لكل واحد بيهوى الرسم

طنش تعش · 01/03/2006

حابب اعمل هون متل البوم للرسم

يعني كل واحد الو مراق بالرسم بيجي بحطلنا خربشتو هون .......وكلشي في بالمنتدى بيعطي رأيو ..................
كان ايجابي ولا سلبي........وبتمنا انو اذا في اي اشكال بالرسم تعطونا رايكون لحتى نتمكن ونتعلم من اخطائنا.........
وحبيت اعرضلكون هالرسمة كبداية لشوف شو رأيكون فيها...........

hammoooza · 01/03/2006

أهلين خيي أبو طنيش

بتصدق انو مبارح كنت عم فكر حط هيك موضوع بس سبقتني علي يللا مش مشكلة

المهم يا سيدي انا لما شفت رسمتك بطل بدي حط ولا رسمة الي

لأنو على هالحالة رسماتي ما بيطلعو شي قدام رسماتك

عنجد روعة كتير كتير كتير وخصوصا التظليل واستعمال التدرج شي روعة

المهم لازم هالموضوع يصير متل مكتبة لهواة الرسم كل واحد بحط شغلو "ويرجى التثبيت"

طنش تعش · 01/03/2006

هلا بالحبيب ومشكور...بس ياخيي حمزة اذا بدنا نشتغل هيك والله بخجل نزل رسمتي ومابعرف شو اي بعمرنا مارح نتعلم................
بقى نزلا...... هاد الموضوع خلق من شان هيك .....وبنتعلم من بعض......انا كنت هيك ودخلت معهد رسم من شي اربع سنين وضليت فيه فترة شهر واستفدت من ناحية التظليل.....بقا هلق ناوي ارجع وفضي حالي لهالشغلة.......وعم ارسم هلق لوحة عالقزيز بس تخلص رح نزلا..........

نور الهدى · 01/03/2006

شي كتيير حلو زميل و انا كمان رح اخجل اعرض رسوماتي بعد اليوم

بس سؤال ليش مو واضحة كتير كيف منزلها بالسكنر؟؟؟؟

انا اللي شايفتو انو نحنا لازم نتعلم منك, بس خطي مو لازم تلبسها كمان بتبرد بعدين

بس انا هلق زعلانة كتيييييييييييير منك لأنك رديت على موضوعي و ما نقدتني بنوب انا ما بزعل من اللي ما بيعرفو بالرسم بس منك انا زعلت انا متأكدة انو عندك ملاحظات و انا نشرت الرسمة مشان تعلقولي عليها و تنكشولي اخطاء مو مشان تقولو حلوة نا ما درست رسم و كل شغلي من ملاحظتي الخاصة مو اكتر مشان هيك بحب استفيد من خبرة غيري

و برد بقلك بتعقد بس لو أنها أوضح

kinda · 01/03/2006

بتسمحولي شارك معكون؟؟؟
والله الرسمة كتير حلوة عنجد و بدون نفاق بس متل ما قالت نور الهدى كان لازم تسترها شوي مو مشان شي بس مشان ما تبرد

بس على كل حال انا بوكرة لما اكبر ما حدى بيعرف ممكن صير متلك هه
وهلأ ما بدي كتير تتوقعو مني رسومات غير شكل كل مين على قدو

طنش تعش · 01/03/2006

رح حاول نزلها بشكل اوضح............. بس هي طلعت هيك لانو انا صورتا عالموبايل ونزلتا عالكومبيوتر وطلع قياسا كبير يعني ماتحملت معي لهون..........رحت عملتلها تعديلات ليصغر قياس الصورة............يعني فاتت بميت مرحلة.............بس المهم مبينة ملامحا.........

اما بالنسبة لرسماتك يانور في رسمة قديمة الك بعتقد انو عطيتك رأيي فيها.......وياريت تنزلي كل رسماتك لهون.........من شان تنعرف اكتر...........وبعتقد انو مشكلتك بالتظليل.... يعني لمسات التظليل عندك خفيفة.......بس اساسيات رسمك كتير حلوة ....وبتمنى شوف العرض هون.
ومشكورة......................

واهلا يا كندا ...ومعلش هون مالخبراء الرسم يعني بنتعلم من اخطاء بعضنا وبنعطي رأينا بالعيوب........ومشكورين جميعا.........

marioma alghzayala · 01/03/2006

ياعين صبي دمع

... لك شو هادا يا هابو ؟؟؟ وين مخبّي هالمواهب ولو؟؟..

