من "طويلين العمر" بحق تعريصة وحدة بكرخانات الريفييرا الفرنسية فينو يطعمي كل أهل غزة كباب و مشاوي لمدة اسبوع و ما تروح عليه ربع خرجية اليوم (لو الأوربي حاقد.. هو يشوف كيف الخليج عايش و كيف مليارديرية العرب.. كان تسائل انو ليش جزء من ضرايبو عم يروح للفلسطينيين؟؟ انو هو مجبور فيهون شي؟ ليش ما بيساعدوهون ولاد بلدهون؟ .. و مع ذلك مافي صوت واحد ضد المال اللي عم يروح للفلسطينيين رغم قلته -النسبية- .. لكن يظل اكثر من مجهود طويلين العمر لدعم الشعب الفلسطيني..

أبو نهلة نحنا عنا حقد بداخلنا فينا نصدرو مع البترول... لما عرفات دعم صدام بحرب الكويت الخليج طرد أغلبية الفلسطينيين شر طردة.. انو هالمساكين شو ذنبون ازا عرفات دعم صدام؟؟؟ تخيل بئا لو اسبانيا تطرد المغاربة بعد تفجيرات مدريد؟

مشكلتنا انو نعتبر كل الكون مسؤول عن مشاكلنا الا نحنا... نحنا مساكين.. و بدنا الكل يتضامن معنا و الكل يحارب عنا لما نحنا مالنا مروة نحرّك اصبع ..

بنتساعد و يتم التضامن معنا بشكل لا نستحقه... أميركا بنت كلب.. .طيب كم اميركي مات بغزة و هو عم يعمل حالو درع بشري؟؟ يا ترى بيبيّن بعيننا؟؟ لا و الله ما بيبيين..

برجع بقول... الحقد ناجم عن اعتبار الغرب شماعة لتعليق فشلنا من قبل الثنائي السام ببلدنا.. الحكومات و رجال الدين...

أنا واثق انو أي واحد من السافلين هدول بيشوف خبر عن فلسطين و ولا يفتحو و لا يقرب صوبو و ولا يهمو.. و يتهمو الغرب بالعمالة لاسرائيل لما هنن.. الوهابيين و المتشددين هنن أول من سب و لعن حزب الله بحرب تموز... هيك و للا مو هيك؟

و بالنهاية أنا قاصد أولا و أخيرا الموقف الانساني.. الألم لعذاب و وموت انسان.. مهما كان الانسان ليكون.. و بعتقد هالأمر ما لازمو تبريرات سياسية أو فكرية ... انما هو أمر بديهي.. مبدئي و غريزي.. أو على الأقل هيك بفكرو انا

و شكرا

*Marwa*

21/08/2008, 16:10

الله يرحمهن..بالفعل الخبر أثر فيي ..انو الشعب الاسباني ما بستاهل (ما تفهموا حكيي انو باقي الشعوب بتستاهل لأ طبعا ولا اي شعب بستاهل يصير فيه هيك بس الشعب الاسباني من الشعوب الغربية اللي احسن من غيرو بكتير)

بالنسـبة لشغلة التعليقات..فمـا بعرق شو بدي احكي اكتر من اللي انحكـى..

انو بس بدي اقول صحيح ازا قلنا انو هالتعصب وهالهمجية بالتعليقات نابعة من اشيا صارت قبل ..لكن ولـو.. هاد ابدا لا يبرر هيك كلام عنصري وهيك تخلي بشع عن الانسانية!
والمشكلة نابعة اكـيد من التربية والتنشئة اللي عم ياخدهـا المجتمع عن طريق رجال الدين الغلط..والاعلام الغلط..

كـمان مرة الله يرحمهن..والله يبعـد هيك مصـاب مكـروه عن كـل انســان .

المحارب العتيق

21/08/2008, 16:25

للأسف فقدو البوصلة بكلامهم بين الصح والخطأ

إن كانوا يبنون كلامهم على مبدأ الرد على مايجري في العراق وفلسطين . فالمقاربة مغلوطة

القتلى مدنيون ماتوا في كارثة إنسانية

وليسوا مقاتلين سقطوا في أرض معركة خارج بلدهم

السلام لضحايا الطائرة والصبر لأهاليهم

MaTyA

21/08/2008, 16:27

لكن عن جد انصدمت من انعدام الانسانية اللي ممكن ينوصللو بسبب التعصب الأعمى و التزمت الغبي...

ما تستغرب .. في ناس بتقلك ادا حدا مرض مرض خبيث بعيد عنّا وعنكن يعني
انو قال هيدا مرض كـ عقوبة .. لانو هو هيك وهيك (بيبلشوا يسبّوا )
هالحكي صار من قـِـبل بعض الناس يللي اتصلوا على احدى المحطات

بقا ما تستغرب من هيك شي..

الله يرحمهن .. وما في دين من الاديان .. بيجيز هالتعصّب

رجل من ورق

21/08/2008, 20:13

ما تستغرب .. في ناس بتقلك ادا حدا مرض مرض خبيث بعيد عنّا وعنكن يعني
انو قال هيدا مرض كـ عقوبة .. لانو هو هيك وهيك (بيبلشوا يسبّوا )
هالحكي صار من قـِـبل بعض الناس يللي اتصلوا على احدى المحطات

بقا ما تستغرب من هيك شي..

الله يرحمهن .. وما في دين من الاديان .. بيجيز هالتعصّب

مثلا اليوم بدير الزور الطقس عجاج _ عواصف رملية الله لا يورجيها لحدا - طلعوا الناس بنغمة قال والله هي عقاب الهي على المهرجانات اللي عم نعملها وانو هالعواصف هي رسالة من الرب لنرجع للدين

طيب شباب بدي اسال سؤال
هلق لما بتصير عملية سموها فدائية او انتحارية او اللي بدكون مش بحق الجيش انما بحق مدنيين مثل اللي بالمللاهي او بموقف الباصات او الخ ........................ وعم بحكي قصدا اسرائيل
موعم نهلل ونطير من الفرحة - عم بحكي بالشعب -
طب هدول شو خصهون بالجيش ؟

zen

21/08/2008, 20:32

انا بشوووف انو القصة بتبلش من التربية وكيف الأهل بيعلموا ولادهون
وكمان متل ما قلت رجال الدين بحملوا وزر هالقصة أكتر من غيرون
لهيك لازم تنتبه الدولة على هالقصة
موشاطرين إلا بال......

عفكرة
هل تعلموا
أنو
دير الزور = عمان = إيطاليا = فرنسا= اليونان = إسبانيا
و و و و و و و و و
دير الزور تختصر العالم
:o

رجل من ورق

21/08/2008, 20:41

HashtNasht

21/08/2008, 22:16

عمي ياس ...انا ماني مختلف معك قد ماني عم حاول ضوي شوي على ( الاسباب) اللي وصلتنا لهون ...و انا كتير بحب اخد بالاسباب ...بالفعل اللي سبق رد الفعل

في عندك التاريخ يحكيلك...

الجيش الاسباني فات بافغانستان بقرار من الأمم المتحدة ( و قرار وافقو عليه بالاجماع و من ضمن الموافقين كانت سوريا.. اللي بهديك الفترة كانت عضو مؤقت بمجلس الأمن) و ما شارك بعمليات قتالية أبدا

الحكومة الاسبانيا دعمت حرب العراق لكن ما قدرت تدعم غير معنويا كون ارسال الجيش لعمليات قتالية يتطلب اعلان حالة الحرب.. و اعلان حالة الحرب بدها ثلثين البرلمان و ما كان عندون ثلثين البرلمان..

استطلاعات الرأي الحكومية (مو شغل جرايد) أثبتت انو 94% كان ضد حرب العراق.. و بالأعمال ضد الحرب انشل البلد مو بس كام مظاهرة متل ما عم تقول

الحكومة الاسبانية سقطت بأول انتخابات بعد حرب العراق رغم تحقيقها معجزات اقتصادية ما صارت بحياتها.. و السبب الوحيد و الأوحد... حرب العراق (رغم انو أول من دعم الحرب هنن عرب... و القوات دخلت من دول عربية... و بموافقة حكومات عربية)

لليوم... لليوم ها... ازنار بالمحاكم بسبب حرب العراق... و قرار المحكمة تبع أحداث مدريد طعنوه الضحايا لأنو بدهون انو بقرار المحكمة يطلع انو حرب العراق كانت سبب غير مباشر للتفجيرات.. بس مشان تكون وصمة عار بتاريخ حزب الشعب (لو هالضحايا فيهون نزعة انتقامية كان بالعكس.. دعمو حزب الشعب مشان يرجع و يعمل حرب تانية و ينتقملهون).

هلأ انا ماني عايش باسبانيا ولا شفت بعيني لافتات بتقول
1898

Sin barcos pero con honor

2004

Con barcos pero sin honor

بس انا بعرف تماما انو ازنار رئيس الوزراء الاسباني السابق كان الركيزة التالتة بقمة الازوريس اللي تحدت العالم و مجلس الامن و الامم المتحدة و شكلو التحالف المستعد ...هلأ مستعد لشو ما بعرف ..بس كانو على ما يبدو مستعدين .و اللي كانو هني امريكا ام الارهاب , بريطانيا كلب امريكا ام الارهاب , و اسبانيا !!!!! ....و اذا كان التاريخ بدو يحكيلي شي ..فانا متأكد انو لازم يحكيلي ع جزر الازوريس و الحلفاء المستعدين !!!

ايضا و بعض ما زحط ازنار ..و اجا هادا اللي اسمو صعب ..ثاباتيرو يمكن...اكتر من مرة صرح انو الحرب على العراق هي ( خطأ سياسي ) و انو الحرب على العرق غير اخلاقية و غير قانونية ... و هاد الشي كان عم يحكي بصدد انو هو اخرج اسبانيا من المسار غير الاخلاقي و غير القانوني اللي كانت ماشي فيه ..و انو و بانتخابو رئيس وزراء صار ممكن يتصلح خطأ سياسي ما !!

طيب معناتا يا اخي في شي غلط كان.... ما معقولة انو طار رئيس وزراء و اجا رئيس وزراء عم يقول انو كان في خطا و ما يكون في خطأ ...هلأ شو هو هالخطأ شو ابعادو ....شو تأثيراتو...كم مليون بني ادم قتل...انا ما بقدر وصل لهيك استنتاجات ...سوري يعني

من جهة تانية ..في قناة اسمها الجزيرة ..و عندا شخص اسمو تيسير علوني ...ترى انا الزلمي ما بعرف عنو شي غير انو صحفي ...و انو الجزيرة عم تقول انو محبوس باسبانيا ظلما و عدوانا ...هلأ اذا هاد الحكي ع الجزيرة يعني ..ما بيعمل ردة فعل سلبية تجاه اسباينا خصوصا باقتران اسم اسبانيا بالحلف المستعد بجزر الازوريس ...ترى بكون في شي غلط..و غلط كبير ..

ما بعتقد حدا عندو شوية أخلاق انسانية ممكن يفرح لموت شخص برئ.. مهما كانت جنسية الشخص لتكون

طيب و اذا ما كان شايفو برئ ؟؟ يعني مين بدو يقول انو برئ و انو لاء ؟؟

المستوطن الاسرائيلي مثلا برئ ؟؟

الموظفين الاداريين بشركة بلاك وتر ابرياء شي ؟؟؟

انو يا اخي برج التجارة العالمي ..برئ ؟؟؟

دافع الضرائب الاميركي ...برئ ؟؟؟

هاد نتيجة الديماغوجيا تبع السياسيين العرب و رجال الدين.. اللي ما بيعرفو غير يعلقو فشلهون على شماعة الغرب...

مورد أساسي لأغلب الدول الاسلامية هي مساعدات الغرب.. و مهاجرين الدول العربية عايشين بالغرب عيشة بحياتهون ما حلموها ببلادهون... لك يا زلمة هون وزارة الداخلية الاسبانية بتتوسط عند السفارة السورية مشان تمشّي أمور المهاجرين السوريين و ليس العكس..

