الوضع المعيشي في سورية .. [الأرشيـــــف]

THE_unforgiven

04/06/2009, 22:57

دخلت سورية في الفترة الأخيرة .. حالة من الإستقرار الإقتصادي .. انعكست على المجتمع بظواهر عدة لاتخفى عن أحد ..
فنسبة تقارب 90 % من سكان سورية يقيمون في منازل مزودة بمياه الشرب والمياه والهاتف .. ومعظم اساسيات المعيشة .. مع مواصلات مؤمنة ...
و2-4 % تعيش ضمن سكن ولكن قد لاتصله الكهرباء او الماء ..
أما النسبة المتبقية فهي من المتشردين (وأغلبهم من البدو ..)
وتتمتع شريحة كبيرة من المجتمع السوري بوسائل ترفيه قد لا تكون ضمن الحسبان .. فنسبة كبيرة تتمتع بالوسائل التالية (كمبيوتر - هاتف محمول - سيارة - الخ ... )
.
.
بالإضافة للإستقرار الداخلي .. والوضع الإجتماعي الجيد ..
.
.
ومع هذا كله .. لا يشعر المواطن بأنه يعيش حياة جيدة ... او حتى عادية ...
ويأخذ بالشكوى .. والنق ...
ويوجه كل أحلامه وطموحاته باتجاه الخليج ... ودوله ...
وكأن الخليج جنة عدن الثانية ...
فيخرج ... ويعود مصدوماً .. أو ربما .. لايعود ... يجد أنه ربما هناك بعض مظاهر الترف ..
ولكن ... ليحصل على ربع ماكان يحصل عليه في بلاده .. (ليس فقط سورية وإنما الوطن العربي بشكل عام) وذلك مقابل أكثر من 15 ساعة عمل ... بالإضافة للتعب النفسي والجسدي ..
لو أحصينا المقدار الذي يجنيه العامل السوري الذي يعمل 15 ساعة في النهار (مهما اختلفت طبيعة عمله .. ) فإنه يجني مقدارا يكفيه لمعيشة جيدة .. وتؤمن المتطلبات الغذائية والإجتماعية (من مسكن ولباس .. ) بالإضافة للراحة النفسية والجسدية ...
...
- هل حقاً نحن في وضع يرثى له ...
- ماتقييمك للوضع المعاشي في سورية بشكل عام ...
- ماتقييمك للوضع في مدينتك ..
- هل تجد في الخليج ملاذاً آمناً ...!؟
..
.
.
.
.
THE,unforgiven ... "

MadMax

04/06/2009, 23:13

دخلت سورية في الفترة الأخيرة .. حالة من الإستقرار الإقتصادي .. انعكست على المجتمع بظواهر عدة لاتخفى عن أحد ..
فنسبة تقارب 90 % من سكان سورية يقيمون في منازل مزودة بمياه الشرب
.
THE,unforgiven ... "
هلأ اذا في مياه شرب ..... يعني في استقرار اقتصادي ..؟؟ :?

أنو يعني ....تفضلو على نافوخنا اذا شربونا مي ..؟؟

ملاحظة : المي بتجي عنا هون .. يوم اي و يوم لا ..
مع اني عايش بأكتر منطقة غنية بالمياه بالشرق الاوسط كلو .. حتى أنو مياه ضيعتنا بتنباع بالخليج العربي

whiterose

04/06/2009, 23:29

هلىء الموضوع فايت ببعضو شوي ماكتير مترابطة الافكار بس الفكرة منو ككل واضحة

انا بلاقي الوضع بسوريا بتحسن ملحوظ بس مو تحسن رهيب او فظيع

والمي والاكل والسيارة والموبايل هدول مو وسائل ترفيه ولا شي من هاد
هدول صارو من ضروريات الحياة

اما بالنسبة للشغل بدل الخليج فبتخيل انو ممكن يكون جنة عدن لكتير ناس دارسين وتعبانين على حالون وماعم يلاقو حالون ببلدون وفي من هالشريحة من المجتمع كتيييييييييييييييييير
بدل ماياخد راتب مثلا 15 الف سوري بياخد اضعافون مضاعفة بجنة عدن

وفي شغلة انو الدنيا عم تتطور كتير وعصر السرعة عم يزيد سرعتو هالشي يلي بيدفع كتير ناس لتشتغل متل التوت لحتى توازي الحياة الطبيعية لاحتياجات البشر:cry:

yass

04/06/2009, 23:46

المتشردين (وأغلبهم من البدو ..)

يا معلم في فرق بين رُحل (و بقي منهم نسبة 1% فقط) و متشردين... و بعتقد بصراحة انو هالغلطة الكبيرة تتناسب مع باقي الموضوع ...

THE_unforgiven

04/06/2009, 23:49

انا بلاقي الوضع بسوريا بتحسن ملحوظ بس مو تحسن رهيب او فظي
لأ ... بحب صحح معلوماتك ... تحسن رهيب ... وفظيع .. ويمكن خطير ...
إنتي بتتذكري كيف كانت سورية بالتمانينات والتسعينات ...
تذكري كيف كان هم البني آدم يأمن ربطة خبز لولادو .. أو شي كيلو رز ..
كان يمكن بالمدينة كلا في شي عشرين تكسي ..

بدل ماياخد راتب مثلا 15 الف سوري بياخد اضعافون مضاعفة بجنة عدن
طيب .. يمكن معك حق ... فرضاً بياخد 80 ألف .. طيب .. فكرتي انتي قديش بيطلعلو صافي منن ...
بيرحلو شي 30 ألف سكن ... و10 بالقليلة أكل .. وإذا في ولاد وعيلة بيروحو 30 .. يعني بالكتيرة بيضل عشرة كل شهر ... بيجمعن عكذا شهر .. بيشتري تكت طيارة روحة رجعة .. و(تيتي تيتي متل مارحتي متل ماجيتي .. )

وفي شغلة انو الدنيا عم تتطور كتير وعصر السرعة عم يزيد سرعتو هالشي يلي بيدفع كتير ناس لتشتغل متل التوت لحتى توازي الحياة الطبيعية لاحتياجات البشر
طيب عراسي وعيني ... بس ليش الإنسان مابيتخلى شوي عن طبيعتو الأنانية .. وبيفكر شوي بغيرو ..
يعني إذا ماكان متأمن الآكل .. بيكون هدفنا الرئيسي رغيف الخبز ... وبس يتأمن الرغيف .. مندعسو بدولاب السيارة اللي منشتريا بالتقسيط عشي خمسين سنة .. بس مشان نواكب عصر السرعة ... ليش دايماً مافي حدود لطمعنا ... طيب هدو شوي .. نتفة نتفة .. بيصير عنا سيارة ...
تذكرو انو من أربعين سنة كان تلت ارباع السوريين .. بيشتغلو بالأرض وبالمدري شو ...
وشوفو هلأ وين صرنا ...
كمان عم تحكي ياعزيزتي ع عصر السرعة ...
بتعرفي كم في مليون بشري (ركزيلي ع بشري ..) بأفريقيا ... عندن عصر السرعة ... انو يقدر يدبر كاسة مي ورغيف خبز بأقل من نهار ...!!!!
بتعرفي انو في أكتر من 1000 بني آدم بيموتو من الجوع كل يوم وبياكل جلدن النسورة والضباع ..
حلو التطور .. بس انو شي منو ...
..
.
تحياتي الك ... :D

THE_unforgiven

04/06/2009, 23:57

يا معلم في فرق بين رُحل (و بقي منهم نسبة 1% فقط) و متشردين...هلأ في فرق أكيد ... بس الفكرة بشكل عام .. انو ع وضع السكن .. يعني ان كانو رحل أو متشردين .. مافي مصدر تغذية دائم بالكهربا او المي .. ف .. هي كانت فكرة التصنيف ..

و بعتقد بصراحة انو هالغلطة الكبيرة تتناسب مع باقي الموضوع ...
عم نحكي بفكرة عامة , وعشي واقعي وملموس بمجتمعنا ...

المي بتجي عنا هون .. يوم اي و يوم لا ..المهم عم تجي ...

whiterose

05/06/2009, 00:02

لأ ... بحب صحح معلوماتك ... تحسن رهيب ... وفظيع .. ويمكن خطير ...
إنتي بتتذكري كيف كانت سورية بالتمانينات والتسعينات ...
تذكري كيف كان هم البني آدم يأمن ربطة خبز لولادو .. أو شي كيلو رز ..

اذا عم تقارن سوريا 1980 بسوريا2009 فهيك معك حق يكون تغير جذري وشرشي كمان

بتعرفي كم في مليون بشري (ركزيلي ع بشري ..) بأفريقيا ... عندن عصر السرعة ... انو يقدر يدبر كاسة مي ورغيف خبز بأقل من نهار ...!!!!
بتعرفي انو في أكتر من 1000 بني آدم بيموتو من الجوع كل يوم وبياكل جلدن النسورة والضباع

مااختلفنا بس نحن عم نحكي عن سوريا مو افريقيا هيك فرقت متر ياخيي

yass

05/06/2009, 00:06

عم نحكي بفكرة عامة , وعشي واقعي وملموس بمجتمعنا ...

