هلوسات مواطن سوري حر .. [الأرشيـــــف]

عرض كامل الموضوع : هلوسات مواطن سوري حر ..

صفحات : [1] 2 3

عاشق من فلسطين

30/05/2005, 15:15

طفولتي الدراسية

شدوا الهمة الهمة قوية .. مع البعث ما في حرية .. يا دورية هيلا هيلا هيلا هيلا ...
حرقتنا الجبهة الوطنية .. والقيادات القومية .. يا دورية يا فاشية .. هيلا هيلاااااااااا...
بشار أسد حرق البلد .. لعن الجد ولعن الولد .. ويا بعثية يا نازية هيلا هيلا ...
سوريا بلد الأحرار ... والبعث مركب الحمار .. يا بعثية يا أشرار .. غدنا يعصف كالأعصار .. يا بعثية هيلا هيلا هيلا هيلا ...
قفز الأرنب خاف الأرنب .. شعب خائف قائد ثعلب ... أسود أسود مثل الظلمة .. ينهق يثغي مثل الغنمة ..
عمي بعثي نجار .. يضحك في يده المنشار .. قلت لعمي عندي كلمة أصنع لي بلدا" من كلمة .. هز السوط وقال .. انا أهوي الذلال ...

.................................................

طفولتي الوطنية ..

رفيقي الطليعي كن مستعدا" دائما" لبناء المجتمع العربي الاشتراكي الموحد والدفاع عنه .. مستعدا" دائما ..
أمة عربية واحدة ذات بغال خالدة .. على الكراسي بائدة ..
الى القبر الى القبر يا بشار المكر ..
الله أفلام .. بوشار وبس ..
فاشييون فاشييون من مولدنا فاشييون ..
7 نيسان يا رفاق ... ميلاد السوط العملاق ..
أهدافنا .. فرقة نازية فاشية ...

..........................................

طفولتي الشعرية ..

اذا الشعب يوما" أراد الحياة .. بقاءه مع البعث حتى الممات ... وأبرة بنج تعيد السبات ..

بلادي وأن جارت عليي عزيزة .. واهلي وأن كانوا بعثيين فقط.. كرام ..

حماة السياط عليكم غنم .. أبت أن تذل النفوس الكرم ..
عرين الأسود بيت حراااااااااااااااااام ..
وعرش الحكومة قبر يضام ..

خضرة يا قيودي خضرة .. دمك فوار .. محروس بعين الحرة تبقى هالدار ..

فلسطين داري .. وأرض انكساري .. وبعث انتحاري ...

ياقطرات البعث الكاذب يا قطرات .. كيف نسيتي الشعب الذائب يا قطرات ..

موطني موطني .. الكلاب والذئاب .. والنعاج والطناب .. في رباك .. في رباك ..
هل نراك .. هل نراك.. هل نراك ... بل نراك .. بل نراك .. بل نراك ...

سوريا يا حبيبتي اعدت لي كرامتي أعدت لي هويتي .. يا يا يا حبيبتي ..
لم ينتهي المشوار يا شعبي .. حتى نعيد أرضنا من ناب كلب ِ ..
ففي الخيام طفلة مصيبة تنادي يا سوريتي الحبيبة ..
اعيدي لي كرامتي اعيدي لي حريتي أعيدي لي هويتي ..
وخذي مني بعثيتي .. وخذي مني رفاقيتيتي .. وخذي مني طفولتي ..
واعيدي لي سوريتي ..
أعيدي لي سوريتي
أعيدي لي سوريتي ...

ياااااااااااااااااااااااا اااا يا يا يا حبيبتي ...

............................

عاشق من فلسطين / حسام ملحم / عربي سوري أصلي :hart: :hart: :hart:

krimbow

30/05/2005, 15:33

لك الله يلعنو للي ما بيحبك شو ما عندو نظر

بس شي مقفعة معك ع الآخر ياه :cry:

وحياتك (و بتعرف انت غلاوة يللي عم احلف فيه) ما بيدوم هاد الليل :D :D :D

عاشق من فلسطين

30/05/2005, 15:39

لك الله يلعنو للي ما بيحبك شو ما عندو نظر

شكرا" :oops: :oops:

بس شي مقفعة معك ع الآخر ياه

خليها لحالي .. رح طق يا رجل .. حتى السكر ما عم يخليني أهدى شوي واطلع من الواقع .. :cry: :cry: :cry:

وحياتك (و بتعرف انت غلاوة يللي عم احلف فيه) ما بيدوم هاد الليل

يا دامي العينيين والكفين ان الليل زائل ..
لا غرفة التعذيب باقية ولا زرد السلاسل ..
نيرون مات ولم تمت روما بعينيها تقاتل ..
وحبوب سنبلة تجف ستملأ الوادي سنابل ..

أخ من كل شي .. وأخ على كل شي .. :cry: :cry:

Tarek007

30/05/2005, 15:45

عاشق من فلسطين

30/05/2005, 15:50

وااللة رح ابكي ....لك والسطل المقدس ...دخيل ربك يا حسام .....و الله صرلي نص ساعة عم غني المقطع الاول
و هلق كملتها .....الله عليك ...و دخيل ربك ورب الي خلق سلنديون ...عطيني بوسة منشان الله
و بطلت بطل الدخان .... يدي حشش كمان ....

لك هلا عم حشش وأشرب ومو عم ينفع .. شو اعمل أشرب نفط وبترول .. ودخن مصاف غاز .. بلكي بيمشي الحال ... :D :D

Tarek007

30/05/2005, 16:00

يلة ... بعد شوي بنشوف شو رح يطلع معنا ...... عم نستناكم بالاعتصام

زينوا المرجة .... و المرجة لينا .... شامنا فرجة و هي مزينة........

layla

31/05/2005, 00:35

krimbow

31/05/2005, 00:56

Hus

31/05/2005, 00:59

أبو النسيم

31/05/2005, 23:56

ما استستغتها من اي باب ..
مع اني جربت شقلبتها بالطول بالعرض .. ما ظبطت معي !! :evil: :evil: :evil: :evil:

ولا أنا أستسغت ردك ياااااااااااااا حكيم :aah: :aah: :aah: :aah: :aah: :aah: :aah: :aah: :aah: :aah: :aah: :aah: :aah: :aah:

sezar

01/06/2005, 00:19

sweetbaby

01/06/2005, 00:45

يعني بس قلي شو بدي قلك
و الله بكيتني يعني يالله عليك يا حسام
و الله ماني عرفانة شو قول و شو احكي :D :D

