حدثنا ابن خلدون قال..
و ابن خلدون هو عالم اجتماع أو كما يقال هو الذي أوجد علم الإجتماع ..قال في مقدمته المعروفة ...مقدمة ابن خلدون..وباختصارإن لكل دولة في العالم و في الكون ثلاثة مراحل عمرية..أولها النشوء..أي الدولة أول طلعتها ..تانيا عصر الإزدهار..أي الدولة وقت تكون قوية و قد حالها..و تالت عصر هو عصر الأفول و الإنهيار..يعني وقت تفرط الدولة..
و اللي عندو أدنى قدر من الثقافة بيلاحظ أنو هالحكي صحيح كل الصحةيا أخي رجاع و شوف كل دول العالم من أول دولة لآخر دولة..بغض النظر كبيرة أو صغيرة..يا أخي حتى الأديان نفس الشي بصير فيها..البني آدم نفس الشي..لك حتى المجرات و الأكوان..
سعد الله ونوس..الكاتب المسرحي السوري العبقري..كتب مسرحية اسمها منمنات تاريخية..تحكي المسرحية عن أهل الشام وقت حاصرهم تمرلنك المغولي..و بالمسرحية حكا عن ابن خلدون اللي كان موجود بالمدينة المحاصرة...و اللي بفاجأنا أنو ابن خلدون و بدل ما يساعد بالدفاع عن المدينة المحاصرة بيوقف مع تمرلنك..و بيبرر أنو دولة المماليك اللي كانت تمثل دولة العرب بهداك الوقت وصلت لمرحلة الأفول و ماعاد منها رجا أو أمل..بينما دولة المغول عم تزدهر و ما حدا بيقدريوقف دولاب الزمن اللي ضعف الدولةالمملوكية و قوى الدولة المغولية..و لهسبب فما في حل أو طريقة لإنقاذ العرب فبينحاز للملك الحقيقي تمرلنك..
نحنا أكيد ما بدنا نحكم على العالم ابن خلدون..بس موقفو بخلينا نفكر..
أولا نحنا..و بهالزمن اللي عايشين فيه..العرب بأية مرحلة صاروا من مراحل ابن خلدون؟؟
طيب إذا نحنا بمرحلة الأفول و الإنهيار شو بنعمل..يا ترى فينا نرجع نوقف على رجلينا؟؟ و لا ماحدا فينو يوقف بوجه عجلة القدر و اللي بدو يصير خلص ما في نهرب منو..؟طيب و إذا اقتنعنا بهالشي شو نعمل ..نضل واقفين عم نتفرج على اللي عم بيصير ببلدنا لأنو مابيطلع بأيدنا شي أو نهرب على الغرب و كل واحد يلحق حالو؟؟
أنا بالنسبة ألي ما بعرف و بترك كل واحد يجاوب عن نفسو...



أبو عبسي....



و سلام....

نحنا بمرحلة الانهيار الفظيع أو ما بعد الانهيار