مكتبة أخوية - دعوة للنقاش

[Fares]

مرحبا...
أنا من فترة منقطع عن المكتبة لأسباب بعضها شخصية (ضيق الوقت الشديد) وبعضها الآخر هو موضوع النقاش يلي حابب أطرحو هون...

ما مدى شرعية ما نقوم به في المكتبة؟ أقصد أنو نحن (سواء يلي عم ينزل كتاب من الموقع أو يلي عم يرفع كتاب بالمكتبة) هل ما نقوم به هو سرقة؟ هل هو تعدي على الحقوق الفكرية للكتاب ولدور النشر؟ أم أنه شيء طبيعي ومن حق الجميع الاستفادة من هذه النسخ الالكترونية؟؟

هالشي خلاني بعّد بالفترة الماضية (كأحد الأسباب كما ذكرت)، والأهم أن هالموضوع كان شاغلي فكري وما عم أعرف مدى أخلاقية أو شرعية تناقل الكتب عبر الانترنت بالمجان... مشان هيك رح أطرح الموضوع للنقاش ورح أبدا بهالكام فكرة ونتيجة يلي توصلتلهون:

حقوق النشر والتوزيع والملكية الفكرية تنطبق تماماً على الكتب الالكترونية كما هي على النسخ الورقية. ولدور النشر كما للمؤلف حق قانوني (بالإضافة للحق الأخلاقي طبعاً) بملاحقة كل من ينشر الكتب (بأي وسيلة) من دون الحصول على الموافقة الخطية من صاحب العلاقة.

هل نشر الكتب الكترونياً وعبر المنتديات يؤثر على بيع النسخة الورقية من الكتاب؟
باعتقادي يبقى تأثير النسخة الالكترونية على بيع النسخ الورقية محدود.. أول شي كنت عم أقنع حالي أنو يا ولد أنت بتنزيلك الكتاب بشكل نسخة الكترونية بتكون عم تعمل دعاية مجانية للكتاب ومؤلف الكتاب، يعني يلي بينزل الكتاب وبيعجبو أكيد رح يروح ويشتريه، كما أن نوعية قراء الكتاب الالكتروني تختلف عن قرّاء الكتاب الورقي، مشان هيك يلي رح يشتري الكتاب (الورقي) رح يشتريه بغض النظر عن توفر أو عدم توفر نسخة الكترونية منه على جهازه الصلب...
بس بعدين قلت لاااء... حاجي تضحك على حالك.. يعني من الأساس المقارنة ظالمة! في السوق الكثير من الكتب الالكترونية، وهي للبيع يعني ما ببلاش... والسؤال لازم يتم عن تأثير بيع الكتب الالكترونية بالمقارنة مع انتشارها بالمجان على الانترنت!!

طيب معناها هل يعتبر الموضوع برمته ( من قبل رافع ومنزل الكتاب) سرقة؟؟
أقولها وبضمير مرتاح: نعم سرقة.

ووقت وصلت لهالقناعة ارتحت!! يعني أنا على قناعة بأنها سرقة، ومع ذلك عم نزل كتب، لأنو برأيي أن نشر هالنوعية من الثقافة نحن بأمس الحاجة إليه وبيستاهل شوية تجاوزات.

هذا شوي من الأفكار يلي عم تدور براسي حول هالموضوع.
شاركونا برأيكم أدامكم الله ...

فارس

[butterfly]

هالسؤال كان زاعجني لفترة كبيرة ! ( ويمكن اوقات لهلق ) من بدايات المكتبة .. انو هل اللي عم نعملو مشروع .. ؟
" أخلاقي " ؟
وكتير ضايقتني فكرة اني عم احرم اشخاص يمكن من نتاج إبداعا ... اللي هو حقا الطبيعي
انو الكتاب الالكتروني ما بيقدر يلغي الكتاب الورقي بس بيحد طبعا ً من كمية انتشارو

حاولت أقارن مكتبة أخوية بمكتبات الإعارة .. اللي هي اليوم كمان بتحد من شراء الكتاب الورقي ..( أنا من طفولتي كنت جدد كل سنة اشتراك بمكتبة اعارة .. لهيك اغلب الكتب اللي قريانتن بحياتي ما بمتلكن )

طبعا ً المبررات كتيرة وموجودة كتير ! ... الكتب اللي اغلبا ما متوفر .. بالمكتبات حتى .. الكتب اللي غالية .. الكتب اللي انت عندك فضول انك تطلع عليها بس لو بدك تضطر تشتريها بتلغي الفكرة من اصلو ..الأشخاص اللي بالغربة

طيب كمان ما عندي ثقافة الحقوق الفكرية او حقوق المنتج .. بشتري سيدياتي نسخ ! وبرامجي بالجملة هدول تبعون " سي دي يحوي كل منتجات الأدوب " ! والموسيقى بنزلا من النت بسمعا ...

