في الخيانة و الوطنية

**krimbow** · 21/02/2006

مرحبا

اي بقا هون بدنا ننهي هي شغلة كل ما حدا ما عجبنا حكيو منروح منسفقو مسبة بتجيب آخرتو ألا و هي "يا خاين ما لكش امان، وريتني العذاب الوان"

بتصور انو لازم نرتقي شوي بهالمنبر
بعمري ما شفت واحد ديمقراطي عم يقول لواحد جمهوري ... خاين (باميركا)
بعمري ما شفت واحد ليكودي عم يقول لواحد هستدروتي خاين (باسرائيل)
بعمري ما شفت واحد ديغولي عم يقول لواحد اشتراكي خاين (بفرنسا)

من زمان كتير ما عاد حدا استعمل هالمفهوم غير باطارو الصحيح ...
يعني بهديك البلاد (يللي كلنا متفقين انها متقدمة و شو عليه ازا صرنا متلها ؟) شغلة الخيانة متل القتل، متل الاغتصاب، متل السرقة ... الخيانة صارت جريمة و ما عادت مسبة
متلها متل كل الجرايم الها عقوبتها و الها محاكماتها و الشغلة مو لعبة

إلا عنا... سبحانك يا ربي شو الك شغلات

مشهد اول
حماس خونة بنظر فتح
و فتح خونة بنظر الشعبية
و الشعبية خونة بنظر المصريين
و المصريين (و خصوصا انور المرحوم، هلأ بينطلي واحد بيقول عني خاين لأنو ترحمت عليه... يا اخي مين ما كنت تكون ما بيجوز ع الميت غير الرحمة) خونة بنظر البعث
و البعث خاين بنظر صدام
و صدام خاين بنظر ابو دريد
و الاخراني خاين بنظر ابنو مضر
و مضر خاين بنظر خدام
و خدام خاين بنطر فاروق
و فاروق إلا ما يطلع خاين بنظر طلاس
و طلاس خاين بنظر مرتو ... بس صابرة

ما رح كمل، حاج لهون

مشهد تاني
مدري كيف مرق الامير سعد تبع الكويت بدون ما يطلع خاين، بتصوري الجنرال ابي زيد باعتبار انو متعلم باميركا ما خطر ببالو يخونو

تاريخنا كلو خيانات
واقعنا كلو خيانات
الشيعة خونة، السنة خونة، المسيحيين خونة، الموارنة خونة، ...
ما عدا وليد بيك... هداك غدار، اتركوه مع جنب مو موضوعنا هلأ

مشهد كوميدي اخو محلوشة
منذ نعومة أظفاري، ما تفرجت على مؤتمر واحد (قطري، قومي، عربي تبع الجامعة) إلا و لقيت ملوك و رؤساء و قادة، الناس بتحلف بارواحها و دماءها فداءا الهم ... عم ينطوطوا متل السعادين و نازلين ببعض
" يا خايــــــــــــــــــــــ ـــــــــــــن"
"عملاء"
"مستعدين تتحالفوا مع الشياطين" (لأ و لمين؟؟ لخادم الحرمين)
"و الله لاعمل هيتش و هيتش باللي خلفتش"

بتلاقيهم محموقين، و الشرر يتطاير من اعيونيهم، و ريقهم عم يروح و يجي مع حركة ايديهم و رجليهم، فشر باتشينو يمثل هيك مشاهد او يعقد هيك عقدة بين عيونو

مشهد فايت بالحيط
سنة 1955 صار حزب كامل اسمو الحزب السوري القومي خاين لأنو رئيسو تورط بقتل ضابط
اعدامات، ملاحقات، اعتقالات، بالجملة
نسوان رجال كبار زغار ... كل مين بيمت لهالحزب بصلة خاين

بعد شوي ... بكتب القومية القديمة بتلاقوا بصفحة نازلين تخوين لهالحزب الفاشي الانبطاحي، و بالصفحة يللي بعدها، تمجيد ببطولات سناء محيدلي (استشهادية قومية اجتماعية)