عاشق من فلسطين

01/06/2005, 02:52

يا حسام شو بدي قللك يعني ماصار الا وبكيتني
بس متل ماقال كريمبو الا ما مايروح هالليل و بوجود شباب متلكون سوريا مابتكون الا
الجلال والجمال ,والسناء والبهاء في رباك
والحياة والنجاة والنجاة والرجاء في هواك
سوف اراك سوف اراك
سالما منعما وغانما مكرما
سوف اراك في علاك تبلغ السماك
موطني

شكرا" ليلا يعني الواحد أحيانا" بيتمنى لو انو الكذبة اللي عيشوه فيها ساووها حقيقة .. بس أنا الحمد لشعوري بالحرية وخروجي عن السرب ساويتها حقيقة بنفسي حاليا" .. واذا مشي القدر معي بسوريا كمان

عاشق من فلسطين

01/06/2005, 03:05

ما استستغتها من اي باب ..
مع اني جربت شقلبتها بالطول بالعرض .. ما ظبطت معي !!
لا ادبيا وفنيا كشعر او نثر او انشودة او حتى زجلية او ما بعرف شو لقيتلها طعمة
ولا فكاهيا _مع اني كان بودي افهمها فكاهيا_ ما حسيت فيها اي حس فكاهي ولا شي بيضحك ولا حتى بيسلى!!
ولا فكريا ..

شو الهدف من هال الهلوسة؟
عنونتها بمواطن سوري حر!! فهمت انو عم بتحاول اتعبر عن حريتك بهال الطريقة وانو هيك نسبيا اذا حكيت بتعتبر انو في حريّة ..
حلو..
بس شو الهدف ..
شو الي عم بتحاول اتوصلو من خلال هال الهلوسة ..؟

شوف دكتور في فكرة أنو مو تهمة باطلة أنو في كتير ملاحظين أنك بتحب انو تكون دائما" بالعكس .. ما علينا ...

هلالنجي لتقييم النص اللي أنا كاتبوا ... ا أنا لنفرض اني كاتب متواضع .. فأنا اللي بقيمني هوي القراء تبعي بغض النظر عن تقييمي لنفسي ..
لنجي للقراء
القراء فئتين
يا أما نخبويين ومختصين ... وهنا انا أفخر بأن كل من قرأ ورد كان رده بالاعجاب وتحريك المشاعر .. الا أنت وهنا يعني على مقولة جوي .. اذا لم يفهمك كل الناس فليس بالضرورة أن تكون مبدعا" .. قد تكون مجنونا" ...

وفي حالة أخرى أن القراء عاديين وليسوا نخبوين .. وفي هذه الحالة أيضا" فأن قرائي العاديين .. وأنا ككاتب عادي .. تقييم الأغلبية كان بالجودة وتحريك المشاعر .. وهنا أنت أيضا" تكون الوحيد المخالف ..

بالنهاية دكتور انا حابب فلك شغلة انو انت دائما" بتحب تتميز وهذا حق لكل انسان .. بس في فرق بين أنو يكون التميز بالتفوق في شيء يتفق عليه الجميع .. وبين ان تكون هجينا" .. وأنا لا أراك الا من الصنف الثاني ..
لأني لا اعتبرك قارئ جيد للأدب ولا مقيم جيد للادب .. وذلك يشير عليه توجهاتك في القراءة وفي الردود في المنتدى ... وعدم فهمك للقواعد التي يقيم بها الأدب على خلاف أجناسه ... لذلك ... أنا أنصحك بأن تجلس بجلسة صفاء مع نفسك .. حتى ترى الحقيقة .. ولكنني صراحة أخاف ان تختلف حتى مع نفسك .. لأن طابع الخروج عن المالوف متأصل لديك .. ولكن ذلك يحتاج الى زمن ..

وفي النهاية .. كاسك يا وطن .. والأيام ووحدها الأيام ... ستثبت من من الحسامين ( انا وأنت) هو صاحب وجهة النظر الصحيحة نحو وطن أفضل .. والمقيم عندها لن يكون انا أو انت .. وأنما سيكون المجتمع والتاريخ ..
وأنا متواضع ممكن .. ولكنني طموح جدا" ... والطموح هو مصدر الغد ...

ولا تواخذنا ... :D

Joe

01/06/2005, 03:49

بس يا حسام (عاشق) انت كمان ما يصير هيك كلامك

هوي صحيح طلعت شوي دج و قاسية من الحكيم.. بس بالنهاية كلامه كان متعلق بشكل مباشر بالنص المكتوب... بينما انت هلأ عملتلو تحليل نفسي و قلتلو يقعد قعدة صفى مع حالو و مدري شو... اي يعني شو رأيك بهل كلام انت نظامي شي كمان؟ :wink:

انا قرأت النص تبعك و الحقيقة ما كان عندي انطباع معين... يعني عادي... يمكن انا شخصيا ما كتير بستسيغ الأدب الوطني و القومي ... او حتى الأدب و الشعر كله ع بعضه ماني صحبة معو... اي اي ما تستغرب... في هيك ناس تماسيح :P

يعني انا شفت الشباب كلهم فرطوا دموع و حب و هيام... يعني انا موقفي... انو ع شو؟ :? .. شو صار بالدنيا؟

يعني انا لو ما شفت الدموع بالموضوع وصلت للركب ما كنت حتى قرأت الموضوع الأصلي... بنوب ما بقرا هيك شغلات.. و لا حتى بشفلا طعمة بنوب... بدون زعل هه؟؟؟ انا عم احكي معك الصراحة و من ناحية أدبية بحتة يعني ما في شي شخصي... يعني نشالله نزار قباني بزاتو كان كاتب هل كلام ما كان كتير فرق معي

بقى يمكن الحكيم متلي بهل الشغلة... بس ع أشرس شوي :lol:

و إجت طبعا فوقها انو الكلام صاير على السياسة و بالمنبر.. و انا ما بشوف هيك كلام خرج المنبر... بالنسبة إلي المنبر للأحاديث الجدية تماما بعيد عن العاطفة... مشان هيك يمكن الحكيم عمل شي 4 او 5 غرف أدبية و ثقافية... مشان ما تلاقوا حجة تكتبوا هيك شغلات بمحل تاني :lol: :lol: :lol:

سلامي حبيب

agha

01/06/2005, 04:05

طيب شو مشان أنا بعثي
ما عجبني هالحكي بنوب :jakoush: :jakoush: :jakoush:

توت توت توت

01/06/2005, 04:12

اسمحلي .. قلك ..
لو أنو البعثيين اللي أسسوا الحزب لو كانوا موجودين وشافوا .... الحزب اليووووووم ...
ما كانوا عرفوووووه ....
أنا ما رح قلك شي ...
انت احكم بنفسك ... بين البعثيين أيام زمان ...(أكرم الحوراني وميشيل .. و ..., ...) وبين البعثيين اليوووم ..
ولحالك بتوصل للجوااااااااااااب ..
وأحلى سلااااااااام ...
:D
ومشكووووووووور حسام ..... :D

عاشق من فلسطين

01/06/2005, 13:46

حبيب القلب جوي اذا كنت لا تستسيغ الأدب أو الكتابات الوطنية أو أي شيء من هذه الأمور التي تحس بأنها بلا طعمة .. فهذا يعني أنك لاتملك وكذلك الدكتور حسام فأظن أنه من الأفضل أن لا تقرأوا أي شيء أدبي (لألي أنا شخصيا") اذا مو عاجبكون أسلوبي ..
وبالنسبة للدكتور حسام فالصراحة يعني ردو مو كالن قاسي .. أنما كان يهدف الى تحقير المادة المكتوبة وصاحبها .. ومن حقي رد .. وأنا رديت رد مهذب وبنيتو على أسس موجودة وقائمة .. عرفت كيف .. :D

sezar

01/06/2005, 19:15

طيب شو مشان أنا بعثي
ما عجبني هالحكي بنوب

انك بعثي هي مشكلتك :confo: رح يساوو دوا لهل شغلة قريبا :confo:

انو ما عجبك هاد رأيك و أهلا و سهلا فيك :D :D

agha

02/06/2005, 02:02

انك بعثي هي مشكلتك

بعتقد أنو هي مشكلتك ما نا مشكلتي
و أهلين فيك على راسيييييييي :D

Hus

02/06/2005, 03:12

شوف دكتور في فكرة أنو مو تهمة باطلة أنو في كتير ملاحظين أنك بتحب انو تكون دائما" بالعكس .. ما علينا ...

:? يظهر ان تم فهم الموضوع وغيره _الظاهر_ بطريقة غير سليمة !
انا ان حصرتني بتعريف ستجدني "عملي معتدل"
فلا تروق لي لا التنظيرات ولا الغوغائيات ولا المزايدات ..

ولا تفتنني بشئ ابعاد الحرية المزعومة فما عانيت من عدمها بأي زمان او مكان فهي ليست هدف ارمي اليه او عقدة احاول فك طلاميسها هي اسلوب حياة لا اطالب به فهو موجود واعيشه بشكل الي لا بل وبدأت اعاني منه, حتى بات مقيت عليّ .. وهنا اخص ما يتم تعليقه على شماعة الحرية من فوضى وغوغائية هي بريئة منه كل البراء ..فالشتائم والسباب لا تعدو ان تكون لطخ من الشوائب يلصقها بعضهم عنوة بالحرية فلا هي من الحرية ولا الحرية منها بمكان لطالما لفظناها ولطالما لفظتها الحرية ولفضها كل ذي رجاح...

ملاحظة: من غير المستحب مصطلح" كتير ملاحظين.." فهو مصطلح غير منهجي .. _بتزكرني بالصحافة الصفراء لما بتقول: صرح مسول رفيع المستوى (أ.ج) ان ......صرح مصدر سري(د.ب).. _ :lol: :lol:
انما من المستحب ان يعبر احدنا عن رأيه وفكره دون استيراد المصطلحات البينية لإسقاط الشرعية او المصداقية على بيانه..

من باب اخر انت مع مجموعة كبيرة من الأعضاء المشاركين في المنبر تحديدا يساريين .. ومنهم من هو يساري جدا ايضا..
الفكرة مو انا الي دائما بحب عارض وانما انت لديك توجه وبيان مختلف تماما عني_بحكم انك يساري او معارض_ فشي طبيعي اتحس ان ما اقول لا يتفق وما تقول وشي طبيعي طبعا اتحس اني معارض لك ؟
_طبعا انا لست معارض لك وانما لا اتفق مع ما تقول او (تقولو) في كثير من الأحيان لان توجهك مختلف عني ورؤياك ليست من نفس الزاوية التي ارى منها _

بس لو اتطلعت للموضوع من فوق بتلاحظ معي انو انتو الي ما في شي عم يعجبكم .. كل ردودكم كل مقالاتكم نقد X نقد ..
انا بفهم ان الديمقراطية ليها مقومات وما بقدر افهم انو بين يوم وليلة فيه شعب يكون ديمقراطي (وهذا ما ادعو له)
انا بفهم ان في اغلاط بالسياسة الحالية بس ما بقدر افهم انو السياسة الحالية كلها هيك قشة لفة خطأ!!(وهذا ما ادعو له)
انا بفهم ان في فسادوفي فساد كبير وليس لي فضل في ان اراه او اكون ضده _فهذا شيئ طبيعي_ لكن ايضا في محالوات للإصلاح ما عم بقدر غض النظر عنها !! (وادعو ايضا لعدم اهمالها واخذها من الباب الإيجابي)
انا ما عم بقدر لاقي اي سبب بيستدعي الحكومة والرئيس لان يقوم بتنويم الشعب.. او الضحك عليه (ومن هون بدعو لفهم الأمور في نصابها الصحيح)
انا بفهم ان في حل افضل للحدث الي عم بتعيشه البلد سواء بإستبدال الحكومة او بتغييرها او تصويب مسارها او تقطيرها بس بتعنيني الحلول والنتائج وما بيعنيني النقد .. _لا فضل لأحدهم في ان يقول للأعور اعور في عينه ما جاب شي جديد لكن الفضل لمن يجد حل لهذا الأعور ومن يعمل ليساعد هذا الأعور _

لاحظ معي
اي قرار بتصدرو الحكومة, اي تصرف او منهج بتنتجهو الحكومة, تاني يوم مباشرة بتتوجهو مباشرة لتأويل وتسنيد التشريع لأسباب سلبية وكأن الحكومة ليها تار مع الشعب وعم بتصفيه !!
وهذا ما لا يروق لي جملة وتفصيل !!

