|
العالم بالارقام (( 2008 ))
المصدر او المرجعية الاساسية لكافة الارقام : الانكارتا آخر نسخة (( 2009 ))
Microsoft ® Encarta ® 2009. © 1993-2008 Microsoft Corporation. All rights reserved. ____________________________________________ هاموش مفعلل : مستعد لّبي طلب اي عضو بالاستفسار على اي دولة كانت او على طريقة حساب اي احصائية مدرجة .. |
سوريا ، syria  المساحة : 185,180 كم مربع (( بمركز 86 عالميا )) عدد السكان ( 2008 ) : 19,747,586 نسمة (( بمركز 55 عالميا ))  معدل النمو : 2,19 (( بمركز 70 عالميا )) هاموش مهم على الفقرة السابقة معدل النمو بيشمل الولادات والوفيات .. وبخصوص الوفيات في عندك من كل 1000 طفل في 27 واحد بفارقوا الحياة وما بيدخلوا بالمعدل وبكل سنة في 667 واحد بموتوا بالمشافي (( تحت الرعاية الطبية )) بحسبة صغيرة وتقديرية اعتمادا على المعدل السابق طلع مع الشباب انه عدد السكان حيكون سنة 2025 : 26,547,725 سنة 2050 : 34,437,235 الكثافة السكانية بتطلع معنا اعتمادا على عدد السكان بعام 2008 هي : 107 نسمة لكل 1 كيلو متر مربع (( اذا جربت تقسم عدد السكان على المساحة حيطلع معك الكثافة واللي هية 106,6 لكن دائما بالاحصائية العامة بيتاخد الرقم التقريبي )) اعتمادا على احصائية صارت عام 2005 طلع ان 50% من الشعب السوري من ابناء الريف و 50% من ابناء القرى اذا اختصرنا السكان اللي فيها ل 100 واحد فيتوزعوا بالشكل التالي : من ناحية القومية (( او العرقية خود اللي بتزبط على مزاجك اكتر )) 90 عرب 10 (( اكراد ، ارمن ، اتراك ، أشوريين ، فلسطينية )) من ناحية الاعتقاد الديني 73 مسلم سني 13 مسلم شيعي (( وبقية الفرق الاسلامية باستثناء السنة )) 10 مسيحية 3 دروز 1 ديانات اخرى وعلى رأسها اليهودية متوسط العمر والاعمار (( يعني شقد متوسط الحياة او تقريبا باي عمر المواطن السوري بموت )) النساء بعمر ال 73,2 الرجال بعمر ال 69.5 وبشكل عام المواطن السوري بسلم الامانة للمولى بعمر 70.9 (( يحرق دينا .. قربت )) (( ومنحتل المرتبة 103 عالميا بهي النقطة )) من الناحية الصحية في طبيب لكل 1,887 بحسب احصائية عام 2006 وفي عناية صحية بتأمنها المشافي (( بيحسبوها من عدد الاسرّة )) : تخت او سرير لكل 667 نسمة بحسب آخر احصائية صارت واللي بترجع لعام 2003 من الناحية العلمية : عدد سنوات التعليم الازامي 9 سنوات عدد المعلمين بالنسبة إلى عدد الطلاب (( النسبة )) استاذ واحد لكل 24 طالب نسبة المتعلمين (( الحاصلين على محو الامية )) 66.1 من النساء 90.6 من الذكور وبالنسبة للسكان بشكل عام : 78.4 من السوريين يجيدون القراءة والكتابة ، محتلين المرتبة 125 عالميا بهاد المجال بيسوى اني نبه على انه الرقم السابق معتمد من عام 2005 عدد افراد الجيش : 307,600 بحسب احصائية 2004 عدد الموظفين لدى الحكومة : 7,908,105 اجتهاد شخصي : بناء على نسبة بين الموظفين وعدد السكان الاجمالي .. طلع معي 40 % من الشعب السوري موظف لدى الحكومة .. بلا تعليق التقنية : كل 1000 سوري ، 278 بيمتلك راديو بحسب احصائية عام 2007 كل 1000 سوري ، 125 بيمتلك تلفون بحسب احصائية 2005 كل 1000 سوري ، 61 بيمتلك تلفزيون بحسب احصائية 2000 عدد مضيفي الانترنت (( internet host )) لكل 10,000 هوي 0,1 بحسب احصائية 2003 (( شعللها )) كل 1000 سوري ، 20 شخص متابعين للجرايد بحسب احصائية 1996 كل 1000 سوري ، 36 شخص بيمتلك سيارة بحسب احصائية 2004 |
