سوري شباب بس بموضوع النكتة السابقة فلاتعطوا أكتر من حجما كانت لمجرد التسالي وتحريك الجو انا كانت اغلب مشاركاتي كانت تسالي باعتبارنا موجودين بعالم افتراضي :D
بس حاليا رح صير ملتزم باعتبار الموضوع جدي:shock:

وييييييي انا ما عني شغلة بالدنيا غير بس احلم:ss:
قائمة طووووووووووووووووووويلة

طالما شرط المشاركة بالموضوع .. هو يكون العمر فوق الـ 25
لازم تتوقعوا الأجوبة

لأنو من بعد عالعمر تحديداً ...من بعد ما تنتهي فترة الدراسة .... و بدء الحياة العملية
بتبلش الرؤيا توضح ...و بتبلش الأحلام تتحطم
يللي بحقق شيء من هالأحلام .. لازم يفرح .. و يعتبر حالو محظوظ

انا مش عارف عايش من زمان بس العمر العددي 28 سنة والعمر الحقيقي اعتقد فوق 643 سنة

تحقيق الطموحات انا ما بعتبرو حظ بجوز الحظ يلعب دورو بس بتوقع هالامر مابيتجاوز عشرة بالمية وبرأيي الأهم هوي اول شي تكون هالطموحات تكون شوي واقعية يعني قريبة من امكانياتك والشي التاني انك تعمل بجد عليا ولاتكل ولاتمل خصوصا انا الجزء الاساسي من شغلي ودراستي بالغربة يعني لتاخد فرصة ابن البلد بدك تبذل جهد تلات اضعافو على الأقل

احم احم احم
صحيح انا بعمر الرياحين والورد
بس انو يعني
سجلولنا اسمنا
فوق ال25 :pos:
هههههههههههههههههه :lol:

هههههههههههههههههه :lol:
انت شو جابك لعنا..:larg:

أول موضوع للنقاش، الحلم/الحقيقة
بعد التحية وانطلاقا من تجربتي الشخصية التي كانت وراء قناعاتي، فالحياة هي التي تتولى مهمة تلقين الدروس وليس عمر الشخص، فمثلا عندما كنت في سن15,17 وتحديدا عند بداية الدراسة الثانوية كانت لي مجموعة من التطلعات ( ليست أحلام)والتي تتحكم فيها مجموعة من العوامل تختلف ظاهريا من شخص لآخر : البيئة التي نعيش فيها، المجتمع، حالة المدرسين، أمثلة من سبقونا بالإيمان:lol: بأحلامهم،الحالة العائلية والمادية..فمن خلال هذه المعطيات تجد نفسك بين خيارين الأول أن تدرس وتحصل على شهادة ومن تم تجتاز مبارة لتحصل على وظيفة تضمن لك العيش الآمن إلى آخر الشهر، أو تتحيل الفرصة لإطلاق العنان لنفسك بالسفر خارج بلدك وتهجره نحو بلد تراه مناسبا لتحويل تطلعاتك إلى أحلام ومن ثم إلى حقيقة
بالنسبة لي جاء الإختيار الثاني عن اقتناع وإيمان ورفض للواقع الأول

أما أحلام الطفولة فعندما كنت طفلا حلمت بأن أكون قبطانا يجوب أقطار العالم عبر سفينته كسلفر في جزيرة الكنز:lol:

وتحية :D

15سنة و120شهر واسبوعين وتلت ايام ونص:clap:هيك بنطلع شيخ بستوني

انو سجلونا معكن

15سنة و120شهر واسبوعين وتلت ايام ونص:clap:هيك بنطلع شيخ بستوني

بعدك جديد عالمصلحة

صار عنا خدمة شي خمس سنين

بس ترى بيحقلك تسجل معنا :D

يعني اللي قطع ال35 متل حالاتي صار ختيار ومهرهر كمان إذا اللي فوق ال25 كهل :cry:

طالما شرط المشاركة بالموضوع .. هو يكون العمر فوق الـ 25
لازم تتوقعوا الأجوبة

لأنو من بعد عالعمر تحديداً ...من بعد ما تنتهي فترة الدراسة .... و بدء الحياة العملية
بتبلش الرؤيا توضح ...و بتبلش الأحلام تتحطم
يللي بحقق شيء من هالأحلام .. لازم يفرح .. و يعتبر حالو محظوظ

محظوظ....نوعاً ما

في شغلات بتظن انو راحت عليك ....وبالحقيقة تأجلت لا أكتر ....

اخي الكبير ..حلمو يركب سيارة من صغرو ....وكل ماكان ينوي يشتري وحدة تطلعلو شغلة تطيرلو المصريات...
وبالاخير...
ماركبها لبين ماصار بال42 :lol:..

يعني اللي قطع ال35 متل حالاتي صار ختيار ومهرهر كمان إذا اللي فوق ال25 كهل :cry:
لا ....انتي صبية ...وست الصبايا كمان



بس هون بأخوية ال25سنة ومافوق ....كبير.....و الله كبير ...

:D الك....شيختنا

شو هالأفكار الحلوة ابو نجبو :D:D....
عنجد من زمان كان بدنا هيك زاوية حلوة للكباريّة

لأنه فقط يلي عمره فوق 25 بيعرف شو بيفكر غيره يلي عمره فوق 25

لما كنت بعمر 14 - 18 كانت الأشياء عندي مثالية بشكل كبير.. يعني كنت فكر بكل شي من منطلق مثالي ... أحلام طموح وحتى تغيير الواقع... طبعاً وبطبيعة الحال، كل ما كنت اكبر سنة كان يصير تعديلات وتنازلات ورضوخ للواقع في نواحي كتيرة... لسه الحلم جواتي، لكن يا عالِم إذا رح أقدر حققو أو رح يصير ذكريات تعبر عن حالي وشخصيتي... في شي كتير أثر في عدم تحقيق أحلامي غير الظروف الخارجة عن إرادتي... أهمها المجتمع اللي عايشة فيو... كسلي ... وطبيعتي اللي يٌقال عنها وجودية.. واتباع شعار (تمتع بيومك) يعني كنت ضحي بكتير قصص من ناحية العمل وتطوير حالي من أجل المتعة والاستمتاع بوقتي .. ومشان هيك كام شهر وبصير بالتلاتين ولسه ما حققت شي من أحلام الطفولة.. لكن، كل هاد ما بيمنع إنو في نوع من الرضا عن حالي ووضعي الحالي من ناحية العمل وما شابه...

وفي ختام قصة حياتي ... عسى ولعل!

بعمر 15 كنت احلم بكثير شغلات
و من ضمنها الدراسة اللي درست غيرها


هي اول خطوة على طريق التعايش او سياسة الحل البديل ... اللي اكتشفنا يوم بعد يوم ... و ما زلنا نكتشف .. هي جوهر الحياة اللي نعيشها !

حلو فرحتوني كنت مفكرة حالي جدة اخوية الكبرى:lol:كل واحد مننا لمّن بلّش يوعى عالدنيا حاول يرسم خريطة طريق لحياتو .....أحلامو و طموحو

كل الناس ...وخاصة لما منكون بسن ال15 - 16 سنة ...بتكون أحلام اليقظة عمتعيش فينا و معنا ....
وكبرنا....وكبرت معنا أحلامنا...وزادت همومنا....

انتو بعمركن هلاء ....

* شو كانت أحلامكن اللي كنتو راسمينها بقلوبكون و عقولكم
احلامي كانت ومازالت كتيرة مابقدر عدها من غير ما انسى نصها
* هل ياترى ...بعد هالعمر ....تحققت هالاحلام ....
بالنسبة للدراسة تقدر تقول رجعتني الحياة من نص الطريق وحققت نص حلم واجلت الباقي شوي بس مع ربا يعني الحلم القديم ماعاد مقنع بدي كمل الطريق للاخر انتو بس ادعولي
* اللي تحقق من هالاحلام ....شو كانت اسباب النجاح
يمكن اهم سبب عنادي وثقتي الزايدة هدول سبب النجاح وليهم دخل كبير فالتاجيل حتى ما سميه فشل
يمكن لاني ابتديت بقوة كبيرة استنفذت طاقتي قبل الوقت خصوصي اني كا كنت متوقعة ان العالم بهالدرجة من السوء
*ومن الاحلام اللي ماتحققت ...شو كان السبب...طيب اللي ماقدرت تحققها ...حذفتها من بالك ..ولا أجلتها... اجلتها وحاولت عوض الوقت الضايع باشياء صغيرة

وبالاخير .....

بعمرك هاد.....وبقدر الطموح اللي راسمو عن حياتك....هل انته راض عن حالك !!!
ماني راضية ابدا ابدا بتفهم حالي وظروفي بس ماني رضيانة



:D

كل واحد مننا لمّن بلّش يوعى عالدنيا حاول يرسم خريطة طريق لحياتو .....أحلامو و طموحو
كل الناس ...وخاصة لما منكون بسن ال15 - 16 سنة ...بتكون أحلام اليقظة عمتعيش فينا و معنا ....
وكبرنا....وكبرت معنا أحلامنا...وزادت همومنا....

انتو بعمركن هلاء ....

* شو كانت أحلامكن اللي كنتو راسمينها بقلوبكون و عقولكم
* هل ياترى ...بعد هالعمر ....تحققت هالاحلام ....
* اللي تحقق من هالاحلام ....شو كانت اسباب النجاح
*ومن الاحلام اللي ماتحققت ...شو كان السبب...طيب اللي ماقدرت تحققها ...حذفتها من بالك ..ولا أجلتها...

وبالاخير .....

بعمرك هاد.....وبقدر الطموح اللي راسمو عن حياتك....هل انته راض عن حالك !!!

هاتو لنشوف

:D

الاحلام عندي بدأت بوقت يسبق عمر ال15 لما كنت صغيرة وحلمت اكون رسامة.. بس على ما وصلت لمرحلة
15_18 وضحت معالم المستقبل وعرفت اني بالرسم ماممكن اقدم شي جديد فأنتقلت عالادب .. بس الحلم ظل هو ذاته اني أكون انسانة حرة بفكري ومستقلة بخياراتي ..أما الخيارات فصارت تعتمد على الظروف..
بعد ما وصلنا لفوق الــ25 فلساتها احلامي عايشة_بس تحت الارض _ وللأسف انها كلما تحاول تطلع تصدم بالاسفلت..

لا ....انتي صبية ...وست الصبايا كمان



بس هون بأخوية ال25سنة ومافوق ....كبير.....و الله كبير ...

:D الك....شيختنا

الله يجبر بخاطرك، رفعتلي معنوياتي. :D

هلأ بخصوص السؤال، الأحلام أنا بحسا بتتغير مع الوقت، أنا كنت أحلم أني فوت عكلية الفنون، بس الله يخلي الماما ما كانت تقبل والسما زرقا، لا وهددتني أنو تعملي واسطة لأسقط بالفحص!! وحتى وقت طلعلي هندسة عمارة باللاذقية كمان ما خلتني روح لأنو بتخاف عليي!! مع أنو كلا سنة وبقدر ارجع انقل عالشام، المهم هيدول أول حلمين انطبشو، ومن يومها بطلت الرسم، بس هلأ بقول لو أني فنانة مظبوط يمكن كنت كفيت بالرسم..
يمكن أكبر حلم بحس أنني حققتو هو الزواج واستمرار التفاهم مع زوجي بعد سنين من الزواج، رغم أني تركت فرص كتير مهمة بالشغل وقت تجوزت كانت بتحققلي أحلام كبيرة، بس المهم هو أنو الواحد يعرف أي حلم هو الأهم بالنسبة إلو، أحيان الأحلام بتكون متعاكسة مع بعضا وما فينا نحققا كلا، بس المهم أنو نعرف نختار وبس نختار ما عاد نراجع تفكيرنا.

كل واحد مننا لمّن بلّش يوعى عالدنيا حاول يرسم خريطة طريق لحياتو .....أحلامو و طموحو
كل الناس ...وخاصة لما منكون بسن ال15 - 16 سنة ...بتكون أحلام اليقظة عمتعيش فينا و معنا ....
وكبرنا....وكبرت معنا أحلامنا...وزادت همومنا....

انتو بعمركن هلاء ....

* شو كانت أحلامكن اللي كنتو راسمينها بقلوبكون و عقولكم


* هل ياترى ...بعد هالعمر ....تحققت هالاحلام ....
* اللي تحقق من هالاحلام ....شو كانت اسباب النجاح
*ومن الاحلام اللي ماتحققت ...شو كان السبب...طيب اللي ماقدرت تحققها ...حذفتها من بالك ..ولا أجلتها...

وبالاخير .....

بعمرك هاد.....وبقدر الطموح اللي راسمو عن حياتك....هل انته راض عن حالك !!!

هاتو لنشوف

:D


بسن ال 15 و 16 الاحلام بتكون مختلفة كتير عن هلق ، بتكون احلام كبيرة كتير وممكن تكون بعيدة عن الواقعية، بس لما بيتقدم الانسان بالعمر بتتغير طريقة تفكيره ومعها بتتغير او بتتعدل احلامه بما بتناسب مع واقعه اكتر ، اول حلم كان الي وتحطم هو اني كمل دراستي بالمجال اللي انا بحبه وكان حلمي ادرس بكلية الميكانيك بس اللي منعني هو علاماتي بالثانوية ، لذلك سجلت متلي متل ثلاث رباع العالم اللي ببلدنا بالفرع اللي طلع لي ، هلق بعد اربع سنوات دراسة تغيرت افكاري ووجهة نظري تجاه المستقبل واحلامي القديمة تغيرت بجزء كبير منها خصوصا الجزء اللي بيتعلق بمهنة المستقبل او اسلوب الحياة ،بعد التخرج ... دخلت اكتر من تجربة عمل ،ودخلت بتجربة ادارة لشركة تجارية صغيرة ، للاسف كانت تجربة فاشلة بشكل كبير و فيها اخطاء كبيرة ولكن طلعت منها بخبرة ذاتية عن معرفة لاطباع الناس المختلفة وطريقة تفكيرهن و مع اني خسرت ايام وجهد وحتى مبالغ كبيرة نتيجة عملية اختلاس حصلت معي الا اني تعلمت اشياء اكتر بكتير ، بعد هي التجربة غيرت نظرتي لواقعي وقررت ارجع للسلك الاكاديمي ورسمت لحالي حلم وهدف جديد وهلق انا على اعتاب تحقيق اول مرحلةمنه بنيل شهادة الماجستير ، طبعا كل مرحلة مريت فيها كانت اهدافي وطموحاتي عم تتبلور حسب المتغيرات اللي عم تفرضها علي ، لذلك بظن انه احلام الانسان تخضع لمتغيرات الزمان والمكان ( على الاقل هاد اللي صار ولسا عم يصير معي لهلق) .
انا راضي عن حالي او لا ؟!... حاليا انا مقتنع باللي وصلت اله ولكن مو راضي كل الرضى وبطمح لانه حقق شي افضل من اللي وصلتله لهلق ، بقية احلام الطفولة نسيتها ؟!... ما بظن بظن انه هي تأجلت لوقت مناسب اكتر ... مو اكتر من هيك:D

في مرحلة المراهقة يا جماعة تركونا من أحلام خلونا في واقع كنا عما نعيشو أنا ما بدي أقول مشروع دراسة و قبول أو عدم قبول لأني نسفت الدراسة من أساسها و تركتها من الأعدادي و لأسباب لا تعد و لا تحصى ألا أني تابعت المطالعة العشوائية دون أي موجه لي ألا رب العالمين المهم كانت لي هوايات ثلاثة السباحة و الغناء و السينما و خاصة الأفلام التاريخية و الأجتماعية و العلمية مثل الخيال العلمي و هكذا كنت أقضي أوقاتي مابين الهوايات الثلاثة و طبعاُ العمل و تعلم مهنة من أجل المستقبل و بعد أنهاء خدمة العلم لم أجد لنفسي في بلدنا الحبيب أي فرصة للتقدم ما عدا الفن و لكن الغناء يحتاج الى كثير من التنازلات التي لم أرضى على نفسي التنازل عنها مهما كانت النتيجة ولو حتى أن أصبح ملك الغناء

ذهبت الى الغربة و عملت بكد و تفاني و أخلاص و الحمد لله أنا بحال لم أكن أحلم به من قبل و الأن أنا أنظر الى المستقبل ليسى من خلال حلم أتمناه لنفسي و أنما لأبنائي الصغار و أنشاءالله يتحقق حلمي بأن يصبحو متعلمين يفيدو و يستفيدو

و مشكورين على الموضوع

في مرحلة المراهقة يا جماعة تركونا من أحلام خلونا في واقع كنا عما نعيشو أنا ما بدي أقول مشروع دراسة و قبول أو عدم قبول لأني نسفت الدراسة من أساسها و تركتها من الأعدادي و لأسباب لا تعد و لا تحصى ألا أني تابعت المطالعة العشوائية دون أي موجه لي ألا رب العالمين المهم كانت لي هوايات ثلاثة السباحة و الغناء و السينما و خاصة الأفلام التاريخية و الأجتماعية و العلمية مثل الخيال العلمي و هكذا كنت أقضي أوقاتي مابين الهوايات الثلاثة و طبعاُ العمل و تعلم مهنة من أجل المستقبل و بعد أنهاء خدمة العلم لم أجد لنفسي في بلدنا الحبيب أي فرصة للتقدم ما عدا الفن و لكن الغناء يحتاج الى كثير من التنازلات التي لم أرضى على نفسي التنازل عنها مهما كانت النتيجة ولو حتى أن أصبح ملك الغناء

ذهبت الى الغربة و عملت بكد و تفاني و أخلاص و الحمد لله أنا بحال لم أكن أحلم به من قبل و الأن أنا أنظر الى المستقبل ليسى من خلال حلم أتمناه لنفسي و أنما لأبنائي الصغار و أنشاءالله يتحقق حلمي بأن يصبحو متعلمين يفيدو و يستفيدو

و مشكورين على الموضوع

انت مثال رائع على أن ترك المدرسة ليس بــ طامة كُبرى قد تكون المدرسة مقبرة للأحلام وليست حضانة لها
بـ صراحة كنت أحاول معرفة ماذا يفكر ذاك الشبخ على أريكته وبأشد صراحة لم أعتقد بأي حال من الاحوال أنه كان يفكر بالغتاء
ليتك كُنت ..

ما حكتلي شو التنازلات يلي لازم الانسان يقدمها لـ يصير مغني

انت مثال رائع على أن ترك المدرسة ليس بــ طامة كُبرى قد تكون المدرسة مقبرة للأحلام وليست حضانة لها
بـ صراحة كنت أحاول معرفة ماذا يفكر ذاك الشبخ على أريكته وبأشد صراحة لم أعتقد بأي حال من الاحوال أنه كان يفكر بالغتاء
ليتك كُنت ..

ما حكتلي شو التنازلات يلي لازم الانسان يقدمها لـ يصير مغني

و من قال لك أنها لم تكن طامة كبرى

ألا أني لم أكن يوماً بعيداً عن المطالعة

و أرجو أن لا يساء فهمي فلي أسباب عديدة لا أستطيع ذكرها ههنا

أما ذال الشيخ أنه رجل أمي ينتظر الكاتب لكي يكتب له و قد أخذتها من صورة أسمها الكاتب و قد كانت الصورة في ملفي ألا أن صورة أبني الصغير حلت محلها

أما عن التنازلات فأستطيع أن أذكر منها مثلاُ لكي تكون عضو في نقابة الفنانين يجب أن تكون عضو متمرن لمدة لاتقل عن الأربع سنوات و هذه المدة يجب أن تغني بها في الأماكن المعروفة مثل الأندية الليلية بعتبار أن المسرح شبه معدوم و غنائي على المسرح لعدة مرات في السنة غير كافي المهم لم أكن مستعد لكي أغني في الملاهي و البارات و الحمد لله لم أكمل

ها أنا أقراء القرأن بصوتي المتواضع و أستخدم المقامات في تجويد القرأن ولا أبحث عن الشهرة و أؤذن في الجامع من وقت لأخر و أسأل الله القبول

أخي الكريم أنا لست فخور لأني تركت المدرسة ألا أن الظروف كانت أكثر من صعبة

من الاحلام يلي كنت راسمتها دراستي بالمجال المرغوب بس ماتحققت...ولحديت هلق بفكر انه ارجع قدم بكالوريا وكمل دراستي بالمجال يلي بدي ياه
وكنت حب ادخل بمجال التمثيل... بس ماكان في مشجعين
كنت بحب الموسيقا ..لسا هالفكرة موجودة وما ماتت

يلي بشوفه انه نحن بعمر 15-18 كنا نحس انه الدنيا مفتوحة قدامنا وكلما منكبر عم تتغير هالفكرة براسنا شوي شوي ... منحس انه بلشت تروح علينا...

انت مثال رائع على أن ترك المدرسة ليس بــ طامة كُبرى قد تكون المدرسة مقبرة للأحلام وليست حضانة لها
بـ صراحة كنت أحاول معرفة ماذا يفكر ذاك الشبخ على أريكته وبأشد صراحة لم أعتقد بأي حال من الاحوال أنه كان يفكر بالغتاء
ليتك كُنت ..

ما حكتلي شو التنازلات يلي لازم الانسان يقدمها لـ يصير مغني
أنا كتير بحترم اللشخص اللي ما قدر يكمل دراسة لأي سبب من الأسباب.. واللي بيحاول يعوض بتعلم مهنة تساعدو تساندو.. أحسن ما يقعد يناطح البكالوريا ويضيع على حالو الوقت ويوصل لعمر لا بيكون قادر على تعلم مهنة ولا بيكون قدر يواصل تعليمو..
للأسف ثقافة العمل مو موجودة عنا ومو محترمة كما يجب..
الك ارسلان :D
لحلبي:D

صح كان في احلام كنت راسميتها بعمر 15 و 16
بس مع الوقت اختلفت هالاحلام .. بالاحرى حلت مكانها "مخططات" اكتر واقعية
يعني ما بتوقع انو باي فترة سعيت بشكل فعلي لتحيقيق حلم معين بقدر ما انو مع كل مرحلة .. في خطوة قادمة بتسلسل منطقي
حتى تخصصي الاكاديمي ما كان اختياره عن رغبة مسبقة .. مع هيك راضيه عن هالخيار الى حد كبير

لهيك بعتبر انو حققت لحد ما الامور اللي كنت مخططة الها ولسة باقي طبعا كتير
بشكل عام اي راضية عن حالي لانو حاليا الحاجز بيني وبين باقي الطريق ..هو الوقت ومش تقصير من جهتي

28 سنة
بالنسبة في عندي موضوع وهو المسلسلات السورية يلي بتحكي عن الاحداث يلي دارت بين اجدادنا وبين الاحتلال سواء كان فرنسي او العثماني او حرب تشرين
هون كل ما بشوف هالمسلسلات بقكر ,, انو جيلنا هلأ رجاال مثلهم ؟
منئدر نعمل متلهون بحيث انو نضحي بحياتنا كرمال الشام وولادنا والاجيال الجاية ؟
انا الشي يلي ما عم افهموا انو الشعب السوري قاوم بشكل رهيب وحارب كل ايد حاولت تأذي الشام او شعبا ,, يا جماعة كانوا اجدادنا عم يحاربوا جيوش
بس الفكرة انو هلأ ليش ما عم نئدر نحارب مجموعة ضالة من حكومتنا عم تنزف بهالشعب
للاسف انا مشتهي شوف قرار لصالح الشعب شي مرة
مشتهي شي مرة اتهنى بجنسيتي كسوري ادام بائي الجنسيات العربية
لك انا ساكن عند البدو ,, لكن فعلا هنن بدو بس نحنا لسة ما بدينا
رغم انو في سلبيات بالنظام السعودي الا انو الشعب متهني والسلبيات ما هي الا سلبيات طفيفة مقارنة بنظام بلدي
نحنا الحمد لله بدال ما يكون في عنا منظمات توعية لشبابنا او قرارات تفيد مستقبل شبابنا
لا اعوذ بالله نحنا عنا فكرة شلون لازم يتدمر الشباب السوري
شلون لازم نخليه يهاجر وما نخليه يضل ببلدو
لك حسبي الله بحكومة بلدي والله ينتقم منهم وان شاء الله رح يكونوا خصومنا امام الله يوم الحشر

يتبع

كان و مازال حلمي تشكيل اسرة سعيدة

و لا ازال اسعى في سبيل تحقيق الحلم

من الاحلام يلي كنت راسمتها دراستي بالمجال المرغوب بس ماتحققت...ولحديت هلق بفكر انه ارجع قدم بكالوريا وكمل دراستي بالمجال يلي بدي ياه
وكنت حب ادخل بمجال التمثيل... بس ماكان في مشجعين
ياستّي ....المشكلة الرئيسية هي البكالوريا...يعني كتير بتخيل انو مثلاً جرثومة صغيرة أو فيروس ممكن يتحكم بمستقبل الواحد ....
كتير من الاحيان بفكر عيد الباكلوريا ....لحتى أدخل الفرع اللي كنت أحلم فيه .....بس ما أظن هاد الشي يحصل ...راحت علينا :p

يلي بشوفه انه نحن بعمر 15-18 كنا نحس انه الدنيا مفتوحة قدامنا وكلما منكبر عم تتغير هالفكرة براسنا شوي شوي ... منحس انه بلشت تروح علينا...
لمّا كنّا صغار كنّا ناخد الدنيا بحسن نيّة .....:lol:

بس لما كبرنا و بلّشت الخوزايق ....حتى الامور الجميلة صارت بتخوّف...

أئللك شغلة ...تركيها بيناتنا ....بالوقت الحالي لما بتمرّ علي لحظات سعادة أو سرور ...بخاف كتير ...من التجارب السابقة تعلمت ....ورا لحظة سعادة بتجي ساعات ألم و قهر .....فلذلك بخاف أفرح أحياناً....:lol:

صح كان في احلام كنت راسميتها بعمر 15 و 16
بس مع الوقت اختلفت هالاحلام .. بالاحرى حلت مكانها "مخططات" اكتر واقعية
يعني ما بتوقع انو باي فترة سعيت بشكل فعلي لتحيقيق حلم معين بقدر ما انو مع كل مرحلة .. في خطوة قادمة بتسلسل منطقي
حتى تخصصي الاكاديمي ما كان اختياره عن رغبة مسبقة .. مع هيك راضيه عن هالخيار الى حد كبير

ما أظن انك كنتي راضية بقدر ما أنك أقنعتي نفسك باختصاصك .....

لا تقنعيني ....اللي بحب العمارة بروح بيدخل كهربا أو ميكانيك ... اي وبيكون رضيان ....!!

لهيك بعتبر انو حققت لحد ما الامور اللي كنت مخططة الها ولسة باقي طبعا كتير
بشكل عام اي راضية عن حالي لانو حاليا الحاجز بيني وبين باقي الطريق ..هو الوقت ومش تقصير من جهتي
بصراحة ...وبدون نقّ وحسد :p....معناها مرتاحة ماديّاً ....لانو تخطيط الحياة لازمو استقرار مالي ...عثرة مالية بسيطة كفيلة بحرف مسار التخطيط .....أو الغائه بالمرة
:D

كان و مازال حلمي تشكيل اسرة سعيدة

و لا ازال اسعى في سبيل تحقيق الحلم
محسن .....حكيت شغلة بدها صفنة


كتير من السهل تشكيل أسرة ...

بس الحلم انو تكون هالاسرة سعيدة.....

:D

لما كنت بعمر 14 - 18 كانت الأشياء عندي مثالية بشكل كبير.. يعني كنت فكر بكل شي من منطلق مثالي ... أحلام طموح وحتى تغيير الواقع... طبعاً وبطبيعة الحال، كل ما كنت اكبر سنة كان يصير تعديلات وتنازلات ورضوخ للواقع في نواحي كتيرة... لسه الحلم جواتي، لكن يا عالِم إذا رح أقدر حققو أو رح يصير ذكريات تعبر عن حالي وشخصيتي... في شي كتير أثر في عدم تحقيق أحلامي غير الظروف الخارجة عن إرادتي... أهمها المجتمع اللي عايشة فيو... كسلي ... وطبيعتي اللي يٌقال عنها وجودية.. واتباع شعار (تمتع بيومك) يعني كنت ضحي بكتير قصص من ناحية العمل وتطوير حالي من أجل المتعة والاستمتاع بوقتي .. ومشان هيك كام شهر وبصير بالتلاتين ولسه ما حققت شي من أحلام الطفولة.. لكن، كل هاد ما بيمنع إنو في نوع من الرضا عن حالي ووضعي الحالي من ناحية العمل وما شابه...
وفي ختام قصة حياتي ... عسى ولعل!
مارح أحكي عن نيرفانا الواقعية الراكزة الاكابر .....مافي شي ممكن ينحكى بهالمجال :D

بحييكي جداً على جرأتك ....
لسّا ماحدا قال عن حالو كسلان ....:lol:
ياريت حلمك يبقى جواتك....متلي ....
:D
بعمر 15 كنت احلم بكثير شغلات
و من ضمنها الدراسة اللي درست غيرها
هي اول خطوة على طريق التعايش او سياسة الحل البديل ... اللي اكتشفنا يوم بعد يوم ... و ما زلنا نكتشف .. هي جوهر الحياة اللي نعيشها !
طيب كانت طموحاتك محصورة بمجال دراستك....!! مافي شي تاني كنت تحب توصلو و وصلتو ...


الاحلام عندي بدأت بوقت يسبق عمر ال15 لما كنت صغيرة وحلمت اكون رسامة.. بس على ما وصلت لمرحلة
15_18 وضحت معالم المستقبل وعرفت اني بالرسم ماممكن اقدم شي جديد فأنتقلت عالادب .. بس الحلم ظل هو ذاته اني أكون انسانة حرة بفكري ومستقلة بخياراتي ..أما الخيارات فصارت تعتمد على الظروف..
بعد ما وصلنا لفوق الــ25 فلساتها احلامي عايشة_بس تحت الارض _ وللأسف انها كلما تحاول تطلع تصدم بالاسفلت..
دايماً اسقيها ميّ ....:p....الا مايوم تنبت و تتحدى الاسفلت وتتغلب عليه ....
الرسم أو الادب أو أي فن من الفنون هو تعبير ....نوعاً ما....عن الجنوح نحو الاستقلالية و الحرية و رفض الواقع...

عالهامش....
انا بنظري ...فنان صادق ...ممكن يحرك الشعب ...اكتر من أكبر زعيم سياسي .....

:D

الله يجبر بخاطرك، رفعتلي معنوياتي. :D

هلأ بخصوص السؤال، الأحلام أنا بحسا بتتغير مع الوقت، أنا كنت أحلم أني فوت عكلية الفنون، بس الله يخلي الماما ما كانت تقبل والسما زرقا، لا وهددتني أنو تعملي واسطة لأسقط بالفحص!! وحتى وقت طلعلي هندسة عمارة باللاذقية كمان ما خلتني روح لأنو بتخاف عليي!! مع أنو كلا سنة وبقدر ارجع انقل عالشام، المهم هيدول أول حلمين انطبشو، ومن يومها بطلت الرسم، بس هلأ بقول لو أني فنانة مظبوط يمكن كنت كفيت بالرسم..
يمكن أكبر حلم بحس أنني حققتو هو الزواج واستمرار التفاهم مع زوجي بعد سنين من الزواج، رغم أني تركت فرص كتير مهمة بالشغل وقت تجوزت كانت بتحققلي أحلام كبيرة، بس المهم هو أنو الواحد يعرف أي حلم هو الأهم بالنسبة إلو، أحيان الأحلام بتكون متعاكسة مع بعضا وما فينا نحققا كلا، بس المهم أنو نعرف نختار وبس نختار ما عاد نراجع تفكيرنا.
نفس المشكلة اللي عانيت منها ....
تحكم الاهل بمصير ابنائون ...
انو يا أخي الولد بيحب الرياضة ....خليه يدخل معهد رياضي .....لا لا ...ويصير استاز رياضة ...؟؟؟
ليش خيو أن أبو فلان الفلاني ...ابني استاز رياضة ...!!
رح دخلو طب ..بتقول لك يا أبو فلان ..الدكاترة عبّو البلد ...وصارو يشتغلو مندوبي أدوية :frown:
بقللك لا لااااااااا......بيبقى اسمو دكتور ...وانا أسمي أبو الدكتور ...وامو بتصير أم الدكتور ....واختو شو بتصير ...!!
كمان أخت الدكتور :o
بتجي بعد 4 سنين بتشوف الولد عمبيراوح مكانو ...بالسنة الاولى ......
لك ليش هيك ....يا أبو فلان ...ابنك صار عمرو 23 سنة و لسّاتو بالسنة الاولى .....
بيقلك حسبي الله ونعم الوكيل ....يالله كلّو قدر و نصيب :?

، للاسف كانت تجربة فاشلة بشكل كبير و فيها اخطاء كبيرة ولكن طلعت منها بخبرة ذاتية عن معرفة لاطباع الناس المختلفة وطريقة تفكيرهن و مع اني خسرت ايام وجهد وحتى مبالغ كبيرة نتيجة عملية اختلاس حصلت معي الا اني تعلمت اشياء اكتر بكتير ،
أنا معك ....جداً
ممكن تكون فاشلة من الناحية التنظيمية أو المالية ....
انا أؤمن بشدة ....انو البني أدم مابيقدر يتعمل الا من تجاربو وتخبيصو .....
يازلمة ازا اجا واحد وقللك انو هيك هيك صار معي و عملت هيك وساويت هيك و تخوزقت " أو نجحت " هيك.....ممكن تتعاطف معو لحد كبير..بس مارح تقدر تعيش أحساسو .....

:D

كل واحد مننا لمّن بلّش يوعى عالدنيا حاول يرسم خريطة طريق لحياتو .....أحلامو و طموحو
كل الناس ...وخاصة لما منكون بسن ال15 - 16 سنة ...بتكون أحلام اليقظة عمتعيش فينا و معنا ....
وكبرنا....وكبرت معنا أحلامنا...وزادت همومنا....


حلو هالكلام ... :D


انتو بعمركن هلاء ....
* شو كانت أحلامكن اللي كنتو راسمينها بقلوبكون و عقولكم
* هل ياترى ...بعد هالعمر ....تحققت هالاحلام ....
* اللي تحقق من هالاحلام ....شو كانت اسباب النجاح
*ومن الاحلام اللي ماتحققت ...شو كان السبب...طيب اللي ماقدرت تحققها ...حذفتها من بالك ..ولا أجلتها...

أنا كنت حب أدرس أو أشتغل بمجال فني أو فكري .. يعني مثلاً تمثيل .. غناء .. صحافة و إعلام .. هيك شي :oops:
بحس انو عندي الموهبة و المؤهل .. بس أول عائق اصطدمت فيه كان معارضة الأهل بحجة انو هالمجالات كلها دراستها بالشام حصراً ، و كوني أخدت البكالوريا بعمر صغير (16 سنة و نص) فكانوا أهلي من باب الرافضين تماماً فكرة إني اطلع عيش لحالي بمدينة ما بعرف فيها حدا ... :jakoush:
هالحكي هاد صار بالحادي عشر .. من لما بلشت فكر شو بدي أدرس بعد البكالوريا .. و كون انو ما في اختصاص معين من الكليات الباقية الموجودة بحلب بيشدني و بيستهويني فاللي صار إني فقدت الحافز للدراسة .. و صرت أدرس فض عتب و لأنجح و بس ، و حتى بعد النجاح سجلت أدب فرنسي و أنا قرفانة ..! قال : "بيضل اسما جامعة و أحسن من المعاهد :pos:"
هلأ اليوم بزعل على هالشي .. بحس انو كنت لازم أقبض القصة جد أكتر و جيب علامات منيحة و صرّ على موقفي بخصوص الدراسة بالشام .. بقول لحالي مرات انو يمكن لو أهلي شافوا اجتهادي و تصميمي كانوا غيروا موقفن و شجعوني ... ما بعرف ..! :oops:




وبالاخير .....
بعمرك هاد.....وبقدر الطموح اللي راسمو عن حياتك....هل انته راض عن حالك !!!
هاتو لنشوف
:D



هلأ بالأخير درست أدب فرنسي متل العالم و الناس و كل سنة بسنتا و كنت من الأوائل بدفعتي كمان ... بس ما بحس حالي اليوم انو هاد مجالي (قصدي ع التدريس) و بحس كمان انو إذا بدي بالمستقبل أشتغل بسوريا لازم يكون الفرنسي عنصر بشغلي مو كل شي فيه .. يعني بمجال السياحة مثلاً أو الإعلام .. و ما بلاقي حالي أبداً عم درّس قرطة عجيان و على اقعود و كن و اسكوت :sick: ... خاصةً انو كان الي تجربة صغيرة بهالمجال من كم سنة و من بعدا رفعت العشرة و قلت التوبة :lol:
بس أنا بشوف انو الرضى عن الذات شغلة نسبية .. يعني أنا مثلاً ما فيني أجزم قطعاً برضايي عن حالي أو بعدمه .. خاصةً لما بتكون نتائج أعمالنا منظورة عالمدى البعيد .. يعني ممكن كون اليوم راضية عن اختيار اخترته أو تصرف عملته و بعد سنتين أكتشف حالي اني كنت غلطانة .. بتصير ما ؟!
بحس انو في أشيا عملتا كانت بمحلا و أشيا تانية لأ .. بس ما بندم ... مبلى بندم :oops: بس مو كتير ;)
:D

دايماً اسقيها ميّ ....:p....الا مايوم تنبت و تتحدى الاسفلت وتتغلب عليه ....

مطرتين مناح والزفت بيقبع وخود على احلام
وبيجوز تألف روايات كمان
نفس المشكلة اللي عانيت منها ....
تحكم الاهل بمصير ابنائون ...
انو يا أخي الولد بيحب الرياضة ....خليه يدخل معهد رياضي .....لا لا ...ويصير استاز رياضة ...؟؟؟

اي اغلب الناس بتحب الرياضة






أنا معك ....جداً
ممكن تكون فاشلة من الناحية التنظيمية أو المالية ....
انا أؤمن بشدة ....انو البني أدم مابيقدر يتعمل الا من تجاربو وتخبيصو .....
يازلمة ازا اجا واحد وقللك انو هيك هيك صار معي و عملت هيك وساويت هيك و تخوزقت " أو نجحت " هيك.....ممكن تتعاطف معو لحد كبير..بس مارح تقدر تعيش أحساسو .....
:shock:

ابو نجبو ما عرفنا شي عن احلامك

24 سنة ، يا تخلوني شارك معكون يا بشكيكون لاشراف اداري او صاحب الموقع :jakoush:
ابو نجبو وصوفي معكون مهلة 24 ساعة قبل التحرك الديبلوماسي .

لو بتجي للعمر بكون اكبر وحدة فيكون
بس شو بدي اعمل شلة زعران زغار عم يتقاوو ع العجايز اي الله يرحم ايامنا
وقت كان ابو كاظم بيرمي شباك بيتنا بالحجارة كل يوم يكسرلنا الازاز الله يكسرلو راسو بجهنم
ووقتا شغلنا وهمنا الوحيد كان المطبخ:pos:
وانا همي كان اتعلم شغل تريكو :cry:

ايه اسألله ع إيام زمان

بعلمي الأخوية كلا زنادقة .. صارت شيوخ . :shock:

بعلمي الأخوية كلا زنادقة .. صارت شيوخ . :shock:
شيوخ غير مشايخ ......بتفرق ;)

أئللك شغلة ...تركيها بيناتنا ....بالوقت الحالي لما بتمرّ علي لحظات سعادة أو سرور ...بخاف كتير ...من التجارب السابقة تعلمت ....ورا لحظة سعادة بتجي ساعات ألم و قهر .....فلذلك بخاف أفرح أحياناً....:lol:

عن جد أنا هي بتصير معي ..مرة صارت معي عشت فترة حلوة شي 4 شهور بس من بعدها اجاني شي 8شهور كلها تعاسة وألم وحزن...
يمكن اذا مافرحنا احسن؟؟

شيوخ غير مشايخ ......بتفرق ;)

لكن الـمُفرد واحد
شيخ
!

عن جد أنا هي بتصير معي ..مرة صارت معي عشت فترة حلوة شي 4 شهور بس من بعدها اجاني شي 8شهور كلها تعاسة وألم وحزن...
يمكن اذا مافرحنا احسن؟؟

كان عليك أن تُعيني أميناً لمخازن الفرح


يُوسُفُ أَيُّهَا الصِّدِّيقُ أَفْتِنَا فِي سَبْعِ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ وَسَبْعِ سُنبُلاتٍ خُضْرٍ وَأُخَرَ يَابِسَاتٍ لَّعَلِّي أَرْجِعُ إِلَى النَّاسِ لَعَلَّهُمْ يَعْلَمُونَ
قَالَ تَزْرَعُونَ سَبْعَ سِنِينَ دَأَبًا فَمَا حَصَدتُّمْ فَذَرُوهُ فِي سُنبُلِهِ إِلاَّ قَلِيلاً مِّمَّا تَأْكُلُونَ
ثُمَّ يَأْتِي مِن بَعْدِ ذَلِكَ سَبْعٌ شِدَادٌ يَأْكُلْنَ مَا قَدَّمْتُمْ لَهُنَّ إِلاَّ قَلِيلاً مِّمَّا تُحْصِنُونَ
ثُمَّ يَأْتِي مِن بَعْدِ ذَلِكَ عَامٌ فِيهِ يُغَاثُ النَّاسُ وَفِيهِ يَعْصِرُونَ

24 سنة ، يا تخلوني شارك معكون يا بشكيكون لاشراف اداري او صاحب الموقع :jakoush:
ابو نجبو وصوفي معكون مهلة 24 ساعة قبل التحرك الديبلوماسي .

انه حسب معلومتي حضرتكم 27 ..ليش عم تصغر حالك ..ولا خايف تكبر أها ;)

ابو نجبو ما عرفنا شي عن احلامك
ياسيدي أنا لمّن كنت مراهق ..كنت حبّ الفيزيا كتير ...وكان حلمي اصير عالم فيزيا أو فلكي ....عن جد عمبحاكيك

يمكن تتوقع انو هيك حلم و خلص ..لا ...عن جد أقعد ساعات طويلة أمام شاشة التلفزيون عمبتابع البرامج التعليمية "المملّة" تبعيت البكالوريا وانا كنت بالسادس بهداك الوئت ...
ولما صرت بال13 كنت مصمّدمصاري من الخرجية رحت اشتريت فيها منظار .....منشان أراقب النجوم و القمر يعني ...على أساس انن ببينو بناضور حقو 500 ورقة .....:pos:
المهم اجيت عالباكلوريا و بلّش ضغط الاهل ...شو بدّك بالفيزيا ..نهايتك استاز و شغلة علّة ......و و ..الخ
وطار حلم دراسة الفيزيا .....ومن وقتها بلشّت أحلامي تتضائل شوي شوي ....
وبصراحة من يومها بلّشت استسلم لظروفي ...شي ياخدني يمين ....شي ياخدني شمال....حتى صرت بالصين :frown:


وبسبب الضغوط الماديّة ....قررت ...او خططت ...انو يكون عندي بيتي المستقل بعمر ال30 ....لكن للاسف مو باين انو رح يتحقق هالشي ....:cry:

اما انو ازا كنت رضيان عن حالي ....فللاسف لا ...حاسس حالي متراجع وانو الدنيا عمتاخدني من شغلات كنت كتير بحبها ...المطالعة مثلاً.....
وللاسف انو الحاجة الاساسية اللي بحتاجها الكل....واللي مفتقدها.... هو تنظيم الوقت .....ومع فوضى الزمن اللي عايش فيه ...بتحسّ حالك انو عمتركض و تركض بس ما عمتنتج شي ...حركة بلا بركة يعني

