بيان ضد الشعب و التاريخ -2-

[yass]

أول شي قبل ما ادرج المقالة بدي اشرح ليش الجزء الثاني مو الأول.. هو الجزء الأول من هالمقالة مكتوبة كمواكبة لتداعيات حرب تموز 2006 بلبنان, لكن الجزء الثاني لهالمقالة بعتقد اظرف و أعمق مقالة قريتها من شهور (أي كلاهما مع بعض.. و لما بيجتمعو يعني في ابداع كبير). فجبت الجزء الثاني بس لأنو هو اللي بدي ياه (لك عمي ليكو ابن خلدون كتب كتاب طويل عريض و الكتاب كبوه و أخدو المقدمة بس... أي نفس الشي)

بدي اشكر أحد أصدقائي الأعزاء و أحد كبار أخوية ( أول حرف من اسمو hashtnasht بس لا تقولولو انو جبت سيرتو) لأنو عرّفني علي هالكاتب, قريتلو كم مقالة عالسريع و فرحت كتير.. لأنو أول مرة من زمان بشوف كاتب يساري يكتب بشكل سلس و خفيف.. لأنو كنت فاقد الأمل انو لاقي هيك كونو يبدو الكتّاب اليساريين العرب بيفكرو انو كل ما كان معلاق أكتر يبان عليه انو مثقف أكتر.

بترككون مع المقالة للكاتب موريس عايق


ملاحظة أولية: اعترض احد الاحدقاء على مسألة الجزمة في سياق الحديث عن الشعب الفلسطيني وعلى الرغم من اني اعتبرت ان سياق العبارة واضح ولا يحتمل تأويلا وشططا ولكن درءا لسوء الفهم وترسيخا لمبدأ الاعتراف بالحق فضيلة فانا بعتذر اذا حدا بيهمو اعتذاري.

بيقولوا انو أحسن طريقة للتعليم هي انك ما تقول الحل انما كيف وصلت للحل ومشان هيك راح بلش بكيف وصلت للحل

بالاول استشرت كل رفاقي في البلد والغربة واللي بعرفون واللي ما بعرفون عن الحل, والكل اتفقوا على انو احسن شي هو الخلاص من الشعب. بس النسب اختلفت وان كانت بين 50% و90% من الشعب لازم ينقتلوا وطبعا انا رفضت هلحل. مش انساني كثير انا او اخلاقي والرفض ما كان اله علاقة بهي القصص انما لسببين.

1- منطقي: يعني بالنهاية نحن من الشعب ومنا احسن منو. يمكن شايفين كتير مصايب بس اكيد انو فينا مصايب معمين عنا وغيرنا شايفها فينا.

2- عملياتي: يعني على القليلة بدك واحد بكل عشرين واحد حتى يقدر يقتلهم كلهم. هيدا اذا كان وحدو المسلح واذا فيهم واحد مسلح صار بدك اكتر. بس حتى لو افترضنا انو هوالوحيد مسلح بيضل بدنا من كل عشرين واحد واحد. وهي كيف ما حسبتها بتطلع كتير كتير وما فينا نجمعهم ونحن اكتر مرة اجتمعنا فيها كانت على حفلة عرس او راس السنة. واذا اجتمعنا على شغلة بنكون بالكتير عشرة والسبب انو لنحضر شي فيلم... او نفتح طاولتين او تلات تركس على انو يكون بعدها عشا معتبر (فراريج مثلا)

طيب الحل ما بيظبط ولازم ندور على شي تاني.

افترضنا انو اذا كانت الثقافة والعقل هنين المشكلة فالحل نحرق كل الكتب والافلام واي شي الوه علاقة باللغة المكتوبة او المسموعة على امل انو يجي بعد شي عشرين سنة جيل جديد ما اله خبر بشي وبيفكر بطريقتو الخاصة. الحل كان طوباوي وما بيمشي من اصله.

اقترحنا انو كل واحد فوق الاربعين يضب لسانو بتمو ويسكت رأفة بالاجيال الجديدة لتاخد حقها بالتعليك. هي كمان ما ظبطت. ما طلع عندون رأفة اصلا والاجيال الجديدة ما شايفينها من اصلو وهي منها شايفة حالها على كلن.

هددناهم بالمدفع وحياتك ما حدا رد علينا لانو ما في مدفع بالاساس.
لا الرأفة ظبطت ولا التهديد نفع. طيب شو منعمل, بنيأس؟
اكيد لا.

طيب الوضع هيك وادراكا للظرف الموضوعي شفت انو احسن شي هو انو نحط اقتراحات او شروط يفترض بكل واحد بيحكي انو يراعيها. يعني هاد اضعف الايمان. وما حدا بيصير يحكي بدون ان يراعيها وخلينا نبلش فيها.

1- ما حدا بيقول عن التاني انو ما بيفهم او غوغائي او غير عقلاني لانو كلنا ما نفهم. لو كان فينا واحد بيفهم ما كان صار فينا يلي عم يصير من 50 سنة.

2- ما حدا بيقول عن التاني انو خاين لانو ما في شعب ولا بلد ولا وطن. يعني شو بدو يخون. اصلا ما في شي حتى يخونو.

3- ما حدا بيستشهد بوليد جنبلاط لانو مبارح بيقول شي واليوم بيقول شي تاني وبكرا بيقول شي تالت. الزلمة ديالكتيكي وكثير غميق ونحنا منا بمستواه.

4- ما حدا بيقول انو معو حق اذا ما معه بارودة واللي معو عشر بواريد معو حق اكتر من اللي معو خمسة واللي عندو دبابة معو حق اكتر من الاتنين. واذا في حدا ما معو شي ومقتنع انو معو حق لازم اول واخر شي يعملو انو يجمع بواريد اكتر من كل اللي حوالو وبعدين بيقول معو حق.

5- ما حدا بيدعو الحكومة لمؤتمر مصالحة او مسامحة وطنية وما فينو يجمع 500 واحد وبعدين مين قلو يسامح او يصالح عن غيرو. اصلا ما صار انتخابات ليفوضوا بالقصة حتى لو كان المواطن الاول.

6- ما حدا بيحكي عن حدا او باسم حدا وخاصة وتحديدا اذا كان الحدا من شاكلة العقل الانساني او ضمير الشعب. يعني انا وين بشوفوا لهاد حتى اعرف اذا كان موكلو للاخ يحكي باسمو. كل واحد بيحكي باسمو.

7- ما حدا بيقول من الله لانو الله ما خصو. الله ما بيستخدم العالم ليقتلو عنو هو بيقتل لحاله وتسونامي وكاترينا دليل على هلشي.

8- ما حدا بيقول الحكومة غدرتنا والحكومة صارلها شي 50 سنة وهي عم تغدر فيه. وحدو الحمار بينغدر اكتر من مرة والاخ اذا بعدو بيقول الحكومة غدرتنا فهي لازم تكون اخر كلمة بيقولها لانو حمار. هو بمحل والحكومة بمحل وما حدا بيغدر بحدا واصلا ما الهن علاقة ببعض حتى يبعت واحد منهن التاني على جهنم.

9- ما حدا بيقول انكسر قلبي اذا شاف ولد فلسطيني عم يموت وبيكمل انو الفلسطينيين لازم يشوفوا حل. لانو لو انكسر قلبو فالاخ بيكون عنده تعالى مش عم يعبر عن رأيو وبعدين اذا حدا بينكسر قلبو فهي ام الولد وما حدا غيرها. وهي بتعرف شو بدها تعمل بولادها البقية وهدول بالنهاية ملكيتها الخاصة ونحن مع الملكية الخاصة وهي موجودة بحقوق الانسان.

10- ماحدا بيقول اذا شاف واحد عم ينقتل من الامريكيين او الاسرائيليين انو الحق عليه لانو وقف بوجه البارودة ورعبو للجندي فقوص عليه. وحده عمرو بن العاص بيقول هيك حكي.