في ناس هون بدل ما تاخد اجازات تروح تتطوع شهر بالصليب الاحمر مشان يساعدو هالمهاجرين غير الشرعيين المساكين وقت يوصلو عالسواحل الاسبانية.. شو ألله جابرو لهاد؟؟

بالزمانات joe حط موضوع نقلو من منتدى سوري عن شخص كان يطالب بهدم كنائس سوريا كلها.. تتذكرو للموضوع؟ هاد الشخص محمل حقد و كراهية.. طيب هاد كمان عندو أسبابو؟؟ سببو الوحيد هو انو حشولو راسو جماعة مجرمين...

الصيفية الماضية طلع وزير الكهربا و قال انو قطع الكهربا بسبب الضغوطات الامبريالية... مثلا يعني.. و كأنو سد الفرات مبني بنيويورك و للا المحطات الحرارية مانها بحلب انما بتكساس لحتى قاطعينها عنا... كلو عالغرب.. نحنا ملائكة و مافي منا بس الزلمة أخو *****

على فرض انو هي نتيجة ديماغوجية السياسين و رجال الدين ..بس انا برايي انو ديماغوجية رجال الدين و السياسين هي نتيجة الاستعمار الغربي ...و بدعم منو كمان

بتقدر تقلي انو القاعدة هي ما من صنع اميركا ؟؟؟

بتقدر تقلي انو الغرب ما حمى و امن المكان الامن و التنقل و حرية الكلمة لاكبر ارهابيين بالعصر الحالي ..و عن سابق اصرار و ترصد !!!

بتقدر تقلي انو السياسات الحلف اخت اطلسية بمنطقة الشرق الاوسط ما كلها بتصب بلعن نفس المواطن العربي و نهب لقمتو و مسح كرامتو ..و هدم بيتو ...و حتى سلب حياتو ...ان كان بالطرق المباشرة او عن طريق وكلاء ؟؟

انا شو بهمني بهوايات المواطن الغربي ...انو بروح ع الصليب الاحمر مشان يساعد هدول اللجئين غير الشرعيين ...ما هو لولا حكوماتو المنتخبة ديموقراطيا ما بكون في لاجئيي ع اوروبا ..يمكن كانو الاوروبيين لجأو لافريقيا !!

افريقيا الثرية جوعانة و القارة العجوز متخمة !!! ..كيف ؟؟

الجواب سهل ..بالسرقة و مص الدماء ..الغرب اللي جاب الرق بالقيود قبل كم مية سنة صار عندو طرق حضارية اكتر بالاستعباد ..و حتى حط تشريعات للعبودية تحت عنوان لميع اسمو ....حرية السوق!!!

يا اخي خلينا نكون واقعيين ....ما هو من وقت ما حسين راسل مكماهون و هني بيكذيو علينا ...يا اخي انا ما عندي ثقة فيهن ...ناس بقولو عن حالن براغماتيين ..كيف بدك ياني اوثق فيهن ..خصوصي و انو جرائمن البشعة على عينك يا تاجر !!!!

يتبع

HashtNasht

21/08/2008, 22:34

يا أخي هلأ شو دخل هاي بهاي؟

هاد موقف سياسي ناجم عن تناغم مصالح, و الشعوب غالبا يكون يا غافلة يا أما مغفلة...

كيف بدك مثلا شعب أميركا يكون حاقد ع حكومتو عاللي عم تعملو بالشرق الأوسط.. لما أوثق حلفاء أميركا هنن حكام هالمنطقة؟ و مع ذلك.. و مع ذلك.. هاد أمر تاني مالو علاقة فيه...

يعني كمان هاي شماعة تانية... بيتناسو مثلا انو باسبانيا و بلجيكا و النرويج و السويد في مذكرة توقيف بحق 47 ضابط اسرائيلي لجرائم ضد الانسانية.. يعني هالضباط هدول مافيهون يدخلو أوربا (و لسى من فترة ببريطانيا واحد من الضباط كان بدو يروح ع بريطانيا و وصل ع بريطانيا و ما استرجى ينزل من الطيارة تبعيت شركة العال.. و رجع بنفس الطيارة لأنو كان رح يتوقف لو نازل..

هدول المطلوبين بأوربا.. لجرائم ضد الفلسطينيين... تلاقيهون يروحو يتغدو و يتعشو و حبايب و تبويس و حبحبة مع مسؤولين فلسطينيين... أو تلاقيهون هلأ عم يصيفو بشرم الشيخ يا عم يتفسحو بالأردن يا بالمغرب... كيف بدك تشرح للأوربي اللي يشوف هالأمور انو نحنا مظلومين؟؟ ما رح يقول انو طلعو من راسي ماني مجبور فيكون؟

اسبانيا تبادلت سفراء مع اسرائيل بالـ 86.. يعني بعد مصر و بعد الأردن... المجانين تبعون مصر و الأردن ينزلو سبسبة بالغرب و عمالة الغرب... لكن و لا واحد يسترجي يفتح تمو مع مبارك أو الملك عبد الله...

هلأ بربك يا زلمي...انو بعد ما عطو فلسطين للاسرائيلية ..يو عليه اذا عملو مذكرة جلب ب 47 كلب !!! انو يعني هني اثروا على مسار القضية ؟؟؟ يا اخي بضلو يبعتو جيوش لكل الكرة الارضية ...اذا هني عندن فعلا موقف انساني و عقلاني و عادل ناح القضية الاخت فلسطينية كانو يبعتولن كم عسكري لهون ويخلصونا من هالقصة ...غير هيك هني كذابين ..و ولاد ستمية الف كذاب .و متل ما حكيت انت الشعوب اما غافلة او مغفلة ....و هالشي للاسف ما بيعفيها من دفع التمن ..لانو غير شعوب غافلة و مغفلة و كلشي يعني ..ما عفوها حكومات الغرب من دفع التمن ...و اللعبة قذرة يعني ...كلياتها ع بعضا قذرة...بقى ليش بدك الشرق يعامل الغرب بانسانية اكتر ما الغرب بعامل الشرق بانسانية !!!! ...اللي عم يموتو بالعراق برقبة الغرب..كل الغرب ..لانو لا روسيا ولا الصين هني الي بالعراق ..و كمان فلسطين ...و الغرب اللي بوقف ضد استقلال اوسيتيا و ابخازيا مع استقلال كوسوفو هو غرب عربيد ...بدو يمن يوقفو عند حدو ..ولو بالعنف ..ما بيشكي من شي العنف مع الهة القتل و التدمير

أبو نهلة نحنا عنا حقد بداخلنا فينا نصدرو مع البترول... لما عرفات دعم صدام بحرب الكويت الخليج طرد أغلبية الفلسطينيين شر طردة.. انو هالمساكين شو ذنبون ازا عرفات دعم صدام؟؟؟ تخيل بئا لو اسبانيا تطرد المغاربة بعد تفجيرات مدريد؟

مشكلتنا انو نعتبر كل الكون مسؤول عن مشاكلنا الا نحنا... نحنا مساكين.. و بدنا الكل يتضامن معنا و الكل يحارب عنا لما نحنا مالنا مروة نحرّك اصبع ..

بنتساعد و يتم التضامن معنا بشكل لا نستحقه... أميركا بنت كلب.. .طيب كم اميركي مات بغزة و هو عم يعمل حالو درع بشري؟؟ يا ترى بيبيّن بعيننا؟؟ لا و الله ما بيبيين..

برجع بقول... الحقد ناجم عن اعتبار الغرب شماعة لتعليق فشلنا من قبل الثنائي السام ببلدنا.. الحكومات و رجال الدين...

يا اخي نحنا عنا مشاكل كتير ...و الغرب شماعة شيالة...لو مانها شيالة ما كنا علقنا عليها كل هالقد ....انا عم قلك..يا اخي فرنسا كانت محتلتنا ...ما مزح يعني ...و يوسف العظمة ما مات بالجلطة ...قتلو الفرنسيين !!!! الفرنسيين نفسن تبعوت الانسانية يعني !!! و غيفارا كمان ما مات بالديسكو ...مات ببوليفيا ..و قتلتو اميركا ...اميركا نفسا تبع حقوق الانسان ...., و للاسف انا عندي قناعة انو الفاشيست هني الي قتلو لوركا ..يعني ما وقع من السطح ....و الفاشيست لساتن باسباينا ..ما راحو ع محل ..
يا اخي انا ما عندي مشكلة مع الاميركي المتضامن معنا ..بالعكس هاد على عيني و راسي ..مع انو هو مانو مفضل علينا ...هاد حقنا اللي عم نحاول بس نقول انو هو موجود.....و اذا التقى الف الفين ..يا اخي 100000 اميركي واقفين بصفنا ...بتكون غالبية اميركا ضدنا ....و منكون نحنا كمان ضدغالبية اميركا ..و هيك يعني

بقى ما بعرف شو بدي قلك....اكيد اللي مانو بحادث طيارة كانو رايحين ع الكاريبي و لا مفكرين يعني انو وين هاد الشرق الاوسط.. و الله يرحمن ..و يعين اهالين ...بس يعني من حيث المبدأ ما تستغرب انو في ناس ما حدا لارحمن ولا عان اهلن ممكن يظهروا مشاعر غير ودية تجاه اي شي الو علاقة بالغرب ...ما لانو الغرب كافر...بس لانو كل يوم عم يثبت انو جائر

و تحياتي :D

yass

21/08/2008, 22:56

هلأ انا ماني عايش باسبانيا ولا شفت بعيني لافتات بتقول
1898

Sin barcos pero con honor

2004

Con barcos pero sin honor

بس انا بعرف تماما انو ازنار رئيس الوزراء الاسباني السابق كان الركيزة التالتة بقمة الازوريس اللي تحدت العالم و مجلس الامن و الامم المتحدة و شكلو التحالف المستعد ...هلأ مستعد لشو ما بعرف ..بس كانو على ما يبدو مستعدين .و اللي كانو هني امريكا ام الارهاب , بريطانيا كلب امريكا ام الارهاب , و اسبانيا !!!!! ....و اذا كان التاريخ بدو يحكيلي شي ..فانا متأكد انو لازم يحكيلي ع جزر الازوريس و الحلفاء المستعدين !!!

ايضا و بعض ما زحط ازنار ..و اجا هادا اللي اسمو صعب ..ثاباتيرو يمكن...اكتر من مرة صرح انو الحرب على العراق هي ( خطأ سياسي ) و انو الحرب على العرق غير اخلاقية و غير قانونية ... و هاد الشي كان عم يحكي بصدد انو هو اخرج اسبانيا من المسار غير الاخلاقي و غير القانوني اللي كانت ماشي فيه ..و انو و بانتخابو رئيس وزراء صار ممكن يتصلح خطأ سياسي ما !!

طيب معناتا يا اخي في شي غلط كان.... ما معقولة انو طار رئيس وزراء و اجا رئيس وزراء عم يقول انو كان في خطا و ما يكون في خطأ ...هلأ شو هو هالخطأ شو ابعادو ....شو تأثيراتو...كم مليون بني ادم قتل...انا ما بقدر وصل لهيك استنتاجات ...سوري يعني

ما اختلفنا في غلط.. أنا ما عم قلك مافي غلط.. افهم علي مشان ألله...

أول شي ماني فهمان الربط... انو أزنار راح ع جزر الأوزوريس معناتا ممكن يكون في تفهّم لتفجير قطار مليء بالأبرياء؟؟

بعدين أحداث مدريد صارت بعد بداية حرب العراق بسنة بالزبط.. كان حزب الشعب آكل هوا بالانتخابات المحلية و في طريقه الى انو يتدحرج الى مزبلة التاريخ بالانتخابات التشريعية.. هاد كان أمر واضح و جلي ومتل عين الشمس مبيّن...

مافي شي يبرر اللي صار, و لا شي ممكن يكوّن قناعة بانو ممكن يكون شي منطقي.. و اللي عم يدافع عن اللي صار ما بيفرق عن بوش بحرف واحد.. هو اجتاح بلد بحجة برج التجارة.. و هنن عم يهللو لقتل أبرياء.. بغزوة مدريد... تفي ع هالموديلات كلاب ولاد كلاب...