بعد شوي ... صورة صعقتني وقت شفتها سنة الـ 2002 لمصطفى طلاس (بعثي عتيق) عم يهدي جبران عريجي رئيس نفس الحزب السوري القومي الخاين (بنفس المبادئ تبعو و نفس اهدافو و غاياتو) بارودة مدري سيف مدري فرد ما عاد ازكر... من دهب (هدية تقدم للحلفاء حصرا)
شيه؟؟؟؟ لسا مبارح كان خاين

و اليوم، شرذمة من ذات الحزب، بذات تحيتو السورية و تخليدو لسعادة، اعضاء بالجبهة الوطنية التقدمية (للوراء)، و واحد من اعضاؤو .... وزير

مشهد فايت بستين حيط
الاخوان المسلمين عصابة ارهابية خاينة متعاملة مع اسرائيل، ضليت ردد هالشعار لتخرجت من المدرسة
اما حماس ... فهدول حلفاء منفتخر فيهم بكل المنابر

تعريف حماس:
حركة المقاومة الاسلامية السرية، فرع حركة الاخوان المسلمين في غزة
و هالحكي من لسان خالد مشعل بزاتو

عيب
واللهي عيب
يللي بيعجبنا منألهو و يللي ما بيعجبنا منخونو

كترت عليكم المشاهد بس لحتى فرجيكم حجم "المصخرة" (اعظم من المسخرة) يللي عايشينها

لمحة تاريخية لا بد منها:
من زمان ... يعني من اكتر من 3000 سنة كانت الخيانة هيي خيانة الملك او الامبراطور ... بس هالمفهوم انتهى لما بروتوس شارك الكونغرس الروماني بطعن يوليوس قيصر (وقتها صاح يوليوس صيحتو المشهورة ... حتى انت يا بروتوس؟)
يمكن رجع هالمفهوم بعصر بعض الملكيات الاوروبية بعد عصر النهضة و خاصة بفرنسا، بس الثورة الفرنسية اسقطت هالمفهوم بشكل نهائي (ضربة قاضية)
و من وقتها لهلأ ما عاد حدا يستعمل هالمفهوم او هالكلمة ضد معارض اي حكم او حاكم (ما عدا عنا)

me2 · 21/02/2006

ما تواخذني كريم :

هي شغلة فلسفة الخيانة و الوطنية سبقوك عليها جماعات لبنان بعد الحريري.. و من مبدأك نفسو أنو ما بيصير الواحد يخون التاني اذا اختلف معه بوجهة نظر , صار لازم يكون حسن نصرالله وطني بالظيط متل سمير جعجع.

بعدين اذا شي أنت مو شايفو مو معناتو أنو مو صاير أو ما صار .. ما تخلي حبك لذاتك و احترامك ألها ينقلب احتقار لألنا .. بعمرك ما اسمعت أنو اسرائيل عم بتحقق مع العضو العربي عزمي بشارة بتهمة " الاتصال بدولة معادية" ؟؟

بدك تسمحلي أنو قلك الوطنية مانها حب النظام بشكل قاطع وأكيد ولكن الخيانة هي محاولة زعزعة النظام وشو ماكان هدا النظام .

اليوم اللي عم بيحاولو انشاء تحزبات و تجمعات تافهة بضم عشرة أو خمس عشر شخص على الأكتر و بدهم يانا انصدق أنهم بيعبرو عن شريحة واسعة من السوريين ؟؟؟ تخنتوها .

وبدون يقولولنا أنو الأحزاب اللي موجودة و مرخصة ما بتعبر عن طموحاتهم ؟؟ لذلك لازمنا شي خمسين حزب تانيات ؟؟

اذا الأكراد اللي هنن من أشد المعارضين اليوم "بعد احتلال العراق" صار عندهم احد عشر حزب ممنوع "على حكيهم" و هنن ما بيتجاوز المليون .. يعني بدنا شي مية و سبعين حزب ..برأيك هيك الوضع صحي ؟؟

أيمتا بحقلي أنو أتهمك بالخيانة ؟؟ اذا شفت كشف حسابك بالبنك أنو واصلك تحويل من كوندي ؟ ولما لما بتغزني سكين بضهري ؟

اذا بدك عرفلي أنت شو هي الخيانة .. بلكي منستفيد .