بس بيبقى عندي أمل ...انو بعض من احلامي الضائعات اشوفها بولادي :oops:
:D

اما انو ازا كنت رضيان عن حالي ....فللاسف لا ...حاسس حالي متراجع وانو الدنيا عمتاخدني من شغلات كنت كتير بحبها ...المطالعة مثلاً.....
وللاسف انو الحاجة الاساسية اللي بحتاجها الكل....واللي مفتقدها.... هو تنظيم الوقت .....ومع فوضى الزمن اللي عايش فيه ...بتحسّ حالك انو عمتركض و تركض بس ما عمتنتج شي ...حركة بلا بركة يعني

بس بيبقى عندي أمل ...انو بعض من احلامي الضائعات اشوفها بولادي :oops:
:D
تعرف كنت محتارة شو بدي حط حلم حياتي مرة بقول طبيبة وبلاقيها موضابطة ومرة اديبة او مترجمة وكمان موضابطة لانو لازمني تكوين ادبي وداكرتي على قدي
لبين مادرست الفيزياء النووية خلص قررت ان هاد تخصصي بالجامعة اهلي قالولي متلك شو رح تعملي بهيك فرع غير اد اخدتي الدكتراه وسافرتي امريكا قلتلهم معلش بكمل الطريق للاخير لانو اساسا ماعجبني غير الفيزياء النووية
وسجلت بجدع مشترك تكنلوجيا علوم دقيقة واعلام الي لما عرفت انو ممكن اتخصص كيمياء صيدلانية حبيتها وشفت انها تجمع كل اللي كنت احلم بيه ففرد تخصص
بس للاسف اصطدمت بوقائع عالارض اجبرتني اكتفي مؤقتا بنص اول شهادة ولانو التفاؤل عندي مزمن لساتني ناوية كمل لصير باحثة بهالمجال :o احيانا بضحك من تفكيري لانو الطريق صعب وانا ماعدت بنفس القوة وابتديت صير عجوزة
بس انا هيك ومارح اتغيرشو بدي اعمل
طولت بالحكي وماقلت اللي بدي ياه الجملة اللي بالاحمر
لسا بتقدر تحقق ولو جزء من حلمك وان ماقدرت فنصيحتي ما تقيد اولادك بحلمك خليه يحلمو احلامهم الخاصة
واسفة عالاطالة:D

من بعد موضوع ابو نجبو الاحلام وتحقيقها ..وكونه خالصنا منه ..حابين نحكي شوي عن الطفوله وتاثيراتها ...وعواملها ..ومنتمنى انه يعجبكون


الطفل والخوف

الطفل تلك الشعله الانسانيه الممتلئه بحريه المشاعر والانطلاقه ..له عالمه الخاص بكل مايحويه هذا العالم من اسراراه وجماليته ...
جميعنا ..مررنا بتلك المرحله المزهره من هذا العمر ...ولنا من الذكريات ما زال ملازم معنا ومنها ما نسيناه ..
ولكن الطفل بذلك العمر لا ينسى ابدا الخوف الذي مر به ...او الاشياء التي تعلم ان يخاف منها ...
ان كانت بفقدان شي ما ..او خوفا من اشياء حياتيه بسيطه ولكنه تعلم ان يخاف منها من خلال الاشخاص الكبار الذين حولهم ..وخاصه من الام ..
كامثله :

اذا بتعذبني ..بدي اتركك وروح وماعاد تشوفني ..
اذا مابدك تاكل ..لح خلي ابو عدل يخطفك .....
اذا ما بتسمع الكلمه بدي احبسك بالعليه وبدون كهرباء ...
والقائمه تطول وتطول .....

يا ترى ..شو تاثير كل هل الامور ..ع شخصيتنا ..الان ..وشو تاثيرها ع الطفل وع طريقه نموه وتصرفاته ؟؟؟؟

وهل هي صحييحه او هي مجرد وسيله للحد من امكانيات الطفل وجعله هادىء لفتره ما ؟؟؟
وماهي الطريقه الصحيحه للتعامل ؟؟؟
:D

انه حسب معلومتي حضرتكم 27 ..ليش عم تصغر حالك ..ولا خايف تكبر أها ;)
:oops:
لا والله اصغر من 27 ، من باب الاقرب للسنة انا ممكن تغاضيا احسب حالي 26 (بس انا مو 26 ولا 27 )

انا عندي فكرة موضوع بتخص فئة كبيرة من الشيوخ والشيخات
في عالم تعتبرو مشكلة وفي عالم تعتبرو ظاهرة وفي عالم تعتبرو هاجس وعالم مابيفرق معها .
بدي سجل معكون دور هون .
سلامي للشيوخ والعجائز والختايرة .

طفولة البني آدم عامل أساسي بتكوين شخصيته ، لذلك كل المواقف اللي بمر فيها بتشكل بمجملها الاساس اللي بتبنى عليه طباع هالانسان هاد ...
اذا عم نحكي عن اسلوب التخويف اللي بيستعملوه الاهل في مراحل تربية اولادهن ...
اكيد الخوف هو واحد من من اهم المشكلات اللي بتواجه الانسان وهو صغير ، لانه دائما في كتير اشياء بخاف منها ... غرفة معينة بالبيت ... شي حشرة مرة مشيت على ايده ... ابوه لما بزمانه عمله كفين مرتبين وعلمت اصابيع ايده على وجهه يومين ، وكتير احيان بيستخدم الاهل هي الاشياء اللي بيخاف منها ابنهن لحتى يمنعوه من الوقوع بالمشاكل والاخطاء ، ولكن المشكلة لما بكون اسلوب التخويف اسلوب خاطئ او اسلوب مبالغ فيه ، يعني متل المثال اللي انذكر قبل شوي " بدي روح وما عاد ارجع " مثلا ، او انه " ما بقى بحبك ورح خلي مدري مين ياخدك " يعني هالنوع من التخويف بنظري ما بيعطي نتيجة ، لانه اذا عم نحكي عن اطفال بعمر صغير فهنن ما رح يفهموا شو هو هالجرم العظيم اللي رح يخلي امه ما ترجع لعنده مرة تانية مثلا ، هالنوع من التخويف مو صحيح ( برأيي ) ، ولكن بنفس الوقت التخويف ضروري ولكن بطريقة مختلفة ، وخاصة بعد ما نفهم هالطفل هاد شو هو الغلط اللي وقع فيه لانه بالنتيجة هو ببيفهم لدرجة معينة و ممكن يستوعب الفكرة اللي بدنا نوصله ياها ولكن بطريقته ، هلق الموضوع بيتشعب لكتير حالات احيانا بكون الطفل "سفيه " او شايف حاله مدلل زيادة ولازم كل رغباته تكون اوامر ، بهي الحالات لازم يكون في حزم بالتعامل من قبل الاهل وحتى انه يكون في نوع من التأديب حسب الحالة يعني ممكن انه ينحرم من شي نشاط معين هو بحبه كتير لحتى يعدل من سلوكه ، او يحرم من اكلة معينة او حتى احيانا هيك قتلة "عالخفيف" ما بتشكي من شي ، الاهم هو انه يكون في شخصية يخاف الطفل من عقابها ابوه مثلا او جده ... يعني شخص لما يعرف هالصغير هاد انه رح يوصله شو عمل يخليه يعدل من تصرفه لما هو افضل ويحاول انه يحسن من سلوكه ... طبعا هاد الشي بكون المرحلة الاخيرة لما ما بينفع الحكي والاقناع مع الطفل فبصير اللجوء لهاد الحل مطلب ... وبالنتيجة الاطفال ما بيعرفوا شو هو الصح من الغلط شو هو المناسب من غير المناسب يعني لازم يكون دور الأهل الاول هو التوعية والتدخل لما بتزيد الامور عن حدها .
هاد النوع من التخويف مطلوب ومستحب استعماله " بالنسبة الي " ، يمكن انا تربيت بطريقة قريبة نسبيا من الشي اللي حكيته فوق ، ولذلك بعتقد انه بتغيير بسيط على الطريقة اللي تربيت فيها وببعض التحديثات عليها ممكن اوصل لاسلوب منطقي بالتعامل مع ابنائي بالمستقبل .
لكن للاسف لما يستعمل التخويف بطريقة غير مدروسة بكون اله تأثيرات سلبية كبيرة بتتمثل باحد وجهين ، اما انه يصير عند الطفل مستقبلا نوع من العقدة تجاه الشخص اللي هو بخاف منه او الحالة اللي كانوا اهله يخوفوه منها ،وبحالة الخوف من الاشخاص " واحد من الابوين مثلا " بصير في فراغ كبير بينهم و فجوة كبيرة بالتعامل وحتى عملية تقبل الافكار من بعض وممكن تعمل مشكلات غير متوقعة ومحرجة باوقات كتير ، او الوجه التاني انه تصير عنده ردة فعل عكسية و لما يكبر ويعرف طبيعة الشي اللي كان يخاف منه يصير ما يحسبله حساب وحتى ما يعمل حساب للاشخاص اللي كانوا يرهبوه فيه ...
برأيي لما يستعمل التخويف بطريقة مدروسة وعقلانية بصير عند الطفل رادع معين تجاه تصرفاته وبصير عنده امكانية انه يقيم تصرفه "خوفا" من مواقف معينة ما بحب انه يتعامل معها .
بدي قول شغلة لو طلعت شوي برا نطاق الموضوع الاساسي ... بلاحظ في وقتنا هاد في كتير اهل بيعتبروا انه من اساليب التربية الحديثة انه يتركوا الولد على كيفه ، ويعطوه حريته بكل تصرفاته بكل مكان وبكل وقت ، من دون ما يعملوا اي شي لتوعيته او لردعه ، يعني ما اظن انه هاد اسلوب التربية المناسب انه نترك الولد على كيفه بكل شي يعني بالنهاية هو طفل ونحن الاهل ولا كيف ؟ وبالعكس لما يربى الطفل على انه دائما كلمته مسموعة وامره مطاع هاد بيعمل مشاكل كبيرة كتير بالمستقبل سواء بينه وبين اهله او وبينه وبين الناس المحيطة فيه ... مسؤولية الاهل تتجاوز مسألة تأمين رغبات اولادهم بالعكس في كتير من الاحيان تكون مسؤوليتهم في توجيه رغبات الاولاد نحو الطريق الصحيح ... مو المهم انه ابني يشعر اني متل رفيقه بقدر ما انه يشعر بوجود شخص يقومه ويعطيه النصح والمشورة وقت الحاجة وخاصة لما يكبر ... بس اذا توثقت هي الفكرة بذهن الطفل من سنين عمره الاولى فكيف بده يتقبل هالشي مستقبلا من ناس هو بيعتبر انهن موجودين لتلبية رغباته فقط ...
بالنهاية ( يمكن طلعت عن الفكرة باكتر من مكان ) ولكن ... بظن انه الخوف هو من اهم عوامل التربية الصحيحة ... انا ما عم قول انه نمسك هالولد ونبلش فيه خبط وقتل لحتى يفهم ... وعلى الاغلب ما رح يفهم بهي الطريقة ... ولكن تعليم الطفل كيفية التعبير عن رغبته ضمن الحدود اللي بيسمح فيها الاهل ومن بعدها تقويم او تسيير هالرغبة بما فيها مصلحة الطفل هي من اهم الوسائل ... والخوف بالنتيجة بحسب الطريقة اللي منستخدمه فيها بقدر النتائج اللي بيعطينا اياها .
:D

بعدو بعدو اللي بدو كام سنة أنا بعطيه من عندي، الشقي عمرو بقي ، ودخلكون ليش حدا منّا عم يتعلم مع مرور العمر إذا بدنا نحب الزمن هيك بتطلع أعمارنا ألعن من جبر هاد اللي قصتو مشهورة كتير وصار مضرب مثل واللي ما بيعرفها بحكيلو إياها و وهيك بتكون أعمارنا سلبية لأنو الزمن ببلادنا بيرجع لورا أنريير يعني

ما علينا
بتحبو احكيلكون عن الطفولة والخوف واللا ما أحكيلكون أحسنلكون وأحسن إلي كمان ، ترا إذا بدكون إحكيلكون
أنا مو مسؤول عن كلامي بنوب بنوب بنوب
ما علينا اليوم خلص نعست ورايح اندفس وقوم أنعس ونام وصير أحلم ربما ... شو بعرفكون ربما بشوف شي حلم أفلام كرتون
تصبحو لخير والصباح رباح

بالنهاية ( يمكن طلعت عن الفكرة باكتر من مكان ) ولكن ... بظن انه الخوف هو من اهم عوامل التربية الصحيحة ... انا ما عم قول انه نمسك هالولد ونبلش فيه خبط وقتل لحتى يفهم ... وعلى الاغلب ما رح يفهم بهي الطريقة ... ولكن تعليم الطفل كيفية التعبير عن رغبته ضمن الحدود اللي بيسمح فيها الاهل ومن بعدها تقويم او تسيير هالرغبة بما فيها مصلحة الطفل هي من اهم الوسائل ... والخوف بالنتيجة بحسب الطريقة اللي منستخدمه فيها بقدر النتائج اللي بيعطينا اياها .
:D



حكيت بطريقه كتير منطقيه ..وواقعيه ..بالنسبه لنقطه الخوف او حسب الحساب لأهل انا مع هل الشي بس حسب الدراسات في عد عوامل ممكن تساعد بدون طريقه التخويف المعهوده عنا ...

انا هون عم احكي عن الخوف الداخلي من الاشياء الي بيسمعها او بشوفها والي انت طرحتها بردك ..

بدك رأي ما في شي اسمه تربيه حديثه وتربيه قديمه ..في اختلاف بالمجتمعات ...مشان هيك لما حاولنا نقلد الغرب سموها حديثه ...
ع كل الاحوال لنرجع ع صلب الموضوع ..انا ضد فكره التخويف باي شكل من الاشكال ..بالاخير الطفل لازم يعامل بطريقه كتير خاصه ..

وع كل الاحوا لح اعطيك مثل ..انا اتربيت بمنطقح جبليه ..وعندي خوف كبير وبطريقه ما نها منطقيه من كل شي اسمه حشره ...لازم كون العكس ..بس لاسباب ما بتشوفي غير بهستر لمابشوفها ...خوف داخلي تاني من البقاء وحيده ..او انه الجميع يتركني ويمشي ...وهدا الشي اله اسبابه ..حتى بعد ما كبرت ..بضل مأثر فيه ...

فا الخوف له علاقه كبيره بناس حولينا اسمعونا ياها ..او هددونا فيها ..

ومنور :D