بصراحة قدرت أتفاوض مع ضميري
اي لا أخلاقي ..
اي غير مشروع
بس أي .. نافع وكتير ..
انا كعضو بأخوية .. كتير كتاب سمعت بأسمن من أخوية .. وكتير كتاب بحثت وراهن وبحثت عنن لأجل مكتبة اخوية .. وكتير كتب ما كنت قريتا لو ما متواجدة بمكتبة اخوية ...

عرفانة اني اللي عم اعملو غلط ... ( ما بقدر اتخبى ورا اصبعتي وقول عنو صح مدام في اطراف عم تتضرر )
بس اقتناعي انو اللي عم نعملو أكثر جدوى .. وحل فعال جدا ً لنشر الثقافة ..
عم يخليني كمل فيه .. بفخر

" أنا فخورة بأغلاطي .. بالمكتبة "


يسلمو فارس ..

[yass]

هممممممممممممممم.....

للوهلة الأولى.... سرقة, سرقة و لكن.....

لو عم نربح تجاريا من نشر الكتب هون كان مافي مجال للشك... سرقة

بس اعتقد انو الوضع خاص, ما اعتقد انو النسخة الالكترونية تؤثر على مبيعات الكتب (المعدومة اصلا).. يعني اللي ينزّل كتاب الكتروني و يقراه عالكمبيوتر يكون يا اما ما عندو امكانية مادية يشتري الكتاب (لأنو سعر الكتاب غالي جدا جدا, يعني مو معقول كتاب للماغوط, اللي هو كاتب سوري, سعرو 500 ليرة) و طبعا هون عم نعمل معروف للثقافة, لأنو الشخص يا يقراه عنا يا ما يقراه...

النمط الثاني هو اللي يقرا كتب مو متوفرة بالمكتبات, يعني في كتب هون لو بلف عليها كل مكتبات الرقة ما بلاقيها, أكيد, لذلك نرجع ع نفس القصة, الشخص يا يقراها هون يا ما يقراها

النمط الثالث هو اللي ساكن برا أمثالي, ما عندي مقدرة اشتري كتب عربي هون, مافي لأنو.. لذلك نرجع ع نفس القصة.. يا أقرا هون بالعربي يا ما أقرا بالعربي عالخالص...


سرقة سرقة ما اختلفنا... بس اعتقد انو هالسرقة عم تنشر ثقافة و عم تتيح فرصة قراءة لنسبة منيح من الناس ما عندها طريقة اخرى للقراءة... لذلك, أخلاقيا اعتقد انو ما لازم نشعر بالذنب... يا ريت كل السرقات هيك



سلامات

[MadMax]

كاتب النص الأصلي : yass

مو معقول كتاب للماغوط, اللي هو كاتب سوري, سعرو 500 ليرة

لو سألنا الماغوط على أيامو
يا ترى بفضل كل السوريين يقرأو كتبو بالمجان ....
و لا يقرأوها بس يللي بيقدروا يشتروها .... ..؟؟






قولك شو كان جاوب ..؟؟

[yass]

كاتب النص الأصلي : Madmax

لو سألنا الماغوط على أيامو
يا ترى بفضل كل السوريين يقرأو كتبو بالمجان ....
و لا يقرأوها بس يللي بيقدروا يشتروها .... ..؟؟






قولك شو كان جاوب ..؟؟

أكيد لما تكون تعبان ع شغلك ما راح تشتغل بالبلاش, و لا راح تهديه بلا مقابل... بس أعتقد حتى الكتّاب ممكن الى حد ما يفهمو اللي صار.. هون باسبانيا عم يصير نقاش مشابه بخصوص الموسيقى من النت... و الدولة ما عم ترضى تجبر الشركات تمنع برامج متل الأيمول و الآريس لأنو هون أرخص سي دي حقو حوالي 15 يورو (الكتب أرخص طبعا) و المبرر تبع الحكومة هو انو يا عم الحق على شركات الانتاج لأنو الموسيقى غالية, لو انها رخيصة متل الكتب كان ما حدا قرصنها... أو بدرجة أقل

ما بعرف..... لما يكون الفرق ليس بأنو تقرا بمصاري أو بتقرا ببلاش لأنك ما بدك تدفع, أو تقرا ببلاش لأنو مانك قادر تدفع أو ببساطة مو متوفر انك تشتري, أعتقد انو حتى الكاتب راح يتفهّم ها لأمر...

[MadMax]

كاتب النص الأصلي : yass

أكيد لما تكون تعبان ع شغلك ما راح تشتغل بالبلاش, و لا راح تهديه بلا مقابل... بس أعتقد حتى الكتّاب ممكن الى حد ما يفهمو اللي صار.. هون باسبانيا عم يصير نقاش مشابه بخصوص الموسيقى من النت... و الدولة ما عم ترضى تجبر الشركات تمنع برامج متل الأيمول و الآريس لأنو هون أرخص سي دي حقو حوالي 15 يورو (الكتب أرخص طبعا) و المبرر تبع الحكومة هو انو يا عم الحق على شركات الانتاج لأنو الموسيقى غالية, لو انها رخيصة متل الكتب كان ما حدا قرصنها... أو بدرجة أقل

ما بعرف..... لما يكون الفرق ليس بأنو تقرا بمصاري أو بتقرا ببلاش لأنك ما بدك تدفع, أو تقرا ببلاش لأنو مانك قادر تدفع أو ببساطة مو متوفر انك تشتري, أعتقد انو حتى الكاتب راح يتفهّم ها لأمر...

كلامك مزبوط
بس نوعاً ما سوريا مثلاً ..... الها وضع خاص ...

و كل شي الو سلبياتو و ايجابياتو ...
بس هون تحديداً ...... ايجابيات السرقة أكبر بكتير

[Fares]

كاتب النص الأصلي : butterfly

طبعا ً المبررات كتيرة وموجودة كتير ! ... الكتب اللي اغلبا ما متوفر .. بالمكتبات حتى .. الكتب اللي غالية .. الكتب اللي انت عندك فضول انك تطلع عليها بس لو بدك تضطر تشتريها بتلغي الفكرة من اصلو ..الأشخاص اللي بالغربة

كاتب النص الأصلي : yass

هممممممممممممممم.....

بس اعتقد انو الوضع خاص, ما اعتقد انو النسخة الالكترونية تؤثر على مبيعات الكتب (المعدومة اصلا).. يعني اللي ينزّل كتاب الكتروني و يقراه عالكمبيوتر يكون يا اما ما عندو امكانية مادية يشتري الكتاب (لأنو سعر الكتاب غالي جدا جدا, يعني مو معقول كتاب للماغوط, اللي هو كاتب سوري, سعرو 500 ليرة) و طبعا هون عم نعمل معروف للثقافة, لأنو الشخص يا يقراه عنا يا ما يقراه...

النمط الثاني هو اللي يقرا كتب مو متوفرة بالمكتبات, يعني في كتب هون لو بلف عليها كل مكتبات الرقة ما بلاقيها, أكيد, لذلك نرجع ع نفس القصة, الشخص يا يقراها هون يا ما يقراها

النمط الثالث هو اللي ساكن برا أمثالي, ما عندي مقدرة اشتري كتب عربي هون, مافي لأنو.. لذلك نرجع ع نفس القصة.. يا أقرا هون بالعربي يا ما أقرا بالعربي عالخالص...

هلأ أنا برجع بقول أنو أنا عم (وسوف) ادعم مشروع الكتب الالكترونية المجانية... ولكن......

بالنسبة للناس يلي بالغربة، في كتير خدمات لتوصيل الكتاب لعند باب البيت إذا بدنا نسخة ورقية، وفي مواقع بتبيع الكتب بنسخة الكترونية. يعني بصراحة نحن (كمغتربين) قادرين نحصل على كتب عربية بطريقة أو بأخرى..

الكتب الغير متوفرة.... صح، في كتير كتب غير متوفرة وعم تتدبر منها نسخة الكترونية... بس الظاهرة منتشرة ابتداءً من قصص ميكي ماوس وانتهاءً بأندر الكتب، يعني الخدمة متاحة ما بس مشان توفير الغير متوفر، وإنما كمنافس حقيقي لدور النشر الرسمية.

أما بالنسبة لغلاء أسعار الكتب، فيمكن هذا هو أكتر سبب بيدفعني لدعم هالسياسة (الروبنهودية). بس عم يخطر على بالي قول سمعتو كتير رغم اشمئزازي منو: (الغبي هو من يعير كتاباً، والأغبى هو من يعيده لصاحبه بعد الانتهاء منه!!!).

نقطة أخيرة، من دوافعي كمان لنشر الكتب هون بأخوية هو أن نخلق جو ثقافي حواري بين بعض، نناقش الكتب يلي عم نقراها، شو عجبنا فيها أفكار، شو ما عجبنا.... إلخ. بس هالهدف من زمان انمحى نتيجة السياسة الاستهلاكية من قبل قراء أخوية الأشاوس..

فارس

[التقرير الجوال]

حسيت و أنا عم اقرأ كلامك برقي حضاري و فكري .
بدي احكي عن تجربتي مع الكتاب .. بالنسبه إلي القراءه هي نوعين الأول كدرس و نحن تعودنا عليه بالقعده عالطاوله و فتح الكتب .. التاني هوي اشباع الرغبات النفسيه بقراءه مواد مختلفه يتم اختيارها بشكل انتقائي عن طريق اختيار القارئ لماده الكتاب .
انا بالعاده ما بقرأ لهدف المطالعه إلا بشروط اولها ما بتكون القراءه من الكمبيوتر او من صحائف " يعني اذا صار و طبعت الكتاب الالكتروني من الكمبيوتر " يا أخي بحسو مو كتاب و كمان ما بستمتع بالقراءه لما بقرا من الانتر نت أو الكتب الالكترونيه .. بيجوز لأن جرت العاده بالقراءه من الكتاب ... أما عن حقوق النشر فهي أمر مفروغ منّو و لازم الكل يحترمها بالابتعاد عن السرقه لأنها ببساطه الكتاب كلّف كتير لينطبع و أخد جهد زمني طويل و جهد جسدي و فكري من الكاتب لانجازو .
أما عن الكتب الالكترونيه يللي غزت الانترنت حالياً فهي امرين 1- اما محفوظه و بدك تدفع لتنزيلها 2- أو كتب فيك تنزلها من دون اشتراك او دفع مصاري و هي فيها نظر و اذا مهتم كتير بمصدرها و كيف الموقع تحصل عليها ففيك تبحبش عن هالمسأله و اذا ثبت بأنو مسروق فهون جد الامر صار متل ما حكيت " سرقه " و كمان انا بخالفك الراي لما قلت " تجاوزات " بس الناس عم تساويها .
أما عن مدى تأثير الكتاب الالكتروني على الكتاب العادي فبرأيي لا شيئ .. اذا كنت من هواة المطالعه فرح تفضّل الكتاب العادي .

[suryoyo]

هي المسؤولية ادبية ...

فعلا وفق قانون الملكية الفكرية ... اي نسخ بدون موافقة خطية من المؤلف ممنوع ...


النشر الالكتروني ... هو بادرة تعريف بالكتاب ... لان ممكن يشتريه القارئ اذا عجبته النسخة الالكترونية بنسخة ورقية

و اذا ما عجبوا ما يشتريه احسن ما يشتريه و بعدين يطلع الكتاب غير مفيد !


لان مهما كانت العيون 6\6 ما تقاوم شاشة الكومبيوتر !

[Moonlights]

هناك إجماع على أنها سرقة متبوعة بكلمة ولكن !
وهذا انطلاقاً من مقولة إن الغاية تبرر الوسيلة

قبل ذلك وبالنسبة للبعض "وهُم كثر" نراهم يتكلمون عن أهمية الكتاب وضرورته ويتبعون ذلك بأنهم لا يستطيعون شراء الكتاب.
نعم عند المثير من الشباب وبحكم عدم استقلالهم الاقتصادي واعتمادهم على الأهل , يعيشون في ضائقة ولكنهم أغلب الأحيان ينفقون أضعاف ثمن الكتب على نواحي ضارة غير مفيدة مثلاً المدخن ينفق حوالي 1000 ل.س وسطياً في الشهر على التبغ وهذا ما يعادل ثمن كتابين إن لم يكن أكثر ثم يقول لا أستطيع شراء الكتب .
لا أود أن أسرد الكثير من أوجه الإنفاق التي يجدها الشاب والصبية أهم بكثير من شراء كتاب .

المشكلة لا تنحصر في القدرة على الشراء وغيرها كما ذكر يمكن الاستعارة من المكتبات أو من الأصدقاء ولكن هذا يتم على أضيق الحدود , المشكلة ليست فردية بل هي ظاهرة لها أسباب متعددة لن أدعي بأني أستطيع الإحاطة بها "فهي بحاجة إلى أبحاث تخصصية" ولاكن أحد أهم أسبابها, الانهيارات التي حدثت منذ أوائل تسعينات القرن المنصرم للتجارب الفكرية من شيوعية وقومية والفراغ الذي أحدثته وبروز التيارات الدينية "السلفية,المعتدلة" التي حاولت ملئ الفراغ الذي حدث"وهذا ما تعكسه مبيعات الكتب وحركة النشر".

كل ذلك مدعوم من قبل السلطات العربية لإفراغ الإنسان من مضمونه وجعله يجري وراء قشور الحداثة بحجة إبعاد الشباب عن التيارات السلفية المتعصبة "كما نلاحظ في جميع القنوات الفضائية " ولكن الهدف هو خلق هذا الكائن الأجوف غير القادر على وعي ذاته ومجتمعه ونظام الحكم لديه.

إذاً الغاية تبرر الوسيلة ... إذا كانت الغاية مبرره أصلاُ.

وغايتنا هنا الحث على القراءة والتعريف بدور الفكر وبالتالي الكتاب وقدرته على النهوض بالوعي " قالت Butterfly بأنها ستكون سعيدة جداً إن استفاد 50 شخص من المكتبة فقط " وهذا أمر مهم جداً كما أراه , سابقاً كان الكثير يشترون الكتاب ويضعونه على الرف دون أن يفكروا أبداً بقراءته , أ تتم قراءته فقط للقول "نعم عندي إياه , أي أي قرأته كتير حلو " وأظن الآن يتم تحميل الكتاب وربما قراءته لنفس الأسباب .

وعليه إن كان من تأثير لعملية نشر الكتب إلكترونياً على الحقوق الفكرية "للناشرين" فهو تأثير ضئيل جداً وإيجابي لأن من يقرأ "وليس من يطالع ويتصفح" له منهجية خاصة في قراءاته ولن يجدها كلها منشورة إلكترونياً وبالمجان لذلك سوف يشتريها وخاصة الإصدارات الجديدة .

تحياتي

[passerby_intime]

لما كنت هناك رأيت هذا الرد من ضمن التعليقات >>

كاتب النص الأصلي : butterfly

سبق وقلت رأيي هون

مكتبة أخوية - دعوة للنقاش

أعجبني عدم اللجوء للتكرار الإختصار في الرد ولذلك أنا أيضا أقول

سبق وقلت رأيي هناك في الصالون
ولكي تراه اضغط هون >>

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

يهمنا رأيكم جميعا
ولكن تمهلوا قليلا وفكروا قبل أن تجزموا أنها سرقة
لأن التعميم هو أقصر الطرق للوصول إلى .. الخطأ

شاركونا فالأمر يهمنا جميعا
إن كان هون أو هناك

[اللامنتمي]

هذهِ سَرقة إيجابية لأنها أولاً وَ أخيراً تفيد القارئ أو الباحث

وَ ثانياً كما ذكر الرفاق " الكِتاب الإلكتروني لا يُغني عَن الكِتاب الورقي "

يَبقى للكِتاب الورقي مُتعته وَ ذكراه

وَ ثالثاً هذهِ دعاية مَجانية يَجبُ أن يَشكرونكم عَليها أؤلئِكَ المُتذمرين

تحياتي

[مايسترو]

تاما يعني نفس الكلام بدو يتكرر

يعني مثلا كتاب متل الاسد والصراع على الشرق الاوسط حقو هديك الحسبة ومو موجود

طيب انا شو بعمل بحالي ؟؟

طبعا مالي غير اخوية والمكتبة اللي فيها اللي عم تساعدني كتير

ومالي كمان غير ميمو مسؤولة المكتبة الرائعة عنجد

[passerby_intime]

كاتب النص الأصلي : اللامنتمي

هذهِ سَرقة إيجابية لأنها أولاً وَ أخيراً تفيد القارئ أو الباحث

كلمة سرقة بحد ذاتها تعني أمرا سلبيا
هل يمكن التقاء النقيضين: النفي ونفي النفي..
اللهم إلا إذا كنت تقصد اجتماع السالب والموجب معا في شيء واحد كإجتماعهما في قطعة المغناطيس شمالها سالب وجنوبها موجب!
بكل الأحوال ذكرتني بقول الشاعر عبد الرحيم محمود
واغصب حقوقك قط لا تستجديها ....... إن الذين سلبوا الحقوق لئام
وأراني مضطرا لذكر مثال على الظلم الفادح الذي تمارسه دور النشر بحق القراء وطلاب المعرفة: احتاجت أختي لكتاب ( علم النفس المعرفي) فهي تدرس في السنة الأخيرة بفرع علم النفس بالجامعة فصدمنا البائع بثمنه: ألف ليرة إلا خمسين!
طيب ..الكتاب فيه شوية معلومات مفيدة ولكنها مأخوذة من مئات المراجع لأن ملحق المراجع فيه ثلاثون صفحة مليئة بعناوين الكتب التي اعتمد عليها المؤلف لكتابة كتابه.
أخي ما شي الحال تعب المؤلف ودرس وراجع وضيع وقت .. ولكن هل يبيح له ذلك أن يلعن ديننا لنشتري كتابه؟
من ناحية ثانية لو أن هذه الألف ليرة ذهبت للمؤلف ما كنا زعلنا.. ولكني بحكم عملي على اطلاع بخفايا عمل دور النشر وأعرف أن أرباحهم على بعض الكتب تتجاوز أحيانا 40% .. نعم أربعين بالمئة من ثمن الكتاب >> فلماذا أدعم دور النشر وأساعدها على سرقتي ؟ وكيف لطالب في الجامعة أن يحتمل هو وعائلته شراء كتاب من 350 صفحة ثمنه ألف ليرة ؟ والطالب يحتاج أكثر من كتاب كل شهر تقريبا وسطيا ..
ماشي.. منشان هيك أنا اشتريت لها الكتاب بعد أن بكت أمامي بيأس وعجز والحرقة تأكل فؤادها ولكني أقسمت أمام البائع أن أنشر كتابه في كل مكان أذهب إليه وأوزعه على عباد الله مجانا بقدر استطاعتي نكاية بدار نشره التي امتهنت السرقة بقوة قانون النشر والملكية المادية للفكر! وهكذا وضعته هنا على الرابط التالي:

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

كاتب النص الأصلي : اللامنتمي

وَ ثانياً كما ذكر الرفاق " الكِتاب الإلكتروني لا يُغني عَن الكِتاب الورقي "

يَبقى للكِتاب الورقي مُتعته وَ ذكراه

أكيد لا غنى أبدا عن ذلك .. لأنه مثلما أن التلفزيون لم يلغي دور الراديو كذلك النسخة الإلكترونية للكتاب لن تلغي دور النسخة الورقية.. كما أن المطبوعات الإلكترونية اليوم هي أشبه ما يكون بطفل صغير يحبو أمام مارد عملاق فلا خطر على المؤلف من الخسارات المادية الكبيرة ولا الصغيرة حتى.. لأنه مثلما ذكرت بكلامك >>

كاتب النص الأصلي : اللامنتمي

وَ ثالثاً هذهِ دعاية مَجانية يَجبُ أن يَشكرونكم عَليها أؤلئِكَ المُتذمرين

لأنه برغم كل شيء فإننا بنشرنا الكتاب على الإنترنيت لا نمارس في الواقع إلا دور إعلان متجول للكتاب ولكن بشكل مجاني لا يكلف الناشرون شيئا!! ولكن يحتاج أولئك المتحجرون عقول ليدركوا بها قبل أن يرفعوا عقيرتهم بالصراخ والتذمر.
دمت بخير
وكل سنة وأنتم سالمون