حكيك عن البدو غلط, هنن مش متشردين, هنن رحل بإرادتهون لأنو هاد سيستيم حياتهون, فما فيك تقول عنهون متشردين و مو شي تافه انو حدا يقلك غلطان و مكتّر...

متشردين أو بحكم المتشردين فيك تحسب كل اللي عايشين بمناطق المخالفات و عم يسرقو كهربا و مي, هدول لا عندون بيت و لا عندون شي, و ساعتها حساباتك بتكبر و بتتغيّر كتير

كمان شغلات..

أول شي, الحسابات بكل دول العالم تؤخذ على انو عدد ساعات العمل باليوم لا يمكن أن يزيد عن 8 ساعات باليوم, و تعتبر راتب جيد هو الراتب اللي بتاخدو مقابل 8 ساعات شغل و يكفيك لحياة متوسطة (و حياة متوسطة تشمل كل هدول اللي عاملهون بموضوعك و كأنو بيفرلي هيلز).

تاني شي, وقت بدك تقارن دول لازم تقارن بدول الجوار و بدول متشابهة من حيث الموارد و غيرو, و انت رحت أول شي ع دول الخليج اللي عم تسبح بالنفط, و رجعت بعدين قارنت سوريا بدول أفريقيا اللي عم يموتو من الجوع, و كلا الحالتين غلط المقارنة, لأنو سوريا فيها موارد ما موجودة بأفريقيا, و مافيها موارد موجودة بالخليج... فمقارناتك غلط

تالت شي, أنا ما بعرف وين عايش انت, بس حابب خبرك انو في مناطق من سوريا عم يتوزّع فيها معونات مشان الناس ما يجوعو, متل ريف الجزيرة (و هاد حكي مو من عندي, بحبش بوسائل الإعلام الرسمية و تلاقي هالشي).

رابع شي, لما عندك 4 سيارات نفس الموديل و نفس الطراز, و 3 منهون بيطلعو عالمية كيلومتر بالساعة بسهولة, و الرابعة يا دوب توصل عالستين كيلومتر بالساعة, المنطقي انك تشوف ليش هالسيارة ما عم تمشي متل مثيلاتا و وين العطل فيها, و مو نقعد مبسوطين انو ماشية أحسن من البسكليت, و انو مافيها تسابق فيراري حتى اذا تصلّحت....

و شكرا

yass

05/06/2009, 00:08

و ع فكرة, لما تفتح موضوع نقاش عيب تقول لحدا يرد عليك انو كلامو تافه, اذا حابب تناقش احترم غيرك, إلا اذا مانك فاتح تناقش, فساعتها اكتب هالشي بالموضوع مشان ما نضيّع وقتنا بالرد

جاد81

05/06/2009, 00:10

انا برأي الموضوع فيه اخطاء كتيرة ...بظن كمينا مطرحوا بالمنبر مثلا ً...منشان نفضفض بالحكي

متل ما بتشوف ادارة المنتدى

THE_unforgiven

05/06/2009, 00:17

حكيك عن البدو غلط, هنن مش متشردين, هنن رحل بإرادتهون لأنو هاد سيستيم حياتهون, فما فيك تقول عنهون متشردين و مو شي تافه انو حدا يقلك غلطان و مكتّر...
هلأ إذا بدك تاخدا من هالمعنى صح .. بس أنا قلتلك مشردين من وجهة نظر انو ماعندن مسكن ثابت .. يعني يمكن ينام اليوم .. يفيق تاني يوم .. مايلاقي بيتو .. هادا بيعتبر مشرد .. من شرد .. (إذا بدك ترجع عاللغة العربية الفصحة ..) شرد ..يعني .. ذهب مع ادراج الريح إلى حيث لايعلم .. هي نقطة ..
النقطة التانية ..
مو شي تافه انو حدا يقلك غلطان و مكتّر...
انا ماقلت انو شي تافه تقلي ع غلطي .. مافي حدا مابيغلط .. والغلط مش عيب .. بالعكس .. اللي مابيغلط مابيتعلم .. بس انو انتا ركزتلي عالبدو من أول الموضوع .. وتركت الموضوع الأساسي وماحكيت عنو .. ف بس هيك قصدي ...
بالنسبة لهي :
أول شي, الحسابات بكل دول العالم تؤخذ على انو عدد ساعات العمل باليوم لا يمكن أن يزيد عن 8 ساعات باليوم, و تعتبر راتب جيد هو الراتب اللي بتاخدو مقابل 8 ساعات شغل و يكفيك لحياة متوسطة (و حياة متوسطة تشمل كل هدول اللي عاملهون بموضوعك و كأنو بيفرلي هيلز).
انتا قلتا ... عدد ساعات العمل لايزيد عن 8 ساعات .. طيب .. ليش العامل السوري عم يترك بلدو كرمال يشتغل بحدود (13-15) ساعة بالنهار .. وبظروف عمل سيئة جداً .. (صحرا .. مسكن صغير - بعيد عن عيلتو .. )
يعني انتي برأيك .. فرضاً لو اشتغل بالخليج بس عشر ساعات .. هالحياة اللي عم يعيشا هنيك .. حياة بني آدم .. !؟ .. بيفيق عالشغل .. وبينام عالشغل .. !؟ بس جاوبني ع هالسؤال ..

تاني شي, وقت بدك تقارن دول لازم تقارن بدول الجوار و بدول متشابهة من حيث الموارد و غيرو
بدك تنتبه ع شغلة .. انا ماقارنت سوريا بأيا دولة تانية ..
انا قارنت وضع سوريا بالتمانينات .. وهلأ ..
بس تطرقت للأسباب اللي بتخلي السوري يسافر عالخليج .. وهالشي بيتطلب تفسير منطقي .. ونوعاً ما مقارنة .. مش هيك ؟!
وبالنسبة لأفريقيا .. كانت مجرد مثال... ع عصر السرعة بالنص التاني من الكون ... (هادا إذا اعتبرناها جزء من العالم الفعلي اليوم ... لأان اللي عايش هنيك متل العايش بجهنم .. ) .
وتحياتي ..

yass

05/06/2009, 00:28

هلأ إذا بدك تاخدا من هالمعنى صح .. بس أنا قلتلك مشردين من وجهة نظر انو ماعندن مسكن ثابت .. يعني يمكن ينام اليوم .. يفيق تاني يوم .. مايلاقي بيتو .. هادا بيعتبر مشرد .. من شرد .. (إذا بدك ترجع عاللغة العربية الفصحة ..) شرد ..يعني .. ذهب مع ادراج الريح إلى حيث لايعلم .. هي نقطة ..
النقطة التانية .. هلأ اتركلي اللغة العربية ع جنب.. في فرق كبير جداً بين اللي ينام بالشارع لأنو ما عندو حق آجار غرفة, و بين الشخص اللي عايش مترحّل لأنو هو هيك بدّو... و البدوي حياتو يكون متنقل (أو من تبقّى منهم مترحّل)

نا ماقلت انو شي تافه تقلي ع غلطي .. مافي حدا مابيغلط .. والغلط مش عيب .. بالعكس .. اللي مابيغلط مابيتعلم .. بس انو انتا ركزتلي عالبدو من أول الموضوع .. وتركت الموضوع الأساسي وماحكيت عنو .. ف بس هيك قصدي ... أي لأنو غلط كبير, و كبير جداً, و حاطو بموضوعك كأنو حقيقة علمية

انتا قلتا ... عدد ساعات العمل لايزيد عن 8 ساعات .. طيب .. ليش العامل السوري عم يترك بلدو كرمال يشتغل بحدود (13-15) ساعة بالنهار .. وبظروف عمل سيئة جداً .. (صحرا .. مسكن صغير - بعيد عن عيلتو .. )
يعني انتي برأيك .. فرضاً لو اشتغل بالخليج بس عشر ساعات .. هالحياة اللي عم يعيشا هنيك .. حياة بني آدم .. !؟ .. بيفيق عالشغل .. وبينام عالشغل .. !؟ بس جاوبني ع هالسؤال ..
هيه! ببساطة عم يهاجر لأنو بشغل 8 ساعات بسوريا المواطن المتوسط (و الطبقة الوسطى في كل دول العالم تحوي مجموعة المواطنين العاملين بالدول) ما فينو يعيش حياة مرتاحة, و للا العشر تالاف عم تكفّي؟

بدك تنتبه ع شغلة .. انا ماقارنت سوريا بأيا دولة تانية .. لأ مو صحيح هالحكي..

انت حكيت عن دول الخليج و رجعت بعدين بأحد الردود حكيت عن الجوع بأفريقيا, هاد اسمو مقارنة يا معلم, و تبريرك اللي تحت ما بينفع لأنو "عصر السرعة" لدول بمستوى سوريا الموردي مختلف عن عصر السرعة الأميركي و عصر السرعة الأفريقي, و هلم جرا

انا قارنت وضع سوريا بالتمانينات .. وهلأ .. أي كمان ما بتقدر تعمل هالمقارنة.... لأنو هون تدخل عوامل غير اقتصادية بالنص

عندك أول شي الفرق التاريخي, مستوى المعيشة يتحدد لزمن و مكان محددين, بالتمانينات ما كان في امكانيات تقنية و بنيوية مش بس بسوريا انما بكل دول العالم (أقصد امكانات بنوية مقارنة بالموجودة حالياً), يعني طبيعي ما كان الهاتف واصل للكل لأنو كانت تكنولوجيا الهاتف أكثر تخلفاً من هلأ, بعد عشرين سنة!