مجرد اسقاط حكومة ناجحة اقتصاديا بسبب حرب العراق يؤكد كلامي ... شعب أسقط حكومتو لأنو ما قبل تكون طرف معتدي... نحنا بدنا خمسين مليون سنة لحتى يصير عنا هيك وعي اخلاقي

من جهة تانية ..في قناة اسمها الجزيرة ..و عندا شخص اسمو تيسير علوني ...ترى انا الزلمي ما بعرف عنو شي غير انو صحفي ...و انو الجزيرة عم تقول انو محبوس باسبانيا ظلما و عدوانا ...هلأ اذا هاد الحكي ع الجزيرة يعني ..ما بيعمل ردة فعل سلبية تجاه اسباينا خصوصا باقتران اسم اسبانيا بالحلف المستعد بجزر الازوريس ...ترى بكون في شي غلط..و غلط كبير ..

تيسير علوني ما بعرفو شخصيا.. بس بعرف عيلتو كلها و منيح كتير كمان... و قضيتو تحاكمت بشكل علني و حكمو مخفف مخفف مخفف أكتر من هيك لا يمكن... بس الجزيرة بدها تعمل حالها ضحية مؤامرة عالمية ضدها.. و يجوز في من هالحكي لكن تيسير علوني ليس جزء من هالمؤامرة.. و استعمالهم الأخرق و الأرعن و القذر لقضيتو لما حتى عيلتو ما استأنفت الحكم يدل على مصداقيتهون... العالية جدا

تيسير علوني لو عامل اللي عملو (و اعترف و اقر انو عملو) بدولة عربية بدل اسبانيا كان ما رجعنا سمعنا باسمو و لا شفنا شكلو.. و هلأ قاعد بالاقامة شبه الجبرية ببيتو و يطلع و يفوت .. بس مجبور ينام ببيتو.... يا حرام المسكين..

طيب و اذا ما كان شايفو برئ ؟؟ يعني مين بدو يقول انو برئ و انو لاء ؟؟

المستوطن الاسرائيلي مثلا برئ ؟؟

الموظفين الاداريين بشركة بلاك وتر ابرياء شي ؟؟؟

انو يا اخي برج التجارة العالمي ..برئ ؟؟؟

دافع الضرائب الاميركي ...برئ ؟؟؟

يا أخي شو دخل هل المستوطن و للا موظف بلاك ووتر بركاب طيارة مدنية لا الهون علاقة بفلسطين و لا بالعراق و لا الهون علاقة بشي.. ناس تدربست الطيارة فيهون و ماتو.. نسوان و شيوخ و ولاد صغار... شو المبرر الأخلاقي للشماتة فيهون؟؟؟ مافي مبرر لا عقلاني و لا أخلاقي و لا حتى شايف أدنى سبب لتفهم الحقد الأسود المقرف هاد

على فرض انو هي نتيجة ديماغوجية السياسين و رجال الدين ..بس انا برايي انو ديماغوجية رجال الدين و السياسين هي نتيجة الاستعمار الغربي ...و بدعم منو كمان

لك انو بدي افهم شو بلانا لحتى الكل مستوطي حيطنا؟ كل مصايبنا بسبب الاستعمار و الامبريالية و كل أكل الهوا هاد....

نحنا شركاء للامبريالية الأميركية باللي عم يصير... رؤسائنا شركاء و ليسو خدم... شيوخ النفط زادو غنى بعد حرب العراق... هنن جابو الأميركان عالخليج.. هنن كانو شركاء بحرب العراق برؤوس أموالهم و بدعمهم اللامحدود... رؤسائنا هنن اللي ينددو بحزب الله وقت يهاجم اسرائيل.. ليش شغلتنا نسب الغرب و أرانب عند رؤسائنا؟ ما هنن نفس اللعنة.. هنن شركائهون و ايد وحدة معهون... ليش لنلوم اللي بعيد عنا ألاف الكيلومترات ازا أول واحد باعنا و لعن ربنا هو اللي عم نهتفلو.. ازا اللي عم نفديه بأرواحنا و دمائنا هو شريك الاستعمار و الامبريالية... ع مين عم نتضحك غير ع حالنا؟

بتقدر تقلي انو القاعدة هي ما من صنع اميركا ؟؟؟

طبعا القاعدة صنع أميركا... و وجود القاعدة يعني نجاح أميركا بقدر ما يعني فشلنا.. و وجود من يدعم القاعدة هو بسببنا, ليس أكثر

بتقدر تقلي انو الغرب ما حمى و امن المكان الامن و التنقل و حرية الكلمة لاكبر ارهابيين بالعصر الحالي ..و عن سابق اصرار و ترصد !!!

مين الغرب؟؟ بالزبط عن مين عم تحكي؟ لأنك عم تعمل نفس اسقاط المحافظين الجدد لما بيحكو عن العرب و الاسلام.. شو عم تفرق عنهون ازا عم تحط الكل بنفس الخانة...

أميركا اللي اجتاحت العراق.. هي نفسها أميركا اللي احتضنت ادوار سعيد لما حتى أهل بلدو خانوه..

أوربا اللي مشاركة بضعف كلمتها باللي عم بيصير هي بيت جالياتنا... و مافي داعي احكي عن جالياتنا...

الحديث عن الغرب ككتلة واحدة خطأ.. و تسطيح للقضية بشكل كبير جدا

بتقدر تقلي انو السياسات الحلف اخت اطلسية بمنطقة الشرق الاوسط ما كلها بتصب بلعن نفس المواطن العربي و نهب لقمتو و مسح كرامتو ..و هدم بيتو ...و حتى سلب حياتو ...ان كان بالطرق المباشرة او عن طريق وكلاء ؟؟

في هوليدنغ من المصالح الملتقية بهذه المنطقة.. و مو صحيح انو مصالح حلف الأطلسي هيي اللي ماشيه فقط.. انما هو ملتقى مصالح كبير و حلف الأطلسي جزء منها... و آل سعود و اتباعهم جزء تاني.. و أمراء الكويت.. و الأنظمة العربية كلها.. هدول المذكورين مانهون وكلاء.. هدول شركاء.. شركاء بكل معنى الكلمة و منتفعين من كل ما يجري..

فيك تقلي انو الأنظمة العربية جميعها بلا استثناء -كأنظمة- ما استفادت من حرب العراق؟

رؤوس الأموال العربية جميعها بلا استثناء مانها شريكة مع رأس المال الأطلسي؟

مين أول مستثمر بالولايات المتحدة؟

مين أول مستثمر ببريطانيا, بكندا, باستراليا...

انا شو بهمني بهوايات المواطن الغربي ...انو بروح ع الصليب الاحمر مشان يساعد هدول اللجئين غير الشرعيين ...ما هو لولا حكوماتو المنتخبة ديموقراطيا ما بكون في لاجئيي ع اوروبا ..يمكن كانو الاوروبيين لجأو لافريقيا !!

افريقيا الثرية جوعانة و القارة العجوز متخمة !!! ..كيف ؟؟

الجواب سهل ..بالسرقة و مص الدماء ..الغرب اللي جاب الرق بالقيود قبل كم مية سنة صار عندو طرق حضارية اكتر بالاستعباد ..و حتى حط تشريعات للعبودية تحت عنوان لميع اسمو ....حرية السوق!!!

هاد تبسيط كبير للقضية و كتير عم تشيل مسؤولية من أبناء الأرض...

ديكتاتوريين أفريقيا أفارقة... ضباط الديكتاتوريين أفريقيا هنن أفارقة... عناصر المخابرات تبع الجمهوريات الأفريقية هنن أفارقة... في جزء سائد هو شريك.. و بالتالي الحق مو بس على الامبريالية (طبعا هي المسؤولة الكبرى.. لكن ما فينا نضحك على بعض و نقول انها الوحيدة.. )

و هاد الحكي كلو مانو مسؤولية الناس كمواطنين.. هاد عبارة عن تلاقي مصالح على ارتفاعات عالية جدا مالو المواطن العادي دور فيها و لا يوصللها.. و اكبر من الحكومات حتى.. و مساعدة المواطنين عنا هون للمهاجرين ناتجة عن وعي لما يحدث و عن شعور ضمني بالذنب الى حد ما... الشعور اللي يبدو بحياتنا ما رح نتعلمو

يا اخي خلينا نكون واقعيين ....ما هو من وقت ما حسين راسل مكماهون و هني بيكذيو علينا ...يا اخي انا ما عندي ثقة فيهن ...ناس بقولو عن حالن براغماتيين ..كيف بدك ياني اوثق فيهن ..خصوصي و انو جرائمن البشعة على عينك يا تاجر !!!!

الحسين هو اللي كذب علينا.. مو مكماهون... الحسين بلش الثورة العربية الكبرى و هو يعرف تماما شو في و شو رح يصير (لكان الحمار بيفكر انو رح يحررولو 3 مليون كيلومتر مربع مشان سواد عيونو الحلوين؟؟ ) و بالتالي المسؤول الأول أمامي كمواطن عربي هو الشريف حسين... لأنو هو اللي كذب علي و هو اللي جاب البلاوي لعندي... هو اللي وقع التحالفات مو أنا

أنا فهمان حكيك تمام .. انو الناس معبية.. بس لازم تكون معبية ع سبب المشكلة.. معبية بشكل منطقي... لك اخي مستحيل تقنعني انو نفس الحقد متبادل.. ع كام كاريكاتير انحرقت سفارات و ماتو ناس... و هون 9 مغاربة عملو تفجير طيّر 192 شخص و ما حدا مس شعرة من راس مغربي واحد... لو عنا الشغلة صايرة كان الله عليم شو صار...

الحقد الأسود كايديولوجيا.. نفس العقل المريض المجنون اللي شمتان بأبرياء ميتين.. هو اللي يهاجم المسيحيين و يقول عنهون خنازير و عباد الصليب.. هو نفسو اللي بيسب السوريين لأنو يفكرهون كلهون علوية (لأنو كلمة علوي مسبة عندو... ) هو نفسو اللي يكفّر حيدر حيدر و نجيب محفوظ و نصر حامد أبو زيد و نوال السعداوي... هاد هو نفسو...

suryoyo

21/08/2008, 22:57

بما انه تحول النقاش لمسار آخر(سياسي) .. رح اكتب و ادلو بدلوي في المسار الجديد

صحيح ما نقدر نحاسب الشعب الاسباني على الحرب على العراق و ما نقدر نحاسب الشعب العربي على التفجيرات في مدريد او لندن ...

بس المسؤولية الاخلاقية تقع على الموافقين و المؤيدين للعمليات العسكرية او الارهابية ...

طيب معناتا يا اخي في شي غلط كان.... ما معقولة انو طار رئيس وزراء و اجا رئيس وزراء عم يقول انو كان في خطا و ما يكون في خطأ ...هلأ شو هو هالخطأ شو ابعادو ....شو تأثيراتو...كم مليون بني ادم قتل...انا ما بقدر وصل لهيك استنتاجات ...سوري يعني

بالحقيقة ... فيها وجهة نظر ..

يعني مو معقول يجي رئيس وزراء و يقول ازنار غلط و ينتهي الموضوع كأن شيئا لم يكن !

او انتقامات سياسية بين الاجزاب تصير على انها العدالة !

كانت في اوربا ردة فعل و مظاهرات ضد الحرب .. بس من خلال الضغوط صارت موافقات برلمانية متفاوتة ..

و تردي الوضع بالعراق ... صار ضمن كفة المعارضين ... يعني صار مكسب سياسي بشكل او بآخر

و لو نجحت الاهداف المعلنة من الحرب اللاأخلاقية و اللاشرعية ... اكيد كان صار ازنار بطل قومي

انا بالاثيو وزيرة الخارجية في عهد ازنار ... شالت بايدها ملف كامل عن اسلحة الدمار الشامل في اجتماع مجلس الامن قبل الحرب و طلع الملف كاذب 100% مثل ملف اميركا عن الاسلحة ..و صارت المسرحية و طلع السبب جورج تينيت بس :shock:.....

