مثلي الاعلى

**krimbow** · 25/03/2006

النعيق
(تحشيشية، فاشلة، تصدر غالبا بعد هزة بدن)

العدد 3

كتير ناس بيسألوني "مين مثلك الاعلى"؟؟
ما بعرف ليش بينصدموا و بيستهجنوا و حتى ممكن انو يستنكروا جوابي الدائم "ما بعرف"
انو لازم يكون عندي مثل اعلى يعني ؟؟
لا و لازم يكون هالمثل الاعلى هوي شخصية حقيقية تاريخية ... و فوق كل هالشي مشهورة، و في مين كاتب سيرة حياتها، لحتى يعرفها السائل، يعني ما بيصير يكون شي شخصية من بنات افكاري، و ما بيمشي الحال يكون شخصية مغمورة

و بيصير جوابي محرج اكتر لما يكون السؤال "شو هيي حكمتك المفضلة"

طيب هاتوا لشوف ... مين بترشحوا انو يكون مثلي الاعلى ؟؟

بيعجبني سرجون لما وحد بلادنا لاول مرة (و آخر مرة) بدون ما يكون هالموحد شي غازي اجنبي

بتعجبني حكمة الاسكندر لما قال "الضربة التي تصيبني و لا تقتلني، استمد منها قوتي".. طموح ما بعدو طموح

بيعجبني هلمقار بعل لما عرف انو عدو قرطاج الاول هوي روما، و لو انو هاني بعل ما كان اناني و مشي على خطا ابوه كان التاريخ اليوم مكتوب باسلوب تاني ... يمكن اكتر انسانية

بيعجبني يسوع لما قال "كونوا ودعاء كالحمائم، و حكماء كالافاعي" يعني بحكمتو هي تفوق على ميكافيللي بذاتو بميكافيلليتو ... و مع ذلك، كل المسيحيين بالعالم بيعتبروه "نبع المحبة"

بيعجبني محمد بانتقالو من دوغمائية دينو لبراغماتية حكمو بمجرد انو غير مكان اقامتو، من مكة ليثرب (المدينة المنورة)

بتعجبني سيرة حياة كتير ناس، دافينشي، يللي على الرغم من عداؤو الشديد للفاتيكان، كان من اهم الفنانين يللي كرمهم باباوات الفاتيكان قبل غيرهم.
عمر الخيام، يللي كتب روائع الحكم على صفحات حرير لحتى ما يطير راسو بسبب افكارو العبقرية.
جان دارك، يللي فاقت شجاعتها شجاعة جميع رجال عصرها.
مارك توين، يللي ما صدق اي كلمة بالكتاب المقدس و قرر انو يشوف بعينو الحقيقة بعد اكتر من 1800 سنة.
ديكارت، يللي شك بكل شي ما عدا مقولة وحدة "وحدها الحقيقة تمنحنا الحرية" و قرر انو يبحث عن الحقيقة لحتى يوصل للحرية.
مي زيادة، يللي احبت شخص لم تره (جبران) اجمل حب ممكن نسمع عنو (و الاذن تعشق قبل العين احيانا).
ارنست همنغواي: لما قرر انو يكون حر حتى لدرجة انو اختار يكون حر حتى وقت مماتو و انتحر.
انطون سعادة: رجل بمعنى الكلمة، قال و كان عند قولو ... هوي و يسوع هنن الشخصين الوحيدين بالتاريخ يللي ماتوا بسبب افكارهم الشخصية و ليس بسبب افكار غيرهم.
عاصي الرحباني: العصامي الذي اعطى للتراث الغنائي اللبناني ابعادا لا حدود لها.

و كتير كتير ناس غيرهم

بقا بالله عليكم ... مين ممكن اني اعتبرو "مثلي الاعلى" ؟؟؟
مين ممكن اني فضلو عن غيرو بين هالكم الرائع من العظماء و العظيمات ؟؟؟؟

عقل بالكف
(الافكار الواردة في هذه الزاوية لا تمثل بالضرورة رأي صاحبها)

مع مطلع القرن الماضي (القرن 21، يعني من 1900 لحتى سنة 2000) شهد الشرق الاوسط بزوغ عمالقة في جميع المجالات
3 رجال قيل عنهم ان الزمن لا يجود بمثلهم إلا مرة كل 1000 عام، انطون سعادة، كمال جنبلاط، فارس الخوري.
ملحنين، ابحروا بمحيطات رائعة من الانغام، عاصي الرحباني، محمد عبد الوهاب، كمال الطويل، نجاح الموجي، فيلمون وهبي
مطربين و مطربات، كدنا ان نحنط حناجرهم من كتر عشقنا لهم، فيروز، ام كلثوم، وديع الصافي، عبد الحليم حافظ، نجاة الصغيرة، وردة، ... الخ
شعراء، كادوا ان يبلغوا (و برأيي بلغوا) مرتبة النبوة باشعارهم، نزار قباني، مي زيادة، محمد الماغوط، ادونيس، بدر شاكر السياب
تربويين، عسكريين، سياسيين، الخ الخ الخ

و مع ذلك كلو
نحنا شعوب على درجة من التخلف و الجهل و الامية ... و الحقد القبلي الاعمى، لدرجة انهم مروا من حياتنا و كأنهم زخة مطر صيفية، لا و فوق كل هالشي مننزعج لأنو بللونا بابداعاتهم

بذات الوقت، بزغ بالولايات المتحدة الاميركية،بذات الحقبة التاريخية، رجل انتهازي واحد يدعى "هنري كيسنجر" ركعنا و ركع العالم باسرو

يا للعار
يا للعار

استراحة العدد

من هو ؟
رجل اعمال سوري معروف، صار ملياردير بفترة زمنية قياسية، عندو شركات بجميع المجالات، من الخليوي، إلى الاسواق الحرة، إلى المدارس

الاحتمالات:
1- نضال معلوف
2- احمد كلاشينكوف
3- رامي مخلوف
4- مواطن منتوف

(الحل في العدد القادم)

و العقل زينة

Willi · 25/03/2006

انو عجبتني شلون انتقلت من مثلك الاعلى لحالنا اللي ببكي
وبعدها كمان سؤال

بعدين يا زلمة انت اللغة اللي بتستعملها غريبة عجيبة
يعني شو دوغمائية وبراغماتية
الله يخليلنا ياك

انو بالفعل انا معك بجوابك
انا ما هاد السؤال بالتحديد ما بلاقيلو جواب
يعني ممكن تعجبك صفات معينة بشخص معين وتحاول انها تكون فيك
بس انو شخص يكون مثلك الاعلى هاي بعيدة شوي
يعني ما حدا مننا كامل وما حدا فيه الصفات كلها اللي انا مثلا بحب تكون فيني
(كان في موضوع عن المثل الاعلى بالصالون من شي كام يوم)
وطبعا صار جدل بين انو ممكن شخص يكون مثلك الاعلى ولا مو ممكن

اقتباس:

رجل اعمال سوري معروف، صار ملياردير بفترة زمنية قياسية، عندو شركات بجميع المجالات، من الخليوي، إلى الاسواق الحرة، إلى المدارس

الجواب هوي رقم 3
رامي مخلوف

هات الجائزة لشوف

**krimbow** · 25/03/2006

خيو بخصوص الدوغمائية و البراغماتية ... فيك تشوف معانيهم بمصطلحات منبر اخوية المثبت فوق بالمنبر

بعدين شو هي جائزة ؟؟؟ وين قريت انو في جائزة ؟؟؟

Willi · 25/03/2006

شبعرفني فكرت في جائزة

**krimbow** · 25/03/2006

اقتباس:

كاتب النص الأصلي : Willi

شبعرفني فكرت في جائزة

اي تكرم عينك بعطيك جائزة

بتربح معنا اشتراك لمدة عشر سنين بمجلة "النعيق"

و اشتراك لمدة 6 شهور بمجلة "النقيق" ... المخصصة للاطفال

Willi · 25/03/2006

اي مو مشكلة
الجائزة بقيمتها المعنوية
مو اي شي تاني

بعدين كلشي منك حلو

**krimbow** · 25/03/2006

اقتباس:

كاتب النص الأصلي : Willi

اي مو مشكلة
الجائزة بقيمتها المعنوية
مو اي شي تاني

بعدين كلشي منك حلو

يسلملي المقهور انا

fady juventus · 25/03/2006

الله الله شو هالحلو هاد
بس أنا مستغرب كيف مالي خبر إنو في عددين سابقين!! يا ريت يا كريم تحط روابكن

عجبني كتير العنوان:

اقتباس:

النعيق
(تحشيشية، فاشلة، تصدر غالبا بعد هزة بدن)

كمان عجبني تقسيمات المجلة " عقل بالكف ، استراحة العدد "

عن جد الله يعطيك العافية.

yass · 25/03/2006

فعلا رائعة يا كريم , كالعادة...
مصطلح المثل الأعلى لا أحبها اطلاقا لأنني أعتبره قاتل لأي شكل من أشكال الفكر الابداعي, دائما سنحاول تقليد المثل الأعلى بكل شيء ودون البحث عن أساليبنا الشخصية.
أقترح لأحد الأعداد القادمة موضوع عن "الفشل" و أثره في حياتنا ... شخصيا أعتبر الفشل أحد أكبر محركات الانساني و أريد رأيك

تحياتي

**krimbow** · 26/03/2006

اقتباس:

كاتب النص الأصلي : fady juventus

الله الله شو هالحلو هاد
بس أنا مستغرب كيف مالي خبر إنو في عددين سابقين!! يا ريت يا كريم تحط روابكن

عجبني كتير العنوان:

كمان عجبني تقسيمات المجلة " عقل بالكف ، استراحة العدد "

عن جد الله يعطيك العافية.

شكرا معلم ... بخصوص الاعداد الماضية ، هيي اكتر من عددين .. عندك العدد زيرو (تجريبي) و في عدد خاص اهداء
و هي اللينكات

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

هلأ بخصوص العنوان .. للامانة الادبية فكرة العنوان ملطوشة (بس بتصرف) من مجموعة مقالات للفنان وليد قارصلي

Joe · 26/03/2006

يعطيك العافية كريم... عن جد خواطر ظريفة كتير

Willi · 26/03/2006

لعمى
مع اني قريتهون كلهون
بس هلق لاشتلقت انك عم تكتب مسلسل

dadoda · 29/03/2006

والله اعجبت كثيرا بما كتبت
وانا شفت المواضيع الماضية وكذلك اعجبتني
بالنسبة للمثل الاعلى والقدوة نادرا ما قد نجد شخصية تتمتع بالمواصفات الكاملة
وفي بعض الاحيان تمر عقود لتجد شخصيات مثالية ممكن ان تتخذها قدوة
فمثلا من الناحية القيادية لم اجد في عصري رجلا مثل السيد حسن نصر الله ليكون قدوتي

مشكور وتحياتي

سرسورة · 30/03/2006

متل العادة....كريمبو بيطيرلي عقلي بكل شي بيكتبو....الله يعطيك العافية...وما تتاخر علينا بالعدد الجاية.....

**zen** · 08/04/2006

يسلموا كريم
كلام بمحلوا

me2 · 08/04/2006

كريم : حكيت اللي ما عم يعرف كتير منا يحكيه ..

MarieSou · 08/04/2006

اقتباس:

حكيت اللي ما عم يعرف كتير منا يحكيه ..

مي تو انت عم تحكي هيك انت حكيت كلشي و ما خليت ما شاالله

me2 · 08/04/2006

اقتباس:

كاتب النص الأصلي : MarieSou

مي تو انت عم تحكي هيك انت حكيت كلشي و ما خليت ما شاالله

أنا بحكي كتير و كل يوم .. بس كريم بخيل و بيطل متل البدر كل كم أسبوع ...

وأنا بستمتع بصراحة بكل حكي حلو و ذكي حتى لو مسبة ألي .

بس على كل حال شكرا ألك

... ولاتخافي ما حدا حاسدني ...

أدوات الموضوع
عرض صفحة الطباعة إرسال هذه الصفحة إلى صديق