تاني شي, كان في بالتمانينات عوامل سياسية مثل الحصار الخانق و جيش بحالة حرب داخل لبنان كان مستنفذ موارد.. و الحصار بشكل أساسي كان خانق هالدنيي, يعني اللي كان يتشرشح ليجيب لتر زيت ما كان لأنو ما عندو حقو, انما كان لأنو ما كان في زيت بالبلد...

هلأ في زيت بالبلد... بس احسبلي قديه النسبة المئوية من راتب الموظف حق القنينة؟

و بالنسبة لسبب الهجرة, اللي عم يهاجر ليروح يشتغل خمسطعش ساعة ما عم يروح لحتى يتفنطز بمصاريهون هنيك, انما بيحاول بعدد من السنين يجمّع مبلغ مالي يقدر يشتري فيه بيت أو يبدأ مشروع عمل بسوريا... لأنو بمستوى الدخل السوري هالأمور صعبة جداً

I_Love_Syria

05/06/2009, 00:35

انتا قلتا ... عدد ساعات العمل لايزيد عن 8 ساعات .. طيب .. ليش العامل السوري عم يترك بلدو كرمال يشتغل بحدود (13-15) ساعة بالنهار .. وبظروف عمل سيئة جداً .. (صحرا .. مسكن صغير - بعيد عن عيلتو .. )
مين حاكيلك هالحكي عالشغل بالخليج, بالخليج بتشتغل 8 ساعات وبتاخد راتب أحسن من الراتب بسوريا ب 200 مرّة
يعني انتي برأيك .. فرضاً لو اشتغل بالخليج بس عشر ساعات .. هالحياة اللي عم يعيشا هنيك .. حياة بني آدم .. !؟ .. بيفيق عالشغل .. وبينام عالشغل .. !؟ بس جاوبني ع هالسؤال ..

يا أخي ليش شو فرئت الخليج عن سوريا ما هنيك بتفيق عالشغل وبترجع بتنام عالشغل وبسوريا بتفيق عالشغل وبتنام عالشغل وهلأ أنا بفيق عالشغل وبنام عالشغل مع إني لا بسوريا ولا بالخليج
وبرجع بقلّك وضع الشغل بالخليج أفضل من سوريا بمراحل, ولا تصدق انو في حدا بيتغرب عن أهلو وبلدو ليعيش نفس العيشة يلي كان عايشها ببلادو, لأنو ما بظن إني ضحّي بالعيشة بسوريا بين أهلي وصحابي وروح عيش بدولة غريب فيها مابعرف حدا كرمال نفس الراتب ونفس العيشة....

أنا برأيي تغوغلك شوي وتشوف متوسط دخل الفرد بسوريا لحتى تعرف معون حق الشباب يسافرو ولا لاء

THE_unforgiven

05/06/2009, 00:41

هلأ اتركلي اللغة العربية ع جنب..
حتى انتا عم تحكي هالكلمة ... وبيقولو ليش عم يغزينا الغرب ...
ع كل مانو موضوع مناقشتنا ... بس اللغة العربية .. مابتنحط نهائياً ع جنب ..
أي لأنو غلط كبير, و كبير جداً, و حاطو بموضوعك كأنو حقيقة علمية
خلص .. متل مابدك ...
هيه! ببساطة عم يهاجر لأنو بشغل 8 ساعات بسوريا المواطن المتوسط ما فينو يعيش حياة مرتاحة, و للا العشر تالاف عم تكفّي؟
أكيد مابتكفي إذا بدو يجيب سيارة .. وينزل كل يوم ع قهوة ومطعم شكل ..
بس إذا بيعيش ع قدو بتكفي وبرياحة .. بس مشكلة الشعب العربي .. هيي المظاهر ..
انت حكيت عن دول الخليج و رجعت بعدين بأحد الردود حكيت عن الجوع بأفريقيا, هاد اسمو مقارنة يا معلم
برأيي .. لازم تعيد قراءة الموضوع .. من أولتو ..
دخلت سورية في الفترة الأخيرة .. حالة من الإستقرار الإقتصادي .. انعكست على المجتمع بظواهر عدة لاتخفى عن أحد ..
فنسبة تقارب 90 % من سكان سورية يقيمون في منازل مزودة بمياه الشرب والمياه والهاتف .. ومعظم اساسيات المعيشة .. مع مواصلات مؤمنة ...
و2-4 % تعيش ضمن سكن ولكن قد لاتصله الكهرباء او الماء ..

أي كمان ما بتقدر تعمل هالمقارنة.... لأنو هون تدخل عوامل غير اقتصادية بالنص
مااختلفنا ... بس بشو بدك تقارن لكن ..
الشعب عم يقول انو مستوى المعيشة سيء ..
طيب ... كان أسوء من زمان ... وهلأ صار احسن .. بالنسبة لهديك الأيام .. ومازال في تحسن .. مافيك تقول انو الوضع عم يبقى متل ماهوي ..
وأكيد مارح نوصل لمرتبة الغرب بفترة قصيرة .. بس انو في أمل ..
بالتمانينات ما كان في امكانيات تقنية و بنيوية مش بس بسوريا انما بكل دول العا
بالتمانينات ... كان بدول الغرب كتير في تطور .. وكانت السيارات شغلة عادية .. وكان التلفزيون وهالقصص كلا شغلة عادية .. بينما كان الوضع بسورية مغاير تماماً .. وللا شو ؟

whiterose

05/06/2009, 00:42

هلأ في زيت بالبلد... بس احسبلي قديه النسبة المئوية من راتب الموظف حق القنينة؟

:D حبيت النقاش

THE_unforgiven

05/06/2009, 00:49

مين حاكيلك هالحكي عالشغل بالخليج, بالخليج بتشتغل 8 ساعات وبتاخد راتب أحسن من الراتب بسوريا ب 200 مرّة
انتا مين اللي حاكيلك هالحكي ... حبيب القلب هالشي صح .. بس مش هلأ .. ولا من قبل فترة .. هالشي من زمان كتير .. وقت كان الخليج بأول طلعتو .. وكان بدو يد عاملة .. هلأ صار العامل السوري عم ينافسو العامل الهندي والمصري والباكستاني ... حبيبنا الباكستاني بيرضى بيومية تكفيه اكل ونومة .. ومابدو أكتر من هيك .. لأأن ببلدو ماصايرلو هالشي .. وبيشتغل شو ماكان ومابتفرق معو ..
أما العامل السوري ... ف بيضل إلو كرامتو .. وإذا ماكان محترم .. مابيرضى يشتغل شو ماكان ..
بالنسبة للراتب .. قلتلي راتب الخليج أكبر من الراتب السوري ب200 مرة .. طيب إذا حسبنا شوي منلاقي انو متوسط دخل الفرد بسوريا بحدود ال 12 ألف .. ضربن ب 200 .. بيطلع ..2400000
اكيد قصدك عاللي بيدخلو بالخليج طول حياتو بيساوي 200 مرة الراتب السوري ..
ف برايي انتي اللي لازم تغوغل ..
وتشوف متوسط دخل الفرد بسوريا لحتى تعرف معون حق الشباب يسافرو ولا لاء
وخاصة بعد الأزمة الإقتصادية ..

لأنو بمستوى الدخل السوري هالأمور صعبة جداً
وهالمشاريع اللي بالبلد .. كلا من وين ..!؟

هدوء البحر

05/06/2009, 00:50

الوضع بشكل عام جيد بعض الشيئ

بس في تحسن ملحوظ

بس ما في امكانيات لنكون احسن من هيك

بشكرك على الموضوع :D

THE_unforgiven

05/06/2009, 00:53

لأنو ما بظن إني ضحّي بالعيشة بسوريا بين أهلي وصحابي وروح عيش بدولة غريب فيها مابعرف حدا كرمال نفس الراتب ونفس العيشة....
مو هادا حكينا ... العالم مخدوعة بكلمة خليج ... حبيبنا اللي ماراح وشاف مابيسدق ... الحكي سهل ..
بيجي مكتب بيقللك راتب 4000 دينار وسكن ومدري شو .. بتروح .. بيعطوك اول شهر شهرين .. وبعدا .. بتضل عال1000 ... هيك صار .. وعم يصير .. ماعم احكيك من عندي .. هادا واقع ... في إلى رفقة .. راحو .. ورجعو ..
عكل .. إذا حابب تجرب وتردلنا خبر ... نحنا ناطرينك ...

yass

05/06/2009, 00:53

حتى انتا عم تحكي هالكلمة ... وبيقولو ليش عم يغزينا الغرب ...
ع كل مانو موضوع مناقشتنا ... بس اللغة العربية .. مابتنحط نهائياً ع جنب ..خود بقا... عمي معنى متشرد واضح مابدو قواميس و معاجم...

