الخط دا خطي




الخط دا خطي
والكلمة دي
ليا
غطى الورق غطي
بالدمع يا عنية
شط الزتون شطي
والارض عربية
نسايمها انفاسي
وترابها من ناسي
وان رحت انا ناسي
ما تنسانيش هى
والخط دا خطي
والكلمة دى ليا
لاكتب على عينى
يحرم عليكى النوم
واحبس ضيا عينى
بدموعى طول اليوم
قبل الوفا بديني
زي الصلا والصوم
والدين فى عرف الحر
هم ومذلة ومر
وشجون تصون وتجر
احزان مخبية
والخط دى خطي
والكلمة دى ليا
لاكتب على كفي
والحبر من دمي
ياهمتي كفي
يا عزوتى ضمي
اول ما ح نوفي
بالوعد
ح نسمي
باسم اللى ماتوا صغار
فى المدرسه والدار
والمصنع اللي انهار
فوق الصنا يعية
والخط دا خطي
والكلمة دى لي

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

السندباد



حكيم عليم
مخلص جسور
طاير على جناح العصور
داير
كما يدور الدولاب
ورا التاريخ
من الجذور
يطلع جبال
يقطع شعاب
يغوص في أغوار البحور
ينبش بعينه في الكتاب
يقرا الشواهد
ع القبور
ولما عاد
السندباد
رامي السلام
وقال كلام
وإسمع كلامه وحلله
تلقاه بسيط من أوله
تعمل حويط وتأوله
تطلع غشيم
قال الحكيم
العمر ماشي
وكل ماشي وله مداه
وكل فرد
له بدايته ومنتهاه
الشعب هو الباقي الحي
هو إللي كان
هو إللي جى
طوفان شديد
لكن رشيد
يقدر يعيد
صنع الحياة
والشعب لما يقول
يا أصحاب العقول
نسمع
ونوعى
ونحترم
صوت الإله

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

مين اللي يقدر ساعه يحبس مصر

زين العابدين فؤاد


يتجمعوا العشاق في سجن القلعة
يتجمعوا العشاق في باب الخلق
والشمس غنوه من الزنازن طالعة
ومصر غنوه مفرعه م الحلق

يجمعوا العشاق في الزنزانه
مهما يطول السجن، مهما القهر
مهما يزيد الفجر بالسجانه
مين اللي يقدر ساعه يحبس مصر ؟

يتجمعوا والعشق نار في الدم
نار تحرق الجوع، والدموع، والهم
نار تشتعل لما القدم تنضم
لما الايادي تفور ،تلم اللحم

واللحم متـنطور في رملة سينا
والكدب بيحجز على أيادينا
قدم العدو غارسه في لحم ترابي
والكدب عشش مخبرين على بابي

والمخبرين خارجين كلاب سعرانه
بيجمعوا العشاق في الزنزانه
مهما يطول السجن، مهما القهر
مهما يزيد الفجر بالسجانه
مين اللي يقدر ساعه يحبس مصر ؟

مصر النهار، يطلقنا في الميادين
مصر البكا، مصر الفنا والطين
مصر الشموس الهالّه م الزنازين
هالّه وطارحه في دمنا بساتين
مصر الجناين طارحه، مين يقطفها ؟
مصر الجناين، للي يرفع سيفها
مهما يطول السجن، مهما القهر
مهما يزيد الفجر بالسجانة
مين اللي يقدر ساعه يحبس مصر ؟
1973

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

غنوة سلام




قد إية القلب يعشق
لو سمع غنوة سلام
ياسلام
قد إية والغنوه تحلى
لو بدينا بالسلام
ياسلام
قد إية الروح تميل
والنغم يطلع جميل
والوتر يوصل كلامه
للقلوب صافى وأصيل
قد إيه
وقد إيه
بس أقول إية ولا إية
السلام دا كلمة خضرا
زى أغصان الريحان
ترتوى منها الشفايف
لما تجرى ع اللسان
زوقوكى الناس يادنيا
بالكلام عن السلام
والكلام غير الحقيقة
والعمل غير الكلام
ياسلام
من هنا نبدى الكلام
ياصبابة يامغرمين
كلنا نحب السلام
والسلام بيحب مين؟
السلام بيحب نورا
وشوفوا نورا تبقى مين
نورا بنت عيونها خضرا
زى قلب العاشقين
والخدود وردية خمرى
والشفايف توت وتين
والضفاير
تبر طاير
يبعت النور والرنين
والنهود حراس مدينة
يالبنادق سهرانين
يحرسوا قلب المدينة
من عيون البصاصين
والمدينة ف عصر نورا
صوروها المنشدين
هى جنة إنسانية
للبنية والبنين
فيها غيط القمح كافى
يدى كل المحتاجين
فيها نهر الحب وافى
يسقى كل العطشانين
فيها نور البدر صافى
يهدى كل الحيرانين
فيها مطرح للسلام
لو فرش يقدر ينام
فيها كل الناس
حبايب
فيها كل الناس تمام
ياسلام
قد إية القلب يفرح
لو يزور بيتنا السلام
ييجى ومعاه الحبايب
نورا والنور والكلام
لافرش الأرض الحبيبة
حنة
واعمل مشايات
وانصب الشادر يلالى
بالكهارب والزينات
واسقى كل الناس حبايبى
مية وردى ف الكاسات
وادعى كل عيال حارتنا
بالمزاهر والنايات
ينشدوا الألحان
فرايحى
تسرى ف قلوب البنات
تعمل الأنغام عمايل
ترسم الأحلام
حاجات
لو قالوها لأمهاتهم
أو عادوها للخالات
يفهموها
ويداروها
عن عيون الأبهات
ويقوموا لها ويقعدوا لها
ويغزلوا لها الأمنيات
والربيع يوصل ما دام
ف الوجود نسمة سلام
والزهور تطرح جناين
والعبير يرسم حمام
زوقوكى الناس يادنيا
بالكلام عن السلام
والكلام غير الحقيقة
والعمل غير الكلام
ياسلام

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

كلمتين يامصر


كل عين تعشق حليوة
وأنتى حلوه ف كل عين
يا حبيبتى
قلبى عاشق
وإسمحيلى بكلمتين
كلمتين يامصريمكن
هما آخر كلمتين
حد ضامن يمشى آمن
أو مآمن يمشى فين؟
شابه يأم الشعر ليلى
والجبين شق النهار
والعيون بحرين أمانى
والخدود عسل ونار
واللوالى ف إبتسامتك
يحكوا أسرار المحار
ياللى ساكنة القصر عالى
إمتى يهنالى المزار
كلمينى يا صبية
طال علية الإنتظار
كلمتين يامصر يمكن
هما آخر كلمتين
حد ضامن يمشى آمن
أو مآمن يمشى فين؟
قصرك المسحور غيلانه
أغبى من دود الغيطان
بعد مصّ الغصن لاخضر
ينحتوا عضم العيدان
واللى خلا الأرض خضرا
واللى خلا الدار أمان
عاش بجوعه ملو جوفه
مات بخوفه م الغيلان
روّح الغلبان ماقلشى
عن شقا العمر اللى كان
كلمتين لمصر يبقوا
هما آخر كلمتين
حد ضامن يمشى آمن
أو مآمن يمشى فين؟
آدى كلمة من عذابى
قلتها لك
باقى كلمة
من حنينى صنتها لك
ف الضلوع
من دنيا ظالمة
كنت خايف يلمحوها
يقتلوها ف سكة ضلمة
شقشقت والنور بشاير
زهرة الصبار يا سلمى
يانسيم الشوق يا طاير
خد لمصر الصبح كلمة
طول مايبقى الركب ساير
بالبصاير والعنين
يبقى ضامن
يمشى آمن
يبقى شايف
يمشى فين