في حقائق عم أتفاجئ فيها يعني متوسط عمر النساء ... يالطييييف، طيب إذا ممكن دولة بولندا يلي عم نتسمم فيها خبرنا شو فيه احصائيات إذا ممكن .:D
عالهامش : لك وين هالغيبة ؟:larg: |
اقتباس:
بصراحة انا كنت بالاساس عبدور على رقم معين واللي هوي معدل دخل الفرد بس بالاحصائية نفسها مش مذكور هاد الشي .. بعتقد كان الرقم بدنا نتفاجئ فيه كتير شو ما كان يكون يا اما بدنا نحسه كتير كبير يا اما كتير قليل :sick: ففضلوا الشباب يصدموني بانهم ما يحطوا من اصله :o ____________ جامعة وخبر يا ابن العم ما عبفضى احك راسي ، وبيني وبينك عبفكر استئجرلي شي واحد يشتغل عندي حكاك :larg: |
بولندا ، poland  المساحة : 321,684 كم مربع (( بالمرتبة رقم 68 عالميا )) عدد السكان : 38,500,696 (( بالمركز ال 33 عالميا ))  معدل الولادة : -0,04 (( اشارة الناقص بتدل على تناقص عدد الافراد )) من كل 1000 ولادة يحدث 7 حالات وفاة للطفل وبحسب احصائية عام 2002 ، 179 شخص بيتوفوا تحت العناية الطبية (( في المشافي )) (( بالمرتبة رقم 154 عالميا )) بسبب المعدل السلبي للولادات متوقع تناقص عدد سكان بولندا لحتى يصل بعام : 2025 : 37,349,696 2050 : 32,084,570 اعتمادا على المساحة وعدد السكان واخد النسبة بيناتهم بيطلع معنا الكثافة السكانية : 127 نسمة لكل كيلو متر مربع (( بالترتيب رقم 63 على مستوى العالم )) اذا نسبنا عدد السكان للنسبة المئوية بيطلع معنا هدول ال 100 : من ناحية التموضع الجغرافي : 62 شخص من اهل المدن 38 من اهل الريف (( بالمرتبة 76 من ناحية نسبة اهل المدن من نسبة السكان الكلية ، بالمساواة مع كوستا ريكو ، كوريا الشمالية )) من الناحية العرقية : 97.6 بولندي 1.3 الماني 0.6 اوكراني 0.5 بيلاروسي اللغات الاكثر انتشارا : بولوني (( اللغة المعتمدة رسميا )) ، انكليزي ، الماني ، روسي الاعتقاد الديني : 92 روم كاثوليك 3 اورثوذوكس 2 لاديني 3 اخرى معدل حياة الفرد : النساء : 79.7 الرجل : 71.3 وبمعدل اجمالي 75.4 وبالمرتبة 54 عالميا المتعلمين (( الحاصلين على شهادة محو الامية )) بحسب عام 2005 نسبة النساء = نسبة الرجال = النسبة الكلية (( منطقيا يعني )) = 99.8 (( اوه ماي الله )) عدد سنوات التعليم الالزامي 9 نسبة المعلمين للطلاب : معلم واحد لكل 13 طالب دستور البلاد : تم التعامل به بتاريخ 17\10\1997 عدد افراد الجيش : 141,500 (( بحسب احصائية 2004 )) عدد فرص العمل (( العاملون بشكل عام )) : 17.191.701 (( بحسب احصائية 2006 )) التقنية : كل 1000 بولندي ، 522 بيمتلك راديو بحسب احصائية عام 1997 كل 1000 بولندي ، 309 بيمتلك تلفون بحسب احصائية 2005 كل 1000 بولندي ، 401 بيمتلك تلفزيون بحسب احصائية 2000 عدد مضيفي الانترنت (( internet host )) لكل 10,000 هوي 204 بحسب احصائية 2003 كل 1000 بولندي ، 102 شخص متابعين للجرايد بحسب احصائية 2000 كل 1000 بولندي ، 345 شخص بيمتلك سيارة بحسب احصائية 2003 _________________________________ :larg: |
موضوع حلو جداً :D
بهالإنكارتا ما بيذكرو شي عن الحغرافيا الاقتصادية ؟ أنو هالبلد بتعتمد بشو باقتصادها على صناعة السيارات مثلاً أو الزراعة وهيك ... |
مثبت ...