بالنهاية ... لا وجود للعدالة بالقضايا السياسية ... لان المصالح اكبر من حزب الشعب او حزب الجمهوريين او حزب العمال البريطاني .. و كلها مصالح اكثر من مبادئ ...

آسف للاطالة .. و يمكن لازم ننزل موضوع خاص عن المتورطين بالحرب على العراق !

yass

21/08/2008, 23:15

هلأ بربك يا زلمي...انو بعد ما عطو فلسطين للاسرائيلية ..يو عليه اذا عملو مذكرة جلب ب 47 كلب !!! انو يعني هني اثروا على مسار القضية ؟؟؟ يا اخي بضلو يبعتو جيوش لكل الكرة الارضية ...اذا هني عندن فعلا موقف انساني و عقلاني و عادل ناح القضية الاخت فلسطينية كانو يبعتولن كم عسكري لهون ويخلصونا من هالقصة ...غير هيك هني كذابين ..و ولاد ستمية الف كذاب .و متل ما حكيت انت الشعوب اما غافلة او مغفلة .... ..لانو غير شعوب غافلة و مغفلة و كلشي يعني ..ما عفوها حكومات الغرب من دفع التمن ...و اللعبة قذرة يعني ...كلياتها ع بعضا قذرة...بقى ليش بدك الشرق يعامل الغرب بانسانية اكتر ما الغرب بعامل الشرق بانسانية !!!! ...اللي عم يموتو بالعراق برقبة الغرب..كل الغرب ..لانو لا روسيا ولا الصين هني الي بالعراق ..و كمان فلسطين ...و الغرب اللي بوقف ضد استقلال اوسيتيا و ابخازيا مع استقلال كوسوفو هو غرب عربيد ...بدو يمن يوقفو عند حدو ..ولو بالعنف ..ما بيشكي من شي العنف مع الهة القتل و التدمير
هيه... مجبورين فيك... ازا انت بايع حالك!

ليك أب نهلة.. الشغلة بهالبساطة هاي:

الغربي بيروح على مصر بيشوف مصر مليانة صور حسني مبارك.. و كلو ينادي باسم حسني مبارك و كلو بيحب حسني مبارك.. ياخد تكسي بيلاقي شوفير التكسي حاط شعبان عبد الرحيم عم يغني لحسني مبارك.. وين ما يتطلع يلاقي صور حسني مبارك.. بعقليتو بيفكر انو عن جد كلو مع حسني مبارك... يفتح الجريدة بيلاقي انو والله حسني مبارك يندد بالاعتداءات الغاشمة على سديروت أو ع شي مستوطنة... هو هون بيقلك أي نحنا و المصاروة عم نفكر نفس الشي... و نحنا ايد وحدة

بيفتح التلفزيون بيلاقي محمود عباس عم يبوّس أولمرت.. تعا اقنعو انو هاد مانو ممثل شرعي للفلسطينيين.. ازا عملو انتخابات و طلع هو رئيس!!

بيفتح الراديو بيلاقي شي رئيس وزراء لبنان عم يحشك ع حزب الله لأنو "استفز" اسرائيل... شو بدك ياه يفكر.. هاد رئيس وزراء!

الرأي العالم الغربي كشعب لا يمكن يتفهّم انو كل هدول موضوعين من قبل الهولدينغ الامبريالي.. ما تدخل مخو.. انو كيف يا زلمة طلع شلون بيهتفولهون و يصفقولهون و يحبوهون.. نحنا ماننا ضدهون لأنو رؤسائهون حبايبنا.. و هنن بيحبو رؤسائهون.. هيك بيفكر المواطن العادي..

عندك الأكثر وعيا بئا يكون فهمان اللعبة... و هاد ناشط.. ناشط جدا كمان... يعني هالـ 47 ضابط اللي عليهون دعاوي اللي مستخف فيهون عالقليلة عملو شي ما معمول بالدول العربية.. .انو نفس الضابط هاد اللي مطلوب بأوربا تلاقيه حبايب هو و الفلسطينية, حبايب هو و المصاروة, حبايب هو و الأرادنة... الخ الخ الخ... فهنن..

بعدين في شغلة:

و هالشي للاسف ما بيعفيها من دفع التمنالثمن انو يندبحو لما مالهون ذنب.. و غالبا المذنب الأول قاعد ببيتك و عم ينهتفلو؟

مين استوطى حيطنا غير نحنا؟ العرب 300 مليون.. قد سكان أوربا.. و أغنى من أوربا.. ليش بيأسو؟ ليش مضحكة العالم؟؟ كلو خارجي؟؟؟ له يا زلمة....

معناتو كمان ازا كل شعب خرج منو من يسيء لشعب أخر.. الى حد ما معناتها أميركا-بناءا على هالمنطق- يحقلها تهاجم اللي هاجمها -بمنظورها- .. نفس المنطق بالزبط

و غيفارا كمان ما مات بالديسكو ...مات ببوليفيا ..و قتلتو اميركا ...اميركا نفسا تبع حقوق الانسان ...., و للاسف انا عندي قناعة انو الفاشيست هني الي قتلو لوركا ..يعني ما وقع من السطح ....و الفاشيست لساتن باسباينا ..ما راحو ع محل ..

ليش غيفارا ما تكفّر هو و من يحبه على ايد الداعية الشيخ أحمد فتفت؟؟؟

أبو نهلة شو دخل هاي بهاي.. انت بذاتك عم تستشهد بناس "من هنيك" و بمكان تاني تحطهون كلهون ببوتقة واحدة...

لوركا قتلوه الفاشيست.. و لوركا لما مات كان موقّع وعد بلفور.. هل يا ترى هو مسؤول ضمني و أخلاقي عن هالشي متل ما عم تقول قبل طالما عم تقول انو شعوب الغرب مسؤولة ضمنيا و غير معفيه من دفع الثمن؟

غيفارا الأرجنتيني.. ابن البلد اللي هاجرو منو تقريبا نص مليون يهودي الى اسرائيل.. هل هو مسؤول اخلاقي عن هالشي؟؟ أذا أثبت بالقول و الفعل انو هو ضد هالشي... شو بدك منو أكتر؟؟؟

و شغلة أخيرة أبو نهلة... ازا بدنا نحكي عن الفعل و رد الفعل.. معناتا بدنا نقر بصحة نظرية أثنار.. اللي يقول انو الامبريالية (هو يسميها حضارة الغرب) ما عم تعيل عالعرب لأنو العرب و المسلمين هنن اللي بلشو المشاكل كون هنن اللي اجو احتلو الأندلس رغم انو ما حدا راح اعتدى عليهون.. هو يعمل اسقاط من هديك الفترة... و انو كل مسلم و عربي يحن الى أيام الأندلس هو داعم للارهاب كون عم يحن الى فترة احتلال... و الله هو هيك يحكي مو انا... و انت عم تحكي شي مشابه بطريقتك لتحميل المسؤوليات.. راح تقلي انو شو ذنبي ازا احتلو الاندلس من خمسميه سنه.. و راح قلك انو شو ذنب زميلاتي اللي توفو بوعد بلفور؟؟ مو نفس الشي؟ أنا شايفو نفس الشي

yass

21/08/2008, 23:25

بالحقيقة ... فيها وجهة نظر ..

يعني مو معقول يجي رئيس وزراء و يقول ازنار غلط و ينتهي الموضوع كأن شيئا لم يكن !

او انتقامات سياسية بين الاجزاب تصير على انها العدالة !

كانت في اوربا ردة فعل و مظاهرات ضد الحرب .. بس من خلال الضغوط صارت موافقات برلمانية متفاوتة ..

و تردي الوضع بالعراق ... صار ضمن كفة المعارضين ... يعني صار مكسب سياسي بشكل او بآخر

و لو نجحت الاهداف المعلنة من الحرب اللاأخلاقية و اللاشرعية ... اكيد كان صار ازنار بطل قومي
عاللي بالأحمر.. هاد كلام غير صحيح و مالو جنس العلاقة بالواقع...

الاحتجاجات و الاضرابات على حرب العراق بدأت قبل الحرب بشهور.. و استمرت فوق السنة لحد ما خسرو الانتخابات...

عم نقلك شعب اسقط حكومتو لأنو ما رضي تكون طرف معتدي... حكومة حققت معجزات اقتصادية و طالعت اسبانيا من العجز بالميزانية.. أسقطها بسبب حرب العراق!

من ورا موقف اسبانيا بعد فوز الاشتراكيين تأزمت العلاقة بين أميركا و اسبانيا.. و اليوم بعد خمس سنين لسى ما صار و لا لقاء بين الطرفين و العلاقات باردة جدا (مع اتهامات لثاباتيرو بدعم "المارقين" متل هوغو تشافيز و ايفو موراليس و ولولا دا سيلفا)

وينو أثنار هلأ؟؟ عايش بأميركا.. من اكثر الشخصيات كرها باسبانيا و في مزبلة التاريخ الى أبد الآبدين..

الشمطاء الغبية أنا بالاثيو... بنفس سنة حرب العراق استطلاع رأي حكومي توجها كأسوء وزيرة في تاريخ اسبانيا من أيام الجمهورية الثانية

حزب الشعب كان حاكم بالأغلبية المطلقة اللي فازها سنة 2000.. و بالتالي كان عندو 53% من البرلمان و ما كان في اجراء ممكن ينعمل ضدو من أي نوع.. و اسقطوهون بأول فرصة!! أول انتخاب بعد الحرب طيروهون و بئس المصير.. شو لازم كمان يعمل الشعب الاسباني؟؟ شو كمان؟؟؟ ايمتى شعب عربي نقم على حكومتو بسبب اعتدائها على بلد تاني؟؟

مافينا نحمّل شعب كامل مسؤولية اللي صار حتى و ولو اخلاقيا طالما ما وفر فرصة لانهاء الاعتداء.. و اعتبارهم مسؤولين يعني قبولنا بانو نحنا جميعا مسؤولين عن أفعال الارهاب تبع منظمة القاعدة ...

suryoyo

21/08/2008, 23:46

مافينا نحمّل شعب كامل مسؤولية اللي صار حتى و ولو اخلاقيا طالما ما وفر فرصة لانهاء الاعتداء.. و اعتبارهم مسؤولين يعني قبولنا بانو نحنا جميعا مسؤولين عن أفعال الارهاب تبع منظمة القاعدة ...انا معك بهذا ... ما ممكن نحميل المسؤولية على الشعب اللي رفض الحرب ...

أو الذي خّدع بسبب انتمائه السياسي ...

الاحتجاجات و الاضرابات على حرب العراق بدأت قبل الحرب بشهور.. و استمرت فوق السنة لحد ما خسرو الانتخابات...

عم نقلك شعب اسقط حكومتو لأنو ما رضي تكون طرف معتدي... حكومة حققت معجزات اقتصادية و طالعت اسبانيا من العجز بالميزانية.. أسقطها بسبب حرب العراق!بس اكيد فشل الاهداف ... هو دافع جديد و استراتيجي لاسقاط حكومة ازنار و خصوصا من قبل مؤيدي حزب الشعب .. اللي صدموا بالواقع ..

وينو أثنار هلأ؟؟ عايش بأميركا.. من اكثر الشخصيات كرها باسبانيا و في مزبلة التاريخ الى أبد الآبدين..

الشمطاء الغبية أنا بالاثيو... بنفس سنة حرب العراق استطلاع رأي حكومي توجها كأسوء وزيرة في تاريخ اسبانيا من أيام الجمهورية الثانيةما صار شي ..بس راحوا لاميركا و اكيد عايشين بأحسن مكان و أحسن ظروف !

بس لو نجي للعدالة الحقيقية ..... كان لازم يتحاكموا على الاشتراك في الحرب... و خصوصا بالاثيو لان كذبت امام العالم ...

