نحن و الآخر

[dimozi]

كنت تقريبا في التاسعة, عندما اكتشفت أن أفضل الكتب هي التي يبقيها أهلي مخبأة عننا, بحجة أنها لا تناسب عمرنا, أذكر كتابا كنت أتسلل لأسرقه من غرفة الأهل و أضعه كعادتي في إحدى قصص الأطفال لأقرأه بسلام في غرفتي, كان الكتاب للدكتورة نوال السعداوي لا أذكر اسم الكتاب الآن لكنني أذكر أنه يتحدث عن طفولتها و بدايات وعيها للظلم الاجتماعي الذي تتعرض له الأنثى في شرقنا العتيد, كمّ التناقضات الذي يحويه هذا المجتمع الفاسد الغارق في عفنه , أذكر بوضوح أنها تحدثت عن بعض مظاهر الكذب و الرياء في هذا المجتمع, فبينما كانت ترى الشيخ إمام مسجد القرية يهتف بأقصى ما واتته حنجرته في المظاهرات التي تنادي بعروبة فلسطين شابكاً أصابعه بقوة بأصابع كاهن كنيسة القرية الذي ينتحب أيضاً صراخاً لا يقل حماساً عن الإمام صديقه , ثم ينتقل المشهد مباشرة إلى درس الدين في المسجد الذي يعطيه نفس الإمام صديق الكاهن العتيد , يقول في درسه موجها تلاميذه أصحاب العقول التي سوف تقفز قريبا إلى الحياة الواسعة " لا تصادقوا المسيحي و لا تأكلوا من زاده و لا تدخلوا داره لأنه من الكفار الذين سوف يرميهم الله في النار يوم الآخرة " و يقفز خيال الكاتبة إلى لذة الكعك الذي تعده أم جورج جارتهم و تقدمه لهم يوم الأحد.

صدمت يومها بحقيقة مجتمعنا, لكنني حتى هذا العمر لم استطع أن أغير هذه الفكرة في رأسي, لا لأني أرفض تغيرها, بل لأن الواقع يمنعني من منح نفسي هذه الرفاهية الخيالية

ها هنا و في أي نقاش يعكس واقع المجتمع, في أي موضوع عن الحرية أو العلمانية أو حتى الوضع الاقتصادي نجد الذين يتشدقون بداية بأفكار ثورية في طرحها عادلة في مضامينها باعثة على الفرح و الحبور في هدوءها و اعتدالها حتى نظن واهمين أن الخير مازال في أهلنا, لكن المحك الأول سيعيدنا إلى المربع الأول و سيطل سيف الله المسلول من سباته ليعمل سيفه في الأفكار التي كان منذ قليل يدافع عنها , سيعمله في اعتداله الظاهر ليدعو إلى دين الحق و إلى العودة إلى صراط العلي المستقيم, الأدق من الشعرة و الأحد من السيف

كل هذا الذين تدعون إليه ترهات من زبل الغرب و نقائضه المستوردة, إن أردتم الحق فعليكم بالسيف و القوة و الغصب الجائر, هذا ما سوف يهرع إليه إن رأى أن استمرار النقاش سيؤدي إلى اعتراف بحق الآخرين في الوجود و الحرية و العيش الكريم.

فإلى متى نظل هكذا , قولوا إلى متى



مية خسة دبلانة

[fady juventus]

معليش سؤال ...
بعد إذنك افصلي بين كلامك و كلام نوال
يعني الموضوع من لما كتبت :"كان الكتاب للدكتورة نوال السعداوي لا أذكر اسم الكتاب الآن لكنني أذكر أنه يتحدث عن طفولتها و بدايات وعيها للظلم الاجتماعي الذي تتعرض له الأنثى في شرقنا العتيد..." هو للدكتورة نوال
ولا رجعت كفيت إنت بعدين ومن وين؟
لأني حابب افهمك من خلال أسلوبك إذا كان إلك تتمة بالموضوع

[dimozi]

فكرت أنو الموضوع أوضح من هيك
بيخلص كلامي عن الدكتورة نوال بكلمة يوم الأحد تحديداً, بتخيل الموضوع عم يطرح الفكرة للنقاش


الموضوع عن تقبل الآخر, التقبل الحقيقي للآخر, و الاعتراف بوجودو و حقو المتساوي مع حقوقنا.



مية خسة

[fady juventus]

لأ هلأ أسلوبك حلو لأنو أدبي و لدرجة ممتازة... هاد اللي عرفتو
و اللي غشني إنك ما فصلت و بتجي عبارة "صدمت يومها بحقيقة مجتمعنا, لكنني حتى هذا العمر لم استطع أن أغير هذه الفكرة في رأسي, لا لأني أرفض تغيرها, بل لأن الواقع يمنعني من منح نفسي هذه الرفاهية الخيالية ..." مكملة للشي اللي كانت الكاتبة تسمعو بدروس الإمام.