هذا في ما يتعلق بزعمكم عن اني معارضة ؟

منرجع لموضوع النص الي طرحته..

شدوا الهمة الهمة قوية .. مع البعث ما في حرية .. يا دورية هيلا هيلا هيلا هيلا ...
حرقتنا الجبهة الوطنية .. والقيادات القومية .. يا دورية يا فاشية .. هيلا هيلاااااااااا...
بشار أسد حرق البلد .. لعن الجد ولعن الولد .. ويا بعثية يا نازية هيلا هيلا ...
سوريا بلد الأحرار ... والبعث مركب الحمار .. يا بعثية يا أشرار .. غدنا يعصف كالأعصار .. يا بعثية هيلا هيلا هيلا هيلا ...
قفز الأرنب خاف الأرنب .. شعب خائف قائد ثعلب ... أسود أسود مثل الظلمة .. ينهق يثغي مثل الغنمة ..
عمي بعثي نجار .. يضحك في يده المنشار .. قلت لعمي عندي كلمة أصنع لي بلدا" من كلمة .. هز السوط وقال .. انا أهوي الذلال ...

ان بالفعل ما كنت عم بقدر حدد الفكرة من الموضوع هل هي فكاهية ام ادبية _لان الموضوع طرح في المنبر _
لكن من ردك وكلامك فهمت انك عم بتقول ان هذي السطور في الأعلى تدخل في باب الأدب والشعر ..!!
ما بيصدد تقييم شعرك_الي في الأعلى_ ابدا..بس عاد انا ما بستسيغو وهذا ما ذنبك انت ..
هذا ذنبي انا ..
انا الي ما عم بستسيغ سطورك الي في الأعلى _الي ممكن اتسميه او يسموه شعر_ و انت بالتالي ما في ليك مان اي زنب بالموضوع فلا تزعل على شي مالك زنب فيه __(((( ولا تزعل مني :D )))))
مجددا انا كل كلامي على هذي السطور في في الأعلى فأنا قليل الدخول لقسم الشعر ككل لذا ما عند اي خلفية عن كتاباتك انا جل كلامي عن السطور الي في الأعلى_

لنجي للقراء
القراء فئتين
يا أما نخبويين ومختصين
.....
وفي حالة أخرى أن القراء عاديين وليسوا نخبوين

بكلى الحالتين القراء الي عم تحكي عنهم هني تلات اربع يا اخي خليهم عشر اشخاص ..
وهل العشرة هذول هم المقياس ..
ابدا ما ما ضدك يا مان ... يا عمي ليش بدي كون غير معك .. يعني مو انو ما عندي سبب كون ضدك بالعكس كل الأسباب بتقول اني لازم كون متعاطف ومتضامن معك .. بس عاد اذا بدنا نحكي موضوعيا بهال الموضوع فما فيني اتفق معك على ان هال العشرة او هال ال50 شخص_إذا بدك_ هم المقياس الي عليه فيك تعتمد انك شاعر شعبي او شاعر متقدم او حتى شاعر؟
ما عم حط من معنوياتك او اكبتك يا مان وانما الريد بول دبحنااااااااااااا :o :o

بالنهاية دكتور انا حابب فلك شغلة انو انت دائما" بتحب تتميز وهذا حق لكل انسان .. بس في فرق بين أنو يكون التميز بالتفوق في شيء يتفق عليه الجميع .. وبين ان تكون هجينا" .. وأنا لا أراك الا من الصنف الثاني ..

هذا رأيك ولابد في ناس بتحترمو _بس انا ما منهم_ :P (طبعا واضح الكناي على اني لا احترم رايك الي بتقول فيه اني هجين _حاسس حالي شي هامستر مبندق_ :lol: :lol: )

لأني لا اعتبرك قارئ جيد للأدب ولا مقيم جيد للادب ..
يا اخي حاجي عاد صفصطائية ..
اذا ما بستسيغ سطورك الي فوق يعني ماني قارئي للأدب ؟!
انا من اكثر من 10 شهور ان كان قد كتبت رد فهو بالمنبر وما بعتقد بالمنبر عم بناقش أدب وشعر ؟
غير ذلك اين قرأت لي رد او تقييم او تسطير لمقالة ادبية بالفورم او بغيرو ,
يعني على شو بنيت اعتبارك ؟
_عفوا بس مين من الشباب قراء لي تسطيرات على مواضيع ادبية هنا او غير هنا ؟؟_

وذلك يشير عليه توجهاتك في القراءة وفي الردود في المنتدى ... وعدم فهمك للقواعد التي يقيم بها الأدب على خلاف أجناسه ...

توجهاتي في القراء والردود بالمنبر متوقفا 99% على الحظ والصدفة ..
نتيجة لضيق وقتي حينما اجد متسع من الوقت للقراءة ادخل المنبر وبفقش موضوع او اتنين لا على التعيين او شيئ من هال القبيل _وهذا يحصل كل عدة ايام او اكثر _ لذا فردودي غير موجهة وانما لما بقرأ موضوع _وبحاول اختار المواضيع القصيرة لضيق وقتي _
يدخل كلامي من باب اني لا اوجه ردودي على مواضيع معينة _انا كل موضوع بقرأه برد عليه سلبا او ايجابا والي ما برد عليه يعني ما قرأته من اساسه وطبعا بيستوقفني اكثر المواضيع الي بتدل بعناوينها على مغالات لا تروق لي لان المغاليين باتو كثر هنا_

والأيام ووحدها الأيام ... ستثبت من من الحسامين ( انا وأنت) هو صاحب وجهة النظر الصحيحة نحو وطن أفضل

حطو رجليكم على الأرض وبلا مزاودة على بكرااااااا

وأنا متواضع ممكن .. ولكنني طموح جدا" ... والطموح هو مصدر الغد ...

بقدر تواضعك ..بس يا مان الشغلة مو شغلة طموحات و احلام ..
كلنا منطمح لمستقبل مشرق
لكن فضل احدنا على الأخر شو عم يعمل منشان ذلك المستقبل ....
انا اجد شيئ من هذا السطور في الأعلى هدر للوقت والجهد _وقتك ووقت الناس الي عم تقرأ طبعا_

لا فضل لأحدنا ان يقول عن الخطأ خطأ _ما جاب جديد_ فالصواب والخطأ بيّنان بيان الشمس في وضح النهار..
لكن المنّة حين نرى الخطأ ثم نعاينه ثم نعطي حلول له واقتراحات منطقية لتصويبه و تجنب الوقوع به مستقبلا ..