هذا اللي قصدته .. بالعدالة الحقيقية .. مو مصالح دول !

و لا لصار مطالبة اوربية ... بمحاكم جرائم حرب ... مثل ما عملوا بمحاكم رواندا و يوغسلافيا السابقة !

yass

21/08/2008, 23:55

بس اكيد فشل الاهداف ... هو دافع جديد و استراتيجي لاسقاط حكومة ازنار و خصوصا من قبل مؤيدي حزب الشعب .. اللي صدموا بالواقع ..

لأ مو صحيح هالكلام.. لأنو ما عم نحكي عن دعم مبدئي تحول بعدين الى نقمة بسبب فشل الحرب... متل حالة أميركا..

عم نحكي عن رفض شعبي يفوق الـ 90% من أول لحظة صار فيها تحركات باتجاه الحرب.. في فرق كبير

و لا لصار مطالبة اوربية ... بمحاكم جرائم حرب ... مثل ما عملوا بمحاكم رواندا و يوغسلافيا السابقة !

مين قال هالحكي؟؟؟

خود هاي موقع المنظمة اللي انشأت خصيصا لملاحقة أثناؤ و وزرائه...

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

و في كوم منظمات من هالقبيل.. لكن هاي أكبر وحدة و اكثرهم تأثيرا.. و الطريق طويل بس راح يقعدوه لأثنار بالمحكمة...

قانونيا.. حرب العراق غير شرعية... لكن الوجود العسكري الحالي شرعي لأنو دبرولو فتوى من مجلس الأمن (و و لا روسيا و لا الصين استخدمو الفيتو.. و هدول حبايب العرب) لكن أثنار بعت وحدتين مهندسين قبل هالفتوى.. و هون السبيل الوحيد للملاحقة القانونية...

المشكلة انو الدفاع ماسك حجة انو الجيش الاسباني ما دخل بأي لحظة بعمليات قتالية و لا كان حتى مجهز لهالشي, كانت فقط وحدات هندسية.. لذلك لا يمكن اعتبار اللي عملو اعلان حرب دون موافقة البرلمان... لكن راح يدبروها..

قرصان الأدرياتيك

22/08/2008, 00:16

HashtNasht

22/08/2008, 01:08

بغضّ النّظر عن الحوار الدّائر... وبعيداً عن تسييس الأحداث:

كل من يبرّر قتلَ الأبرياء ويشمت بموتهم، مهما كانت الأسباب، لا يعرفُ من الإنسانيّة إلا القذارة!!!

وكلمة واحدة بالنسبة لما يدور على حلبة الموضوع:
كلام ياس منطقيّ إنسانيّ معتدل في ما يتعلّق بحادث الطّائرة الإسبانيّة وتعليقات الشّامتين.
تقبّل سلامي وتقديري.

اخي القرصان ...انا ماني عم قول شو الصح و شو الغلط..شو المعتدل وشو المتطرف ...عم قول شو الواقع

ياس قال

مافي شي يبرر اللي صار, و لا شي ممكن يكوّن قناعة بانو ممكن يكون شي منطقي.. و اللي عم يدافع عن اللي صار ما بيفرق عن بوش بحرف واحد.. هو اجتاح بلد بحجة برج التجارة.. و هنن عم يهللو لقتل أبرياء.. بغزوة مدريد... تفي ع هالموديلات كلاب ولاد كلاب...

و انا هاد اللي عم قولو ....انا عم قول انو الطرفين متساويين ...و في خلاف انو مين هني الطرفين بالضبط ...

فعل الشماتة بضحايا حادث طائرة هو مانو اكتر عنف من قتل مدنيين ..من وجهة نظري عالاقل ... و اذا كان في طرف عم يشمت ..في طرف بالمقابل عم يمارس القتل بكل ما تيسر من تكنولوجيا !!

و الاولى انو ندين الطرف اللي المفوض انو هو اقوى و قادر يسيطر ع الموضوع ..الولى انو ندين من يسنحق ان يدان ...تعلقيات كم مواطن من العامة ع موقع اخباري مانها اقوى او اهم من تعليقات سياسين من الصقور بواشنطن ..و مانا مؤذية متل اكاذيبن ...و حركة الشماتة هي رد الفعل و ليس الفعل و بس .

هاي هيي ببساطة يعني

yass

22/08/2008, 01:19

فعل الشماتة بضحايا حادث طائرة هو مانو اكتر عنف من قتل مدنيين ..من وجهة نظري عالاقل ... و اذا كان في طرف عم يشمت ..في طرف بالمقابل عم يمارس القتل بكل ما تيسر من تكنولوجيا !! أنا معك بهالشي...

لكن اللي عم قولو انو قتل الابرياء و المدنيين مانو مسؤولية الناس اللي ماتت بهالطيارة.. مالهون ذنب.. شعبيا الناس جدا متعاطفة مع العرب و قضاياهم رغم كل شيء.. و بيساعدوهون بكل ما أوتيت لديهم من قوة..

و اللي عم قولو كمان.. انو اللي شمتان بموت الأبرياء بالطيارة.. هو نفسو اللي فرحان على التصفيات الطائفية بالعراق.. و هو نفسو اللي بيحكيلك أبناء القردة و الخنازير و عباد الصليب, و الرافضة و النصيريين و كل هالعلاك الفاضي..

اللي بدي اوصلو.. انو غلط خندقين.. شرق و غرب... في جزء شعبي كبير جدا جدا معنا بنفس الخندق... و غلط نعتبرهون مسؤولين عن شي رافضينو و ناضلو ضدو الشي اللي ما استرجى حدا يناضلو من شعوبنا...

يعني نحكي عن اوربا... طيب قطر ليكها الكل معجب فيها و مربط خيلنا صارت.. عندا أقدم مكتب مصالح اسرائيلي بالمنطقة, و فيها أكبر قاعدة عسكرية اميركية و الجانب الأكبر و الأعظم من الضرب العسكري على العراق انطلق من أراضيها... فليش بدي حط حالي مع قطر و مع الكويت مثلا... و بقول الاسبان مسؤولين عن دعم حكومتهم للحرب لما اثبتو انو هنن متبرين من حكومتهم اللي عملت هالعملة...

القصة مو قصة عرب و غير عرب... لا كل الغرب متل بعضو.. و لا كل العرب متل بعضهون... في امبريالية اقتصادية.. و جزء كبير من العرب جزء أساسي و فاعل فيها كما انو جزء أساسي و فاعل من العالم الغربي يقف ضدها بشراسة.. و بنفس الوقت في حركة حقوق مدنية و حريات في جزء عربي فيها .. و في جزء غربي فيها...

بن لادن و ما حوله و بوش و ما حوله نفس الزبالة... و أرفض انو يكون بن لادن و ما يمثله ضمير العرب أو لسان حالهم.. متل ما بوش أرفض انو يكون لسان حال.. الشعب الاسباني مثلا..

الاولى انو ندين الطرف اللي المفوض انو هو اقوى و قادر يسيطر ع الموضوع ..الولى انو ندين من يسنحق ان يدان ...تعلقيات كم مواطن من العامة ع موقع اخباري مانها اقوى او اهم من تعليقات سياسين من الصقور بواشنطن ..و مانا مؤذية متل اكاذيبن ...و حركة الشماتة هي رد الفعل و ليس الفعل و بس .

المشكلة أنا شايفهون انهون نفس الشي.. نفس اللعبة و شركا فيها (طبعا أبو تعليق هو تابع اعمى أو جاهل لحركة أخرى)

أبو تعليق ما بيمثل لسان حال العرب .. منيح؟ ما فينا نعتبرو حالة معزولة لكن مافينا نقول انو لسان حالنا... بس كمان صقور واشنطن لا يخُتصر الغرب بهم.. برجع لنفس المثال.. أميركا اللي حاوية بوش هيي أميركا اللي قدمت ملجأ لكتير مبدعين عرب.. ادوار سعيد كمثال... غلط نشوفهم ككتلة واحدة متجانسة... لأنو بهالحالة عم نسمحلهون يشوفونا كمان ككتلة واحدة متجانسة

Marooshe

22/08/2008, 22:26

يعني في بس شغلتين بقدر قولهن عن هي العالم...
اول شي هيك ناس (او ما بعرف ازا بيصح نسميهن ناس بما انا عم نحكي عن ناس وانسانية) بيفتقدو لأي ذرة انسانية...
وتاني شي هي مخلوقات جاهلة لدرجة انو بتصر انها تنسب كلشي للدين ول اللة وقدرتو والنبي ومعجزاتو... ما بعرف كيف ممكن يآمنو بهل "اللة" يلي ما بيعرف غير يعاقب ويقتل ويشرد ويخرب.... انو معقولة هاد اللة يلي صرعونا فية؟؟؟ اللة ونبيو قالولهن افرحو وهللو ازا غيركو (من غير المسلمين بس) بيموت!!!
ما بيعرفو يثبتولنا وجودو وعظمتو بغير اشيا يعني؟
ما عندو معجزات مثلا؟ لهدرجة ما بيقدرو يورجو قوتو؟ لدرجة انو اي شي بيصير بينسبو الو؟ مافيي قول غير... ياحرام...

achelious

23/08/2008, 03:44

..السطل بالمجتمع موجود هي نقطة المفروض نكون خالصين منا من زمان.. هلئ شو بيعبو شي تاني!..
بس عالأكيد مالو علاقة بالله!
يعني لو كان الله بشر لزعلت عليه عقد مالفقلو تهم..
-هيدا سببو الرئيسي الاحتقان.. اللي تغذيه أساسا السياسة الخارجية الأمريكية اللي بدورا بتعقد حالا إرادة إلهية!
وصرحت بهالشي بأكتر من مناسبة.. هي هي السياسة عم تغذي هاد التطرف.. واللعب عم يكون عالجهل والعصبية والقبلية.. يعني شيء مؤسف بس جميع الأطراف عندا نفس النظرة.. يعني هدوك شو ملايكة؟!
ماكمان بيعتبرونا كفار أجمعين! المنيح فينا قبل العاطل.. وبيحكوا أكتر من هيك كمان..
اليمين المسيحي بأميركا بيعتبر إنو إسرائيل مشيئة إلهية وتقتيل الفلسطنين مسألة ضرورية لأنن ضد الله!
نفس العقلية هون وهونيك!..
الموضوع مالو علاقة بالانسانية برأيي.. ماالشماتة موجودة-فكيف بالعدوين؟!!!!!- والغباء حاضر والملافظ سعد..
;):D

قرصان الأدرياتيك

23/08/2008, 04:40

اخي القرصان ...انا ماني عم قول شو الصح و شو الغلط..شو المعتدل وشو المتطرف ...عم قول شو الواقع

عزيزي hashtnasht

تحيّة وبعد...

من يقرأ مشاركاتك وحوارك مع ياس لا يجدُ هذا في الحقيقة، فنحن هنا بصدد مناقشة تعليقات وردت في موقع معيّن حول حادثة الطّائرة الإسبانيّة.

وأن يأتي أحدُهم ليطرح مقابل الشّماتة تصرّفات الغرب الجائرة وسياسته الكاذبة فهذا يعدّ تبريراً (بطريقة غير مباشرة).

القضيّة بحسب المنطق الأرسطوطالي بسيطة: حدثٌ وقع، شماتة، طرح، عرض آخر... والعرضُ الآخر هو ما قمتَ به أنتَ، ولأنّه يأتي في صالح الشّامتين فهو ليس إلا تبريراً من نوعٍ آخر. لا تعارضني، عارض أرسطو في منطقِه!

مع الشّكر والتحيّة.

HashtNasht

23/08/2008, 09:15

عزيزي hashtnasht

تحيّة وبعد...

من يقرأ مشاركاتك وحوارك مع ياس لا يجدُ هذا في الحقيقة، فنحن هنا بصدد مناقشة تعليقات وردت في موقع معيّن حول حادثة الطّائرة الإسبانيّة.

وأن يأتي أحدُهم ليطرح مقابل الشّماتة تصرّفات الغرب الجائرة وسياسته الكاذبة فهذا يعدّ تبريراً (بطريقة غير مباشرة).

