القرميدة المكسورة

**krimbow** · 26/03/2006

النعيق
(تحشيشية، فاشلة، تصدر غالبا بعد هزة بدن)

العدد 4
عدد خاص

القرميدة المكسورة، هيي واحدة من اروع روايات الاديب اللبناني (و لو انو لما كانوا يسألوه كان يقول انو هوي سوري متل ما جبران سوري) الراحل "سعيد تقي الدين"

سعيد تقي الدين درزي، لما كان صغير، كان ينزل كل يوم من ضيعتو على مدرستو يللي ببيروت.
ع الطريق كان في دير مسيحي قديم، و كان هالدير يغيظ سعيد لأنو كان قرميد سطحو مكسور و حالة الدير مزرية، و كان يستغرب ليش هيك المسيحيين هاملين هالدير بالذات.
ببلد متل لبنان، الطائفية فيه متل الخبز، كتير بيهتموا بدور العبادة لدرجة انو مستحيل تلاقوا معبد إلا و احلى من قصر يلدز
إلا هالدير، عتيق، مبهدل، لدرجة انو حتى قرميد سطحو مكسور

كبر سعيد و تخرج، و تعين سفير لبنان بالفليبين، بالاضافة انو كان صحفي يكتب بجرايد لبنان، و يهتم كتير بالسياسة.
بهالوقت، بزغ نجم علامة كبير اسمو انطون سعادة، اسس حزب علماني اسمو الحزب السوري القومي الاجتماعي، بيرفض الطائفية و الاقطاع و كل الاوبئة الاجتماعية يللي ما زلنا ليومنا هاد منعاني منها، و هيي السبب الاساسي بتخلفنا.

سعيد كره انطون سعادة اكتر من كرهو للدير المبهدل لمجرد انو انطون سعادة كان مسيحي، و كان ... طول فترة تواجدو بالفليبين يكتب مقالات يهاجم فيها سعادة، و كان دايما يختم كل مقالاتو بالعبارة التالية:
"عندما اعود إلى لبنان، سأعلق رأس هذا الولد (بيقصد انطون سعادة، كان دايما يلقبو بالولد لصغر سنو) على خشبة في رأس بيروت"

بتموز سنة 1949، تم اعدام انطون سعادة، عن طريق شنقو بمنطقة راس بيروت
و لما سعيد تقي الدين قرا الخبر صعق، لأنو تنبأ بأنو سعادة رح ينعدم شنقا براس بيروت تحديدا، و لمعلوماتكم، ما تم اي عملية اعدام وحدة بمنطقة راس بيروت إلا عملية اعدام انطون سعادة

بعد هالحدث، استقال سعيد و رجع ع لبنان، و صار يقرا فكر سعادة و مبادئ حزبو، ... و اقتنع فيها و انتمى للحزب السوري القومي الاجتماعي.
و بيوم من الايام و هوي و راجع على ضيعتو، و هوي ع الطريق شاف الدير القديم، بس هالمرة كان مرمم و مصلحين قرميدو و منظر الدير من احلى ما يكون، انبسط انو تصلح الدير، و فات عليه و سأل الخوري
سعيد: الله معك ابونا
الخوري: الله معك يا ابني
سعيد: و اخيرا رممتوا الدير، ايمت رممتوه ؟
الخوري: آخر مرة رمموه متل مو مكتوب بالسجلات كان سنة 1860
سعيد: 1860 ؟؟؟!!! مستحيل!!!!، ايام الدراسة من 10 سنين كنت كل يوم امرق من هالدير و كنت شوفو مبهدل
الخوري: يا ابني، صرلي عم اخدم بهالدير اكتر من 40 سنة، و من يوم ما فتت عليه لليوم، ما تغير حجر واحد فيه

حسب ما كتب سعيد تقي الدين، الدير فعلا ما تغير فيه شي، يللي تغير هوي افكار سعيد تقي الدين نفسو و نظرتو للامور
بالماضي، كان الحقد الطائفي الاعمى و كرهو للمسيحيين يخلوه يشوف الدير مبهدل، بس بعد ما لغى الطائفية من حياتو... صار يشوف الدير على حقيقتو

بتمنى لو يجي اليوم يللي اقدر الغي الطائفية من حياتي متل اديبنا العظيم سعيد تقي الدين، ساعتها، اكيد، رح اقدر شوف الامور على حقيقتها و بجمالها الطبيعي

فشل، و فاشلون:
بناءا على طلب مشرفنا الغالي yass رح نزل هالزاوية بهالمجلة المبهدلة
بس اليوم رح احكي عن سبب اختياري للفشل بمانشيت المجلة

حسب اكتر الاحصائيات تفاؤلا، عدد الناجحين بهالحياة لا يتجاوز الـ 10% من الناس، كل الجوائز الهم، كل المقالات بتحكي عنهم، كل الدنيا بتدور حواليهم
اما هالتسعين بالمية المساكين ... هدول ولاد البطة السودا

