-
دخول

عرض كامل الموضوع : <<<ابتسم فأنت في الأردن >>>

سوا ربينا
28/12/2007, 20:26
إذا مشيت بالشارع يوم من الأيام ... وشفت سياره تكسي صفرا ...
من جوا ضو أزرق ... وسي دي معلق على المراي ... وجواتها شب مربي سكسوكه ولابس بنطلون كونز ومعبي السيارة من برا تعليقات وملصقات ... فأنت تسير في شوارع الأردن .... :clap:

إذا كنت واقف على الإشارة ولما تصير صفرا بتسمع سبعين واحد بيزمرو وراك .... فأنت في الأردن اذا كنت ماشي وعلى بعد 200 متر إشارة خضرا .. وشفت كل السيارات بتتجاوز عنك عن اليمين .. عن الشمال ... مش فارقه .. المهم يلحقوا الإشارة خضرا .... بتكون في الأردن ... :lol:

إذا دخلت أي دائرة حكومية وشفت الموظف قاعد مادبوزه ومكشر ووجهه زي اللي شامم ريحة عاطلة بلا مؤاخذه فلتبتسم لانك في إحدى الدوائرالحكومية في الأردن ... :frown:

اذا سمعت الحوار التالي .....

- ألو ...
- ألو ...
- مرحبا
- هلا .. هلا ...
- كيف الحال ..
- والله الحمد لله ... انت شو أخبارك
- تمام الله يسلمك ...
- شو فيه ما فيه ..
- والله صافيه وافيه .. مين معي
- انت الطالب .. مين حضرتك
- مش تليفون ابو غازي ..
- لا يا خوي النمره غلط
- آه ... حقك علي يابه ..
- ولايهمك .. كسبنا سماع هالصوت ...
- يا سيدي الله يحي اصلك .. من وين انت ...
- انا من الملاطشه ...
- هاظا احنا قرايب ...
- يا سيدي حياك الله ... مع السلامه
- هلا .. هلا .. الله معك ...

طبعا اذا سمعت مثل كل هذاالحوار ... والنمره غلط ... فأنت أكيد في الاردن ...;)

اذا كنت تتحدث مع شخص عن أسعار الاراضي ... وقالك انه الارض الفلانيه اللي بعبدون كانت لجده وكان يزرع فيها بندوره وفقوس .. وباعها بثلاثمية ليره بالستينات ... فأنت اكيد في الاردن .... ;)

اذا كنت ماشي بالشارع ... وشفت واحد بيجح بخلقتك.. هيك بدون سبب ... لا هو مسلِم .. ولا هو مبتسم لك ... بس بيجح كانك قاتل ابوه .... فانت ماشي في الاردن ... :cry:

اذا رن عليك واحد مش شايفه صار لك عشرطعشر سنه ... وساعه وهو يسلم عليك ويمدح فيك وآخر اشي سألك : بالله وين محول راتبك.... اكيد بتكون بالاردن ...:p

اذا كنت قاعد بمكان عام ... وكل اللي حواليك ماسكين موبايلاتهم وسمعت .. " بالله شغل البلوتوث .. بدي أبعث لك شغله طقع " ... بتكون بالاردن ...

اذا سمعت كلمة صافيه وافيه ... وهي لا صافيه ولا وافيه .. بتكون بالاردن .. :lol:

اذا شفت بكم ديانا موديل الف وتسعميه وخشبه محمل بندوره والشوفير شاد الشماغ على راسه ومش شايف لا شمال ولا يمين .. ويا أرض اشتدي ما عليكي أدي .. بدي أسبق كل التكاسي .. بتكون بالاردن ...:shock:

اذا الدنيا رشت شوية بَرَد ...ووزارة التربية علَقت الدراسه .. والحكومة اعلنت عطلة رسمية بسبب خوفها من الثلج الغادر .. والتلفزيون بث مسرحية العيال كبرت .... معناته انت كمان بالاردن ... :lol:

اذا شفت الجو ..هَه .. برشرش ثلج والناس بتقدر تركض عالخبز والكاز بس ما بتقدر تروح تداوم ... برضه بتكون بالاردن ...:lol:

وبالرغم من كل اللي بالاردن ......
بنضل نحكي .... ومن قلوبنا ... شو حلوه يا بلدي.....:D:D:D

ان شالله تعجبكم.....:D:D:D
المحامية الصغيرة
28/12/2007, 20:46
مشكور اخي الله يخليلكم الاردن واهلها الجميل
سوا ربينا
28/12/2007, 20:59
مشكور اخي الله يخليلكم الاردن واهلها الجميل

شكرا لمرورك...
والله يخليلك ويخليلنا فلسطين....
اممي
28/12/2007, 22:06
مشكور اخي الله يخليلكم الاردن واهلها الجميل

الله يخليكن للاردن و بالاردن :lol:
Damask Rose
28/12/2007, 22:10
يعني ضروري الفضايح؟؟؟؟؟؟؟؟؟؟؟؟؟؟؟؟:jak oush::jakoush::jakoush:
سوا ربينا
28/12/2007, 22:13
يعني ضروري الفضايح؟؟؟؟؟؟؟؟؟؟؟؟؟؟؟؟:jak oush::jakoush::jakoush:

خيتو هاي مو فضايح .... هاي واقع ... والا انا غلطان;);)

وشكرا لمرورك...:D:D:D
Damask Rose
28/12/2007, 22:15
خيتو هاي مو فضايح .... هاي واقع ... والا انا غلطان;);)

وشكرا لمرورك...:D:D:D


لامو غلطان
مشان هيك بقلك فضايححححححححححححححححححححح ح;););)

وبدي قول كمان شغلة
يعني ازا بتطلع على باص وبتلاقي الكل مكشر وضارب بوز بس في واحد عم يبتسم فلازم تعرف انو هاغريب باالاردن;)


ثاااااااااااااااااااااااا ااااااااااااانكس عمووووووووو:oops:
LiOnHeArT.3LA2
28/12/2007, 22:27
هدا الايميل وصلني من شي تلت ايام

بيفرط من الضحك
سوا ربينا
28/12/2007, 22:30
هدا الايميل وصلني من شي تلت ايام

بيفرط من الضحك

الله يفرطك كمان وكمان......:lol::lol:
black_iris
28/12/2007, 22:32
الله يخليكن للاردن و بالاردن :lol:
:frown::frown:
ومين قلك بدنا نطلع منها
ونحن ها هنا قاعدون :pos:
سوا ربينا
28/12/2007, 22:35
:frown::frown:
ومين قلك بدنا نطلع منها
ونحن ها هنا قاعدون :pos:

وانا بأيدك بهالحكي.......:gem:
ميرسي على مرورك....:D:D
ايمن عودة
29/12/2007, 11:42
ههههههههههههههههههههه

كمان نسيت شغلة

اذا كنت بتصلي يوم الجمعة وانت كلك خشوع وبعد ما يسلم الامام
على طول بتسمع 4 بليرة الخيار 3 بليرة البطاطا

ابتسم فأنت بالاردن
تحيــــاتي لك
betty_palestine
29/12/2007, 11:49
ههههههههههه
لك اسألونا احنا عن هالقصص :o
لك المشكلة مش بالاردن المشكلة بالناس:p
اللي بصفر من هون واللي بجحرك عن الجنب:shock:
واللي مو عاجبتو لبستك واللي لاحقك للبيت بالسيارة:shock:
واللي طنط بيتغزل وخايف ينطعج:frown:
وفوق هاد ابتسم:x
BnBooN
30/12/2007, 00:59
ههههههههههههه اشي من الاخررر :lol::lol:
يسلموووو سكل
ابو قطيط
31/12/2007, 00:57
مان انت صح من الآآآخر طقع.... :pos:

و بحب اضيف انه لما يوصلك هيك رد (لمزيد من المعلومات اطلع سطرين) بتعرب انه جاي من الاردن:sosweet:
red rose
05/01/2008, 17:54
ميرسي كتييييييييروانت مش غلطان لانو عنجد هاد الواقع بالاردن بس انا زعلانة كتيييييييييييير منك ليش ماذكرت احلى منطقة وعمايلها بالاردن والي هي الزرقاء اجمل مدينة صراحة رووووووعة.