هلأ الفكرة يلي بدي قولها كتير بسيطة وانشا الله انلاقي تفاعل
الفكرة انو كل شخص يكتب تصورو عن الدولة وبالتحديد يكتب عناوين عريضة لدستور هل دول الافتراضية
هلأ الدولة يلي عم نحكي عنا اعتبروها شبيهة بسوريا وكل شخص يكتب تصورو عن الدولة
ويكتب دستور مصغر يلي بضمن
فكرة عن السلطات الثلاثة وعلاقتها مع بعض وياريت كل سلطة نستفرد بشوية كلام عنها
كيفية ادارة نظام التعليم
نظرية اقتصادية للدولة
كيفية ادارة السياسة الخارجية بفرض انو انت بسوريا وعم دير عاساس المعطيات يلي صايرة هلق

واكيد لازم تحطو انو دستورك بشكل عام كيف رح يكون توجهو يعني يمني ولا يساري

هلأ بالنسبة الي رح بلش بحالي ونظامي قريب كتير على التخيل يلي تخيلو الحكيم بس مع بعض التعديلات


اول شي رح بلش بالخطوط العريضة
بالنسبة الي النظام هوة نظام مدني محمي من قبل الجيش يلي بدخل لما بشوف انو الديمقراطية في خطر
طبعاً هل شي مابيعني انو الجيش الامر النهي
لانو رح احط قوانين للجيش بتحد من حركتو منشان ما يستبد قواد الجيش بالبلاد
يعني مثلاً متل ماصار بتركيا لما رجعو الحجاب
بصراحة بهل حالة الجيش مابصير يدخل لانو بلش يأثر على الحريات
المهم رح ينحط قوانين بتعطي للجيش قدرة على الدفاع عن المدنية وبس ومابتسمحلو
بأي مس بالحريات العامة

تاني شي تجديد الثقة
يعني كل فترة سنة بصير تجديد ثقة للرئيس ولازم يحصل عل قليلة على 30 بالمية
او بتم انتخابات مبكرة
طبعاً في ناس رح تقول انو هوة لسا عم يشتغل وما طالع النتائج يلي بدو ياها
انا بقول انو نسبة 30 بالمية نسبة كتير معقولة يعني عل قليلة يكون في نسبة 30 بالمية بتأيدو
بمشروعو يا ولا بدنا نرجع لمتل ماكنا

كمان منشان حالة الطوارئ انا بدي اخلي حالة الطوائ الها وقت معين يعني بالسلم شهر والحرب 4 شهور
مثلاً
بالنسبة للسلطات رح يكون في فصل كامل بين السلطة القضائية وباقي السلطات
يعني القضاة رح يكون الهن وزنن وكلمتن المسموعة لانو هل شي ضروري منشان انحد من
نتائج المؤامرات السياسية او انو حزبين يجتمعو لمصالح وبعدا يعملو يلي بدن ياه


هلأ منشان الانتخاب انا مع انو يكون في شي اسمو وزن انتخابي
يعني ماحلوة الفوال ياخد صوت والدكتور بالجامعة ياخد صوت
طبعاً بختلف التوزيع وهل شي هوة يلي رح يحددو ناس مختصين اكتر مني
لاني مهما حطيت مارح اصل للشي السليم
في تخيل بنظري بس منترك الامر لعلماء الاحصاء
طبعاً الزون بعتمد على الدراسة والعمر والثقافة بشكل عام والانجازات والاختصاصات
بالنسبة للعمر رح يكون الفئة الصغير اقل نسبة
بعدا بتكتر شوي شوي ولما بوصل الانسان لعمر ال 50 رح ترجع نقطو تنزل
وهيك
بالنسبة الي كمان رح ساوي كبينات انتخابية يعني كل مابدنا نعمل قرار منستأنس برأي البشر
وهون بجي الاختصاص
يعني لما بدنا نعمل تعديل بقانون اقتصادي بكون وزن دكتور الاقتصاد اكيد كتير كبير
هلأ بالنسبة للانجازات يعني مثلاً انت ممثل كبير والك كلمتك وقضيتك اكيد رح تكون نقطك عالية

