قضية وطنية : رأيك بالتواجد العسكري الروسي في سوريا [الأرشيـــــف]

VivaSyria

22/08/2008, 07:24

طبعاً كلنا منعرف انو تم الإتفاق بين الرئيس بشار الأسد والحكومة الروسية على إنشاء قاعدة عسكرية بحرية بطرطوس بعد ماكان ميناء طرطوس يقدم بعض الخدمات الفنيية لقطع بحرية روسية بتتواجد بالمنطقة وتم الإتفاق أيضاً على نشر صواريخ باليستية روسية على ألأراضي السورية..

موضوع وجود قاعدة بحرية عسكرية روسية بطرطوس هو موضوع قديم جداً "من أيام الاتحاد السوفيتي" بس لغاية اليوم لحتى بلشت الخطوات الفعلية لإنشاء هالقاعدة.. واتوجهت أول خمس قطع بحرية روسية يتضمن حاملة طائرات وغواصتين وفرقاطتين وزوارق خدمة باتجاه المياه الإقليمية السورية وطبعاً كالعادة إعلامنا هو الغائب الوحيد عن هالشي...

هون حبيت ناقش أرائكون عن هالقضية..

هل برأيك هالوجود العسكري الروسي على الأراضي السورية بيخدم المصالح الوطنية لسوريا؟؟

أم هالتواجد ينتقص من السيادة الوطنية وهو متل أي تواجد أجنبي على أرضنا؟؟

هل برأيك هالتواجد رح يكون دعم عسكري لسوريا بوجه التهديد الإسرائيلي "إن وجد هيك تهديد!!" ؟

هل هالتواجد رح يحول سوريا لساحة تصفية حسابات بين أميركا وروسيا على أرضنا؟ هل ستتحول سوريا إلى أو أسيتيا 2 أو كوبا 2 أو جورجيا 2 أو قطر 2 ؟؟

هل هالتواجد هو عبارة عن محاولة من النظام لخلق حلف مع روسيا بيحميه من التهديدات والمخاطر يلي عم تهدد وجوده؟

ام هالتواجد هو خطوة صحيحة من النظام لخلق استراتيجي مع روسيا يخدم المصالح الوطنية؟

شو مصلحتنا بهيك تواجد؟؟ وشو مصلحة روسيا؟؟ وين رأي الشعب بهيك قضية بحجم الوطن؟؟

باختصار شو رأيكون بهالقضية؟

شوية مقتطفات من أقوال المسؤولين السوريين والروس وبعض الأخبار المتعلقه بالموضوع:

ونقلت وسائل إعلام روسية عن الأسد قوله قبل الزيارة إن بلاده مستعدة لتفاوض موسكو على استقبال منظومة صواريخ إسكندر الباليستية القادرة -حسب روسيا- على شل أي نظام دفاعي صاروخي.
الجزيرة

قال الرئيس السوري بشار الأسد يوم الأربعاء إن سورية على استعداد لمناقشة مسألة نشر شبكة صواريخ "إسكندر" الدفاعية على أراضيها غير أنها لم تتلق لغاية اليوم عرضاً روسياً رسمياً بذلك.
الوطن

وذكرت وكالة الأنباء الروسية نوفوستي أن الأسد الذي وصل يوم الأربعاء إلى روسيا في زيارة رسمية تستغرق يومين قال في مقابلة مع صحيفة "كومرسانت" عشية سفره إلى موسكو "موقفنا هو أننا على استعداد للتعاون مع روسيا في أي مشروع قد يعزز أمنها... أعتقد أن على روسيا حقاً أن تفكر في الرد المناسب عندما تجد نفسها في دائرة مغلقة".
الجزيرة

رجح مراقبون عسكريون ان روسيا ستنقل سفن اسطولها الحربي الى موانئ طرطوس واللاذقية السورية بعد رفض اوكرانيا تمديد فترة مرابطتها في مرسى سفاستوبل على البحر الاسود، ونقلت صحيفة الوطن الكويتية في عددها الصادر اليوم الثلاثاء عن "مراقبون عسكريون" حديثهم عن إمكانية نقل روسيا سفنها الحربية إلى حوض البحر الأبيض المتوسط ؛ حيث أعلن القائد العام لقوات الاسطول الروسي ان روسيا تخطط لبناء قاعدة بحرية عسكرية هناك، منوها بان لروسيا مصالح استراتيجية في البحار والمحيطات الدولية، واعاد رئيس معهد التحليل السياسي والعسكري الكسندر خرامتشينكو الاذهان الى ان لدى روسيا في حوض البحر الابيض المتوسط موقعا واحدا الا وهو ميناء طرطوس السوري، حيث يمكن الاتفاق مع دمشق حول تحويله الى قاعدة ثابتة, وتأتي هذه التوقعات اثر المعلومات عن توجه سبع قطع بحرية روسية إلى مرفأ طرطوس وتشمل هذه القطع غواصتين روسيتين مجهزتين بصواريخ بالستيه.
الوطن الكويتية وأسقطت روسيا 70% من هذه الديون فيما سيتعين على سوريا تسديد جزء من الديون المتبقية والجزء الآخر من خلال خدمات تقدمها لروسيا على شكل إقامة قاعدتين دائمتين للأسطول الروسي في طرطوس واللاذقية. يشار إلى أن الأسطول السادس الأميركي يتواجد بشكل دائم في البحر الأبيض المتوسط فيما كان الأسطول الروسي يكتفي «بزيارات ودية» إلى المنطقة قبل إعادة تفعيل القاعدتين في سوريا.
الشرق الأوسط

أفادت صحيفة <كومرسانت> الروسية في وقت سابق أمس، نقلا عن المسؤول في سفارة روسيا لدى دمشق فلاديمير زيمين، بأن موسكو بدأت أشغالا لتعميق ميناء طرطوس وتوسيع ميناء اللاذقية. وأضافت الصحيفة أن روسيا تبحث عن حل بديل من قاعدة سباستوبول الاوكرانية المطلة على البحر الأسود والتي تستأجرها حتى العام 2017 وقد تضطر إلى مغادرتها.
الحياة

lostman1

22/08/2008, 08:50

طبعاً كلنا منعرف انو تم الإتفاق بين الرئيس بشار الأسد والحكومة الروسية على إنشاء قاعدة عسكرية بحرية بطرطوس ب

لماذا يتصرف بشار بسوريا و كانها ملك عائلي له ... كتصرفات سكاشفيلي بجورجيا

مجنون يحكي وعاقل يسمع

22/08/2008, 09:09

ط

هون حبيت ناقش أرائكون عن هالقضية..

هل برأيك هالوجود العسكري الروسي على الأراضي السورية بيخدم المصالح الوطنية لسوريا؟؟
حبيبي قلبي مو بالأول لازم نعمل وطن بعدين منحدد وين مصلحة الوطن وبس يصير الوطن وطنّا وملكنا ونحن ملك الوطن وليصير عنا حرية فينا نحدد كيف لازم نحافظ عليها

أم هالتواجد ينتقص من السيادة الوطنية وهو متل أي تواجد أجنبي على أرضنا؟؟
لو كان في أكتر من هيك انتقاص سيادة كنّا خفنا على الباقي من السيادة بس أنا شايف أنّو ما في أقل من هيك انتهاك للسيادة ويا ريت اللي عم ينتهكو السيادة دول معادية للأسف أشخاص بيلبسوا تياب متلنا ومحسوبين علينا
هل برأيك هالتواجد رح يكون دعم عسكري لسوريا بوجه التهديد الإسرائيلي "إن وجد هيك تهديد!!" ؟

لو كان في تهديد غير اللي بنعرفو كنّا فكرنا بالموضوع بس من خمسة وتلاتين سنة لحد اليوم شايف الحدود السورية الإسرائيلية كتير كتير هادية وما صار أي تهديد رغم أنو صار إشكالات مع كل دول الجوار من المزارب اللبنانبة مرورا بالأردنوالعراق وتركيا أمّا هنا فالأمن مستقر والشباب صار طيرانون يطلع جولات سياحية لعنّا[/COLOR][/SIZE]
هل هالتواجد رح يحول سوريا لساحة تصفية حسابات بين أميركا وروسيا على أرضنا؟ هل ستتحول سوريا إلى أو أسيتيا 2 أو كوبا 2 أو جورجيا 2 أو قطر 2 ؟؟
يعني وبدون وجود القواعد ما رح نكون ساحة؟ ...وبعدين نحنا مو بحاجة لحدا يحمي سوريا حتى الجيش صار بدو تسريح بعد اللي صارت الشعارات حقائق وصار سوريا الله حاميها
بس يمكن في شوية تناقض بهالحكي إذا الله حاميها لكن حراميها شو شغلتون
هل هالتواجد هو عبارة عن محاولة من النظام لخلق حلف مع روسيا بيحميه من التهديدات والمخاطر يلي عم تهدد وجوده؟
ليش انفك الحلف عم الشيطان واللا هداك حلف داخلي وهادا حلف خارجي
ام هالتواجد هو خطوة صحيحة من النظام لخلق حلف استراتيجي مع روسيا يخدم المصالح الوطنية؟
عم يلعبو الولاد عم يلعبو " بس للأسف ما تركولنا لا سما زرقا لنلتحفا ولا أرض خضرا نرعى عليها يعني وطن بح