11- ما حدا بيقول عن شغلة غلط اذا عملها نصر الله وهي ذاتها بتكون صح اذا عملها غيرو. يعني يا هي غلط عند الاتنين او صحيحة عند الاتنين.
12- ممنوع على اي واحد غير رأيو بالحياة اكتر من تلات مرات انو يحكي. لانو ما بتظبط حتى بديالكتيك هيغل.

13- ممنوع على اي واحد يقول ديمقراطية ويكمل بكلمة بس. يا ديمقراطية يا بس. هلكلمتين ما بيجتمعو مع بعض ومستحيل يكون الواحد ديمقراطي وبساوي وبذات الوقت. ضد منطق ارسطو بيصير الزلمة.

14- ممنوع على اي واحد يستشهد بالتاريخ لانو صار عنا لهلق شي عشرين تاريخ وكل واحد بيعمل تاريخ على كيفو.

15- ما بيصير الواحد يكتب بطريقة انو بدنا شي ساعة لنفك الشيفرة اللغوية تبعو لنفهم. او يعبر عن رأيو بطريقة كتير ذكية يعني انو متل من تحت الصفر للصفر شو درس رياضيات. او بيحكي شغلة وبيقول بعدين ما كان هيك قصدي منو نص زلمة.

16- ما حدا بيوقف مع شغلة وهو شخصيا ما عندو استعداد يعملها وخاصة اذا كان فيه.



هاد اللي طلع معي لهلق واذا كان في حدا عندو بعد شي رأي أو اقتراح فانا جاهز تماما لتوسيع اللائحة ومناقشة الموضوع معو. منفتح كتير انا بتأثير الزمن والاوضاع والدق.

[MadMax]

كاتب النص الأصلي : yass

هاد اللي طلع معي لهلق واذا كان في حدا عندو بعد شي رأي أو اقتراح فانا جاهز تماما لتوسيع اللائحة ومناقشة الموضوع معو. منفتح كتير انا بتأثير الزمن والاوضاع والدق.

ما حدا يقلي قاطع بضاعة البلد الفلاني و نحنا بدنا مليون سنة لنعرف نعمل متلا... أو لنقدر نستغني عنها
لا تصدق واحد بقلك قاطع البضائع الامريكية ....و هو ما بخللي مرتو تولد غير بنيويورك ....مشان ابنو ياخد الجنسية الامريكية
( هدول من وحي جارنا عضو بمجلس الشعب )





مشكور ياسين عالمقال الرائع

[VivaSyria]

ما حدا بيقول عن التاني انو خاين لانو ما في شعب ولا بلد ولا وطن. يعني شو بدو يخون. اصلا ما في شي حتى يخونو

و قبل التخوين نوصل لتعريف واضح للخيانة.. لأنو الخيانة صارت مفهوم مطاط..

ما حدا بيقول عن شغلة غلط اذا عملها نصر الله وهي ذاتها بتكون صح اذا عملها غيرو. يعني يا هي غلط عند الاتنين او صحيحة عند الاتنين.

و يلي بدو يشرع المقاومة ببلد بدو يشرعها ببلدو أول شي .. تحديداً اذا كانت نفس الحقوق المسلوبة و نفس المطالب..

ممنوع على اي واحد يقول ديمقراطية ويكمل بكلمة بس. يا ديمقراطية يا بس. هلكلمتين ما بيجتمعو مع بعض ومستحيل يكون الواحد ديمقراطي وبساوي وبذات الوقت. ضد منطق ارسطو بيصير الزلمة.

و ممنوع على أي حدا يدعم مطالب أطراف بالديمقراطية التوافقية.. لأنو يا ديمقراطية يا توافق.. ديمقراطية و توافق ما بيجتمعو..

ممنوع على اي واحد يستشهد بالتاريخ لانو صار عنا لهلق شي عشرين تاريخ وكل واحد بيعمل تاريخ على كيفو.

و للأسف مافي أشطر منا بقلب الهزائم لنصر... و تشويه التاريخ

و بضيف على المقال من وجهة نظري:

ممنوع حدا يقرر شو الممنوع و شو المسموح بالنسبة للشعوب..

مشكور ياس