شو يعني علمانيّة؟؟؟

كهربجي · 23/10/2006

يابا أنتو يا عالم ليش مو عاجبتكن هالبدعة؟؟

أنو ليش كل ما قلنا علمانيّة بتنقز هالعالم؟؟

خبروني بالأول شو يعني علمانية.. بعدين منتفاهم..

طبعاً أكيد بعرف أنو بدون ينطو على هي شغلة عاملها الغرب ليستعمرنا.. وعلى هي عدو الدين الأول.. هدول بعرف أنكون هيك رأيكون.. (طبعاً مو كلكون)

بس حدا يفهمني شو العلمانيّة...

Syrian__Angel · 23/10/2006

اول شي ... مرحبا ، بس ليش عم تقاتل ؟!

وتاني شي ... ما فهمت شو القصد من موضوعك ، او لوين بدّك توصل ؟ او شو الغرض من السؤال ؟! لانو مستحيل يكون قصدك مقتصر على " شرح " معناها وبس

بكل الاحوال .. وبالمختصر ، العلمانية = اللادينية ..

وبانتظار التوضيح اكتر

جورج الأول · 23/10/2006

اقتباس:

بكل الاحوال .. وبالمختصر ، العلمانية = اللادينية ..

للأسف الجواب غلط و بهز البدن مع كل احترامي .

أسير التشرد · 23/10/2006

منشانك هيك لازم نعرف هالعلمانية بشكل الصحيح ... لحتى ما حدا يجي ويضيف ويعرف من عندو ... العلمانية = اللادينية ...

لاوديسا · 23/10/2006

اقتباس:

كاتب النص الأصلي : جورج الأول

للأسف الجواب غلط و بهز البدن مع كل احترامي .

طول بالك الصبية ما كفرت

قالت كيف هيي بتشوف العلمانية و قالت بانتظار توضيح اكتر

باختصار العلمانية هيي متل ما قلت انا بموضوع تاني

فصل الدين عن الدولة ومانا ابدا الغاء الدين او اللادينية

يعني الاحتفاظ بالدين واخفاء مظاهرو بالمجتمع

يعني هيي اقرب ما تكون للمجتمع المدني

..............؟

Syrian__Angel · 23/10/2006

اقتباس:

للأسف الجواب غلط و بهز البدن مع كل احترامي .

شو الغلط ؟!؟

العلمانية معناها الصحيح هو اللادينية او الدنيوية .. وشو يعني هالحكي ؟ يعني فصل الدين عن الدولة ..
شلون يعني فصل الدين عن الدولة وعن المجتمع .. يعني كل شي بالحياة بيكون قائم عالعلم والعقل بعيداً عن الدين او ما ذكر فيه .. بمعنى تاني .. كل شي بالكون قابل وخاضع للنقاش بالمنطق .. اما الجانب الديني فهو بيضل بين الفرد وربّه ( بمعزل عن المجتمع )

وهكذا جرى التوضيح .. بئا وين الغلط ؟؟

**krimbow** · 23/10/2006

كلام سليم

العلمانية تعني عدم تدخل الدين في شؤون الدولة

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

سقى الله هديك الايام، وقت كان الحوار للاغناء .. مش للاستغناء

dot · 23/10/2006

باختصار..

العلمانية = اللادينية.

فصل الدين عن حياتنا اليومية.

فصل الدين عن الدولة
(يعني بنخلي القوانيين والتشريعات و.. مفصولين عن اي شي متعلق بالدين )يعني ما بنخلي الدين يكون ورا اصداار القوانين و....

العلمانية ما بتسمح للدين يتحكم بعلاقاتنا الاجتماعية و طرق حل مشاكلنا و خلافاتنا الاجتماعية.

~YAFA~ · 23/10/2006

علمانية يعني فصل الدين عن الدولة
واحنا ناس ما بنعرف نروح نكزب ونسرق ونهد الناس ونمارس الفاحشة وكل انواع الكبائر برا المعبد وبس نروح المعبد نصير انسان تاني

كيف برا حدود المسجد او الكنيسة تكون ملحد وبس تفوت الكنيسة او المسجد تصير ابو الدين

**krimbow** · 23/10/2006

اقتباس:

كاتب النص الأصلي : ~YAFA~

علمانية يعني فصل الدين عن الدولة
واحنا ناس ما بنعرف نروح نكزب ونسرق ونهد الناس ونمارس الفاحشة وكل انواع الكبائر برا المعبد وبس نروح المعبد نصير انسان تاني

كيف برا حدود المسجد او الكنيسة تكون ملحد وبس تفوت الكنيسة او المسجد تصير ابو الدين

بالاخلاق...

