جاي على بالي أنشر الوعي بأهمية التناقض بالمجتمع...
يعني ليش التناقض صفة مذمومة؟؟
أصلا الطبيعي بالحياة هو التناقض وهو موجود بكل أقطاب الحياة...في الحب مثلا..عندك الشب والبنت...متناقضين وبيتجاذبوا....
في الغذاء مثلا عندك اللحمة (أكل الأغنياء) والخبز (أكلة الفقراء) كمان بيتجاذبو وبيعملو لُحمة عالمية اسمها الهامبرغر...
حتى المشافي...ناس بتولد وبتموت بالمشافي...هذا يؤدي إلى إنو التناقض صح.....
بس التوافق هو اللي غلط...
بتشوف الشرطي والقانون... الـ 2 متل بعض بس متنافرين...
الموظف...يعني بيعمل أي شي إلا وظيفته...
لك حتى الراتب...مكركب على الأخير...مالو راتب بنوب...
بنوب مالو راتب....
ترى ما قصدي شي...قصدي إنو الحياة...مغناطيس
عدي
* بحبشت كتير و ما كنت لاقي تناقض بيني و بين مديري ... يعني هو عندو بيت و أنا عندي بيت ... هو عندو سيارة و أنا عندي سيارة ... هو عندو راتب و أنا عندي راتب ... بس أنا عندي هم مشان أبني مستقبلي و هو ما عندو ... يعني بالقيمة المطلقة (واللي بينو و بينها علاقة سريّة) أنا عندي أكتر منو ... بس ما كنت لاقي التناقض مشان نكون متجاذبين ... يعني يا دوب يا دوب نتجاذب أطراف الحديث مو أكتر ... انو كنت أقدر ادخل لنص الحديث ... دايماً عالأطراف ... و المشكلة انو الأطراف مربوطة ... قال شو لكل حصان جامح كبوة ... و هو ما بدو ياني اكبي ... لذلك كابحلي جماحي ... حكيم.
مناف:
• قال اللي استحوا ماتوا....طيب وإذا كان ماتوا...ما عاد إجى غيرون على الدنيا؟؟ولا حتى خلفوا ولاد ليستحوا متلون؟؟
يعني ما عبعرف تحديدا....هنن من شوا ماتوا...من كتر الحياء؟؟
طيب والعايشين شو وضعون؟؟ قصدي مع الحيا؟؟
طيب بهالحالة معناتها اللي لسه عايشين...هنن...إححححم...ما بيستحوا..
على هالحالة الحمدلله راح نلاقي الموظفين أطول الناس عمراً....بلا الموظفين لسه بنتحامل عليهون...هيك الأمور ماشية عليهون وعلى غيرون.
خلينا نركز على الشوفيرية.... كمان بنضل بنق عليهوم.... يعني شو طالع بإيدون المساكين...
طيب خلينا نقول شرطة المرور....كمان الله يكون بعونون منين بدون يلاقوها ولا منين....من الوقفة بالشمس واستنشاق دخان السيارات ولا من اسلوب القيادة الرعن تبع الشوفيرية...رجعنا حكينا عليهوم...والشوفيرية نصون موظفين قبل الضهر...
إي ما تم حدا...الشعب كلو عايش وما حدا مات لسه....بس شو هو العنصر المشترك بيناتون غير عدم الحياء ؟؟
يمكن نسيانين أمواتون....؟؟؟
عدي:
* ما عم افهم لهلق ليش الناس مستعجلين دائماً ... يعني على شو؟ ... بتلاقي هالموظف مستعجل ليجي أول الشهر ... طيب مادام عم يحط هالراتب ديون ... ليش مستعجل؟ خليه على مهلو ... بتصير الديون أبطأ ... و بتلاقي الناس راكدة ركد بهالشوارع ... هاد اللي مستعجل يوصل عالبيت ... على شو؟ على شهرزاد اللي بدها تحكيلك شو صار بسندباد امبارح لما شاف روزاليندا؟؟
و التاني قال شو مستعجل عالجامعة ... و هداك مستعجل ليوصل عالشغل ... عم يكسرو حجار بالشغل ... طيب و لما يوصل ليش عم يقضي نص النهار عم يفطر و النص التاني عم يشرب كاسة الشاي تبع بعد الأكل؟ ... يفطر بالبيت على مهلو ...
أحلى شي هداك اللي مستعجل لأنو واعد الشباب بالقهوة ... يا أخي الرجال بينمسك من لسانو و ما دام قال الساعة سبعة لازم يوصل عالموعد ... بس على شو؟ انو صرلو زمان ما نزل عالقهوة؟
بيقلك في العجلة الندامة و في التأني السلامة ... مشان هيك ما عم نلحق عجلة التطوّر ... منخاف نندم ... نندم منخاف...
مناف
• الإنسان متل البطاطا....النوعية الممتازة... بتكون تحت الأرض (حكمة)
عدي:
يا أخي النشاء مادة كتير مهمة ... ما فهمت ليش الناس بتحب تبعد عنو و عن مصادرو ... بيقولو انو اكتر شي موجود بالذرة ...
و بلاها ... أصلا من أول ما اخترعوها ما نابنا منها الا وجع الراس ... بس أنا بقول غير هيك ... أهم مصدر للنشاء هو نحنا ...
يعني بتلاقينا دائماً نشاء الحرية ... و نشاء لقمة العيش ... و نشاء الفرح و السعادة ... و نشاء اقامة في الخارج ...
و نشاء بناء جسور المحبة مع كافة شعوب العالم ... و نشاء نمضي يوم بدون سمّة بدن ... و نشاء الوصول الى قلب المرأة ... أهم شي الوصول ... لأنو هي اللي بتثبت الدفعات ...
و نشاء و نشاء و نشاء ...
بقى اذا بدكون تبعدو عن النشاء بعدو عن نفسكن شوي ... بركي بيكتشفولنا مادة جديدة اسمها "لدينا" ...
مناف وعدي كعكجي

