موسوعة yass التدوينية

[yass]

الجزء الأول: كيف و ليش

1) شو يعني تدوين؟

التدوين هو الشي اللي يعملو المدوّن..

2) مين هوي المدوّن؟

الشخص اللي عندو مدونة ..الغرب الكافر بيسموه Blogger

3) شو يعني مدونة؟

أهااااااااااا .. سؤال حلو

المدونة يا سادة يا كرام هيي نفسا الـBlog بلغة الأجانب.. و هي عبارة عن صفحة شخصية صغيرة فيك تفتحها بأحد مخدمات التدوين الكبرى أو الصغرى (الكبرى أحسن دايما) بيكون عنوانها هو اسمك أو الاسم اللي بدك ياه +المخدّم دوت كوم (هيك الأغلبية يعني).

التدوين بلّش تقريبا حوالي سنة الـ 2002 بصورة بدائية مختلفة تماما عن ما هو موجود اليوم.. كانت الشغلة بدائية و هات ايدك و الحقني.. و وخمة و وجع راس.. هلأ الأمور تطورت كتير يعني.. و كانت خطوة موفقة جدا في طريق فرض الانترنت كوسيلة اعلامية اعلانية تواصلية.. و كتير من فهمانين علم الاجتماع بيحكو عن أهمية "المواطن الصحفي" اللي عندو سبيس خاص فيه يحكي فيه و يعبّر فيه..

4) وين فيني اعمل مدونة؟ و قديش تكلف؟

في كتير مخدمات تعطيك امكانية عمل المدونة.. في منهون عالميات و في منهون على مجال أضيق (مخدمات عربية)

العالميات:

Blogspot: بعتقد أفضل مخدّم تدوين.. فيو اعدادات كتيرة و يعطيك امكانيات كتير ة لتحط اكسسوارات +بيدعملك التعامل مع جميع أنواع المخدمات الأخرى من Feed و تعليقات, بيدعم اللغة العربية بشكل ممتاز (السنة هاي لحتى عملو عربي) .. صرلي أكتر من سنتين و نص اتعامل معو و جدا ممتاز.. و بعدين تابع لشركة غوغل.. و ما أدراك ما غوغل..

مشكلتو انو محجوب بسوريا

wordpress: المفضّل من قبل المدونين العرب اجمالا و خصوصا السوريين (كون لسى ما انحجب), بيشبه البلوغ سبوت إلى حد كبير و اعداداتو شبيهة نوعا ما لكن أنا ما بحبو كتير (هيك محبة من ألله يعني).. خيارات التميّز فيه أقل من البلوغ سبوت بكتير(يعني اكسسوارات محروفة, و هيك أمور) لكن كمان موقع ممتاز و محترم و كتير شهير..

لسى ما حجبوه بسوريا


العربيات:

مكتوب

البوابة

أين

الخ...

هدول ما تعاملت معهون بنوب... فيهون مشكلة أساسية وهي انو القدرة على السيطرة على الدعايات محدودة شوي (بمكتوب لأ.. لكن بالباقي لاحظت هالشي).. يعني تفتحهون و ينطو بوجهك الدعايات كتير.و قعود سكّر نوافذ.. المشكلة التانية انو غالبا ما بيعطو مع بعض و لا مع العالميات, و الـ feed تبعهون فايت بالحيط و ما بيدعم أنظمة الخلاصات متل الخلق... ( و بعتقد كلهون محجوبين)

لذلك أنا ما بنصحهون بنوب يعني..


بالنسبة للكلفة.. فصفر مربع للتكعيب.. متلو متل حساب ايميل (طبعا في خيارات بالمصاري متل انو تعمل نطاق أو اسم مخصوص يكون اسم مدونتك دوت كوم أو انك كمان يكون بدك حساب بريد الكتروني خاص بمدونتك و هيك قصص)



ازا ع بالك تفتح مدونة.. طوّل بالك علي اليوم و بكرا بكون نزلت كل شي لازمك لتكون مدوّن منيح .. تابعنا على قناة الصالون الفضائية و أسئلتكم حول الأجزاء نجيب عليها بكل سرور



للحديث بقية...