بس بدي قللك كتيييير رسمك حلو عن جد فن ....

وانا ما بعرف ارسم كتيير يعني بحب شوف ... وانشالله يتثبت الموضوع ..

والبنت بتجنن

.... بس ما بتشبهني

..انا احلى ..

طنش تعش · 01/03/2006

وهي كرمال المدام المزوقة....................ولعيونكو ن..................وانشالله تكون هي اوضح.....
وبدنا نشوف همتكون...................

marioma alghzayala · 01/03/2006

ياخ ..هابو ..عن جد هيك بترسم ؟؟؟

يا زلمة خيلة

...حلو كتييررر ...

طنش تعش · 02/03/2006

لك انا عادي بس انت الخيلة.............تكرم عيونك مدام........
وهي رسمة تالتة من البوم رسماتي........وعدلت التانية لانو ماطالع غير نصها والتالتة نزلتا بطريقة اوضح...........ولسى ماشفتو شي لسى الخير لقدام ........الدفتر مليان.......

نور الهدى · 02/03/2006

لاااااااااااا زميل من الأول خلينا نتفق

يعني قاعد بتنشرلنا بهالرسمات الحلوة و كأنها تقليعة, بس مو مباشرة يعني كانك
عمتقول شو مفكرين حالكون خدولنا هالخربشة و افرقونا

هههههههههه عمبمزح........

الرسمة التانية كمان كتير حلوة بس كمان مو كتير واضحة التالتة اوضح الشي, بس ممكن أعرف بشو راسم بالضبط لأنو ما بين معي
منيح
و بدي قول انو انا عمنق على شغلة انو تكون الصور أوضح لأني انا بحب جمع
الرسومات الحلوة و بحز بنفسي انها ما تكون واضحة انا بصور رسوماتي بالكاميرا ,
صحيح انها ما بتطلع على حقيقتها بس أوضح من هيك.
و بالنسبة لرسمي انا ما صرلي بالقصر من امبارح العصر شلون عمتقلي رسمة
قديمة؟؟؟؟
معقول مخربط بيني و بين حدى تاني؟؟؟ انا الرسمة الوحيدة اللي نشرتها هون هيي
Natalie Portman اذا بتقصدها انا بقلك انو معك حق الظل فاتح شوي بس انا مو
محترفة يا دوب برسم بقلم رصاص عادي و على ورق رسم عادي كمان و ما بطلع
معي الظل أغمق من هيك مع اني جبت اكتر من نوع لقلام الرصاص و بدرجات
مختلفة.................

اذا في عندك نصيحة لا تحرمنا..............
و هي رسمة من رسوماتي بس بالألوان انا بحب ارسم الشخصيات بالرصاص و الورد
بالالوان و بدي رايكون

آسفة اني نشرتها بهالشكل هاد بس طريقتكون ما عمتزبط معي

(((الجنرال أبوجعفرالورد))) · 02/03/2006

حبيبنا إيهابو الصور كتير حلوة ........ تسلم يا فنان ...........
بس للأسف أنا مالي بالرسم يعني قلي شو بتكره بقلك الرسم ....... لأني معاني فيه ....

تقبل تحياتي وإلى الأمام .... أحسنت ..

طنش تعش · 02/03/2006

اقتباس:

و بدي قول انو انا عمنق على شغلة انو تكون الصور أوضح

رح ندبرلا حلة لهي................................

اقتباس:

انا مو
محترفة يا دوب برسم بقلم رصاص عادي و على ورق رسم عادي كمان و ما بطلع
معي الظل أغمق من هيك مع اني جبت اكتر من نوع لقلام الرصاص و بدرجات
مختلفة.................

وبالنسبة لالك يانور انا متلي متلك يعني متل مانك شايفة........ عاشقفة ورقة ومعي قلم رصاص عادي بس انا بشدد بالتظليل عالاماكن الي بتكون معتمة ...يعني بعطيها جهة انكسار ضوء ....هلق رسمتك انا نزلتا عاجهازي وشفت انو ماعاطيتيا حيوية للصورة وبتمنى انو ماتزعلي مني بس انت طلبتي انو كون صريح معك...هلق في اماكن كتير بدا تدريج لون وكانو ضارب الضوء فيها يعني وانتي نازلةمن الخفيف للغميق..... وفي اماكن بدها تعتيم وتظليل متل تحت الرقبة وهيك شغلات هي الي بتعطي نسبة كبيرة من التحسينات عالرسمة.....
وانت مبين عليكي فينك تشتغلي عاهالشي .......و لك نور عافكرة عنجد صدمتيني بهالرسمة يعني وين عم تقليلي بضيعكون وفرقونا ...لك شي كتير حلو وكتير ظابت التظليل بالاحمر عالمناطق المعتمة......وعطيتيا تدريج بالابيض عاطي متل لمعة كتير حلوة...........لك انا مابيطلع معي هيك...
اب جعفر الحبيب عيونك الحلوين وبشوفو كلشي حلو......وحضرلي حالك بدي اطرقك رسمة شي فخفخة .....

mio haddad · 02/03/2006

هيدي احدى خرابيشي في كتير غيرها بس عطلانة السكنر عندي
لا تاكلو هم بكرا بدبرها
سلام الرب

ما مشي الحال آل شو قياس الصورة كبير رح حاول صغرها و حطها واذا في حدا يعملي وساطة بركي بحطها متل ما هيي

طنش تعش · 02/03/2006

حبيب القلب....كبوس عاصورة الرسمة بزر الماوس اليمين وعملا فتح باستخدام المايكروسفت بيكتشر مانجير..........وهنيك عمول تحرير الصور.... مكتوبة بالشريط باعلى الصفحة......وعدل بقياسها وحجما. وحفوظ التعديلات..وانشالله بيمشي الحال......

نور الهدى · 02/03/2006

اقتباس:

وبالنسبة لالك يانور انا متلي متلك يعني متل مانك شايفة........ عاشقفة ورقة ومعي قلم رصاص عادي بس انا بشدد بالتظليل عالاماكن الي بتكون معتمة ...يعني بعطيها جهة انكسار ضوء

مممممممممممم ما بعرف بس فعلا جربت

اقتباس:

هلق رسمتك انا نزلتا عاجهازي وشفت انو ماعاطيتيا حيوية للصورة وبتمنى انو ماتزعلي مني بس انت طلبتي انو كون صريح معك...هلق في اماكن كتير بدا تدريج لون وكانو ضارب الضوء فيها يعني وانتي نازلةمن الخفيف للغميق..... وفي اماكن بدها تعتيم وتظليل متل تحت الرقبة وهيك شغلات هي الي بتعطي نسبة كبيرة من التحسينات عالرسمة.....

أول شي شكرا كتير عالاهتمام, و تاني شي انا مبسوطة و مو زعلانة لأني بحس بشي غلط و ما بعرف شو هوي بريد أسال غيري بلكي بقلي بس الكل بيقولو حلوة و بس, لدرجة اني صرت اكره هالكلمة, بوعدك اني رح حاول اعمل بنصيحتك و ظبطها و بدي رأيك بعدين اذا فهمت عليك ولا لأ

اقتباس:

و لك نور عافكرة عنجد صدمتيني بهالرسمة يعني وين عم تقليلي بضيعكون وفرقونا ...لك شي كتير حلو وكتير ظابت التظليل بالاحمر عالمناطق المعتمة......وعطيتيا تدريج بالابيض عاطي متل لمعة كتير حلوة...........لك انا مابيطلع معي هيك...

ما رح قول غير هالشي من زوقك و بالنسبة لأنو بيطلع معك انا متأكدة بيطلع المسالة مبدا موهوب أو لأ و انت موهوب

و زميل mio haddad في طريقة تانية انو تنزل الصورة على موقع تنزيل صور و بعدين تحط الكود هون متلي يعني

نور الهدى · 02/03/2006

مممممممممم ما بعرف هي جربت و مو كتير مقتنعة بس مو نلوية عدل فيها أكتر من هيك منجرب بغير شي بعدين
شوفولي ياها و بدي رايكون, و زميل طنش وين المفاجأة عمبستناها

اوفففففففففففف ما عميزبط معي الارفاق رغم انها تحملت و حجمها مقبول بس ما عمتطلع ليييييش
هاد رابط الصورة و يا ريت تساعدوني بشغلة المرفقات

http://www.0zz0.com/2006/03/02/815576380.jpg

طنش تعش · 02/03/2006

بهنيكي عالرسمة الحلوة وانا ياريت فيي طول بالي متلك عاتظليل الشعر.....ولاحظت انو الصورة صارت اغمق........بس بدي قلك شغلة..: انو وقت الي بترسمي ماتخلي خط القلم يبين يعني الحدعم تشدي عليه .......والافضل انو تستعملي التظليل لترسمي خط واضح............