هلق اذا راح البيانوني و عمل عملية استشهادية بفلسطين .. متل اذا عملها بلأزبكية ؟؟ يعني اذا قتل يهودي ولا اذا قتل سوري "غالبا علوي" بيكون نفس الشي ..؟؟

شو صايرلك كريم ؟؟؟ عم تتهم النظام بأنو عرف يفرق بين الأخوان المسلمين اللي قتلو السوريين و أهانوهم و اتصلو بصدام و السعودية والأردن و قبضو مصاري ليقلبوا النظام بالسلاح , و بين حماس اللي مارفعت سلاحها ألا بوجه الأسرائيلي ؟؟

هدا الحقد اللي جواتك على النظام صار أسمو حقد أعمى .. وصرت عم تخلط الحابل بالنابل ... اذا بدك الناس ما تكره المعارضة , بدك تحسن اسلوبك شوي .. و تبطل نكش تاريخ , الكل مقتنعين أنو أسود.

اذا لسى بدك تغزل على مسلة الوطنية والخيانة , وتحاول تغيير مفاهيم بسيطة ومفروغ منها سواء باللغة العربية أو بالحياة العملية .. خلينا ننهي النقاش .

sari · 21/02/2006

يا سيد Krimbow و يا سيد قبضاي انت الاتنان معكن حق
بس المشكلة ان في تعرف عام للخيانة و هي تتعلق بطرفين الحاكم و المحكوم
الحاكم و الزبانية تبعونو عندهم كل واحد بعارض الأمر هو خائن و المحكوم مقسوم قسمين
قسم اذا ما عجبو موضوع ما من الحاكم بيطلع الحاكم عميل امبريالي صهيوني رجعي كل مالو آخد البلاد لورا و قسم يا أحبائي بيطلع بعين الناقد البناء
يعني بيشوف الامور بجميع الاوجه و على الاساس بيشوف الامر اذا كان على المدى الطويل او القصير فيه مصلحة للبلد فلا يعد خيانة و اذا كان العكس فاما هو خطاء عادي تجدر معالجته بالنقد البناء و اما يكون اصرار على الخطاء حينها في الامكان ان نقول خيانة .
فاما هي خيانة و طنية اذا كان فيها مصلحة لدولة معادية تستهدف تدمير البلد و مقدراته كافة و هنا ان يكون الحل جزريا الا و هو الاطاحة بها الخائن و من لف لفيفه من العملاء و الاذناب والتابعين ......و اما لمصلحة شخصية و هنا يعد صاحب هذه المسألة غير مؤهل لان يقود البلاد والعباد لما فيه صالحهما وهنا يجب ردعه عما هو فيه بالنصيحة والارشاد و ان كان من القوم الفارغين الفارهين المسطولين الذي عندهم مبدأ انا و من بعدي الطوفان فيجب الاطاحة به و لا أسف عليه و على زبانيته.
و بالنسبة لك سيد قبضاي ان ما يحصل في لبنان على مستوى المسؤولين هم من الفئتين المنفعة الشخصية و المنفعة لدولة معادية و حتى مستوى الشعب أيضا علما انه من الشعب من لا يعترف بهؤلاء الذين يعتبرون كل من كان محيدا و معارضا خائنا عميلا (سوريا) يريد ان يدمر البلد
فهل أنصت يا سيد Krimbow و يا ريت يكون في الحد الادنى اسمك عربي

me2 · 21/02/2006

اقتباس:

كاتب النص الأصلي : sari

يا سيد Krimbow و يا سيد قبضاي انت الاتنان معكن حق
بس المشكلة ان في تعرف عام للخيانة و هي تتعلق بطرفين الحاكم و المحكوم
الحاكم و الزبانية تبعونو عندهم كل واحد بعارض الأمر هو خائن و المحكوم مقسوم قسمين
قسم اذا ما عجبو موضوع ما من الحاكم بيطلع الحاكم عميل امبريالي صهيوني رجعي كل مالو آخد البلاد لورا و قسم يا أحبائي بيطلع بعين الناقد البناء
يعني بيشوف الامور بجميع الاوجه و على الاساس بيشوف الامر اذا كان على المدى الطويل او القصير فيه مصلحة للبلد فلا يعد خيانة و اذا كان العكس فاما هو خطاء عادي تجدر معالجته بالنقد البناء و اما يكون اصرار على الخطاء حينها في الامكان ان نقول خيانة .
فاما هي خيانة و طنية اذا كان فيها مصلحة لدولة معادية تستهدف تدمير البلد و مقدراته كافة و هنا ان يكون الحل جزريا الا و هو الاطاحة بها الخائن و من لف لفيفه من العملاء و الاذناب والتابعين ......و اما لمصلحة شخصية و هنا يعد صاحب هذه المسألة غير مؤهل لان يقود البلاد والعباد لما فيه صالحهما وهنا يجب ردعه عما هو فيه بالنصيحة والارشاد و ان كان من القوم الفارغين الفارهين المسطولين الذي عندهم مبدأ انا و من بعدي الطوفان فيجب الاطاحة به و لا أسف عليه و على زبانيته.
و بالنسبة لك سيد قبضاي ان ما يحصل في لبنان على مستوى المسؤولين هم من الفئتين المنفعة الشخصية و المنفعة لدولة معادية و حتى مستوى الشعب أيضا علما انه من الشعب من لا يعترف بهؤلاء الذين يعتبرون كل من كان محيدا و معارضا خائنا عميلا (سوريا) يريد ان يدمر البلد
فهل أنصت يا سيد Krimbow و يا ريت يكون في الحد الادنى اسمك عربي

تقريبا فهمت عليك و شكرا على أغناء الموضوع ...

me2 · 21/02/2006

اذا قلنا أنو اللي بيقبض مصاري من أمريكا بيكون خاين .. مننتهم أنو عم نخون العالم و ما بيحقلنا .. أما أنو يجي واحد من غياهب الصحراء و عتم ليالي العبودية و ينعنتنا بمختلف أنواع صفاته الشخصية .. فهدا بيدل أنو نحنا صح .

الإمام علي بن أبي طالب قال ما جادلني جاهل إلا غلبني.

**krimbow** · 22/02/2006

اقتباس:

هي شغلة فلسفة الخيانة و الوطنية سبقوك عليها جماعات لبنان بعد الحريري.. و من مبدأك نفسو أنو ما بيصير الواحد يخون التاني اذا اختلف معه بوجهة نظر , صار لازم يكون حسن نصرالله وطني بالظيط متل سمير جعجع.

يسبقني عليها مين ما كان

عندك رد احكيه بيغني الموضوع احيكه
ما عندك بلا كتر حكي بلا طعمة

و انا ما عم اتفلسف

هاد الواقع ... فيك تكذبو ؟؟؟
فيك تكذب انو حماس جزء من الاخوان ؟
فيك تكذب المؤتمرات و البلاوي يللي عم يصير فيها ؟؟
فيك تكذب قصة اغتيال عدنان المالكي ؟؟؟

اقتباس:

بعدين اذا شي أنت مو شايفو مو معناتو أنو مو صاير أو ما صار .. ما تخلي حبك لذاتك و احترامك ألها ينقلب احتقار لألنا ..

شو ؟؟؟
ليش دحشت هالحكي هون ؟؟؟
لحتى تقللي اني مغرور مثلا ؟؟؟
شو هالاسلوب السافل هاد ؟.؟؟؟؟
خليك رجال و احكي الدغري حاج ولدنة

بعدين انا وين احتقرتك لما حطيت المشاهد السابقة ؟؟؟

شو ما عم تشوف شو عم تخبص ع الكيبورد ؟؟؟؟

عموما انا مو مضطر اتحمل اتهامات منك اكتر منهيك

و بعرف كيف خليك تصف عند حدودك

و تاني مرة استرجي توجهلي تهمة وحدة .. مفهوم

لعما على هالاسلوب اللصوصي
اسلوب رخيص

عموما هيك اساليب ما بتنجاب من ضيعة الجيران

و كل اناء ينضح بما فيه من سفالة و ندالة و وقاحة

ما علينا

خلينا نكمل لنشوف شو آخر هالتخبيص الطالع نازل هاد

اقتباس:

بعمرك ما اسمعت أنو اسرائيل عم بتحقق مع العضو العربي عزمي بشارة بتهمة " الاتصال بدولة معادية" ؟؟

مبلا سمعت
مين قلك انو اسرائيل بالمسائل القانونية قبلة تحتذى ؟؟؟
ما كل قوانينها قوانين عنصرية

بعدين شو يعني ؟؟؟ انو شو يللي بيخللي هالموضوع يلغي كون العرب نازلين تخوين ببعض ؟؟؟

اقتباس:

بدك تسمحلي أنو قلك الوطنية مانها حب النظام بشكل قاطع وأكيد ولكن الخيانة هي محاولة زعزعة النظام وشو ماكان هدا النظام .