هي لمحة عن قانون الانتخاب
بالنسبة للتعديل بالدستور
رح يكون التعديل مو بالهين ورح يكون عل شكل التالي
60 بالمية من البرلمان وموافقة الرئيس و70 بالمية من المحكمة الدستورية
80 بالمية من البرلمان وموافقة الرئيس و 50 بالمية من المحكمة الدستورية
او 80 بالمية من البرلمات من دون موافقة الرئيس و 70 بالمية من المحكمة الدستورية
هلأ ممكن تختلف التصانيف بس القصد انو نحط نسب بحيث ماحدا يكون ماسك القرار بايدو
بغض النظر عن رأي البقية

بالنسبة للاقتصاد رح يكون على الشكل التالي
اول شي مصلحة البلد اولاً منشان هيك رح ناخد منل الكل ورح نصادق يلي بيعطينا مصاري اكتر
حاجتنا مواقف ابية
هل مواقف بتجي بعدين لما منصير اقوياء اقتصادياً
هلأ بالنسبة كيف بدنا نزبط حالنا انا رح اخد الطريق يلي اتبعتو هولندا والدانمارك ويلي هوة الزراعة
يعني سوريا بلد زراعي ممتاز وبتصور فينا نكون اقوياء فيو
وبظن انو القطن والقمح اكبر مثال
يعني مو ضروري نكون بالتكنولوجيا لانو بدا وقت كتير طويل وصعب نلحق الدول التانية
طبعاً ماعم قول انو نتركا بالعكس نشتغل عليها بس نركز عل زراعة



بالنسبة للتعليم رح يكون النظام قريب على النظام الاميركي وفيو شي من ناظم اليابانيين
يعني البني ادم عنا منعرف شو مهارتو وبشو ببدع وشو بحب
لنقول مثلاً رياضيات من ضل اندرسو ونفهمو رياضيات لبين ما الله ياخدو
هيك بطلعلنا ناس مبدعين بمجالن
طبعاً المناهج رح تنحط بعناية شديدة ومن ناس مختصين ورح نطلب منل الدول يلي الها تجارب سابقة
تبعتلنا الناس يلي ساعدوها
او ندرس التجربة ونستفيد منا قد ما منقدر

هلأ بالنسبة للاعلام رح يكون في حرية كتير كبيرة بالاعلام يعني احكي يلي بدك ياه مو مشكلة بس المهم
ما تزرع فتنة دينية او ما تتهم حدا بدون دليل
بس غير هيك كلشي مسموح
بالنسبة لسياسة الدولة الخارجية رح تكون البلد مالو علاقة بالجيران الا الشي يلي بمصلحتو
يعني خلينا شوي نلتفت لنفسنا بعدا منحكي

يعني فيكن تقولي هادا دستوري وشكراً ليلي صبرو واوصلو لهون
موفقين :D:D:D

فكرة حلوة كتير... أخوية لاند فينا نسميها :lol:

ياريت من الأخوة يتذكرو انو أخوية لاند تشبه سوريا و لكان ليست سوريا... ما عم نحكي عن سوريا.. مشان الأمور القانونية و الحلال و الحرام عند ولاد خالتو صيدنايا ;)

هههههههههههههه ملعوبة وانا عم انتظر تصورك للدولة بفارغ الصبر

أنا قريت رؤيتك للنظام وبصراحة فيها وجهة نظر ببعض ما ورد فيها
بس بتمنى منك قبل كل شي تعرف شغلة "وبتصور انك بتعرفها" أنو مو الشغلة بالحكي لانو ما في اسهل من الحكي....قصدي لازم يكون في عمل ومن كل فئات الشعب وهون بيجي دور الطبقة المثقفة متلك متلا لحتى يوعي الناس العاديين مشان نوصل ليللي بدنا ياه
وللأسف بتصور أنو الطريق قدام الدول العربية طويلة كتير و في كتير من العقبات

اكيد الشغلة مو بس بالحكي متل ما بتعرف الحكي ببلاش
واكيد توعية الناس امر ضروري كتير بس انا كنت حابب انو نعرف شو بدنا نساوي بعد ما نخلص توعية
صحيح انو لسا كتير بكير بس فينا نحط هل دستور متل مطالب لتعديل الدستور وشوي شوي فينا
نغير بهل بلد صحيح رح يضل البلد مو كتير متقدم بس هيك احسن من بلا
وياريت اسمع منك تصورك للدولة والدستور وشكراً

طيب... قال نجي نحط تصوّر لدولة ما كيف بدنا نعملها و كيف راح تكون الخطوط العريضة لتكوّنها.. أووووووكي

لنبدأ


هوية الدولة و صيغة الدستور:

يجب أن تكون هوية الدولة منسوجة على أساس وطني بحت, دون أي صيغة ثانية قومية أو عرقية أو دينية أو ايديولوجية من أي نوع.. انما صيغة وطنية بحتة. و أن يعتبر الدين كالايديولوجيا خيارا فكريا شخصيا لا يوثّق و لا يكون له أي أساس أو استعمال قانوني (عدا جانب قوانين الاحوال الشخصية).

