ذكريات رمضانية

[yass]

غدا أول أيام رمضان.. أعاده الله علينا و عليكم بالصحة و السعادة و العافية, و في هذا الشهر المميز للمتدينين منهم و غير المتدينين يتغيّر كل شيء في بلادنا, حتى نظام التوقيت و أوقات النوم و الصحو و العمل و الدراسة و كل شيء.


أعيش خارج سوريا منذ سنين عديدة, و لذلك فإن رمضان كغيره من الأيام بالنسبة لي كوني أعيش في اسبانيا و أنا علماني غير مؤمن بالأديان إلا كمرحلة من مراحل التطور الإنساني, لكن هذه قصة أخرى, لكنني دائما أتذكر أيام رمضان بحنين, لأنني أعتقد أنه ليس شهرا دينيا فقط بل هو طقس اجتماعي لعله الأهم في البلدان ذات أغلبية سكان إسلامية (كالكريسماس في بلاد الغرب, معناه الديني مقتصر على المؤمنين و المتدينين, لكنه طقس اجتماعي).


أتذكر عندما كنت صغيرا و كنا نذهب إلى المدرسة في رمضان, كانت الدراسة و الوظائف أخف قليلا من الشهور الأخرى, فالأستاذ أو المعلمة "صائمة" و "تعبانة". و في المدرسة كذلك أتذكر طرق الأطفال لمعرفة من فيهم الصائم من غيره, و منها طريقة فحص اللسان, فإن كان أبيض اللون فيفترض أن صاحبه صائم, و يا ويل من لا يكون بياض لسانه واضح, لأن الفسحة ما بين الدروس ستكون جحيما يلاحقه فيه زملائه وهم يغنون له "يا مفطر يا دم.. يا بياع السم".


عند خروجنا من المدرسة كنا نهرول إلى البيت بسرعة على عكس عادتنا في باقي أيام السنة, ففي تلك الأيام لم يكن هناك ستالايت و فضائيات بعد, و كانت فترة الظهر مخصصة لاعادة بث مسلسلات غوار الطوشة القديمة, و بعد غوار تبدأ برامج الأطفال التي كانت تبدأ الساعة الثالثة على عكس باقي السنة حيث كانت تبدأ في الرابعة و نصف, و بعد برامج الأطفال يبدأ برنامج "طبق رمضان", و مع بدايته تبدأ مفاوضات الأهل مع أحد الأولاد لكي يذهب لشراء المعروك, غالبا ما تبدأ المفاوضات سلسة هادئة و سرعان ما تتحول إلى زمجرة تجعلك تتحوّل إلى طائرة نفاثة تطير نحو محل المعروك (طقس رمضاني آخر, دائما الأهل يفضلون المعروك المصنوع في محل بعيد عن المنزل و لا يحبون معروك المحل القريب, و لذلك من الممكن أن تنظم رحلات جماعية لأطفال الحارة لشراء المعروك و تتخلل هذه الرحلات مغامرات و تسلية كثيرة).


بعد المعروك هناك طقس آخر يكتشفه من يستعمل السيارة أو المواصلات في الفترة الحرجة (تبدأ قبل الافطار بساعة تقريبا), حيث يتحوّل السائقون إلى مجانين يسابقون الريح للوصول إلى المنزل قبل الافطار. تذكرت هذا الطقس منذ فترة قليلة, بالتحديد يوم نهائي كأس الأمم الأوربية الذي لعبته اسبانيا و ألمانيا و انتهى بفوز الاسبان, كنت عائدا من زيارة لمزرعة خالي قبل المباراة بنصف ساعة, و كان كل من يقود حولي مسرعا و كأنه أصيب بمس من الجنون (رغم أن سائقي المنطقة التي أعيش فيها يتصفون بالهدوء و احترام القوانين) فقلت لأختي:" حاسس حالي برمضان قبل الافطار".


ثم الافطار..

عدد كبير من الأطباق و الصحون و السلطات و الفتوش (أغلبها لا يمس من قبل أحد) .. ثم كاسة شاي.. ثم لعبة طابة بالحارة حتى يبدأ المسلسل الرمضاني الوحيد (في تلك الفترة), أغلب هذه المسلسلات كان عن أيام الاستعمار الفرنسي أو الاحتلال العثماني, تسعفني الذاكرة باسمين: هجرة القلوب إلى القلوب (90 أو 91), و رائعة حنا مينا "نهاية رجل شجاع" (95 .. أعتقد).


اعتبارا من انتصاف شهر رمضان تبدأ التحضيرات للعيد, حيث تمتلئ الأسواق بالناس (20% يشترون- 80% يتسكعون) و يبدأ البحث عن ثياب العيد للصغار, و للكبار أحيانا كذلك..


في الأيام الأخيرة من رمضان هناك ما كان ينبئ الأطفال بقرب العيد: تبدأ البقاليات بوضع بسطات ضخمة أمامها تحوي مختلف أنواع السكاكر و الحلويات (ضيافة العيد).. فرش البسطة في بقالية الحارة كان دغدغة لروح الطفل الذي كنت.. حيث أنه يشير إلى أن العيد قد اقترب جدا..


ثم هناك طقوس يوم العيد... لكن هذا موضوع نتركه لنهاية هذا الشهر..


مع أنني نوستالجي إلى حد ما لكنني لست ممن يقول أن الزمن الماضي كان أفضل.. فقط أقول أنه كان بالنسبة لي أكثر جمالا.. لأنني كنت أراه بعيون طفل, من الممكن أنه كان زمنا أقل استهلاكية و أقل تجارية... من الممكن أنه لم يتغيّر أبدا, بل تغيّر المراقب...


طقس رمضان, بغض النظر عن المعنى الديني العائد لكل شخص, هو جزء من ثقافتنا و جزء من تراثنا الذي يجب الحفاظ عليه قدر الامكان لأنه طقس جميل و ممتع..






كل عام و أنتم بخير...و الله يسعدكون




Yass

[Reemi]

فعلا شهر رمضان..مميز بامتياز ... انا وعيلتي ما بنصوم ...بس فعلا احب ما عقلبي يجي هالشهر ..وبكون ناطرتو نطاره..بحس فيه بالهدوء والسكينه ..بنبسط للعالم الي جد عم تحب انو يجي رمضان لتزور بعضها ويجتمعو سوى ..وبنبسط للعالم الاقل حظا الي بيتمنو بتكون كل ايام السنه رمضان..لانو العالم الي فوق ما بيذكروهن غير بهالشهر بالتبرعات وما اليه .. بنبسط للولاد بايام العيد ..انو الفرحه بتنط من عيونون... اولهن اختي..بيتنا ما فيه اي جو من اجواء رمضان مع ذلك اختي الصغيره بس يجي العيد بتشتري تياب حتى ولو كانت مشتريه قبل يومين بس انو المهم عالعيد تشتري واول يوم تفتح المدرسه قال بيروح الكل بتياب العيد والشاطر فيهن مين تيابو احلى ...

انا بحب هالشهر جداا ..بالي بيرتاح لسبب غير معروف بهالشهر ..

شكرا ياس وعقبال رمضان الجاي تيجي عالبلد وناخدك فتله تتذكر ايام الطفوله وتعزمني ع معروك رح موت واعرف شو هوي هالمعروك

ينعاد عالجميع بالصحه والعافيه

[yass]

رح موت واعرف شو هوي هالمعروك

اسمعو ع هالسمعة!! انتي شو نافعك انو خريجة جامعية ازا ما بتعرفي شو المعروك؟


الله كريم.. انشالله رمضان الجاي سوية..

[black_iris]

كاتب النص الأصلي : yass

أتذكر عندما كنت صغيرا و كنا نذهب إلى المدرسة في رمضان, كانت الدراسة و الوظائف أخف قليلا من الشهور الأخرى, فالأستاذ أو المعلمة "صائمة" و "تعبانة". و في المدرسة كذلك أتذكر طرق الأطفال لمعرفة من فيهم الصائم من غيره, و منها طريقة فحص اللسان, فإن كان أبيض اللون فيفترض أن صاحبه صائم, و يا ويل من لا يكون بياض لسانه واضح, لأن الفسحة ما بين الدروس ستكون جحيما يلاحقه فيه زملائه وهم يغنون له "يا مفطر يا دم.. يا بياع السم".

اي .. وفي طريقة تانيه .. لما يقرصو مفصل اصبع .. وقال لازم يضل مكان القرصه مبين .. وإلا ...

رمضان شهر خارج بنظامو عن جميع اشهر السنه .. كسر للروتين بشكل شامل
بشوفو شهر العيلة بإمتياز .. و كتير منا بشوفوه فرصه للبدايات الجديده

الله يعيدو على الكل بالخير

[zen]

كاتب النص الأصلي : yass

اسمعو ع هالسمعة!! انتي شو نافعك انو خريجة جامعية ازا ما بتعرفي شو المعروك؟


الله كريم.. انشالله رمضان الجاي سوية..

معقول ما بتعرفي المعروك ريمي
تركها ياسو
متخلفة بهاشغلات
يا ستي هي هو المعروك

تفضلي دوقي


وخدلك وحدة ياسو الك بلكي مافي منو باسبانيا

ورمضان كريم


طبعا ما راح انسى قللك انو المضوع حلو كتير وجد رمضان الو جوو حلو كتير انا مثلا ما بذكر الا وقت المسحر يجي على الحي اللي انا سكن في كان كل ما يوصل
شق الباب نتفة واتطلع عليه من بعيد كنت خاف منو
وهو ضرير ما بشوف
فكنا كلنا نخاف منو
بس هوي مات الله يرحموا
وكمااان قبل الفطور بشوي منززل انا ورفقاتي على الشارع الرئيسي عنا بتلاقي العالم كلها راكضة ومستعجلة وزحمة كتيررررررررررر
فوق العادة
واللي عم يشتري الناعم (ما تقولوا ما بتعرفوا)
وشي معروك وشي تمر هندي وشي وشي
خير الله

[MadMax]

كاتب النص الأصلي : yass

هو طقس اجتماعي لعله الأهم في البلدان ذات أغلبية سكان إسلامية (كالكريسماس في بلاد الغرب, معناه الديني مقتصر على المؤمنين و المتدينين, لكنه طقس اجتماعي).

هاد التعبير على طول بستخدمو
رمضان طقس عائلي و طقس اجتماعي ... قبل ما يكون ديني

[amey]

بتعرف أحلى شي برمضان إنه بجمع الكل فيو

حلوه ذكرياتك عن رمضان



في غنية لأحمد قعبور بحبا كتير

بسمعها ع السحور

رح حطلكن ياها لحتى تسمعوها معي


علو

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -
 

رمضان كريم

رح برجع بقلك من ذكرياتي بس بعد ما نام لحتى أقدر جمع شو رح اكتب

[*Marwa*]

اييه على رمضان وأيامو.جد بحبو يعني متل ما قلتوا مش بس مناسبة روحانية دينية ..وانما كمان طقوس اجتماعية كتير حلوة.. وبالفعل كل العادات بتتغير برمضان..يعني شوفوا على سبيل المثال انا..غريب اني صاحية وعم بكتب بهالساعة..بس لأنو صارلي صاحية من ساعة السحور

أتذكر عندما كنت صغيرا و كنا نذهب إلى المدرسة في رمضان, كانت الدراسة و الوظائف أخف قليلا من الشهور الأخرى, فالأستاذ أو المعلمة "صائمة" و "تعبانة". و في المدرسة كذلك أتذكر طرق الأطفال لمعرفة من فيهم الصائم من غيره, و منها طريقة فحص اللسان, فإن كان أبيض اللون فيفترض أن صاحبه صائم, و يا ويل من لا يكون بياض لسانه واضح, لأن الفسحة ما بين الدروس ستكون جحيما يلاحقه فيه زملائه وهم يغنون له "يا مفطر يا دم.. يا بياع السم".

إحنا عنا كانوا يقولوا "يا مفطر رمضان يا مقلل دينو..والبسة السودا تاكل مصارينو "

وحضرة جنابي ما بلشت أصوم الا لحتى صار عمري 12 سنة (لأنو اصلا الجو بالبيت ما بشجع عالصيام يعني صحيح في جَمعة حول السفرة وهيك بس فش حدا صايم )..فلما كنت بالابتدائي كنت الوحيدة اللي بتصومش..وشي مرة غلطت بصف رابع ابتدائي ورحت شربت مي وشافوني اولاد صفي..ويا عيني على فضيحة بكل ارجاء المدرسة حتى المدير عرف بوقتها ..

المهم بصف سادس قلت بدي اصوم..لكنني عاودت نفس الغلطة..وشربت مي سهواً..وبوقت الفرصة كمان..يعني كل المدرسة برا .. انو.. المنحوس منحوس ...

بس جد ما في احلى من رمضان وجمعاته..وسهراته..وايمانيات ه..جد فيو جو ايماني كتير حلو..بحس بتفاؤل لما بييجي وبعمل عندي محفز لتجديد الايمان..


رمــضــان كــريــم

[The morning]

ياس, فتحت مجاري الذكريات بنجاح مؤلم ..

. و في المدرسة كذلك أتذكر طرق الأطفال لمعرفة من فيهم الصائم من غيره, و منها طريقة فحص اللسان, فإن كان أبيض اللون فيفترض أن صاحبه صائم, و يا ويل من لا يكون بياض لسانه واضح, لأن الفسحة ما بين الدروس ستكون جحيما يلاحقه فيه زملائه وهم يغنون له "يا مفطر يا دم.. يا بياع السم".

اذكر انّو وقت كنت بالمدرسه كان عندي مشاكل صحيّه - فقر دم - و اهلي ما كانو يخلوني صوم بناء عليه لكن اصدقائي بالمدرسه ولا مرّه فهمو عليّ هالفكره .. كان دائما يقلولي العباره اللّي قلتها عن المفطر .. او عباره اخرى صراحه ما بتزكّر بالضبط ..
لذلك كان الصيام عندي هـدف او حلم بتمنى اقدر حققه لو بالسرقه عن اهلي -هلئ صار العكس - طبعا كان يساعدني تواجدي بوسـط فيه الاختلاف الكتر من الديانات فمش الكل صايم و بالتالي ما حس حالي انا الوحيده اللي غلط !!

مع أنني نوستالجي إلى حد ما لكنني لست ممن يقول أن الزمن الماضي كان أفضل.. فقط أقول أنه كان بالنسبة لي أكثر جمالا.. لأنني كنت أراه بعيون طفل, من الممكن أنه كان زمنا أقل استهلاكية و أقل تجارية... من الممكن أنه لم يتغيّر أبدا, بل تغيّر المراقب...

كلامك هاد بيجعل من كلانا شركاء فـِـكر ..
تحيّه و ينعاد عليك

[روعة1]

ايــــــه.. ذكرتني باللذي مضى..

فعلا الواحد ما بحس بطعم رمضان الا ببلدو.. يعني كل ما ييجي رمضان عليي و يمضى ما بحسو و بنبسط فيه متل ما كنت بسوريا.. اجواء رمضان بسوريا غير غير غير..

بتذكر وقت اللي كنت صغيرة _ما كنت صوم_ بس كنت كذب و ئول اني صايمة.. روح ع المدرسة ما احسن اشتري اي شي من هنيك لانو بكون ما معي مصاري (بما اني صايمة) فبستنى لارجع ع البيت..
بلاقي امي مخلصة الطبخة.. فكانت تبعتني جيب اي شغلة من عند "السمان" و قبل ما روح كنت استناها لتطلع من المطبخ و اخدلي شغلة اكلها ع الطريق منشان سكت جوعتي فيها..
و بس ييجي موعد الافطار,, كنت اعد اول وحدة ع الصفرة (على اساس اني صايمة و جوعانة كتير) و كانوا الكل وقتها يمدحوا فيني اني قدرت صوم و انا انفش بحالي ..(يعني كنت كذب الكذبة و سدئها)

و ع سيرة المعروك.. كان في بياع معروك بحارتنا.. ( بس هلأ سكر لانو فتحوا بدالو مطعم بالحارة) فكنت كل ما انزل لاقي عم يعيط و يقول " مارووووووك,, اربــعة بورئـــــة,, مارووووووووك (هي يعني معروك) "
كنت روح اشتري شي عشرين وحدة و اطلع ع البيت متل الطهبوبة مبسوطة فيهون..

ذكريات لا تنسى.. اس الله..

[Sarita]

منها طريقة فحص اللسان, فإن كان أبيض اللون فيفترض أن صاحبه صائم,

تزكرت وقت كنت بعملها لتلاميز امي وقت كانت تفطرون هههههههههههههه

والله زكريات حلوة كتييير
مرات لمن كنت زغيرة كنت بفيق بوقت السحور خجلانة يعني بشوف العيلة مجتمعة بعدين البابا بيناديلي وبيقعدني بحضنو ويخليني اتسحر معو
وبكرا بفيق جوعانةبرووح دغري ع المي ههههههههه
اي والله زريات حلوة
كنا منجيب التلفزيون ع مقابيلنا مشان نحنا وناكل ما يروح علينا شي
ومرات بابا بيجبلنا مشبك ناكلو طوالله شي بيجنن
ورمضان غير الشهور
يعني شخصيا امبارح كنت قاعدة مع اختي ولمن سمعت انو رمضان اليوم طرت من الفرحة ما بعرف حسيت شي غمرني وفرحت واطمنت كتييييييييييييييييييييير
الله يهنيلكون بالكون بكل الشهور مش بس برمضان

[Abu ToNi]

انا كمان شخصيا بحس شهر رمضان في اله طعمة مييزة وحلوة
يمكن وقت كنا ولاد كنا نحس فيها بشكل اكبر " ما بعرف ليش مع انه القصة مش مرتبطة ابدا بالعمر "
بس حاليا في اله طعمة .... وكمان مميزة ... يعني انا حاليا عايش بشبه صيام كون محلات الأكل كلها مسكرة وكون اذا كنت ماشي بالطريق وعبتاكل لك شي شغلة ممكن يتعرض لك احد الاشخاص " متل ما صار معي السنة الماضية "

بس بيبقى شهر مميز وحلو ... من ايام ما كنا ننصرف بالمدرسة بكير " لان الدوام المسائي بصير اقصر " لعجقة السير اللي بتصير قبل الطوب ... لاكل المعروك اللي بحس صانعي المعروك بيدخلوا بثبات كل السنة وبفيقوا على صوت الطوب برمضان

[اللامنتمي]

مُتصفحٌ ذو نكهةٍ فريدة

لن أبتعدَ كَثيرا ً فـ الذاكِرة ُ هُنا فاتنه

ياس

رمضان كريم

[Government]

اخي رمضان شغلة عنجد .. الو بهجة بكل محل .. احلى الشي لما يكون الواحد مشرك من الجوع بعدين منستنا لايادن والناس كلابتهجم ع الاكل وخاصة ازا في عزيمة .. وواحد بعد مابكون مية من الجوع بصير مليان لدينو .. وماعبيسن يتحرك ..
متل امبيرحة يازلمة ع اساس مابدي اتسحر وخلص ضربت زلوميات .. ولا تاني يوم من الساعة 4 بلشت اعطش وجوع وبلشنا .. يازلمة عفت سماي .. واحلى الشي اخر 5 دقايق من الادان بتحسن كانن 5 ساعات عنجد .. يازلمة كل اللي كانو بالبيت عبطلعوا ع عداد الثواني تبع الساعة ازا بقى يمشي
وهو ادن هالناس كفتت .. واخر الشي ماحدا عاد يحسن بتحرك من ع قد ماتعبى


اخي بعدين المعروك شغلة .. شغلة رسمي وخاصة ازا سخن .. اليوم نزلت اشتريت معروك تااااازة فوق ماتتصور ومابتحسن تمسكو ع قد مو سخن .. منظرو بطقق اي وهو عبتطلع منو الدخنة ع قد مو سخن
اخي شغلة رسمي هالرمضان هون ولا بقطر ولا وين ماكان الو بهجة مو طبيعية .. بعدين اليوم سريع كتير مابتحس فيه


الله يعيدو علينا وعليكن

[Reemi]

ريمي بدها معروك

[pesho]

لك يسلموا رجعتنا خمسين سنة لورا

[pesho]

إيه واالله رائع رجعتنا خمسن سنة لورا (بعد المعروك هناك طقس آخر يكتشفه من يستعمل السيارة أو المواصلات في الفترة الحرجة (تبدأ قبل الافطار بساعة تقريبا), حيث يتحوّل السائقون إلى مجانين يسابقون الريح للوصول إلى المنزل قبل الافطار. تذكرت هذا الطقس منذ فترة قليلة, بالتحديد يوم نهائي كأس الأمم الأوربية الذي لعبته اسبانيا و ألمانيا و انتهى بفوز الاسبان, كنت عائدا من زيارة لمزرعة خالي قبل المباراة بنصف ساعة, و كان كل من يقود حولي مسرعا و كأنه أصيب بمس من الجنون (رغم أن سائقي المنطقة التي أعيش فيها يتصفون بالهدوء و احترام القوانين) فقلت لأختي:" حاسس حالي برمضان قبل الافطار".)وبتصور رح يضلوا هيك لبعدين
مشكور أخي الغالي