سجن شبين الكوم

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ممنوع من السفر


ممنوع من السفر
ممنوع من الغنا
ممنوع من الكلام
ممنوع من الاشتياق
ممنوع من الاستياء
ممنوع من الابتسام
وكل يوم ف حبِّك
تزيد الممنوعات
وكل يوم باحبك
أكتر من اللى فات
حبيبتى ياسفينة
متشوقة وسجينة
مخبر ف كل عقدة
عسكر ف كل مينا
يمنعنى لو أغير
عليكى
أو أطير
إليكى
واستجير
بحضنك أو أنام
فى حجرك الوسيع
وقلبك الربيع
أعود كما الرضيع
بحرقة الفطام
حبيبتى ياسفينة
متزوقة وحزينة
فى كل حاره حسره
وف كل قصر زينه
ممنوع من إنى أصبح
بحبك أو أبات
ممنوع من المناقشة
ممنوع من السكات
وكل يوم ف حبك
تزيد الممنوعات
وكل يوم بحبك
اكتر من اللى فات


القاهرة 1976

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

رجعوا التلامذة

رجعوا التلامذة
ياعم حمزة
للجد تانى
يامصر انتي
اللى باقية وانتى
قطف الاماني
لا كوره نفعت
ولا اونطه
ولا المناقشة وجدل بيزنطه
ولا الصحافة
والصحفجية
شاغلين شبابنا
عن القضية
قيمولنا صهبة
يا صهبجية
ودوقونا طعم االاغانى
رجعوا التلاميذه
للجد تاني
طلعوا التلاميذه
ورد الجناين
اسمع يا ميلص
وشوف وعاين
ملعون ابوك ابن كلب خاين
يا صوت اميركا
يا امريكاني


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

صبر أيوب




عليل وصف علته
قال له الحكيم هوه
داء الغرور فى البشر
خلا النفوس هوه
طبيب وجاي يسعفه
صابه الغرور هوه
ترك أصول حرفته
وإنساق ورا القوة
كاد العليل ينتقل
قام قال له إيه هوه
يا مسأسأ الصبر فوق الجرح من بره
الجرح يا عم
جايب دم من جوه


****

فين آخر الصبر يا شيخ أيوب
لآمتي الحر يبات مغلوب
إلجو ضباب
الوقت غروب
ألديب ع ألباب
ألباب موروب
الحرب الحرب الحرب
ولا غير الحرب سبيل
والضرب الضرب الضرب
على ناصيه كل ذليل
النار والعار
لعدو الدار
والموت للخاين والغدار
كان جدي كبير السن
وكان بيقوللي كلام
زى القرآن
الحق عجوز وقديم ويغر
لكن ما يموتش وله طلاب
والتار قنطار
فوق كتف الحر
والصبر فى وقت البلوى
عذاب
والعزم صديق فى الوقت المر
ولا غير العزم تلاقى صحاب
والآرض براح
وأن داسها الذل تضيق بالناس
وألخضرة تموت
ويعربد فيها البوم أجناس
ولاتبقي حياه
ولا يبقي نظام
ولا خطوه تسير بالناس قدام
ولا تعرف بكره حييجي بايه
ولاتفهم معنى لآى كلام
ونلف نلف وبرضه نقول
الحرب سجال داير على طول
والسكه أمل
وألنيه عمل
والجهد حياه
والراحه شلل
يا زنود الناس الشغاله
ملعونه الراحه ف خط النار
النصر عروسه يا رجاله
لكن ممهوره بالآصرار
التار يا عروبتنا
التار
التار فوق رقبتنا
قنطار
وخلاص الشعب الحر اختار
الحرب الحرب الحرب
وليحيا كفاح الشعب

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

الحاوي


توت حاوي حاوي توت
خش اتفرج هرج فوت
زاحم لاحم عارك اضرب
ناضل فاضل
خطوة وتقرب
وإلحق نفسك
قبل ما يلعب
وامسك نفسك جوه الملعب
دانت حتضحك لما تموت
توت حاوي
حاوي توت
***
توت حاوي سبع مرات
لعبة جديدة
يا حضرات
دق الفول ويا الكرات
هات الشطه والبهرات
شخبط لخبط حضر طاسه وكب الزيت
ولع طلع ريحه مريحه ف جو البيت
ح تلقى عجينه عجيبة متينة
لا تقول تينه ولا برتينه
كل يا صنايعي
كل يا فقير
كل ماهو لسه الفول قناطير
آه يا سلام لو عود جرجير
تفضل تاكل لما تموت
توت حاوي
حاوي توت
***
توت حاوي حاوي توت
خش اتفرج هرج فوت
قعده فكيهه
حتسمع فيها
حكاية البيضة والكتكوت
يحكى أن
ولازم يحكى
وكان ياما كان
قبل الجنه
كان فيه بيضه وفرخه كمان
دبحوا الفرخه طبت سارخه
قامت البيضه طقت شارخه
طقشت فقست فرخ فصيح
يدن ويهلل ويصيح
حتى إن كان على وش دبيح
يفضل يدن لما يموت
توت حاوي حاوي توت
***
سحر مفيش دا كلام تهويش
نفض مخك يا ابو درويش
كل ما فيها الدنيا دي فيها
ناس بتبكش
لجل تعيش
حابس حابس
عفريت كابس
ينزل قالع يطلع لابس
واللي بيرقص
ع المسامير
واللي بإبره بيفحت بير
واللي بينفخ في المزامير
يفضل ينفخ لما يموت
توت حاوي
حاوي توت



القاهرة 1968


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

الغربة



يا غربة روحي روحي
لاتحطي على سطوحي
وسطوحي يطلع فدان
والفدان يحتاج مروى
والمروى عرق الإنسان
والانسان
يحتاج ثروة
والثروة فى غيط الفلاح
والعامل صاحب المفتاح
والمفتاح يفتح جنه
والجنة فيها الحنه
يا حنه يا محنيه
عشقوكي الجناينية
زرعوكي خضرا خضرا
م البدره للقطفيه
وعجنوكي حمرا حمرا
للسمرا والخمريه
والسمرا طرحت بستان
والبستان لابس فستان
والفستان طاقة طاقة
أحمر أخضر يا رفاقه
ورفاقي يا كل الناس
من كل الناس و الاجناس
ع الجنة واقفين حراس
والحنه على سطوحي
يا غربه روحي
روحي


القاهره /

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ايا ولدي



*

لاَ تَبْكِ فأحزانُ الصِغَرِ

تَمْضِي كالحُلْمِ مع الفَجْرِ

وقريبًا تَكْبُرُ يا وَلَدِي

وتُرِيدُ الدَمْعَ فلا يَجْرِي...

*

إِنْ سَهِرَتْ أمْطَارٌ مَعَنَا

أو غَطَّى البَرْدُ شَوارِعَنَا

فالدِفءُ يُعَمِّرُ أضْلُعَنا

ولَهِيبُ الأرضِ بِنا يَسْرِي...

وإذَا بَحَّتْ لَكَ أُغْنِيَةٌ

أَوْ أَنَّتْ قَدمٌ حافِيَةٌ

فَشُمُوسُ رِفاقِكَ آتِيَةٌ

وسَتُشْرِقُ مِنْ غَضَبِ الفَقْر...ِ

*

قدْ أُرْمَى خَلْفَ الجُدرانِ

وتحِنُّ لِحُبِّي وحَنَانِي

فانْظُرْ في قَلْبِكَ سَتَرانِي

لَنْ يَقْوَى القَيْدُ على الفِكْر...ِ

سأضُمُّكَ والصَدْرُ جَرِيحُ

وسأعْشَقُ والقَلْبُ ذَبِيحُ

مهما عَصَفتْ ضِدِّي الريحُ

لَنْ أَحْنِيَ في يوْمٍ ظَهْرِي...

