هلق دور " حشت نشت "
وهوي حيعين المتهم التالي ........ ترقبو

احم احم ...... احم
يعني حبيت اني اني بكر شوي بالاجابة مشان ما اتأخر عليكن من جهة ومشان ما تكتر الأسئلة من جهة ( أهم ) 8)

سؤلي هوي: ايمت أكتر مرة حسيت فيها بالسعادة (و إذا مافيها سئلة قلنا ليش)

بصراحة يا جوليا ولا مرة :oops: يعني أنا من الناس اللي عندن مستوى ثابت من السعادة ما بيتغير مع الأحداث والظروف
و فينك تقولي أنو أكتر موقف مفرح ما بزيد سعادتي سنتيمتر واحد !! بس كمان بالمقابل نادراً ما ازعل على شي أما شو السبب ف ما بعرف؟؟

شو بتحب تغير بحياتك؟؟

نانا يا نانا بحب غير كتير اشيا بحياتي بس حالياً اكتر شي عم فكر في هوي اني غير مكان الإقامة :P لأني بعتقد إني إذا سافرت رح ققدر غير بحياتي بطريقة أسرع وأسهل من اذا بقيت هون

هع اب نهلى ..
اي تعى قلي هلق .. لو ما اجاك اولاد غير البنات شو بتتمنى يطلعو بالمستقبل .. وشو مفكر تعمل لتخلهون يحققو الي ببالك بخصوص مستقبلهم !!

والله يا حكيم أنا ما عندي مشكلة منوب منوب انو يجي ولادي كلن بنات بالعكس بنبسط و بسمين نهلة 1 , نهلة 2 , .... الخ
أما شو بحب يطلعوبالمستقبل أهم شي عندي أنو ما يطلعو متلي :o يعني شو ما كانت المهنة أو الدراسة اللي يختاروا ما عندي مشكلة المهم يكونو ناجحين بالمجال اللي عم يشتغلو في ويكونو هني مبسوطين ( مبسوطات ) بهالمجال .
أما شو مفكر أعمل لحتى يحققو اللي ببالي اي هي شغلة بسيطة أنا مفكر أعتمد ع المدام بشكل كامل بهالموضوع :P

أي خيو

اذا مرة كنت قاعد بشي محل وعازم رفقاتك شباب وصبايا على مشروب مثلا وكانت علاقتك رسمية معون

ولما اجيت لتحاسب واز ما معك مصاري

شو بتعمل

والله يا زعيم سؤالك صعب يعني ما انو صعب الاجابة ع السؤال هوي السؤال بحد ذاتو صعب
يعني كنت عم تحكي بشكل منطقي لحد ما وصلت لكلمة ( وعازم ) !!! يعني بتجي بعدا كلمة شباب وصبايا!! و بعدين مشروب و بعدين رسمية و الأهم بعدين تحاسب !!!! يعني كل هدول المصطلحات أنا ما بعرفن أبداً :o بعدين بيرجع السؤال منطقي عند ( واز ما معك مصاري ) يعني بلشت صح وخلصت صح بس السؤال من جوا كتير غريب لذلك بدي اعتذر منك يا زعيم
لا يوجد جواااااااااااااب :?

اي يعني امتى بيخلص دوره

هادا اسهل سؤال :lol: :lol: :lol: بتقدري تقولي انو خلص :angel:

هل يهمك في زوجة المستقبل وضعها المادي؟




والله يا رواف بصراحة لاء ما بهمني اللي بهمني هوي وضعي المادي وقت بدي قرر اتزوج و اذا كان وضعي منيح فما بهمني الوضع المادي لشريكة المستقبل أما اذا كان ما منيح فما بهمني موضوع الزواج من اساسو

ايه وهيك بكون عملت اللي عليي و بكون صار الدور عند جوليا :gem:
وسؤالي هوي: اذا افترضنا انك بتقدري تكوني انسانة جديدة ابتداءً من هاللحظة و خيروكي بين انك تكوني حلوة ومشهورة متل نانسي عجرم أو انك تكوني مهيوبة ومشهورة متل الأم تريزا أو انك تبقي متل ما انتي شو بتختاري؟؟؟؟؟؟ :?:

عمر لاب نهلى عمر ..
وسوال قوي لجوليا ................