الاخلاق ليست حكرا على دين او قوم دون سواهم

بالضمير...
الضمير بيولد مع ولادة الانسان مش مع اعتناقو لعقيدة ما

و اخيرا بالعقل...
فالعاقل قادر على تمييز الخير من الشر، المنفعة من المضرة، الصح من الخطأ... بدون مساعدة الهية، هيك انخلقنا،

**Government** · 23/10/2006

يعني ياسيدي ملا انت بأختصار

يعني عايش على البركة
هي عايش بلا هدف
كلو بيمشي معو

عالبركة

~YAFA~ · 23/10/2006

بس اوكى كل واحد عندو عقل بنعرف
بس انا متأكدة انو ما في حدا عندو القدرة على الراحة ازا كان مفصول عن الله يعني عن ربو

كيف بدك تكون مفصوول

والعلمانية فصل الدين عن الدولة يعني كل شي برا حدود المعبد مفصووول عنا نعيش بلا دين ما بينفع

وهادا هو رأي كلو

والي بدو يكون علماني يكون

**krimbow** · 23/10/2006

اقتباس:

بس انا متأكدة انو ما في حدا عندو القدرة على الراحة ازا كان مفصول عن الله يعني عن ربو

ذكرتيني بمحشش سأل شيخ: شيخي بتصير الصلا بلا وضوء؟
الشيخ: الصلاة دون وضوء لا تجوز..
المحشش: طيب شو رأيك اني جربتها و زبطت؟

يعني باختصار انا جربت اني "انفصل عن الله" و عايش مبسوط عين الله عليي

بعيدا عن الهبل و الجدبة
لما كون مش مبسوط بحياتي، بيكون هالشي لأي سبب تاني غير اني بعيد عن الله
ممكن كون مزعوج لأني فقير، لأني اسير....الخ
يعني لسبب واضح، مش لأني بعيد عن الله

لما بعرف حالي اني ما عم اسرق غيري (السرقة مجرد مثال)، بكون مبسوط، حتى لو كنت ملحد

السؤال انو لو كنت مؤمن، و متدين، بس عم اسرق، يا ترا رح كون مبسوط؟
بتصور انو الجواب "لأ"

فإذا السرقة هيي سبب عدم الانبساط بهالمثال، بغض النظر عن علاقتي بربي

~YAFA~ · 23/10/2006

ازا كنت تريد الانفصال عن الله لازم تنفصل عن كل شي اعطاك ياه الله

روحك وجسدك وعقلك وحواسك
اولادك رزقك وكل شي اعطاك ياه الله
والي ما اعطاك ياه الله وانت جبتو من دار ابوك انت حر فيه خليه معك
بس الانفصال عن الله يعني الانفصال عن كل شي اعطاك ياه الله

والنكتة مش دليل يابا

ابو مرسيل · 23/10/2006

يا شباب اذا بتسمحولي عرف شو يعني العلمانية بمعناها الحقيقي الغير محرف يعني الاصلي فيك تقول
يا حبايبي العمانية تعني انو كل واحد من الشباب الطيبة الي هنة اصحاب القرار بكل بلد انو يعني ما ينحاز لدين او طائفة معينة انو يتبع المنطق الانساني و الي بيناسب الموجود باتخاذ القرار او التصويت على اي قرار يعني عاساس انون محايدين بكل شي و محكمين عقلون كمان

**krimbow** · 23/10/2006

اقتباس:

كاتب النص الأصلي : ~YAFA~

ازا كنت تريد الانفصال عن الله لازم تنفصل عن كل شي اعطاك ياه الله

روحك وجسدك وعقلك وحواسك
اولادك رزقك وكل شي اعطاك ياه الله
والي ما اعطاك ياه الله وانت جبتو من دار ابوك انت حر فيه خليه معك
بس الانفصال عن الله يعني الانفصال عن كل شي اعطاك ياه الله

والنكتة مش دليل يابا

رح ناقشك من منطلقين
منطلق الاعتراف بوجود الله مع عدم التعلق فيه:
و من هالمنطلق بقدر خبرك انو (طالما انا معترف بوجود الله، فمعترف بنعمو عليي) و مع ذلك .. يعني هوي رح يعطيني او ياخد مني هالنعم بدون ما يهتم بعلاقتي فيه، يعني متل مو شايفة الله مأنعم على بوش و بلير، و اولمرت ...

منطلق عدم الاعتراف بوجود الله:
و بالتالي مش معترف بفضلو عليي، و ما لو عليي منية

و كما قال النبي عمر الخيام:

سأشربها إذ هي الحاصل
ما الحق؟ حاشاك، ما الباطل؟
سأعصيك بالضد حتى أرى
أذنبي؟ أم عفوك الشامل؟

ابو مرسيل · 23/10/2006

يا شباب نحنا منفصلين عن الله خلقة لانو بيقول فيلسوف الماني للاسف ما عم اتذكر اسمو انو اذا كان الله موجود فانا ميت و اذا كنت موجودا فالله ميت و نحنا اكيد موجودين و بالاخير و هذا رايي انو الله خالق لا غير بس مو مدبر هل حياة

~YAFA~ · 23/10/2006

طيب الي بدو يكون علماني يكون هو حر

ولكل حدا معتقاداتو
وانا بعيش في بلد علماني فلسطين المحتلة " اسرائيل"
ولكني لا اماس العلمانية