بكل حال آسف عالخلط اللي صار
ولنا عودة

[ظل جيفارا]

اول اسمح لي ان اقدم .تحياتي الحارة .
بصراحة موضوعك مهم وهلأ كنا عم نناقشه مع احدى الصديقات على الماسنجر .
بصراحة صديقي مرة سمعت كلمة وما عم اقدر انساها ..إنو طالما كل انسان يظن انه يمتلك المعرفة الكاملة فالتكفير والرفض مباحين
يعني لما تكون السلطة الأيديولوجية مستمدة من افكار علوية خالدة ملزم انك تأمن بصحتها بيصير الأنسان لا يملك إلا ان يؤمن بأنها صحيحة بكل ما جاء بها ويصبح تفسيرها او نقضها من ذاتها وهنا يصبح التكفير مباح ويصبح الأخر خاطئا بالضرورة .
لذا طالما نحن نقول اننا " نحن " فنحن بالضرورة نقول " هم هم "
وتحياتي الحارة
ظل جيفارا

[Nabilove]

قبول الاخر هو اشكالية الوعي المتخلف
الوعي المتخلف هو قراءة سطر من كتاب اصفر سواءا كان دينيا او ايديولوجيا او تاريخيا فتظن انك تمتلك المعرف هذا الوعي المتخلف هو اساس كل الفتن و الطائفية فالمثال الذي اوردته لنوال السعداوي هو لشيخ في كتاب و كلنا نعرف المستوى التعليمي و الفكري لهكذا شيوخ حيث ان في مجتمعنا العربي صارت مهنة المعلم و الاستاذ و مهنة الشيخ مهنا للفاشلين دراسيا و هذا لا ينكره احد. من هنا تبدأ ازمة الفكر العربي لان المسؤولون عن توعيته في مجتمعنا هم بالاصل منعدموا الثقافة سواءا اكانت دينية ام ايديولوجية.
بالنسبة لي هناك حلان
1- السجية و الفطرة حيث نرى ان القرى النائية التي يعيش فيها المسلمون و المسيحيون و غيرهم من الطوائف و التي لم يدخلها وطاويط الدين تعيش في تاخي و هناء فالفطرة الانسانية تدعو للتعايش .

2- الوعي الحقيقي عن طريق معرفة جوهر الدين و ليس قشوره و الانفتاح و التعرف على ثقافة الاخر فالدين سواء اكان مسيحيا او اسلاميا انما جاء لينظم العلاقات فيما بيننا ليجعلها اكثر انسانية
تحياتي

[W.E.G.A]

هو شوف الواقع الي انت طرحته للاسف صحيح
بس انت حصرت مسبب الواقع بدين معين
يعني بيني وبينك كل الاديان بتتعامل مع اي اختلاف بنفس الطريقة
يعني مو بس امام الجامع الي بينشر التفرقة الدينية
كمان قسيس الكنيسة
وحاخامات اليهود وووووو
اي شخص منتسب لشيء فبالضرورة يكون واقف مع هاد الشيء ضد الضد
يعني هي من الطبيعة البشرية قبل نزول اي دين او انتشار اي ثقافة
يعني من العصر الحجري البشر تجمعو مع بعض ليواجهو الاخطار الي بتهدد انقراضن سواء من الحيوانات المفترسة
او العوامل البيئية او او او
وبعد ما تكونت الثقافات وصارت هي الامور تقريبا مؤمنة صارو يشتغلو ببعض ونزول الاديان زاد هاد التخالف بين البشر الي انقسمو بين مصدق ومكذب وزاد التفرقة بالمعاملة وعلى هاد المنوال استمرت الحالة لوصلنا للوضع الحالي

تحياتي لطارح الموضوع

[ظل جيفارا]

كاتب النص الأصلي : ويجا

كمان قسيس الكنيسة
وحاخامات اليهود وووووو
اي شخص منتسب لشيء فبالضرورة يكون واقف مع هاد الشيء ضد الضد

هيدا الحكي مو بالإنتساب لكلشي بس للإنتماءات اللي مصدرها فوق انساني او ما ورائي
اما بالإنتماءات اللي مصدرها انساني فهي دوما قابلة للمجادلة لدى الأصحاء
تحياتي الحارة
ظل جيفارا

[wisefamme]

الكتاب اسمو
امرأة عند نقطة الصفر
وانا كمان قريتو بالسرقة عن اهلي

[MadMax]

عدم قبول الآخر... أو رفض الآخر ..... هو عرف عربي .. مستمد أصالتو و قدسيتو من قداسة الأديان يللي بتدعمو
و للتخلص من هالعرف يجب التخلص من شيء من قدسية هالأديان وقصر دورها على الأمور الوحية فقط