انا سوالي لجوليا ..
بصراحة بصراحة انتا شب ولا بنت :?

ايمت أكتر مرة حسيتي انك بتكرهي شخص ومين هوي وليش؟؟؟

شو هي ممكن تكون أحلى لحظة بحياتك ؟؟ وليش ؟؟؟ :jakoush: :jakoush:

هل عندك اعتقاد أنو كل انسان خلق بهال الدنيا و مصيرو مرتبط بانسانة معينة :?: :pos:

شو هي الصفات يلي بتكرهيها و ممكن تغضي نظر عنها بزوج المستقبل و الصفات المستحيل :?: تتقبليها

مرحبا للكل :sosweet:
شو القصة الأسئلة كلها صعبة :( يلا رح نبلش:

اذا افترضنا انك بتقدري تكوني انسانة جديدة ابتداءً من هاللحظة و خيروكي بين انك تكوني حلوة ومشهورة متل نانسي عجرم أو انك تكوني مهيوبة ومشهورة متل الأم تريزا أو انك تبقي متل ما انتي شو بتختاري؟؟؟؟؟؟

بختار إني إبقى متل ما أنا بس مع بعض التغيرات و ما بعرف ليش بس بحس إني هيك بكون مرتاحة أكتر :D
بصراحة بصراحة انتا شب ولا بنت

من استخدامك لكلمة (انتا) مبين إنك متأكد إني شب بس أنا بنت صدقاً:!:




ايمت أكتر مرة حسيتي انك بتكرهي شخص ومين هوي وليش؟؟؟

أحيانا بتضايق من بعض الأشخاص بس ولا مرة حسيت إني بكره حدا بمعنى الكره :D





شو هي ممكن تكون أحلى لحظة بحياتك ؟؟ وليش ؟؟؟


سؤال صعب وما بقدر جاوب عليه بدقة لأنو الواحد مننا كل ما يحقق الشي يلي بيريده بحس انو هي أحلى لحظة بحياتو
هل عندك اعتقاد أنو كل انسان خلق بهال الدنيا و مصيرو مرتبط بانسانة معينة

أكيد لا برأيي ما حدا مرتبط مصيرو بحدا والشخص نفسه بيحدد انو يربط مصيره بمصير شخص تاني أو لا :D
شو هي الصفات يلي بتكرهيها و ممكن تغضي نظر عنها بزوج المستقبل و الصفات المستحيل تتقبليها

بصراحة في صفات ما بفضل إنها تكون موجودة في زوج المستقبل بس ممكن إني غض النظر عنها في حال كانت باقي الصفات الموجودة فيه جيدة جداًمتل الغيرة الزايدة عن حدها بس مابقدر ارتبط أبداً برجل بخيل أو ضعيف الشخصية أو غير حنون مهما كان بيتميز بصفات جيدة أخرة :D
وهلق اجا دور :angel: :angel: الأستاذ :D
سؤالي هوي : مين أغلى إنسان عليك :?: :D

شو أصعب شوال انسألته بحياتك :?: :?:

بصراحة بصراحة انتا شب ولا بنت

من استخدامك لكلمة (انتا) مبين إنك متأكد إني شب بس أنا بنت صدقاً:!:

طب سوال براني لكن ليش اميلك الي مسجلي فيه هوي yousef-n@>>> يعني باسم يوسف !! :?

أي يا كبيرنا
أيمت الحظة ألي بتحس حالك فيا كبير :?

حط عينك بعيني لشوف ................ :shock:

كأني عرفتك ..................... :?

على كلن اذا شي مرة كنت ما شي انتي وخطيبتك بالشارع :hart: وصادفت شخص بتعرفوا وبتعرف انو رح يبهدل حالو و يبهدلك معو اداما :x ..............شو بتعمل ؟ ( يعني شخص غليظ و ما بيعرف يتصرف )

استاذ عفواً يعني بس بدي اسألك هالسؤال
انت بالحقيقة استاذ شي؟؟؟؟ :shock: :?

اخر سوال كتير كتير سهل ..
الإستاذ متل ما اتقول .. استاذ الأساتزة .. يعني هوي الي بيعطي دروس للاساتذة بالاستذة .. عرفت كيف
هيك استذات بقلب بعضون يعني

ما قدرت ما جاوب :oops: فيي انا والأستاذ (الي حين رغبته بالتصريح عن اسمه) .. مشكلة قديمة ..انو لما بيسألوني هوي بيجاوب .. وبيجاوب بالظبط متل ما كان بدي جاوب ولما بيسالوه بجاوب انا وبالظبط متل ما هوي كان بدو يجاوب .. هال المشكلكة صايرة قديمة .. وكانت تزعج ابونا سمير -الله يزكرو بالخير- ودوم يقلنا كل مين يجاوب عن حالو - على امتعاض يعني - :P

سؤالي ا ذا عطوك يوم كامل تكون فيه رئبس جمهورية :roll: قصدي انو ايا بلد بتختار لتحكمو؟ :P

مين انت وشو اسمك وشو هدفك بالحياة

شو هوي أظرف موقف حدث معك ؟ :jakoush: :confo:

أي يا كبيرنا
أيمت الحظة ألي بتحس حالك فيا كبير

لما بقرا توقيعي
:D :D :D :D :D

يا جماعة الأسئلة هلأ موجهة للأستاذ :)

مو للكبير :(

مع الاحترام طبعا :lol:

شكراً للكل :D
مع إني كنت حابب يكون في أكتر من هيك أسئلة :!: و أنو تكون الأسئلة حساسة أكتر :sosweet:
على كل حال ما فيني طول بالرد لأنو اليوم الضهر رايح على حلب و راجع السبت و ما معقولة نطركون لوقتا

julia: سؤالي هوي : مين أغلى إنسان عليك

والله أأنا عندي مشكلة أنو قلبي بيسع كتير وبقدر عدلك على الأقل سبع تمن أشخاص هن الكتير غالين عليي (طيعاً من بيناتون حضرتي) يمكن السبب أنو قلبي متل شي مدرسة بتعطي شهادات للطلاب و ما ممكن ترجع تاخدا منون............... مع العلم أنو من بينات هل الناس الأغلى عليي مين ما عندو أي فكرة عن الموضوع و ما ببادلني الشهادات( المعزّة)............ مدري هل شغلة منيحة مدري سيئة الله أعلم....... بس أنا هيك جايي من الوكالة

Geeny: شو أصعب سؤال انسألته بحياتك

يعني الجواب بالنسبة إلي كتير سهل و واضح بس بالنسبة إلكون رح يكون كتير مبهم
أصعب سؤال إجاني بكلمة_ ليش_ و صعوبتو أنو كان بالنسبة إلي جواب مش سؤال
(يلي بحب أنو يستزيد من الموضوع فينو يبعتلي رسالة خاصة)

architecturer: اذا شي مرة كنت ما شي انتي وخطيبتك بالشارع وصادفت شخص بتعرفوا وبتعرف انو رح يبهدل حالو و يبهدلك معو اداما..............شو بتعمل ؟ ( يعني شخص غليظ و ما بيعرف يتصرف(

يعني بعتقد أنولو شو ما كان وضعو هاد الشخص ما ممكن يبهدلني قداما
لأنو رح كون أنا بعرف شو هيي وهيي بتعرف شوأنا و ماني بوارد خبي عنها أي شي أو أي شخص في علاقة بيني و بينو
أما لو كان هاد الشخص بحبو حتى لو كان مبهدل فبنبسط أأني عرفا عليه لأنو من خلالو رح تعرفني أكتر
بس إذا هاد الشخص دمو تقيل و لزقة يعني سواء كانت معي أو لاء رح أعمل حالي موشايفو وأزمط بريشاتي
يستر عليكون كل شي إلا السماجة وتقل الدم


hashtnasht: استاذ عفواً يعني بس بدي اسألك هالسؤال
انت بالحقيقة استاذ شي؟؟؟؟

كلمة أستاذ هيي بالأصل كلمة فارسية معناتا المعلم والمربي
ومن جهة تانية كلمة أستاذ هيي اللقب يلي بنادو فيه الشخص يلي بيمسك الحسابات بأي جهة
و أنا بالحياة العادية دارس المحاسبة و إدارة الأعمال وبحاول علم الناس المحبة
وبالأخوية أنا مربي و بنفس الوقت المسؤول المالي وماسك الحسابات
وبالتالي شي طبيعي كون بالموقع """ الأستاذ""" ........... عُلم
Dr_HUS:الإستاذ متل ما اتقول .. استاذ الأساتزة .. يعني هوي الي بيعطي دروس للاساتذة بالاستذة .. عرفت كيف هيك استذات بقلب بعضون يعني
لك يسلم هالتم........ ايه هي الأستذة

nana: سؤالي ا ذا عطوك يوم كامل تكون فيه رئبس جمهورية قصدي انو ايا بلد بتختار لتحكمو؟

يعني إذا شغلة يوم واحد بسيطة، أكيد ما بنقي ولا بلد من بلادنا العزيزة كتير على قلبي
لأنو لازم خلال هاد النهار فرفش و إنبسط وما فكر بالانقلابات و الاغتيالت يلي ممكن اتعرضلا، هادا من جهة
و من جهة تانية يعني ماني ضمنان شو بدو يصير فيي بعد هاد اليوم لما يجي صاحب الحظ السعيد خَلَفي

drhas: مين انت وشو اسمك وشو هدفك بالحياة

أنا سر إنسان
و اسمي بكتبو بأعمالي و كلماتي
و هدفي بالحياة كون أنا و خلي غيري يكون هوي

rowaf: شو هوي أظرف موقف حدث معك ؟

مرة رحت على صيد العصافير بالليل مع أولاد عمتي، وليلي بيعرف الصيد بكون والعصافير نايمة على الأغصان
فضوولي بالبيل على الشجرة و صوبت على عصفور و قوصتو و نزل من أول ضرب بضربو بحياتي فقالولي الكل أنو أنا خلقت معلم بالصيد
و لما اجينا نكمل ضوينا بالبيل ولقينا العصفور لساتو محلو وطلع يلي صبتو عصفور تاني ما كنت شايفو
(ملاحظة: أنا ماني من هواة الصيد، لا بالعكس أنا من غير محبذينو)

و بالنسبة للمتهم التالي أنا ما بعرف إذا جو قعد على الكرسي
إذا لاء رح بسألو هل الغربة بتغير طعم البلد عند الواحد :?:

لبقا تحكي كتير لأنو بلشت تكشف حالك يا أستاذ :)

اي عمي جو 8)

أكيد انتي مجرب تحب هون قبل ما تسافر :!:

وأكيد حبيتلك شي حدي هونيك :wink:

في فرق بين التنين :?:


وبصراحة :D

ايمت أكتر مرة عصبت ونرفزت

متل ما فهمت من الكلام أنك مسافر فشو علمتك الغربة وشو غيرت من شخصيتك؟

حسب وجهة نظرك ... بعد فترة معينة ببلش الواحد يبطل يكون مشتاق لبلدو متل ما بيكون في البداية يعني بيتعود عالعيشة بالغربة ...أو هاد الاشتياق بيذيد كل يوم عن يوم ... متل ما عميصير معي :?:

صعبين الاسئلة :?

ايه يا معين

الاستاذ: رح بسألو هل الغربة بتغير طعم البلد عند الواحد ؟

انا بتخيل انو قصدك البلد هوي البلد الام سوريا.. انا قريبا رح انزل ع سوريا لأول مرة من بعد ما سافرت ع كندا - حوالي السنتين - و بصراحة سؤالك مخيف شوي و انا ناطر لأعرف الجواب بنفسي بس أنزل! بس مبدأيا فيني قول انو نعم أكيد بتتغير النظرة لكتير أشياء... يمكن بتصير سوريا أقرب لمكان اصطياف و زيارة الاقارب منها لمكان اقامة و استقرار و عمل... بس منشوف بس انزل و الله يستر :!:

architecturer :
أكيد انتي مجرب تحب هون قبل ما تسافر

وأكيد حبيتلك شي حدي هونيك

في فرق بين التنين

اي و الله في فرق يا شريك.. يعني بالنسبة لتجربتي بسوريا كان فيك تقول عنها حب "صادق" و لو كان حب مراهقة.. و عادة المشاعر على الاقل فيك تقول انها مانها متركزة حول الجنس... يمكن لانه المجتمع بدون ما تحس بقلك ما تفكر بهل طريقة لانو ما رح يمشي الحال! (بشكل عام طبعا)
بينما هون أول شي بطلت "حب" بمعنى الحب... يعني صار اكتر منه اعجاب و معنى جنسي اكتر.. و حتى لو انو صاحبتي الاخيرة هون كانت سورية!! بس بدون ما تحس.. الاشياء يلي بتحكي فيها معها و "بتتوقعها" منها و هي بتتوقعها منك... بتختلف كتير.. و معنى الصحبة بيفرق. طبعا ما عم قول انو هون ما في حب حقيقي و هل حكي.. أكيد فيه... و حتى احيانا العلاقات غالبا بتكون جدية اكتر بكتير من سوريا... بس يعني... في حرية اكتر

mhmary: ايمت أكتر مرة عصبت ونرفزت
و الله انا بشكل عام بعصب كتير من الانسان البليد و الجاهل و الغبي... أو اذا مرق الباص من ثانية و ما قدرت لحقو! بس بشكل عام انا ماني انفعالي ابدا و اعصابي كتييير هادية و باخد الامور ببساطة.. يعني ما بذكر موقف معين

julia: متل ما فهمت من الكلام أنك مسافر فشو علمتك الغربة وشو غيرت من شخصيتك؟
يمكن صار في اعتماد اكبر بكتير على النفس و تحمل للمسؤولية ... بس كمان ناطر لانزل ع سوريا لانو لما انزل بتخيل رح اعرف الجواب و اتأكد اذا انا عن جد تغيرت لما لاء

saeed: حسب وجهة نظرك ... بعد فترة معينة ببلش الواحد يبطل يكون مشتاق لبلدو متل ما بيكون في البداية يعني بيتعود عالعيشة بالغربة ...أو هاد الاشتياق بيذيد كل يوم عن يوم ... متل ما عميصير معي
و الله أول شهر ما كنت مشتاق
بعدين مرقت فترة صرت كتيييييير مشتاق خصوصي انو صرت احكي مع الشباب على المسنجر
بعدين فترة سباااات بيتخللها بعض الاشتياق!
هي بصراحة بتتعلق بالشخص و المدينة العايش فيها... يعني انا هون اكتشفت بعد فترة انو عندي رفيق من حمص من حارتنا!! و شاغل حالي بالدرس و شوية شغل... بقى لاء الشوق ما عم يزيد.. فيك تقول عم ينقص :roll:


حاجتي ما
:lol:
شو mhmary باشا شو رأيك تشرف عل كرسي

شو أكتر مرة أنبك ضميرك؟؟

شو هو أكتر موقف قربك من الله :?: :?: :?:

شو هو أكتر موقف قربك من الله :?: :?: :?:

الله يتلطف فينا :lol:
هلق أنا رح جاو بعد 33 ساعة من هلق

في شي مرة حدا من رفقاتك يلي بيعزو عليك زعجك كتير ؟ :?:

وشو كان السبب ؟ :?:

:D

اذا خيروك تخلق بدل شخص تاني ممكن مشهور او عادي مين بتنقي؟؟

سؤال سهل بس مهم
اذا ربحت باليانصيب 500 الف سوري فقط لاغير
شو اول شي بتفكر تعملو بالمصاري؟؟؟؟؟؟

اذا كان معك حريه الاختيار بين انسان فقير و ناجح اجتماعيا.... أو غني و غير ناجح احتماعياً .....
يعني ببساكة المال او المرتبة الاجتماعية... أي بتختار؟؟؟

أي مرحبا بانسبة لجو
أيمت أكتر مرة أنبك ضميرك:هاي مرة كنت بالمدرسة صف تاسع وكنت بالباحة عم أشتري من عند الأذن وأذ بيجي واحد صف حادي عشر بيدفشني ويزعجني مزبوط فأنا وقتا ثارت فيي الحمية العربية وقررت أني ألعن سلاف الجابو وفعلا الفرصة البدة لطششتو قتلي خليتو ينسا الحليب الشربو من أمو ويا دوب أدرو الشباب يفكو من بين أيديي يعني مسحت الأرض فيي
وبعديين أجو هيك رفقاتي وقفنا مع بعض فرحا بالنصر على الحادي عشر بس هو يا حرام كان واقف لحالو يعني ما حلوة بحقو يتشرشح هيك شرشحة فأنا وقتا عنجد نزعجت ومدري شو صرلي ورحد لعندو وأعتذرت منو بس الفكرة أنو ما قبل الأعتذار وليلتا يا دوب قدرت نام وضليت ي خمس تيام مزعوج
-بالنسبة لجيني أيمت أكتر مرة حسيت فيا أني قريب من الله: مرة كنا عاملين حفلي لليتامى وكل واحد أستلم مجموعة وأنا كان بمجموعتي بنت عمرا شي 7 سنيين وحلوة وحبابي كتير يا حرام وحدة تاني عمرا شي 4سنيين بس مدللي كتير وقت توزيع الهداية طلعت هديتا للبنت العمرا 7 كتير حلوة وكتير عجبتا بس البنت المدللة صارتتبكي بدا ياها وهدوليك المسؤليين عن الميتم أد ما نون فهمانين عطوا ياها وصارت البنت تبكي فأنا أنزعجت كتير و الدمعة رح تنزل من عيني
فا رحت وأشتريت هدية تاني لهديك البنت مع أنو المعروف عني أني واحد مفلس وما بيلتقى عشر ليرات بجيبتي ومع هيك حطيت كل مصروف الجمعة من شان البنت بس مبسوط كتير
architecturer
أي في حدا من رفقاتي زعجني كتير مرة كان في عندي رفيق بحبو كتير وبحكيلو كل أسراري ومرة حبيت وحدة حب ما طبيعي وكل يوم كنت أنطرا عالمدرسة من شان شوفا وقلتلو هالشي لهادا رفيقي عالأساس سر بس الجحش راح فضح الدني ونزع كلشي وصرت كل ما أمشي بالحارة أسمع طلاطيش الحكي ومرة كنا بحفلة وأجيت بدي أرقص مع هاي البنت أميت ما قبليت طبعا لأنو سيرتنا على كل لسان :cry:
نانا أنا بنقي شخص عادي
هشت نشت:بيغر بيتي وبشتري واحد يكون ألو غرفة نوم لأنو البيت لخلقت في ما كان في غير وحدة لأمي وأبي وطول حياتي كنت نام على الصوفا لحتى هل السني وقت أجيت على أميركا
saeed
أكيد الحياة الأجتماعية بدون منازع
وهاق شو منشانيك geeny
شو هيي أكبر مواجهة واجهتيا :?:

يا ماما :( :( :(

أهلين جيني

شو أكتر شي بيزعجك بأهلك .. او اذا حابة تجاوبي بهل طريقة.. شو أكتر موقف خلاكي تنزعجي منون ؟؟؟

و good luck :P

أي أم الجون

انتي برأيك وبشكل عام

مين أكتر بيحب من قلبو :hart:

البنت ولا الشب ولييييييييييييييييييييييي ش :?:

وبدي كمان بشكل خاص فيكي :o

:D

اذا فقدت السيطرة في امر موكل اليك هل تتخلى عنه ام تحاولي ان تعيدي سيطرتك عليه ؟ على الرغم من ان هناك من هو احق منك في ذلك المنصب , (وان الوقت لا يكفي ويجب تنفيذ العمل بسرعة ) :jakoush: :confo:

جيني ممنوع تجاوبي لحتى يصير في على الاقل خمس أسئلة
هلق صاروا أربعة

:roll:

جيني من بعد اذنك سؤال غريب شوي ...
اذا انعزمتي لعند عالم ... و بعد ما وصلتي لعنون بتكتشفي انو الواحد لازم يشلح من رجلو لأنو في سجاد أو موكيت ..و انتي ما بتقدري تشلحي من رجلك لسبب معين ... شو بيكون تصرفك وقتها؟؟؟ بكل صراحة :P

جيني من بعد اذنك سؤال غريب شوي ...
اذا انعزمتي لعند عالم ... و بعد ما وصلتي لعنون بتكتشفي انو الواحد لازم يشلح من رجلو لأنو في سجاد أو موكيت ..و انتي ما بتقدري تشلحي من رجلك لسبب معين ... شو بيكون تصرفك وقتها؟؟؟ بكل صراحة :P

حلوي منك أبو السعود :lol:

أنا اسفة عل التأخير
mhmary:
مواجهة حالي و حقيقتي لاني كنت دايماً اتهرب من معرفة حالي و لهلأ بواجه حالي ولهلأ المواجهة صعبة لأنك بتكون عم تعترف بأشياء موجودة فيك و كنت عم ترفضها :?
joe:
ما في أكتر من المواقف يلي بتزعجني من أهلي بس أكتر شي بيخليني أنزعج هو أنو أهلي مثقفين كتير و قدام الناس بيحكوا عن الحريّة و التحرر بس لما تصير الشغلة معلقة بولادهم بينسوا كل الحكي و بيتحولوا لناس جداد. :?
architecturer:
و الله انت عرفت مين تسأل :cry: :P
أنا ما عندي خبر ة حتى خبرك بس بتخيل البنت لأنو عندها مشاعر فائضة و أحاسيس ممكن تغرق العالم و إذا حبّت عن جد بضحي بالعالم كرمال يلي بتحبه.
هلأ أنا لسه ما حبيت و لا مرّة بس أنا بستخدم عقلي أكتر شوي من قلبي :shock:
:: rowaf:
بتخيل بسلمه للشخص الأحق مني لأنو رح ينفذه بشكل أحسن و بالوقت المطلوب و لأنو ما رح يكون وقتا لحتى أتمرجل و عنّد و ضلّ متمسكة فيه يعني انت متل ما بتعرف أشغالي كتيرة و بعدين مين قلك انو في حدا أحق مني أنا أحسن مني ما في :oops: :P :P :P
saeed:
بسألهم قبل ما فوت :عندكم شي جوز جرابات مرتب :wink: لمصلحتكم طبعاً :lol: :lol: :lol:
هلأ دور MARCHELLA
أي مين أكتر شخصية بتحترميها :?:

أي مارشيلا خانوم :D

أذا شي مرة وحدي من أعز صيقاتك ختلت فيك ( خانتك بشغلة أو حكيت بضهرك مثلا ) :cry:

شو بتكون ردة فعلك :?:

هع .. وصل الدور على ارمينيا هههههههههههههههههههه
اي مارشيلا
شو اكتر اكلة بتحبيها .. وشو اكتر اكلة بتكرهيها .. !!

سؤالي مارشيللا هو ... مارشيللا هو اسمك الحقيقي أو اسم الدلع !!! :!: ؟؟؟ :?: :confo:

مارشيلا سؤالي كتيير بسيط مين الفنان المفضل عندك ؟ :wink: :wink:

شوووو وينك مارشيللا ؟؟؟؟ نحن ننتظر :?

ايمت أكتر مرة حسيت فيها بالسعادة؟ :D

مرحبا يا شباب انا عضو جديد بالمنتدى وكنت عم بعمل كزدورة بكورنيش الاخوية فكفشت هاللعبة وحبيت شارك فيا
والسؤال لمارشيللا هوييييي:
اذا تزوجت ان شاء الله واخدتيلك شي حليوة متلي :mrgreen: :pos: مانو ارمني ، بتعلمي ولادك ارمني ولا لاء؟
هاتي لنشوف جاوبي :jakoush:

بعد ما انا كمان كسدرت على الكورنيش التقيت برامو
بدي قلك شغله صحيح انا ارمنيه بس ماني متعصبه :x :evil:بس بحب ولادي يعرفو مو بس ارمني وعربي واسباني وانجليزي ...يعني بدون يعرفو كل لغات امون :wink: :angel: بس اذا زوجي مانو ارمني ما بحب وقت اللي يكون ابون موجود يحكو لغه هو ما بيعرفا .... :sosweet:

سوري منكون بس انا ما كنت بعرف باللعبه ...الظاهر كل يوم بتسالو شي عضو؟؟!!!! :cry: :cry: ووصل الدور علي...اوكي
اولا انا بحترم كل من يحترمني :angel: واذا شي مرة غدرت فيني او خانتني انا بعصب بس ما بفرجي :evil: :x :evil: بس يا ويلها مني لأنه انا بسامح بس ما بنسى ...اكلتي المفضله هي الباميا وبكره الكوسه والملفوف
اسمي الحقيقي مارتشيلا يعني حرويه البحر بس في عندي اسم دلع واسهل بكتير من مارتشيلا وكما بيبلش بحرف الميم :P
فناني المفضل انا بحب جوليا بطرس ومحمد منير و هلأ كتير عم تعجبني فرقه كلنا سوا :sosweet: واللحظات السعيده كتيرة بس اكتر مرة انبسطت فيا لما حسيت حالي محبوبة :hart: :hart: :sosweet: :sosweet: