الفن + سياسة= ؟؟؟؟؟؟

[phoenixbird]

مرحبا اخوية

من كم يوم وانا عم فكر بموضوع انو ليش الفنان لازم يكون ملاك سياسي وما يحدد موقف اله لانو رح يخسر بسببه الناس
بس بالمقابل مو هوي بشر وحقه يعبر عن رايه


مثلا

الجملة الاخيرة على الست فيروز لانها عم تغني بالشام
جوليا تعرضت لحملة من 14 اذار لانو غنت كلام السيد حسن
زياد الرحباني خسر كتير من جمهوره بسبب اراءه الاخيرة بالاخبار
مارسيل حليفة خسر كتير من جمهوره العربي

اليسا منعت من سوريا بحجة مشاركنها ب 14 اذار
راغب علامة منع في سوريا لانه صرح على المستقبل ان سوريا بلد احتلال

وتطول القائمة ولا تنتهي بس السؤال هل الفنان ( كاتب صحفي ممثل مخرج مغني رسام ..............)
مطالب بتحديد موقفه وعلانه ام يجب ان يكون محايد ولا يميل لطرف على حساب الاخر


تحياتي

[باشق مجروح]

أهلا
ميرسي عالموضوع
أنا رأيي انو لو عنا شعب متربي تربية ديمقراطية خالصة
كان هالموضوع عادي
المشكلة فينا يا صاحبي
يعني شوف الانتخابات الرئاسية بأورويا وأميركا منشوف دعم الفنانين لبعض المرشحين وهالشي ما بيأثر على شعبيتهن لأنو بالنهاية الشعب بيربطو بفنانو الفن وبس صوت أو تمثيل أو لوحة بس هو بالنهاية الو وجهة نظر متل هالبشر.
نحنا كشعوب غير مهيئين لاحترام من نختلف معهم بالرأي وهاد سبب خوف الفنانيين على شعبيتهون ووقوفهون على الحياد بأي قضية سياسية ساخنة وعليها انقسام بالمجتمع.

[yass]

كاتب النص الأصلي : باشق مجروح

أهلا
ميرسي عالموضوع
أنا رأيي انو لو عنا شعب متربي تربية ديمقراطية خالصة
كان هالموضوع عادي
المشكلة فينا يا صاحبي
يعني شوف الانتخابات الرئاسية بأورويا وأميركا منشوف دعم الفنانين لبعض المرشحين وهالشي ما بيأثر على شعبيتهن لأنو بالنهاية الشعب بيربطو بفنانو الفن وبس صوت أو تمثيل أو لوحة بس هو بالنهاية الو وجهة نظر متل هالبشر.
نحنا كشعوب غير مهيئين لاحترام من نختلف معهم بالرأي وهاد سبب خوف الفنانيين على شعبيتهون ووقوفهون على الحياد بأي قضية سياسية ساخنة وعليها انقسام بالمجتمع.

تماما... المشكلة مو بالفنان انما بتقبّل الشعب انو هالفنان مدين الهون بفنو و ما عدا ذلك مالو أهمية... فيك تقول حياتو الخاصة حتى لو هو استعمل شهرتو في سبيل دعم اتجاه أو حزب أو شخص

[phoenixbird]

كاتب النص الأصلي : yass

تماما... المشكلة مو بالفنان انما بتقبّل الشعب انو هالفنان مدين الهون بفنو و ما عدا ذلك مالو أهمية... فيك تقول حياتو الخاصة حتى لو هو استعمل شهرتو في سبيل دعم اتجاه أو حزب أو شخص

اذا شو تفسير هالمسخرة انو كل يوم دولة مانعة فنانين من الدخول بسبب ارائون الشخصية
واخرون شخص كاتب مقال قال يدعو لسحب الجنسية من كل لبناني يغني في سوريا
او مثل اللي وصف صباح فخري بالخيانة لانو غنى على شاشة المستقبل مثلا
وخلونا ساكتين بخصوص مارسيل حليفة
بس الوجه الاخر يقول انو هاد الفنان برايه هو ضد فكرة الدولة االلي انا فيها اذا انا بدي امنعه
كما حصل مع ماجدة الرومي

[suryoyo]

نرجع و نقول الديمقراطية ما تليق بالعرب

لان اذا تركنا الدول على جنب .........