القضيّة بحسب المنطق الأرسطوطالي بسيطة: حدثٌ وقع، شماتة، طرح، عرض آخر... والعرضُ الآخر هو ما قمتَ به أنتَ، ولأنّه يأتي في صالح الشّامتين فهو ليس إلا تبريراً من نوعٍ آخر. لا تعارضني، عارض أرسطو في منطقِه!

مع الشّكر والتحيّة.

اي اخي القرصان ...انا حكيت مع الشباب المذكورين اعلاه و اكدولي انو هني ماتو من زمان !!! ..و حتى ما اطلعو ع الموضوع يعني .

المهم ...انا بس حبيت سلط الضوء على شوية خلفيات للموضوع يعني ....ما اكتر ولا اقل ..ماني عم برر للشامتين الاوباش و كمان ما عم لاقي مبرر للمعتدين الاوغاد .....انا ما عندي ازدواجية تفكير ..و بصراحة انا بشوف انو تحويل كنيسة انا صوفيا على يد العثمانيين لجامع هي جريمة ما اقل من انو الصهوينيين يحولو المسجد الاقصى لهيكل ... مثلاً يعني .

و كمان و قت بيطلع واحد عم يحكي حكي بتحسو يعني انو مانو نظامي ...بنتقدو.... بس كمان لازم انتقد الفعل اللي مانو نظامي اللي عملو الشب التاني ....هلأ مين هو الشب التاني ...و ليش الشب الاولاني عم يحكي هالحكي فعلاً , ترى ماني متأكد ..و ممكن نختلف على هالموضوع ...و منتاقس لنوصل لنتجية .

بس بضل انو الاشخاص الشامتين من العوام ..و مرتكبي الافعال الاجرامية هني من النخب المنتخبة ....و هاد بحط اشارة استفهام كبيرة شوي !!!

و تحياتي الادرياتكية :D

قرصان الأدرياتيك

23/08/2008, 09:31

صباحُ الخير...

أسعدني وجودك من جديد.

اي اخي القرصان ...انا حكيت مع الشباب المذكورين اعلاه و اكدولي انو هني ماتو من زمان !!! ..و حتى ما اطلعو ع الموضوع يعني .
نعم مات ولكنّ أثره مازال يدوّي في كلّ مسألة وقضيّة ونظرة عابرة بين الكتب تقولُ أكثر من ذلك ;).

المهم ...انا بس حبيت سلط الضوء على شوية خلفيات للموضوع يعني ....ما اكتر ولا اقل ..ماني عم برر للشامتين الاوباش و كمان ما عم لاقي مبرر للمعتدين الاوغاد .....انا ما عندي ازدواجية تفكير ..و بصراحة انا بشوف انو تحويل كنيسة انا صوفيا على يد العثمانيين لجامع هي جريمة ما اقل من انو الصهوينيين يحولو المسجد الاقصى لهيكل ... مثلاً يعني .

كلامُك هذا على رأسي وأنا أيضاً لا أتّفق مع أيّة سياسة تهدم الآخر أيّاً كانَ!
لا أودّ الدّخول في تفاصيل قضايا الغرب لأنَّ كلامي إليك كان يدور حول مسألة الحادث وما جاء من تعليقات عليه وكما يحدث دوماً عند أيّة حادثة يتعرّض لها غربيّون!!! صارَ فينا يا عزيزي كما في مسرحيّات العراقيّين الشعبيّة، قيل في واحدة منها "إذا رجّال يطلّق مرتو بديترويت يقولوا سوش صدّام".

و تحياتي الادرياتكية ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

أهلاً بك ومرحباً :D.

HashtNasht

23/08/2008, 10:32

لك اخي ليش لنورح لبعيد ؟؟

هي اليوم الخبر

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

مقتل أكثر من 76 أفغانيًا في قصف جوي للقوات الأمريكية ...معظمهم من الاطفال و النساء .

اذا بتقرى التعليقات بتلاقي :

يايها الإفرنج الصهاينة ...يا اخوة الخنازير ..... ما لكم..... لا يرى في اشباحكم الا الديدان..... و لا فى ارواحكم الا الشيطان..... و لا في إصحاحكم الا البهتان... ولا في اصباحكم الا القان.....و لا عليكم الااللعان.... و لا باسكم الا هان..... ولا شرفكم الا شان..... ولا اجلكم الا حان..... و لا موعدكم إلا ان ..... ولا زوالكم الا كان..... ولا جمعكم الا فان..... ولا علي حتفكم الا ثوان... ولا فناءكم الا دان ..... ولا تحتكم الا البركان ..... و لا فوقكم الا الحسبان..... ولا حولكم الا الطوفان .....اللهم اجزم ذرائعهم..... واخصم ودائعهم ..... و اشئم طوالعهم .....و اظلم سواطعهم...واعتم لوامعهم ..... واحمم موائعهم..... واحجم طلائعهم ..... و اوصم مرافعهم .....و اصرم فوارعهم... واهدم اصاقعهم..... و اقسم مجامعهم ..... واردم منابعهم .....و اعقم مراضعهم..... واطعم اسابعهم .....وابشم اضابعهم ..... و اقصم مدارعهم .....واثلم قواطعهم..... وسمم هوامعهم .....و اصمم مسامعهم..... وعمم مصارعهم ..... ودمدم مواقعهم..... واعظم مقامعهم ..... و ضخم فواجعهم..... و تمم مواجعهم ..... اللهم اقصفهم قصفا..... وانسفهم نسفا ..... واجعلهم عصفا ..... آمين

و كمان بتلاقي :

اللهم ياقادر يامقتدر ياعظيم السموات والارض ياخالق الكون ومدبرة يالمحيي يمميييت ياول يأخر ياظاهرا ياباطن اللهم أني أسألك وأطلبك أن تدمر أمريكا ومن عونها وترنا فيها اياتك وتزلزل الاراضي تحت أقدانهم وتجعلهم من حزن الى فرح فانهم قد قتلوا المسلمين وقتلوا الاطفال ونشرو فسادهم فينا فجعل تدبيرهم تدميرهم اللهم قد أتى رمضان فأرنا بهم ايات قيل دخول الشهر الكريم ليكمو نصرا وبشرى خيرا للمسلمين ياحي ياقيوم ياقدوس ياجبار ياصمد يالم تلد ولم تولد ولم يكن لك كفو أحد والقارئ يقول امين

__________________________________________________ __

بقى اذا مثلا وقعت طيارة...او شي جسر...او اجى شي اعصار....بركان ..هيك قصص بتصير كانو هي استجابة لدعاء هالمستضعفين ....عرفت كيف ؟

ليش ..لانو ما قادرين يعملو شي ...ما باقي بايدن سلاح غير الدعاء و الشماتة ....و ممكن بحالات متطرفة انو تلاقي شي واحد مفجر حالو .

بفيلم اميركي طويل ...كان في واحد بدو يكشف المؤامرة...و بدو يكشف كل الوجوه ...لانو لازم نعرف ..بالاسماء يعني ...يا اخي مين هني الاوادم و مين هني اخوات الشحطة !!!

انا شو بعرفني مين البريطاني الحباب مثلاً ؟؟ شو بعرفني اذا في بريطاني حباب !!!!

ال b 52 مثلا هي طيارة بريطانية ..و كتير كبيرة ..استخدمت بقتل المدنيين ابتداءً من الحرب العالمية التانية بالمانيا و اخيرا و ليش اخرا بالعراق...طيارة بترمي اطنان ...اطنان يا جماعة من المتفجرات شديدة التفجير....و هي كما تعلم غير دقيقة يعني يا بتصيب يا بتخيب ..و وقت بتخيب بتصيب شي تاني ...

بقى لك اخي انو تعى حط عينك بعيني ....انو وقت واحد بيشمت بالبريطانيين عموماً بدون تمييز و بعاملن كلاميا بطريقة غير انسانية ..ما احسن بالف مرة من وقت بتطلع ال b52 لتقتل العراقيين عموماً و تتعامل معن تفجيريا بطريقة حيوانة !!!

مين اللي عندو اسلحة دمار شامل ؟؟

لك مين هو الوحيد الل ضرب بحياتو سلاح نووي ؟؟ ..زيا سيدي و مرتين كمان

مين المحتل ؟

مين ..و مين ..و مين ...و مين .و مين !!!

المشهد هيك متل اذا عشرين شب نازلين ضرب بواحد ..و ضرب ع كبفك بعنب ..وين بيوجعو عم يضربوه ..و اخر شي اجا هو سبن مثلاً ..حشكلن .....قمت انت اتدايقت منو !!

انو لاء يا ابوالشباب ما بصير تحشك ..عيب عليك ...مانك مؤدب انت !!!!

اي بدو يحشك يا زلمي ...بدو يحشك لانو عم يموت ....داقت خلاقو نظامي يعني !!

و كمان تحياتي :D

HashtNasht

23/08/2008, 10:36

صحي عندك صورتو لهاد الشامت ؟؟

انا عندي صورة ال b 52

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

VivaSyria

23/08/2008, 11:09

HashtNasht

23/08/2008, 11:55

معلم أبو نهلة بس اسمحلي بسؤال بسيط:

انت برأيك أو مشان تكون أصح مو برأيك... برأي هالأشخاص يلي انت عم تقول انو معون حق "أو ممكن نبررلن" موت الأبرياء بالطائرة الاسبانية أو موت أبرياء على أحد الجسور بأميركا أو موت أي مواطن مدني بريء بأي دولة بأوروبا أو أميركا يعتبر انتقام رباني للناس يلي عم يموتو ببلادون؟؟ أو هالشي يعتبر قصاص أو حق دم متل مابيقولو؟؟

بس فهمني هالأبرياء شو زنبون؟؟ والله تقلي مات الطيار تبع ال B52 ولا الجنرال يلي عطا أمر القصف ولا وزير الدفاع الأميركي أو البريطاني.. بقلك فيا وما فيا انو يشمتوا ... بس ناس مادخلون بشي شو المكسب أو الفرحة بموتون؟؟

يا حبيبي ...مشان الله ..انا عم بررللن !!!

انا قلت انو معن حق !!!

ما دامك عم تحكي انو الابرياء شو ذنبن ..جاوبني انت !! ..مين اللي عم يقتل الابرياء ؟؟

بعدين مين هو طيار ال b 52 ?? انشالله مفكر ان ال b52 عمل فردي ؟؟

ال b 52 هي بريطانيا ...و وقت ال b 52 بتقصف بتكون عم تقصف باسم بريطانيا ...و البريطانيين ..ما باسم الطيار ..ولا الجنرال .

يا جماعة ..انا ماني عم قول انو المعلقين الحمير معن حق ...انا عم قول انن حمير...و اتن مفعوسين كمان
و الأولى و الاجدر فينا انو بدلل ما ننتقد هاد الحمار المفعوص ننتقد جبابرة العصر ..ملوك السلاح و الاعلام ...القتالين البكائين !!

11 ايلول عمل ارهابي ..و قذر ....بس الاقذر منو هو احتلال العراق ....موت الملايين بالعراق عمداً تحت الاحتلال الامريكي اقسى بكتير من تعليقات الشعب الجحش .

حاج نتعامى عن الحقيقة ...و يني و بينكن انا مشتغرب انو ليش ما بصير كل يوم عملية بالغرب !!...ماني عم قول انو انا مع هالعمليات ..بس المنطق بقول انو الي بدو يعمل فعل بدو يشوف ردة فعل ....ما بتقدر تاخد جيشك و طياراتك و سلاحك و تروح تحتل بلد و بعدين تقول انو و الله شو ..قال عملو تفجير بالمترو !!!

طبعا بدن بقجروا المترو..لكن شو بدن يفجروا ..مقر ال CIA ??

