الديــــن و الإلـــــــحاد "دعـــوة للتعايـــش"

[ooopss]

رسالة وسؤال ..بحب وجههم لأخوتي المؤمنين ولأخوتي الملحدين ..
بنلاحظ أنو أكتر اختلافاتنا وأشدها حدية بتتعلق بأمور الدين
ولا مرة تخانقنا على شي نظرية فيثاغورثية .. أو على مين كاتب شي جملة أدبية ..
ولما بنفكر بالنهاية بنلاحظ أنو كل خناقاتنا وإهاناتنا ما وصلت لأي نتيجة .. غير ضياع النقاش
طول ما نحنا هيك ما فينا نوصل كلمتنا .. وبعدين ؟ ..
ماحدا رضيان ولا حدا مبسوط من الطرفين ..
نحنا هون بأخوية عم نحاول نلاقي مساحة تحتوينا .. اذا الواقع ما احتوانا ..
نحنا يمكن مهجرين من أراضينا .. يمكن معنفين ..يمكن معانين من الطائفية ...
يمكن مكتأبين ... يمكن موملاقيين حدا يسمعنا .. يمكن بس حابين نعبر .. نكوّن صداقات .. نغني أفكار ..
نحنا شوي شوي بدل ما نخلي أخوية ملاذ إلنا عم نخليها أمر من الواقع أحيانا ..
ونحنا فينا نصل لحل يرضي جميع الأطراف ..
كيف ؟ لازم كلنا نتعاون

أخوتي المؤمنين .. ( مسلمين ومسيحين )
ما بدنا طائفية!!
لاتحاسبو شخص فينا بناءا على دينو .. أو لا دينو
طالما هالشخص عم يعبر عن فكرو ..رأيو الخاص خلونا نحافظ على حرية معتقدو ..
متل ما نحنا بحاجة نحافظ على حرية معتقدنا ..
نناقشوا باحترام .. نحنا ما لنا أنبيا لنهدي حدا
نحافظ على حرية إيمانو أو لا إيمانو - وكلنا بنعرف لا اكراه بالدين-
ولما شخص بيهينك لشخصك.. بيهينك لدينك ... رح يكون المشرف اول شخص بيخالفو ..

أخوتي الملحدين :
كمان لاتحاسبو شخص فينا بناءا على دينو أو لا دينو ..
مو كل مسيحي أو مسلم متزمت ارهابي متخلف ..
مالنا مقتنعين بدينو - هو حر -طالما هو ما عم يأذيك ..
سواء صح كان أو غلط برأيك
اذا قيدلك حرية رأيك - واتهمك بالاهانة تبلياً - وما كان على حق
رح يكون المشرف أول مين ينصرك ...ماحدا بيكمم الأفواه هون ..

خلونا نحترم معتقدات بعض آراء بعض ..
مانتحاسب على أساس مؤمن مع ملحد .. مسيحي مع مسلم
نتحاسب على أساس إنسان مع إنسان ..أخ مع أخ ..
اذا زعلنا من قبل واختلفنا خلونا نبدأ صفحة جديدة ..
مابدي كلامي يكون مقالة تنظيرية أو مجرد حكي ..
نحنا بحاجة أخوية .. وهي بحاجتنا
مافي قكرة بتصل بالختاق ..
ومافي حدا صح على طول .. خلونا ما نتشبث بالرأي .. يمكن بآخر لحظة نكتشف أنو كنا غلطانيين

خلونا نتقبل الحوار ..
وسؤالي الكن بالنهاية ..
بهالطريقة فينا نتعايش مع بعضنا ملحدين ومؤمنين مسلمين ومسيحيين تحت سقف أخوية ؟
خلونا نتعاون ..
شاركوني آرائكن لنصل سوا .. دون الحياد عن الموضوع

[VivaSyria]

أنا موافق على فكرة التعايش... وبتمنى الطرف الأخر يتخلى عن مبدأ الكره لمجرد الإختلاف.. يعني مو كل حدا مو متلي لازم اكرهو وهاجمو وقيم عليه الحد.. بس للأسف باعتبار هي المبادئ "هيَ العقيدة" مابتخيل نقدر نوصل لحل..

والسلام

[MaTyA]

انا خلقة متعايشة

بس لنحكي شي.. انا كتير بتزعجني فكرة انو لما حدا يكتب شي يمكن بيمت شوي للدين .. بيجي حدا بيقلب الموضوع لمسخرة واستهزاء بـ ما كـُـتب .. وهيك بتعلق بين الـطرفين.. ( بمعزل عن مين هالحدا .. ) .. بطبيعة الحال غالباً اذا مو دائماً بكتفي بـ انو المشرفين هنّي يحذفوا وما بفوت بهيك احتدامات..

بس قلك كوني ما عم فوت بهيك احتدامات يعني شي ما عم يزعجني؟ لا عم يزعجني وكتير كمان.. انو ليه ما بيصير نقاش عقلاني ادا حدا بدو يناقش.. انو كتير بلاقي تطاول على ما يؤمن به الطرف الآخر .. ان كان على الرب او على المعتقد وَ ما شاكل .. عم بحكي بغض النظر عن شو هو المعتقد يللي بيؤمن فيه الطرف الآخر.. بس بيصير تطاول

وَ تكاتف على هالتطاول .. متل ما حكينا انا وبلاك ايريز من كم يوم..

يا ريت يصير تعايش.. برايي لحتى يصير هالتعايش..
ما لازم يضل ولا موضوع بيمت بـ صلة للدين بغير القسم المخصص للدين واللي ما يؤمنوا بدين لا يفوتوا هالقسم
و انو ما لازم تضل مواضيع حقيقةً بنحكي كتير بيتخللها تعدي على الدين نفسو..من قبل كاتبين ما بيؤمنوا بشي يمكن..
انو خيي انت ما تؤمن بحدا حريتك.. بصراحة وبصدق بقلك حريتك ومش شأني انك تؤمن ولا ما تؤمن بس ما في داعي للسخرية على معتقدات الآخرين

الك ooopss

[سوا ربينا]

حلو الكلام ,,,, وانا من الناس اللي ما بتفرق معي واول ما دخلت هون بعرف انو في ملحدين وغيرو وبحياتي ما حكيت مع واحد او كرهتو لسبب انو ملحد او انو من دين غير ديني ,,,بس لانو اكتر الاشخاص الملحدين لما بدهم يفتحو موضوع بيغلطو عالذات الالهية يعني لو ما حدا بيغلط ما رح يصير في اي شي بين ملحد او مؤمن او غيرو,,,,

[black_iris]

طريقتي يجب ان تكون كما يلي :
لي معتقدي ..لا اطالب احد بتبني هذا المعتقد .. ولا أحقر او اهين او حتى املك الحق بتقييم معتقد احد
بالمقابل ..
لي الحق بأن يُحترم معتقدي .. وليس لاحد تحقير او اهانة ما اعتبره مقدس
وليس لاحد تقييم فكري او ثقافتي بناءاً على هذا المعتقد ..
بالنهايه فكلنا يمارس حقه
ooopss

[مالي خايف]

أهم شي من كلا الطرفين يحترموا آراء بعض وما يحاولوا يكتبوا شي استفزازي والي بخلي هالشي كلو يتأجج
متل مو صاير هلأ بأحد المواضيع الموجودة حاليا والي الشباب نازلين ببعضون وبصراحة في كتير شباب عم تحكي حكي جدا استفزازي
وأخي لكم دينكم ولي ديني
كل واحد على دينو ومعتقداتو الله يعينو

[ooopss]

عذروني رح رد بالمجمل وارجع بعدين رد عليكن واحد واحد... كل النقط يلي عم تحكوا عنها هي يلي بدنا نحلها ... -يعني حكيكن مزبوط بالمجمل انو الطرفين عم يتهجموا عبعض أحيانا... ومشان هيك نحنا بلشنا وبدنا نبدأ من جديد ونحل المشكلة مع بعضنا ..بمساعدتكن .

[المحارب العتيق]

المشكلة أنو في ناس بتفكر أنو اهانة الاله هو كنوع من أثبات ذاتو الالحادية
وأنا بشوف أنو في تناقد كتير بأفكارهم . لما بيبنوا كل نقاشهم على نقد وألغاء مالا يؤمنو به
بسهولة اذا كنت لاتؤمن بوجود الرب فلماذا تذكره ليل نهار
لما بيكون الشخص مالو مؤمن بشي المفروض أنو مايذكروا لأنو أصلا بالنسبة الو هو شيء غير موجود
بعتقد أنو الناس بكل المعمورة كأفراد . عم يدورو على شيء يجمعهم . والناس وصلت لأنو تحترم حيوان بالهند مثلا لأنو ممكن يكون مقدس عندهم . بس لحنا لسا منهين معتقدات بعضنا . على مبدأ أثبات الذات

[Marooshe]

بهالطريقة فينا نتعايش مع بعضنا ملحدين ومؤمنين مسلمين ومسيحيين تحت سقف أخوية ؟

ما في احلى من التعايش بس ما بعتقد رح تزبط
لانو كل ما رح يحتد الحوار رح يبرم الدولاب عن جديد
وعلى قصة نشر دعوة وعلى قصة تبشير وعلى نهي عن لتنين

لما بيكون الشخص مالو مؤمن بشي المفروض أنو مايذكروا لأنو أصلا بالنسبة الو هو شيء غير موجود

اي حكيك فيو وجهة نظر
بس خود بعين الاعتبار انو نحنا او العالم كلها تربت على وجود اللة وعلى قوة اللة
واحيانا بتصير الشغلة كأنها كلمة ومنقالة يعني بتنقال لمجرد تعويد مو لانها مقصودة
واحيانا اخرى في ناس برغم انكارها ل "اللة" بيضل عندها خوف معين وعدم قناعة بيظهرها ال "لا وعي" عن طريق تكرار عبارات تذكرو

[سوا ربينا]

كاتب النص الأصلي : marwa hanna

ما في احلى من التعايش بس ما بعتقد رح تزبط
لانو كل ما رح يحتد الحوار رح يبرم الدولاب عن جديد
وعلى قصة نشر دعوة وعلى قصة تبشير وعلى نهي عن لتنين

لا بتزبط وما في اسهل منها ,,, بس اهم شي انو ما حدا يتعرض لاي دين او اي فكر تاني باهانة او تلميح باسلوب مباشر او غير مباشر,,,او شتم الذات الالهية ,,, وانا متأكد انو مارح يصير اي شي ورح الكل يكون مرتاح ومبسوط ,,, لانو صارت من فترة باخوية ومافي حدا كان يتعرض للتاني باي شكل من الاشكال ,,,بس للاسف رجعت من شي شهر ونص تقريبا,,,,

[Abu ToNi]

جاي على اشوف اول بني آدم بالطريق " ما بتفرق معي ملحد او مؤمن " واتعايش معه

لك صعي
فين راحوا جماعة " اللادينيين "
وجماعة الحنفيين

تحت اي باب بيندرجوا .؟؟؟؟
دينيين ... لادينيين .... ملحدين ..... بياعين بطاطا .... يعني شو وضعهم بالاعراب

[Donald Duck]

كاتب النص الأصلي : ooopss

أخوتي المؤمنين .. ( مسلمين ومسيحين )

طالما هالشخص عم يعبر عن فكرو ..رأيو الخاص خلونا نحافظ على حرية معتقدو ..
متل ما نحنا بحاجة نحافظ على حرية معتقدنا ..

حلو كثير هالحكي .. خصوصا هالجملة ..

يعني لو كل الاعضاء يلتزموا فيها .. حتى لو كان عن مزح او عن تعبير عن رأي ..

بدون اهانة لمعتقد غيرنا ..

مشكورة على هاللفتة الحلوه .. وانشالله نتعلم جميعنا ..

[biomen]

حلوة كتير فكرة التعايش oopss .. بس لقلك شغلة التعايش رح يتجسد اذا كان في احترام وتكاتف بين كل الاعضاء ...يعني ما في داعي الواحد يتعرض لمعتقد التاني...اذا كان المؤمن بيشوف الملحد مخطئ فما في داعي للتجريح...و اذا كان الملحد مو مقتنع بمعتقد المؤمن فكمان ما في داعي للتعرض لمعتقد الطرف التاني...يعني نحكي بالمعقول..الكل هون بالغين و واعيين انّو اي موضوع بينطرح و يكون استفزازي رح يثير الطرف التاني اكيد... و رح نشوف الردود اللي ما الها فائدة و شتائم و زعل....الخ

فلهيك الحل انو كل واحد بدّو يعرض موضوع للنقاش فلازم يكون خالي من العبارات التجريحية
و كمان تدخل المشرفين عالمنتدى ضروري...يعني لمّا يصير حكي برّات الموضوع او يصير في تطاول على شي معتقد لازم يكون المشرف موجود لحتى يكّف التطاول...كمان شغلة تانية لازم يكون المشرف عادل في قرارو...يعني يكون حيادي...

مشكورة oopss عالموضوع...و رح نوقف جنبك لتحقيق هذا الهدف

[Abu ToNi]

مع احترامي لكل الأعضاء المتفائلين ومع احترامي للمنسقة الجيدة المتحمسة والي عبتحاول من فرط حماسها تعمل نقلة نوعية بالأخوية

بعرف بدي اواجه انتقاد كتير على هاد الرد
بس عادة اذا واحد بدي يمشي بنوعه بيلطشوه كيف مشان يفيق ويصحى
مع اني ما بحب آخد موقف الضارب الكف لأن كل العالم بدها تعلق معي

بس هوي كف ولازم ينضرب عاجلا ام آجلا ....

مشكلة العلقة بين الدينيين والادينيين مانها مشكلة جديدة ومن الصعب جدا حلها " هاد من المنظور المتفائل جدا لكن واقعيا لا يمكن حلها ابدا "

هلق الشعب الديني بشكل عام هوي الشعب اللي يعتبر الدين محور حياته وبينبني حياته على مبادئ وتوصيات الدين واحكامه وانا شخصيا كانسان ما كتير بيخرط لي مشطي فكرة الدين واصنف نفسي من مشتقات اللادينيين ، شخصيا ما عندي اي مشكلة مع انسان من هاد النوع طالما بينه وبين ربه القصة وما عبيتعدى على غيره .
بينه وبين ربه حر .. ما حدا ماسكه ... بكون ابن وأب ... يكون عابد ومعبود ... يكون آلهة ومنفذ للأوامر ... متل ما بده يكون يكون انا ما بهمني واصلا غلط اني اهتم بهيك شي لأنها علاقة شخصية جدا بين الانسان والقوة العليا ما بحق لحدا يتدخل فيها ..
بس وقت بده يكون معي لازم يكون انسان فقط لازم يتعامل معي كانسان فقط
ما لازم يهتم شو لون عيوني وشو نمرة رجلي وشو وضع العلاقة اللي بيني وبين الآلهة
وللأسف العالم بتدخل بشكل كتير سافر ووقح بالعلاقة اللي مفترض تكون شخصية بين الانسان والقوى العليا

هي اول باشتان

تاني باشتان انا مستعد احترم كل الاديان ومستعد احترم كل الآلهة وابعد عنها وما اجيب سيرتها على لساني طالما لا اتباعها ولا هية بذات نفسها عبتجيب سيرتي بالعاطل
يعني وقت بتم تصنيفي على اني كافر ويحلل سلبي حياتي ويحلل قتلي بالمكان اللي بشوفوني فيه
لا اسمحوا لي يعني
مشاعركم اكيد مش اهم من حياتي
بدي سب والعن واتمصخر حتى موت من الضحك لأن بكل الأحوال انا ميت وميت عبنتظر احد المجاهدين لينفذ حكم الله ، الآلهة نفسه اللي مانه مستعد يحترم حقي بالحياة وحقي باختيار الشي الأنسب " بحسب وجهة نظري وما حدا مجبر يقنعني فيها "
فقبل ما تطلبوا من اللادينيين يحترموا الدينيين
اطلبوا من آلهة الديينيين يحترم اللاديينيين ويعتبرهم بشر من حقهم الحياة


اذا
كان في حل فهو ان الدينيين يعيفوا دينهم على طرف ويشاركوا كبشر ومن منطلق انساني بعيد عن اي مذهب ديني
برجع بقول
اذا كان في حل ...

[سوا ربينا]

كاتب النص الأصلي : gabriel

اطلبوا من آلهة الديينيين يحترم اللاديينيين ويعتبرهم بشر من حقهم الحياة


اذا كان في حل فهو ان الدينيين يعيفوا دينهم على طرف ويشاركوا كبشر ومن منطلق انساني بعيد عن اي مذهب ديني
..

اول شي كلامك هاد اللي انفتح الموضوع مشانو ,,, تاني شي اللي باللون الاحمر ما فهمتها منيح فياريت تشرحلي اياها ,,,

تالت شي بقدر افهم من كلامك انو الدينيين مش بشر,,,

واخيرا انا اذا بدخل بموضوع فيه شي من هالحكي فانا ما بدخل الا اذا لاحطت انو في ناس بتغلط على الذات الالهية ,,, او بتجيب سيرة ديني بالعاطل ,,ولو ما بشوف هيك حكي انا ما بدخل لانو متل ما نتا قلت كل واحد بينو وبين ربو وبين الالهة تبعو ,,, بالاخير هوي اللي رح يتحاسب مش انا ,,,,

[sandra]

هو بس يكون احترام للطرف الآخر ولو شو مكان معتقدو أو فكرو طالما هالشي ما بيأثر عليه
وبالمقابل الطرف الآخرما بيفرض رأيو وطريقة حياتو ومعتقدو عالبقية
هون بيصير التعايش

[Donald Duck]

كاتب النص الأصلي : sandra

هو بس يكون احترام للطرف الآخر ولو شو مكان معتقدو أو فكرو طالما هالشي ما بيأثر عليه
وبالمقابل الطرف الآخرما بيفرض رأيو وطريقة حياتو ومعتقدو عالبقية
هون بيصير التعايش

كلامك صحيح 100% ..

بس مو لنبدا بحالنا بالاول !!!

ما تزعلي مني سندرا ..

[LiOnHeArT.3LA2]

حلو كثير هالحكي .. خصوصا هالجملة ..

يعني لو كل الاعضاء يلتزموا فيها .. حتى لو كان عن مزح او عن تعبير عن رأي ..

بدون اهانة لمعتقد غيرنا ..

مشكورة على هاللفتة الحلوه .. وانشالله نتعلم جميعنا ..

ليش شلت هدا القسم ؟

لاتحاسبو شخص فينا بناءا على دينو .. أو لا دينو