مرحبا شباب
بدي احكي عيب اللي عم يصير لحنا على اساس طبقة واعية
شايف ما نازلين إلا نسب على بعضنا
برايي خلينا اللي بيسب او بيحكي كلمة مش حلوة الكل يعمل او يتخذ بالأحرى تصرف مرتب ضدو رسالة عتب مثلا
او ممكن الكل يطنشوا لأنو عيب وصلنا لمرحلة بتسود الوش برأيي انا

شو رأيكن

والله ياشريك الحال من بعضو

بس بما أنو مشرف المنبر غايب والحكيم مابيدخل لح يضل الوضع هيك

بقا ليدخل كريم ويبلش حذف وطق انذارت بيتغير الوضع

وكريم غايب مدري مرضان مدري ابصر شو والغايب عزرو معو

صديقي المسبات من شيم العربي المعاصر .. عادية !!

اذا حوار عادي ما عم بيصير .. دائما في حدا ضد حدا .. وعالموت .. صراح فكري وقبلي وعشائري اخو شليتة !!
وعالفاضي


شكرا جدا جزيلا

الموضوع أنو مافي أحترام

والكل بدو يرد بطرق بهلوانية

وهاد التعصب والشتم يعني عمينقلو الشارع لهون

ونحن هربانين منو لحتى نشوف شي يرد شوية أمل بالشباب

بس للأسف بس يعجز حدا عند فكرة بينطحا

ومتل مابيقول هرقليطس

الكلاب تنبح على كل ما لا تتبينه

الكلاب تنبح على كل ما لا تتبينه
وشكلنا فقدنا كم عضو من اللي كانو يبينو كلشي للناس
لهيك تعبى المنتدى نباح

الله يعينك يا كريم .... بس ترجع شو عندك شغل :cry:

صديقي المسبات من شيم العربي المعاصر .. عادية !!

اذا حوار عادي ما عم بيصير .. دائما في حدا ضد حدا .. وعالموت .. صراح فكري وقبلي وعشائري اخو شليتة !!
وعالفاضي


شكرا جدا جزيلا

صح .. هاي مشكلة .. بس
"If a problem has no solution, it may not be a problem, but a fact - not to be solved, but to be coped with over time"
بما معناه ..
اذا ما كان للمشكلة حل فهذا بيعني انو ما عاد في مشكلة هاي صارت واقع، FACT و الواقع ما بيبحثو في حله ، وانما بيتعاملو معو كواقع ..

(طبعا هذا الإقتباس عن خالك شمعون.. "شيمون بيريز" رئيس حزب العمل الإسرائيلي _حزب خنازير وقردة بعرف :lol:_ وهوي خنزير وقرد كبير _بعرف كمان:lol:_ بس فهمان .. يفدح حريشو .. فهمان .. بتصير انو يكون واحد خنزير وفهمان .. )

الي بدي قولو معلم انو احنا العربان "والعاربة كمان هوي العربان لوجه التحديد و بعض العاربة لوجه الحق والباطل"
ما عنا بتراثنا اي ثقافة حوار.. ما صادف بتاريخنا المجيد (بما يشمل الفتوحات حتى .. و رغم انو وصلنا لإشبيليا وغرناطا .. بس بمجال الحوار ما لينا باع بنوب.. كان ايدنا والكف، يا قبيلتي اقوى من قبيلتك يا قبيلتك بتسبي نساء قبيلتي و اخواتي و خالاتي و عماتي بيصيرو يغسلولك رجليك .. مافي حلول وسطى .. _إلا نادرا_ ، و بعدنا لمن شي 50 سني تقريبا لحتى قدرنا نبلش نبلش نفهم انو "شؤم البسوس" خرافة .. و "داحس و الغبراء" ما حدى ربح فيها .. ضلت النتيجة تعادل.. و رح بتضل تعادل .. حتى لو ما كان فيك تستوعب هذا كمحازب لداحس، وحتى لو ما قدرت اتفهم "كغبراوي" هالموضوع ، بس هيك قضاء وقدر بدها تفضل تعادل.. بعدنا مش قدرانين نقبل واقع انو "الزير سالم" كان شخص طائش ابله (بس محظوظ)..

شيلك من المقدمات البايخة هاي ، المشكلة ببساطة انو احنا ما عنا تجربة حوارية، فبأول مناسبة صرنا مضطرين فيها للحوار مع الأأأأأأأأأأأأأأأأأأأأخــ ـــــــــــــــــــــــــ ــــر (بدون استخدام الكف، وبدون هزلت ، و صفاقة ، و تبت يداك .. ) اي اول مناسبة كانت مؤخرا جدا جدا ، (بعد ما حاربنا العولمة طويلة واثبتتلنا انو احنا ما فينا نحاربها اكتر من هيك فطالتنا و طالت رقابنا ) .. المهم فلمن بلشنا هلق حوار اجباري بالبداي بدنا نتقاتل مع بعض، بدنا نخبص بعض، بدنا نطير رقاب (احنا هيك متعودين ، متعودين نشوف نفسنا فقط فقط من خلال إلغاء الآخر، ما فينا نشوف نفسنا اذا في واحد تاني موجود ، يعني عارف انت كشخص او كتيار او جهة ما بتقدر تعبر عن وجودك _بالعربان_ الإ بإلغاء الآخر.. )

هلق لهون الحكي بيهوي.. و كلو تشاؤوم و هيك .. بس الظريف بالموضوع ، انو هاي المرحلة (اصدي بنظرة استقرائية لتجارب الشعوب الأخرى الي سبقتنا بموضوع الحوار مع الآخر) بتلاقي انو هاي المرحلة مرحلة ضيقة بالبداية فقط بتكون .. و ما بتاخد وقت كتير كبير (او هيك عمليا كان عم بيصير بالحواضر، والأمم الأعرق منا بتاريخ الحوار مع الآخر)..

لهيك الي بدي قولو ، ان وموضوع الصراع تبع الوجود ، والتعبير عن النفس من خلال إلغاء الآخر ، ومن خلال إحتكار المعرفة المطلقة (انا الصح وانتو كلكم كلكم غلط بغلط .. انا ديني اصلي والباقي كلو كلو فالصو، انا جيش الله، حزب الله ، جبال الله ،الخ _بما معناه احنا الي منختصر الله على الأرض و عاملين بمشيئته و عم نحكي هون بإسمو_ ، والباقي كلون ضالين و كفار و لازم يروحو ع النار و هلق اليوم قبل بكرا .._ الخ من هال الأفكار الإختزالية - الإحتكارية _طبعا تبدأ بالديانات ، والإيديولوجيات و لا تقتصر عليها بنوب، يعني الحكومات هيك كمان ، هني فقط الوطنيين والباقي كلون كلون خونة و عملاء للخارج و عم بيهددو الأمن القومي و بدهم يخربو البلد والوطن و يبيعو ترابنا للصعاليك )..

ما علينا .. خلاصة الكلام الي بدي قولو انو يا اخوة ما تتشائمو اذا اخوية او المنبر او غيرو كان فيه بطريقة او اخرى شوية ضبط للأوضاع و تنظيم للحوار، بالخارج _بالشارع و المواقع الأخرى وغيرو_ الصراع على اشده .. ومحاولات إلغاء الأخر، او اثبات الوجود من خلال إلغاء الآخر قائمة و هيي الوحيدة القائمة حاليا .. بس بيفضل متل ما اشرت فوق انو هاي مرحلة انتقالية .. لن تطول كل ما كان الصراع محتدم اكتر و اوسع طيفا كلما قصرت المرحلة هاي .. و منأمل ما يوصل البل للدقن _كسوري عم بحكي هون عن الأمة السورية والشعب السوري و حاضرة بلاد الشام الكبرى .. عم قول انو النزاعات هاي محتدمة على اوجها خارج منطقتنا اكثر من ما هي عليه في داخلها ، وهاي فرصة نتعلم من تجارب الجيران كي لا نقع بها .. او بالأصح لنتمكن من الخلوص منها بأضيق الخسائر واقلها ..__

(شغّال تفاؤل ع الريق مو ;-))

خيي ابي الحروف ع راسي كلامك مية بالمية
اولا الوضع العام الذي نعيشه في منطقة الشرق الاوسط هو وضع الإلغاء وإذا بتلاحظ رغم انو اصل اليهود اللي عايشين بفلسطين هلأ أوروبيين بس لما سكنو بوسطنا اخدوا عاداتنا وصار بالمجتمع الإسرائيلي كمان في إلغاء للاخر وهيدا اللي صار مع عزمي بشارة مثلا
لهيك بقول الشغلة مو شغلة عرب لإنو مثلا انا برأيي انو لحنا اهل سوريا -سوريا الكبرى- مو عرب لحنا كنعانيين وسريان واللي صاير هو احتلال فكري عربي لعقولنا
المهم انا معك انو اذا ما كبرت ما بتصغر يعني لازم يوصل إلغاء الأخر للذروة لحتى تنحل
بس برايي ما في حدا بيتعلم إلا من كيسو يعني لازم يوصل البل لدقنا حتى نعرف
يعني مثلا بيقولو الشطار اللي مفكرين حالهن شطار إنو شوفو الديمقراطية بلبنان شو جابت انا من الناس اللي بتقول بدنا سنين لنوصل لمرحلة لبنان لإنو اللي عم يتعرضلو لبنان حاليا هي الهدم ما قبل البناء
يعني تماما متل ما قصد ابي الحروف لبنان بأخر مرحلة من مراحل إلغاء الاخر لهيك بنشوفها محتدمة كتير
هيدا رأيكن انتو ؟

تسجيل متابعة : اي هاه هاد موضوع بيعبي الراس

هلق أنا مع كل شي حكيتو

بس كمان بقولو اللي بجرّب مجرّب بكون عقلو مخرّب ..

ليش لنكون متل الزعماء العرب ما شاطرين غير بالعياط و بالأخير ما نصل لقرار يرفع راسنا

بكل اجتماع قمة ما بيصلو لشي غير الخلافات بتزيد بيناتون .. و كل مالو الموقف بحتّد بين هالدول أكتر و أكتر

يعني تعوّدنا بهالاجتماعات ما في اتفاق ..

و نحنا كمان مضل منعّيط بهالمواضيع و منزعبر على بعض .. و الشاطر اللي بروح رد تلات صفحات و بحطلك ألف رابط

و يا مسيحي تعا شوف شلون بليون واحد أسلم و يا مسلم تعا شوف شلون عبتهزأ الشيخ الفلاني

و يا معارض معلمك بشار الاسد .. و يا موالي انت خاين لوطنك و و و و و

بالأخير ما مننصل لرأيي متلنا متل هالزعماء ..

بتوقع كلنا بدنا نخلص من هالواقع على الأقل بهالمنبر الي هوي منبر الجميع و لا شو ..؟؟

كنت بدي اكتب رد على شوية افكار
بس غيرت رأيي ورح اكتفي بالمتابعه
لتخلص الازمة الحوارية ...
مع كامل الاحترام والتقدير لكل مين كنب رد
ولصاحب الموضوع :D

انا بظن المشكلة انه قبل كانت المواضيع الي بتنحط بأخوية المقصود منها فائدة الكل وانه نفيد ونستفيد من بعض ونتناقش بالمواضيع وناخد ونعطي...فكانت اخوية عين الله عليها اخر رواق وحتى لو صار نقاشات بتكون باحترام الرأي الاخر....

بس هلق ومع احترامي للأعضاء كلن وخصوصا الاعضاء الجداد بأخوية....صار الشاطر الي يصير نقاش وقتالات اكتر بموضوعو والشاطر الي بفرد عضلاتو علتاني سواء بمواضيع دين او سياسة او غيرو وبطل فيه احترام لبعض (وبغترف اني من الي عم يعملو هيك كمان يعني ما عم بتفزلك ونظر عليكن:p)وبما انو دايما مواضيع الدين بتعمل توتر والسياسة صار فيه اعضاء معن دكتوراه وتخصص بس بهالمواضيع...الي لا بتفيد ولا شي وبس بتعمل حزازيات وقتالات......

بقا لازم نكبر عقلنا وبتمنى من المشرفين والمنسقين يشددو عهلمواضيع ويفكرولنا بشي حل جذري لهلقصة قبل ما تنتزع اخوية:x

(قبل ما حدا يقول اني عم احكي عأيام زمان وانا جديدة....انا مو جديدة بأخوية بس الظروف خلتني الغي تسجيلي القديم :cry:)

:D:D

اوكي صار دوري ما هيك ؟؟؟؟؟؟؟؟؟؟؟؟؟
المهم بلا طول لعي
هلق أنا مع كل شي حكيتو

بس كمان بقولو اللي بجرّب مجرّب بكون عقلو مخرّب ..

ليش لنكون متل الزعماء العرب ما شاطرين غير بالعياط و بالأخير ما نصل لقرار يرفع راسنا

بكل اجتماع قمة ما بيصلو لشي غير الخلافات بتزيد بيناتون .. و كل مالو الموقف بحتّد بين هالدول أكتر و أكتر

يعني تعوّدنا بهالاجتماعات ما في اتفاق ..

و نحنا كمان مضل منعّيط بهالمواضيع و منزعبر على بعض .. و الشاطر اللي بروح رد تلات صفحات و بحطلك ألف رابط

و يا مسيحي تعا شوف شلون بليون واحد أسلم و يا مسلم تعا شوف شلون عبتهزأ الشيخ الفلاني

و يا معارض معلمك بشار الاسد .. و يا موالي انت خاين لوطنك و و و و و

بالأخير ما مننصل لرأيي متلنا متل هالزعماء ..

بتوقع كلنا بدنا نخلص من هالواقع على الأقل بهالمنبر الي هوي منبر الجميع و لا شو ..؟؟
حلو كتير خيي بلاك واضح انو حضرتك تعبان كتير من الموضوع هيدا موضوع عدم تقبل الشعب
هلأ لحنا هون لنتحاور لنزيد ثقافتنا - انا بحكي عن حالي لإنو ما بضمن الكل وبعرف انو في ناس فايتة تفرجينا قوتها -
بس بشكل عام في نسبة اعضاء فايتين لنفس الغرض تبعي طيب لحنا بظل هيدا الوضع العام اللي بيمنعك من الممارسة لما انت مقتنع به ما بقي غير إنو نحكي اللي لحنا مقتنعين فيه بركي بيكتروا الناس اللي عندهن مبدأ مقتعين فيه لهيك برأيي المنابر الإلكترونية هي الأكثر رواجا مشان نفضي
وشكرا لمرورك
كنت بدي اكتب رد على شوية افكار
بس غيرت رأيي ورح اكتفي بالمتابعه
لتخلص الازمة الحوارية ...
مع كامل الاحترام والتقدير لكل مين كنب رد
ولصاحب الموضوع
خيو مية اهلين وسهلين فيك
احترامي الشديد لك
بإنتظار أن أقرأ ما سيخطه القلم
بقا لازم نكبر عقلنا وبتمنى من المشرفين والمنسقين يشددو عهلمواضيع ويفكرولنا بشي حل جذري لهلقصة قبل ما تنتزع اخوية
شرفتي الموضوع صديقتي
انو نكبر عقولنا صعبة شوي لهيك بطلب من المشرفين تشديد اكتر شوي
وشكرا لمرورك الكريم صديقتي

معك حق و لازم ينمنع من دخول المنتدى لأنه لازم يكون في احترام للآخرين مش هيك

اسف اخي ظل جيفارا للتأخير
هاد الموضوع كتير زاعجني _عدم احترام الآخر -
متل ما قلت انت احنا هون لنزيد معرفتنا ولنطور ثقافتنا
هلئ هون وبالنسبة لاخوية في شغلة انو عندك الاعضاء بالآلاف
يعني اكيد مو الكل بنفس مستوى الثقافة والإدراك والوعي
في عالم بتكتب رد بفورة دم وعالم تانية بتكتب لتورجي انها بتعرف تكتب
بجوز تكتب مسبات وبجوز يكون حكي فاضي
وطبعا صعب انك تضبط هالعالم كلها سوا وتوحد رأيهن وفكرهن
كل واحد منن شايل فكرة مقتنع فيها وراكد وبدو يورجينا انو بيعرف يحكي
هلئ اول شي اغلب المواضيع اللي بصير فيها خناء مواضيع المنبر -سياسية و دينية -
واحيانا بكون موضوع صغير بالصالون بينقلب لجدل غبي جدا
طبعا هون بيجي دور المشرفين بحذف معاقبة الشخص اللي بيطلع عن مستوى الحوار والنقاش
بس كمان احنا ك اعضاء لازم نلتزم بشروط الكتابة - خاصة بالمنبر - انو يعني هي احكام واعراف الكتابة بالمنبر
مو حاطينها هيك فزلكة او فراغ ليتعبى .. طبعا لاء واكيد مو حاطينها بس للعالم اللي بتنزل مواضيع
كمان الفهمان اللي بدو يرد لازم يلتزم . وهون المشكلة عنا -عدم الالتزام بالاحكام -
هلئ الحرية بأخوية كتير حلوة وكبيرة تماما متل البحر بس حتى البحر إلو حدود ووقت بيتعدها بيصير كارثة
واحنا وقت بنتعدى حدود العقل والحرية بالحوار بتصير كارثة وخناقة إلها اول ما إلها آخر
وكمان شغلة انت او اي واحد بيشوف انو هالرد مالو طعمة وفزلكة وعلاك ممكن جدا انك تلطشو مشاركة عاطله
وهيك بتساعد المشرفين باداء واجبن وبتسهل عليهن كمان
حكيت كتير واكتر من اللازم بس والله الواحد صار مشتهي يشوف حوار راقي
متل ايام جيل اخوية الاول
انشاالله ما يكون كلامي تقيل عالبعض
-طبعا انا ماعندي هالمشاركات بالمنبر او اي موضوع حواري-
تحياتي :D

أنا بس اللي بدي قولو باختصار و اللي استخلصتو من تجربة الحوارات في اخوية (تحديدا الدينية و السياسية)
في أزمة حوار
في كبت .. الناس ما متعود تحكي رأيها بصراحة ، مو متعودة على حوار مفتوح
في ناس بتحكي رأيها بس هيك لتحكي شي
في ناس بتعتبر أي واحد مختلف عنها بالديانة أو الرأي "مخلوق فضائي من عالم آخر"
في ناس مو فهمانة الرأي من النقاش من الحوار من القمع مو فهمانة شي

انا اللي بلومو هو النظام السياسي القمعي الكبتي و النظام الاجتماعي المطبوع بنفس الأمراض، ثقافة الظل اللي بتعتمد على الإنغلاق و بتولد عنصرية و كره هي اخطر شي.. هي اللي بتنتج عراق تاني

انا اللي بلومو هو النظام السياسي القمعي الكبتي و النظام الاجتماعي المطبوع بنفس الأمراض، ثقافة الظل اللي بتعتمد على الإنغلاق و بتولد عنصرية و كره هي اخطر شي.. هي اللي بتنتج عراق تاني
خلص مجرد اقتباس
انا كمان بلوم نفس الجهة

انا اللي بلومو هو النظام السياسي القمعي الكبتي و النظام الاجتماعي المطبوع بنفس الأمراض، ثقافة الظل اللي بتعتمد على الإنغلاق و بتولد عنصرية و كره هي اخطر شي.. هي اللي بتنتج عراق تاني
خلص مجرد اقتباس
انا كمان بلوم نفس الجهة