راسبوتين

[و الله بقلبي يا سوريا]

انا حبيت انو اكتب الموضوع بالعامية لانو اسهل عليي فبتمنى الكل يفهمو عليي

راسبوتين كان راهب روسي غامض و مخيف و نسبت اليه العديد من القدرات الروحانية الغريبة و الخارقة, و من اهمها الشي اللي ساواه مع الامير الصغير اليكس اللي كان رح يرت عرش روسيا من بعد ابوه القيصر. الامير اليكس كان عندو مرض وراثي نادر كتير يطلق عليه اسم المزاج النزفي او بالانكليزي Hemophilia و هو مرض خطير و قاتل, لانو اذا المصاب انجرح جرح صغير فرح يضل ينزف ليموت.
و بسنة 1912 انجرح اليكس بعد ما وقع بالحمام و الاطباء قالو لاهلو انو مافي امل بشفاءو , بس زوجة القيصر اتصلت براهب و طلبت منو انو يجي و يشوف اليكس و كان الراهب هو راسبوتين. لما راسبوتين شاف الصبي قلهم انو ما يخافو و انو الامير رح يعيش. لما راسبوتين شاف الولد بلش يعمل حركات بايديه حولين الامير. و بعدين قال للقيصر و زوجته ان الامير رح يشفى و يرجع متل ما كان واحسن, و فعلا بعد فترة تحسن الامير و وقف النزيف, و راسبوتين صار اقرب و اعز شخص عند القيصر, و صارت خزائن الدولة الروسية كلها بتصرفو و صار هو اللي بيقضي و بيمضي متل ما بيقولو. بس هل شي ما عجب نبلاء و اغنياء روسيا و من شان هيك قررو يقتلو راسبوتين و جهزو كلشي و كانت الخطة انو يجي راسبوتين لعند واحد من النبلاء و بعدين ينزل معو على القبو تبع القصر و يشربو خمر بعد ما يكون وضع بالخمر كمية من السم و فعلا نفذو الخطة و راسبوتين شرب سم بيكفي لقتل ست رجال بس الغريب انو ما تاثر و كانو ما شرب شي. الرجل اللي راسبوتين عندو بالبيت خاف كتير و قوص راسبوتين عدة طلقات و راسبوتين وقع على الارض و الرجل قرب منو ليتاكد انو اذا كان راسبوتين مات بس الغريب انو راسبوتين صحي فجاة و حاول انو يخنق الزلمة بس الرجال خلص حالو و طلع من شان ينادي لباقي الشباب اللي كانو عم ينتظروه بالقصر. و لما نزلو ما شافو راسبوتين بحثو عنه بعدين لقوه على باب القصر عم يزحف و عم يحاول الهرب. فصارو يضربوه بالعصي و بكلشي معهم و بعدين ربطوه و رموه بالنهر و الغريب انو لما عثرو على جثة راسبوتين اكتشفو انو مات غرقا و انو كان فاكك الحبال اللي ربطوه فيها يعني راسبوتين ما مات لا من السم و لا من الرصاص و لا من الضرب, مات غرقا. و الاغرب انو راسبوتين كان دائما يتنبئ و يقول اذا انا متت فرح تصير ثورة بروسيا تقلب الامور راسا على عقب و فعلا هادا اللي صار فبعد فترة من موت راسبوتين صارت الثورة البلشفية و عدمو القيصر و عائلتو.
انا حبيت حط كم صورة لراسبوتين لتشوفو شكلو اديش بخوف

[fernanda bachchan kfoury]

ميرسي كتييير ع الئصة المشوقة ولي عليه شو بيخوف هالزلمة من وين طالع ؟؟؟ ميرسي ع الموضوع طرووووووووووووء زوووووووووووء عيوني

[و الله بقلبي يا سوريا]

والله ما بعرف من وين طالع بس هيئتو لو ضل عايش كان رح يعمل مصايب بالدنيا.. منيح يلي موتو و خلصونا منو... شكرا لانك شرفتي الموضوع بدوخولك يا احلى كفورية

[fernanda bachchan kfoury]

كاتب النص الأصلي : و الله بقلبي يا سوريا

والله ما بعرف من وين طالع بس هيئتو لو ضل عايش كان رح يعمل مصايب بالدنيا.. منيح يلي موتو و خلصونا منو... شكرا لانك شرفتي الموضوع بدوخولك يا احلى كفورية

اي اي معك حق لا شكر على واجب ولو هيدا من واجبي طروووء و الله الموضوع صاحبو مشرفو و منورو ميرسي طروئتي

[بيلسان]

فعلا مرعب
بس والله يا عمي لزيز
شوفو هاي كمان معلومات زيادة عنو

* اكتسب في فترة مراهقته اسم راسبوتين ( أي الفاجر) بسبب علاقاته الجنسية الفاضحة.

* في ديسمبر عام آلف وتسعمائة وستة عشر كتب راسبوتين خطابا للقيصر يتنبأ فيه بقتله. وعن قتلته المحتملين، كتب يقول" إذا قتلني أقاربك فلن يبقى أي فرد من عائلتك حيا لأكثر من عامين، وتستطيع أن تقول أي من أولادك أو أقاربك، فسوف يقتلهم الشعب الروسي.. سأُقتل، لم يعد لي وجود في هذه الحياة. صلي أرجوك، صلي، وكن قويا، وفكر في عائلتك المصونة ".

* في السبعينيات قدمت فرقة البوني إم الشهيرة عملا كوميديا جمعت فيه مآثر راسبوتين، " نظر إليه معظم الناس من خلاله بخوف ورعب، ولكنه كان بالنسبة لأطفال موسكو، شخصا محبوبا".

* تقول إحدى النظريات المتعلقة بقدرة راسبوتين على وقف النزيف الذي أصيب به أليكسيس، ابن القيصر، بأنه استخدم التنويم المغناطيسي لإبطاء النبض، ومن ثم تقليل القوة التي تدفع الدم إلى الدوران في جسده.

* تم الاحتفال بنبأ موت راسبوتين ونظر إلى القتلة على أنهم أبطال أنقذوا روسيا من نفوذ ألكساندرا الألمانية و الراهب المجنون راسبوتين.

* قام الناس خلال ثورة فبراير عام آلف وتسعمائة وسبعة عشر بإخراج جثة راسبوتين وحرقها.

ضلو خايفين منو حتى وهوي ميت فعلا شغلة هالزلمة

[rami_shama]

بجد بخوف هاد راسبوتين ... أنا قرأت عنه كتير وبجد بخوف

[و الله بقلبي يا سوريا]

شكرا كتير على المعلومات المهمة و على دخولكم على الموضوع

[verocchio]

راسبوتين شخصية تستحق التأمل

[و الله بقلبي يا سوريا]

اه معك حق