طبعا بدن يشمتوا العالم ..طبعا بدن يكونو عدوانيين و فطريين ...و ما منقدر نلومن ...اوروبا و اميركا من خلال حلف الاطلسي و ما قبل حلف الاطلسي و على ما اظن بعدو ..استباحوا الارض ..و اتصرفوا بهمجية و و حشية ما قدروا يطمسوها رغم امتلاكن الاعلام و وسائل كتابة التاريخ . يا اخي شي طبيعي انو يكون في مشاعر كره ..شي عادي و اقل من عادي .

ليش ما بتشوف هيك تعليقات ضد الصين ؟؟ ..او ضد اليابان ؟؟؟ ليش ؟؟؟؟

انو هلأ ازنار عم يتحاكم ؟؟؟ لاء يا سيدي ...مانو عم يتحاكم ..ولا رخ يتحاكم ...المحكمة لميلوسوفيتش و عمر البشير و صدام حسين ...هدول بيتحاكمو ..ما غيرن

حاج نلف و ندور....واضحة متل عين الشمس ..و ما بتتخبى ..و ما ممكن يعني انو تخخبى

تحياتي

VivaSyria

23/08/2008, 12:25

يا حبيبي ...مشان الله ..انا عم بررللن !!!

انا قلت انو معن حق !!!

ما دامك عم تحكي انو الابرياء شو ذنبن ..جاوبني انت !! ..مين اللي عم يقتل الابرياء ؟؟

بعدين مين هو طيار ال b 52 ?? انشالله مفكر ان ال b52 عمل فردي ؟؟

ال b 52 هي بريطانيا ...و وقت ال b 52 بتقصف بتكون عم تقصف باسم بريطانيا ...و البريطانيين ..ما باسم الطيار ..ولا الجنرال .

أول شي بس بدي وضحلك إنو الـ B52 أميركية الصنع ومانها بريطانية ودخلت ضمن منظومة سلاح الجو الأميركي أول مرة سنة 1955...ولما بتقصف وبتدمر بتقصف بإسم الحكومة الأميركية مو بإسم الشعب الأميركي...

منرجع للنقطة الأولى : يا أخي ليش ماعم توصلك نقطة انو الشعب غير الحكومة؟؟ وهاد دليل سقوط أغلب الحكومات عند أول استفتاء بعد الحرب والأمثلة كتيرة " بريطانيا واسبانيا و و و" طبعاً بحكم الديموقراطية يلي مافينا ننكرا..

يا جماعة ..انا ماني عم قول انو المعلقين الحمير معن حق ...انا عم قول انن حمير...و اتن مفعوسين كمان
و الأولى و الاجدر فينا انو بدلل ما ننتقد هاد الحمار المفعوص ننتقد جبابرة العصر ..ملوك السلاح و الاعلام ...القتالين البكائين !!

ياعمي نحنا عم ننتقدون وبقسوة.. بس ما بتخيل انو أحد وسائل الانتقاد هو الشماته بالبشر الأبرياء..

11 ايلول عمل ارهابي ..و قذر ....بس الاقذر منو هو احتلال العراق ....موت الملايين بالعراق عمداً تحت الاحتلال الامريكي اقسى بكتير من تعليقات الشعب الجحش .

ماعم افهم ليش مصر انك تربط الحكومات بالشعوب.. ياعمي اليوم جورج بوش يحظى بأقل نسبة تأييد حصل عليها رئيس أميركي بالتاريخ بسبب حرب العراق... ماعم تشوف المظاهرات والأفلام والكتب والجمعيات الأعلية بأميركا شو عم تحكي عن جورج بوش وشو عم تساوي؟؟

حاج نتعامى عن الحقيقة ...و يني و بينكن انا مشتغرب انو ليش ما بصير كل يوم عملية بالغرب !!...ماني عم قول انو انا مع هالعمليات ..بس المنطق بقول انو الي بدو يعمل فعل بدو يشوف ردة فعل ....ما بتقدر تاخد جيشك و طياراتك و سلاحك و تروح تحتل بلد و بعدين تقول انو و الله شو ..قال عملو تفجير بالمترو !!!

طبعا بدن بقجروا المترو..لكن شو بدن يفجروا ..مقر ال CIA ??

يعني انت برأيك تفجير هالمترو هو رد الفعل الصحيح للهمجية يلي عم تمارسها حكومات بعض الدول ببلادنا؟؟؟ يعني هيك ردينا اعتبارنا وأخدنا بالتار منون؟؟
طيب شو رأيك انو هيك عمليات اجرامية عم تعطي مبرر أكبر لهالحكومات وعم تخلي الشعب يحس انو بالفعل حكومتو معا حق بيلي عم تعملو.. والبشر يلي مأيدين قضيتك عم يكرهوك وينفرو من هالقضية...

طبعا بدن يشمتوا العالم ..طبعا بدن يكونو عدوانيين و فطريين ...و ما منقدر نلومن ...اوروبا و اميركا من خلال حلف الاطلسي و ما قبل حلف الاطلسي و على ما اظن بعدو ..استباحوا الارض ..و اتصرفوا بهمجية و و حشية ما قدروا يطمسوها رغم امتلاكن الاعلام و وسائل كتابة التاريخ . يا اخي شي طبيعي انو يكون في مشاعر كره ..شي عادي و اقل من عادي .

يشمتو بشو؟؟ بكم بريء ماتو؟؟ يعني اذا حكوماتون مجرمين وسفاحين مسموح الشماته بالشعوب؟؟
بعدين أنا ماعم يقلك انو مايكون في مشاعر كره.. بس كره ليلي بيستحق الكره مو كره لناس مادخلون.. يعني لإيمتى بدنا نضل ما عنا أقل درجات العقل والمنطق؟؟ لإيمتى بدنا نضل شعب عايش على الله .. منحكي شو ماكان ومنعمل شو ماكان.. شوية عقل شوية منطق شوية أخلاق بيمشي حالنا... واذا في كم مجرم من قادة الدول وماعندون أخلاق هالشي ما بيبرللنا انو نصير همجين متلون وردات فعلنا حيوانية...

ليش ما بتشوف هيك تعليقات ضد الصين ؟؟ ..او ضد اليابان ؟؟؟ ليش ؟؟؟؟

انو هلأ ازنار عم يتحاكم ؟؟؟ لاء يا سيدي ...مانو عم يتحاكم ..ولا رخ يتحاكم ...المحكمة لميلوسوفيتش و عمر البشير و صدام حسين ...هدول بيتحاكمو ..ما غيرن

حاج نلف و ندور....واضحة متل عين الشمس ..و ما بتتخبى ..و ما ممكن يعني انو تخخبى

كلنا منعرف انو في ازدواجية بالمعايير وفي منطق قوة عم يحكم هالعالم.. بس برجع بقلك في شعوب مالها ذنب.. بشر متلي ومتلك.. ومتل الطفل يلي عم يموت بفلسطين وبالعراق.. انسانية بس..

تحياتي
هلا صديقي

HashtNasht

23/08/2008, 12:54

منرجع للنقطة الأولى : يا أخي ليش ماعم توصلك نقطة انو الشعب غير الحكومة؟؟ وهاد دليل سقوط أغلب الحكومات عند أول استفتاء بعد الحرب والأمثلة كتيرة " بريطانيا واسبانيا و و و" طبعاً بحكم الديموقراطية يلي مافينا ننكرا..

يا سيدي و حياة المعكرونة انت اللي ما عم يوصلك شي...و مع احترامي الك ترى ما فهمت عليي و لا كلمة !!!

بعدين تعى لهون ..الديمقراطية ما فينك تنكرا صح !!!

طيب ما هني المجرمين اجو ديمقراطيا ...منخبين من الشعب و ممثلين للشعب ...لطموحات الشعب و ارادة الشعب !! ما هيك ؟؟؟

ليش عم تقلي انو اسقطوا الحكومة....ليش ما تقول انو هني اللي جابو الحكومة الاولانية ؟؟ شو حكومة ازنار كانت جاي بانقلاب يعني ....لاء

طيب ازنار طلع كذاب ..عم يكذب ع الشعب ...اجو شالوه ..طيب شو عملو معو؟؟ شبحو ع السلم شي ؟؟ لاء ...و لاء ..و ثم لاء مع انو هو مسؤول عن قتل الملايين ...شريك بجرائم اكبر بكتير من جرائم ميلوسوفيتش ....بس لانن كذابين ...نعم ..كذابين و محترفين كذب ...مين هني ؟؟

الاسبان .... و ما تقلي ما تعمم ...لانو ما انا اللي عم عمم ...انا عم اقرأ بس .

ماعم افهم ليش مصر انك تربط الحكومات بالشعوب.. ياعمي اليوم جورج بوش يحظى بأقل نسبة تأييد حصل عليها رئيس أميركي بالتاريخ بسبب حرب العراق... ماعم تشوف المظاهرات والأفلام والكتب والجمعيات الأعلية بأميركا شو عم تحكي عن جورج بوش وشو عم تساوي؟؟

هلأ انا اللي ما عم شوف ؟؟

حبيبي جورج بوش هي تاني ولاية الو ..زتاني ولاية ....يعني انتخبوا مرة تانية الشباب !!!!

و بتقلي انو انا عم اربط ...مين انا لحل و اربط ؟؟ ..الشعب الاميركي انتخب بوش مرتين ..مصرين يعني الشباب ..و يمكن لو بحقلو جولة تالتة كانو انتخبو ه ..بقا لا تقلي اربط و فك ...انا لابربط ولا بفك ....ديموقراطيا انتخبوه مرتين ...و انا ماني فهمان بصراحة شو دين اخت هيك شعب بينتخب بوش مرتين !!!

يعني انت برأيك تفجير هالمترو هو رد الفعل الصحيح للهمجية يلي عم تمارسها حكومات بعض الدول ببلادنا؟؟؟ يعني هيك ردينا اعتبارنا وأخدنا بالتار منون؟؟ طيب شو رأيك انو هيك عمليات اجرامية عم تعطي مبرر أكبر لهالحكومات وعم تخلي الشعب يحس انو بالفعل حكومتو معا حق بيلي عم تعملو.. والبشر يلي مأيدين قضيتك عم يكرهوك وينفرو من هالقضية...

حبيبي رجاء قرا الموضوع ...ما بدي ضل عيد

انا ما قلت انو صحيح ..انا قلت انو طبيعي ..و عادي ..و اقل من عادي ...العنف بولد العنف ...و وقت بدن يجو ع العراق بيعملوه مجموعات فطرية ..لام يشوفو رد فعل فطري ...شو كانوا متوقعين مثلاً ..انو يلاقو العراقيين شالحين تيابن بالهايد بارك بمظاهرة سلمية !!!

بعدين أنا ماعم يقلك انو مايكون في مشاعر كره.. بس كره ليلي بيستحق الكره مو كره لناس مادخلون.. يعني لإيمتى بدنا نضل ما عنا أقل درجات العقل والمنطق؟؟ لإيمتى بدنا نضل شعب عايش على الله .. منحكي شو ماكان ومنعمل شو ماكان.. شوية عقل شوية منطق شوية أخلاق بيمشي حالنا... واذا في كم مجرم من قادة الدول وماعندون أخلاق هالشي ما بيبرللنا انو نصير همجين متلون وردات فعلنا حيوانية...
يشمتو بشو؟؟ بكم بريء ماتو؟؟ يعني اذا حكوماتون مجرمين وسفاحين مسموح الشماته بالشعوب؟؟

اي ما تحكيني هاد الحكي الي ...اول شي روح نزل ليستا بالمجرمين اللي لازم يستهدفو ..و وزعا ع الشعب المسكين ...و تاني شي روح لعند واحد انقطعت رجلو و انقلعت عينو بالقصف الامريكي و قلو يا اخي ما بصير ..نحنا لازم يكون عنا شوية منطق ..شويع عقل ....شوية اخلاق !!!!!
و بالمناسبة ..انا ما ببرأ الشعوب الحلف اطلسية ...هني مستفيدين ...و كتير منن مبسوطين ..و الدليل ما شفنا شي بدل عالعكس ...و ما تقلي انو مظاهرات ..هاد حكي للجرايد !!

