قصائد ممنوعة جدا ..لشعراء من العالم [الأرشيـــــف] - صفحة 2

أدونيس

20/03/2006, 22:54

شكرا ميمو ..وتركني هلا ..حاليا انتقد هالقصائد ..شكرا

mimo_13

22/03/2006, 06:04

شكرا ميمو ..وتركني هلا ..حاليا انتقد هالقصائد ..شكرا

وينك حبيبي اذا ما بدك تنقدا قلي مشان ما عد حك عندي كتير
ومشكور يا غالي

here i am

22/03/2006, 12:34

شباب مشان قصيدة جبلة هي مووووو لنزار هي لنديم محمد جبت الديوان اسمو آلام
و مشان مظفر النواب شغلة كبيرة و خصوصي قصيدة القدس أذا بتحبو لنزللكون ياها

أدونيس

23/03/2006, 02:20

شكرا إلك وياريت تقلي اسم القصيدة لجبلة ...وأنا قلت اللي عندي ...ومن الذي يعرف نستفيد ..صح ؟
وأنت سيد ميمو راجعلك

لاوديسا

23/03/2006, 19:51

شكرا كتير ادونيس ع الموضوع
بس عن جد شباب صار عندي فضول اتاكد لمين القصيدة
انا عندي كتاب في هالقصيدة وموقع عليها نزار رغم انها غير طريقتو بالكتابة ووقت شفت الموضوع وانو مختلفين لمين من الشاعرين هاي القصيدة صار عندي فضول اكتر انو اعرف
بقى شو

أدونيس

23/03/2006, 20:27

بنت اللاذقية حتى الآن معلوماتي أنو القصيدة لنزار ...يعني ونزار شاعر ..وبالنهاية بشر ..يعني ..ممكن يحرف طريقتو شو هالقصة يعني ...يعني .كبار في عالم الأدب حرفوا طرقهم ..وكبار في عالم الفن ...رسموا لوحات ..لا تليق بهم ..
فهناك فنان إيطالي لا أذكر اسمه بصراحة قالت له ابنة اخته أن يرسم لها دجاجة ..فرسم دجاجة ...وووضع للوحة بروازاً..من أفخم البراويز ..وبعد موته بسنوات ..تشاجر أهل الفن على أن تكون تلك اللوحة له أم لا ...ولكنم تأكدوا بعد ذلك أنها له ..

والقصيدة إن كانت لنزار شيء طبيعي ومع ذلك أنا لا زلت أتمنى معرفة الحقيقة ..وأنا أسعى بكل جهدي لمعرفتها ..

فلاش باك

13/04/2006, 20:54

مساء الخير لكم جميعا
هلئ لبعرفو أنو القصيدة لنزار وكتبها بعد ما ماتت زوجته بلقيس في انفجار السفار العراقية في لبنان ولأنو اتهم رفعت الأسد بالعملية

HashtNasht

16/04/2006, 23:49

شباب جبتلكن كوليكشن قصائد ممنوعة....لطشتن من منتدى تاني :lol:

بس حلوين

و الكل مرفقين بملف rtf للي بحب

قصيدة في هجاء معمر القذافي
قصيدة في هجاء صدام حسين
قصيدة الى الاقزام العرب
ايها الاذلاء !!
الى الدجال الليبي
رسالة الى ملك الاحتضار
نزار قباني يهجو صدام حسين
قصيدة في هجاء وزير خارجية قطر
الشاعر رعد بندر يهجو نزار قباني
قصيدة في هجاء الملك حسين
قصيدة في هجاء جورج بوش الاب
معارضة لقصيدة السفير القطري
السيرة الذاتية لسياف عربي
المهرولون
قصيدة في هجاء رأس الشر في ليبيا
قصيدة أين حقي لمحمد صالح بحر العلوم
شكوى أم ليبية الى منظمة العفو الدولية
قصيدة في هجاء الشاويش علي عبدالله صال
قصيدة في هجاء ياسر عرفات
شرح المصاب للدكتور محمد صيام
أعرب نحن ؟!
قصيدة في هجاء زين العابدين
قصيدة في هجاء حكام قطر
(( شوبش )) .. يا معان
الشيخ حمد في قصيدة لابن نفطويه

mimo_13

17/04/2006, 03:20

والله شي حلو .. يسلمو دياتك يا فحل وكتر من هدول الله يوفقك

MATATA

02/08/2006, 16:17

انا كنت متوقع ان اول قصائد رح توضع هي قصائد أحمد مطر .;-) ...وأنا برأيي أنه افضل من دخل هالمجال ....لأنه منفي من العراق بسبب شعره ( يعني متل نزار ) .:o .وراح الكويت بعدين نفوه الكويتيين واستقر ببريطانيا ... وآخر معلومات عنه انه كان مريض وهي كم قصيدة ..من العيار التئييل....

المنشق

أكثر الأشياء في بلدتنا

الأحزاب

والفقر
وحالات الطلاق
عندنا عشرة أحزاب ونصف الحزب
في كل زقاق!
كلها تسعى الى نبذ الشقاق!
كلها ينشق في الساعة شقين
وينشق على الشقين شقان
وينشقان عن شقيهما
من اجل تحقيق الوفاق!
جمرات تتهاوى شرراً
والبرد باق
ثم لا يبقى لها
إلا رماد الإحتراق!
* * *
لم يعد عندي رفيق
رغم أن البلدة أكتظت
بآلاف الرفاق
ولذا
شكلت من نفسي حزباً
ثم إني
- مثل كل الناس -
أعلنت على الحزب الانشقاق!!!