و بما اني من انصار "توم" ضد انتصارات "جيري" المتلاحقة،
و من انصار "المدمرون" ضد "جونغر"
و من انصار الفلسطينيين ضد الاسرائيليين
و من انصار المعارضة بسوريا ضد الموالاة و المخابرات
و من انصار "الضعفاء" اينما وجدوا ... لسبب بسيط اني واحد منهم

مشان هيك قررت انو تكون هالزاوية من اليوم و طالع، هيي تسليط ضوء على بعض الفاشلين، او على فشل بعض الناجحين

عقل بالكف: (زاوية مستقلة، لا تعبر بالضرورة عن رأي كاتبها)
خدام من باريس، يريد انقاذ السوريين من الجوع
البيانوني من ميونخ، يريد انقاذهم من الكفر
رفعت من ماربيا، يريد انقاذهم من الامبريالية
البعثيون من دمشق، يريدون انقاذهم من الذل و الهوان
الغادري من واشنطن، يريد انقاذهم من الديكتاتورية
اللبواني من السجن، يريد انقاذهم من السجون
انور البني، يريد انقاذهم من الظلم

اما السوريين انفسهم، يريدون من ينقذهم من جميع هؤلاء

في ناس من كتر ما حبوا وطنهم.................. قضوا عليه (اسامة الرحباني)

شاخصة مرورية: (القيادة فن و ذوق و اخلاق)
اخي السائق، افضلية العبور للقادم من جهة اليمين،............. و لأبن الوزير، و ابن المدير، و ابن الضابط، و ابن عضو مجلس الشعب، و ابن ....
باختصار... افضلية العبور للجميع ما عداك

و العقل زينة

Syrian__Angel · 26/03/2006

رائعة رائعة رائعة ....

تسلم ايديك كريم على هالمجلّة " المرتّبة "

اقتباس:

اما السوريين انفسهم، يريدون من ينقذهم من جميع هؤلاء

انشالله ...

محمد ابراهيم · 26/03/2006

برافو كريم هالعدد افضل من الاخير
في تطور سريع

احتمال بعد اسبوع تروح تكتب لمجله كبيرة
ويمكن عاخر السنه تكتب فالنيوز ويك او واشنطن بوست (بشرط تستمر فالتقدم كل يوم )صعبتها عليك شويه..
بس مشان توصل للعالميه لازم يكون طريقك صعب شويتين تلاته ويمكن اربعه

**krimbow** · 26/03/2006

شكرا انجل و شكرا محمد على تشجيعكم

بس ما بتصور انو ع آخر السنة رح اكتب بالنيوز ويك، اصلا انا ما بحبها لهالمجلة كتير

عموما الكتابة لما تكون غاية بحد ذاتها، بتصير كتير تافهة

المهم عندي هوي الحقيقة... لأني بآمن انو "لا عقيدة اسمى من الحقيقة"

و شكرا الكم مرة تانية

**krimbow** · 26/03/2006

نسيت نزللكم كاريكاتور العدد

مشان هيك رح نزلو هون

ملطوش من موقع الدومري

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

Willi · 26/03/2006

انو نطرتني من مبارح على نار لاقرا الموضوع

بس محتار علق على الطائفية
ولا على الفشل
ولا على السوريين

المشكلة انو التلات مجموعات انا منهون
فما بقدر علق على حالي

انو تحياتي الك وناطرين الاعداد الجاي

Syrian__Angel · 26/03/2006

كريم ... كاريكاتور العدد المفروض كان ينزل مع العدد الماضي .. كمساعدة بالسؤال

صياد الطيور · 26/03/2006

استاذ كريم تقبل تحياتي العظيمة على موضوعك الجبار .....

رغم اني قررت من فترة الإبتعاد عن المولضيع السياسية ووجع الراس ( حتى أخبار بطلت تابع )
بس مافيي .. متل ما بيقول المثل ( الشــر *** ) اذا تابت بتطلع من الدرخوش )
وهي عم يصير فيني ...

المهم مالنا فيها .... الله يقويك

yass · 27/03/2006

يا معلم!! فعلا شي حلو كتير ... و مشكور على الأخذ باقتراحي

بانتظار أعداد قادمة

توت توت توت · 27/03/2006

قوية يا معلم .... رووووووووح والقلب داعيلك ...

**zen** · 27/03/2006

يعني
شو قول
ما بعرف
شكرا كركوبة
عمل رائع واكتر
من بعد اذنك بدي صير استخدم اعداد مجلتك وابعتها بالايميل
موافق
قلي بسرعة مشان ما الطوش بدون حقوق

**krimbow** · 27/03/2006

اقتباس:

كاتب النص الأصلي : zen

يعني
شو قول
ما بعرف
شكرا كركوبة
عمل رائع واكتر
من بعد اذنك بدي صير استخدم اعداد مجلتك وابعتها بالايميل
موافق
قلي بسرعة مشان ما الطوش بدون حقوق

شكرا الكم كلكم

بالتأكيد موافق زين ... كحقوق ملكية لو بدي دور عليها ما كنت نزلتها باخوية، بعد ما نزلت باخوية صارت ملك كل الاخويين

عموما هالشي اكيد بيفرحني