اي لا انت يللي بدك تسمحلي
مفهومك عن الخيانة خاطئ
على مفهومك هاد
معناها الحركة التصحيحية خاينة لأنو انقلبت ع نظام صلاح جديد
و ثورة 8 اذار خاينة ... لأنو زعزعت نظام الانفصاليين
و الثورة السورية خاينة لأنو زعزعت النظام الفرنسي
و قيس على هالمقياس

انو مو فهمان شو هي الخيانة و جايي تحكي فيها ؟؟

اقتباس:

اليوم اللي عم بيحاولو انشاء تحزبات و تجمعات تافهة بضم عشرة أو خمس عشر شخص على الأكتر و بدهم يانا انصدق أنهم بيعبرو عن شريحة واسعة من السوريين ؟؟؟ تخنتوها .

وبدون يقولولنا أنو الأحزاب اللي موجودة و مرخصة ما بتعبر عن طموحاتهم ؟؟ لذلك لازمنا شي خمسين حزب تانيات ؟؟

اذا الأكراد اللي هنن من أشد المعارضين اليوم "بعد احتلال العراق" صار عندهم احد عشر حزب ممنوع "على حكيهم" و هنن ما بيتجاوز المليون .. يعني بدنا شي مية و سبعين حزب ..برأيك هيك الوضع صحي ؟؟

برأيي انو الوضع هيك مو صحي
بس مو معناتو انو صاروا خونة

اقتباس:

أيمتا بحقلي أنو أتهمك بالخيانة ؟؟ اذا شفت كشف حسابك بالبنك أنو واصلك تحويل من كوندي ؟ ولما لما بتغزني سكين بضهري ؟

تمام
بهيك حالتين بيحقلك
لما بدك تتهم شخص باي تهمة لازم بالاول يكون ارتكب التهمة
حلوة هي تجي تقول عني خاين لأنو والله بيجوز ........ كوندي تحوللي مصاري
ما هي فيها تحول المصاري الك و لمين ما كان

و خود على ضرب بالمندل و تبييت استخارات لنشوف مين الخاين

اقتباس:

اذا بدك عرفلي أنت شو هي الخيانة .. بلكي منستفيد .

اي تكرم عينك
الخيانة هي ارتكاب فعل واعي ضد المصلحة العليا للوطن ... و لمصلحة دولة اخرى (و مو مهم تكون معادية او صديقة)

يعني مثلا لما بيجي نزار اسعد و يبيع بترول بلادنا بسعر 15 او 20 دولار بالوقت يللي سعرو العالمي فوق الـ60 دولار للاميركان
بيكون عم يطبق تعريف الخيانة تماما
و يللي بيوافق على هيك عملة بيكون اخون

لسا راكضلي ورا ابدا بنفسك و علبة كولا عم يرميها متخلف ع الارض
مدري خمسين ليرة رشوة لشي موظف ضميرو نايم ناوي ينقعني لآخر الدوام مشان توقيع

روح شوف الخيانة على اصولا حبيب

اقتباس:

هلق اذا راح البيانوني و عمل عملية استشهادية بفلسطين .. متل اذا عملها بلأزبكية ؟؟ يعني اذا قتل يهودي ولا اذا قتل سوري "غالبا علوي" بيكون نفس الشي ..؟؟

شو صايرلك كريم ؟؟؟ عم تتهم النظام بأنو عرف يفرق بين الأخوان المسلمين اللي قتلو السوريين و أهانوهم و اتصلو بصدام و السعودية والأردن و قبضو مصاري ليقلبوا النظام بالسلاح , و بين حماس اللي مارفعت سلاحها ألا بوجه الأسرائيلي ؟؟

ليك معلم
ما بنكر فضل رفعت و حافظ بتوقيف سرطان الاخوان بسوريا
بس مع الاسف هالشي دفعنا تمنو من جيبتنا و كرامتنا
اما بخصوص حماس
فانشالله مفكرني جوييم بصدق كل شي بيقولوه بالتلفزيون ؟؟؟
حبيبي هدول حماس جماعة ربتهم اسرائيل لحتى تقول لعرفات: "يا بتتفاوض معنا يا منتفاوض معهم، و انت برا فلسطين هنن جواتها .. شو قلت ؟؟"

و يظهر ما خلص دورها و إلا كانت اسرائيل انهتها من زمان

وين حماس و عملياتها السخيفة البايخة من عمليات وديع حداد و جورج حبش

بالوقت يللي حماس خليت العالم كلو يشوف الفلسطينيين كإرهابيين
عملية ميونخ وحدها عم تتمجد بالسينما و ترسم اروع صورة لشرعية الكفاح الفلسطيني المسلح

اقتباس:

هدا الحقد اللي جواتك على النظام صار أسمو حقد أعمى .. وصرت عم تخلط الحابل بالنابل

ما بدنا نبطل شغلة الاتهامات ؟؟؟
كيفك .... بس تزكر انو انت يللي بلشت

هدول يللي مرقوا اليوم بهالرد مجرد تحماية شريك

اقتباس:

ذا بدك الناس ما تكره المعارضة , بدك تحسن اسلوبك شوي .. و تبطل نكش تاريخ , الكل مقتنعين أنو أسود.

المشكلة شريك اني ما عم مثل بشي مسرحية
و لا عم دلل على بضاعة
و لا عم اعمل ديعاية

انا بحكي افكاري و آرائي و قناعاتي ... و بحاول دعمهم بالوقائع و الادلة المنطقية و الواقعية

ازا حدا سمعلي بيجوز يكون فاد حالو
ازا ما حدا سمعلي كمان بيجوز يكون فاد حالو
بالحالتين ما جاييني شي
على الاقل بهالمرحلة يللي فيها قانون طوارئ و ما في احزاب
بس تصير الاحزاب مشروعة .. و بس لاقي حالي خرج ادخل برلمان او حكومة او او ... الخ... ساعتها بفكر بالديعاية

اما بخصوص التاريخ
انا بنكشو لحتى ما ننسا
ما ننسا شو النا
و ما ننسا شو علينا
لحتى ذكركم بالحقيقة المرة يللي عايشينها و مطنشينها

عموما مشكور ع النصيحة

اقتباس:

اذا لسى بدك تغزل على مسلة الوطنية والخيانة , وتحاول تغيير مفاهيم بسيطة ومفروغ منها سواء باللغة العربية أو بالحياة العملية .. خلينا ننهي النقاش .

اي اي الوطنية والخيانة
ما بذكر انو انا يللي خون
بتصور انو انت يللي خونت ما هيك ؟؟؟ و اللا انا غلطان ؟؟

اما تغيير المفاهيم ... فكمان مدري مين عمل الخاين وطني و شريف و عمل الشريف خاين

اما بخصوص انهاء النقاش
كيفك
بس بأكدلك لما بتطل تغزل على مسلة الخيانة الخطيرة من عندي رح وقف
اما طول ما انك عم تستعمل هالاسلوب القمعي الرخيص ... رح تلاقيني لاطيلك على كل رد

**krimbow** · 22/02/2006

اقتباس:

كاتب النص الأصلي : sari

يا سيد Krimbow و يا سيد قبضاي انت الاتنان معكن حق
بس المشكلة ان في تعرف عام للخيانة و هي تتعلق بطرفين الحاكم و المحكوم
الحاكم و الزبانية تبعونو عندهم كل واحد بعارض الأمر هو خائن و المحكوم مقسوم قسمين
قسم اذا ما عجبو موضوع ما من الحاكم بيطلع الحاكم عميل امبريالي صهيوني رجعي كل مالو آخد البلاد لورا و قسم يا أحبائي بيطلع بعين الناقد البناء
يعني بيشوف الامور بجميع الاوجه و على الاساس بيشوف الامر اذا كان على المدى الطويل او القصير فيه مصلحة للبلد فلا يعد خيانة و اذا كان العكس فاما هو خطاء عادي تجدر معالجته بالنقد البناء و اما يكون اصرار على الخطاء حينها في الامكان ان نقول خيانة .
فاما هي خيانة و طنية اذا كان فيها مصلحة لدولة معادية تستهدف تدمير البلد و مقدراته كافة و هنا ان يكون الحل جزريا الا و هو الاطاحة بها الخائن و من لف لفيفه من العملاء و الاذناب والتابعين ......و اما لمصلحة شخصية و هنا يعد صاحب هذه المسألة غير مؤهل لان يقود البلاد والعباد لما فيه صالحهما وهنا يجب ردعه عما هو فيه بالنصيحة والارشاد و ان كان من القوم الفارغين الفارهين المسطولين الذي عندهم مبدأ انا و من بعدي الطوفان فيجب الاطاحة به و لا أسف عليه و على زبانيته.
و بالنسبة لك سيد قبضاي ان ما يحصل في لبنان على مستوى المسؤولين هم من الفئتين المنفعة الشخصية و المنفعة لدولة معادية و حتى مستوى الشعب أيضا علما انه من الشعب من لا يعترف بهؤلاء الذين يعتبرون كل من كان محيدا و معارضا خائنا عميلا (سوريا) يريد ان يدمر البلد
فهل أنصت يا سيد Krimbow و يا ريت يكون في الحد الادنى اسمك عربي

كمان من عندي شكرا الك على اغناء الموضوع
مع انو تعريفك للخيانة مو كتير واضح
يا ريت ترجع توضحو

على فكرة اسم محاوري me2 و ليس قبضاي
قبضاي هي صفة بتطلع عند كل عضو حسب عدد مشاركاتو

بس ما فهمت انو وين المشكلة باسمي ؟؟؟

عموما فيك تناديلي كريم

me2 · 22/02/2006

شو يعني لما بتسأل حدا : كيفك اليوم ؟؟ بيقوم بيرد عليك : والله أبو أحمد اشترا سيارة جديدة ...

شو فيك تفهم من أنو حدا يغير كل مجرى الحديث ؟؟

مرة تانية وتالتة رح أفترض حسن نية و اتغاضى عن قلة الاحترام للمنبر . و اذا لاحقا قررت أنو ما أتغاضى .. مارح أعمل شي .. لأنو كل شي بآوانو أحلى .

**krimbow** · 23/02/2006

اقتباس:

مرة تانية وتالتة رح أفترض حسن نية و اتغاضى عن قلة الاحترام للمنبر . و اذا لاحقا قررت أنو ما أتغاضى .. مارح أعمل شي .. لأنو كل شي بآوانو أحلى .

ييييي
يا ماما
عم ارجف من خوفي

دخيل الزلم انا

me2 · 23/02/2006

تتطاير القذائف المعادية التافهة .. من تحت أقدام الشبيحة وتجار الولدنة ومن بين عيون الانتهازيين و لا تغبر على صرامي الأخوية .

yass · 02/01/2008

روح لفوق!!!!!

راجعين...

yass · 02/01/2008

الداخل مفقود و الخارج ملعون... و كلاهما "خونة" في نظر المطبّلين و المزمرين...

تعريف المطبّل/المزمّر: شخص يتكلم عن الواقع السياسي أو الاجتماعي كمن يحضر مباراة كرة قدم... تشجيع و تصفيق و هدف و أفحمتو و أخجلتو و قوية يا أبو فلان و عاش لسانك أبو علتان...

لا خيانة الا الخيانة, حب الوطن له طيف واسع كطيف الالوان و طيف الفكر و حتى طيف العلم و الاستيعاب..... و التخوين كالتكفير, وسيلة أصحاب الفكر المحدود ان لم نقل مفقود للطعن فيمن يعارضونهم فكرهم (أو للطعن فيمن يمتلكون فكرا غالمخوّن أو المكفّر غالبا لا يملك فكرا انما يملك قشا عقليا سريع الاشتعال بفعل شرار الديماغوجيا السياسية)...

ربما لي عودة......

تحية

**BL@CK** · 03/01/2008

اقتباس:

كاتب النص الأصلي : krimbow

خليك رجال و احكي الدغري حاج ولدنة

اما طول ما انك عم تستعمل هالاسلوب القمعي الرخيص ... رح تلاقيني لاطيلك على كل رد

آخ بس ..

كبير يا كريم كبير .. يا ريت الكل على مختلف توجهاتون و أفكارون رجال و بيحكو الدغري و بلا ولدنة

تحيّة إلك وين ما كنت ..

محمد ابراهيم · 03/06/2008

مافي ابدع من هيك
فكر راقي ياريت العالم تقرأ
هاد وقت الرد المناسب بموضوع متل هاد ، بدو تحديث هالموضوع (يلا روح لفوء ياعمي)

اقتباس:

كاتب النص الأصلي : krimbow

مرحبا

اي بقا هون بدنا ننهي هي شغلة كل ما حدا ما عجبنا حكيو منروح منسفقو مسبة بتجيب آخرتو ألا و هي "يا خاين ما لكش امان، وريتني العذاب الوان"

عيب
واللهي عيب
يللي بيعجبنا منألهو و يللي ما بيعجبنا منخونو

كترت عليكم المشاهد بس لحتى فرجيكم حجم "المصخرة" (اعظم من المسخرة) يللي عايشينها

لمحة تاريخية لا بد منها:
من زمان ... يعني من اكتر من 3000 سنة كانت الخيانة هيي خيانة الملك او الامبراطور ... بس هالمفهوم انتهى لما بروتوس شارك الكونغرس الروماني بطعن يوليوس قيصر (وقتها صاح يوليوس صيحتو المشهورة ... حتى انت يا بروتوس؟)
يمكن رجع هالمفهوم بعصر بعض الملكيات الاوروبية بعد عصر النهضة و خاصة بفرنسا، بس الثورة الفرنسية اسقطت هالمفهوم بشكل نهائي (ضربة قاضية)

و من وقتها لهلأ ما عاد حدا يستعمل هالمفهوم او هالكلمة ضد معارض اي حكم او حاكم (ما عدا عنا)

اولا رح اتخيل انو الحوار مفتوح بيني وبينك كعادتنا قديما لحتى ارد عليك واكتبلك مرحبا
وأتمنى من كل قلبي انو اشوف رد الك على تعليقي هاد قبل نهاية هالشهر قبل ما ارجع اسجل دخول لاخوية تاني (ان كان صعب او مستحيل ، قناعتي انو مافي مستحيل على الله )
تركتك السنة اللي فاتت باخر شهر 5 لفترة اقل من شهر ،رجعت ما لاقيتك بتمنى ترجع هالمرة قبل ما ارجع انا .
المهم بدي احكيلك عشغلة ، انو المصخرة يا عزيزي انو يتم اعتقالك بتهمة "نشر أخبار كاذبة من شأنها إضعاف الشعور القومي ".
هو من جهة معينة انا مع هالاتهام عنجد (اي لاتتفاجأ رح اشرحلك )
مثل ما بتعرف انا قرأت الك كتير ولا زالت ، خلال الفترة الماضية (شعوري ضعف جدا) قسما بالله ، لا تستغرب ، شعر راسي وقع منو كتير والله العظيم ،، اي اي استنى قبل ما انسى ، وشعر صدري كمان ضعف ووقع منو كتير ، بصفة عامة يعني حدث اضعاف ل"شعوري " ، انا ذهبت للطبيب وخبرني انو الموضوع "اضعاف شعوري " يتعلق باسباب خاصة بالتغذية والاعتناء بشعوري ، لكن لا مانع لدي من انتهاز الفرصة طالما ان اتهامك جاهز ومعد سلفا ويرتبط ارتباط وثيق بضعف شعوري لذلك انا بتهمك بالتسبب في اضعاف شعوري ، يا عزيزي كان لازم بكتاباتك تنصح الجميع بالاعتناء بالشعور وغسل الشعور جيدا وتنصح بالتغذية حتى لا يضعف ويتساقط متل ما بتعرف يا عزيزي ما في اخطر على الشعوب من انو يحدث الا اضعاف لشعورها .

أخدت بالك من المصخرة ياعزيزي؟

habiba2008 · 28/06/2008

yali mhayarni enou elkel 3am isafeklou la karim (allah ifouk asrou) bes wala wahed elou elchaja3a layehki metlou ma3a enou kan younkoul wake3 houwa chayfou ghalat ou ma 3ajabou fa abda mawkefou

elmawdo3 kan 3elkhyana
bes ya toura ou bikoul saraha hal elkhyana ayan kanat machrou3a fi halat am la