شو صعبة الواحد يقر بخطأو

خلص .. متل مابدك ...
.....

أكيد مابتكفي إذا بدو يجيب سيارة .. وينزل كل يوم ع قهوة ومطعم شكل ..
بس إذا بيعيش ع قدو بتكفي وبرياحة .. بس مشكلة الشعب العربي .. هيي المظاهر ..قبل ما تفوت ع مشاكل الشعب العربي و حبو للمظاهر...

موظف رابتو عشر آلاف ليرة, و عندو مرة و ولدين بدو يطعميهون و يلبسهون و يدرسهون و يداويهون... و فوقها بدو يدفع آجار... ما راح قلك بالشام(لأنو بالشام بيطير الراتب آجار)... خود أي مدينة سورية و اعمللي حساباتها, و اقلعلي عيني و فرجيني كيف بدو يعيش

من العشرين مليون سوري قديه نسبة اللي يطلع و يفوت متل ما عم تحكي؟

برأيي .. لازم تعيد قراءة الموضوع .. من أولتو .. أنا بشوف انو انت اللي لازم ترجع تقرا موضوعك من أولو

مااختلفنا ... بس بشو بدك تقارن لكن ..
الشعب عم يقول انو مستوى المعيشة سيء ..
طيب ... كان أسوء من زمان ... وهلأ صار احسن .. بالنسبة لهديك الأيام .. ومازال في تحسن .. مافيك تقول انو الوضع عم يبقى متل ماهوي ..
وأكيد مارح نوصل لمرتبة الغرب بفترة قصيرة .. بس انو في أمل .. يا عمي طبيعي بدها تكون أحسن! شي طبيعي, هاد مسير التاريخ! الحياة تتطوّر, بس كون صار في عندك شغلات كتيرة لا يعني انو الوضع الاقتصادي جيد... لأنو بدك تشوف قديه النسبة المئوية من الناس عندا طريقة لتوصل لها الأشيا الموجودة...

الفرق هو سرعة أو تسارع التطور, و هون بنصحك ترجع تقرا مثال السيارات اللي حكيت عنو سابقاً

بالتمانينات ... كان بدول الغرب كتير في تطور .. وكانت السيارات شغلة عادية .. وكان التلفزيون وهالقصص كلا شغلة عادية .. بينما كان الوضع بسورية مغاير تماماً .. وللا شو ؟

يا عمي ما بتقدر تقارن مع الغرب... سوريا بالتمانينات كانت مشكلتا السياسية أكبر من مشكلتا الاقتصادية.. التلفزيون كان موجود بالتمانينات كيف ما كان, انو ما كان في كل هالماركات و كل هالتنويع هاد شي طبيعي جدا جدا.. كان الزمن غير! مافيك تقارن عصور بين بعضها!

و طالما بترجع تحكي عن السيارة و كأنها صارت دليل رفاهية مجتمع, خود شريحة الموظفين بالدولة (و هي الشريحة اللي لازم تندرس, مو الأغنياء) و شوف قديه النسبة المئوية منهون اشترى من راتبو (من راتبو, مو من اللطش) سيارة, و شو نوع السيارة اللي اشتراها, و روح قارن هالدراسة هاي بنفس الشروط بالأردن أو لبنان أو قبرص (هاي دول الجوار) و تعا خبرني شو لقيت...

أنا بستغرب لما بدك تجي سنجق عرض تبيّن للناس انهون علاكين, انو الوضع الاقتصادي منيح و انو اللي عم يهاجر عم يهاجر ليتفزلك... عمي مسؤولين الدولة حكيهون ليل نهار عن الوضع الاقتصادي السيء, و في ناس كبيرة بالدولة عم تحكي بالموضوع و تشير إلى الأسباب و منها طبعاً الفساد و سوء الإدارة, و لما بيطلع وزير العمل بيصرّح انو اذا تسرحو كتير عمال سوريين بالخارج راح تكون مصيبة لأنو هدول مورد اقتصادي للبلد لا يمكن الاستغناء عنو...

افتح أفق شوي... العدسة الضيقة بتخدع

THE_unforgiven

05/06/2009, 00:55

عكل ... شو ماكان الوضع بسوريا ... وبرا سوريا ... شو ماصار فينا ..
بتضلا سوريا ...وطننا ... بلدنا .. أرضنا .. وشعبنا ... والموتة عترابا ... بتسوى العيشة ع نفط الخليج .. وبس ..

yass

05/06/2009, 00:57

بتضلا سوريا ...وطننا ... بلدنا .. أرضنا .. وشعبنا ... والموتة عترابا ... بتسوى العيشة ع نفط الخليج .. وبس ..

هاد حكي عاطفي, و حقك تحكي هيك...

بس الاقتصاد و المال ما بيفهم بالعواطف.. ما حدا يتشنطط و يروح يشتغل برا و يترك أهلو للفراغ, مافيك تتجاهل هالشي أبدا

هدوء البحر

05/06/2009, 01:02

عكل ... شو ماكان الوضع بسوريا ... وبرا سوريا ... شو ماصار فينا ..
بتضلا سوريا ...وطننا ... بلدنا .. أرضنا .. وشعبنا ... والموتة عترابا ... بتسوى العيشة ع نفط الخليج .. وبس ..

والله معك حئ

لعمى تعى شوف الخليج ما بتنطاء لا جو ولا حياة ما في احلى من بلدي

mhsen77

05/06/2009, 01:02

لو أحصينا المقدار الذي يجنيه العامل السوري الذي يعمل 15 ساعة في النهار (مهما اختلفت طبيعة عمله .. ) فإنه يجني مقدارا يكفيه لمعيشة جيدة .. وتؤمن المتطلبات الغذائية والإجتماعية (من مسكن ولباس .. ) بالإضافة للراحة النفسية والجسدية ...
رح احسبلك ياها بالورقة و القلم
انا موظف و راتبي بحدود 17 الف \ محسوب عالوظائف المدعومة ماديا في وزارة الكهربا ولا باخد رشوة من حدا و لا بطلع براني مو لشي بس لانو مافي تعامل مع المواطنين و لا مراجعين \
اجرة سكن 5 الاف
اجرة نقل 1000 ليرة
محسوبك حشاش دخان \حمرا طويلة بدي باكيتين \ ب70 ليرة باليوم يعني بالشهر 2100 ليرة
مصروف خليوي و كمبيوتر \بطاقات نت \ 1000 ليرة
مصروف كهربا و مي و هاتف مو اقل من 2000 ليرة
هي صارو 11 الف لسا ما اكلت ولا شربت

طيب العيلة الصغيرة من اربع افراد بيكفوها 6000 ليرة بالشهر اكل و شرب؟
الطفل الصغير بشوشتو بتكلف 10 ليرات و اذا عملها ع حالو 5 مرات باليوم بيكلف 50 ليرة يعني بالشهر 1500 ليرة

وين عايش انت :?
بعدين دخلك في بشري بيشتغل 15 ساعة و بيكون مرتاح جسديا؟؟؟؟
و كيف ممكن يكون مرتاح نفسيا اذا عيلتو واهل بيتو \ ما رح جيب سيرة اصحابو \ مو قادر يشوفون؟

ayhamm26

05/06/2009, 01:03

انتا مين اللي حاكيلك هالحكي ... حبيب القلب هالشي صح .. بس مش هلأ .. ولا من قبل فترة .. هالشي من زمان كتير .. وقت كان الخليج بأول طلعتو .. وكان بدو يد عاملة .. هلأ صار العامل السوري عم ينافسو العامل الهندي والمصري والباكستاني ... حبيبنا الباكستاني بيرضى بيومية تكفيه اكل ونومة .. ومابدو أكتر من هيك .. لأأن ببلدو ماصايرلو هالشي .. وبيشتغل شو ماكان ومابتفرق معو ..
أما العامل السوري ... ف بيضل إلو كرامتو .. وإذا ماكان محترم .. مابيرضى يشتغل شو ماكان ..
بالنسبة للراتب .. قلتلي راتب الخليج أكبر من الراتب السوري ب200 مرة .. طيب إذا حسبنا شوي منلاقي انو متوسط دخل الفرد بسوريا بحدود ال 12 ألف .. ضربن ب 200 .. بيطلع ..2400000
اكيد قصدك عاللي بيدخلو بالخليج طول حياتو بيساوي 200 مرة الراتب السوري ..
ف برايي انتي اللي لازم تغوغل ..