كلنا منعرف انو في ازدواجية بالمعايير وفي منطق قوة عم يحكم هالعالم.. بس برجع بقلك في شعوب مالها ذنب.. بشر متلي ومتلك.. ومتل الطفل يلي عم يموت بفلسطين وبالعراق.. انسانية بس..

تماماً..و مشان هيك عم قلك خلينا ندور ع اعداء الانسانية و نحط اصبعنا بعينن ....ما نمسك تعليق تافه من واحد تافه و نعملو نموذج لمعاداة الشرق المتخلف للغرب المنير !!!

هزلت يا مان !

مين اعداء الانسانية ؟

باريس او كابل ؟

بغداد او واشنطن ؟

دمشق ولا لندن ؟ ؟

المحارب العتيق

23/08/2008, 15:13

على هامش الحوار
من سينادي بالأنتخابات الأميركية ويزاود على حماية أميركا خارجيا" . ومحاربة من يصوروهم على أنهم أعداء الشعب الأميركي في بلدانهم بضربات أستباقيةسيفوز في الأنتخابات

yass

23/08/2008, 22:37

كمان شوي رح حس بالذنب لأني زعلان عالمتوفين بالحادث...

أبو نهلة مرة أخيرة... غلطان.. و كتير كمان... لأنك عم تحمّل ناس مسؤولية شي مانهون مسؤولين عنو.. أو على الأقل مانهون مسؤولين أكتر من ابن جلدتك...

هاد اللي نازل تقسيم باسم الاسلام... بنفس الوقت تلاقيه ما يرضى تحكي كلمة ع شيخ من شيوخ الوهابية السعودية... اللي زبطو فتاوي حتى لدخول الاميركان بالعراق, و اللي محالفين الامبريالية بأقصى درجاتها و أقصى قسوتها و هنن شركاء أساسيين بكل اللي عم يصير.. هاي ازدواجية المعيار يا أبو نهلة..

قطر فيها أكبر قاعدة عسكرية اميركية بالشرق الأوسط, منها طلع كل الضرب اللي اجا عالعراق, فيها مكتب تمثيل اسرائيلي عينك عينك و وزيرة الخارجية الاسرائيلية رايحة جاية لعندون.. برأيك حدا يشمت بالقطري لما يموت بحادث طيارة؟؟ طب شو عمل الاسباني و ما عملو القطري أو الكويتي أو السعودي؟؟ شو ذنبو ازا بنصنا عايشة الامبريالية و حاكمتنا و بنفس الوقت الامبريالية اللي حاكمتنا هي اللي بتسب عالامبريالية؟

عم تحكي و كأنو كل الغرب جورج بوش و شلتو.. و كأنو الناخب يروح يصّوت برنامج انتخابي اسمو: نضرب العرب و للا ما نضربهون... لأ مو هيك.. و لا يقترب من هيك.. كل ممارسات الغرب هي بشراكة حكوماتنا, و حكوماتنا لو ما جايبة الدب لكرمها كان ما اجا لحالو.. بس حكوماتنا ما حدا يحكي كلمة عنها...

فيك تقلي انو العرب ما طبلو و زمرو على جية أميركا ع أفغانستان وقت دعمت "الأفغان العرب" بنزاعهون مع الاجتياح السوفيتي؟

فيك تقلي انو مو العرب هنن اللي استنجدو بأميركا لتحرر الكويت بحرب حتى سوريا شاركت فيها, و بالتالي شرّعو الوجود الأميركي في أراضيها؟

فيك تقلي انو العرب ما طبلو و زمرو لأميركا و الناتو وقت فات ع كوسوفو و شلّح يوغوسلافيا مهد قوميتها؟؟

أميركا فاتت على العراق و هي متحالفة مع العرب.. و اللي ما استرجى يعلن صراحة عن تحالفو خلاه شوي مستّر.. بس بالنهاية كلهون كانو موافقين.. و كلهون استفادو بدرجات متفاوتة.. و هنن شركاء بهالشي

هلأ انت بتشوف طبيعي انو ازا مات شي سوري يجي حدا لبناني يشمت فيه لأنو معبي علينا؟ تلاقيه أمر عادي؟

آسف يا شباب بس بهالموضوع بالذات ما فيني كون حيادي.. ما فيني الاقي مبرر (أو تفهّم) للشماتة بموت صديقتين, و لا فيني حتى ألاقي تفهّم لهجمات مدريد مثلا (لأنو ان جيت للواقع.. ع ايد الجيش الاسباني ما مات حدا.. لا بأفغانستان و لا بالعراق.. و خسائر الاسبان 195 قتيل بتفجيرات ارهابية -و ما عم احسب الجنود اللي ماتو بحادث طيارة و هنن راجعين من أفغانستان.. هدول ع طرف)

yass

23/08/2008, 22:54

طيب ازنار طلع كذاب ..عم يكذب ع الشعب ...اجو شالوه ..طيب شو عملو معو؟؟ شبحو ع السلم شي ؟؟ لاء ...و لاء ..و ثم لاء مع انو هو مسؤول عن قتل الملايين ...شريك بجرائم اكبر بكتير من جرائم ميلوسوفيتش ....بس لانن كذابين ...نعم ..كذابين و محترفين كذب ...مين هني ؟؟

الاسبان .... و ما تقلي ما تعمم ...لانو ما انا اللي عم عمم ...انا عم اقرأ بس .لك حاج مسخرة بحياة دينك أب نهلة شو عم تحكي انت يا زلمة؟؟؟

الشرشحة اللي أكلها ازنار ما راح ياكلها بحياتو حاكم عربي من شعبو.. بحياتو ها.. هاد الكلب ابن الكلب صدام حسين صار بطل بعيون العربان... ( و انت الك صولات و جولات مع واحد فات فتح عزا هون بالشعر... تتزكر؟ )

بس ينشال حاكم عربي بنفس طريقة شيلة أزنار منحكي ساعتا... بس شعب يقلّع حاكمو لأنو شاعر بالخجل من موقفو تجاه شعب تاني يبقى سب الاسبان ع كيفك.. هلأ ما بيطلعلك... (مو كأبو نهلة ما بيطلعلك.. الشغلة مانها شخصنة.. عم احكي كموقف اعتباري)

يعني هلأ انت ازا ما طالبت بمحاكمة النظام السوري على تجاوزاتو بلبنان انت كمان كذاب و ستين كذاب.. شو رأيك بهالحكي؟؟

بس تطالب بمحاكمة كل الزعماء العرب اللي ساندو أميركا بدعمها لطالبان, و ساهمو بجيبة أميركا عالعراق, و بس تطالب بمحاكمة القيادة السورية اللي بعتت الجيش يحارب جنب أميركا بحرب الخليج الأولى, و بس تطالب بمحاكمة المتحالفين مع روسيا بسبب مذابحها بالشيشان.. يبقى تعا سب عالشعب الاسباني.. و ازا ما عملت كل هدول يكون انت اللي عندك ازدواجية نظر مو أنا

ما نمسك تعليق تافه من واحد تافه و نعملو نموذج لمعاداة الشرق المتخلف للغرب المنير !!!لك تروك البادوايزر (يا امبريالي :lol:) من أيدك يلعن سماك انت التاني... هلأ برأيك هاد أنا حكيي؟؟؟ نرجع لأول الموضوع.. ليك شو عم احكي أنا:

لازم أذكر انو في كتير من التعليقات طبيعية بهيك حالة و عادية, من ناس عاطين للخبر حقو و حافظين رهبة الموت ... يعني ردة الفعل اللي بتصوّر إي انسان سوي نفسيا و أخلاقيا يفترض تتولد عندو عند قراءة خبر...حكيت هالحكي قبل ما اجيب النموذجين ... و النموذجين أنا ما جبتون كنموذج انو ليك الشرق شو كيت و كيت.. عم قلك انو أغلب التعليقات منطقية بأمر متل هاد.. جبت نموذجين للكراهية و الحقد الأسود.. و لا تقلي هدول اللي حكو كتير هامهون أفغانستان و للا العراق أو حتى فلسطين.. واحد عم يترحّم عالمسلمين فيما لو في شي قتيل مسلم و واحد يريد يعلي راية الاسلام في الغرب الكافر و شايف الأمر عقاب رباني.. هدول انا عندي مستواهون بمستوى واحد من أعضاء فرقة ميتاليكا.. اللي طلع من فترة عم يقو انو قالولو انو بغوانتانامو الحراس الأميركان يجبرو المساجين يتسمعو ع أغانيه و هو فخور بانو أغانيه تكون مساعدة لحماية بلدو .. نفس النموذج بالزبط...

جرب هلأ تبعت ايميل لواحد من هدول و عم تحكي بالعاطل عن بن باز ... بقص أيدي ازا ما بيحلل دمك (رغم انو بن باز طالع فتوى بجواز الاستعانة بالقوات الأميركية ضد صدام حسين.. و موجود باليوتيوب الفيديو الشهير تبع "كفار يا شيخ" ) .. فشو رأيك بازواجية هالمعايير؟؟ شو فارق بن باز اللي مرتبتو مرتبة القديسين عن ازنار؟ و ليش بتسب الشعب الاسباني و تقلو كذاب ابن كذاب رغم احتقارو لأزنار, و ما تسب كل مسلم محترم بن باز؟؟ اشرحلي ياها هالنقطة .. مشان ازدواجية المعايير مو مشان شي :p

راح تقلي انو ها.. حكي تبع ميتاليكا دليل على انو الكره متبادل.. راح قلك لأ... لأنو متل ما تبع ميتاليكا أميركي... الناس اللي استضافت ادوار سعيد و عطتو كل التسهيلات و الدعم كمان اميركان... المرأة الأميركية اللي ماتت تحت دبابة اسرائيلية بغزة كمان أميركية.. و انت عم تعمم و كتير... عم تصب جام المسؤولية على ناس و ترفعها عن ناس ولاد بلدنا عملو متل ما عملو الأميركان بالزبط.. طب ليش مسامحهون هدول؟

ليش ما بتشوف هيك تعليقات ضد الصين ؟؟ ..او ضد اليابان ؟؟؟ ليش ؟؟؟؟ لا تخاف التعليقات ضد الصينيين الملاحدة موجودة و كتير كمان.. و ضد اليابان ما بعرف.. بس صحيح ليش مافي؟؟

اليابان دعمت حرب العراق معنويا قد اسبانيا (بتزكر قمة بوش مع رئيس وزراء اليابان.. ما بتزكر اسمو بس شكلو يشبه ريتشارد غير بس على ياباني :lol:).. و اليابان بعتت قوات عالعراق من أول الحرب.. شي 650 جندي لساتهون موجودين رغم انو تغيرت 3 حكومات باليابان.. اسبانيا بعز دعمها بعتت 131 جندي بدون عتاد حرب, و رجعو بقرار رئيس الوزراء ثاباتيرو, و هالقرار كان القرار رقم 1 من فترتو الرئاسية و أصدرو بعد 20 دقيقة من توليه منصبو

بلغاريا عندا جنود بالعراق

بولونيا عندا جنود بالعراق

كوريا عندا جنود بالعراق

ليش هدول ما ينشمت فيهون و ينسبّو؟ ما بقبل.. مو عدل.. اطالب بالشماتة فيهون كمان :?, و بمحاكمة قادتهم, و اطالب كمان بمحاكمة كل مدخن مارلبورو عربي, و كل شريب بادوايزر عربي.. و أولهم أبو نهلة :pos:

صحيح كمان شغلة أبو نهلة... انو عم تقول انو التفجيرات اللي تصير بأوربا هو رد فعل لفعل... طيب بدي هالشي يشمل التفجيرات ضد المواطنين العراقيين من قبل من يفترض انو هو مسحوق؟ أو الهجمات على كنائس الأقلية المسيحية العراقية و قتل رجال الدين المسيحي العراقيين؟؟ لأنو أنا على ثقة, مو بس على ثقة.. براهنك على عشا انو اللي شمتان بالقتلى الاسبان كمان شمتان بهدول... و للا شو رأيك انت؟