تزويج الفتاة من مغتصبها ...

[marioma alghzayala]

مرحبا ..


كل اليوم الصبح بتجيني جريدة بلدنا عالمكتب .. بس مبارح لفتني العنوان ...اللي كان :
تزويج الفتاة من مغتصبها ..(عفوا ايها القانون ) ...:

كتير انطرح مواضيع بخصوص جرائم الشرف .... وكتير في نقاط خلاف صار وحوارات واحاديث ..

بس من القصة اللي مكتوبي واللي هيي عبارة عن انو بنت ما كانت تاخد شكل جدي كيف بينظرلا ابن جيرانا ..انو عادي متلو متل اي شب ..بس بيوم من الايام وهيي راجعة عالبيت بيغتصبا..وبترجع عالبيت مكسورة ومحطمي وحالتا بالويل ... وقت اللي راحوا عالمخفر .. قالولوا قدامك حلين ..
يا بتنسجن 15 سني
يا اما بتتزوجا ..

يعني كتير خيارات ..مكتّرين ...حسيتن عم يساعدوه...

.. انو شفت وقت اللي زوجوا البنت اللي اعتصبا هداك الحيوان ... اي صارت جريمتين .. طيب شو زنبا هيي؟؟... نفسيتا كيف رح تكون ؟؟؟ كيف رح تطلع فيه ؟؟ مين بيتحمل المسؤولية؟؟ هيي ؟ اهلا ؟ الشب ؟ العالم ؟


وتفضلوا

[أإأبو العبد]

بس يعني لو ماتزوجا المغتصب مين رح يتطلع فيها بمجتمعنا؟؟؟؟؟؟؟؟؟؟

[عطر الايام]

الموضوع بيفتح مجالات كتيرة للمناقشة
طيب ازا البنت ما رضيت تتزوج الشاب يللي اغتصبها حينحبس 15 سنة( انا يللي بعرفوا 20 سنة )
بس بهالحالة لازم اهل البنت والمجتمع يوقف معها للبنت لانو هي ضحية هاد لانو كانت مأدبة البنت وما أخدت وعطت مع الشاب
بس انا بنظري مو لازم ينحبس الشاب لازم ينشنق لانو هيك حيوان لازم ما يعيش. وساوى معها هيك حيساوي مع غيرها
وازا تزوجتوا مشان ما يصير فضايح حتعيش بإهانة طول عمرها معو
انا برأيي خليه ينحبس

[أإأبو العبد]

كاتب النص الأصلي : عطر الايام

انا برأيي خليه ينحبس

حلو الكلام بس البنت بمجتمعنا شو رح يصير فيها
قولك العرسان رح يوقفو طوابير على باب بيتن؟؟

[عياش]

كاتب النص الأصلي : أإأبو العبد

بس يعني لو ماتزوجا المغتصب مين رح يتطلع فيها بمجتمعنا؟؟؟؟؟؟؟؟؟؟

معناها الحل نزوجها لمغتصبها لأنو هية براد أو غسالة أحسن ما ينسرق منبيعو........

يعني بالله عليك حيوان بشري اغتصب بنت شلون بدك يعاملها كزوج.......

بس للتوضيح الاغتصاب ليس عملية سهلة يعني غير منطقي إنو رجل واحد يقدر يغتصب بنت هيك بدون ماحدا يساعدو أو يستخدم مخدر أو تهديد بسلاح يعني المغتصب بيكون إما عم يستغل ضعف البنت نتيجة مرض أو علة نفسية أو عصبية أو مخطط مع سبق الاصرار إنو يغتصبها ومهئ الظروف ومستخدم سلاح أو متفق مع أشخاص آخرين يساعدو يعني مو متل ما بيصوروها إنو ساعة طيش وشباب وفورة جنسية نتيجة اغراء لا يقاوم لانو في كتير ناس بتتعامل مع المغتصب إنو ضحية الاستفزاز والاغراء الجنسي خصوصا نجوم الفضائيات من المشايخ المتلفزيين.

[marioma alghzayala]

طيب هدّوا شوي ...

لنفرض تجوزا ... كم مرة رح يرجع يغتصبا ؟؟... لك هيي من الاساس ما بدا ياه .. لاء وجوزوها ياه ؟؟ اي و الله فظاعة

[عطر الايام]

البنت المغتصبة ضحية ولازم كل العالم يفهم هالشي
لانو يللي صرلها ماكان بإيدها ولا موافقة عليه كانت

[عطر الايام]

انا ضد انو يتزوجها
لانو هيك شاب لازم ينفضح وخليه ينحبس

[أإأبو العبد]

كاتب النص الأصلي : عياش

معناها الحل نزوجها لمغتصبها لأنو هية براد أو غسالة أحسن ما ينسرق منبيعو........

يعني بالله عليك حيوان بشري اغتصب بنت شلون بدك يعاملها كزوج.......

بس للتوضيح الاغتصاب ليس عملية سهلة يعني غير منطقي إنو رجل واحد يقدر يغتصب بنت هيك بدون ماحدا يساعدو أو يستخدم مخدر أو تهديد بسلاح يعني المغتصب بيكون إما عم يستغل ضعف البنت نتيجة مرض أو علة نفسية أو عصبية أو مخطط مع سبق الاصرار إنو يغتصبها ومهئ الظروف ومستخدم سلاح أو متفق مع أشخاص آخرين يساعدو يعني مو متل ما بيصوروها إنو ساعة طيش وشباب وفورة جنسية نتيجة اغراء لا يقاوم لانو في كتير ناس بتتعامل مع المغتصب إنو ضحية الاستفزاز والاغراء الجنسي خصوصا نجوم الفضائيات من المشايخ المتلفزيين.

ياعمي انا والله معك بس يعني لو انحبس والتعن دين اهلو (وانا مع هالشي) البنت \\\(بمجتمعنا)\\\ شو حتستفيد
ياجماعة انا مو مع تزويجها لهالوحش البشري بس انا بدي ناخد بعين الاعتبار مجتمعنا (المتخلف) كيف بيفكر؟؟؟

وقضايا من هالنوع مابتنحل الا اذا تغيرت طريقة تفكير المجتمع فالتغير مابيبدا بتغير القوانين قبل مايبدا بتغير طريقة تفكير هالمجتمع

[Noah]

موضوع محيّر فعلاً .. يزيد تعقيده ما يقيّد ساعدينا من عادات

هلْ البنت المغتصبة قادرة عى رؤية مغتصبها .. يدعوها للفراش ثانية ؟ باللين؟

وعليها حق الاجابة ؟

[أإأبو العبد]

حاجتنا احلام وردية وانو الجاني رح ينال عقابو (هاد اذا ماكان مدعوم وطلع منها)وانو البنت رح تعيش بسعادة وهناء والناس رح تتعاطف معها
وانا بشوف مافي حل للبنت حاليا الا بزواجها من مغتصبها
بس نبقى هيك نوصل لمرحلت الانسانية ونفهم شو معنى كائن بشري ونخلص من جعل القضايا الجنسية اول اولوياتنا بهالحياه ونتخلى عن مفهوم الشرف التنكي المقرف الي جعل اساس شرف البنت بغشاء البكارة وهاد المفهوم البدوي المتخلف هو الي جايبنا ستين الف سنة لورا
ساعتها بس ممكن يتغير هالمجتمع ويمكن وقتا نقدر نغير بهالقوانين

[أم الجود]

هالموضوع مطروح بحلقتين من مسلسل سيرة الحب .. و القصة هي نفس القصة اللي حكتها مريومة بالأول بالضبط ..
الحلقة بعنوان 508 و هو رقم القانون يلي بيسقط العقوبة عن المغتصب في حال الزواج ...
أنا لما شفتها بكيت لتنهنهت

[أإأبو العبد]

كاتب النص الأصلي : Noah

أنا أرى أن عمليات ترميم البكارة هي الحل درئاً للفضيحة .. وليُرمى ذاك المتوحش في غياهب السجن سنوات وسنوات

كيف رح يرمى بالسجن والبنت ماتنفضح اساسا هيك كلب مسعور لما ينسجن بيكون شغلو الشاغل كيف ياذي البنت ويفضحى فكيف رح تزبط هالشغلة حتى لو ترمم غشاء البكارة

[أم الجود]

كاتب النص الأصلي : أإأبو العبد

حلو الكلام بس البنت بمجتمعنا شو رح يصير فيها
قولك العرسان رح يوقفو طوابير على باب بيتن؟؟

صديقي أبو العبد
انو تعنّس هالبنت أحسنلا من انو تتزوج هالحقير و تعيش معو بعذاب كل يوم هي و عم تسترجع هديك اللحظات المؤلمة .. لأنك لما بتتزوج بتكون عم تعمل عيلة و من حق ولادك عليك تنقيلون أم منيحة .. و أنا لو محل هالبنت -الله لا يقدر طبعاً- ما برضى لولادي هيك أب ...

[أإأبو العبد]

شكرا ام الجود لانك قدرتي تفهمي قصدي

يعني باختصار رايحه عالبنت بالحالتين اذا تزوجتو رح تعيش بمأت وهم وغم ونكد
واذا لا رح تنفضح ويمكن حتى اهلها يقرفو عيشتا وماحد رح يتطلع فيها مهما كانت اخلافا ومهما كان جمالا

[..Jimy]

كاتب النص الأصلي : أإأبو العبد

بس يعني لو ماتزوجا المغتصب مين رح يتطلع فيها بمجتمعنا؟؟؟؟؟؟؟؟؟؟

أنا... ليش هي شو فيها نقص حتى ما اطلع فيها أو بشو اذنبت هيي.. أو بشو غلطت؟؟
وابو العبد متل ما قالت ام الجود انو تعنس افضل بكتير من انو يتكافئ المجرم الحيوان عجريمتو..

كاتب النص الأصلي : marioma alghzayala

طيب هدّوا شوي ...
لنفرض تجوزا ... كم مرة رح يرجع يغتصبا ؟؟... لك هيي من الاساس ما بدا ياه .. لاء وجوزوها ياه ؟؟ اي و الله فظاعة

ولأ وشو كمان بقانونا العتيد الصنديد.. اغتصاب الزوجي امر قانوني..عادي يعني ..

[Noah]

كاتب النص الأصلي : أم الجود

هالموضوع مطروح بحلقتين من مسلسل سيرة الحب .. و القصة هي نفس القصة اللي حكتها مريومة بالأول بالضبط ..
الحلقة بعنوان 508 و هو رقم القانون يلي بيسقط العقوبة عن المغتصب في حال الزواج ...
أنا لما شفتها بكيت لتنهنهت

قد رأيتها .. الفتاة المظلومة نالت مايكفي من الظلم ..

من المغتصب

من المجتمع

ثم الاهل


لم المجتمع لا ينظر اليها .. كما ينظر لامراة مطلقة مثلا؟

او اجنبية ؟ من بلاد الحرية ..!

[عياش]

كاتب النص الأصلي : ..Jimy

ولأ وشو كمان بقانونا العتيد الصنديد.. اغتصاب الزوجي امر قانوني..عادي يعني ..

بحب أضيف بهل الصدد إنو بقانونا العتيد الصنديد بالمادة 491 جاء ما يلي للعاهرة الحق بأن تمنع نفسها عمن شاءت ومتى أرادت.
يعني القانون ضمن حماية العاهرة من الاغتصاب ولم يحمي الزوجة من الاغتصاب ملاحظة بتعريف الاغتصاب بالقانون السوري يعاقب من جامع امرأة غير زوجته قسراً .....يا أخي القانون ما بيدخل بين المرأة وجوزها شو يدك بالحكي.