يبقى الشعب اللي يريد يؤيد فنان يحمل نفس اراءه السياسية .... و ما يحب الفنان اللي آراءه تختلف عنه


و نرجع للدائرة المفرغة

البيضة اصل الدجاجة و الدجاجة اصل البيضة

[yass]

كاتب النص الأصلي : phoenixbird

اذا شو تفسير هالمسخرة انو كل يوم دولة مانعة فنانين من الدخول بسبب ارائون الشخصية
واخرون شخص كاتب مقال قال يدعو لسحب الجنسية من كل لبناني يغني في سوريا
او مثل اللي وصف صباح فخري بالخيانة لانو غنى على شاشة المستقبل مثلا
وخلونا ساكتين بخصوص مارسيل حليفة
بس الوجه الاخر يقول انو هاد الفنان برايه هو ضد فكرة الدولة االلي انا فيها اذا انا بدي امنعه
كما حصل مع ماجدة الرومي

هاد اسمو تخلّف... الفنان و الرياضي و أي شخص كان الو كل الحق انو يكون الو مواقف و أفكار تجاه قضايا معينة.. و انت بدك من الفنان فنو و من الرياضي لعبو و ما يهمك أي اعتبار تاني.... التطبيل و التزمير الانتمائي التنكي هاد مالو معنى و لا منطق....

[phoenixbird]

كاتب النص الأصلي : yass

هاد اسمو تخلّف... الفنان و الرياضي و أي شخص كان الو كل الحق انو يكون الو مواقف و أفكار تجاه قضايا معينة.. و انت بدك من الفنان فنو و من الرياضي لعبو و ما يهمك أي اعتبار تاني.... التطبيل و التزمير الانتمائي التنكي هاد مالو معنى و لا منطق....

حضرتك ياحج ياسين بتقول هالحكي واللي سبقونا وانا كمانم بنقول هالحكي بس شو مشان باقي البشر ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟
وشو مشان الاعلام اللي صار يصنف الفنان بطريقة وقحة احيانا متل العربية لما قالت انو كوليت خوري عميلة للسلطة اما غادة السمان من المعارضة
او دريد لحام اللي قاطعته كتير من المحطات بسبب تقديمه لبرنامج على المنار

شو مشان هدول
وشو مشان حكومة اليلد ايا كان هاد البلد اللي حاطة هيك اعتبارات
سواء كانت سياسية او دينية

[yass]

أي لا تضيع حجي....

الكتّاب غير وضع صارو, لا تخلطهون مع الفنانين... الكاتب حتى لو روائي فايديولوجيتو راح تطغى على اسلوبو أو أفكارو و حتى الصور الرمزية المستخدمة بالروايه.... يعني الكتاب ما خرج ينحطو بخانة الفنانين. مستحيل ما تتحيّز لنوع من الكتّاب يتناسب مع فكرك و ايديولوجيتك

طبعا هالشي لا يعني الرفض أو المنع أو الحجب أو أي شي من هالقبيل....

بعدين ضعت انا... انت عم تحكي عن المنع على مستوى حكومي و وللا كيف؟

[phoenixbird]

كاتب النص الأصلي : yass

أي لا تضيع حجي....

الكتّاب غير وضع صارو, لا تخلطهون مع الفنانين... الكاتب حتى لو روائي فايديولوجيتو راح تطغى على اسلوبو أو أفكارو و حتى الصور الرمزية المستخدمة بالروايه.... يعني الكتاب ما خرج ينحطو بخانة الفنانين. مستحيل ما تتحيّز لنوع من الكتّاب يتناسب مع فكرك و ايديولوجيتك

طبعا هالشي لا يعني الرفض أو المنع أو الحجب أو أي شي من هالقبيل....

بعدين ضعت انا... انت عم تحكي عن المنع على مستوى حكومي و وللا كيف؟

لا سيدي عم بحكي عن المنع من الطرفي الحكومي والشعبي

[yass]

كاتب النص الأصلي : phoenixbird

لا سيدي عم بحكي عن المنع من الطرفي الحكومي والشعبي

المانع الحكومي مالو أي داعي من أي نوع (غير حالات تحديد السن الادنى للأفلام و بعض الموسيقى) غير هيك مافي أي مبرر لتدخّل حكومي في أمر ابداعي

المنع الشعبي ما فهمتو كتير.. بعرف انو كل واحد بيقرا و بيسمع و بيشوف اللي بدو ياه و أنا كانسان بالغ و عاقل ما في حدا بيقدر يقلي اقرا أو لا تقرا...