[i m sam]

متابع وباهتمااااااام
شكرا ياس

[boy freind]

لك يا عيني عليك

انا من زمان نفسي اعرف عن هالموضوع بالذات

متابعك و على احر من الجمر

[yass]

الجزء الثاني: شوية قصص و انطباعات شخصية حول التدوين بشكل عام, و التدوين العربي

حضرتنا, و أعوذ بالله من قولة حضرتنا, بيشتغل بالتدوين من شي 3 سنين, بلشت بالبلوغ سبوت و بمدونة اسبانية, و ماشي الحال الحمدلله أمورنا ماشية أخدنا جائزتين بهالوقت (رمزيات.. ما طلعلنا ولا فرنك) و هلأ عندي مدونتين اسبانيات + مدونة عربية..

خبرتي بالمدونات بترجع للبلوغوسفير العالمية (البلوغوسفير blogosphere هو مصطلح يقصد به عالم التدوين أو عالم المدونات), و نشاطي على المستوى العربي تقريبا من أول الصيف فقط..

المدونات بعتقد شي جميل و ايجابي و ضروري.. خصوصي للشباب, شي حلو يكون عندك ركنك الخاص بتعملو ديكور ع كيفك و تزبطو ع مراقك و تكتب فيه شو ما بدك و كيف ما بدك.. تسالي يعني.. بس عدا التسالي بعتقد شي منيح يكون عندك دافع تكتب بمكان ما, و مشان تكتب لازم تفكر.. و بالتالي عالم المدونات يدعم الفكر و تحريك المخ.

بشكل عام في مدونين على مستوى العالم صارو أشهر من صحافيين عالميين.. و هنن ناس متلي متلك يعني, بس عندون شي يحكوه و جذب الناس إليه (و مو شرط يعني مقالات شي رهيب و قوي, و للا خواطر و قصائد شغلة كبيرة.. انما يجوز شي انت تعتبرو غير ذي أهمية بتلاقي الناس مهتمة فيه.. على كل, محتوى المدونات رح نحكي عنو لاحقا)

متل ما كنت عم قول.. التدوين صاير متل وجود ركن شخصي الواحد يكتب فيه عن اهتماماتو, يحط صورة عجبتو, أغنية حبها و يكتب عنها, مقطع فيديو.. الخ... و هاد الأمر الطبيعي

بالنسبة للتدوين على المستوى العربي, فمثل ما قلت سابقا خبرتي فيه ترجع لشهور قليلة لكن فتلت فيه منيح و حكيت مع مدونين كتار و اطلعت على دراسات عن هالشأن و خلتني جيب شوية استنتاجات, و رح نحكي على مستوى التدوين العربي (باللغة العربية أو من دول عربية) و بعدين نجي على سوريا:

- بشكل عام, التدوين العربي هزيل إلى حد ما, يتناسب طردا مع واقع الانترنت العربي و مفهوم الانترنت العربي.. عدد المدونين قليل نسبيا و غالبهم يستعمل مفهوم المدونة بشكل خاطئ, لا يمنع هالشي انو في طاقات و خامات ممتازة في جميع المجالات.. في مدونين ممتازين

كتميّز على مستوى دول.. فشخصيا معجب بالنخبة تبعيت التدوين السعودي.. صحيح قليلين لكن ممتازين جدا و على مستوى ثقافي عالي جدا (طبعا هون كل واحد و اهتماماتو) .. بيجو أخواننا المصاروة بعدين كمان عندون شي حلو .. و بعدين من بلاد الشام بتلاقي الفلسطينيين و الأرادنة, و بعدين سوريا بشكل متأخر جدا

لبنان حطيتها ع طرف.. لأنو كحركة تدوين هيي أنشط دولة عربية, و غالبا تحط باقي الدول كلهون بجيبتها الصغيرة, لكن قليلين جدا جدا اللي بيكتبو بالعربي.. التدوين اللبناني انشهر أيام آخر حرب صارت, و كتير من المدونين اللي بلشو يروو تفاصيل الحرب من قلب الحدث هلأ ألفو كتب و صارو يشتغلو بدوريات فرنسية و أميركية

و سوريا بتصير فيها تقريبا نفس الحالة.. في كم هائل من الأكاديميين السوريين المغتربين اللي بيكتبو مدونات, لكن الغالبية تكتب بالانكليزي.. و النذر ابيسير اللي يكتب بالعربي متأثر جدا بالمنتديات, و يكتب بالمدونة و يستخدم المدونة و كأنها منتدى (على كل رح نحكي بمكان تاني عن الأخطاء الشائعة بالتدوين العربي و خصوصا السوري)


لانهاء هالفقرة بس رح قول انو في من استغرب انو أكتب موضوع يدعو لنشر التدوين و أنا اداري منتدى.. طبعا التدوين لا يتعارض مع المنتدى, بالعكس تماما هيي أمور مختلفة.. و ممكن حتى يكون انعكاسها ايجابي على المنتدى (لأنو اللي يفتح مدونة لازم يشغل مخو مشان يعمل أفكار مشان يحطها بالمدونة, و نفس الفكرة اللي كتب عنها بالمدونة كمان بيشتغلها بالمنتدى, فيتحول من عضو مستهلك للمواضيع إلى عضو منتج لها) .. و يعني حتى لو في تأثير للتدوين على المنتدى ( وعم قول انو في حال وجوده هو تأثير ايجابي).. فكل تأثير يؤدي الى انو عضو يتحول إلى المبادرة و الابداع و الانتاج.. حتى لو خسرتو كعضو (و ما رح اخسرو) أنا رضيان فيه...



منكمّل بعدين

[Reemi]

مثبت يا ابني

[رجل من ورق]

روووووووووووووووووووووووح شايفلك ولو انك قلبت المواجع
حتى مدونات مكتوب حجبوها

[yass]

الجزء الثالث: شوية نصائح و أخطاء لازم نتفاداها اذا ناويين نكون مدونين ناجحين (1)

بما يخص الديكور و الاكسسوارات:

- في فرق بين غرفتك بالبيت و غرفة أوتيل.. غرفة الأوتيل نظيفة و جديدة و عين ألله عليها خرج تطلع بغلاف مجلة..لكن ما فيها لمحة شخصية.. مافيها لمسة منك يعني..و غرفتك يكون التخت مجعلك و فوقو كوام تياب, و طاولتك مليانة كتب و وراق و ضو الطاولة (الفلكس) ملزوق بشرطيطون و اللمبة تتلولح, و تحت الطاولة في ورقتين من شدة قديمة واقعين و ما سخيان تكبهون عالزبالة لا يكون يلزمو بعدين.. تمشي و تلاقي قنادرك- الله يعز- مبعثرة عالأراضي و الباب ما بيسكّر منيح و بدك تحط محرمة بالشق لحتى يطبق منيح.. بس يا أخي غرفتك هاي... فيها شخصيتك يعني... عرفت المدونة شلون لازم تكون؟ قصدي انو لازم يكون في لمسة شخصية حتى لو ما كانت هاللمسة غرافيك ديزاين و شغلات حرّيفة ... لأ يوب.. عالخفيف و على قد حالنا, بس عطيها لمسة شخصية...

- لا تكتّر اكسسوارات غير ضرورية, لا تحوّل المدونة إلى سيارة تكسي مليانة شغلات أبتنفع.. حط قصص مفيدة (بلوغ رول, عدّاد أنيق, شوية روابط -منحكي بالروابط بعدين-.. هيك أمور) يعني ما ضروري تحط الأبكليكيشن اللي تعطيك درجة حرارة نيودلهي متل هالوقت السنة الماضية و بالفهرنهايت و السلزيوس.. ما ضروري يعني

- الروابط اللي تحطها.. يا حبيب كلو بيعرف شو رابط البي بي سي, و شو رابط الجزيرة... ما محتاجين يفوتو ع مدونتك ليعرفو كيف بيدخلو.. لا تكتّر روابط.. و يفضّل ترتبهون بين مدونات أصدقائك و المدونات اللي تزورها و تزورك (منحكي بهالأمر بنقطة التشبيك) و بقسم تاني تحط منتدياتك و هالمواقع الظريفة اللي ما معروفة كتير مثلا و انت تعتقد انو حلو تحط روابطها و تكون تتناسب مع الجو العام لمدونتك..


بما يخص النشر و المواد المنشورة:

- حبيب قلبي ... سمعت صار شي و بدك تعرف شو هوي.. بتفتح مدونة رفيقك لتعرفو؟ لأ .. بتفتح الجزيرة نت.. لذلك حبيب المدونة مانها موقع اخباري.. لا تنقل أخبار يعني...

- لا تكتّر نقل مواد أو مقالات.... و للا قلك؟ لا تنقل طاول بنوب .. بيكون أحسن.. المدون المحترم ما بينشر الا شغل ايدو.. و اذا مش ولا بد عجبك شي جدا جدا فافتح مقال جديد و اكتب رابطو و شرح عنو (باسلوبك) و شو عجبك و ليش عجبك.. يعني مو تكبس المقالة و تتم ماشي (في كمان خيار حلو بيستعملوه الشباب أحيانا.. انو بالقائمة تبعيت مدونتك تفتح قسم اسمو مختارات و تحط فيه لينكات لمقالات أو مواضيع من مواقع أخرى)

- المدونة هي شي شخصي.. لذلك كل ما كان الشغل تبعك شخصي كل ما كانت ناجحة أكتر..

- لا تكتب لمجرد الكتابة و التحديث... و لا تلتزم بشي مانو من اهتمامك لمجرد انو (ماشي سوقو).. يعني انت احكي بشو ما بدك.. بشو جاي ع خاطرك تحكي.. و النت شاسع واسع و راح توصل لحدا مشترك معك بهالشي (هالحكي خصوصا للمدونين العرب... اللي محتكرين شغلتين: سياسة و دين) .. بتكتب خواطر معناتو حط خواطر, تكتب شعر حط شعر.. تكتب قصص تقنية حط قصص تقنية.. بتحب تكتب يوميات و رؤية هيك للحياة حط... بتحب الموسيقى اكتب عن الموسيقى, بتحب الرياضة اكتب عن الرياضة ..و لا تحط لحالك معيار للابتذال.. كل شي مهما كان تافه.. اذا طالع من ابداعك و عاجبك فانشرو و لا تستحي.. هاي مدونتك و انت أمين التحرير و المحرر و انت الكل بالكل, و اللي ما عاجبو لا يفوت يقرا

و ما حدا قال انو المدونة لازم تكون تخصصية.. لذلك لا تجبر حالك على قالب من المواضيع أو المواد.. اكتب عن اللي جاي بمراقك.. و كيف ما جاي بمراقك (شب مدون كاتب من يومين انو لبس البنطلون و طلع بقلبو صرصور.. انو تسالي.. لأنو حاكي القصة تقول سسبنس عالآخر و حبكت معو تسالي... و هو شب بالعادة يكتب خواطر جادة و مقالات جدية يعني..)

- حاول تكون دوري نوعا ما بالكتابة و متوازن فيها .. يعني لا تحط أربع اضافات جديدة بيوم و تروح تطس اسبوعين.. انما حاول تكون منظم و التراتب يكون واحد (تقريبا) و ازا عندك كتير مواد ففيك تبرمج نشرها (تحطها بالمدونة و تبرمج النشر و هي تنشرلك ياهون باليوم و الساعة اللي بدك ياهون كل وحدة) .. يعني فيك تحط مواد احتياط تخليهون عندك لوقت تنشغل (يعني ازا عدت فترة عم تكتب كتير فـ خبّي قرشك الأبيض ليومك الأسود) .. و كنصيحة شخصية ما بنصح حدا ينشر أكتر من مادة باليوم..

- استخدم التاغز أو السمات لترتيب موادك حسب نوعها (يوميات, سياسة, رياضة, خواطر.. الخ)..

-اللغة دائما ضروري تكون مزبوطة و صحيحة.. لكن مافي داعي تكون متكلّفة و تقيلة دم.. كتوب ع راحتك, و اذا مافيك الا ما تكتب كم جملة بالعامية حطهون و لا تخجل.. تعطي مدونتك لمسة قرب و شبابلك كتير.. المهم تكون مرتاح يا بوبو العين

- مو ضروري تلزم حالك بانو اذا مو طالع معك مقال عليه العين ما تكتب.. يعني في ناس ما بتحط الا مقاطع صغيرة.. تعليق صغير يجوز على شيء ما .. سطرين و تم ماشي.. بس انو يكونو طالعين من صماصيم قلبو .. بيسوو كتب.. مو بس مقالات


منكمّل لاحقا

[اللامنتمي]

عجبتني هي شغلة " المدونة "

بس قولك " ما بـِ تنحجب " كمان "

[yass]

كاتب النص الأصلي : اللامنتمي

عجبتني هي شغلة " المدونة "

بس قولك " ما بـِ تنحجب " كمان "

أغلب مخدمات التدوين محجوبة.. لكن مع ذلك.. بعتقد ازا في شرخ صغير ممكن الواحد يمرق منو فلازم نمرق منو.. حاليا في مخدم مانو محجوب و لا في نية لحجبو على ما يبدو و هو مخدم الوردبرس... و الباقي بتفوتلهون متل ما بتفوت ع هالمواقع المحجوبة...

[i m sam]

ياس ممكن تحطلنا رابط نقدر نفوت عالمدونات نعرف شلون الشغل عالواقع ونتابع معك
يمكن بتنفهم المعلومات اكتر وخاصة هلق بلشت الترتيبات تبع المدونة وبلشت التعقيدات
ومشكور على تعبك كمان

[yass]

كاتب النص الأصلي : i m sam

ياس ممكن تحطلنا رابط نقدر نفوت عالمدونات نعرف شلون الشغل عالواقع ونتابع معك
يمكن بتنفهم المعلومات اكتر وخاصة هلق بلشت الترتيبات تبع المدونة وبلشت التعقيدات
ومشكور على تعبك كمان

قصدك انو نحط أمثلة على كيفية اعداد المدونة (الجانب التقني) و للا أمثلة عن مدونات جاهزة أو هيك شي؟ صديقي ما فهمت بالضبط كيف فيني اخدمك فبلكي تشرحلي بالزبط مشان نتفق

تحية

[i m sam]

اي الجانب التقني

[yass]

كاتب النص الأصلي : i m sam

اي الجانب التقني

بالنسبة للجانب التقني.. فكل مخدّم الو طريقتو الخاصة و اعداداتو الخاصة.. فحسب وين فاتحها بيكون في قصص مختلفة.. انا فيني ساعدك عالبلوغ سبوت لكن غير هالمخدم أنا ما استخدمت..

على كل أنا دائما بنصح انو الواحد يعمل أول مدونة, قبل مدونتو النهائية.. بس مشان يجرب قصص و يبحبش..بالعادة دائما الطريقة سهلة جدا و خلال نص ساعة بتكون سيطرت على كل الجوانب (الله يرحم أيام زمان كان كل شي برمجة و أتش تي أم لأ.. و تعا دبرها.. هلأ مافي أسهل من انك تعمل مدونة ممتازة خلال ساعة زمان)

[yass]

الجزء الرابع: التشبيك و الاندماج بالـ Blogosphere

هو عمليا لسى ما انتهينا من النقطة السابقة اللي تناقش السلبيات اللي لازم نتفاداها.. لكن حاليا رح اكتفي بهالأمور الأساسية حيال هالنقطة, و بعدين نعمل اضافات للصبايا و الشبيبة اللي قررو يبدو رحلتهون في عالم التدوين..

بهالجزء رح نحكي عن التشبيك, و اللي هو مصطلح خرندعي مدري من وين طلع و يقصد به "دمج مدونتك ضمن شبكة" .. و لما نقول شبكة, بنقصد نوعين من الشبكات:


- شبكة ليست فيزيائية انما شبكة علاقات مع مدونات و مدنين آخرين: في واحد من أخطاء التدوين العربي انو الشخص يفكر مدونتو الناس رح يجوها لحالهون, و هون في غلط كبير لا علاقة به بجودة المادة اللي تقدمها, انما انو اذا ما سمعانين فيك و لا شايفينك بأي مكان فما رح يجوك من حالهون حتى لو مادتك جيدة (بخصوص الجودة.. ما دام المادة من شغلك فهي جيدة.. لأنو هاد مجهودك الشخصي, التقييمات التانية ترجع لكل شخص.. عم قول هالكلام لأنو أول و أكبر و أصعب شغلة لازم يتخلص منها أي شخص بدو يبدع هو الخجل, او اعتبار مادته دون المستوى..)

هالنوع من التشبيك هو أهم نوع, و عليه تبني سمعة مدونتك و سمعتك كمدوّن.. بعد ما تبني مدونتك و تبلش تكتب, حاول تبحث أو توصل لمدونات موجودة تتناسب مع أفكار مدونتك و طريقتك (مو شرط مية بالمية.. بس يعني يكون في ترابط منطقي) و اقرا فيهون و تفرّج عليهون, لما تشوف مدونة تعجبك و فيها مواضيع منيحة تروك تعليقات (التعليق غالبا بيعطيك خانة تحط فيها عنوان مدونتك)..

القصد من التعليقات مو انو تعلّق حيالله مشان بس يظل تعليقك.. انما حاول يكون تعليقك متناسب مع الموضوع, مانو مجرد شكر و ظل ماشي.. لأنو تعليقك الجذاب رح يكون دعاية لمدونتك (أساس الملاحة التدوينية هيي انك تقعد تقرا مدونات و تقرا التعليقات, و تلاقي تعليق يعجبك فتروح على مدونة صاحبو, و كمان هنيك تلاقي تعليقات, و نفس العملية بتنط من مدونة لمدونة و بتلاقي بظرف اسبوعين تلاته صارو المدونات المتشابهة بيعرفو بعض.

طبعا كمان في خدمات متل قوائم الروابط أو قوائم المدونات ضروري تستخدمهون, يعني مدونة حبيتها و شفت صاحبها تعاون معك و زارك و زرتو "تدوينيا" فتحط رابط مدونتو عندك بقائمة الروابط تبع مدوناتك الصديقة, و هو يعمل نفس الشي و غيرو و غيرو.. و بتكونو عملتو شلة تدوينية يجمعها التدوين حول أمر مشترك..

بيكون منيح كمان لو تترك عنوان ايميل بمدونتك مشان الناس يقدرو يبعتولك و هيك أمور..

الحقيقة انو هالنوع من التشبيك هو المتعة تبعيت التدوين, و هو الاصانص تبعو.. لأنو انت عم تتعرف على مدونات جديدة و فكر جديد و عم تقرا و تستفيد و تتعرف على ناس, بنفس الوقت اللي عم تترك بصمة (تعليق) هي دعاية لمدونتك.. و الغريب انو هالنوع من التشبيك مافي اهتمام فيه بالمرة بالمدونات السورية, كل واحد قاعد بمدونتو و مالو علاقة بحدا.. بالكتير 2 رفقات فاتحين مدونات و بيزورو بعض.. لذلك لحد هلأ مافينا نقول انو في blogosphere سوري حقيقي, انما في مدونات متفرقة فقط لا غير...

- الطريقة الثانية ليست بأهمية الأولى لكن كمان مهمة, و هي عبارة عن مجتمعات التدوين: مواقع عادية تكون مجهزة مشان تعمل فيه أكاونت و تسجل فيه مدونتك, فهنن عن طريق رابط الخلاصات يسحبو مواضيعك الجديدة و يحطوها عندهون بتسلسل زمني مع رابط مدونتك ( فيكون تقولو انو متل دليل المدونات).

على المستوى السوري في موقعين (شوفو الروابط و رح توصل الفكرة بسهولة أكبر):

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

على اعتبار التدوين السوري ما زال هزيل فلذلك المجتمعات التدوينية متل ما شايفين شاملة (انو مدونات سورية و فقط.. بدون تصنيفات)..

بـ blogosphere كبيرة و نامية تلاقي انو في مواقع متل المذكورة فوق (متعوب عليها أكتر لأنو هالموقعين اليتيميات بسوريا الله يعطيهون العافية اللي عاملينهون و تعبانين عليهون فعلا لكن شوي خدماتهون سطحية) مو بس انو مدونات دولة معينة.. انما تلاقي مثلا موقع فيو مدونات سياسية, مدونات دينية, مدونات تهتم بالزراعة و الاعشاب, مدونات طبية... الخ الخ الخ



آسف طولت عليكون.. و يمكن الحكي هيك فايت ببعضو و ما كتير مفهوم, فازا في أي استفسار خبرونا


عقبال ما نعمل شبكة مدونات أخوية

[yass]

موقع البلوغ سبوت (تابع لغوغل) عامل قناة خاصة فيه عاليوتيوب و حاطين شوية فيديوهات تشرح بشكل مبسّط كيفية انشاء مدونة على بلوغ سبوت .. الفيديوهات بالانكليزي, و عم يشرح طبعا على القالب الانكليزي للموقع, لكن اللغة سهلة و مفهومة , و القالب العربي نفس القالب الانكليزي بالضبط, يعني تشوف المبدأ بالفيديو و رح تشوف انو نفس الشي بالعربي.. اللغة بالانكليزي بس اعتقد مافي مشكلة بفهمها لأنو بيحكي بطئ نوعا ما و بينفهم أغلب الكلام بسهولة..

نقّيت أول و أهم 3 فيديوهات (للأسف ما بعرف كيف فيني ارفع الفيديوهات للناس اللي محجوب عندون يوتيوب)

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

[was616im]

كاتب النص الأصلي : yass

قصدك انو نحط أمثلة على كيفية اعداد المدونة (الجانب التقني) و للا أمثلة عن مدونات جاهزة أو هيك شي؟ صديقي ما فهمت بالضبط كيف فيني اخدمك فبلكي تشرحلي بالزبط مشان نتفق

تحية

اي و لو سمحت كمان اذا شي نموذج جاهز عن المدونة لحتى تكتمل الفكرة براسي الله يخليك معلم

[butterfly]

بديت معك


ومتابعة بشغف

[yass]

كاتب النص الأصلي : was616im

اي و لو سمحت كمان اذا شي نموذج جاهز عن المدونة لحتى تكتمل الفكرة براسي الله يخليك معلم

مسلا مسلا...


مدونة المتشائل

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

مدونة وائل كريم (وائل76)

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

و بالمواقع اللي حطيتهون سلفا

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

بتلاقي كوم مدونات فيك تتفرج عليهون (و لو انو لا تاخد نماذج كتيرة.. يعني قارن و شوف شو حكينا.. لأنو التخبيص شغال, بيني و بينك الحكي لا تقول لحدا )