*

وإذا ما الدهْرُ بنا دَارَ

ومَضَيْتُ إلى حَيْثُ أُوارَى

أَكْمِلْ مِنْ بَعْدِي المِشْوَارَ

لا تُخْلِفْ مِيعادَ الفَجْر...ِ

لَنْ يَسْقِيَ دمْعٌ أشْجارَكْ

لَنْ تَبْنِيَ بِالآهِ جِدارِكْ

فاصْرُخْ بالخَوْفِ إذا زارَكْ

لا تَخْشَى النارُ مِنَ الجَمْرِ...

كلمات : آدم فتحي

لحن و غناء : الشيخ امام


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

رساله

أحمد فؤاد نجم


واه يا عبد الودود
يا رابص ع الحدود
ومحافظ ع النظام
كيفك يا واد صحيح
عسى الله تكون مليح
وراجب للأمام
ع اجولك وانت خابر
كل الجضية عاد
ولسه دم خيك
ما شرباش التراب
حسك عينك
تزحزح يدك عن الزناد
خليك يا عبده راصد
لساعة الحساب
آن الأوان يا ولدي
ما عاد الا المعاد
أمك ع تدعي ليك
وع تسلم عليك
وتجول بعد السلام
خليك ددع لابوك
ليجولوا منين دا بوك
ويمصخوا الكلام
واه عبد الودود
تنفض الشركه واصل
وينزحوا الكلاب
إن كنت ود ابوك
تديب لي
تار اخوك
والأهل يبلغوك
دميعا السلام واه با عبد الودود
كيفك وكيف زمايلك
عسى الله طيبين
خالك زناتي
داي لك
ضمن المتطوعين
واختك تطلع يوماتي
ع المشتشفى الجديمه
حاكم ع يمرنوها
في العركه تكون حكيمه
ومحمدين موافي
يتعلم المطافي
ويجولك شد عزمك
ويجولك العوافي
ومن هنا الجرايب
والعيله والعيال
ع يبلغوك سلامهم
ولتمة الرجال
وآخر الكلام
نجول لك في الختام
الله يصون بلدنا
ويحرس السلام
والدك حسن محارب
غفير برج الحمام

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

الأخلاق


مناعه ارزاق
جلابة ارزاء
يا سخامه يا لطامه
ياللى اسمك اخلاق
ازيك وايش حالك
ايه اخر الانباء
دجوكى ؟
سلخوكى ؟
خلوكى اشلاء
ما انا قايل وسمعتي
بس انتي اللى طمعتى
فى بلدنا يعوزكي
مسكوكي دقوكي
بدماغ الدقماق
بالقاضيه الفنيه
صرعوكى السجانه
حبوسكى
فى قضيه
مرفوضه وخسرانه
والتهمه الجنائيه
اكمنك انسانه
وخدوكى الشرطيه
وعساكر هجانه
وابولكنه فرنساوي
طبال ومغناوي
بيغنى اشتراكاوى
والعالم طرشانه
وابو عسكر حرميه
بيبرطع فى تكيه
ويقول اشتركيه
والناس
لسه جعانه
يا هبيله يا فضيله
يابتاعه المهابيل
بلا وكسه
بلانيله
بلا هفه مخاليل
دى بلدنا
ولا حولا
ما بقاش فيها علاوله
وعوضنا على المولي
فى ولادنا الشماليل
يادينا ورجلينا
اسسنا وعلينا
وعملنا اللى علينا
جيل يطلع ورا جيل
ويقول ابنوا لبكره
والبنى ادم ذكري
نتحمس للفكرة
من كتر التطبيل
واخيرا ولا اخر
اخلاقنا بتتاجر
ومهازل
ومساخر
وهزيمه
وتضليل


القاهرة / 1967


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

على الأرغول



الأوله آه
والتانية آه
والتالتة آه
الأوله آه
والغدر لمن حكم
صبح الأمان بقشيش
والتانية آه
والندل لما احتكم
يقدر ولا يعفيش
والتالته
آه
والحر مهما انحكم
للندل ما يوطيش
الأوله غربتي
والتانيه بلوتي
والتالته كلمتي
أرغول يا أغول
يا أبو النغم موصول
شطره تجيب شطره
والشطره غنيوه
منظومه وحليوه
والسامعين أدرى
والسامعين أشتات
زى النغم مقامات
قسم وغني وهات
وإملا المكان خضره
بالفن والقدره
والأوله آه
والتانيه آه
والتالته آه
ياعم يا قوال
يا أبو الحرير موال
كيفك
وكيف الحال
اغزل وسمعنا
واشطح مع النغمات
ودوس على المقامات
هات إللي عندك هات
لمن تشبعنا
د إحنا الحيارى دليل
مستنظرين مواويل
توصل مع المراسيل
والصهبه تجمعنا
صهبتنا صباحي
طول ما الألم صاحي
يا شوقي يا جراحي
يا حبي يا بكره
يا صحبتي فى الهم
يا شركتي فى الدم
عزوتنا
لو نتلم
ونغني للفقرا
أخضر خضرضر مال
للعشق والموال
وكان أصيل الخال
لكن فقير الحال
شد الرحال فى الحال
جاب البلاد رحال
ينزف على الأرغول
دم الصبا سلسال
أخضر خضرضر مر
على كل بحر وبر
داق الشتا فى الحر
والعشق له أهوال
رجع صاحبنا حزين
يقعد مع المساكين
ويغني للعاشقين
ويقسم الموال
يا ليلي آه يا عين
يا عم يا جمال
ترعى جمالك وين
وأنت فقير الحال
يا ليلي آه يا عين
والمرعى للأندال
يا ليلي آه يا عين
يا عم يا جمال
والصبر مهما طال
ما حتنفتلش حبال
إذ لم قلوب وإدين
يتمدوا ع الشطين
ويعمروا العيارين
ويطخوا راس المال
والأوله آه
والتانيه آه
والتالته آه



////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

عطشان يا صبايا




عطشان يا صبايا
وانا عاشق ع السبيل
عطشان والميه ف بلدي
على عكس مايجرى النيل
والنخل العالي مطاطي
والجذع الواطي ذليل
والريح العاكس كابس
والريح العاطي بخيل
والنسمة اتعكر لونها
من هم النلس يا خليل
عطشان والنيل ف بلدنا
والزرع اخضر وجميل
وانا كنت امبارح خالي
واليوم دا صبحت عليل
عطشان ودوايا حبيبي
يسقيني العشق دليل
ودليل الحب عمايل
وكلام الحب دليل
وانا كل مااقول التوبه
تغويني المواويل
تطرح ف القلب جناين
تفقس فيها الزغاليل
عشاق يا حمام الغيه
ولافيش قدامنا بديل
سكه ومحسوبه علينا
نمشيها جيل ورا جيل
ع الشوق نفرد خطاوينا
ف الليل
تضوي القناديل
حوالينا قلوب حبابه
ومعانا العقل دليل
والشمس تصب صبابه
والمنبع نهر النيل
وان لاموا علينا يلوموا
مالهمش علينا سبيل
ماهو شوك العشق ملامه
والشوك ف الورد أصيل
ودوني ع السبيل



القاهرة1977


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

بقرة حاحا



ناح النواح والنواحه
على بقرة حاحا النطاحه
والبقره حلوب
حاحا
تحلب قنطار
حاحا
لكن مسلوب
حاحا
من أهل الدار
حاحا
والدار بصحاب
حاحا
وحداشر باب
حاحا
غير السراديب
حاحا
وجحور الديب
حاحا
وبيبان الدار
حاحا
واقفين زنهار
حاحا