أو تحويل بعض من هالقدسية الى الوطن و المواطنة

[yass]

حلو كتير أبو شريك... مزبوط كلامك و للأسف. ما فينا نشوف الآخر كآخر و دائما راح نقرا فكرو من منظور فكرنا يعني سلفا غلط

ما منعرف نناقش لسرد الافكار انما يبدو انو فقط للاقناع و الارهاب الاقناعي.....للأسف هاد اللي بيصير

ميت خسة

[ابو عمير السوري]

مو كل رجال الدين والمشايخ هنن صح في كتير منن مخبايين بتايبن والواحد منا الو عقل بمييز الصح من الغلط والتعايش واقع مالو وهم بس في ناس مندمجين مع بعضهم من الأطراف المتعددة وفي ناس منعزلين حسب درجةالوعي عندهم

[yass]

كاتب النص الأصلي : ابو عمير السوري

مو كل رجال الدين والمشايخ هنن صح في كتير منن مخبايين بتايبن والواحد منا الو عقل بمييز الصح من الغلط والتعايش واقع مالو وهم بس في ناس مندمجين مع بعضهم من الأطراف المتعددة وفي ناس منعزلين حسب درجةالوعي عندهم

ما بعرف باقي الاعضاء.. بس أنا الشغلات اللي حكيت عنها بردي السابق مو بس ملاحظها ببعض المتدينين... حتى ممكن تلاقي ناس يعني بعيدين كل البعد عن الدين و عندهون نفس المنطق الاستخفافي بالآخر

[ابو عمير السوري]

كاتب النص الأصلي : dimozi

ها
كل هذا الذين تدعون إليه ترهات من زبل الغرب و نقائضه المستوردة, إن أردتم الحق فعليكم بالسيف و القوة و الغصب الجائر, هذا ما سوف يهرع إليه إن رأى أن استمرار النقاش سيؤدي إلى اعتراف بحق الآخرين في الوجود و الحرية و العيش الكريم.

فإلى متى نظل هكذا , قولوا إلى متى



مية خسة دبلانة

هون جواب على سؤالك الاسلام اعترف بوجود الأخر ونظمه والدليل استمرارية العيش المشترك والأمور ماشية
السؤال شو فائدة طرح هيك نقاشات حسمت قبل مئات السنين بالعيش ضمن عباءة الدولة الواحدة
وبعتقد بسوريا مميزيين عن الاسلام مثلا عندون يوم الأحد دوام قصير
صحيح ها الامر بسيط بس الو دلالة كبيرة وهي مراعاة واحترام الأخر
ومية فلة مو خسة

[ابو عمير السوري]

كاتب النص الأصلي : yass

ما بعرف باقي الاعضاء.. بس أنا الشغلات اللي حكيت عنها بردي السابق مو بس ملاحظها ببعض المتدينين... حتى ممكن تلاقي ناس يعني بعيدين كل البعد عن الدين و عندهون نفس المنطق الاستخفافي بالآخر

وهي بدليل انو التركيبة النفسية لها دور اكبر من الدين يعني حسب القدرة على الاندماج
مثلا علاقتي بجاري المسيحي اكبر من علاقتي بجاري المسلم هي ماالها علاقة بالدين بل بدرجة تفهم واستساغة بعضنا

[butterfly]

قبول الأخر ..
رح حاول ما انشرح بالحكي كتير

الشي اللي ما منسامح الأخر عليه وبيخلينا نرفضو .. أنو سمح لنفسو ما يكون " متلنا " ..
يعني ببساطة نحنا عنا تصور انو نحنا الصورة المثالية ( الدين الحق .. الحزب الأول - العرق الأفضل .. إلخ ) .. وهو وقت عم يكون ما بيشبهنا فبذلك هو مرفوض
فبداية رفض الأخر المختلف .. بيكون نابع من تقوقعنا حول حالنا - معتقدنا - حزبنا -وطننا .. إلخ ..
واعتقادنا انو احدنا على حق والأخر مخطأ حتما ً

تاني مشكلة بيخلقا الأخر المختلف فينا أنو بيدفعنا " للشك . .للقلق .. للرغبة أنو نتغير "
الأشخاص المتماثلة .. ( أو الأكثر تشابها - بما انو ما في ناس تماما ً متل بعض )
هالأشخاص وقت بتلتقى بحوار .. بتلتقى بالحياة ..
بتعزز دور بعضا ..
يعني أنا بفكر هيك وأنت بتفكر متلي .. وتنيناتنا رائعين .. وشوي شوي .. بتصير جماعة من المتشابهين عم يصفقو لبعض بس ولا واحد فين عم يتطور ملم ..
الأخر .. باختلافو بيخليني اكتشف .. معتقداتي ( بتساؤلاتو .. بوجودو .. بالعيش معو ) وبيخليني اكتشف وجود حقيقة خارج الشي اللي انا بتبناه ..
هلق هالاكتشاف .. والتغيير بيكون عادة كأي تغيير بالدني بيرافقو ألم ..
الانسان بيحب انو يضل على حالو .. وبيقاوم التغيير ( والنضج .. حتى ) ..
لهيك بنرفض الأخر المختلف .. لأنو بنرفضو لأنو قادر يحدث فينا تغيير ونحنا منرفض هادا التغيير ..

تالت مشكلة .. هي انو تنقبل نعترف بالأخر .. لازم بكتير مرات نعترف أنو نحنا عم نتعدى المساحة المخصصة ألنا .. وعم نكون حشريين ونتدخل بحريتو
يعني أمن بالله أو ما أمن .. هي علاقة شخصية وأنا ما خصني ..
مارس جنس أو ما مارس .. هي مبادئو وكمان أنا ما خصني ..
كان بيأمن بالشيوعية ولا رأسمالي .. كمان ما خصني
مثلي او غير مثلي .. مانا شغلتي ..
المشكلة بالاعتراف بحدودنا وحدود الأخرين .. وخصوصيتن وفرادتن ..

بس ..

[ابو عمير السوري]

كاتب النص الأصلي : butterfly

..


المشكلة بالاعتراف بحدودنا وحدود الأخرين .. وخصوصيتن وفرادتن ..

بس ..

هي جزء من المشكلة والجزء الأكبر تقوقع كل طرف على محيطه ورفضه الاندماج والمشاركة

[التقرير الجوال]

عمتم بخير.

هوي الجدير بالذكر و الغير مستهان به و الواجب العمل على تقويضه هو تهميش المرأه اجتماعياً و ثقافياً و فكرياً و
"بصراحه كل شي".
لم تكن المرأه مهمشه في الماضي و خصوصاً عن العرب و التاريخ يزخر بمشاهد نسائيه رائعه..فمنهم التي لم تكن تنكح الرجال إلا في ديارها..و منهنّ من أنشان و صنعن رجالا أغنو التاريخ.
بس هون اذا بدنا نحصر الحقبه التي تم بها تهميش المراه و جعلها من باقي أساسيات البيت......!! بدنا نحكي عن آخر 600 سنه بحياه العرب..العثمانيين و ما هنالك.
رجعت المرأه و أخدت دور و لو بسيط و بمشاركات اجتماعيه سقيمه و محدوده...يعني ليست شامله لكل النساء
تمثلت بالصالونات التي كانت يرتادها المثقفين و الشعراء و حتى الثوريين و الضباط.
في كتير نساء اشرفو على صالونات ثقافيه "كانو متحررات" .
و كمان للحقيقه و بدي احكي عن سوريا تحديداً..بالستينات و السبعينات كانت المرأه تذهب للمدارس و دور النساء و حتى الدور السينما..و كانت كمان تلبس الـ Mini Jupe يعني مافي أحلى من هيك "ما هيك".
هل صار في شوي تحول او رغبه للانحياز للديانه..بس لساتها المراه عم تشق طريقها بمثابره للوصول إلى ما تصبو إليه... و ما بظن في حدا واقف بطريقها.
أما لما الدكتوره السعداوي تحاول تبني أسافين بين المسيحيه و المسلمين فبدي قللها انت كتيـــــــر غلطانه..
اي صح في متزمتين من الطرفين مسيحيه و مسلمين بس هاد بحياتو ما نال من علاقه العرب المسيحيين مع اخوانهم المسلمين"خصوصاً لما الحكي بيكون عن فلسطين".
بسوريا "فارس الخوري" كان علم من أعلام سوريا...قاد الحكومه السوريه, يعني فعلاً كان رأيس الحكومه السوريه
لما ناضل الفرنسيين و عمل تجمعات وطنيه كان أغلب الملتفين حوله مسلمين و أصدقاء مسلمين له.


يعني انا بدي افهم يعني كيف الدكتوره السعداوي بدها مساواة....يعني مثلا بتصير الاخت المسيحيه "خوري".. والا المسلمه "إمام مسجد"..

كلنا مع احترام الرأي الآخر بس خلقه المراه و بنيتها و كمان تفكيرها ما بياهلوها غالباً لتولي امور يقوم بها الرجال.

هون اذا سمحتولي احكي عن "الراي و الرأي الآخر" او تحديدا...كيف بدنا نتعايش مع آراء و افكار أحيانا ممكن تكون متباينه متناقضه.

موضوع كتير مهم و بيكون اهم اذا الاخوات هون بيحاولو يشاركو كمان.