شوفلنا الاردن غابي :lol:بيطلعلا شي رقم بهالعجقه ؟! |
اقتباس:
الشباب كاتبين على اهم البلدان اللي بصدر لها منتجاتها ، واهم البلدان اللي بتستورد منها منتجاتها وحاكيين شغلات اقتصادية بحتة بحاجة لانسان مختص حتى يترجمها متل ال GDP اللي ما عرفت شو بيقصدوا فيها .. اذا كنتي بتقصدي المهن اللي بيعتمدوها العالم واللي بيشتغلوا فيها فهنن ما كتير مفصلين بهي الامور وحاطين عناوين كتير عريضة يعني على سوريا كاتبين انه بحسب احصائية 2002 43 % من السكان بيشتغلوا بمجال الخدمات .. اي اقعدي فقسي على ربهم شو بيقصدوا بكلمة خدمات :lol: على هامش سؤالك انتبهت على شغلة ماني كاتبها بدي كبرها مشان الكل يشوفها : بحسب احصائية 2003 معدل البطالة في سوريا 12,3 % اقتباس:
ومشان الاردن .. بشفلك ياها بكرا .. باتعبار هلق ما عبشوف قدامي وما عبعرف طريق تختي من وين :lol: :D |
الأردن ، jordan  المساحة : 89,556 كم مربع (( بمركز 109 عالميا )) عدد السكان : 6,198,677 نسمة (( بمركز 102 عالميا ))  معدل النمو : 2,34 معدل النمو بيشمل الولادات والوفيات .. وبخصوص الوفيات في عندك من كل 1000 طفل في 15,6 طفل بفارقوا الحياة وما بيدخلوا بالمعدل (( وبهي النقطة ترتيب الاردن 119 عالميا )) وبكل سنة في 588 واحد بموتوا بالمشافي (( تحت الرعاية الطبية )) بحسب احصائية 2003 بالاعتماد على عدد السكان بال 2008 وعلى معدل النمو متوقع يصل عدد السكان بعام : 2025 : 8,651,714 2050 : 11,772,789 الكثافة السكانية : 67 شخص لكل كيلومتر مربع (( بالمركز 104 عالميا )) للغات المنتشرة مرتبة بحسب الاهمية في الاردن : العربية (( اللغة الرسمية )) ، الانجليزي ومنتشرة جدا بين المواطنين الاردنيين اذا اختصرنا السكان اللي فيها ل 100 واحد فيتوزعوا بالشكل التالي : التوزع الطبقي 79 من اهل المدن (( وبالمرتبة رقم 37 عالميا بهي النقطة )) 21 من اهل الريف (( الرقمين السابقين بيرجعوا لاحصائية ال 2005 )) من ناحية القومية او العرقية 98 عرب 1 آشوريين 1 ارمن من ناحية الاعتقاد الديني 93 مسلمين (( ويعتبر الدين الاسلامي الديانة الرسمية للدولة ومعظم المسلمين الأردنيين من الطائفة السنية )) 4 مسيحية 2 لا دينيي 1 ديانات اخرى متوسط العمر والاعمار (( احصائية 2005 )) النساء بعمر ال 81,3 الرجال بعمر ال 76,2 وبشكل عام المواطن الاردني متوسط عمره 78,7 (( بالمرتبة 27 على مستوى العالم )) من الناحية الصحية في طبيب لكل 403 بحسب احصائية 2004 وفي عناية صحية بتأمنها المشافي (( بيحسبوها من عدد الاسرّة )) : تخت او سرير لكل 588 نسمة بحسب آخر احصائية صارت واللي بترجع لعام 2003 من الناحية العلمية : عدد سنوات التعليم الالزامي 10 سنوات عدد المعلمين بالنسبة إلى عدد الطلاب (( النسبة )) معلم واحد لكل 20 طالب (( بحسب احصائية العام الدراسي 2002 - 2003 )) نسبة المتعلمين (( الحاصلين على شهادة محو الامية بحسب احصائية 2005)) 87,9 من النساء 96,5 من الذكور والاردن بتحتل المرتبة 89 عالميا بعدل اجمالي 92,4 دستور المملكة: تم وضعه في 8\1\1952 ـ وتم تعديله في ـ 1974 ـ 1976 ـ 1984 عدد افراد الجيش : 100,500 بحسب احصائية 2004 عدد وظائف العمل : 1,873,216 