[phoenixbird]

كاتب النص الأصلي : yass

المانع الحكومي مالو أي داعي من أي نوع (غير حالات تحديد السن الادنى للأفلام و بعض الموسيقى) غير هيك مافي أي مبرر لتدخّل حكومي في أمر ابداعي

المنع الشعبي ما فهمتو كتير.. بعرف انو كل واحد بيقرا و بيسمع و بيشوف اللي بدو ياه و أنا كانسان بالغ و عاقل ما في حدا بيقدر يقلي اقرا أو لا تقرا...

المانع الحكومي معك حق

بس الشعبي شو بتفس الدعوات لسحب الجنسية وحرق الاعمال وتوصل لمقاطعة غريبة عجيبة
طبعا عم بحكي بسوريا

[yass]

كاتب النص الأصلي : phoenixbird

المانع الحكومي معك حق

بس الشعبي شو بتفس الدعوات لسحب الجنسية وحرق الاعمال وتوصل لمقاطعة غريبة عجيبة
طبعا عم بحكي بسوريا

ثقافة الغوغاء و الرعاع.... هاد تفسيري و الله ما عندي غيرو

[phoenixbird]

كاتب النص الأصلي : yass

ثقافة الغوغاء و الرعاع.... هاد تفسيري و الله ما عندي غيرو

صحيح يا حجي صحيح بس هاد الامر الواقع شو فيك تعمل قدامه؟

[dimozi]

على أساس هاد الموضوع لازم تكون شعبية بسام كوسا و خالد تاجا و مي سكاف بالأرض بالبلد, لأنن من الموقعين على بيان ال 99 .



فشلون زبطت معكن؟؟؟؟؟؟

[ظل جيفارا]

برأيي المشكلة بشعبنا وبطريقة تفكيرنا .... يعني الفنان انسان قبل ما يكون فنان وبإعتباره مرهف الاحاسيس فلا يملك سوا ان يشعر بهموم الناس وتدخل إلى داخله عبر خلفيته الثقافية والإجتماعية فينتمي لمجموعة من الأراء ومن الطبيعي ان يعبر عنها عبر فن معين
ولكن المشكلة ونعود بها إلى إلغاء الأخر ... دائما ابدا ..
تحياتي الحارة .
ظل جيفارا

[phoenixbird]

طيب يا جماعة اسمعولي

شدد عضو "اللقاء الديمقراطي" النائب وائل أبو فاعور على ضرورة مشاركة اللبنانيين في الذكرى الثالثة لاغتيال رئيس الوزراء الأسبق رفيق الحريري، محذرا من ان "عدم المشاركة تعني تراجع مسيرة الاستقلال اللبناني خطوة الى الوراء". ولفت في حديث النائب أبو فاعور الى "أخبار المستقبل" انتقاده للكلام الذي أدلت به الفنانة ماجدة الرومي في ذكرى اغتيال النائب والصحافي جبران تويني، مشددا على "رفض أن تتم مخاطبتنا بنفس المنطق الذي يُخاطب به باقي النواب الذين يتنقلون بسياراتهم بشكل طبيعي فيما نحن نتعرض للاغتيال"، ومعلنا عدم القبول بهذا "التعميم الذي فيه ازدراء واحتقار للناس"

واللي حكته الست ماجدة هوي التالي

"كم قلب بعد لازم ينكسر؟ كم بيت بعد لازم يخسر ويخرب؟ كم لبناني بعد لازم ينام على الهمّ ويقوم على الغم؟ كم شب وصبية لازم يفلو لتجتمعو وتتفقو وتقررو تنهو هالوضع المأسوي يللي نحن فيه وهالانقسام المرعب. كيف فينا ننقسم لدرجة لاقي ناس يقولولي اوعِك تروحي تصلي بجناز بيار (الجميل)، اوعا تروحي تحكي بذكرى جبران بيفكروكي ضد التانيين. مين التانيين؟ مين الاولين؟ مش كلكن لبنانيي؟ وكل هالشهدا يللي ماتوا، بصدق، وبلا تجميل حكي، من اقصى جنوب لبنان ومجازر اسرائيل، لاقصى الشمال وشهدا الجيش الحبيب، لكل يللي ماتوا من خيرة شبابنا... مش كلن إلنا وحرقو القلب، وذنبن بس انن لبنانيي؟