نظام الحكم:

جمهوري دستوري برلماني ديمقراطي.. يبدأ التمثيل الديمقراطي فيه من أدنى درجات الادارة المحلية و حتى رئاسة الجمهورية, مع تقسيم واضح للسلطة التنفيذية التي تكون بيد حكومة منبثقة عن أغلبية برلمانية مطلقة أو نسبية متفقة. و يكون دور رئيس الجمهورية تمثيليا و خاصا برسم الخطوط العامة للدولة بالتعاون و التنسيق مع الحكومة الوزارية.

لكي يتحقق نظام الحكم هذا من المفترض وجود دستور مبني على أسس وطنية و ذو آليات واضحة لرسم عمليات السلطة و تحديد الصلاحيات في الحكم, و يتضمن قانون أحزاب عصري و منطقي و حر.

يجب التأكيد كذلك على فصل السلطات الثلاث: التشريعية و التنفيذية و القضائية, و ضمان استقلاليتها و تنظيم العلاقات الدستورية فيما بينها. و هذه العلاقة تنظّم عن طريق محكمة دستورية عليا تكون أعلى سلطة دستورية في الدولة.


الجيش و القوات المسلحة و قوات الأمن:

جميع الجهات المسلحة تحت تصرف السلطة التنفيذية (وزارتي الداخلية و الدفاع) و بمراقبة شديدة من قبل السلطة القضائية.. يمنع لأي جهة مسلحة أي استقلالية قرار و أي تدخل من أي نوع من دون المرور بالاجراءات الدستورية التي يقتضيها الأمر.

الحريات السياسية و الحقوق العامة للمواطنة:

ان الحريات السياسية و حقوق المواطنة يجب أن تكون مضمونة بالتعاون بين السلطات الثلاث التي تشرف على قدسية الاجراءات الدستورية الناظمة لحقوق المواطنين السياسية و العامة من حيث حرية الرأي للمواطن من جهة, و حرية الصحافة التي يجب أن تكون مضمونة بقانون مطبوعات و منشورات حر وواضح.

جزء آخر من الحريات الأساسية هي ضمان قدرة وصول المواطن الى الجهات القضائية القادرة على ضمان حقوقه دون وجود عوائق مادية أو قانونية تحول دون ذلك, و ايجاد الصيغة الملائمة لخلق قنوات واضحة بين المواطن و جهاته التمثيلية.

كما أنه من الضروري جدا وجود قوانين أحوال شخصية عصرية و ملائمة للتنوع و الاختلاف بين المواطنين و اتاحة الفرصة لتشريع قوانين أحوال شخصية دينية و قوانين أحوال شخصية مدنية علمانية و يكون للمواطن الحق باختيار الخيار الذي يلائم فكره.





يتبع...

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

لازم يكون في عنا قانون عقوبات بيتمتع بالمرونة .................هاهاهاها

ياسيدي يا ياس فعلاً كلامك اغلبو حلو وانا لما حكيت على علمانية الدولة
نسيت قول انو بقوانين الاحوال المدنية كل شخص بتطبق عليه قوانين فكرو

وبالنسبة للحريات انا معك تماماً بالافكار العريضة بس انشا الله تحكيلنا شوي بالكلام يلي رح تكتبو بعدين

وبالنسبة للجيش انا بشوف انو قرار الحرب والسلم بكون بايد الشعب حصراً طبعاً لما منكون نحن اصحاب المبادرة

لانو بصراحة بالحرب ما بحدا بتأثر اكتر منل شعب
وشكراً ياس على كلامك وعم انتظر كمالة ردك

تحياتي الحارة



عل هامش :(يلي قالب الموضوع بطاطا ياريت ما يقعور كوسا على شجرة الخسة)
وشكراً

طبعاً نسيت قول اني رح حط رأيي الكامل بدستورك لما بتوضح اكتر من هيك منشان الدقة



تحياتي الحارة