..!؟

اول شغلة يا معلم مين قلك انو السوري اللي بالخليج بيتقارن بالباكستاني او الهندي , السوريين اللي بالخليج بنسبة كبيرة منن بيشتغلوا اما بالتجارة والاعمال الحرة او بمهن محترمة تعتمد على شهاداتن الجامعية , صح رواتبن مو متل اول بس اضعاف راتبن بسوريا و على الاقل اللي بيشتغل هنيك في عندو امل كبير بالاخير يقدر يجمع شوية مصاري لما يرجع على بلدو, واكيد هالامل اكبر بكتييير من ال 12 الف ليرة اللي ما بتكفي اكل وشرب

هي شغلة لقيتها عن متوسط دخل الفرد في سوريا

تبرز أهمية التقرير الوطني الأول لحالة السكان في سورية ليس من كونه التقرير الأول من نوعه فحسب بل من كونه يعبّر عن منعطف نوعي في تطوير الوعي بالعلاقة الأساسية بين السكان والتنمية"، سيرا أستور-رئيسة الهيئة السورية لشؤون الأسرة!
"يعتبر التقرير الثاني من نوعه على المستوى العربي بعد مصر، سورية أدركت من زمن طويل الدور الرئيس لقضايا السكان في التنمية"، لينا موسى- صندوق الأمم المتحدة للسكان

والتقرير بيقول باحد فقراتو

إذا ماتناولنا مسألة السكان بمنظور العلاقة بين السكان والموادر الاقتصادية المتاحة فان سورية تصنّف عندئذ ضمن مجموعة الدول كثيفة السكان، فقد تنامت العجوزات المالية في الدولة حيث يتجاوز حجم الدين العام 750 مليار ليرة سورية والعجز بالموازنة وصل عام 2009 إلى 226 مليار ليرة سورية وارتفعت معدلات البطالة وانخفضت المقدرات على التشغيل، وتزايد الهجرة الداخلية، وارتفاع عدد الفقراء في سورية حيث وصلت نسبة من يعملون براتب 9000 ليرة سورية وأقل يشكلون حوالي 62% من مجموع العاملين في القطاعات الاقتصادية، وأن 76.5% من الذين راتبهم دون ال5000 ليرة سورية يعملون في القطاع الخاص.

يعني 9000 ليرة متوسط الدخل بالشهر للغالبية من الشعب, بيقدر حدا من اللي شايف الوضع جيد يشرحلي كيف انسان , على فرض عندو بيت ملك وما عم يدفع تلت ارباع راتبو اجار, بيقدر يعيش ب 9000 بالشهر؟؟؟

I_Love_Syria

05/06/2009, 01:07

انتا مين اللي حاكيلك هالحكي ... حبيب القلب هالشي صح .. بس مش هلأ .. ولا من قبل فترة .. هالشي من زمان كتير .. وقت كان الخليج بأول طلعتو .. وكان بدو يد عاملة .. هلأ صار العامل السوري عم ينافسو العامل الهندي والمصري والباكستاني ... حبيبنا الباكستاني بيرضى بيومية تكفيه اكل ونومة .. ومابدو أكتر من هيك .. لأأن ببلدو ماصايرلو هالشي .. وبيشتغل شو ماكان ومابتفرق معو ..
أما العامل السوري ... ف بيضل إلو كرامتو .. وإذا ماكان محترم .. مابيرضى يشتغل شو ماكان ..

موضوع الباكستاني والهندي موجود بكل دول العالم لأنو ما شا الله واسعين الإنتشار هالجنسيتين وصحيح بيرضو يشتغلوا بأي راتب بس هاد ما بيعني إنو ما ضل فرص للسوري ولغيرو وغيراتو متل مافي شركات بتدور عالهندي والباكستاني في شركات بتبعد عنهون سفر سنة ولأسباب كتيرة......

بالنسبة للراتب .. قلتلي راتب الخليج أكبر من الراتب السوري ب200 مرة .. طيب إذا حسبنا شوي منلاقي انو متوسط دخل الفرد بسوريا بحدود ال 12 ألف .. ضربن ب 200 .. بيطلع ..2400000
اكيد قصدك عاللي بيدخلو بالخليج طول حياتو بيساوي 200 مرة الراتب السوري ..
ف برايي انتي اللي لازم تغوغل ..

هلأ بالله عم تحكي جد ولا عم تمزح بهالحسابات يلي عم تساويها أكيد عم تمزح لما قلك الراتب بالخليج أحسن من الراتب بسوريا ب 200 مرّة فأنا ماعم قول إنو الراتب بالخليج بيساوي الراتب بسوريا مضروب ب 200ً لكن لو قارنت بين الراتب يلي بتاخدو بالخليج مع مصروفك والراتب يلي بتاخدو بسوريا مع مصروفك بتشوف إنو الفرق كبير

وهالمشاريع اللي بالبلد .. كلا من وين ..!؟
على عيني وراسي المشاريع بس إذا مافي رواتب شو الفايدة

مو هادا حكينا ... العالم مخدوعة بكلمة خليج ... حبيبنا اللي ماراح وشاف مابيسدق ... الحكي سهل ..
بيجي مكتب بيقللك راتب 4000 دينار وسكن ومدري شو .. بتروح .. بيعطوك اول شهر شهرين .. وبعدا .. بتضل عال1000 ... هيك صار .. وعم يصير .. ماعم احكيك من عندي .. هادا واقع ... في إلى رفقة .. راحو .. ورجعو ..

طيب واحد من رفقاتي صرلو ست سنين بدبي ولو ماصارت معو ظروف عائلية قاهرة مستحيل يرجع لسوريا لأنو يلي عم يطالعو هنيك وعم يصرفوا مستحيل يطالعو بسوريا

THE_unforgiven

05/06/2009, 01:09

موظف رابتو عشر آلاف ليرة, و عندو مرة و ولدين بدو يطعميهون و يلبسهون و يدرسهون و يداويهونماحدا قللو يتجوز ... أصلا نحنا مشكلتنا انو منخلف ومنزت عالطريق ... حبيبنا الزواج مسؤولية .. إذا ماكنت قادر تكون علية وتصرف عليا ماتتجوز .. او تجوز .. بس ماتنق ..
كان فيه يشتغل كم سنة زيادة .. ويصمد كم قرش .. ويعمل شي مشروع صغير .. وبعدا يتجوز ..

يا عمي طبيعي بدها تكون أحسن! شي طبيعي, هاد مسير التاريخ! الحياة تتطوّر,ياأخي انتا قلتا .. صحي الحياة بتتطور .. بس كمان بدك تاخد بالحسبان العوامل الللي ذكرتن انتا ...
كان في بالتمانينات عوامل سياسية مثل الحصار الخانق و جيش بحالة حرب داخل لبنان كان مستنفذ مواردليش بدي اسألك الوضع السياسي بالوطن العربي .. شايفو كتير أحسن من قبل ...
بدك تاخد بالحسبان انو في كتير ضغوط ع سوريا .. من قبل كل المجتمع الدولي .. ومنيح اللي وصلنا لهون .. وكتير خير الله ..

الفرق هو سرعة أو تسارع التطور لأنو بدك تشوف قديه النسبة المئوية من الناس عندا طريقة لتوصل لها الأشيا الموجودة...انتا عم تناقض حالك بحالك ...
سبق وقلت انتا "
أي كمان ما بتقدر تعمل هالمقارنة.... لأنو هون تدخل عوامل غير اقتصادية بالنصعأيا أساس عم تقارن سرعة التطور .. مافيك تقارن سرعة تطور سوريا بروسيا مثلا ...
أول شي عندك الحجم البشري .. والإقتصادي .. والعسكري .. بيختلف .. ف مافيك تقارن سرعة تطورنا بروسيا أو ايا دولة تانية .. نحنا منقارن مع حالنا .. كيف كنا وكيف صرنا ..

yass

05/06/2009, 01:15

ماحدا قللو يتجوز ... أصلا نحنا مشكلتنا انو منخلف ومنزت عالطريق ... حبيبنا الزواج مسؤولية .. إذا ماكنت قادر تكون علية وتصرف عليا ماتتجوز .. او تجوز .. بس ماتنق ..
كان فيه يشتغل كم سنة زيادة .. ويصمد كم قرش .. ويعمل شي مشروع صغير .. وبعدا يتجوز .. أي و شو رأيك تحسب حساب انو ما بدو يتزوج و عمرو ستين سنة؟! بتعرف شو معناة حياة طبيعية؟

هل تعلم انو بجملتك هاي عم تقلي "معك حق" قدها مترين؟ الحياة الطبيعية انو الواحد يلاقي شغل, و هالشغل يأمنلو استقرار مادي يمكنو من متابعة مسيرة الحياة الطبيعية...

انت بذاتك عم تقول انو هالشغل ما بيأمنلو, فكر فيه... اذا حابب

ليش بدي اسألك الوضع السياسي بالوطن العربي .. شايفو كتير أحسن من قبل ...
بدك تاخد بالحسبان انو في كتير ضغوط ع سوريا .. من قبل كل المجتمع الدولي .. ومنيح اللي وصلنا لهون .. وكتير خير الله .. كان في حصار, الدولاب ممنوع يفوت!! مو نفس الشي

انتا عم تناقض حالك بحالك ..
لأ ما عم ناقض حالي, حكيي مفهوم و واضح جداً للي حابب يشوفو, بس انت بدك تطالع كل الدنيا غلطانة, و انت الصح, و أمام هالشي لا أنا و لا حدا تاني فينو يعمل شي... بس اذا انت هيك سعيد, الله يهنيك

MadMax

05/06/2009, 01:15

لأ ... بحب صحح معلوماتك ... تحسن رهيب ... وفظيع .. ويمكن خطير ...
إنتي بتتذكري كيف كانت سورية بالتمانينات والتسعينات ...