وف يوم معلوم
حاحا
عملوها الروم
حاحا
زقوا الترباس
حاحا
هربوا الحراس
حاحا
دخلوا الخواجات
حاحا
شفطوا اللبنات
حاحا
والبقرة تنادي
حاحا
وتقول يا ولادي
حاحا
وولاد الشوم
حاحا
رايحين فى النوم
حاحا
البقرة إنقهرت
حاحا
فى القهر إنصهرت
حاحا
وقعت فى البير
حاحا
سألوا النواطير
حاحا
طب وقعت ليه
حاحا
وقعت م الخوف
حاحا
والخوف ييجي ليه
حاحا
من عدم الشوف
حاحا
وقعت م الجوع ومن الراحه
البقرة السمرا النطاحه
ناحت مواويل النواحه
على حاحا
وعلى بقرة حاحا




////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

بوتيكات


بوتيكات النات كوا النات
وشقق مفروشه وعمولات
يا حلاوه الناوة كوا الناوة
يا بلدنا يا اخر فتاكات
بوتيكات النات كوا النات



شبيبيك لبيك فتح مخك
لبييك شبيك غمض عنيك
حتقفل مخك ح نطخك
ونلوشك لو تفتح عينك
ركب قرنين تركب مازدا
وتعيش سلطان فى البراوز دا
مش عاجبك فالجبنه الفاسدة
والعيش والفول والكرات
يا حلاوه الناوه كوا الناوه
يا بلدنا يا اخر فتاكات
بوتيكات النات كوا النات



مين فيكوا ما يعرفش عليوه
شيال المينا الكحيان
فى ثواني اتمول واتحول
بقي مسيو عليوة عليان
ازاى ؟
ما هى بوظه ومفتوحه
على حس ولاد المفضوحه
وارانب صاحيه ومدبوحه
تتأستك تبع البنوكات
يا حلاوة الناوة كوا الناوة
يا بلدنا يا اخر فتكات
بوتيكات النات كوا النات



حتقولي الفقرا ومشاكلهم
دى مسائل عايزة التفانين
وانا رأيي نحلها رباني
ونموت كل الجعانين
وبهذا ما حدش
ح يجوع
لو نعلن هذا المشروع
و ح نقفل هذا الموضوع
نهائيا
ونعيش فى تبات
يا حلاوة الناوه كوا الناوة
يا بلدنا يا اخر فتكات
بوتيكات النات كوا النات


سجن الاستئناف /

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

المسحراتى


حبلت الأيام سنين
ولدت الأيام دهور
دامت الأيام لمين
وحدوا المولى الغفور
صلى ع اللى ف القيامة يشفعك
واصحى ياللي نمت باللي بيوجعك
وانده اللي لو ندهته يسمعك
واكشف اللي بيألمك و بيمنعك
قول يا جاره
قول يا جار
مهما طال الليل وجار
كل جرم و له مسار
والكواكب دوارين
وحدوه يا مؤمنين
صح نومك يا اسطى مرسي
ياللي راسي
هل يومك يا اسطى فكري
ياللي ناسي
يا حبايب مصر ياأهلى ياناسى
اللى يعشق بالسهر حتماً يقاسى
إصحى يانايم كفاية
وحَّد الإنسان معايا
طالت الليل الرحايه
والحدادى قلقانين
وحدوه يامؤمنين
ياللى صاحيين ف البيوت
ياللى واعيين بالزمان
ياللى سامعيين السكوت
ياللي كاشفين المكان
استمدوا م الصيام
واستعدوا للقيام
واقبلوا مني الكلام
مصر نايمة من سنين
وحدوه يا مؤمنين
وحدوه يا مؤمنين


القاهرة1977

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

دلي الشكارة

أحمد فؤاد نجم


دلي الشكارة جنب الشكارة
و اقعد يا حفني ولعلك سيجارة
فكّـر شوية ... بالعيشة دية
إيه القضية إيه العبارة
من صغر سني
شقيان لكني
ما لط سني غير البصارة
....
و دخلت حارة من جوة حارة
و فكل حارة عليت عمارة
و سط المعامل بنا و مناول
بس المقاول كلني بشطارة
و لا خلى صرة و لا لقمة حرة
و العيشة مرة ... أخر مرارة


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

اليويو


يا واد يا يويو
يا مبرراتي
يا جبنه حادقة على فول حراتي
أستك لسانك
فارد ولامم
حسب الابيج
يا مهلباتي

يا واد يا يويو يا مهلبية
فوق الصواني
سايحه وطريه
فى كل جلسه تلبس قضيه
وتخيل عليها
يا مشخصاتي
حسب الوظيفة
وأنت وشطارتك
تظهر حلاوتك
تظهر مرارتك
لو خفضوك ترفع حرارتك
لو صعدوك
تقلب جيلاني
وبالمناسبة
وأنت اللى أدرى
كان لك تحفظ على المبادرة
ليه النهاردة بترش بودره
يا بن الأبالسه
يا ملطفاتي
وفى النهاية
لك عندى كلمة
آخر طريقك زحل وضلمه
حيث ان آخر القرع ضلمه
يا إما كفته
عند العجاتى


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

صرخة جيفارا




جيفارا مات
جيفارا مات
اخر خبر فى الراديوهات
وفى الكنايس
والجوامع
وفى الحواري
والشوارع
وع القهاوي وع البارات
جيفارا مات
واتمد حبل الدردشه
والتعليقات
مات المناضل المثال
ياميت خسارة على الرجال
مات الجدع فوق مدفعة جوه الغابات
جسد نضالة بمصرعه
ومن سكات
لا طبالين يفرقعوا
ولا اعلانات
ما رايكم دام عزكم
ياانتيكات
يا غرقانين فى المأكولات
والملبوسات
يا دافيانين
ومولعين الدفايات
يا محفلطين يا ملمعين
ياجيمسنات
يا بتوع نضال اخر زمن
فى العوامات
ما رايكم دام عزكم
جيفارا مات
لاطنطنة
ولا شنشنه
ولا اعلامات واستعلامات
**
عينى عليه ساعه القضا
من غير رفاقه تودعه
يطلع انينه للفضا
يزعق
ولا مين يسمعه
يمكن صرخ من الالم
من لسعه النار ف الحشا
يمكن ضحك
او ابتسم
او ارتعش
او انتشى
يمكن لفظ اخر نفس
كلمه وادع
لجل الجياع
يمكن وصيه
للى حاضنين القضيه
فى الصراع
صور كتير
ملو الخيال
والف مليون احتمال
لكن اكيد
اكيد اكيد
ولاجدال
جيفارا مات
موتة رجال
ياشغالين ومحرومين
يا مسلسلين رجلين وراس
خلاص خلاص
مالكوش خلاص
غير بالبنادق والرصاص
دا منطق العصر السعيد
عصر الزنوج والامريكان
الكلمه للنار والحديد
والعدل اخرس او جبان
صرخه جيفار يا عبيد
في اى موطن او مكان
مافيش بديل
مافيش مناص
يا تجهزوا جيش الخلاص
يا تقولوا على العالم خلاص


القاهرة 1968


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

كل ماتهل البشاير
من يناير كل عام
يدخل النور الزنازن
يطرد الخوف والضلام
يانسيم السجن ميّل
ع العتب وارمى السلام
زهَّر النوار وعشَّشْ
ف الزنازين الحمام
من سكون الجن صوتى
نبض قلبى من تابوتى
بيقولولك ياحياتى
كلمتى
من بطن حوتى
سلمى لى ع الحبايب
ياحبيبتى سلمى لى
كل حِب وله نصيبه
من سلامى
بلغى لى
احضنى العالم عشانى
بين عيونك
وابعتى لى
نظرة منها أشوف حبايبى
واشفى قلبى
واسأليلى
كل عالم فى بلدنا
كل برج وكل مدنى
كل صاحب من صحابنا
كل عيل من ولادنا
حد فيهم شاف علامة
من علامات القيامة
قبل ماتهل البشاير
يوم تمنتاشر يناير
لما قامت مصر قومة
بعد ماظنوها نومة
تلعن الجوع والمذلة
والمظالم والحكومة
سلمى لى ع الولاد السمر
خُضر العمر ف عموم الحوارى
سلمى لى ع البنات
المخطوبين فى المهد لسرير الحوارى
وأسأليلى بالعتاب
كل قارئ ف الكتاب
حد فيهم كان يصدق
بعد جهل وبعد موت
إن حس الشعب يسبق
أى فكر وأى صوت؟؟
هى دى مصر العظيمة
ياحبيبتى
هى مصر
اللى فضلتى ف هواها
عشنا على ألف قصر
هى دى ياحبيبتى مصر
هى دى ياحبيبتى مصر



سجن طره (يناير 1977)

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

الانتخابات



شوف عندك يا سلاملم
واتفرج يا سلام
ع المدعو دومه عيسوي
وزير الإمن عام
فى الفصل الانتخابي
من مرسح السلام
سارح بالبلطجية
والهجامه القدام
عشان ضمان عبوره
من دايرة لانتقام
واتفرج يا سلاملم
على عيسوي يا سلام

- العيسوي بيه
- العيسوي بيه
- صاحب البوكسات
- العيسوي بيه
- والحبسخناتات
-العيسوي بيه
- ملك اللومانات
- العيسوي بيه
- والمعتقلات
- العيسوي بيه

- بشرى لجميع الهباشه
العيسوي
رمز الطفاشه
سبحان الله
من أومباشه
حكم المأمور يا ماشالله عليه
- العيسوي بيه
- العيسوي بيه

بشرى لجميع الحشاشه
العيسوي بيه
رمز الماشه
سبحان الله من أومباشه
بقي كل الإمن العام فى إديه
- العيسوي بيه
- العيسوي بيه

من أجل ضمان الحرية
لجميع تجار الباطنية
العيسوي بيه ميه الميه
حيخلي القرش
بربع جنيه
- العيسوي بيه
-العيسوي بيه

-خليكوا فاكرين
- العيسوي بيه
-تنتخبوا مين
- العيسوي بيه
- فليحيا أمين
- العيسوي بيه
- ابن أم أمين
-العيسوي بيه
- العيسوي بيه
- العيسوي بيه

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ايران يا مصر ، زينا
كان عندهم ..
ما عندنا
الدم هو دمنا
والهم من لون همنا
تمسك ودأنك من قفاك
تمسك ودأنك من هنا
الخالق الناطق هناك
الناطق الخالق هنا
الارض حبلى بالربيع وبالغنى
والجو
مشحون بالقصايد والغنا
والشمس
فوق الكل تشبه شمسنا
والثروة
ملو الارض والناس والبنا
بس العصابه الامريكانى
مربعه
فوق الغلابه
والديابه مضبغه
والصحفجيه العرصجيه الاربعه
لابسين صاجات
وكل حاكم له غنا
تمسك ودأنك من قفاك
تمسك ودأنك من هنا
الخالق الناطق هناك
الناطق الخالق هناك
نفس البلاوي
ع الغلابه متلتله
من فقر شوف وهم خوف
نازل بلا
والقهر زاد
والسيف على رقاب العباد
والمخبرين زي الجراد
ملو الخلا
والفنانين المومسين
والفنانات
دول شغالين
تبع وزير الاعلانات
يحصل جواز
يحصل طلاق
يحصل ممات
دول مبسوطين
ومابجين طول السنه
تمسك ودانك من قفاك
تمسك ودانك من هنا
اللى حصل فيهم هناك
لازم حيحصل
عندنا



////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

الخواجة الامريكانى



الخواجه الامريكانى
والسماسرة اللى وراه
تخنوا بالكدب ودنه
وعرضوا له مقاس قفاه
فهموه
من غير ما يفهم
ان سوق الشرق مغنم
والخوجه بطبعه مغشم
والمصاري معفرتاه
حب يعمل فيها تاجر
وانطلق
يسلب وينهب
ف الزباين بالنهار
يحدف الدولار يلمه
تلتميت مليون دولار
بالقزايز والبنات
باللبان
والبمبونات
بالمدافع والدانات
او بأفلام الرعاة
قول بقي تاجر وفاجر
وانفلت لص المواشي
رعب ماشي فى البلاد
يشفط البترول ويطرش
كل الوان الفساد
عزرائيل من غير فرامل
يقلب العرسان ارامل
حتى فى بطون الحوامل
كان بيدبح الحياة
بالسناكي والخناجر
والنهايه يا خواجه
مش ف يوم كانت بدايه ؟
البدايه برضه لازم
ييجي يوم
توصل نهايه
مهما زاد الراسمال
الهلاك هو المآل
والتاريخ
هو اللى قال
لعبه الموت فى الحياة
تسحب الروح م الحناجر




القاهرة / 1967


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

سلام مربع



أول كلامنا وفتح الباب
سلام مربع
للطلاب
يا فرحه هلت وأحنا حزانى
يا ميت حلاوه عليك يا شباب
خمس سنين فاتت
على نار
كرامه " يوك "
وعيشه مرار
ولما حانت ساعه التار
راجعين يقولوا
ضباب وهباب
لكن يامصر خلاص ما بقاش
بكش
يعيش فيكي وبكاش
طول ما الشباب فاكر
ما نساش
والثوره بتدق الابواب


القاهره / 1972


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

سلام للأرض




سلام يا ارضنا
يا غيطان الفلاحين
يا ورشه الصنايعي
يا بحور الصيادين
يا مدرسه يا جامعه
سلام والدنيا سامعه
يا دشمه يا خنادق
يا مدفع يا بنادق
واقفين والعزم صادق
تردوا المعتدين
ع الحق والسلام
سلام سلام سلام
سلام يا إدين قويه
خشنين وعرقانين
يناموا المغربيه
ويقوموا مبدرين
ويخضروا الجناين
ويطيروا الحمام
ويعمروا المداين
ويضيعوا فى الزحام
سلام يحمي الحياه
وصناع الحياه
ويزيد الانتباه
فى الناس الطيبن
للحق والسلام
سلام سلام سلام
سلام يا ارضينا
يا جنات الزيتون
يا اغلى عندنا
من حبات العيون
سلام نحميه بروحنا
ونصونه فى القلوب
ونداوي بيه جروحنا
احنا
وكل الشعوب
سلام يطرح امانى
ويزوق الاغانى
ويروق الانانى
ويسقى العطشانين
للعدل والسلام
سلام سلام سلام


معتقل القناطر / 1970
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

وصية سليمان خاطر


مقطع من رسالة هربها الشهيد سليمان خاطر من زنزانته قبل أن تقدم مباحث أمن الدولة المصرية على تعذيبه حتى الموت *

أضمك وجرحي
بينزف قُبل
برغم اللي خانوا
ورغم اللي هانوا
ورغم اللي كانوا
" في غاية الخجل" *

أضمك وحتما يدور العجل
بكل الأراضي
اللي خُضرة وحبل
مادام لسى بغزل
حروف الغزل
وبنقش غرامي قصيدة
و كلامي بينقش أسامي
بحجم الدبل

ح اضُمّك
وبحلم بحضنك وبيت
أنا اللي بليلك و"طَميِك" ** حييت
وضيعت عمري
وما كنت أدري
ولو كنت أدري مكنتش بقيت
على أي صهيوني أول ما جيت

فصيلك نبينا في يوم الحساب ***
إذا ما التقيتي بهذا الكتاب
ولم تصدقي
ولم تعشقي
ولم تلحقي
حتى لو بالحجارة
ويركب قفاهم بشارع وحارة
ما بين الآثار
وجوى الديار
بأرض المطار
أو بمبنى السفارة

و آخر كتابي
أيا مهجتي
أمانة ما يمشي
ورا جثتي
سوى المتهومين بالوطن-
تهمتي
فداكي بدمايا اللي شاغلة الخواطر
بطول الزمان

___________________

* بعد ساعات من "الحادثة", صبيحة السادس عشر من تشرين أول 85, صرح حسني مبارك, أنه "في غاية الخجل" بسبب قيام أحد جنوده بفتح النار على مجموعة من الاسرائيليين اخترقوا الحدود المصرية مما أدى إلى مقتل سبعة منهم.