الختان

ألبسوني بردة شفافة
يوم الختان
ثم كان
بدء تاريخ الهوان
شفت البردة عن سري
وفي بضع ثوان
ذبحوا سري
وسال الدم في حجري
وقام الصوت من كل مكان
الف مبروك

وعقبى للسان

صاحبة الجهالة

مرة فكرت في نشر مقال
عن مآسي الاحتلال
عن دفاع الحجر الاعزل
عن مدفع أرباب النضال
وعن الطفل الذي يحرق في الثوره
كي يغرق في الثروه أشباه الرجال
* * *
قلب المسؤول أوراقي وقال:
إجتنب أي عبارات تثير الإنفعال
مثلاً:
خفف ( مآسي )
لم لا تكتب ( ماسي ) ؟
أو مُواسي ؟
أو أماسي ؟
شكلها الحاضر إحراج لأصحاب الكراسي
وتعريض بخط الإنعزال!
إحذف ( المدفع )..
كي تدفع عنك الاعتقال
نحن في مرحلة السلم
إحذف ( الارباب )
لا رب سوى الله العظيم المتعال!
إحذف الطفل ..
فلا يحسن خلط الجد في لعب العيال
إجذف ( الثوره )
فالأوطان في افضل حال!
إحذف الثروه والاشباه
ماكل الذي يعرف ياهذا يقال
قلت : إني لست ابليس
وأنتم لا يجاريكم سوى ابليس
في هذا المجال

قال لي : كان هنا ..

لكنه لم يتأقلم
فأستقال

الشعر والرقابه

فـكرت بـأن أكتب شعراً

لا يـهدر وقـت الـرقباء
لا يـتعب قـلب الـخلفاء
لا تـخشى مـن أن تنشره
كــل وكـالات الأنـباء
ويـكون بـلا أدنى خوف
فـي حـوزة كـل القراء
هـيـأت لـذلك أقـلامي
ووضـعت الأوراق أمامي
وحـشـدت جـميع الآراء
ثـم.. بـكل رباطة جأش
أودعـت الصفحة إمضائي
وتـركت الصفحة بيضاء!
راجـعت الـنص بـإمعان
فـبدت لـي عـدة أخطاء
قمت بحك بياض الصفحة..

واسـتغنيت عـن الإمضاء

وهذا غيض من فيض .....بس حاج هالقد ...الشغلة رح تقلب جد :jakoush:

krimbow

02/08/2006, 16:22

وهذا غيض من فيض .....بس حاج هالقد ...الشغلة رح تقلب جد

لا مو حاج

وصلنا لنص البير و قطع الحبل فينا

كمل كمل

MATATA

02/08/2006, 23:30

لا مو حاج

وصلنا لنص البير و قطع الحبل فينا

كمل كمل

والله بخاف يضبوني ... ..يا.krimbow......:lol:

krimbow

03/08/2006, 01:00

والله بخاف يضبوني ... ..يا.krimbow......:lol:

ما هنن رح يضبونا رح يضبونا، ازا مشان هالشغلة و اللا مشان غيرا

"من لم ينضب بطول اللسان انضب بغيرها، تعددت الاسباب و الضب واحدو"

دو

MATATA

03/08/2006, 02:11

ما هنن رح يضبونا رح يضبونا، ازا مشان هالشغلة و اللا مشان غيرا

"من لم ينضب بطول اللسان انضب بغيرها، تعددت الاسباب و الضب واحدو"

دو

ماهوي الضب بيختلف ...في ضب بيكون على كم كف :cry: ...وقعدة ع بساط الريح ...
وفتلة عالدولاب :o ...

وفي ضب بتروح معك ابدية ....
:jakoush:
فخلينا عالضب الاولاني وبلا ما نعمق ...

وطبعا لازم كفي ابياتك .........وبما انك نهيتها ب دو ...فخود هالبيت

دور يازمن دور ........ النحل ضبوه ومابقي غير الدبور :gem:

شلوني معك

oliver68

04/08/2006, 12:45

الله يلعنك نسيتني اشكر صاحب الموضوع.
أدونيس مشان الله لا تواخزني، ألف شكر عالموضوع و يسلمو هالإيدين الدهب اللي كتبوا هالشعر، و شكرا لكل واحد حط قصائد بهالموضوع، مرة تانية لا تواخزوني و ألف ألف شكرا.:oops: :oops: :D

f.y

12/08/2006, 22:32

مرحبا
انا بعتقد انو نزار قباني من اطول قامات الشعر في القرن العشرين .
وهو زلمة مبدع يعني ابداعو بيخلي يبعد كتيير عن التفكير السائد ولولا هيك
ماكان اسمو مبدع.
اما مشان الكلام البذيء يللي بيكون ببعض قصائده فهو انسان بيغضب وبيحب وبيحزن
بس بكل هدول بيفرق عني وعنك بشغلتين:
اولا:نزار قباني شاعر يعني بيحكي شعر,وبيبكي شعر,وبيسب وبيشتم شعر ,يعني
قصائده وحدة بيبكي فيا ووحدة بيفرح فيا وتالتة بيغضب......
تانيا:التاريخ عم يسجل انفعالات نزار من خلال قصائده بس انا وياك لأ
يعني تخيل لو انو مسجلين ورانا كل الحكي يللي عم نحكي وقت منفرح او منزعل او
منعصب او منسب...صدقني بتختلف صورتنا عند الناس كتييييييير.

بكل الاحوال انا برجع بقول نزار قباني شاعر عظيييم

هاد الرد على كل من يلوم مبدع لانه خارج السرب.

f.y

16/08/2006, 01:19

شو يا شباب ما عد سمعنا ولا صوت؟؟؟؟؟؟؟؟؟؟؟؟؟؟؟؟؟؟؟

شو القصائد كلها صارت مسموحة:shock: :shock: :shock: :shock: :? :? :? :?

asmaa_elhusseny

02/09/2006, 19:46

حلو منك انا لسه جديدة هنا

Samy Abul-Ela

19/09/2006, 16:43

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
Thanxxxxxxxxxxxxxxxxxx
I Never Read them before

ali8892

23/09/2006, 13:17

مرحبا شباب وصبايا
أيا الأصح برأيكم:yahoo: :cry: :gem:

نزار قباني
--------------------
عفوا فيروز أقاطعك.. أجراس العودة لن تقرع
خازوق دق بأسفلنا .. من شرم الشيخ إلى سعسع
من أين العودة فيروز والعودة تحتاج لمدفع
و المدفع يلزمه كف و الكف يحتاج لإصبع
و الإصبع ملتذ لاهٍ .. في دبر الشعب له مرتع....
عفوا فيروز و معذرة.. أجراس العودة لن تقرع
خازوق دق بأسفلنا ... من شرم الشيخ إلى سعسع ...
--------------------------------------------------------------
غنت فيروز مغردة وجميع الناس لها تسمع..
الآن الآن وليس غدا أجراس العودة فلتقرع..
من أين العودة فيروز والعودة يلزمها مدفع..
خازوق دق ولن يقلع من شرم الشيخ إلى سعسع..
عفوا فيروز ومعذرة أجراس العودة لن تقرع!.
---------------------------------------------------------------------عفوا فيروز أقاطعك.. أجراس العودة لن تقرع
خازوق دق بأسفلنا..من شرم الشيخ إلى سعسع
من أين العودة فيروز..والعودة تحتاج لمدفع
و المدفع يلزمه كف..و الكف يحتاج لإصبع
و الإصبع ملتذ لاهٍ .. في دبر الشعب له مرتع....
عفوا فيروز و معذرة.. أجراس العودة لن تقرع
خازوق دق بأسفلنا ... من شرم الشيخ إلى سعسع ...

غنت فيروز مرددة ... آذان العرب لها تسمع
الآن الآن وليس غداً ... أجراس العودة فلتقرع
عفواً فيروز ومعذرة ... أجراس العودة لن تقرع
فيروز من أين العودة ... والعودة تحتاج لمدفع
و المدفع يلزمه كف ... و الكف يحتاج لإصبع
و الإصبع تلهو غارقة 000 في دبر الشعب له مرتع
خازوق دق بأسفلهم ... من شرم الشيخ إلى سعسع
ومن الجولان إلى يافا ....0 ومن الناقورة إلى ازرع
دايان يدق به دقا ... جونسون بقوته يدفع
فتجمع ماخوس وزعين .... وصلاح جديد مع الاكتع
وابن الطلاس مع أسد ....ونوري قد شهر المبضع
فتنهد نوري وقال لهم ... هيهات الطب لن ينفع
خازوق دق بأسفلنا ... خازوق دق ولن يطلع
لو أكمل حزبي رسالته ... لقبضنا من ثمن الأقرع

oliver68

23/09/2006, 22:55

لك يسلمو يا أحلى علي، روح الله يسلم إيديك على هالتحفة.:D :D :D

ali8892

09/10/2006, 13:02

مرحبا ممك ن تقلي هالقصيدة لمين:
عفوا فيروز و معذرة اجراس العودة لن تقرع
خازوق دق بأسفلنا من شرم الشيخ إلى سعسع
وبسرعة اذاممكن رد

krimbow

09/10/2006, 15:35

مرحبا ممك ن تقلي هالقصيدة لمين:
عفوا فيروز و معذرة اجراس العودة لن تقرع
خازوق دق بأسفلنا من شرم الشيخ إلى سعسع
وبسرعة اذاممكن رد

هي القصيدة ما انطبعت لأي شاعر او اديب، تم مصادرتها من زمان كتير...