معك حق نحنا اصلا انوجدنا اجناس وشخصيات تختلف عن بعضها بس مين قال انو ازا في بشخصياتنا اختلاف معناها لازم يكون في خلاف؟؟
بالعكس المراة جميلة ومميزة بشخصيتها والرجل نفس الشيء والاجمل لما بلتقوا مع بعض!
اصلا لو كنا كلنا نفس الشي ونفس التفكير ونفس الشكل :? شو راح تكون المتعة بالحياة؟ :shock:
بعدين لو ما كان في تناقضات كان ما عرفنا شي اسمو تعايش!

شكرا عالموضوع تحياتي :D

وين الفستق ..؟؟ :shock:

... بركي بيكتشفولنا مادة جديدة اسمها "لدينا" ...
مناف وعدي كعكجي


يعني مع أنو ما كتير إستوعبت الموضوع .. أكبر من مستوى تفكيرنا بارليب الحكي هاد :shock:

بس معبرة الجملة الأخيرة كتير .. أحلى شي فيها أنو بعيد عن شواربنا ! :cry:

Barleb


هلق هاد الحكي (( منشأ )) ولا (( لدينا )) :shock::shock:

وين الفستق ..؟؟ :shock:
:hashish::hashish::hashish:



Barleb


هلق هاد الحكي (( منشأ )) ولا (( لدينا )) :shock::shock:

هاد لدينا .. بس نشاء ينفهم ( بفتح الفاء و الهاء )

يعني مع أنو ما كتير إستوعبت الموضوع .. أكبر من مستوى تفكيرنا بارليب الحكي هاد :shock:

بس معبرة الجملة الأخيرة كتير .. أحلى شي فيها أنو بعيد عن شواربنا ! :cry:
ولو يا معلم .. كلك مفهومية ..