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

جيسكار ديستان

أحمد فؤاد نجم


فاليري جيسكار ديستان
والست بتاعه كمان
حيجيب الديب من ديله
ويشبع كل جعان
ياسلملم يا جدعان
ع الناس الجنتلمان
داحناحنتمنجه جداً
وحتبقى العيشه جنان
التلفزيون حيلون
والجمعيات تتكون
والعربيات حتمون
بدل البنزين برفان

وحتحصل نهضه عظيمه
وحتبقى علينا القيمة
فى المرسح أو فى السيما
أو فى جنينة الحيوان
وحتبقى الأشيا زلابيه
ولاحوجه لسوريا وليبيا
وحنعمل وحده أرابيا
مع لندن والفاتيكان

والفقرا حيكلوا بطاطا
وحيمشوا بكل ألاطه
وبدال ما يسموا شلاطه
حيسموا عيالهم جان
وده كل بفضل صديكي
ديستان الرومنتيكى
ولاحدش فيكو شريكى
فى المسكن والسكان

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

يا عرب



يا عرب
يا عرب
يا عرب في أي مصر
يا عرب
يا عرب
إسمعوا صوت شعب مصر
احفظوا لمصر المكان
وإحنا ع العهد إللي كان
مصر أوفي م الزمان
وانتوا عرفين شعب مصر
يا عرب
يا عرب
ياعرب يا أهل مصر

إللي خانوا العهد بينا
واستباحوا كل حاجه
واستهانوا بالعروبه
واستكانوا للخواجه
مستحيل حيكونوا منا
إحنا حاجه وهما حاجه
هما باعوا البندقيه
والوطن والجلابيه
وإحنا أصحاب القضيه
إحنا ما بنبعش مصر
يا عرب
ياعرب

يا عرب يا أهل مصر
يطلع الدجال بزيفه
يملا بحر النيل ضباب
ينزل الجلاد بسيفه
يزرع الموت والحزاب
يطول الليل زي كيفه
الصباح له ألف باب
وإحنا بوصلتنا ف ادينا
ما تخافوش م الليل علينا
مهما غبتوا عن عنينا
انتوا جوه في قلب مصر
يا عرب
يا عرب

يا عرب يا أهل مصر
سينا ولا
يافا ولا
حيفا ولا
دير يا سين
إسألوا الشمس إللي هاله
ع إللي صحيوا مبدرين
يزرعوها
نور وغله
دول جدودنا
ولا مين ؟
حقنا وحتما يعاد
بس لو بانت سعاد
والبيان ده
له معاد
والمعاد
حيكون ف مصر
المعاد
حيكون ف مصر


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

النداله



يا كارتر يا ندل
حبيبك وصاحبك
وصاحب مراتك
وتبقي انت صاحبه
وصاحب مراته
وكان والده ايضا
مصاحب حماتك
وكان برضه والدك
مصاحب حماته
وطول عمره نافد
على استخباراتك
وشغال جاسوسك
على استخباراته
وقاعد يزود
رصيد ملياراتك
وسارق
وشايل معاك ملياراته
وراجل مامنك
وخاين ضميره
وخايف
وحاطط ف ايدك مصيره
ودابح ف بحبك
الوف الضحايا
ودايس ف طين الدنس
والخطايا
يقوم لما يطبق عليه المحيط
تطنش يا كارتر
وتعمل عبيط
وتخلع
وتنسي الحمار والغبيط
وتاكل عيالك
بدون وجه عدل
صحيح
انت ندل




////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

يا فلسطينية



يا فلسطينية
والبندقاني رماكو
بالصهيونية
تقتل حمامكو في حداكو
يا فلسطينية وأنا بدي اسافر حداكو
ناري في أيديه
وإيديه تنزل معاكو
على راس الحيه
وتموت شريعة هولاكو



يا فلسطينية
والغربة طالت كفاية
والصحرا أّنت م اللاجئين والضحايا
وألارض حنّت للفلاحين والسقايه
والثورة غاية
والنصر أول خطاكو
يا فلسطينية
والثورة هي الاكيدة
بالبندقية نفرض حياتنا الجديدة
والسكه مهما طالت وبانت بعيدة
مدّ الخطاوي
هوه اللي يسعف معاكو



يا فلسطينية
فيتنام عليكو البشارة
بلنصرة طالعة
من تحت ميت ألف غارة
والشمعة والعه
والامريكان بالخسارة
راجعين حيارى
عقبال ما يحصل معاكو


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

التحالف


يعيش أهل بلدي
وبينهم ما فيش
تعارف
يخلي التحالف يعيش
تعيش كل طايفه
من التانيه خايفه
وتنزل ستاير بداير وشيش
لكن فى الموالد
يا شعبي يا خالد
بنتلم صحبه
ونهتف .. يعيش
يعيش أهل بلدي

يعيش المثقف على مقهى ريش
يعيش يعيش يعيش
محفلط مزفلط كتير كلام
عديم الممارسه
عدو الزحام
بكام كلمة فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش أهل بلدي

يعيش التنابله
فى حي الزمالك
وحى الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك إذا عزت توصف حياتهم
تقول الحياة عندنا
مش كذلك
وممكن تشوفهم فى وسط المدينه
اذا مر جنبك
أتومبيل سفينه
قفاهم عجينه
كروشهم سمينه
جلودهم بتضوي
دماغهم تخينه
سنانهم مبادر تفوت فى الجليد
ما فيش سخن بارد
بياكلوا الحديد
ما دام نهر وارد
وجاي م الصعيد
تزيد الموارد
كروشهم تزيد
وتسمع وتسلم
بأن التنابله
أو الأكالين
حيسمح كبيرهم
ويعمل مقابله
مع الفلاحين
ويحصل تحالف
ما بين الجميع
ونملا المصارف
بدم القطيع

أطيع الخليفه
أطيع والديك
أطيع التنابله
دا مفروض عليك
وتزرع وتبعت لحي الزمالك
وحي الزمالك
مسالك مسالك
تحاول تفكر تهوب هنالك
تودر حياتك بلاش المهالك
لذلك
إذا حد جاب لك سيرتهم
تبسمل تكبر
وتهتف كذلك
يعيش التنابله
يعيش يعيش يعيش
يعيش أهل بلدي

يعيش الغلابه
فى طي النجوع
نهارهم سحابه
وليلهم دموع
سواعد هزيله
لكن فيها حيله
تبدر تخضر جفاف الربوع
مكن شغل كايرو
ما يتعبش دايره
لا ياكل
ولا حتى يقدر يجوع
يا غلبان بلدنا
يا فلاح يا صانع
يا شحم السواقي
يا فحم المصانع
يا منتج
يا مبهج
يا آخر حلاوه
يا هادي
يا راضي
يا عاقل
يا قانع
ما تتعبش عقلك
فى شغل السياسه
وشوف انت شغلك
بهمه وحماسه
وعود عيالك فضيله الرضا
لأن إحنا طبعا
عبيد القضا
ورزقك ورزقي ورزق الكلاب
دا موضوع مؤجل ليوم الحساب
كمان الصحافه
حتكتب فى حالتك
وتنشر مناظر لخالك وخالتك
وتتطلع يا مسعد عليك الغناوي
وتسمع باسمك
فى قلب القهاوي
تحبك مشيره وبنات الجزيره
وقصه غرامك
تشيع فى الرداوي
يعيش عم مسعد
يعيش يعيش يعيش
يعيش أهل بلدي


القاهرة / 1967


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

يا حبايبنا



يا حبايبنا
فين .. وحشتونا
لسه فاكرينا
ولا نسيتونا
دا حنا فى الغربه
م الهوى دبنا
وأنتو فى الغربه
اوعوا تفكروا
إننا تبنا
مهما فرقونا
ولا بعدونا
يا حبايبنا


معتقل القناطر / 1971



////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

عم السيد



- عم السيد
- سيد ليه ؟
- كل ما يمشي يلقى جنيه
- يعمل ايه
- زي البرق يدوسه فى جيبه
- طب ما يجيبه وياخد بيه
- ياخد أيه
- ننقش له الورد ف منديله
- ودا بيشم
- نعصر له الورد ونسقي له
- شرب السم
- طب احسن حاجه نغنى له
- ترا لرا لم
- فرخه خالتى مباركه
- ما لها
- فيها الخير و البركه
- ليه
- تزمط كل ادان
- ايه
- بيضه ورا اللقان
- هيييه
- خالتى مباركه تاخدها
- هييه
- وتطير على الدكان
- ليه
- تقضي المونه والكمونه
- والينسونه و الدخان
- نعمه جزيله يا حاجه مباركه
- فرخه فيها الخير البركه


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ع المحطه
ع المحطه
واللى شفته ع المحطه
طلعت الخفه ام شنطه
سلم الاوتوبيس
بنطة
حته ملعب
والاكاده
فى القوام والحسن
بطه
هى خشت درجه اولي
والكراسي بقت منطه
سابوا تاتيه
وغلب تانيه
والقطيع على اولى خطي
اللى يعلا
واللى يوطي
بص واحد م اللى هما
دمهم فلفل وشطه
شاف صنايعي
فى البريمو
قال لة خش هنا يا اسطي
تانيه انسب للى زيك
دى الحقيقة بلاش مغالطه
لاسطى قال له ياعم روق
دى الحياة تحب المباسطه
وانت شايف
مش مغمض
حاجه ملبن
حاجه قشطة
ولايعنى الكون ح يخرب
لو فقير
يلهط له لهطه


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

بلح ابريم



يابلح ابريم يا سمارة
سواك الهوي ف العالي
هويت
على طمى النيل ياسمارة
وشربت عكار
لما استكفيت
بس احلويت قوي يا سمارة
لما اسمريت قوي ياسمارة
لفيت الشارع و الحارة
على زى نقاوتك فين
ما لقيت



يا حلاوة بنار
يا حلاوة بنار الشمس النور
يا سمارة وعمار الصحرا البور
شباك الهوى
داير ما يدور
اتاريك دبت وطبيت
بس اغلويت قوي ياسمارة
لما اتدليت قوى ياسمارة
ونزلت الشارع الحارة
سوقك
لا رخصت ولا اتذليت
يابلح ابريم
ياسمارة



حصنت بعقدك صدر الناس
من شر النخاس الخناس
يابو قلب لا سوسه
ولا سواس
ورقيتك يا اسمر
واسترايت
الضم حبابيك بقي ياسمارة
وافتح شبابيبك لقا يا سماره
على جو الشارع
والحاره
تحلو زيادة
وتملا البيت
يا بلح ابريم يا سماره



////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

الحمدلله


الحمد لله خبطنا
تحت بطاطنا
يا محلا رجعه ظباطنا
من خط النار
يا اهل مصر المحميه
بالحراميه
الفول كتير والطعميه
والبر عمار
والعيشه معدن واهي ماشيه
اخر اشيا
مادام جنابه والحاشيه
بكروش وكتار


(////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

حنتــــــوب




حنتـــــوب
لندوب ف غرامَك دوب
يابو خال ع الخد
وشال ع التوب
ياحــرام
ياحــلال
يابوتيه ودلال
دوَّبنا القلب
ولسه يادوب
حنتـــوب



القاهرة1967


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

محكمة



اسمع وشوف ما حصل
رضه السمع واجب
قاضي المظالم وصل
وإتأكد الحاجب
غمز بعينه لمره
وراح مكسكس ورا
القاضي قال محكمة
وهو قال
مجزره
مع إنه قبلها بدقيقه
عامل عون
نازل شتيمه وأذى
فى عساكر الكركون
مجعوص بيقرا الصحف
ويرد ع التليفون
ويمر فى وسطنا
كأنه نابليون
وفجأة فز اتنتر واقف على حيله
كرشه الجسيم انهطل
أنا قلت دا ديله
قول حبتين واتنصب
باسم العداله ميزان
مدموغ بكلمه شرف
مش كلمة السلطان
ممكن يشيل الهرم
وينخ من شعره
حسب الظروف والعلل
والرك ع الوزان
أول قضيه شطح
سمى الرعيه جاموس
تانى قضيه نطح
قال ع الضحيه
جاسوس
تالت قضيه وأنا فى الإصل
راجلها
سألني إيه شكوتك
أنا قلت أجلها
لما الميزان ينصلح
ويلاقي وزانه
من الصباح للمسا
صاحبك يعدلها

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

ميكي



بصراحه يا أستاذ ميكي
إنك رجعي وتشكيكي
قاعد لا مؤاخذه تهلفط
وكلامك رومانتيكي
ولا ناوي تبطل تكتب
بصراحه كلام بولوتيكي
عن دور الحل السلمي
وإستعماله التكتيكي
فى الوقت إللى إحنا صراحه
دايخين دوخه البلجيكي
وبلدنا لسه جريحه
وبتصرخ بالآفريكي
لو بات التار يا ولادي
ح يبات الذل شريكي
والشعب يقول يا بلادي
بالروح والدم أفديكي
وحاجات بصراحه بتحصل
فى بلدنا يا أونكل ميكي
بصراحه ولا أنت معايا
ولا طالل من شبابيكي
وكأنك مثلا موميا
للسلطان الانتيكي

أحياها لا ستعمالها
لاستعمار الامريكى
رجعت على هيئة
ميكي



القاهره / 1969


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

جائزة نوبل



شوف عندك يا سلاملم
واتفرج يا سلام
مواطن
شخص عادي
مالوش أي اهتمام
ومبارك الخيانه
ومسميها السلام
وف يوم قرا الجرايد
تاريخ ما اعرفش كام
من يومها يا ضنايا
بيشقلب فى الكلام
واتفرج يا سلاملم
على شقلب يا سلام

لما محانم جيبن يا دخ
زايجة لوبن
يعنى مناحم بيجن
ياخد جايزة نوبل
تبقى النوديا
يعنى الدنيا
ماشيه بتحدف بالمندار
يبقى الشهر اتناشر ساعه
يبقي اليوم
ليلتين ونهار
يبقى القاتل
شخص ضحية
والمقتول مجرم جبار
شفتوا إزاى ؟
أما صحيح الطب اتقدم
وحنا ما وصلتناش أخبار
أيوه يالجنة لوبن بيه
قاعدة ازاى بتلجنى إيه
أنا مش فاهم حاجه صراحه
لما القاتل يا خد جايزه
كده من دون تلبيخ وأباحه
يبقي
يا إما اللجنه دى بايظه
أو لا مؤاخذه
رئيسها حمار
يبقي يا لجنه يا عره يا كوسه
جتنا وجتكو ستين حوسه
يبقي ف هذا الزمن المايل
ياما حتجري علينا هوايل
تبقي اللكلمه بدل الكلمة
والكاتب يمسك منشار
يبقي الراعش
يعنى الشاعر
يسكن شقه ف بيت
فى قصيده
يكتب فول
ياكل أشعار





////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

الشيخ عاشور



سلام مربع يا بلد
للشيخ عاشور
قلب الاسد
سلام يا واد
على دا ودا
لو دسته منه
فى البلد
ما كانش كان
كل اللي كان
ولا كان دا حالك يا بلد
مدد يا شيخ عاشور
مدد
مدد يا شيخ عاشور مدد

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

السيما


شوف عندك يا سلاملم
واتفرج يا سلام
أفلام القرع كوسه
حتقدم فيلم خام
من مخرج الروايح
ومسبب الزكام
عن قصه واقعية
من تشخيص المدام
والفيلم لجل خاطرك
واخد مليون وسام
واتفرج يا سلاملم
ع السيما يا سلام

الناس ملهية وساكتة
والصاله بتشغى عيون
والفيلم مطلع ريحه
والناس مش لاقيه لمون

عيل فرحان بشبابه
ومغرق شعره صابون
مشكلته .. ما بيخلفشى
ومراته كمان بتخون
ودلال بتحب عطيه
وعطيه جدع مجنون
لازق ف زبيده التشه
أخت الأستاذ مأمون
اللي مراته ام قداره
أخت محمد سعدون
جوز تانت ماريكا الهبله
اللي مرافقه المأذون
واللي معلق نبويه
بنت الأستاذ مأمون


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

يا مرحرح



يا مرحرح خالص مالص
يا رقيق جدا وسمين
يا غصين إلبان يالا للي
يا خواتي
على الطعمين
يا حلولا
يا ورده يا فله
يا معشش فى البساتين
يا بو شعر مسبسب سايح
من صهد البريانتين
يا منور فى التشريفه
ومضلم فى التخمين
يا بو كرش مدور
كور
من لحم البني آدمين
يا صباح الخير يا لفندي
يا نهارك
رحرح خالص مالص
ولا سائل فى التانيين
مرعوب كده ليه يا حلاوه
ومفاصلك ليه سايبين
وتموت فى الدبلوماسيه
وتخاف م الفدائين
وتشوف الحل السلمي
فى الراديو وفى الجرانين
تتنهد من معاميعك
وتقول قادر يا معين
ما تصح النوم وتفوق
وتشوف بتكلم مين
الشعب بخير يا مرحرح
والناس كلك عارفين
مين إللى خان يا بهيه
ومين قتل ياسين
ومين بهدل بلدنا
ومين ومين ومين
ويا مصر يا أول صوره
فى عيون المولودين
ويا مصر يا آخر صورة
فى عيون الميتيين
يا بلدنا
يا بكره ولادنا
يام الدنيا والدين
يام الولدات المجدع
والبنتات الطعمين
يحرم إسمك علينا
ونعيش متغربين
لو سبنا الذل يدوسك
أو عشنا مغلوبين
ويا سينا
أكيد جايينك
ناخذ بتار ياسين


القاهره / 1967


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

البتاع



يا للي فتحت
البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل
غبي
مخبول
أمر بفتح البتاع
لأنه
كان مسطول !



وبعد فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف
سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له
مش معقول



وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب
لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

هما مين واحنا مين



هما مين واحنا مين
هما الامر والسلاطين
هما المال والحكم معاهم
واحنا الفقرا المحكومين
حزر فزر شغل مخك
شوف مين فينا بيحكم مين

احنا مين وهما مين
احنا الفعلا البنايين
احنا السنه واحنا الفرض
احنا الناس
بالطول والعرض
من عافيتنا تقوم الارض
وعرقنا يخضر بساتين
خزر فزر شغل مخك
شوف مين فينا
بيخدم مين

هما مين واحنا مين
هما الامرا والسلاطين
هما الفيللا والعربيه
والنساوين المتنقيه
حيوانات استهلاكيه
شغلتهم حشو المصارين
حزر فزر شغل مخك
شوف مين فينا بياكل مين

احنا مين وهما مين
احنا قرنفل على ياسمين
احنا الحرب حطبها ونارها
احنا الجيش اللى يحررها
واحنا الشهدا ف كل مدارها
منتصرين او منكسرين
حزر فزر شغل مخك
شوف مين فينا بيقتل مين

هما مين واحنا مين
هما الامرا والسلاطين
هما مناظر بالمزيكه
والزفه وشغل البولوتيكا
ودماغهم طبعا استيكه
بس البركه فى النياشين
حزر فزر شغل مخك
شوف مين فينا بيخدع مين

هما مين واحنا مين
هما الامرا والسلاطين
هما بيلبسوا اخر موضه
واحنا بنسكن سبعه ف اوضه
اللى يقول النصر نميس
ينفع تاكسي
يميشي رميس
واللى يقول الفورد يا بيه
اجعص من اجعصها جعيص
واللى يقول جونسون دا حمار
راجل
عقله عقل صغار
راجل تيس
من غير حيث
ينصب الف جنازة بطار
بس اهو راح
وحنرتاح
وحنتنحنج بقي ونقول
يحزب بيته
ويدلق زيته




////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

شقع بقع

أحمد فؤادنجم


أنا الاديب ولا تعرفنيش
تقرا لي لكن ماتشوفنيش
كلامي لاهو مدهون ورنيش
ولا المعاني عليها غبار
شقع بقع يادليل الفار
ياشعب مصر ياخم اللنوم
ماتفوق بقى وتشوفلك يوم
والثورة قامت في الخرطوم
وانت اللى نايم بالأسرار
شقع بقع ياديل الفار
ياشعب ثور داهيه تسمك
وشيل أصول أسباب همك
عصابة بتمص في دمك
والاسم قال ضباط احرار
شقع بقع ياديل الفار
خدوا اليهود غزه وسينا
وبكرة يبقوا وسطينا
والراديوهات بتغدينا
خطب ونتعشى أشعار
شقع بقع ياديل الفار
الشيخ امام قال كلمة حق
الست ثومة قالت لك لا
وأبو النجوم على ودنه انزق
في المعتقل والدنيا نهار
شقع بقع ياديل الفار


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////(Offe...0lataarfnich.rm (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

الحمام الإمرى




الحمام الإمرى صَبح ع البنانى
قابل الصبح المنور بالأغانى
والمعانى الحلوه رنت
ف الخميله النايمة غنت
والقلوب الصاحية حنت
للأمانى
كنت فين يافجر غايب
كنت فين
والسؤال ف عنية دايب دمعتين
والساعات ف عنية دايب دمعتين
ع السهارى ف الخميله
والأغانى كل ليله
ولسه تانى



القاهرة1966



////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)

أوأه المجنون أبو برقوقه
عيره وبرانى وملزوقه
نصاب ومنافق ودماغه
مليانه مناطق موبوءه
والنكته كمان انه حلنجى
وعامل لى فكاكه وحندوقه
مع ان الحجش أفهم منه
والعالم فهمه ومفلوقه
بسلامته بيسرح قال بينا
يعنى احنا مواشى يا زقزوقه
داحنا العريفه الحريفه
غيرش الايام المدعوقه
شفت الولدات الشلبيه
ليلة التحرير يا أسطى فاروقه
أهو دولا ولادنا وأكبدنا
وقلوبنا عليهم مشقوقه
يا سلام يا صلاة النبى احسن
إلى حيل العلم يا مرزوقه
حلوين وحياتك يا بلدنا
يا أم الخيرات المسروقه
احنا اللى رمينا البذرايه
وروينا الارض المعزوقه
وحنحصد بكره وحنغنى
وعيون الخاين مخزوقه
القاهرة 1973

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)