الشارع العربي بيقول انها لنزار قباني بالتواتر، بس بالاوساط الادبية، المعروف انها للشاعر السوري الكبير عمر ابو ريشة

عموما هي القصيدة تخطت الرقابة لقوتها النقدية و جمالها و ذاع صيتها، و بشكل عام برجح انها تكون للشاعر الكبير عمر ابو ريشة، لانها مشابهة للغتو النقدية اللاذعة

نابلسي

10/10/2006, 19:50

مشششششششششششششششكور

therion

07/11/2006, 13:49

يا شباب بعرضي انا قاريها للقصيدة ( بلد التعريص جبلة ) , وكلياتكم بتعرفو كيف كانت جبلة بدون ما حاد يقلكم , بتعرفو انو ايام زمان كانو الشباب الطيبة اذا بدهم بنت بيجيبوها من نص بيتها حتى لو كانت من عائلة محترمة هاد اذا كان في .
ابقوا جيبولي حلاوة معكم . :sick:

شمس الليل

17/11/2006, 22:50

الف شكر علي القصيدة

لوليتا

06/12/2006, 20:42

عنجد حلوووووووووووووووووووووووووووووووووووة
مشكووووووووووووووووووووووووووووور
اجراس العودة لم ولن تقرع يسلم تمك

مايسترو

21/05/2007, 05:12

ادونيس بتعرف قصيدة عنترة؟؟؟؟؟

كمان لنزار اذا بتقدر تحطها بتكون 1000 معلم مع بعض مو واحد

مايسترو

يمو_عاللمبة

26/05/2007, 18:21

عذراً و معذرة فيروز .... أجراس العودة لن تقرع

خازوق دق بأسفلنا .... من شرم الشيخ إلى سعسع

هذه القصيدة لــ نــزار قــبـــانـــي .

وهي ناقصة هنا .

مشكورة جهود الشباب الطيبة .

ali8892

28/05/2007, 09:54

غنت فيروز مرددة ... آذان العرب لها تسمع
الآن الآن وليس غداً ... أجراس العودة فلتقرع
عفواً فيروز ومعذرة ... أجراس العودة لن تقرع
فيروز من أين العودة ... والعودة تحتاج لمدفع
و المدفع يلزمه كف ... و الكف يحتاج لإصبع
و الإصبع تلهو غارقة .... في دبر الشعب له مرتع
خازوق دق بأسفلهم ... من شرم الشيخ إلى سعسع
ومن الجولان إلى يافا .... ومن الناقورة إلى ازرع
دايان يدق به دقا ... جونسون بقوته يدفع
فتجمع ماخوس وزعين .... وصلاح جديد مع الاكتع
-------------------- ....ونوري قد شهر المبضع
فتنهد نوري وقال لهم ... هيهات الطب لن ينفع
خازوق دق بأسفلنا ... خازوق دق ولن يطلع
لو أكمل حزبي رسالته ... لقبضنا من ثمن الأقرع

oliver68

28/05/2007, 21:21

غنت فيروز مرددة ... آذان العرب لها تسمع
الآن الآن وليس غداً ... أجراس العودة فلتقرع
عفواً فيروز ومعذرة ... أجراس العودة لن تقرع
فيروز من أين العودة ... والعودة تحتاج لمدفع
و المدفع يلزمه كف ... و الكف يحتاج لإصبع
و الإصبع تلهو غارقة .... في دبر الشعب له مرتع
خازوق دق بأسفلهم ... من شرم الشيخ إلى سعسع
ومن الجولان إلى يافا .... ومن الناقورة إلى ازرع
دايان يدق به دقا ... جونسون بقوته يدفع
فتجمع ماخوس وزعين .... وصلاح جديد مع الاكتع
-------------------- ....ونوري قد شهر المبضع
فتنهد نوري وقال لهم ... هيهات الطب لن ينفع
خازوق دق بأسفلنا ... خازوق دق ولن يطلع
لو أكمل حزبي رسالته ... لقبضنا من ثمن الأقرع
كفو معلم، بالله إنك كفو، و لو فيك كمان تجيبها كاملة مكملة، و تجيب القصائد السياسية يللي من هالمستوى، يعني يللي فيهن سب عأبو جنب بدون هز دنب :shock::shock:...شو مشان جاي عالقافية؟؟؟!!!!!!!! :gem::gem:
بس معلم في ملاحظة عالبيت الأخير، أنا كأني اسمعتو إنو "لو أدى البعث رسالته لجعلنا الصهيوني يركع"، فتأكدلنا منها دخيل عيونك أنا.
يعطيك العافية معلم، إنتي و الشباب الشبيحة.

أبو بحر

29/05/2007, 16:19

من كل عقلك هادا لنزار
صدقني ممكن يكون لقرود السود ولا يكون لنزار
وميشان ما حدا يقول مين عم يتفزلك وشو عرفك مجموعة نزار قباني كاملة عندي ياها بالبيت وفيك تطلع عليها على الأنترنت على موقع
adab.com

أبو بحر

29/05/2007, 16:32

مرحبا مايسترو القصيدة يلي عم تحكي عليها ما اسمها عنترة اسمها من يوميات شقة مفروشة وهي بديوان خمسون عاما في مديح النساء
ونصها كالتالي
هذه البلاد شقو مفروشة ..
يملكها شخص يسمى عنترة
يسكر طول الليل عند بابها
ويجمع الإيجار من سكانها
ويطلب الزواج من نسوانها
ويطلق النار على الأشجار
والأطفال .. والعيون .. والأثداء
والضفائر المعطرة ...
هذي البلاد كلها مزرعة شخصية لعنترة
سماؤها هواؤها نساؤها
حقولها المخضوضرة
كل البنايت هنا ..يسكن فيها عنترة ..
كل الشبابيك عليها صورة لعنترة ..