شو مصلحتنا بهيك تواجد؟؟ وشو مصلحة روسيا؟؟ وين رأي الشعب بهيك قضية بحجم الوطن؟؟

وين رأي الشعب بقياداتو , وين راي الشعب بممثلينو وين رأي الواحد منّا لما بيشوف صورتو بالمرايا ولك يا حبيب ما عاد إلنا عين نشوف حالنا بالمراية

باختصار شو رأيكون بهالقضية؟
أنا بكره شكل العسكر وين ما كان وشو ما كانت مهمتون , وبتمنّى يحكم الأرض يا أطفال يا مجانين , يعني إذا حدا عندو قواعد أطفال أو مجانين يا هلا فيه بما تبقى لنا من وطن في أحلامنا ,أو في ما تبقى لنا من ذكريات , أو اللي عندو قواعد بتستطيع تخلصنا من هالذكريات يجيبها لنعرف نرتاح شوي

الله يسامحك أخي الصبح على بكرا , والله وجبة تقيلة على المعدة والعقل وعالروح يبدو لسا الإحساس والشعور ما خلص عنّا
تسقط كل قواعد العالم وكل عسكر العالم ,يا أخي نحنا ما بقا بدنا حتى نحلم بالوطن صار بدنا نحلم أنو أطفالنا يعرفو يحلمو بوطن رغم مرارة هيك حلم

Sun Shine Art

22/08/2008, 09:52

الله الموضوع كله صار جكاره ...بجكاره بين دول ..
بعدين الشغله فيها مصالح وفرض راي وعلى مبدا انه شوفو انا لسى (موجوده الحكي ع روسيا) .....

وليش بالتحديد بهل الوقت ..ليش مو قبل .....؟؟؟

بس مع كل هذاا من نواحي معينه انا بايد ..ومن نواحي اخرى انا بعارض

LiOnHeArT.3LA2

22/08/2008, 12:18

ما بعرررف ..

خايف فكر بالموافقة .. منصير عملاء للغرب .. وبيصير معت بيحقلنا نحكي عالسعودية والامارات وقطر ..

" طبعا مع الفرق الهائل بين روسيا واسرائيل "

بس كمان ازا رفضت .. في عنا شغلة الحرب الشغّااالة .. وازا كنا بدون حرب .. مع روسيا بنصير بحرب

ما بعررف عنجد محتار كتير .. انا ما رح صوت ..

بس رح احكي هالكلمتين ..

كشغلة مبدأ .. اكيد............ لأ ..

بس كشغلة استراتيجيات سياسية .. وما بعرف شو .. مع

was616im

22/08/2008, 14:23

خيو انا رجل كنت متشائم بالاول ( بكل شي يعني لا تفكر انو عم احكي عن هالقضية بالذات لا قصدي هيك بالحياة بشكل عام يعني ) ... يعدين صرت متفائل ... بس هلق ...ما عادت فرقت يا رجل ... المهم الله يقدم اللي فيه الخير ...
مشان هيك ما رح صوت بدك ما تواخذنا يعني :D

yass

22/08/2008, 14:56

ما دام عم نتعامل دوليا بأسلوب "حبيب قلبي" فما رح ينفع...

لشو بدنا قاعدة روسية؟ روسيا رح تدافع عنا؟؟؟ طبعا لأ.. روسيا عم ترقص فالس مع أميركا و مسلمة أميركا الشرق الأوسط بشرط انو أميركا تحل عن القوقاز ... هلأ روسيا ناقمة على حركة كوسوفو (اللي صفقلها العرب بكل غباء) و دعم أميركا المحدود لجورجيا... فبدها تعمل حركة هلأ سريعة..

طبعا الحركة السريعة يقصد بها هلأ تسريع المفاوضات.. الفكرة أقدم من هيك.. روسيا مستأجرة قواعد بحرية بأوكرانيا و راح ينتهي العقد بعد سنتين يمكن... فالاسطول تبع البحر الأسود لازم يروح ع شي مطرح.. فينقلوه عالمتوسط...

العقود اللي رح تصير مع روسيا هي عقود آجار و ليس معاهدة دفاع مشترك متل أميركا بالسعودية.. يعني سوريا ما جايها شي منوب من هالشغلة.. روسيا ما رح تدافع عنا.. يجوز ترد المعروف بمعروف عن طريق عقود سلاح أو يسامحونا بجزء من الديون (لأنو روسيا الها علينا ديون بلاوي ألله من أيام الاتحاد السوفييتي.. و رغم انو سامحونا بـ 70% من الديون لكن الباقي يعادل أضعاف الميزانية السورية.

اذا أيام الاتحاد السوفييتي ما عملنا قواعد... فليش هلأ؟ و لشو؟ بلاها كل هالشغلة ..

THE_unforgiven

22/08/2008, 18:25

هلأ اول شي .. القصة كلها .. ماحدا بهالمنتدى ولا بغير منتدى بيقدر يحكم عليها .. هيدي شغلة اهل السياسة .. تانيا .. أنا برأيي (وهادا رأيي والكل هون مابيقدرو يقدمو شي غير آراء فلا حدا يتفلسف ويقعد يعطي انتقادات لسياسة الدولة ) انو هالخطوة ما إجت عبث .. يعني ما فيحدا بيعمل شغلة إلا ومن وراها غرض .. يعني إذا ماكانت هالحركة السياسية وبمتل هيك وقت لأغرض عسكرية (حاليا) فهيي أكيد لأغراض سياسية واقتصادية ..
ثالثا .. هالديون اللي مندينها لروسيا .. إذا كتير انتو كريمين ومابدكن نردها بطرق غير مباشرة تفضلو مدوا ايدكن ..
وأخيرا .. وجود أسطول بحري أجنبي أو وطني بالبحر أبدا ما بيضر .. وخاصة من دولة صديقة .. يعني إذا مانفع ما بيضر .. وهوي أكيد بدو ينفع .. لأأن اسرائيل صار بدها تحسب مية حساب قبل ما تفكر تقرب بطياراتها ع شمال لبنان وع جهات تركيا .. لأن أي هجوم عمنطقة قريبة من الأسطول الروسي .. يعتبر مهاجمة لروسيا .. والباقي انتو بتعرفوه .. يعني الزبدة .. الأسطول مصدر دفاع غير مباشر لسوريا .. نحنا ماعم نقول انو رح يقوم بالهجوم عاسرائيل .. بس من جهة تانية هوي عامل ردع ..
وبعد فترة رح تبين آثارو عاسرائيل من خلال رد الفعل الدولي ..

VivaSyria

22/08/2008, 18:44

فسحة أمل

22/08/2008, 18:50

كنت بتمنى انو الموضوع يقتصر على النواحي الأقتصادية صفقات شراء الأسلحة ....على الرغم من هيك بس ممكن تكون للقواعد الروسية فوائد استراتيجية مؤقتة لسوريا...بس بهل الحركة أنا بعتبر أنو ما عدنا مختلف عن دول الخليج أو أي دولة موجود فيها قواعد عسكرية أمريكية ......
متابع..

VivaSyria

22/08/2008, 18:53

هلأ اول شي .. القصة كلها .. ماحدا بهالمنتدى ولا بغير منتدى بيقدر يحكم عليها .. هيدي شغلة اهل السياسة ..

المشكلة متل ماني شايف انو لهلأ مافهمنا شو يعني قضية وطنية... بهيك أمور يا صديقي بأي دولة بالعالم بينعمل استفتاء شعبي مو بس بتنطرح القضية للنقاش بحكم انو هاد مو قرار أشخاص ولا حكومات هي قضية نتائجها الايجابية والسلبية بتنعكس على الوطن كلو.. الا اذا كنت بتعتبر الوطن حكر على أفراد معينين بيتحكمو فيه متل مابدون

تانيا .. أنا برأيي (وهادا رأيي والكل هون مابيقدرو يقدمو شي غير آراء فلا حدا يتفلسف ويقعد يعطي انتقادات لسياسة الدولة ) انو هالخطوة ما إجت عبث .. يعني ما فيحدا بيعمل شغلة إلا ومن وراها غرض ..

طيب باعتبار انت عم تعطي رأي.. وبحكم بتعرف انو مسموح الشعب يعطي رأي.. مين عطاك السلطه حتى تحكم مين يلي عم يتفلسف ومين لاء؟؟ بأي حق بتحكم على رأي مواطن متلك متلو انو عم يتفلسف؟ وليش لحتى كل رأي بيخالفنا نعتبرو فلسفة؟؟ هالبني أدم يلي "اتفلسف" مو عم يتفلسف من محبتو ببلدو أما لأنو عميل "صهيوني" والرأي السليم هو الرأي يلي بيهلل لقرارت السلطه شو ماكانت؟

THE_unforgiven

22/08/2008, 19:15

بهيك أمور يا صديقي بأي دولة بالعالم بينعمل استفتاء شعبي مو بس بتنطرح القضية للنقاش
لأ .. الإستفتاء بينعمل بعد القرار .. بكافة دول العالم .. خود مثال أمريكا .. دولة عظمى وبتنادي بالحرية وبالديمقراطية ... وقت قامت بالحرب عالعراق وع افغانستان .. أخدت رأي شعبا شي ..
بحكم انو هاد مو قرار أشخاص ولا حكومات هي قضية نتائجها الايجابية والسلبية بتنعكس على الوطن كلو.
هالشغلة .. مسؤوول عنها القادة والحكام .. والوزراء .. وقبل ما يتخذ اي قرار .. بيكون صرلها الحكومة شهر عم تتناقش فيه .. وإذا كل مابدها الدولة تعمل شي .. بدها تعمل استفتاء .. معناتا على الدنيا السلام .. ومعناتا ما في ثقة بين الحكومة والشعب ..
دايما ببتخذ القرارات اللي بتكون لمصلحة الدولة .. وماتنسو انو القادة .. بلدنا بلدون .. وأكيد ما رح يعملو أي شي بيضرها ..
بأي حق بتحكم على رأي مواطن متلك متلو انو عم يتفلسف؟
أنا عم بحكي ع اللي بيعطي رأي وما بيكون مسؤوول عنو .. هادا بيكون عم يتفلسف .. مو عليك انتا .. بالعكس .. انا كتير بحترم موضوعك .. مثلا
LOSTMAN1 عطا رأيو بشكل همجي .. بدون ما يعطينا سبب .. بيبرر اللي قالو ..
وياريت يوضحلنا شو قصدو .. لأن الدولة مانا ملك لحدا .. الدولة للشعب كلو ..
وبتمنى يكون النقاش موضوعي ومايقعد يفتحلي نقاشات سخيفة قائمة عالإنتقاد بدون أسباب ..
وليش لحتى كل رأي بيخالفنا نعتبرو فلسفة؟؟
بالعكس .. انا ما قلت انو بيخالفني .. اناعم قول انو بعض الأعضاء .. بيفوتو بيشلحولن كم كلمة وبيطلعو .. اللي بدو
..يشارك بالموضوع .. يتفضل .. ويفرجينا شو عندو بكل وضوح ما يقعد يحكيلنا ألغاز

VivaSyria

22/08/2008, 19:37

لأ .. الإستفتاء بينعمل بعد القرار .. بكافة دول العالم .. خود مثال أمريكا .. دولة عظمى وبتنادي بالحرية وبالديمقراطية ... وقت قامت بالحرب عالعراق وع افغانستان .. أخدت رأي شعبا شي ..

ياعمي شو قصة أمريكا لسا كل كلمة أمريكا؟؟ بعدين فرق كبير بين يلي عم نحكي عليه وبين قصة الحرب الأمريكية.. يا عمي هون في قوات أجنبية فايته عالبلد.. مو نحنا بدنا نبعت قواتنا على غير بلد..
أما بالنسبة للاستفتاء فهو بكل الدنيا بيصير على شغلات أصغر من هيك... لك على قصة حلف اقتصادي بيصير استفتاء.. على قصة تجنيس بيصير استفتاء.. عل قصة ارسال 50 عسكري قوات طوارئ أو سحبون بيصير استفتاء..على أي قصة كبيرة بتهم الوطن بالدول يلي بتحترم حالا بيصير استفتاء...

هالشغلة .. مسؤوول عنها القادة والحكام .. والوزراء .. وقبل ما يتخذ اي قرار .. بيكون صرلها الحكومة شهر عم تتناقش فيه .. وإذا كل مابدها الدولة تعمل شي .. بدها تعمل استفتاء .. معناتا على الدنيا السلام .. ومعناتا ما في ثقة بين الحكومة والشعب ..
دايما ببتخذ القرارات اللي بتكون لمصلحة الدولة .. وماتنسو انو القادة .. بلدنا بلدون .. وأكيد ما رح يعملو أي شي بيضرها ..

لاء لاء لاء ياعمي... الله يرضى عليك شوية منطقية... لما بتكون انت منتخب هالوزراء وهالقيادة بيكون عندون السلطه انون ياخدو جزء من هالقرارت بدالك.. وحتى بهيك حالة مابيصير انو ياخدو قرار بهالحجم بدون رأي الشعب.. ياعمي هي لدنا كلنا مو بلد هالكم شخص وبيحقلون يتحكمو فيها متل مابدون.. بكل الأحوال هنن مانون ملائكة ولا أنبيا وما بدنا ننظر على بعض...

بالنسبة لموضوعنا رأيك بخترمو باعتبار أكيد انت شايف فيه مصلحة لبدك "من وجهة نظرك".

boy freind

22/08/2008, 19:46

اي يعمل جلسة لمجلس الشعب يشوف شو رأيون قبل ما يعمل شي بيكون احسن

انا محتار بس بظن افضل لأ

yass

22/08/2008, 21:47

هلأ اول شي .. القصة كلها .. ماحدا بهالمنتدى ولا بغير منتدى بيقدر يحكم عليها .. هيدي شغلة اهل السياسة .. تانيا .. أنا برأيي (وهادا رأيي والكل هون مابيقدرو يقدمو شي غير آراء فلا حدا يتفلسف ويقعد يعطي انتقادات لسياسة الدولة )

كفين كفين عالماشي معلم.. اسمع مني هدول عالم ما بيجو الا هيك :?

عفوا يعني... بس اذا شايف الشغلة فلسفة.. فببساطة لا تقرا و لا تتعب حالك.. بس لا تفوت هالفوتة و تقعد تقسّم من عندك مين يقدر و مين لأ.. و تقرر (متل ما مكتوب برد تاني تحت) مين عم يرد بشكل همجي و مين لأ... لأنو بهالحالة.. بدك تتحمّل تقييم ردك.. و ردك اللي فوق ناقصتو اللباقة كتير.. عدا عن انو عاطي لحالك حق لا تمتلكه..

بتمنى ما تتكرر هيك تعليقات.. ازا عندك رأي حطو و عالعين و الراس.. ما عندك فمالك بالعالم شو بتحكي.. أو بتتفلسف أو ما تتفلسف

و يا هلا

yass

22/08/2008, 21:56

طيب هون عندي سؤال:

حتى لو مادافعت عنا بس برأيك وجود هالقواعد العسكرية مارح يفرض نوع من التوازن الاستراتيجي بالمنطقه؟؟ طبعاً أنا ضد أي وجود أجنبي بالبلد بس بعالم كلو عم يتبع سياسة المحاور عدم انضمامك لمحور معين مو بيعملك لقمة سائغة بالمعادلة؟

لأ طبعا ما رح يأثر عالتوازن الاستراتيجي.. لأنو القواعد هاي مجرد عقد آجار لمساحة من الأرض فقط لا غير.. مانو معاهدة دفاع مشترك و لا حتى ممكن تقول عنها قاعدة حربية.. مجرد محطة مبيت للسفن بين مهمة و مهمة.. فقط لا غير..

و بخصوص الديون... يبدو الأخ ما فهم منيح شو عم اقصد كونو صار يتمسخر يعني.. أول شي بخصوص حكيو ع انو أمد ايدي.. و الله مو أنا اللي تدينت لحتى مد ايدي... و ثاني شي.. حيثيات الصفقة لا تحمل في طياتها انو يسامحونا بالديون.. وللا كان اعتبرتو مبرر منطقي.. مافي شي بالاتفاق غير انو يبيعونا شوية سلاح دفاعي فقط لا غير (بيع و ليس هدية .. كل شي بحقو)

علاقة روسيا كما علاقة الاتحاد السوفييتي السابق باسرائيل تتعرض للمد و الجزر حسب الحالات.. لكن يستحيل روسيا تسمح بتهديد أمن اسرائيل للحظة واحدة.. و لا تنسو انو الاتحاد السوفييتي (حبيب قلبنا .. )هو أول دولة اعترفت باسرائيل.. قبل أميركا حتى. لذلك الشغلة مانها بالبساطة اللي يحاول يصورها البعض.. روسيا بحياتها ما رح تكون النا متل ما اميركا لاسرائيل... لا بوجود قاعدة بحرية و لا بعدمها

مالي خايف

22/08/2008, 23:02

أنا الي بعرفو انو امتداد اللوبي الصهيوني بالساحة الروسية أقوى منو بالساحة الأميركية بما معناه تأثير اليهود على
روسيا أقوى من تأثيرون على أميركا بحكم انو في نسبة كبيرة من اليهود روس وبحكم انو في نسبة كبيرة من اليهود
بروسيا يعني أنا بذكر اني قريت مرة انو روسيا كانت من أكتر الدول الي ساعدت على تواجد اليهود بفلسطين نظرا لقوة اليهود بروسيا....
هلأ موضوع انو يكون في قواعد عسكرية للروس عنا بسوريا بظن انو هاد الموضوع ما لازم يصير, أنا بنظري هاد
الشي اسمو احتلال غير مباشر وبالمستقبل أي رد فعل عكسي بعلاقتنا مع روسيا حينقلب السحر عالساحر وشوي لقدام حنصير متلنا متل دول الخليج ما بنفرق عنهون شي الا انهون سابقينا بمراحل

THE_unforgiven

22/08/2008, 23:52

كفين كفين عالماشي معلم.. اسمع مني هدول عالم ما بيجو الا هيك
اول شي هالعبارة ما فهمت شو قصدك فيا ... شو قصدك بكلمة عالم ..يعني مثلا مثلا عم تقصد انو انا همجي .. !!
إذا كنت عم تفكر أو تبادر لذهنك .. ما تتعب حالك .. انا كتير لبق .. ولازم تكون لاحظت هالشي
..
عدا عن انو عاطي لحالك حق لا تمتلكه..
شو هالحق بالله ..!!
بتمنى ما تتكرر هيك تعليقات.. ازا عندك رأي حطو و عالعين و الراس.. ما عندك فمالك بالعالم شو بتحكي
هلأ انا اللي عم عللق ..ولا الأفندي لوست مان .. أنا كل شي كتبتو انو ياريت الواحد بس يفوت يحط رد .. يكتب شي منطقي وواقعي .. مو هبش حكي وكلام فاضي .. ويعطي آراء بعالم هني أكبر منو ..
أنا لا قصدتك ولا قصدت حدا بشكل مباشر .. عم احكي بشكل عام .. ياريت تنتبه على هالنقطة .. وأنا محترمك وبحترم رأي الكل .. بس
عفوا يعني... بس اذا شايف الشغلة فلسفة
الشغلة مو شوف وبس .. الشغلة حقيقة .. لأن اللي بيشلح حكي وبيمشي بيكون عم يتفلسف ..
هلأ خيي فيفا حط موضوع .. وتابعو .. هوي مانو عم يتفلسف .. اما بعض الإعضاء اللي بيشلحو ردود عالماشي مشان زيادة مشاركاتن .. هودي اللي بيتفلسفو ..
أنا ما قصدتك ياس أبدا بأي واحد من تعليقاتي .. وياريت مانحول الموضوع لمناقشة شي خارج الموضوع .. بس حبيت وضح وجهة نظر ..
وبتمنى ننتهي هون .. مع احترامي للكل ..

yass

23/08/2008, 00:01

اول شي هالعبارة ما فهمت شو قصدك فيا ... شو قصدك بكلمة عالم ..يعني مثلا مثلا عم تقصد انو انا همجي .. !!
إذا كنت عم تفكر أو تبادر لذهنك .. ما تتعب حالك .. انا كتير لبق .. ولازم تكون لاحظت هالشي
..مافي داعي تكبّر الخط... الحمد لله نظري منيح و ما بحتاج

و ما حكيت عن انك لبق أو عدم لبق.. عندي قدرة انو اعرف أفرق بين رد شخصية الكترونية و شخص عالواقع.. و لذلك انا حكيت عن ردك انو ما كان لبق.. و بعرف شو عم احكي...

..
شو هالحق بالله ..!!
اانك تقرر مين خرج يحكي و مين لأ.. مين عم يتفلسف و مين لأ.. هاد حق لا تمتلكه لا انت و لا غيرك..

هلأ انا اللي عم عللق ..ولا الأفندي لوست مان .. أنا كل شي كتبتو انو ياريت الواحد بس يفوت يحط رد .. يكتب شي منطقي وواقعي .. مو هبش حكي وكلام فاضي .. ويعطي آراء بعالم هني أكبر منو ..
أنا لا قصدتك ولا قصدت حدا بشكل مباشر .. عم احكي بشكل عام .. ياريت تنتبه على هالنقطة .. وأنا محترمك وبحترم رأي الكل .. بس يا سلام!! هبش و حكي فاضي! و مين حضرتك لتحكي عن حكي الناس انو هبش و حكي فاضي؟ و ليش مقياسك هو الصح لحتى تتأمر عالعالم؟ يجوز عند غير ناس حكيك هو الهبش و الحكي فاضي..

و يحكي عن ناس أكبر منو؟؟ يا عين..

الشغلة مو شوف وبس .. الشغلة حقيقة .. لأن اللي بيشلح حكي وبيمشي بيكون عم يتفلسف ..
هلأ خيي فيفا حط موضوع .. وتابعو .. هوي مانو عم يتفلسف .. اما بعض الإعضاء اللي بيشلحو ردود عالماشي مشان زيادة مشاركاتن .. هودي اللي بيتفلسفو ..
أنا ما قصدتك ياس أبدا بأي واحد من تعليقاتي .. وياريت مانحول الموضوع لمناقشة شي خارج الموضوع .. بس حبيت وضح وجهة نظر ..
وبتمنى ننتهي هون .. مع احترامي للكل ..

الشغلة مو شغلة تقصدني أو لأ.. ذاتا بصراحة يعني.. مشان ما اكذب عليك.. ما بيهمني كتير ان قصدتني أو لأ..

أنا مسؤول عن هالقسم, و ما بسمح يستخف برأي عضو مين من كان هالعضو ليكون.. و حضرتك يبدو ما عم تمسك هالنقطة منيح .. لأنو ما اول مرة نفوت بسجال حول هالأمر اذا ماني غلطان.. مافي داعي تكون قاصدني لحتى أتدخل أو لأ... مالك شغل عند اللي بيحكي شو ما بيحكي.. و ما بيصير تقرر شو قيمة حكي أي عضو بهالمنتدى مين من كان ليكون

قلت سلفا انو احكي رأيك و عالعين و الراس.. و رأيك بالعالم و ردودها و حقها بالكلام من عدمو مو من حقك تقيمو.. و مو من حقك تقرر انت شو هو الحكي اللي حكي فاضي و للا مليان, و شو فلسفة من عدمها, و مو من حقك تقرر احجام الناس.. خليك برأيك و حاور برأيك و لا تستخف بالعالم.. مين من كان ليكون..

يا ريت تكون المرة الأخيرة اللي نضطر نفتح فيها هالسيرة...

و نرجع للموضوع

yass

23/08/2008, 00:25

تصريحات الرئيس الروسي من الجزيرة نت:

"نحن مستعدون لبيع أسلحة دفاعية فقط لا تخل بتوازن القوى في المنطقة"

دخيل حليفنا انا!!! ازا هاد حليفنا لشو بدنا اعداء؟؟

قصدو طبعا بتوازن القوى انو نبقى متل ما نحنا... انو اسرائيل تظل قادرة انو تتغدانا امتى ما بدها.. هاد التوازن اللي بدها ياه روسيا حبيبتنا..

لو بدهون توازن بمعنى تعادل.. كان باعونا نووي متل ما اميركا بتعطي لاسرائيل ببلاش

VivaSyria

23/08/2008, 00:28

خلينا نرجع عالموضوع بعد ماوصلتك الفكرة:

لأأن اسرائيل صار بدها تحسب مية حساب قبل ما تفكر تقرب بطياراتها ع شمال لبنان وع جهات تركيا .. لأن أي هجوم عمنطقة قريبة من الأسطول الروسي .. يعتبر مهاجمة لروسيا .. والباقي انتو بتعرفوه .. يعني الزبدة .. الأسطول مصدر دفاع غير مباشر لسوريا .. نحنا ماعم نقول انو رح يقوم بالهجوم عاسرائيل .. بس من جهة تانية هوي عامل ردع ..

فسرلي بس شو يعني عامل ردع بوجهة نظرك؟؟ على اعتبار انو اسرائيل من 35 سنة ماشنت أي حرب واسعه على سوريا "بغياب عوامل الردع يلي من هالنوع" .. معناها بتقصد انو رح يكون عامل ردع للعمليات الصغيرة يلي بتنفذها اسرائيل بإرضنا ونحنا نايمين؟؟؟ متل ضرب عين الصاحب وضرب البناء العسكري يلي بالمنطقه الشرقيه؟؟ مافهمت شلون بنظرك بدها تدخل روسيا بأي عمل عسكري من هالنوع؟

ولا برأيك انو تواجد الأسطول بطرطوس فائدته الوحيدة انو رح يمنع الطيران الإسرائيلي من المرور بأجواء طرطوس؟؟

THE_unforgiven

23/08/2008, 00:32

yass

23/08/2008, 00:35

هلأ إذا بدنا ندخل بقصة النووي .. معناتا صار حكي تاني .. متل ما بتعرف في اتفاقيات دولية .. وهيدي بين الدول الكبرى .. وبتضمن الاستقرار العالمي .. ف مافي حدا يخل فيا .. وخاصة أذا كانت واضعتها دول كبرى .. فهي شغلات صعب ندخل فيها بسبب عدم اتضاح تفاصيلها .. بس الواضح انو في اتفاقية روسية - أمريكية .. والظاهر انو بلشت تتداعى بعد حرب جورجيا .. ومسألة انو تبيعنا نووي ..وراها كتير شغلات إذا بدنا نحكي فيها .. ما منخلص لبكرا ..

لأ لأ ما قصدي تبيعنا نووي (كنت بعتقد انو موضح كلامي أكتر من هيك.. مو مشكلة)

قصدي انو روسيا بعز زعلها من اميركا عم تحط معنا خط أحمر.. انو أسلحة دفاعية فقط "مشان التوازن" .. طيب شو هالتوازن؟ ازا بدك تعادل قوى فاسرائيل عندا اسلحة هجومية.. يا أما اكبس على أميركا متل ما اميركا كابسة عليك لحتى ما تبيع أسلحة هجومية.. يا أما لا تعمل حليف استراتيجي و شغلة كبيرة..

قصدي بالحكي عن النووي انو اسرائيل عندا نووي.. و من سنين طويلة.. و وروسيا بدها تبيعنا بس أسلحة دفاعية "مشان التوازن".. فواضح انو التوازن اللي بدهون ياه هوي انو اسرائيل تكون أقوى..

THE_unforgiven

23/08/2008, 00:43

:
فسرلي بس شو يعني عامل ردع بوجهة نظرك؟؟
أول شي .. لومانو عامل ردع .. ومو بالضروري من جهة سوريا-اسرائيل .. شو بدو يكون هدفو .. يعني مانا متضرة روسيا تدفع ملايين مشان تمشي اسطول بالبحر .. بس مشان عرض العضلات .. إذا مانو عامل ردع لاسرائيل .. هوي عامل ردع لأمريكا .. وفكر فيا شوي .. ليش روسيا نقت سوريا مشان تحط الأسطول ..يعني في كتير دول ممكن تكون مقر للأسطول الروسي .. إلا لأسباب استراتيجية .. بتتعلق بالتوازنات بالمنطقة .. وأكيد رح تأثر عأسلوب التعامل مع سوريا بالفترة القادمة ...
ولا برأيك انو تواجد الأسطول بطرطوس فائدته الوحيدة انو رح يمنع الطيران الإسرائيلي من المرور بأجواء طرطوس؟؟
اسرائيل بدون اسطول روسي .. ما بتقدر تقرب عالساحل السوري .. كيف بأسطول بحري .. يعني انحذفت الفكرة نهائيا من عقل الإسرائيليين .. إلا إذا بيحبو يعيدو هزيمة تموز ..

yass

23/08/2008, 00:47

يعني في كتير دول ممكن تكون مقر للأسطول الروسي

مثل؟

سوريا هي الدولة الوحيدة بشرق المتوسط اللي مانها حليفة اميركا و ما فيها تواجد أميركي.. و قواعدها عالبحر الأسود ما بتكفيها بعد انتهاء العقد مع أوكرانيا.. مالها غير سوريا

اسرائيل بدون اسطول روسي .. ما بتقدر تقرب عالساحل السوري .. كيف بأسطول بحري .. يعني انحذفت الفكرة نهائيا من عقل الإسرائيليين

يا زلمة لسى من سنتين فاتو لفوق القصر الرئاسي بصلنفا و حامو فوقو شي عشرين دقيقة رايحيني جايين.. و من أقل من سنة وصلو لدير الزور و رجعوا...

شوية واقعية الله يخليك!

THE_unforgiven

23/08/2008, 00:49

قصدي بالحكي عن النووي انو اسرائيل عندا نووي.. و من سنين طويلة.. و وروسيا بدها تبيعنا بس أسلحة دفاعية "مشان التوازن".. فواضح انو التوازن اللي بدهون ياه هوي انو اسرائيل تكون أقوى..

طيب .. كيف بدو يتحقق هالتوازن .. ما بيتحقق إلا بالنووي ... وطبعا النووي .. ما رح يشكل فرق بالنسبة للجبهة السورية - الإسرائيلية .. لأن ما إلنا مصلحة انو نضرب اسرائيل بنووي .. وما حدا إلو مصلحة .. لأان بتروح فلسطين وكل شي حواليها ..

وغير هيك .. في اتفاقية حظر انتشار أسلحة نووية .. نحنا موقعينا .. وروسيا موقعيتا .. ف .. هي النقطة الحرجة ..

THE_unforgiven

23/08/2008, 00:54

يا زلمة لسى من سنتين فاتو لفوق القصر الرئاسي بصلنفا و حامو فوقو شي عشرين دقيقة رايحيني جايين.. و من أقل من سنة وصلو لدير الزور و رجعوا...

شوية واقعية الله يخليك!

هلأ إذا ما ضربناها بوقتها .. مو معناتا ما منقدر نضرب الطيران .. الله يوفقك .. فكر فيا شوي ..
كل شي بوقتو منيح ... هيي اسرائيل كل فترة بتعمل جولة بالطيران .. لحتى تكتشف شو في عند العدو أسلحة .. ومشان تحثو انو يستخدما .. وبالتالي تطور قدرتها على التخلص من هالدفاعات ..
اتذكر ايام حزب الله .. شو كانت تعمل .. ولساتا .. كل فترة بتبعت طائرة استطلاع .. لتشوف مدى تطور الأسلحة عند حزب الله ..

yass

23/08/2008, 00:54

طيب .. كيف بدو يتحقق هالتوازن .. ما بيتحقق إلا بالنووي ... وطبعا النووي .. ما رح يشكل فرق بالنسبة للجبهة السورية - الإسرائيلية .. لأن ما إلنا مصلحة انو نضرب اسرائيل بنووي .. وما حدا إلو مصلحة .. لأان بتروح فلسطين وكل شي حواليها ..

وغير هيك .. في اتفاقية حظر انتشار أسلحة نووية .. نحنا موقعينا .. وروسيا موقعيتا .. ف .. هي النقطة الحرجة ..

عليك نووووووووور!!!

طيب لا تبيعنا نووي (يا زلمة عم احكي عن التوازن ما عم احكي عن النووي بحد ذاتو أنا!) ليش ما تعمل متل أميركا بخصوص تطبيق اتفاقية الحظر؟

أميركا بتطبّق اتفاقية الحظر على كيفها.. طيب عمرك سمعت مسؤول روسي عم يطالب بتفتيش المنشآت النووية الاسرائيلية؟؟ لا سمعت و لا رح تسمع.. و شو رأيك ازا حكيتلك انو في تعاون نووي روسي -اسرائيلي (علني.. ماننا بصدد السرية.. اتفاقيات علنية) على أعلى المتسويات.. يعني بتساعد اسرائيل بنشاطها النووي لكن نحنا بتبيعنا أسلحة دفاعية "مشان التوازن.... ملا مسخرة

VivaSyria

23/08/2008, 00:59

بس في هالنقطه لفتتلي نظري بالنقاش:

أنا الي بعرفو انو امتداد اللوبي الصهيوني بالساحة الروسية أقوى منو بالساحة الأميركية بما معناه تأثير اليهود على
روسيا أقوى من تأثيرون على أميركا بحكم انو في نسبة كبيرة من اليهود روس وبحكم انو في نسبة كبيرة من اليهود
بروسيا يعني أنا بذكر اني قريت مرة انو روسيا كانت من أكتر الدول الي ساعدت على تواجد اليهود بفلسطين نظرا لقوة اليهود بروسيا....

خليني وضحلك هالكذبة يلي متل العادة العرب أكتر ناس صدقوها:

الكنيسة في روسيا وبعد أفعال ستالين طلعو قصة لتشويه سمعة الشيوعين وكانت أن من أصل كل 10 شيوعين في روسيا هناك 9 يهود وواحد مشكوك في أصلو... وطبعاً العرب كالعادة أي كذبة بتنكذب فوراً بيصدقوها وتحديداً هالمره على اعتبار انو هالكذبة بتخدم مصلحتون بتشويه سمعة الشيوعية...

وفيما بعد الاشاعة اللي طلعت انو اليهود مؤثرين على الحكومة الروسية و على الحزب الشيوعي .. و تحولت فيما بعد ان روسيا تدعم اسرائيل بسبب هجرة اليهود الروس اليها... عمي العرب دايماً بيصدقو كل شي بيسمعوه..

هون بدي اطلع عن الموضوع بكلمتين وقلك شغلة صغيرة عن دعم السوفييت لاسرائيل بأول نشإتها :

اسرائيل عند قيامها كانت على اساس مجتمع اشتراكي .. و كان الاحزاب اليسارية قوية فيها.. فالإتحاد السوفيتي بهداك الوقت كان داعم لهيك تحركات.. بس بعد فترة صغيرة ولما توضحت طبيعة كيان اسرائيل رفع هالدعم هاد وتحول لدعم للعرب بشكل عام ولعبد الناصر بشكل خاص...

ويكون بعلمك انو روسيا اليوم هي خارج أي نفوذ شيوعي من الأصل فكيف بدها تكون تحت تأثير لوبي يهودي اذا جاريتك بقصة الشيوعية؟

yass

23/08/2008, 00:59

هلأ إذا ما ضربناها بوقتها .. مو معناتا ما منقدر نضرب الطيران .. الله يوفقك .. فكر فيا شوي ..
كل شي بوقتو منيح ... هيي اسرائيل كل فترة بتعمل جولة بالطيران .. لحتى تكتشف شو في عند العدو أسلحة .. ومشان تحثو انو يستخدما .. وبالتالي تطور قدرتها على التخلص من هالدفاعات ..
اتذكر ايام حزب الله .. شو كانت تعمل .. ولساتا .. كل فترة بتبعت طائرة استطلاع .. لتشوف مدى تطور الأسلحة عند حزب الله ..

هلأ معليه ... هاد حكي برأيك منطقي؟؟ هاد اسمو تبرير واهي مع احترامي الك.. بيحكوه للولاد الصغار..

اسرائيل مانها بحاجة تبعت طيران لتشوف شو عنا دفاعات.... لاحظ انو كل صفقات الأسلحة تبيعتنا يتم الاعلان عنها من قبل روسيا و بكل تفاصيلها.. و كل ما يروح مسؤول سوري ع روسيا بتلاقي انو بعد اسبوع في وفد اسرائيلي راح ع روسيا ليشوف شو صار هنيك.. اسرائيل الله وكيلك عندا حتى نمر سيارات المرسيدس تبعيت الجيش.. مانها بحاجة تخاطر بطيارة حقها 400 مليون دولار مشان تستطلع شو في دفاعات.. عندا قمرين صناعيات بيقرو عناوين الجرايد من عند أبو بسطة الجرايد اللي جنب قهوة الهافانا

يكون افضل لألي انو ينقاللي انو و الله الأف 16 ما عنا سلاح يقدر يصيبها.. ساعتها بنقول امرنا لألله شو بدنا نساوي.. لكن انو نكون قادرين نضرب.. و ما نضرب طائرات معادية تخترق سيادة أراضينا؟ فو الله هاد عذر أقبح من ذنب...

و حزب الله لعلمك ما أسقط طائرات حربية

THE_unforgiven

23/08/2008, 01:02

yass

23/08/2008, 01:04

بس في هالنقطه لفتتلي نظري بالنقاش:

خليني وضحلك هالكذبة يلي متل العادة العرب أكتر ناس صدقوها:

الكنيسة في روسيا وبعد أفعال ستالين طلعو قصة لتشويه سمعة الشيوعين وكانت أن من أصل كل 10 شيوعين في روسيا هناك 9 يهود وواحد مشكوك في أصلو... وطبعاً العرب كالعادة أي كذبة بتنكذب فوراً بيصدقوها وتحديداً هالمره على اعتبار انو هالكذبة بتخدم مصلحتون بتشويه سمعة الشيوعية...

وفيما بعد الاشاعة اللي طلعت انو اليهود مؤثرين على الحكومة الروسية و على الحزب الشيوعي .. و تحولت فيما بعد ان روسيا تدعم اسرائيل بسبب هجرة اليهود الروس اليها... عمي العرب دايماً بيصدقو كل شي بيسمعوه..

هون بدي اطلع عن الموضوع بكلمتين وقلك شغلة صغيرة عن دعم السوفييت لاسرائيل بأول نشإتها :

اسرائيل عند قيامها كانت على اساس مجتمع اشتراكي .. و كان الاحزاب اليسارية قوية فيها.. فالإتحاد السوفيتي بهداك الوقت كان داعم لهيك تحركات.. بس بعد فترة صغيرة ولما توضحت طبيعة كيان اسرائيل رفع هالدعم هاد وتحول لدعم للعرب بشكل عام ولعبد الناصر بشكل خاص...

ويكون بعلمك انو روسيا اليوم هي خارج أي نفوذ شيوعي من الأصل فكيف بدها تكون تحت تأثير لوبي يهودي اذا جاريتك بقصة الشيوعية؟

هو معك حق.. العرب أخدو من النظرية ما يلائمهم.. لكن علاقة الاتحاد السوفييتي بالوكالة اليهودية غني عن التعريف..

بن غوريون كان متأثر جدا بالنظريات الشيوعية, و ازا بتلاحظ انو نظام الكيبوتزيم (تبع المزارع التعاونية) هو تمثيل اسرائيلي للكومونات الشيوعية .. و هاي مانها نظرية مؤامرة انما واقع .. في عشرين سنة من تاريخ المنظمات الصهيونية, بالتحديد بين 1930-1950 كان في تأثر شديد بالشيوعية السوفيتية و علاقة شديدة المتانة.. و ليس عبث انو الاتحاد السوفيتي اول من اعترف باسرائيل... هاد تاريخ موثق..

طبعا العربان, خصوصا شلة الله وكيلك... أخدو نظرية المؤامرة... تبعيت اليهود

VivaSyria

23/08/2008, 01:05

بس هون في نقطه بدي ذكركون فيها:

فلاديمير بوتين كان من المقرر بعد بكرا يكون بزيارة لتل أبيب وأحد اهم البنود على جدول هي الزيارة اتفاقية تطوير أسلحة مشتركة بين تل أبيب وموسكو...
طبعاً الزيارة تأجلت بحكم موقف اسرائيل من يلي عم يصير بجورجيا.

yass

23/08/2008, 01:08

شو بدك تعمل أخي ياس .. هي الواقع ونحنا ضمن الواقع .. ومجبورين .. يعني .. شو منوقف ضد العالم كلو ومنقلو نحنا ضد اسرائيل وروسيا وأمريكا .. وسوريا الله حاميها .. في شي اسمو استرتيجية .. كمان ما فيك تقعد تقللا لروسيا .. والله انتي مع اسرائيل ونحنا بدنا نحاربك .. سورية دولة لا تقارن بالنسبة لأمريكا وروسيا بكافة النواحي الأقتصادية والعسكرية .. الخ .. ف في شي اسمو سياسترتيجي .. وتوازن قوى .. مامنقدر نتدخل فيه . إلا إذا كنا من هالقوى .. ونحنا ماننا هيك .. ف ماباليد حيلة ..

لأ طبعا ما فينا نحارب... ما فينا نحارب حتى دبان وشنا.. القصد من كل هالحكي انو الرهان على روسيا كحليف وثيق هو رهان خاطئ.. روسيا وقت الصحيح ما تشترينا بفرنك... متل ما عملت بزماناتها

متل اللي عندو كلاشينكوف بس ما عندو ذخيرة.. معك أنا.. روسيا شغلة كبيرة .. لكن شغلة كبيرة مش نافعة لألنا... ليش لنربط حالنا فيها و تصير الاستخبارات الروسية بأراضينا بشكل شرعي اذا وقت الصحيح ما رح نستفاد منهون شي..

بأيام عز علاقتنا مع الاتحاد السوفيتي.. بالستينات, لما النكسة.. طارو أراضي كوم من حلفائها (سوريا و مصر) و غلبت حليفة أميركا الحرب و الاتحاد السوفيتي ما ضغط بفرنك... بس يجعجع من بعيد.. بينما لما بحرب تشرين اسرائيل انكبست للحظات.. أميركا فورا فتحت جسر جوي مباشر و صار العتاد يوصل حتى بدون ما يشيلو العلم الأميركي من الطيارات...

هاد تاريخ.. و التاريخ موجود لنتعلم منو.. مو لنكرر أخطائنا.. الاتحاد السوفيتي استغلنا كسوق تصريف و كسوق عمل للخبراء الروس اللي كان واحدهون يقبض قد 50 موظف سوري, و شحاطة اللصطيك تبعيت أي موظف سوري تفهم أكتر منو.. و ما باعونا غير أوهام.. بحياتهون ما باعونا سلاح ابن سنتو .. و لا باعونا عتاد متل الخلق..

yass

23/08/2008, 01:09

VivaSyria

23/08/2008, 01:16

هو معك حق.. العرب أخدو من النظرية ما يلائمهم.. لكن علاقة الاتحاد السوفييتي بالوكالة اليهودية غني عن التعريف..

بن غوريون كان متأثر جدا بالنظريات الشيوعية, و ازا بتلاحظ انو نظام الكيبوتزيم (تبع المزارع التعاونية) هو تمثيل اسرائيلي للكومونات الشيوعية .. و هاي مانها نظرية مؤامرة انما واقع .. في عشرين سنة من تاريخ المنظمات الصهيونية, بالتحديد بين 1930-1950 كان في تأثر شديد بالشيوعية السوفيتية و علاقة شديدة المتانة.. و ليس عبث انو الاتحاد السوفيتي اول من اعترف باسرائيل... هاد تاريخ موثق..

طبعا العربان, خصوصا شلة الله وكيلك... أخدو نظرية المؤامرة... تبعيت اليهود

حكيك صحيح تماماً بس كمان وقت بدنا نرجع للتاريخ بدنا تنذكر من وين تسليح كل الجيوش العربية؟؟ مين يلي دعم عبد الناصر وحافظ الأسد وحتى صدام حسين بحروبون مع اسرائيل وبالعدوان الثلاثي وبحرب تشرين وبحرب لبنان؟؟
ما بدنا ننسى انو جيوشنا بلا السلاح الروسي كانت حاربيت بالنقيفات... ولولا الغطاء السوفيتي بهجاك الوقت يلي شمل الدعم بالحافل الدولية وشمل الدعم السياسي كنا أكلين هوا أكتر مو نحنا هلئ...

ومشان اعتراف موسكو بإسرائيل بهداك الوقت صحيح انو كان في علاقة متينه بس بدنا ما ننسى انو لسا كانت التحالفات الدولية والمحاور الاقليمية لسا مانا واضحة...

بس متل ما قلت العربان كلو عندون بطاطا..

yass

23/08/2008, 01:22

حكيك صحيح تماماً بس كمان وقت بدنا نرجع للتاريخ بدنا تنذكر من وين تسليح كل الجيوش العربية؟؟ مين يلي دعم عبد الناصر وحافظ الأسد وحتى صدام حسين بحروبون مع اسرائيل وبالعدوان الثلاثي وبحرب تشرين وبحرب لبنان؟؟
ما بدنا ننسى انو جيوشنا بلا السلاح الروسي كانت حاربيت بالنقيفات... ولولا الغطاء السوفيتي بهجاك الوقت يلي شمل الدعم بالحافل الدولية وشمل الدعم السياسي كنا أكلين هوا أكتر مو نحنا هلئ...

ومشان اعتراف موسكو بإسرائيل بهداك الوقت صحيح انو كان في علاقة متينه بس بدنا ما ننسى انو لسا كانت التحالفات الدولية والمحاور الاقليمية لسا مانا واضحة...

بس متل ما قلت العربان كلو عندون بطاطا..

يا أخي باعونا سلاح.. ما بقلك لأ.. لاحظ باعونا, كل شي بحقو يعني..

بحياتهون ما باعونا سلاح ابن سنتو.. و دائما كان الاتفاق الضمني على انو اسرائيل لازم تكون متفوقة (بصراحة ما كانو يثقو فينا.. يخافو يبيعونا سلاحهون الجديد لأنو بيعرفو انو من صار بايدنا فأميركا راح يوصلها مسطرة من هالسلاح تدرسو و تطالع مضاد, فكانو يبيعونا الستوك يا اما اللي عرفانين انو اميركا عارفتو و عندا مضادو)

و ما فضّلو علينا بفرنك.. مع كل دبابة بدك تشتري قطع غيار, و تجيب مكنسيان روسي معا لأنو ما بيعلمو اللي خلفهون كيف تتصلح.. فهنن عم يبتزوك يا معلم... لأنو فوق حق الدبابة عم يشغلو واحد روسي عاطل عن العمل عندك..

ما كان الاتحاد السوفيتي رح يسمح انو يغلبو العرب.. كان في اتفاق ضمني مع أميركا انو نحافظ على الهدوء النسبي.. بس فيما لو.. الغلبة لاسرائيل.. و هلأ ما اختلف الوضع أبدا

ayhamm26

23/08/2008, 01:30

يا أخي باعونا سلاح.. ما بقلك لأ.. لاحظ باعونا, كل شي بحقو يعني..

بحياتهون ما باعونا سلاح ابن سنتو.. و دائما كان الاتفاق الضمني على انو اسرائيل لازم تكون متفوقة (بصراحة ما كانو يثقو فينا.. يخافو يبيعونا سلاحهون الجديد لأنو بيعرفو انو من صار بايدنا فأميركا راح يوصلها مسطرة من هالسلاح تدرسو و تطالع مضاد, فكانو يبيعونا الستوك يا اما اللي عرفانين انو اميركا عارفتو و عندا مضادو)

و ما فضّلو علينا بفرنك.. مع كل دبابة بدك تشتري قطع غيار, و تجيب مكنسيان روسي معا لأنو ما بيعلمو اللي خلفهون كيف تتصلح.. فهنن عم يبتزوك يا معلم... لأنو فوق حق الدبابة عم يشغلو واحد روسي عاطل عن العمل عندك..

ما كان الاتحاد السوفيتي رح يسمح انو يغلبو العرب.. كان في اتفاق ضمني مع أميركا انو نحافظ على الهدوء النسبي.. بس فيما لو.. الغلبة لاسرائيل.. و هلأ ما اختلف الوضع أبدا

كلام صحيح تماما, الاتحاد السوفييتي كان دايما حريص انو يبقوا العرب هني الطرف الضعيف واسرائيل دائما غالبتن وبنفس الوقت كان من مصلحتو الابقاء على انظمة متل النظام السوري ونظام عبد الناصر ضعيفة لكن موجودة

يعني متل الوضع الحالي اللي عاملتو امريكا, انظمة ضعيفة متهاوية لكن ممنوع تنهار الا اذا اقتضت مصالحن العليا

اللي عم يصير هلق هو ايقاظ وهم قديم وهو وهم الدعم السوفييتي المضاد للدعم الامريكي لاسرائيل
وهو هلق اكتر من وهم لانو روسيا الحالية اضعف بكتير من انها تدخل بمواجهة طويلة الامد مع الغرب , كل اللي عم يصير هلق هو ازمة عابرة رح تلاقي طريقها للحل متل كتير ازمات بمجرد تتغير الادارة الامريكية ورح يرجعوا كلن حبايب والخاسر طبعا هني العرب متل العادة

ا

VivaSyria

23/08/2008, 01:36

يا أخي باعونا سلاح.. ما بقلك لأ.. لاحظ باعونا, كل شي بحقو يعني..

بحياتهون ما باعونا سلاح ابن سنتو.. و دائما كان الاتفاق الضمني على انو اسرائيل لازم تكون متفوقة (بصراحة ما كانو يثقو فينا.. يخافو يبيعونا سلاحهون الجديد لأنو بيعرفو انو من صار بايدنا فأميركا راح يوصلها مسطرة من هالسلاح تدرسو و تطالع مضاد, فكانو يبيعونا الستوك يا اما اللي عرفانين انو اميركا عارفتو و عندا مضادو)

و ما فضّلو علينا بفرنك.. مع كل دبابة بدك تشتري قطع غيار, و تجيب مكنسيان روسي معا لأنو ما بيعلمو اللي خلفهون كيف تتصلح.. فهنن عم يبتزوك يا معلم... لأنو فوق حق الدبابة عم يشغلو واحد روسي عاطل عن العمل عندك..

ما كان الاتحاد السوفيتي رح يسمح انو يغلبو العرب.. كان في اتفاق ضمني مع أميركا انو نحافظ على الهدوء النسبي.. بس فيما لو.. الغلبة لاسرائيل.. و هلأ ما اختلف الوضع أبدا

يا أخي والله حكيك صح بس السوفييت دعموا العرب وبقوة رح أعطيك مثال دبابة الـ T72 كانت أقوى دبابة بالعالم وأول ناس عطوهن ياها الروس كانو العرب.. هلئ ليش وكيف أنا بقلك انو اكيد القصة كانت قصة مصالح وتوازنات.. بس بيكفي انو نحنا كنا جزء من توان الإتحاد السوفيتي مع أميركا.. اما نحنا اليوم وين؟؟

شيلك عن الدعم العسكري.. فينا ننكر دعمون بالمحافل الدولية للعرب وقضاياهون؟؟ فينا ننكر قرارات الأمم المتحده يلي بلا السوفييت كنا بعمرنا ما شفناها؟؟ فينا ننكر انو كان الاتحاد السوفيتي خالق حالة من الدعم لقضايانا بوجه أميركا وإسرائيل؟؟ طبعاً أكيد هالشي مو لسواد عيوننا.. هيك مصلحتون كانت.. ومصلحتون تلاقت بمصالحنا ومشاكلنا...

ومشان كون واضح أنا ضد التواجد العسكري الروسي بسوريا.. وصوتت بهالشي أول ماطرحت الموضوع.. وبعتبرو انتقاص من السيادة الوطنية وما بيخدم أي هدف وطني.. إلا لعبة جديدة من النظام لكسب لاعب مهم كروسيا لصالحو لضمان استقرار الحكم..

yass

23/08/2008, 01:42

يا أخي والله حكيك صح بس السوفييت دعموا العرب وبقوة رح أعطيك مثال دبابة الـ T72 كانت أقوى دبابة بالعالم وأول ناس عطوهن ياها الروس كانو العرب.. هلئ ليش وكيف أنا بقلك انو اكيد القصة كانت قصة مصالح وتوازنات.. بس بيكفي انو نحنا كنا جزء من توان الإتحاد السوفيتي مع أميركا.. اما نحنا اليوم وين؟؟

شيلك عن الدعم العسكري.. فينا ننكر دعمون بالمحافل الدولية للعرب وقضاياهون؟؟ فينا ننكر قرارات الأمم المتحده يلي بلا السوفييت كنا بعمرنا ما شفناها؟؟ فينا ننكر انو كان الاتحاد السوفيتي خالق حالة من الدعم لقضايانا بوجه أميركا وإسرائيل؟؟ طبعاً أكيد هالشي مو لسواد عيوننا.. هيك مصلحتون كانت.. ومصلحتون تلاقت بمصالحنا ومشاكلنا...

ومشان كون واضح أنا ضد التواجد العسكري الروسي بسوريا.. وصوتت بهالشي أول ماطرحت الموضوع.. وبعتبرو انتقاص من السيادة الوطنية وما بيخدم أي هدف وطني.. إلا لعبة جديدة من النظام لكسب لاعب مهم كروسيا لصالحو لضمان استقرار الحكم..

هيه...

معليم الأخ أيهم حكى كلمة بعتقد تلخص كل الكلام "بدهون يانا ضعيفين بس موجودين".. لذلك يعطيك دبابة منيحة كل عشرين سنة.. يجعجع باسمك شوي بمجلس الأمن (سلملي ع مجلس الأمن.. في قرارات من تلاتين سنة ما تنفذت و لساتها موجودة) لأنو لازم يكون في حروب و مشاكل.. تجارة السلاح أكبر تجارة بالعالم من حيث كمية المال اللي تحركو.. و بالتالي لازم يكون في حروب لحتى السلاح يتصرّف

ما عم قول نطرد السفير الروسي و نتفل عليه و هو طالع عالمطار.. لأ.. هنن بيبيعو و نحن منشتري.. أوكي.. بس لازم نعرف شو نحنا بالنسبة الهون و شو هنن بالنسبة النا.. و نكون واقعيين و ما نبني قصور من رمال تتهاوى عند أدنى نسمة ريح, و نفكر حالنا عنا حليف و نحنا ما عنا غير تاجر بدو يصّرف بضاعتو

suryoyo

23/08/2008, 01:46

صار الموضوع محتاج موضوع منفصل .. عن علاقة العرب بالسوفيت تحديدا

ذكرتوني بمقال في احدى الصحف ... عن مؤتمر لدول عدم الانحياز

احتدم النقاش بين عرب موسكو و عرب واشنطن !

.. لا موسكو كانت تدعم العرب ببلاش ... و لا واشنطن تدعم العرب ببلاش ...

بس الحق يقال ... الاتحاد السوفيتي ساند العرب ضد اسرائيل في حروب 67 و 73 ... بس العرب ما حاربوا لاسباب معينة !

و مثل ما الاميركان ما باعوا السلاح مجانا للخليج .. الروس ما باعوا السلاح للعرب مجانا ..

و دبابات T72 الروسية كانت ما تضاهيها اي دبابة في العالم ...

مالي خايف

23/08/2008, 01:52

بس في هالنقطه لفتتلي نظري بالنقاش:

خليني وضحلك هالكذبة يلي متل العادة العرب أكتر ناس صدقوها:

هلأ انا بالنسبة للحكي يلي عم احكي مالي جايبو من أي مصدر عربي بالعكس كلها مصادر أجنبية هاد أول باشتان

تاني باشتان لو بدنا نحكي شوي عن تجميع اليهود بفلسطين فنحنا ما عم نحكي عن قرار اتخزوا كم دولة يعني خلينا نكون واضحين أكتر
في وثائقي أميركي هلأ بهاللحظة هي عم اتفرج عليه عم يحكي عن شي اسمو الماسونية أكيد هالحركة معروفة للجميع
لنرجع لقصة اليهود والروس وشو علاقة الماسونية بالموضوع ياسيدي العزيز موضوع وضع اليهود بفلسطين والقرار هاد ماتم بيوم وليلة وهالقرار هاد تم من هالمجموعة هي يلي تدعى الماسونية ولما هالمجموعة هي تاخد قرار بيكون بناء على دراسة جدا عميقة للأبعاد تبع هالقرار وكيف رح تكون ردة الفعل من قبل الناس التانية وشو بدو يكون ردنا على ردة هالفعل هي هلأ هالجماعة هي بتفرض رأيها عالحكومات وبتفرض على كل حكومة شلون بدها تنفذ هالموضوع هاد يعني لما نحكي انو روسيا داعمة اسرائيل فأنا ماعم احكي عن الفترة الي كان فيها عبد الناصر وحافظ الأسد عم احكي عن فترة قبل بدءا من اتخاذ قرار نقل اليهود على فلسطين ولحد هاللحظة هي سياسات الدول كلها بالوقت الحاضر ومن 80 أو تسعين سنة لورا كلها مسيسة من قبل هالجماعة هي

مالي خايف

23/08/2008, 01:52

VivaSyria

23/08/2008, 01:53

ياس وأيهم يا شباب أنا والله ماعم قول عنون حلفاء ولا عم قول انو الجماعة حاملين قضايانا الوطنية وراكضين فيها وماعم قول انو تواجدون بسوريا مفيد لإلنا.. بالعكس أنا يلي عم قولو انو الجماعه مابيهمن غير مصالحون وانو من كم يوم كان اولمرت بموسكو ووصفوا بوتين بالحليف الأكبر للكيان الروسي.. وبرجع بقول انو هالصفقة تبع اليوم هدفها من النظام كسب روسيا لصالحو بحال صارتلا شي دربكة عليه وبغض النظر عن المصالح الوطنية يلي بعمرا ما كانت هاممتو...
بس النقطه انو مع كل هاد السوفييت تاريخياً انو أخدين العرب كحليف استرتيجي شئنا أم أبينا... تجارة صناعه مصالح اتفاقات شو مابدكون سموها... بس بالوقت يلي العالم كلو كان ضد العرب الروس كانو مع قضاياهون وبرجع بقلك بغض النظر ليش بس هاد يلي صار...

ayhamm26

23/08/2008, 01:55

.. بس لازم نعرف شو نحنا بالنسبة الهون و شو هنن بالنسبة النا.. و نكون واقعيين و ما نبني قصور من رمال تتهاوى عند أدنى نسمة ريح, و نفكر حالنا عنا حليف و نحنا ما عنا غير تاجر بدو يصّرف بضاعتو

تعليقا على قصة نبني قصور من الرمال , بزمانو بسنة 1982 لما كانو الفلسطينيين محاصرين ببيروت الغربية ,راح فاروق القدومي (وزير خارجية منظمة التحرير الفلسطينية) على موسكو ليستنجد بالرفاق السوفييت

وحسب ما بيروي القدومي نفسو ببرنامج حرب لبنان , الرفاق السوفييت نصحوا يستسلم هو وجماعتو ويطلعوا من بيروت , فالقدومي استغرب وقلون انتو اللي قدمتوا للعالم دروس بالصمود ب ستالينغراد جايين عم تنصحونا نستسلم , قاموا ردوا علي انو ب ستالينغراد كنا عم نستنى الجيش الاحمر يجي يحرر المدينة انتو هلق مين عم تستنوا؟؟
يعني بطريقة دبلوماسية فهموا ياها انو حل عنا ودبروا راسكن وقيس على هالحادثة لتشوف مدى الدعم السوفييتي السابق والروسي الحالي للعرب

VivaSyria

23/08/2008, 01:56

.. لا موسكو كانت تدعم العرب ببلاش ... و لا واشنطن تدعم العرب ببلاش ...

بس الحق يقال ... الاتحاد السوفيتي ساند العرب ضد اسرائيل في حروب 67 و 73 ... بس العرب ما حاربوا لاسباب معينة !

و مثل ما الاميركان ما باعوا السلاح مجانا للخليج .. الروس ما باعوا السلاح للعرب مجانا ..

و دبابات T72 الروسية كانت ما تضاهيها اي دبابة في العالم ...

هاد الحكي ماعليه غبار...

suryoyo

23/08/2008, 01:58

طب كأنو عم نقول الروس ساندو العرب بالحرب طيب نسيتو صفقة الأسلحة الفاسدة

ما تقدر تقول سبب خسارة الحرب بال 67 هو صفقة الاسلحة الفاسدة فقط ...

على علمي ما كانت بس مصر تحارب ضد اسرائيل ... اضافة الى ازمة الفساد بالجيش المصري ..

مالي خايف

23/08/2008, 02:01

ما تقدر تقول سبب خسارة الحرب بال 67 هو صفقة الاسلحة الفاسدة فقط ...

على علمي ما كانت بس مصر تحارب ضد اسرائيل ... اضافة الى ازمة الفساد بالجيش المصري ..
أنا ماعم برر الخسارة تبع حرب ال 67 يلي الكل بيعرف ليش خسرنا هالحرب أنا عم احكي عن دعم السوفييت النا كعرب
انت برأيك في حدا قايم العرب من أرضون أو معبرهون أو مستني رأيهون

yass

23/08/2008, 02:03

تعليقا على قصة نبني قصور من الرمال , بزمانو بسنة 1982 لما كانو الفلسطينيين محاصرين ببيروت الغربية ,راح فاروق القدومي (وزير خارجية منظمة التحرير الفلسطينية) على موسكو ليستنجد بالرفاق السوفييت

وحسب ما بيروي القدومي نفسو ببرنامج حرب لبنان , الرفاق السوفييت نصحوا يستسلم هو وجماعتو ويطلعوا من بيروت , فالقدومي استغرب وقلون انتو اللي قدمتوا للعالم دروس بالصمود ب ستالينغراد جايين عم تنصحونا نستسلم , قاموا ردوا علي انو ب ستالينغراد كنا عم نستنى الجيش الاحمر يجي يحرر المدينة انتو هلق مين عم تستنوا؟؟
يعني بطريقة دبلوماسية فهموا ياها انو حل عنا ودبروا راسكن وقيس على هالحادثة لتشوف مدى الدعم السوفييتي السابق والروسي الحالي للعرب

يا سيدي نعم... هاد مثال..

الاتحاد السوفيتي يا فادي ما كان يشوفنا حليف استراتيجي.. كان يشوفنا صديق لا أكثر و لا أقل.. حليف استراتيجي يعني قوتو من قوتك.. و ضعفو من ضعفك.. و انت و ياه واحد (اسرائيل بالنسبة للولايات المتحدة)..

في فرق بين حليف استراتيجي .. و دولة صديقة.. و بينك و بينها تعامل تجاري و هيك.. فرق كبير كمان