ما عدنا نلتقي لنترحم ع الشهدا. صار في شهيد إلن، شهيد إلنا. شو مؤلم هالحكي، وانا برفضو. انا بعلن من هون انو شرّفني رتّل لبيار، وبيشرفني احكي بجبران. واذا كنت متهمة اني لبنانيي، نيالي. ما بقا يهمني مين يلي بدو يزعل من هالحكي. بعرف انو في ناس رح يزعلو، بس مش هاممني كثير مين رح يزعل، لانو بعد 30 سنة حرب يأسنا، وما بقى يهمني اشهد لاي انسان ع الارض، خاصة مش بالسياسة. بشهد لربنا، وربنا بيحب السلام، وهو ضد العنف، وبيقللي اليوم اشهد للحق ولخيرة شبابنا، لسيادة هالارض وحريتها متل ما بيليق بمواطن عندو كرامة، لهالشعب اللبناني المعذب الشهيد يللي بيموت كل يوم الف موتة، وبيعيش من حلاوة الروح وبيكفي...

بتقولو انكن مؤتمنين على سيادة لبنان وعلى سلامتنا... انتو فتفتو هالبلد وبدكن تعملو بلد على قياس الطوائف والاحزاب، على قد الكرسي. بس هوي اكبر بكثير. انتو يللي فرقتونا وقسمتونا بقلب البيت الواحد، ويللي شرذمتونا وربطتو قصتنا بقصص نص الكرة الارضية... ليش لازم نكون نحن ورقة بيلعبو فيها الكل؟ ليش انتو بتقبلو بانقسامكم 30 سنة وتعلنو للدني كلها انكن مش قادرين تديرو شؤون الوطن. ويمكن هيدا المطلوب بالاخير. واذا كان هيك، انتو بتعملوه؟ انتو مؤتمنين على حريتنا وسيادتنا واستقلالنا. انا هون تا قول بيكفي... تركونا نعيش.

باسم الحق، وباسم ربنا يللي بتقولو انكن بتحبوه وبتتحركو باسمو، تركو هيدي الدولة دولة. من مصلحة مين يكون هالوطن بلا سقف، ويصير مية دولة؟... انا هون لناشدكم باسم الرب لتعملو السلام. عم تخنقونا لما يضل فينا حدا يسمعكن. وانا هون لجبران ، لقلو يا صديقي وخيّي جايي حييك، والقلب واحد. على قد ما رح تبقى قلوبنا قلوب، انت فيها ومنصان بالوفا. لي؟ لانو اذا ما قدّرنا شب مثلك بيسوا دموع العينين، واذا ما وقفنا اليوم هالوقفة لالك، وانت الملك يللي غاب عنا، رح نوقف لمين؟ ليللي دبحونا من الوريد للوريد؟ مش رح نوقفلن. بطلع بصورك ع الطريق وبستحي يا جبران قلك ان دمك ما رح يروح هدر. بس بقلك باسم ربنا الحي الباقي للابد، جايي إيام وبجزم بدها تجي، يبزهر فيها دمك بثلاث ألوان العلم وبس، بيوم الحرية والسيادة يللي بدو يجي، مهما طال الوقت، لانو ما حدا بيكبر تيصير بحجم لبنان... ولبنان ما بيزغر. كلن رايحن وهوي باقي. ومطرح ما لبنان باقي، رح تبقى يا جبران، مع الكبار يللي شهدو لكرامتو ورسالتو المتميزة بالارض...".

[phoenixbird]

طيب هي شو بتسموها ؟

[free_worod]

لك نفسي اصحى يوم من النوم وافتح التلفزيون ع الاخبار ويكون اول خبر بسمعه عن شجرة ما كانت تعمر وبعد 10 سنين في عليها زهر
لاني زهقت اخبار القتل والدم والحرب
وتعبت