على فكرة هادا مقطع صغير القصيدة أطول من هيك بكتير بس صدقني ما فيني اكتبها كلها
وعلى كل متل ما قلتلك فيك تسأل أي مكتبة بأي محافظة الديوان اسمو خمسون عاما في مديح النساء
وهو متوفر بكل المكاتب

أبو بحر

29/05/2007, 16:33

مرحبا مايسترو القصيدة يلي عم تحكي عليها ما اسمها عنترة اسمها من يوميات شقة مفروشة وهي بديوان خمسون عاما في مديح النساء
ونصها كالتالي
هذه البلاد شقو مفروشة ..
يملكها شخص يسمى عنترة
يسكر طول الليل عند بابها
ويجمع الإيجار من سكانها
ويطلب الزواج من نسوانها
ويطلق النار على الأشجار
والأطفال .. والعيون .. والأثداء
والضفائر المعطرة ...
هذي البلاد كلها مزرعة شخصية لعنترة
سماؤها هواؤها نساؤها
حقولها المخضوضرة
كل البنايت هنا ..يسكن فيها عنترة ..
كل الشبابيك عليها صورة لعنترة ..

على فكرة هادا مقطع صغير القصيدة أطول من هيك بكتير بس صدقني ما فيني اكتبها كلها
وعلى كل متل ما قلتلك فيك تسأل أي مكتبة بأي محافظة الديوان اسمو خمسون عاما في مديح النساء والقصيدة اسمها من يوميات شقة مفروشة
والديوان موجود بكل المكاتب تقريبا

oliver68

29/05/2007, 23:23

من كل عقلك هادا لنزار
صدقني ممكن يكون لقرود السود ولا يكون لنزار
وميشان ما حدا يقول مين عم يتفزلك وشو عرفك مجموعة نزار قباني كاملة عندي ياها بالبيت وفيك تطلع عليها على الأنترنت على موقع
adab.com
معلم مع احترامي، بس ما بوثق بأي قصائد سياسية منشورة بالوطن العربي أو القائمين على نشرها عرب مقيمين بالوطن العربي، لأن بكل بساطة بتكون مراقبة و رايح نصها، فبظن إنو هيك قصيدة مو معؤول تكون بالموقع، و لسا في قصائد كتييييييييييييييييير من هالمستوى و ألعن كمان، و ما بعيدي على نزار يكتب هيك، لأن هادا الأسلوب نفس أسلوب القباني، الأسلوب الساخر و يللي ما عندو كبير إلا الجمل.
المهم معلم شكرا على قصيدة عنترة، منيح يللي قلت بأي ديوان موجودة. :D:D

sliman

30/05/2007, 14:40

صدقوني ندوخت

أبو بحر

31/05/2007, 03:56

أول شغلة رح قلك ياها أنا قصدي على قصيدة جبلة أنها مولنزار هي لنديم محمد أصلا أسلوبها ومفرداتها لا تمت لنزار بصلة كمان نزار ما عندو خلال سيرة حياتو يلي فيك تعرفها من كتاب حياتي والشعر من تأليف نزار شخصيا
سيرة حياتو كلها ما إلها علاقة بجبلة لا من قريب ولا من بعيد على عكس نديم محمد
كما رح قلك شغلة تانية بخصوص القصائد السياسية أولا نحنا كسوريين قطعنا شوط جيد كتير بمجال الرقابة وهادا كلام مو اجتهاد شخصي
تانيا بالنسبة لقصائد نزار فيك تتأكد ببساطة أنو مو منشال منها شي لسبب بسيط جدا هو أنو دار النشر هي منشورات نزار قباني ببيروت يعني نزار كان يكتب وينشر بالوقت نفسو وإلا كان مات من الجوع
ورقابة بلبنان ما كان في بهديك الفترة على الأقل لذلك الدواوين كانت تنزل كاملة مكملة واللي وصل لعنا شي كتير ممتاز وبإمكانك تتأكد أنو القصائد يلي ما عم توصل السبب في ذلك تقصير بدار النشر مو أكتر
ولحتى تتأكد برجع بقلك في موقع سوري اسمو أدب دوت كوم فيه أكتر من 90 بالمية من مجموعة نزار
ولحتى تتأكد من أنو الرقابة عنا دورها عم بكون واعي وجيد اقرأ ديوان (لا)لأنو عبارة عن مجموعة قصائد سياسية مرعبة من كتر مو قوية وحلوة ولمعلوماتك الديوان موجود بكثرة بأي مكتبة من المكاتب يعني مسموح فيه بشكل ديمقراطي
ولا تواخذني على طول السيرة بس كل هالحكي لمجرد التوضيح وبأكدلك أنو الكلام موثوق من مصادر موثوقة وما كنت بحكي شي قبل التجربة
سلام

مايسترو

31/05/2007, 19:40

يسلمو ايديك ابو بحر على ردك

مايسترو

oliver68

01/06/2007, 11:52

أول شغلة رح قلك ياها أنا قصدي على قصيدة جبلة أنها مولنزار هي لنديم محمد أصلا أسلوبها ومفرداتها لا تمت لنزار بصلة كمان نزار ما عندو خلال سيرة حياتو يلي فيك تعرفها من كتاب حياتي والشعر من تأليف نزار شخصيا
سيرة حياتو كلها ما إلها علاقة بجبلة لا من قريب ولا من بعيد على عكس نديم محمد
كما رح قلك شغلة تانية بخصوص القصائد السياسية أولا نحنا كسوريين قطعنا شوط جيد كتير بمجال الرقابة وهادا كلام مو اجتهاد شخصي
تانيا بالنسبة لقصائد نزار فيك تتأكد ببساطة أنو مو منشال منها شي لسبب بسيط جدا هو أنو دار النشر هي منشورات نزار قباني ببيروت يعني نزار كان يكتب وينشر بالوقت نفسو وإلا كان مات من الجوع
ورقابة بلبنان ما كان في بهديك الفترة على الأقل لذلك الدواوين كانت تنزل كاملة مكملة واللي وصل لعنا شي كتير ممتاز وبإمكانك تتأكد أنو القصائد يلي ما عم توصل السبب في ذلك تقصير بدار النشر مو أكتر
ولحتى تتأكد برجع بقلك في موقع سوري اسمو أدب دوت كوم فيه أكتر من 90 بالمية من مجموعة نزار
ولحتى تتأكد من أنو الرقابة عنا دورها عم بكون واعي وجيد اقرأ ديوان (لا)لأنو عبارة عن مجموعة قصائد سياسية مرعبة من كتر مو قوية وحلوة ولمعلوماتك الديوان موجود بكثرة بأي مكتبة من المكاتب يعني مسموح فيه بشكل ديمقراطي
ولا تواخذني على طول السيرة بس كل هالحكي لمجرد التوضيح وبأكدلك أنو الكلام موثوق من مصادر موثوقة وما كنت بحكي شي قبل التجربة
سلام
عراسي معلم، له يا زلمي، طول أد ما بدك و خود راحتك :larg::larg:
يعني يا معلم أنا متأكد إنك مجرب و عرفان أديش الرقابة عنا "خافة" بس يا معلم لسا موجودة، و لو شفت القصائد يللي عنجد كاتبها نزار و يللي مو منشورة حتى بلبنان لكنت ارتعبت كتيييييييييييييير، و صرت تخاف حتى من إنك تئراها، و هالحكي مو من عندي بس، الحكي من الناس يللي عايشين ببريطانيا أو خارج الوطن العربي بشكل عام، و في منهن كتير شباب بأخوية، ياريت حدا منهن يخبرنا و يقلنا عن وضع قصائد نزار بهديك البلاد.
و الشوط يللي قطعتو القابة عنا، صدقني أبو شريك مو طويل، بالعكس قصير كتير ولازم يلتغى، و بالزات على الجرايد و المجلات، يعني عطيني مجلة بسوريا للمعارضة!!!!!!!!!!!!!
بس بدي اسألك، في ديوان اسمو "الكبريت في يدي و دويلاتكم من ورق" قرأتو قبل هالمرة؟؟؟؟ هوي كتير جايز يكون بسوريا، بنصحك تئراه. ;-);-);-)
:D:D:D

أبو بحر

01/06/2007, 13:34

كيف الشباب
أول شي أبو طريق أنا معك بكل حرف حكيتو بس خلينا نحكي بمنطقية شوي نحنا ما في عنا الشعب المثقف يلي ممكن نشيل عنو الرقابة وأكبر دليل أنو كتير ناس لحد الآن بيقعدوا يبيعونا وطنيات من خلال بعض الدعايات الكاذبة للجزيرة والعربية والحرة وبعض القنوات المتصهينة يعني بيثعدوا يناقشوك بشغلات جاييتن مقشرة وخالصة بدون أي تفكير أو أي محاكمة عقلية هدون النس لو قرؤوا أي شي جديد منطقي أو ثوري أو سياسي بجوز كتير يتبنوه بشكل أعمى
لذلك لما بدنا نشيل إيدنا عن الناس ونمنع الرقابة لازم الناس أو القراء يكونوا على قدر هالمسؤولية يعني مثقفين نسبيا وكيف رح يكونوا مثقفين ونسبة القراءة بين سكان الوطن العربي 5دقائق بالسنة بينما بفرنسا مثلا نسبة القراءة 8كتب بالسنة وهي النسبة مو من عندي من شبكة فرنسة
والشغلة الأخيرة بلا طول سيرة هي أنو نقارن الرقابة عنا بدول الوطن العربي نحنا فعلا قطعنا شوط جيد أكيد لازم يكون أكتر من هيك أنا معكن إنما نحنا كقراء لازم نلعب دورنا بهالموضوع وعلى كل الدواوين يلي موجودة عنا والمسلسلات يلي عم تنقد والحكي يلي عم نحكيه شي جيد وما فينا ننكر بس أكيد لازم يكون فيه انفتاح من الرقابة لحتى نحنا كمان نقدر نتثقف

أبو بحر

01/06/2007, 13:48

حبيب قلبي matata
شكرا كتير على هالقصيدة الحلوة وبتمنا تزيدنا

أبو بحر

01/06/2007, 13:52

على راسي حبيبي مايسترو

verocchio

19/06/2007, 16:20

لماذا لا يتم جمع كل الأشعار الممنوعة في ملف واحد للتحميل

theone298

23/06/2007, 01:46

يعني وين القوة اذا واحد برات هالبلد قاعد عم يسبسب عكيفو .. شو هالقصة العظيمة
و شغلة تانية لك اللي بدي افهمو انو ليش كل امة الله حاطين نزار قباني بوشون و عابدينو
اساسا شعرو ما محبوب الا لبساطتو و استخدامو لكلمات سهلة و مافيا جنس العمق
يمكن هو شاعر منيح نوعا ما بس بالنسبة الي الحمد الله ما بطيق شعرو .. بيجوز لتفاهة معانيه و سذاجتو
بس هادا بيضل رأيي
بالنهاية اذا في شاعر الله خلقو فهو المتنبي و بلأحرى كل شي اسمو شعراء عرب قدماء عندون قوة بالشعر
و كمان خليل مطران شعرو مرتب

oliver68

23/06/2007, 02:13

يعني وين القوة اذا واحد برات هالبلد قاعد عم يسبسب عكيفو .. شو هالقصة العظيمة
و شغلة تانية لك اللي بدي افهمو انو ليش كل امة الله حاطين نزار قباني بوشون و عابدينو
اساسا شعرو ما محبوب الا لبساطتو و استخدامو لكلمات سهلة و مافيا جنس العمق
يمكن هو شاعر منيح نوعا ما بس بالنسبة الي الحمد الله ما بطيق شعرو .. بيجوز لتفاهة معانيه و سذاجتو
بس هادا بيضل رأيي
بالنهاية اذا في شاعر الله خلقو فهو المتنبي و بلأحرى كل شي اسمو شعراء عرب قدماء عندون قوة بالشعر
و كمان خليل مطران شعرو مرتب
عراسي أبو شريك، يعني منيح يللي لحقت حالك بآخر لحظة و كتبت "هادا بيضل رأيي" لأن بصراحة كنت رع عجب عليك متل مرة وحدة حطت موضوع كامل عن نزار قباني و ساوتو كافر و منحط و فاسق، فالشباب الطيبة ما خلولا مجال تتنفس.
يللي بدي عاتبك عليه إنو نفيت عن نزار قباني القوة لأن كتب شعر من برا سوريا، و بكل بساطة حبيبي نزار و أمثالو من الشعراء و الأدباء يللي عاشوا بالبمنفى و كتبوا يللي بقلبهن، أحسن بمليون مرة من يللي بئيوا و بلشوا يمسحوا جوخ، و لعلمك لو نزار قباني بقي بسوريا، يا بدو يصير فيه متل ما صار بمحمد الماغوط، او صار فيه متل ما صار بمعظم شعراء العرب، يعني منافق درجة أولى. و لمعلوماتك إنو نزار أكل يللي فيه النصيب من الشباب الطيبة قبل ما يسافر، مشان هيك سافر، مع إنو كان بعثي، بس للأسف أهداف البعث الحقيقية يللي مآمن فيها ما اطبق منها غير الشعرات و الكلام الدبلوماسي الفاضي بدون أي فعل "لو أدى البعث رسالته... لجعلنا الصهيوني يركع".
فيا سيدي الشاعر يسافر و يكتب من برا بلدو أحسن ما يبقى ببلدو و يموت غريب "متل الماغوط" أو إنو يصير منافق"متل معظم شعرائنا".

theone298

23/06/2007, 14:26

أبو شريك انا ما بنفي انو الزلمة فهمان و شعرو مرتب و حلو
بس يعني كمان اذا بتطلع على الواقع بتحس انو عطو اكتر ما بيستاهل
يعني سلطوا عليه للزلمة ضوء كبير و صار شوية تانية نبي الشعر على الرغم انو في شعراء جداد متلو نوعا ما و شعراء قديمين اقوى منو بمليون مرة و مع هيك ما انعرفوا متل ما انعرف نزار
بالنهاية بيضل شاعر متميز بس اخد اكتر من حقو

oliver68

23/06/2007, 14:50

أبو شريك انا ما بنفي انو الزلمة فهمان و شعرو مرتب و حلو
بس يعني كمان اذا بتطلع على الواقع بتحس انو عطو اكتر ما بيستاهل
يعني سلطوا عليه للزلمة ضوء كبير و صار شوية تانية نبي الشعر على الرغم انو في شعراء جداد متلو نوعا ما و شعراء قديمين اقوى منو بمليون مرة و مع هيك ما انعرفوا متل ما انعرف نزار
بالنهاية بيضل شاعر متميز بس اخد اكتر من حقو
هلأ يا معلم إنتي نزعتا هيك، لأن برأيك الزلمة أخد أكتر من حقو، بس برأيي أنا إنو الزلمي أخد أقل من حقوا و بكتييييييييييييييييييييير كمان، ليش؟؟؟؟ لأن ماحدا من يللي بيمدح نزار بيعرف شعر نزار، فمشان هيك بتحسوا آخد أكتر من حقوا، نزار مو بس شاعر حب و مرأة، هوي شاعر سياسة و وطن و شعوب، أنا عسبيل المثال بحس إنو نزار و محمد الماغوط أكتر تنين بالوطن العربي كتبوا عن همومنا بشكل دقيق و صحيح، ولو تعمقت شوي بشعر نزار رح تلمس هالشي، إنتي إنسى الشباب الفارطة هالأيام يللي مو حافظ لنزار غير القصائد المغناة، و نصهن ما بيعرفوا إنو هالقصائد ما تغنت إلا لما تغيرت معظم كلماتها، و إزا عرفوا فبكونوا بحبوا نزار لأن حاكي نهداك و حلمتاك... بأشعارو، و إنتي إزا بدك تعرف نزار عنجد، اقرأ ديوان "الكبريت في يدي و دويلاتكم من ورق" و تحديدا قصيدة أصهار الله، و كمان في قصيدة "من قتل الإمام" هي قصيدة من أروع القصائد بنصحك تئراها.
فيا سيدي لما تتعمق بشعر نزار رح تكون متأكد 1000000000000000% إنو لسا ما أخد حقو بنووووووووووووووووووب، و أكبر إهانة لنزار كانت المسلسل الفاشل السخيف"برأيي و رأي كل واحد بيعرف شعر و حياة نزار" يللي انعمل عنو و ماكان في أكتر من0.000001 % من أحداثو صح، لك منيح إزا بوصل لهالنسبة.
المهم شو ما كان بضل "برأيك" نزار أخد أكتر من حقو، و أرجووووووووك يا غالي لا تحكم و خلي الشغلات ضمن رأيك.
و هي أحلى وردة :D

theone298

23/06/2007, 15:00

يمكن الحق معك ... يعني انا الصراحة مو متعمق بشعرو مظبوط و ملاحظتك صح انو نص امة الله مو حافظ الا الشعر اللي مالو علاقة باللياقة ..
بس صديقي يعني كمان بتمنى انو طالما عم تقرا لنزار فقرا لشعراء تانيين متل المتنبي , ابو القاسم الشابي , عنترة , الامام الشافعي>> أبو البقاء الرندي و خصوصا قصيدتو في رثاء الاندلس و عندك الياس فرحات بقصيدتو حياة مشقات ... و الشغلة اللي بتحير انو البشر ما عاد شافو غير نزار بالرغم من انو في غيرو كتير
و لا تنسالي قصيدة هجاء كافور الأخشيدي للمتنبي .. يازلمة رهيبة هالقصيدة بس انا رح اقرا بشعر نزار شوي انشالله بعد هالفحص بركي

oliver68

23/06/2007, 15:19

يمكن الحق معك ... يعني انا الصراحة مو متعمق بشعرو مظبوط و ملاحظتك صح انو نص امة الله مو حافظ الا الشعر اللي مالو علاقة باللياقة ..
بس صديقي يعني كمان بتمنى انو طالما عم تقرا لنزار فقرا لشعراء تانيين متل المتنبي , ابو القاسم الشابي , عنترة , الامام الشافعي>> أبو البقاء الرندي و خصوصا قصيدتو في رثاء الاندلس و عندك الياس فرحات بقصيدتو حياة مشقات ... و الشغلة اللي بتحير انو البشر ما عاد شافو غير نزار بالرغم من انو في غيرو كتير
و لا تنسالي قصيدة هجاء كافور الأخشيدي للمتنبي .. يازلمة رهيبة هالقصيدة بس انا رح اقرا بشعر نزار شوي انشالله بعد هالفحص بركي
يا عيني عليك شو فهمان و مزوق :D:D:D
عكل أنا جربت و قرأت شعر قديم، و ما قدرت افهم منو ولا حرف، و كمان ما عرفت اقرأ معظم الكلمات، بس بسبب زوقك و احترامك و قبولك لرأي الطرف الآخر، أنا اتعلمت منك درس مرتب، و رح ارجع عيد قراءة بعد القصائد للشعراء القدماء و رح حاول أكتر من جهدي، بس للأسف أنا هلأ ملتهي ببحث رسالة الماجستير تبعي، فمشان هيك رح تكون نتائج هلامطالعة الشعرية بطيئة و طويلة كمان.
المهم الله يوفقك بكل فحوصاتك و ادرس منيح، لأن ما بفيدنا بهالدنيا غير شغلتين، الحب و العلم.
عفكرة، إنتي عنجد the one، لأن معظمنا هالأيام بكون معصلج و ثابت على رأيو بدون إقناع، يعني بعيد عنك متل التور المتنح، و إنتي الوحيد يللي لحد هلأ أبدى مرونة بوجهة نظرو. عنجد اسمح لي سيدي أن أرفع قبعتي احتراما لك. :deal::deal::deal:

theone298

23/06/2007, 15:30

لك عراسي حارتك يا مزوق يا أكابر
بشرفي دبحتني بشيلة هالطاقية هي و رح تضطرني شيل طربوشي كمان و انحني الك انحناءة ود و احترام
و نشالله موفق برسالتك ... صحي شو بتدرس
كمان شغلة ابو شرك انو الشعر القديم انا كمان ما بفهم منو الخمسة من الطمسة بس يعني في قصائد مفهومة نوعا ما و في شروحات لهلشعر بموقع صخر بس للمتنبي .. يعني صحي حتى احيانا الشرح ما بتفهمو بس خيو امرك لله و هي موقع المتنبي و انا متأكد انك بتعرفو ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////