ولهذا سألتك شو المقصود ..لوين بدك اتوصل ..(لاني اعتقد ان اي تصرف من دون هدف هدر للوقت) وهذا اتبنى على خلفية من ردودكم الي تتصف بالنقد بطابع عام _نقد غير بناء_ .. بدنا شي على الأرض .. يدنا حلول ..
أشبعنا شحن وصار لازملنا تنفيسة بشي عملي .......

:D :D :D

Tarek007

02/06/2005, 03:57

... Dr_HUS
..............
..............
.........................

:
.................................................
...........................................
..........................................
مشكلة ( الجهل )أنه في الواقع نوع من ( العلم )يستند دائماً الى نوع من( العقل ), و يقوم أيضاً على نوع من( المنطق )...أنه ليس ظاهرة بريئة .. :evil:

عاشق من فلسطين

02/06/2005, 12:15

دكتور حسام الصراحة وأنا عم اقرألك تذكرت نيشته .. يعني فعلا" أفحمتني .. بس في فكرة انت أقمت نقاشك على أني معتبر كلامي شعر أو خاطرة .. بس هاد لانو شعر ولا خاطرة هي اسمها هلوسة ادبية .. يعني ما الها قواعد أو بحور او اوزان .. والمقياس الوحيد لتقييمها هوي مدى تأثيرها .. وأنا أقمت مقياسي على عشرة أشخاص لأنون شريحة .. مانهن مجتمع بس شريحة ..
وبالنسبة لمفهومك للديمقراطية .. فبقلك أنو ادارتك للمنتدى دليل واضح على ديمقراطيتك وتفهمك الها ..
وبالنسبة لكلامك أنو ما بدك تحطملي معنوياتي .. فحابب قلك انو بدك كتير لحتى تأثر على جزء من معنوياتي ..
وبالنسبة للنقاش الطويل العريض لفتحتلي ياه عن الديمقراطية واليسارية والمعارضة فهادا مو هون محلو .. مناقشوا بمواضيع تانية ..
وعلى فكرة

ولهذا سألتك شو المقصود ..لوين بدك اتوصل ..(لاني اعتقد ان اي تصرف من دون هدف هدر للوقت) وهذا اتبنى على خلفية من ردودكم الي تتصف بالنقد بطابع عام _نقد غير بناء_ .. بدنا شي على الأرض .. يدنا حلول ..
أشبعنا شحن وصار لازملنا تنفيسة بشي عملي .......

لا تواخذنا دكتور يعني انت طارح مشاريع عملية ضخمة نحو تطوير سورية وبشكل عملي .. بس نحنا عم نعرقلك بالشحن المعنوي تبعنا .. شعبنا كلو شايف الخطأ معك .. بس بدو شحن بالأول لحتى يقوم بوجه الخطأ .. يعني ما حدا رح يقبل منك مشاريع وطروحات ..
قبل ما يكون مشحون ومستعد للتغيير ..

وسلام حبيب .. لأنو الصراحة عندي شي أهم من أني رد على المعلقات اللي بتكتبها دائما" واللي ممكن تتلخص بكم سطر .. وهالأسلوب بالنقاش تبعك .. أنو تسكت الخصم نتيجة ردود عملاقة نجح معي .. لأنو ما عندي وقت ضيعوا بالرد على كلام مسهب .. ومتشعب عن محور النقاش الأساسي ...
:D

Nadim

02/06/2005, 18:57

التعليق بعيد قليلاً عن الموضوع و لكن هو رد على الدكتور حسام:

بس لو اتطلعت للموضوع من فوق بتلاحظ معي انو انتو الي ما في شي عم يعجبكم .. كل ردودكم كل مقالاتكم نقد X نقد ..

إن الوضع الراهن غلط بغلط و ليس غريب أن ترى كثير من الناس الجرئيين ينتقدون فقط..

انا بفهم ان الديمقراطية ليها مقومات وما بقدر افهم انو بين يوم وليلة فيه شعب يكون ديمقراطي (وهذا ما ادعو له)

إذا كنت تتحدث عن الكلام العلمي و الممنهج، فما هي مقومات الديمقراطية؟ و من قال أن الديمقراطية هي الحل؟ ماذا عن الجمهورية؟؟ بجميع الأحوال الديمقراطية على مراحل ما هي إلا كذبة و حجة يتخذها المتخاذلين و المتمسكين بالسطلة التي استحوذوا عليها بغير حق لكسب المزيد من الوقت و إضفاء الشرعية على ممارساتهم التي تتراوح بين اللاشرعية و الوحشية.

انا بفهم ان في اغلاط بالسياسة الحالية بس ما بقدر افهم انو السياسة الحالية كلها هيك قشة لفة خطأ!!(وهذا ما ادعو له)
انا بفهم ان في فسادوفي فساد كبير وليس لي فضل في ان اراه او اكون ضده _فهذا شيئ طبيعي_ لكن ايضا في محالوات للإصلاح ما عم بقدر غض النظر عنها !! (وادعو ايضا لعدم اهمالها واخذها من الباب الإيجابي)
من باب التساؤل فقط: هل تعتقد أنه من المحتمل أن يكون هناك شعور خوف داخلي أو رقيب أو سمه ما شئت ربته السلطة في داخلك على مر السنين و هو الذي يعلن لك دوماً أبحث عن الإيجابيات و سوف تجدها، هناك إصلاح هناك تحرك، لكن الواقع هناك تخاذل ، و هناك استهتار بالوطن و المواطنين، يا سيدي كل لحظة تضيعها الطغمة الحاكمة هي 20 مليون لحظة و لنستبعد المستفيدين من الحكم و من لف لفهم و هم بأحسن الأحوال لن يتجاوزوا الخمسة في المائة و لنفترض 10% فإنها 18 مليون لحظة .. إنها ليست سخرية و لكنها حقيقة، إن أي عدوان محتمل على سوريا ليس سببه إلى الطغاة الذين سيكونون أول الفارين إلى الخارج أو سيختبأون في حفر تحت سطح الأرض......

انا ما عم بقدر لاقي اي سبب بيستدعي الحكومة والرئيس لان يقوم بتنويم الشعب.. او الضحك عليه (ومن هون بدعو لفهم الأمور في نصابها الصحيح)
هناك تفسيران لا ثالث لهما : إما أنك جاهل أو مستفيد، فإن كنت جاهل فيمكنك أن تكون منطقي أكثر و أن لا تنطلق من مسلمة (الحكم أمر واقع، و هو إلاه منزل لا يمكنني الكفر به) ثم فكر.. أما إذا كنت مستفيد، فاصمت آلا حلت عليك اللعنات

نا بفهم ان في حل افضل للحدث الي عم بتعيشه البلد سواء بإستبدال الحكومة او بتغييرها او تصويب مسارها او تقطيرها بس بتعنيني الحلول والنتائج وما بيعنيني النقد .. _لا فضل لأحدهم في ان يقول للأعور اعور في عينه ما جاب شي جديد لكن الفضل لمن يجد حل لهذا الأعور ومن يعمل ليساعد هذا الأعور _
بعد كل القمع و تكسير العظام و الوحشية في التعامل مع أصحاب الرأي الحر ، و باسم القانون يتم القمع و التشديد على رسائل مثل الخطوط الحمراء و النظام لا يزال قوياً و البعث هو ربكم و أنتم عباده يفعل بكم ما يشاء..

و إذا كنت تتحدث عن الحرية، أين الصحافة الحرة في سوريا؟ هل تستطيع أن تقول رأيك بحرية؟ حتى قمع الأدب من قبل السلطة محاباة لرجال الدين موجود و ذلك لتبادل الشرعنة بين الطرفين، شرعنة الحكم الطفيلي على الناس و فكرهم و حياتهم

أبو النسيم

02/06/2005, 19:25

سمعان الناس الشرفاء يا دكتور .....ح......!!!

شكرا نديم :D :D :D :D :D :D :D :D :D :D :D :D :D :D :D :D

Hus

02/06/2005, 20:16

اخي عاشق بيزعجني حقا انك فهمت ما تقدم من ردي على محمل شخصي .. كنت خايف من هيك بالفعل بس الحقيقة ما في اي شي شخصي بيستدعي الحدية يا مان ..

منشان نوجز الموضوع ضل بضعة نقاط تم الإشارة ليها حرد عليها بإقتضاب منشان ما ياخد الموضوع ابعاد اكثر من ما يستحق ..

تناولت بمستهل حديثك اني اطيل في الكلام وفي الردود دائما .. وهذا للحقيقة صحيح جدا فهو ليس بجديد علي وليس إسلوب في الكتابة وانما هي اسلوب بالحياة والنقاش .. فانا بطبعي حين اشرح أمرا اشرحه بإستفاضة واعيد شرحه عدة مرات وكل مرة بطريقة مختلفة _متأثر بإستاذعنا بالجامعة كان يعطينا فيسيولوجيا كان يفهمنا كتير بسبب ان كان يشرح فكرته نفسها عدة مرات وكل مرة بطريقة هيك لا بد تفهم على طريقة من الطرق _لأتمكن من إيصال الفكرة التي ارمي تحديدا تجنبا لسوء الفهم ..
لاني عانيت مرارا من سوء الفهم وهذا للأسف حتى يحصل معي كثيرا في المنتدى ايضا
يعني يا مان على الرغم من اسهابي في الشرح وإعادة شرحي لنفس الفكرة عدة مرات بأساليب متعددة على الرغم من هذا عم بيصير سوء فهم لما اقول ... فما بالك لو اختصرت واوجزت الكلام ..

اشرت ايضا لخروجي عن الموضوع وهذا ايضا اعترف به ..
لكن ما خروجي عن الموضوع بهدف تغيير منحنى الحديث او السوق به لمكان اخر يوافق هواي وانما اتى خروجي من باب شرح ما كن مبهم بطريق المثال .. يعني ما كان الخروج هوي محور كان بس قصدي فيه التوضيح لهذا ما حناقشه طبعا ولا حرد على الردود الاخيرة الي بتناقش المثال الي طرحت او _الخروج هذا_ لانو فعلا ما مكانه هنا ..

لا تواخذنا دكتور يعني انت طارح مشاريع عملية ضخمة نحو تطوير سورية وبشكل عملي ..

:lol: :lol:
بريئ يا سيدي بريئ ..
شو مشاريع عملية وضخمة كمان ..
يا عمي احنا ناس غلاباااااااااااااااااا..

مان هوي هون برجع بشير لنقطة اشرت ليها فوق..
يا بدو الواحد يشتغل وبالتالي ما عندو وقت يحكي وبالتالي ما حتعرف شو عم يشتغل ليخلص شغلو!
يا بدو يحكي بالتالي ما عندو وقت يشتغل بالتالي ما حتشوفو غير عم يحكي !
:D

التعليق بعيد قليلاً عن الموضوع و لكن هو رد على الدكتور حسام:

اخي نديم متل ما اسلفت التعليق بعيد عن الموضوع لهذا افضل ما نفتح النقاش به هنا منشان ما يشت الموضوع الي قارب على الإنتهاء
بعتزر عن الرد .. خليها لوقت تاني منحكي بالموضوع ..
:D

سمعان الناس الشرفاء يا دكتور .....ح......!!!
شكرا نديم

:o
يا حبيبيييييييييييييي
طلعنا مرتزقة على اخر هال العمر :lol: :lol: :lol:

يا عمي اب نسيم على اعتبار انك رجال كبير وعندك نسيم (الله يخليلك ياه)
فما حلوي هاي قضايا التخوين والمزاودات الوطنية في ساحات الحوار والنقاش
بتحسس الواحد بالغثيان وهيك ..

موووو _علي سيرة مو شو اخبار جماعة فاجئناكم موووو :lol: :lol: __

وهاي على اعتبار رخصان الورد هلق والشباب فاردي ايدها وعم بتبعتر
هه :D :D :D :D :D :D :D :D :D :D :D :D :D

here i am

02/06/2005, 20:29

أنا مابدي زيد شي بس بنطر من الشباب أنو يطلعو على نص الكاسة الملان و مايكون نضالون من أجل الحرية ضال ساخر أو ناقد لدرجة الاستخفاف بكل التطورات يلي عم تصير لو أنها بطئة شوي
بس يلي بيسعى للحرة و بيتغنى بالديمقراطية بظن لازم يكون عندو نظرا محترمة شوي بالنسبة للواقع و مايكون نقدو ساخر ب ال
100% يعني إذا في غلط بالنظام ما منيجي منكفنوا بطريقة ناقدة بحتة لأنو بهيك أسلوب مارح نوصل لنتيجة سلمية بتراعي متطلبات الشعب بكل فئاتو
بس بطلب من كل الشباب انو يتأملو خير و يشتغلو على مبدأ الفعل
يا عمي لو مافي أمل أنو تتحقق الديمقراطية ماكنا حكينا كل هالحكي و ماكنا حلمنا هيك حلم
بقى قولو الله و انشالله خير
:D :D :D :D :D :D :D

انا بفهم ان الديمقراطية ليها مقومات وما بقدر افهم انو بين يوم وليلة فيه شعب يكون ديمقراطي (وهذا ما ادعو له)
انا بفهم ان في اغلاط بالسياسة الحالية بس ما بقدر افهم انو السياسة الحالية كلها هيك قشة لفة خطأ!!(وهذا ما ادعو له)
انا بفهم ان في فسادوفي فساد كبير وليس لي فضل في ان اراه او اكون ضده _فهذا شيئ طبيعي_ لكن ايضا في محالوات للإصلاح ما عم بقدر غض النظر عنها !! (وادعو ايضا لعدم اهمالها واخذها من الباب الإيجابي)
انا ما عم بقدر لاقي اي سبب بيستدعي الحكومة والرئيس لان يقوم بتنويم الشعب.. او الضحك عليه (ومن هون بدعو لفهم الأمور في نصابها الصحيح)

معك حق بهي حكيم :D :D

Nadim

02/06/2005, 22:04

بس بطلب من كل الشباب انو يتأملو خير و يشتغلو على مبدأ الفعل
يا عمي لو مافي أمل أنو تتحقق الديمقراطية ماكنا حكينا كل هالحكي و ماكنا حلمنا هيك حلم
بقى قولو الله و انشالله خير
:D :D :D :D :D :D :D

انا بفهم ان الديمقراطية ليها مقومات وما بقدر افهم انو بين يوم وليلة فيه شعب يكون ديمقراطي (وهذا ما ادعو له)
انا بفهم ان في اغلاط بالسياسة الحالية بس ما بقدر افهم انو السياسة الحالية كلها هيك قشة لفة خطأ!!(وهذا ما ادعو له)
انا بفهم ان في فسادوفي فساد كبير وليس لي فضل في ان اراه او اكون ضده _فهذا شيئ طبيعي_ لكن ايضا في محالوات للإصلاح ما عم بقدر غض النظر عنها !! (وادعو ايضا لعدم اهمالها واخذها من الباب الإيجابي)
انا ما عم بقدر لاقي اي سبب بيستدعي الحكومة والرئيس لان يقوم بتنويم الشعب.. او الضحك عليه (ومن هون بدعو لفهم الأمور في نصابها الصحيح)

معك حق بهي حكيم :D :D

أفهم ما أردت بس...
أولاً- الشعب ديمقراطي بطبعه .. المطلوب الحكم يكون ديمقراطي
أولاً- السياسة الحالية خطأ بخطأ : سياسياً محاصرين و أميركا على الأبواب و الوضع من سئ إلى أسوء .. اقتصادياً حدث و لا حرج لولا ارتقاع أسعار النفط لانهار الاقتصاد من العام 2000 و البطالة ضاربة أطنابها و القطاع العام خاسر أو مخسر و الاحتكارات موجودة و المافيات تبيع البلد و تشتريه كل يوم 1000 مرة و ليس لنا الحق بالاعتراض.. دبلوماسياً : مآسي تحدث إن كان في أحداث لبنان و إن كان في التعامل مع الولايات المتحدة، إعلامياً: كما لو أن إعلامنا يعمل لصالح إسرائيل مثلاً صورتنا أسود من الشحار و لا أقول ذلك تشفياً و لكن لأني أرى النظرة في عيون الناس عند سؤالهم من أي بلد أنت و تأتي الأسئلة من قبيل خرجت جنود احتلالكم من لبنان.. ، اجتماعياً .. ثقافياً تعليمياً .. ...
ما هي محاولات الإصلاح الجدية .. ما هي بل ما هي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
أستطيع كتابة مجلد عن التخبيص السياسي و الاقتصادي و قمع الحريات و الفساد .. مدعوماً بأرقام الحكومة نفسها (لست أرمي كلماتي جزافاً يمكنك الإطلاع على محاضرات كاملة في جمعية السورية للعلوم الاقتصادية ..) أما الإصلاح الذي تتحدث عنه فما هو إلا في مقالات الصحف أو باستصدار مراسيم مجتزأة و مفصلة على مقاس أشخاص أو شركات أو مصممة لتعطي دفعة إعلامية دون أن تجرد الحكم من أدواته في التسلط على الشعب

سؤال واحد أجبني عليه و أعدك أن أكف عن الانتقاد بعدها: لماذا لازلنا نعمل بظل قانون الطوارئ؟

و على فكرة قانون الطوارئ أكثر بكثير من كلمتين.. إنه التعسف في استعمال السلطة التي هي غير شرعية أصلاً و ما الداعي أصلاً لهذا القانون؟ من أجل محاربة اسرائيل؟؟؟؟؟؟؟

here i am

02/06/2005, 23:24

مرحبا

أولاً- الشعب ديمقراطي بطبعه .. المطلوب الحكم يكون ديمقراطي

حلوة منك نحنا طول عمرنا كنا نطمح أنو نكون ديمقراطيين بس ولا مرة قدرنا نجسد هالشي ولو حتى بكتابة مقال
يعني بظن خطوة حلوة أنو عم نقدر نكتب و عم نحكي كمان بالطريق و في شباب بتتفشخر و بتسب و بتلعن و انفتحت كتير مجالات للحياة الديمقراطية
هلق مابدي قلك أنو صرنا هلق أحرار و كلمتنا على راس لسانا بس فيني قلك أنو صرنا بجو كتير مقبول النسبة يلي كن عايشينو
هذا شي بيطرح أنو حكومتنا عم تمشي على طريق من طرق الديمقراطية
و بقلك شغلة أنا ماني بموقف مدافع بس أنا عم أحكي من موقف المتفائل

أولاً- السياسة الحالية خطأ بخطأ

أنا معك فيها بس إذا طبشنا و قاتلنا و خانقنا مارح نوصل لنتيجة ..... لو منفكر شوي منلاقي أنو في أحزاب بلشت و عم تقوم بشغلها بطريقة منظمة و إلا مايكون في نتاج

سؤال واحد أجبني عليه و أعدك أن أكف عن الانتقاد بعدها: لماذا لازلنا نعمل بظل قانون الطوارئ؟

أنا متلي متلك بطالب بالنظر لأمر المخطوفين و تحديد الجهات المسؤولة عن هالشي
بس مابظن أنو تطبيق هالقانون عم يكون بأوامر عليا يعني بمعنى تاني في إيدين جوات البلد عم تخرب و تعفس بس تأكد أنو الحكومة السورية مارح تيجي تستخدم هيك أساليب و هيك قوانين هلق و هي بتعرف أنو نحن بموقف حرج و كل العالم واقفلنا على غلطة
متل وقت تهمونا بدم الحريري " ياعمي كل العالم ناطرك تكب كاسة مي بتيجي بتخليون عم يطلعوا عليك و بتكبها "
و أخيرا
تأمل خير و خلي نضالك منظم و جدي و نحن هذا يلي بدنا ياه
:D :D :D :D :D :D :D :D :D
سلامات

Danito

03/06/2005, 00:08

تأمل خير و خلي نضالك منظم و جدي و نحن هذا يلي بدنا ياه
نضال أخدوا على العسكرية و المنظم احترق من ذبذبة الكهربا و جدى عطاك عمرو من زمان

و مثل ما بدكون بصير سيدي

here i am

03/06/2005, 00:48

جدى عطاك عمرو من زمان

البقية بحياتك :D :D :D

عاشق من فلسطين

09/06/2005, 18:06

البقية بحياتك

البقية بحياتنا كلنا ..
لأنو الوطن عم يحتضر :cry:

sezar

09/06/2005, 20:24

البقية بحياتنا كلنا ..
لأنو الوطن عم يحتضر

تضرب عند هل مساا :cry: :cry: :cry: :cry: :cry: :cry:

عاشق من فلسطين

12/06/2005, 03:28

تضرب عند هل مساا

لك أضرب أيمتا ما كان .. صحيح الصراحة بتجرح لكنها بتفيد .. :wink: :D

Kakabouda

12/06/2005, 04:53

تضرب عند هل مساا

لك أضرب أيمتا ما كان .. صحيح الصراحة بتجرح لكنها بتفيد .. :wink: :D :gem: :gem:

عاشق من فلسطين

13/06/2005, 12:42

:P :P :P :angel:

Atramez_Zeton

13/06/2005, 12:49

:? :? :? :? :?
و حياة الله ما فهمت على شو عم تبكو !!!
:? :? :?
قريتا هيك بس انو شو غير البهادل ما في !!!
:? :? :? :?

Tarek007

13/06/2005, 12:51

حياة الله ما فهمت على شو عم تبكو !!!

قريتا هيك بس انو شو غير البهادل ما في !!!

:?: :?: :?: :?:

عملك وش تاني للصفحات ....بركي بيمشي الحال

8) :P

Barleb

04/01/2006, 01:46

انو أدب و شعر ثقافة و و
فـ الأفضل تترك هل شغله لـ صحابها
بس كلام حلو و معبر كتير مو شوي
مشكور يا حلو

Tarek007

04/01/2006, 02:22

مشكور يا امور

عن العاشق بغيابوا

sezar

04/01/2006, 02:49

آااخ على عاشق و أيامو
مرسي للي نكش الموضوع

layla

04/01/2006, 09:55

:cry: رجعتوني لايام الاخوية القديمة
هالموضوع يمكن وقت انكتب قريتو شي سبعين مرة وماكنت مل منو وهلأ رجعت قريتو شي عشر مرات بدون ما مل
مشكور عاشق من القلب ومشكور اللي نكش الموضوع
الله يرد غيابنا :(

Tarek007

04/01/2006, 18:15

أبو النسيم

04/01/2006, 20:39

عنجد هل الأيام هي وهل المسخرة يلي صارت بشغلة خدام و مجلس الشعب
بها هلوسة :clap: :clap: :clap: :clap: :clap: :clap:

Barleb

04/01/2006, 20:51

مشكور يا امور

عن العاشق بغيابوا
معك وكالة ؟

yass

04/01/2006, 22:06

:lol:

هل المرة مو انا يلي نكشتوا ....حطيت رابطوا بموضوع منشان تنكشوا .. ..فنكشوا ياس

لانوا غالباً كل ما بنكش شغلة بتقولوا : ينكشوا قبرك ليش نكشتوا

:lol::lol::lol::lol::lol::lol::lol::lol:

لك شو أنا نكشتو!!! يحرق حريشك زتيتها براسي أنا ألي ست شهور غايب :lol: :lol: ...أنا الموضوع كلو على بعضو تزكرتو لما حكيت عنو بالموضوع التاني , و رديت عليه هنيك :pos:
الحق كلو عليك ياطارق يا حبيبي , ولا تسألني ليش لأنو أنا كمان ما بعرف...المهم أنو الحق عليك :jakoush: :jakoush: :jakoush:

Tarek007

04/01/2006, 23:37

لك شو أنا نكشتو!!! يحرق حريشك زتيتها براسي أنا ألي ست شهور غايب :lol: :lol: ...أنا الموضوع كلو على بعضو تزكرتو لما حكيت عنو بالموضوع التاني , و رديت عليه هنيك :pos:
الحق كلو عليك ياطارق يا حبيبي , ولا تسألني ليش لأنو أنا كمان ما بعرف...المهم أنو الحق عليك :jakoush: :jakoush: :jakoush:
هاد العرق يلي شربانوا مغشوش الظاهر !!!

لا تواخذنا حبيب :lol:

بس خلص طلعت براسك ...أنت يلي نكشت الموضوع :lol:

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

Barleb

09/02/2006, 17:49

تحية لحسام ملحم

فاوست

06/09/2006, 00:25

نحن دائما مهلوسين على هل حالة

Nirvana

06/09/2006, 11:25

هلوسنا عالآخر ..