أنا بذكر منيح فترة التمانينات ..
حتى بعز الحصار الاقتصادي على سوريا ..

و لما كنا ننطر يوم كامل على باب المؤسسة لنجيب علبة السمنة

كانت أفضل من هالأيام ..
عالأقل الطبقية ما كانت واضحة المعالم متل هلأ

و كانت القدرة الشرائية للراتب ( برغم صغرو ) أكبر من هلأ

THE_unforgiven

05/06/2009, 01:19

يعني 9000 ليرة متوسط الدخل بالشهر للغالبية من الشعب, بيقدر حدا من اللي شايف الوضع جيد يشرحلي كيف انسان , على فرض عندو بيت ملك وما عم يدفع تلت ارباع راتبو اجار, بيقدر يعيش ب 9000 بالشهر؟؟؟
يااخي هادا متوسط .. بس إذا بتجي عالحقيقة .. نسبة كبيرة من السكان بيزيد دخلن عن ال15 ...
مو شرط بكل المدن .. بس هيك الأغلبية .. يعني أكيد هاللي عم شوفون كل يوم مانن من كوكب تاني ..

yass

05/06/2009, 01:21

يااخي هادا متوسط .. بس إذا بتجي عالحقيقة .. نسبة كبيرة من السكان بيزيد دخلن عن ال15 ...
مو شرط بكل المدن .. بس هيك الأغلبية .. يعني أكيد هاللي عم شوفون كل يوم مانن من كوكب تاني ..

يا أخي المتوسط هو شامل غالبية السكان! ما فيك تروح تعمل دراسة عن المستوى الاقتصادي بالمالكي!!!! اذا بدك تحكي عن مستوى معاشي لازم تدوّر عالمتوسط فما دون, لأنو بين المتوسط و ماتحتو بتلاقي 75 من شعبك

THE_unforgiven

05/06/2009, 01:22

كانت أفضل من هالأيام ..
عالأقل الطبقية ما كانت واضحة المعالم متل هلأ

و كانت القدرة الشرائية للراتب ( برغم صغرو ) أكبر من هلأ
صح .. وكتير صح هالحكي ... كانت أفضل .. لأان ماكان في مظاهر متل هلأ ..
اخي بهديك الأيام .. كان الواحد يقبض أربعتالاف .. يدفع 2 أجار بيت .. والباقي .. أكل .. وعالعيد بيجبلو قطعة تياب ..
وهلأ بهالأيام .. بتقبض تسعتالاف .. بتدفع ستة أجار بيت .. والبقية أكل وشرب ..
بس إذا بدك تحط كل يوم 500 ليرة بالقهوة ... و300 بالنت .. و400 بالمقهى .. ومدري . شو .. بتفرق أخوي ..

هدوء البحر

05/06/2009, 01:33

رح احسبلك ياها بالورقة و القلم
انا موظف و راتبي بحدود 17 الف \ محسوب عالوظائف المدعومة ماديا في وزارة الكهربا ولا باخد رشوة من حدا و لا بطلع براني مو لشي بس لانو مافي تعامل مع المواطنين و لا مراجعين \
اجرة سكن 5 الاف
اجرة نقل 1000 ليرة
محسوبك حشاش دخان \حمرا طويلة بدي باكيتين \ ب70 ليرة باليوم يعني بالشهر 2100 ليرة
مصروف خليوي و كمبيوتر \بطاقات نت \ 1000 ليرة
مصروف كهربا و مي و هاتف مو اقل من 2000 ليرة
هي صارو 11 الف لسا ما اكلت ولا شربت

طيب العيلة الصغيرة من اربع افراد بيكفوها 6000 ليرة بالشهر اكل و شرب؟
الطفل الصغير بشوشتو بتكلف 10 ليرات و اذا عملها ع حالو 5 مرات باليوم بيكلف 50 ليرة يعني بالشهر 1500 ليرة

وين عايش انت :?
بعدين دخلك في بشري بيشتغل 15 ساعة و بيكون مرتاح جسديا؟؟؟؟
و كيف ممكن يكون مرتاح نفسيا اذا عيلتو واهل بيتو \ ما رح جيب سيرة اصحابو \ مو قادر يشوفون؟

فوء كل هيك العالم مدبرة حالها

طيب شفت حدا مات من الجوع.؟

yass

05/06/2009, 01:42

طيب شفت حدا مات من الجوع.؟

مفهوم الحياة الكريمة مانو بس أكل و شرب و سكن (بالزور), الناس بيحقلها تعيش

MadMax

05/06/2009, 01:47

وهلأ بهالأيام .. بتقبض تسعتالاف .. بتدفع ستة أجار بيت .. والبقية أكل وشرب ..
..
أكل و شرب بـ 3000

بتكفيك اجرة سرافيس لوحدك هالـ 3000

خاصة هلأ على ايام عولمة الاسعار ... بغض النظر عن الدخل ( هي نظرية الدردري )

MadMax

05/06/2009, 01:51

فوء كل هيك العالم مدبرة حالها
في مثل بقول ..
سوري ... دبر راسك ..

بس إذا بدنا نعد وسائل التدبير ..... رح نثير القرف بين قراء القسم

THE_unforgiven

05/06/2009, 01:51

مفهوم الحياة الكريمة مانو بس أكل و شرب و سكن (بالزور), الناس بيحقلها تعيش
ياس أنا معك .. وللعضم ... بس حلو الواحد مايكون متعصب لرأيو .. وياخد رأي الأخر عجنب .. ويفكر فيه ولو لثانية ..
حلو الواحد يصرف ... ويعيش حياة حلوة .. ويترفه .. بس لازم يعيش لحتى يعمل كل هدول مو ..
طالما الإنسان عايش .. (متأمن الاكل والشرب ..) كلشي غير هيك بيتأمن بعدين .. :D
تحية إلك ,.. وللكل .. :D ..

ayhamm26

05/06/2009, 01:53

صح .. وكتير صح هالحكي ... كانت أفضل .. لأان ماكان في مظاهر متل هلأ ..
اخي بهديك الأيام .. كان الواحد يقبض أربعتالاف .. يدفع 2 أجار بيت .. والباقي .. أكل .. وعالعيد بيجبلو قطعة تياب ..
وهلأ بهالأيام .. بتقبض تسعتالاف .. بتدفع ستة أجار بيت .. والبقية أكل وشرب ..
بس إذا بدك تحط كل يوم 500 ليرة بالقهوة ... و300 بالنت .. و400 بالمقهى .. ومدري . شو .. بتفرق أخوي ..

خيو مفاهيمك للحياة غريبة كتير , يعني معتبر انو توفر السكن اللي ف بيت في مي وكهرباء هو الشي الطبيعي واي شي تاني هو فزلكة !!!:?

الانسان الطبيعي من حقو يتمتع بحياتو متل ما هو بيحب مو يعيش متل الدابة و يشتغل باكلو وشربو وهو مبسوط

واذا هالظروف مو متوفرة بوطنو و ما في امل تتوفر قريبا فوين الغلط اذا راح على بلد بييحقق في هالشي اللي بيخلي يعيش كبني ادم بيحترم نفسو

yass

05/06/2009, 01:55

ياس أنا معك .. وللعضم ... بس حلو الواحد مايكون متعصب لرأيو .. وياخد رأي الأخر عجنب .. ويفكر فيه ولو لثانية ..
حلو الواحد يصرف ... ويعيش حياة حلوة .. ويترفه .. بس لازم يعيش لحتى يعمل كل هدول مو ..
طالما الإنسان عايش .. (متأمن الاكل والشرب ..) كلشي غير هيك بيتأمن بعدين .. :D
تحية إلك ,.. وللكل .. :D ..

لأ الحياة الكريمة مش حياة رفاهية... في فرق شااااااااااااسع واسع

الأكل و الشرب و المسكن, ضرورات أساسية, بس مش الوحيدة... في ضرورات تانية لا تقل عنها أهمية أبداً, و ما عم احكي عن رفاهيات, عم احكي عن ضرورات

نحنا بشر, مش آلات

أنا ع كل حال أدليب بدلوي, و بعتقد اللي بدو يفهمني فهم عليي.. و اللي مابدو, هاي مشكلتو

معتبر انو توفر السكن اللي ف بيت في مي وكهرباء هو الشي الطبيعي واي شي تاني هو فزلكة !!!////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////يبدو هيك تفكيرو أخونا.... و بصراحة شديدة مافيني ما أأسف على هالشي, لأنو هاد مانو مفهوم حياة كريمة, لا بالغرب و وللا بالشرق...

yass

05/06/2009, 02:04

whiterose

05/06/2009, 02:12

ayhamm26

05/06/2009, 02:15

أنا حتى حسابات الأكل و الشرب ما بتطلع معي لحتى واحد يقدر يأسس أسرة براتبو

خلينا نقول راتبو 10000 و انو الزلمة كبس ع حالو و عاش ب8 آلاف, منيح؟ (آجار و مواصلات و أكل و شرب, الزلمة لا عندو موبايل و لا يفوت عالنت و لا يروح و لا يجي, من البيت للشغل و من الشغل للبيت, و كمان ما بيبرد و ما بيجيب مازوت)

هالزلمة بيوفر من راتبو 2000 ليرة كل شهر, ع هالحسبة بيوفر 24000 كل سنة...

اذا اعتبرنا انو خلال العشرين سنة المقبلة ما صار معو طارئ, و لا مرض, و لا حتى اشترى تياب و ما طلع من الشام ع ولا مطرح... بعشرين سنة بيوفّر 480000, يعني نص مليون الا طجة... عشرين سنة مشان يوفّر عشر آلاف دولار

وحدة من تنين.... يا بيسرق, اذا بيطلعلو, يا بيهاجر, كمان اذا بيطلعلو....

و عمار يا بلد

ما هي هون المصيبة, لو الراتب بيكفي اكل وشرب ومواصلات كنا منقول في امل الواحد يعتبر الوضع مقبول, بس حتى هي صارت حلم

تخيل الواحد بدو يشتغل شغلتين و تلاتة احيانا مو مشان يلم حق بيت او سيارة او يخبي شوية مصاري لولادو لما يكبروا, وانما بس ليأمن لولادو ياكلو ويشربو ببلد الدولة معتبرة مجرد انو عم تعطي الموظف راتبو هي منية , لاء وكل سنة بيمننوا بزيادة راتب هزلية عم تضر اكتر ما تنفع

وبعد كل هالشي ليش الناس عم تهاجر , غريب ما :frown:

saman

05/06/2009, 02:20

yass

05/06/2009, 02:20

ما هي هون المصيبة, لو الراتب بيكفي اكل وشرب ومواصلات كنا منقول في امل الواحد يعتبر الوضع مقبول, بس حتى هي صارت حلم

تخيل الواحد بدو يشتغل شغلتين و تلاتة احيانا مو مشان يلم حق بيت او سيارة او يخبي شوية مصاري لولادو لما يكبروا, وانما بس ليأمن لولادو ياكلو ويشربو ببلد الدولة معتبرة مجرد انو عم تعطي الموظف راتبو هي منية , لاء وكل سنة بيمننوا بزيادة راتب هزلية عم تضر اكتر ما تنفع

وبعد كل هالشي ليش الناس عم تهاجر , غريب ما :frown:

أي عم نحكي عن واحد عزابي... لأنو بعرف الشباب حسب ما حكو قبل انو اللي ما بيلحق لولادو هاد الحق عليه لأنو ما حدا ضربو ع ايدو قلو تزوج...

طيب هاي واحد توظف و عمرو 25 سنة (بفرض دبر حالو و توظّف بهالعمر)... بدو عشرين سنة ليصير معو نص مليون.. وين تشتري بيت النص مليون؟ هاد بعمرو ما رح يتزوج

أنا بصراحة جداً أأسف لأنو صار مفهوم بسوريا (مفهوم فرضتو الظروف) انو الحياة أكل و شرب و آجار, فقط لا غير... و الباقي كلو كماليات... و هاد مانو مزبوط, و مش بعرف غربي أو شي, اذا بنقول هيك عم نلغي 200 سنة تطوّر انساني من الثورة الصناعية و حتى اليوم...

و المشكلة انو ما عم توصل فكرة انو هالكم حوت بالبلد اللي صار ملياردير على مستوى العالم جمّع ثروتو من المصاري اللي كان لازم تكون بايد هالشعب المسكين, و للأسف هالشي صار طبيعي و مقبول

عايشين بزمن "حلال عالشاطر".. هاد هو المفهوم الوحيد الشغّال, مافي قيم انسانية, و اذا ما دبّرت راسك... بيكون الحق عليك

yass

05/06/2009, 02:28

لأ وفوق هيك طبعاً النصب شغال ع ابو جنب ...
لو بتشوفوا ايرادات شركة الاتصالات وشركة ام تي ان وسرئة تيل ... بالسنة ... لتقول الشعب السوري مليونير .. لحتى عم يدفع كل هالارباح لهالشركات !

ولسا عم نقول انو المواطن السوري عايش !:?

هاد حكي تاني...

سامر حكى قبل عن الطبقية... و هلأ البلد طبقتين, الطبقة الوسطى طارت إلى غير رجعة على ما يبدو... (عندك أغنياء بدرجات متفاوتة, و فقراء بدرجات متفاوتة)

عندك من العشرين مليون سوري في عندك بضعة ألوف ثرائهون فاحش, يعني بيسابقو أغنياء أوربا بجدارة و يغلبوهون, شي رهيب انو الواحد يسأل هدول من وين طالعو كل هالمصاري بهالبلد؟

بعدين عندك 1-2 مليون ثراء عالي أو وسط... هدول كمان تلاقي حياتهون بمعايير فوق العالمية

ويبقى عندك مليونين أو تلاتة.. مستورة و الحمد الله (هاي بقايا الطبقة الوسطى.. ببلد وضعو الاقتصادي جيد لازم 70-80 بالمية من السكان يكونو هون)

و بعدا شي 5-8 مليون, عايشين حسب مفهوم الشباب أكل و شرب و نوم.. و بالزور (حياة الموظف المعتّر الغنية عن التعريف)

و بيظل عندك عدد هائل من السكان تحت خط الفقر, يعني هدول أكل و شرب مش مأمنين, و هالحكي دراسات حكومية يعني مش من عندي, شوفو تقارير وزارة الاقتصاد بالسنين الأخيرة كل سنة بيرفعو نسبة السكان اللي تحت خط الفقر (الأمم المتحدة تعرّف خط الفقر بانو هو 2 دولار يومياً للفرد).

حسب دراسة من سنتين (دراسة للأمم المتحدة بالتعاون مع الحكومة السورية) اذا ماني غلطان كانو حاسبين انو في 2,2 مليون سوري تحت خط الفقر المدقع (يعني أقل من دولار واحد باليوم).

تحديث: تأكدت من النسبة, و حسب هيئة تخطيط الدولة بعام 2007, نسبة الفقراء باستخدام خط الفقر الأدنى بسوريا هي 11.4%

أكيد الأسباب كتيرة و متشعبة, فساد, سوء ادارة, انفجار سكاني, ظروف خارجية... الخ الخ الخ.. بس اللي بعتقد نكرانو هو متل تخباية ضو الشمس... هو انو الوضع الاقتصادي للبلد سيء... لك مسؤولين الحكومة عم يقولو انو سيء جداً معقول في حدا يزاود عليهون؟

عبر المحيط

05/06/2009, 02:49

عكل ... شو ماكان الوضع بسوريا ... وبرا سوريا ... شو ماصار فينا ..
بتضلا سوريا ...وطننا ... بلدنا .. أرضنا .. وشعبنا ... والموتة عترابا ... بتسوى العيشة ع نفط الخليج .. وبس ..

الحوار على اشده

اخي الحبيب انت خليت الخليج وكأنها جهنم في المريخ مع انها جاره لسوريا.... سوريا نعتبرها بلدنا ووطننا وماعندنا مانع نموت عترابا والعيشة في سوريا بتسوى الغالي والنفيس... وحكيك ع الخليج وكأنه سجن للاشغال الشاقة مو صحيح العالم بتجي على الخليج محترمة وبتطلع محترمه مستفيدة..اكيد فيه البعض يفشل في تجارة في الخليج او يفشل في صنع ثروة لكن هذا مو معناه الجميع فشل انا اعرف الكثير من السورين حققوا ثروات بالملايين في خلال 5 سنوات والبعض يعمل في شركات بمرتب خرافي وسوريين مميزين في الخليج في الاعمال الصحية والتعليمية والادارية والاقتصادية والتجارية وفيه البعض اللي يعمل مجال المقاولات والبناء والنقل هؤلاء قد يكون هم من يعمل في اعمال شاقه وفي ظروف صعبة وساعات اطول وفي اي بلد هذه المهن صعبة وشاقة حتى في سوريا.....مع هذا الخليج ليس جنه او ملاذ وظيفي امن لكل شخص حتى ابناء الخليج انفسهم لم يعد لهم الحال كما كان في السابق................................شكر ااااااااااااااااااااااااا اااااااا

* للعلم......لم اصوت

saman

05/06/2009, 02:55

هاد حكي تاني...

سامر حكى قبل عن الطبقية... و هلأ البلد طبقتين, الطبقة الوسطى طارت إلى غير رجعة على ما يبدو... (عندك أغنياء بدرجات متفاوتة, و فقراء بدرجات متفاوتة)

عندك من العشرين مليون سوري في عندك بضعة ألوف ثرائهون فاحش, يعني بيسابقو أغنياء أوربا بجدارة و يغلبوهون, شي رهيب انو الواحد يسأل هدول من وين طالعو كل هالمصاري بهالبلد؟

بعدين عندك 1-2 مليون ثراء عالي أو وسط... هدول كمان تلاقي حياتهون بمعايير فوق العالمية

ويبقى عندك مليونين أو تلاتة.. مستورة و الحمد الله (هاي بقايا الطبقة الوسطى.. ببلد وضعو الاقتصادي جيد لازم 70-80 بالمية من السكان يكونو هون)

و بعدا شي 5-8 مليون, عايشين حسب مفهوم الشباب أكل و شرب و نوم.. و بالزور (حياة الموظف المعتّر الغنية عن التعريف)

و بيظل عندك عدد هائل من السكان تحت خط الفقر, يعني هدول أكل و شرب مش مأمنين, و هالحكي دراسات حكومية يعني مش من عندي, شوفو تقارير وزارة الاقتصاد بالسنين الأخيرة كل سنة بيرفعو نسبة السكان اللي تحت خط الفقر (الأمم المتحدة تعرّف خط الفقر بانو هو 2 دولار يومياً للفرد).

حسب دراسة من سنتين (دراسة للأمم المتحدة بالتعاون مع الحكومة السورية) اذا ماني غلطان كانو حاسبين انو في 2,2 مليون سوري تحت خط الفقر المدقع (يعني أقل من دولار واحد باليوم).

تحديث: تأكدت من النسبة, و حسب هيئة تخطيط الدولة بعام 2007, نسبة الفقراء باستخدام خط الفقر الأدنى بسوريا هي 11.4%

أكيد الأسباب كتيرة و متشعبة, فساد, سوء ادارة, انفجار سكاني, ظروف خارجية... الخ الخ الخ.. بس اللي بعتقد نكرانو هو متل تخباية ضو الشمس... هو انو الوضع الاقتصادي للبلد سيء... لك مسؤولين الحكومة عم يقولو انو سيء جداً معقول في حدا يزاود عليهون؟
ولي ..:?
حكيك بيخلي الواحد .. يفنجر عيونو ويقول العمى !!!!! وين عايش انا :frown:
11.4 % تحت خطر الفقر ...!
العمى وهيئة تخطيط الدولة فرحانة بالله ...او بالاحرى الحكومة فرحانة بهالانجاز مثلاً :frown:
لأ وبيجي حدا بيطلع عالتلفزيون وبيتفزلك وبيقول انو وضعنا عال العال والاقتصاد كل مانو عم يتحسن ... والميزان التجاري متوازن !! :?

Abu ToNi

05/06/2009, 04:00

عمي ابو جعفر كيفك ..:D

بما اننا " انا وانت يعني " لسعتنا طلاب وما دخلنا بشكل نظامي بسوق العمل فعلى الأغلب حكينا بده يكون تنظير بتنظير ، وبده يكون توقعات بشو بده يصير معنا .. وبيني وبينك كتير اوقات بفكر بوين رح تكون أراضي بعدما اتخرج .. من كتر ما بيوجعني راسي بروح نايم طب على وجي

حاليا وضعنا مانه مزري متل أفريقيا .. اي مزبوط معك انا بس ليش حتى نقارن حالنا بأفريقيا بالأصل ؟
يفترض نستنى نصير بمستوى افريقيا لنقول انه وضعنا سيء؟

عم تقول اننا عم ناكل ونشرب .. اي من ناحية تانية يفترض نصل لمرحلة ما منقدر فيها ناكل ونشرب حتى نقول يا جماعة نحن وضعنا سيء ؟!

بالنسبة لوضعنا المادي كل الاحزاب والفئات والمولاة والمعارضة متفقة على ان وضعنا حاليا سيء إلى حد ما
وطبعا بتختلف الحجج والمسببات .. المعارضة بتقول بأن الفساد والنهب عم يعملونا فينا هيك والموالاة بتقول بأن اللاحرب واللاسلم الوضع اللي العايشين من من 30 سنة عم ياخد أكتر من 75% من ميزانية الدولة لتسليح الجيش والمكنة العسكرية
بس بالأخير الكل متفق بأن الوضع أبداً مو طبيعي
ما بدي قلك بأن المواطن الفرنسي المتشرد ( للوصول لنقطة مشتركة بينك وبين ياس بفرنسا بسموهم smf يعني sans maison fixe = بلا منزل ثابت
هدول بياخدوا راتب من الدولة بعادل تقريبا 550 يورو .. اذا بده ياكل ويشرب يومياً من محلات الـ 2 يورو ولا على باله .. وبيبقى عايش ومرفه كمان (اذا اعتبرنا أكل المطاعم ترفيه بهي الحالة )

بس واقعنا بزعل وما خرج نطلع كتير على حالنا
بدك تقلي شوف وضعنا بالتمانينات وهلق وكيف العالم بتوقف علدور مشان تنكة السمنة
طب ما تاريخنا أقدم من التمانينات .. جدي كان زلمة موظف وبرقبته 5 أولاد + هوي وزوجته + والدته عايشة معه بالبيت
وكان قادر يطعمي ولاده ويلبسن وحتى يفوتن بالجامعات ويخلين يكلموا دراستن .. مين في موظف حاليا بيقدر يعمل هي الشغلة ؟

روقنا ابو جعفر ما متعودين نشوفك معصب :D

BL@CK

05/06/2009, 04:09

لأ ... بحب صحح معلوماتك ... تحسن رهيب ... وفظيع .. ويمكن خطير ...
إنتي بتتذكري كيف كانت سورية بالتمانينات والتسعينات ...
تذكري كيف كان هم البني آدم يأمن ربطة خبز لولادو .. أو شي كيلو رز ..
كان يمكن بالمدينة كلا في شي عشرين تكسي ..

بحب صحح معلوماتك عزيزي أنو مسيرة التطور عنا أبطئ من البطئ , إزا مفتكر الإنترنت بسرعة 56 كيلو و الموبايل على أبشع شبكة في العالم و هالسيارات الجربانة اللي بتدفع دبلين حق السيارة بين رفاهية و جمارك تطور فا أنت غلطان ..

يعني هالإشيا لازم نكون منتهين منا من عشر سنين أقلا شي , من إيمتا في ببيروت موبايل قبلنا بأديه و مع العلم لبنان كلا أد عقلي و ما عندا موارد نفطية بالصلاة عا الأنبيا متلنا ؟! أديه في فرق بأسعار السيارات بينا و بين الدول المجاورة شو نحنا ولاد الرقاصة و غيرنا ولاد الشريفة !؟

بتعرفي كم في مليون بشري (ركزيلي ع بشري ..) بأفريقيا ... عندن عصر السرعة ... انو يقدر يدبر كاسة مي ورغيف خبز بأقل من نهار ...!!!!
بتعرفي انو في أكتر من 1000 بني آدم بيموتو من الجوع كل يوم وبياكل جلدن النسورة والضباع ..
حلو التطور .. بس انو شي منو ...

و بتعرف كم مليون جحش شغل هون عنا بسوريا عما يشتغل من أول النهار لآخر النهار من السبعة الصبح لآخر الليل مشان عشر تالاف راتب شهري و ألفين إضافي ما بتكفيه حق فلافل لعيلتو ..

في مليون مثال و مليون عيلة لنضرب مثال عيلة وضعا جيد جدا ً بالنسبة لغيرا الأب متوفي و الأم مكفوفة عندون أربع أطفال و شب كبير عما يشتغل مكنسيان بيلتعن سلافو لياخد بالشهر 12 ألف ليصرف على عيلتو ..

حسبلي ياها أزا بدو كل واحد ياكل ست صندويشات فلافل كل نهار تنتين للفطور و تنتين للغدا و تنين للعشاء ..

غليانة صندويشة الفلافل صايرة هلأ ب 20 ليرة مع غليان المواد الأولية فا ضربا بآلة حاسبة صغيرة بيطلع معك بدو كل نهار 360 و بالشهر 10800 ببقا معو 1200 ليرة مواصلات لشغلو .

طيب يا أخي ما بدو مي ما بدو كهربا ما حنحكي عن التليفون و لا الموبايل .. و لا رح نحكي أنو رح يحبلو شي وحدي و ينجبر على عيد الفاللانتين ياخدلا هدية ..

أيا تطور و أيا مستوى معيشي , لك ما ليكون في مستوى معيشي , ما لنكون عايشين أول شي ..

Reemi

05/06/2009, 08:18

عدلنا المشاركات واخدنا شوية اجراءات ادارية بس لازم وضح هون كم شغلة:

يلي فايت يخانق ويفرض رأيو يلي هو مقتنع فيه ومانو حابب يناقش وأي حدا بدو يناقشو بدو يتعرضلو شخصياً فالصالون مو مكان مناسب لهالشي

يلي بدو يقلل من قيمة أي طرح أو فكرة ويسخفها أو يتفهها لمجرد انو مو طابقة على فكرو كمان بلا ما يحط موضوع ويناقش

يلي مقتنع انو البلد جنة مافي داعي يناقش بوضع البلد اذا ماعندو استعداد يناقش بهالقناعات

يلي طالب بنقل الموضوع من الصالون لاخد الحرية بحب وضحلو انو كل الاقسام باخوية بتنطبق عليها نفس شروط النقاش بس الفرق بطبيعة الموضوع هي يلي بتحدد القسم المناسب لإلو

شكراً للكل :D