بحسب احصائية 2006 نسبة البطالة : 12,4 بحسب احصائية 2004 الدول الاساسية اللي بتصدر الاردن منتجاتها الها (( بالترتيب حسب الاهمية )) : العراق ، الولايات المتحدة ، الهند ، سعودية ، اسرائيل الدول الاساسية اللي بتستورد منها منتجاتها : العراق ، المانيا ، الولايات المتحدة ، الصين ، فرنسا التقنية : كل 1000 اردني ، 271 بيمتلك راديو بحسب احصائية 1997 كل 1000 اردني ، 119 بيمتلك تلفون بحسب احصائية 2004 كل 1000 اردني ، 120 بيمتلك تلفزيون بحسب احصائية 2000 عدد مضيفي الانترنت (( internet host )) لكل 10,000 هوي 5,7 بحسب احصائية 2003 كل 1000 اردني ، 75 شخص متابعين للجرايد بحسب احصائية 1998 كل 1000 اردني ، 106 شخص بيمتلك سيارة بحسب احصائية 2004 |
اقتباس:
اقتباس:
ليك كيف طالع العلم البولوني :lol: خط أحمر بس |
مانهم مفصلين بس كاتبين .. خدمات .. صناعات يدوية :sick:
______________________________________ مشان مشروع الابيض ما عبيين على صفحة الاخوية وخطرلي اعمل له على الفوتوشوب اطار اسود بس القصة بدها تاكل وقت على كل علم .. مشي لنا ياها كرمال طاهر :deal: |
اقتباس:
يعني النت ببولونيا صار شغلة كتير بديهية و بسيطة و اساسية بالبيت بنفس الوقت ... ايييييييييييييه كيف انقلبت بولونيا خلال مدة قصيرة كتير... |
موضوع رائع جداً . :D |
حلو كتير كتير كتير ... بس في شغلة ما كتير خرطت مشطي ...
اقتباس:
لأنو الولاد مثلا اكيد مارح يكون عندن تلفزيون .. او سيارة وينن هدول جماعة الانكارتا ؟؟ بعتلي ياهن لحتى بهدلن ... :lol: بس عنجد موضوع مرتب ... خيو بدي اعرف عن كرواتيا .. والمانيا .. والامارات ... وللا ما بيحقلي غير دولة وحدة ؟؟ مشكور ..اب طوني... :gem: :sly: |
بللا شفلنا اسرائيل
|
انو موضوع كتير رهيب ابو طوني كالعادة كل موضوع احسن واهم من التاني ....
بس انو من ايمتى صاير سكان الاردن 6,198,677 :? والله كترانين ...:shock: |
انو عن جد انا التانية كل ما عم بقرأ بهل المعلومات للبلاد اللي حاطتهن هيك عم بصير فيني
متل هل السمايلي :o .. هلأ ابو طوني.. شفلنا استراليا بماعيتك يعني اذا مافيها سئلة.. و موضوع عن جد شغلة.. متابعتك.. :D |
انو يعطيك العافية جابي .. :D
عندي هيك كم استفسار مبدئيا .. اقتباس:
انو اوك انت كتبت .. تحت انو عرب واكراد واتراك وكزا .. بس انو العدد المذكور فوق هنن عدد المواطنين السوريين اللي ولا عدد السكان انو مع الكل ؟ ! لانو العدد كتير قليل صراحة وفلجني .! اقتباس:
يعني مثلا لو بدن يكتبو عن الاقتصاد بهي الحالة .. لح يكون ال GDP .. هون معبر عن ناتج الاجمالي المحلي .. للسلع والخدمات الموجودة بالسوق .. واللي بتنتج محليا .. وبكون خلال فترة ما معينة على مدار السنة .. بيعطيك رقم ما معين .. عن كامل وشامل الانتاج .. المحلي داخل هي البلد .. عكلن انت شوف شو الموضوع ... وببين معك اكيد مفروض .. متابع معك .. :D ** هاموش ما تنسانلي حصتي من البلدان .. بس خلينا نبلش بقطر حاليا ... :p |
| الساعة بإيدك هلق يا سيدي 06:39 (بحسب عمك غرينتش الكبير +3) |
Powered by vBulletin® Copyright ©2000 - 2015, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون