مجرد وطن .. [الأرشيـــــف]

Nirvana

11/09/2006, 22:48

مننولد بمكان .. منبدا نكتشف فيو .. شو حوالينا؟ .. مين حوالينا؟ .. منكبر على ريحتو وصوتو وصورو ..
ريحة قهوة الصبح .. ريحة رطوبة الشتا على ترابو .. لك حتى ريحة الزبالة عند البيوت ..
صوت الأذان .. صوت اجراس الكنايس .. صوت بياعين الخضرة والخردة .. صوت زمور الباصات .. صوت الولاد الصغار بالحارة ..
صور بيوتنا .. صور حاراتنا .. شجارنا .. شمسنا .. ناسنا ..

منتعلم انو هالشي اللي عم نتعرف عليه هوي النا .. نحنا جزء منو وهو جزء منا .. ما بكون غير فينا وما منكون غير فيو .. سمولنا ياه وطن ..

منقول هاد الوطن .. وطني ..
الوطن اهلي ..
الوطن بيتي ..
الوطن مدرستي ..
الوطن جامعتي ..
الوطن شغلي ..
الوطن ذكرياتي .. رفقاتي .. حبايبي ..

منكبر .. منصير نفكر .. منصير نقرا .. منصير نفهم .. منصير نميز .. وبس نحس إنو صرنا "انسان" ..

بيجي الوطن بيدبحك .. بيصلبك .. بدينك .. بموتك ألف مرة ..
بيدبحك بالخوف .. بيصلبك بالحاجة .. بدينك بالفكرة .. وبموتك بكل مرة بتحاول فيها تجرب ..
تجرب الحب ..
تجرب الحرية ..
تجرب تصنع حياة خاصة فيك .. بأسلوبك .. بطريقتك .. بحزنك .. بضحكاتك .. بفنك .. بأدبك .. بثقافتك .. بحريتك .. بإنسانيتك ..

في وطن الأحلام ... منعيش .. منحب.. مننجن .. منغير .. منمارس انسانيتنا متل ما بنحبها تكون ..

في وطننا .. بنتجرد من كل هالأحاسيس لحتى نقدر نعيش بهالوطن ..

ليش منحبك هالقد .. مع انك مجرد وطن ؟؟؟

Reemi

11/09/2006, 22:56

whereEver i stand is my HOLLY land

بنضل نحبه لهيك ....
بعدين دخلك هوي الوحيد الي ثابت...يعني ع القليله بيطلعلوا يعذب فينا مشان يفرجينا كيف الدنيا....

Spector

11/09/2006, 22:59

نيرفانا انا عندي قناعة بجوز تكون صح بجوز تكون غلط

مع هيك هاي قناعتي و ما بتراجع عنا

انا برأيي الوطن بأهلو و الاشياء يلي فيه

يعني انا لو الناس يلي بحبون و الطبيعة يلي بحبا و ابو وديع عندي هون

مابفكر ارجع لا عالوطن و لا عالأمة

الوطن بأهلو ...

تحياتي نيرفانا و لكل شبيبة المنبر الرائع :D

Nirvana

12/09/2006, 00:14

whereEver i stand is my HOLLY land

بنضل نحبه لهيك ....
بعدين دخلك هوي الوحيد الي ثابت...يعني ع القليله بيطلعلوا يعذب فينا مشان يفرجينا كيف الدنيا....

ثابت بثبوتنا .. لانو اذا نحنا تخلينا عنو صدقيني بينهز .

Nirvana

12/09/2006, 00:20

نيرفانا انا عندي قناعة بجوز تكون صح بجوز تكون غلط

مع هيك هاي قناعتي و ما بتراجع عنا

انا برأيي الوطن بأهلو و الاشياء يلي فيه

يعني انا لو الناس يلي بحبون و الطبيعة يلي بحبا و ابو وديع عندي هون

مابفكر ارجع لا عالوطن و لا عالأمة

الوطن بأهلو ...

تحياتي نيرفانا و لكل شبيبة المنبر الرائع :D

وانا كمان عندي قناعة .. ووارد جدا تكون غلط ...

نحنا اكتر شي بنتعلق وبنتأثر بالمكان اللي تربينا فيو ..
يعني ممكن تكون جنسيتنا شي .. والبلد اللي تربينا فيو يكون شي تاني ...
بس اذا انت تربيت بوطنك واضطريت تتركو .. صدقني مهما كنت مبسوط برا .. بتضل تحز بقلبك كلمة وطن .. خصوصا اذا المكان اللي كنت فيو ما بيعطيك شو بيعطيك وطنك ..
وطنك بحسسك أنو الك .. ملكك .. لو بتنهان فيو ممكن تسكت ..بس اذا انهنت برا بـ**** أبو الساعة اللي طلعت فيها من بلدك .. صح ؟

طبعا هاي وجهة نظري فقط ..
وشكرا لمشاركتك ..

layla

12/09/2006, 02:14

ليش منحبك هالقد .. مع انك مجرد وطن ؟؟؟
بتسألي وبتجاوبي بنفس اللحظة

منقول هاد الوطن .. وطني ..
الوطن اهلي ..
الوطن بيتي ..
الوطن مدرستي ..
الوطن جامعتي ..
الوطن شغلي ..
الوطن ذكرياتي .. رفقاتي .. حبايبي ..

jazz_music

12/09/2006, 02:23

لك انت قاعد بقلبي .. هلء كنت بدي اكتب موضوع متل موضوعك ....

لك روح و انا معك بكل كلمة قلتا ...

ما اصلا نحنا اشباه مواطنين او مشروع مواطنين ...

chefadi

12/09/2006, 03:44

الوطن دائما يعني الانتماء اللي مافينا بدونو ,,, و أنا ميال اكتر لوجهة نظر نيرفانا يعني ارتباطي بالمكان اولا بعدين بيجو الاشخاص ,,,
صحيح انو اغلبنا عم يفكر يسافر و يتغرب كرنال حياة فيها شوية حرية و انسانية و بحبوحة مادية بس بيضل الوطن بقلوبنا قد ما عمل فينا و شو ماعمل فينا
تحياتي للجميع :D

Nirvana

12/09/2006, 09:49

بتسألي وبتجاوبي بنفس اللحظة

جنان صح .. بعرف ..

Nirvana

12/09/2006, 10:20

لك انت قاعد بقلبي .. هلء كنت بدي اكتب موضوع متل موضوعك ....

لك روح و انا معك بكل كلمة قلتا ...

ما اصلا نحنا اشباه مواطنين او مشروع مواطنين ...

انا بنت .. هاي اول شي .. بس شي منيح انك مو منتبه ..:lol:

المهم .. انو ما بدنا نضل أشباه مواطنين في مشروع وطن ..

حقنا نعيش مواطنين بوطن.

Nirvana

12/09/2006, 10:23

الوطن دائما يعني الانتماء اللي مافينا بدونو ,,, و أنا ميال اكتر لوجهة نظر نيرفانا يعني ارتباطي بالمكان اولا بعدين بيجو الاشخاص ,,,
صحيح انو اغلبنا عم يفكر يسافر و يتغرب كرنال حياة فيها شوية حرية و انسانية و بحبوحة مادية بس بيضل الوطن بقلوبنا قد ما عمل فينا و شو ماعمل فينا
تحياتي للجميع :D

الانسان بدون وطن بحس حالو متعري من كل شي .. وكانو ما الو مكان في الدنيا .. مو عارفة اعبر.. بس متل البيت تمام ..

:D

فلسطينية الشتات

12/09/2006, 12:10

مشكوووووووووووووووووووووو وووووووووووورة نيرفانا الف مرة على الموضوع الرائع، بس بحب احكيلك شي، الوطن مش محصور بالمكان اللي انولدنا فيه او اللي عشنا فيه.

واكبر دليل بحكيه من الواقع اللي بعيشه انا.

انولدت بالإمارات العربية، وحاليا عايشة بمخيم لاجئين، واصلا من فلسطين

لكن الشي الوحيد المحفور بقلبي صدقيني هو فلسطين.

يا وطني المعروض كنجمة صبح في السوق
في العلب الليلية يبكون عليك
ويستكمل بعض الثوار رجولتهم
ويهزون على الطبلة والبوق
أولئـك أعداؤك يا وطني
من باع فلسطين سوى أعدائك أولئك يا وطني
من باع فلسطين وأثرى بالله
سوى قائمة الشحاذين على عتبات الحكام ومائدة الدول الكبرى ؟

فلسطين انخلقت بقلوبنا وانغرست في لحظة الولادة، رضعنا حبها مع حليب الأم
ما تفكري انه المكان اللي بتكبري فيه او الناس اللي بتعيشي معهم هم وحدهم
بكفوكي، اذا للحظة ما عرفتي شو معنى الوطن

شو معنى يكون الك انتماء لأرض، ترفعي راسك بالعالي لما تحكي انا بنت هالأرض
الوطن امتداد الروح والأرض، العلاقة الاكبر ما بين الجسد والأرض

منها وجدنا ولها سنرجع

Nirvana

12/09/2006, 12:43

شو معنى يكون الك انتماء لأرض، ترفعي راسك بالعالي لما تحكي انا بنت هالأرض
الوطن امتداد الروح والأرض، العلاقة الاكبر ما بين الجسد والأرض

وهاد اللي قصدتو ... مشكورة .

فلسطينية الشتات

12/09/2006, 13:10

وهاد اللي قصدتو ... مشكورة .

خلص متفقين نيرفانا
دايما ان شاء الله

jazz_music

12/09/2006, 18:55

انا بنت .. هاي اول شي .. بس شي منيح انك مو منتبه ..:lol:

المهم .. انو ما بدنا نضل أشباه مواطنين في مشروع وطن ..

حقنا نعيش مواطنين بوطن.
طيب انا اسف ....

و انا معك يا صديقتي ..

Nirvana

12/09/2006, 19:44

طيب انا اسف ....

و انا معك يا صديقتي ..

ما في مشكلة ..

Gazita

12/09/2006, 20:12

ليش منحبك هالقد .. مع انك مجرد وطن ؟؟؟

اول خطوة مشيتها كانت بوطني ولسا بوطني واي شخص اتغرب هربا من وطنو بيرجع يطل على وطنو وبيضل يسأل حالو نفس السؤال ليش لساتني بحبو مع انو ما عطاني اللي بدي ياه من تحقيق احلامي ....... مجرد وطن لانو ما حقق لي نصف اللي بدي.بس اكبر وطن بطبيعتو وطقوسو وجدرانو بسماؤو اللي استوقفتنا مرات عديدة واحنا صغار ولحد هلء.
ميرسي نيرفانا على الموضوع الرائع:D :D

Nirvana

12/09/2006, 20:16

اول خطوة مشيتها كانت بوطني ولسا بوطني واي شخص اتغرب هربا من وطنو بيرجع يطل على وطنو وبيضل يسأل حالو نفس السؤال ليش لساتني بحبو مع انو ما عطاني اللي بدي ياه من تحقيق احلامي ....... مجرد وطن لانو ما حقق لي نصف اللي بدي.بس اكبر وطن بطبيعتو وطقوسو وجدرانو بسماؤو اللي استوقفتنا مرات عديدة واحنا صغار ولحد هلء.
ميرسي نيرفانا على الموضوع الرائع:D :D

شكرا لمشاركتك جازيتا .. الوطن نحنا ونحنا الوطن ..:D

sezar

12/09/2006, 20:23

أحبه لأنه مجرد وطن لأنه مجرد أرض أعشق ان أسير فيها لأنها مجرد أرض أشتاق لها

لمجرد ذلك أعشقه :D

MR.SAMO

12/09/2006, 20:31

بحبه لأنه عايش فيي قبل ماكون عايش فيه

Nirvana

12/09/2006, 20:43

أحبه لأنه مجرد وطن لأنه مجرد أرض أعشق ان أسير فيها لأنها مجرد أرض أشتاق لها

لمجرد ذلك أعشقه

بحبه لأنه عايش فيي قبل ماكون عايش فيه

آآآآآآآآآآآآآآآآآخ .. أجوبتكم بترد الروح للوطن ..

COSTA

12/09/2006, 23:29

وانا كمان عندي قناعة .. ووارد جدا تكون غلط ...

نحنا اكتر شي بنتعلق وبنتأثر بالمكان اللي تربينا فيو ..
يعني ممكن تكون جنسيتنا شي .. والبلد اللي تربينا فيو يكون شي تاني ...
بس اذا انت تربيت بوطنك واضطريت تتركو .. صدقني مهما كنت مبسوط برا .. بتضل تحز بقلبك كلمة وطن .. خصوصا اذا المكان اللي كنت فيو ما بيعطيك شو بيعطيك وطنك ..
وطنك بحسسك أنو الك .. ملكك .. لو بتنهان فيو ممكن تسكت ..بس اذا انهنت برا بـ**** أبو الساعة اللي طلعت فيها من بلدك .. صح ؟

طبعا هاي وجهة نظري فقط ..
وشكرا لمشاركتك ..
الوطن هو الارض يلي منعيش عليها
و قلت قبل بمرة انو الارض هي امنا ولما بتعطي بتعطي الكل وما بتفرق بين الكل
وشو ما كانت جنسيتنا بضل انتمائنا للارض يلي اكلنا وشربنا وربينا وحبينا و عشنا عليها

SAM 1

12/09/2006, 23:45

انا بحب وطني

لأنو اجمل البلاد ....... ماء وخضرة وشعب طيب

ولأنو مهد الحضارات والأديان ومهد الإنسان ومنو انتشر بباقي العالم

وحسيت بقيمتو فعلا وقت شفتو بعيون الحاسدين

ابتسمو فأنت سوريون.............
ودعو الحاقدين يموتون في غلهم

تحيا :hart: سوريا :hart:

tiger

12/09/2006, 23:49

جزء كبير مني موجود في وطني ....
ووقت اللذي اشتاق له أنا لا أشتاق لوطني ..... بل لنفسي ....
فأنا فيه وهو في ...... الى الأبد

وائل 76

13/09/2006, 04:56

حلو كتير موضوعك نرفانا ومو غريب عليكي هاي المواضيع الحلوة

انا بختصر كل الكلمات بكلمتين لولا انه الوطن لما كنا نعيش المعاناة التي نعيش الان
فاذا ادركنا ان الحياة هي اغلى ما يملك الانسان وان تلك الحياة نراها صغيرة جدا ونضحي بها من اجل الوطن سندرك حتما حب ومكانة الوطن في نفوسنا
حين يرتقي حبنا للوطن لمرتبة اعلى من تصور البشر
حين ترجح كفة الوطن على كفة الحياة
سندرك ان الله الدين الوطن هي الحقائق الثلاث التي نعيشها

احترامي للجميع :D

Nirvana

13/09/2006, 09:05

الوطن هو الارض يلي منعيش عليها
و قلت قبل بمرة انو الارض هي امنا ولما بتعطي بتعطي الكل وما بتفرق بين الكل
وشو ما كانت جنسيتنا بضل انتمائنا للارض يلي اكلنا وشربنا وربينا وحبينا و عشنا عليها

ما بنسى هالجملة أبدا لانها اثرت فيي وقتها كتير.. ومازالت ..

Nirvana

13/09/2006, 09:08

انا بحب وطني

لأنو اجمل البلاد ....... ماء وخضرة وشعب طيب

ولأنو مهد الحضارات والأديان ومهد الإنسان ومنو انتشر بباقي العالم

وحسيت بقيمتو فعلا وقت شفتو بعيون الحاسدين

ابتسمو فأنت سوريون.............
ودعو الحاقدين يموتون في غلهم

تحيا :hart: سوريا :hart:

بس ما تنسى انو الآخرين الهم وطن .. وبنقهرو على وطنهم متلك تمام اذا حدا هاجمو ..

سوريا بالقلب.

Nirvana

13/09/2006, 09:09

جزء كبير مني موجود في وطني ....
ووقت اللذي اشتاق له أنا لا أشتاق لوطني ..... بل لنفسي ....
فأنا فيه وهو في ...... الى الأبد

تمام .. ما ممكن نقدر ننفصل عن وطنا .. الا اذا ما كان عنا احساس بوطنيتنا وارتباطنا وببساطة حبنا الو ..

Nirvana

13/09/2006, 09:11

حلو كتير موضوعك نرفانا ومو غريب عليكي هاي المواضيع الحلوة

انا بختصر كل الكلمات بكلمتين لولا انه الوطن لما كنا نعيش المعاناة التي نعيش الان
فاذا ادركنا ان الحياة هي اغلى ما يملك الانسان وان تلك الحياة نراها صغيرة جدا ونضحي بها من اجل الوطن سندرك حتما حب ومكانة الوطن في نفوسنا
حين يرتقي حبنا للوطن لمرتبة اعلى من تصور البشر
حين ترجح كفة الوطن على كفة الحياة
سندرك ان الله الدين الوطن هي الحقائق الثلاث التي نعيشها

احترامي للجميع :D

شكرا وائل ...

فعلا التضحية من اجل الوطن .. بتعبر أديه مهم الوطن ... اذا كان الوطن بخير منكون نحنا بخير .. واذا كان الوطن مو بخير .. فاطلع علينا :pos:

فلسطينية الشتات

13/09/2006, 09:49

يا جماعة والله انا بحسدكم

كلكم عايشين بوطنكم، وكلكم قادرين تروحوا وتيجوا

حتى اللي عايشين مغتربين عن وطنهم بس بإرادتهم وقت ما بدهم بيرجعوا

لكن الدور والباقي على اللي مثلنا، بنتجرع حب الوطن زفرات ألم بتجرحنا مع كن نفس

امنيتي في الدنيا ارجع ولو ساعة لفلسطين وبعدها اموت مش فارقة معي

المهم امسك تراب فلسطين بإيدي، اشم ريحة الأرض
ريحة هوا فلسطين

والله ما بتتخيلوا شو يعني تكون عايش برة وطنك ومجبور على هالعيشة

عزاؤنا انه فلسطين عايشة فينا حتى لو ما عشنا فيها

sezar

13/09/2006, 11:02

ليس بالضرورة ان يكون الوطن شيء مادي أرض نمشي عليها او هواء نتنشقه ..
بل أسمى معاني الوطن عندما يمكنك العيش فيه بداخلك أطلق العنان لروحك لتعيش فيه و لو كان محتلا و لو كان بعيدا :D

وائل 76

13/09/2006, 11:04

يا جماعة والله انا بحسدكم

كلكم عايشين بوطنكم، وكلكم قادرين تروحوا وتيجوا

حتى اللي عايشين مغتربين عن وطنهم بس بإرادتهم وقت ما بدهم بيرجعوا

لكن الدور والباقي على اللي مثلنا، بنتجرع حب الوطن زفرات ألم بتجرحنا مع كن نفس

امنيتي في الدنيا ارجع ولو ساعة لفلسطين وبعدها اموت مش فارقة معي

المهم امسك تراب فلسطين بإيدي، اشم ريحة الأرض
ريحة هوا فلسطين

والله ما بتتخيلوا شو يعني تكون عايش برة وطنك ومجبور على هالعيشة

عزاؤنا انه فلسطين عايشة فينا حتى لو ما عشنا فيها

اختي العزيزة فلسطين لها خصوصية خاصة تختلف بها عن بقاع الارض
اذا كان الناس تسكن الاوطان ففلسطين تسكننا جميعاَ
نعم انا من فلسطيني الداخل لكني لا استطيع ان ارى مناطق اخرى من فلسطين
ورغم ذلك اشعر بان فلسطين تسكن بكل جزء من جسدي واستطيع ان اترك خيالي ليسرح ويطوف في اي منطقة اريد من فلسطين
وليبقى املنا بالله عز وجل كبير ان ياتي يوم الخلاص والانعتاق لنعود كلنا الى الوطن وننعم به

تحياتي الك اختي العزيزة:D

فلسطينية الشتات

13/09/2006, 11:11

فلسطين حالة عشق لا تتكرر....

وإن تكررت فلا تتكرر إلا ......... بها

Nirvana

13/09/2006, 11:17

أسمى معاني الوطن عندما يمكنك العيش فيه بداخلك أطلق العنان لروحك لتعيش فيه و لو كان محتلا و لو كان بعيدا :D

هالمعنى كتير عجبني .. وهالشي صحيح .. وبينتج عن قوة الارتباط بهالوطن.

Nirvana

13/09/2006, 11:20

فلسطين حالة عشق لا تتكرر....

وإن تكررت فلا تتكرر إلا ......... بها

فعلا .. فلسطين حالة بتختلف عن بقاع الأرض كلها لعدة اسباب.. أهميتها لكل انسان حتى لو ما كان فلسطيني .. تاريخها وموقعها .. وكل ما ارتبط بالقضية الفلسطينة والكيان الصهيوني ..
فما بالك بالنسبة للفلسطيين.

أصبحت .. وطنا عالميا يدافع عنه كل من لديه احساس بخصوصيتها واهميتها ..
بنشوف كتير ناس حاملين هم القضية الفلسطينية مع انهم مو فلسطينيين وهاد بدل على مكانتها .

بسام2

13/09/2006, 11:24

الوطن هو المكان الذي يرزق فيه الأنسان وليس اللذي يولد فيه..

والزوجه الوفيه ممكن تصبح وطن..

مجرد رأي..:king:

فلسطينية الشتات

13/09/2006, 11:27

الوطن هو المكان الذي يرزق فيه الأنسان وليس اللذي يولد فيه..

والزوجه الوفيه ممكن تصبح وطن..

مجرد رأي..:king:

يسعدلي رأيك ما احلاه :yahoo: :yahoo: :yahoo:

فعلا الزوجة الوفية اكيد رح تكون وطن

المتزوجين يعني اوطانهم دايما معهم
بس المشكلة اذا عكننوا عليهم .... بصيروا يكرهوا الوطن ؟؟ :p :p

MR.SAMO

13/09/2006, 12:08

اصعب شي هيي الغربة
والاصعب انك تكون عايش بأرضك وأرضك مو لألك

فلسطينية الشتات

13/09/2006, 12:18

كلام جميل والله مستر سامو لمست كبد الحقيقة

والاجمل توقيعك

MR.SAMO

13/09/2006, 12:31

[QUOTE=فلسطينية الشتات;453512]كلام جميل والله مستر سامو لمست كبد الحقيقة

والاجمل توقيعك[/ QUOTE]
دايما الحقيقة موجودة وباينة بس نحنا اوقات كتير بندير ضهرنا عليها
تحياتي

Nirvana

13/09/2006, 13:05

اصعب شي هيي الغربة
والاصعب انك تكون عايش بأرضك وأرضك مو لألك

صحيح .. :pos:
وتعيش بأرضك وأرضك يصادرها القريب ومو الغريب كمان ..

jazz_music

13/09/2006, 16:06

انا بحب وطني

لأنو اجمل البلاد ....... ماء وخضرة وشعب طيب

ولأنو مهد الحضارات والأديان ومهد الإنسان ومنو انتشر بباقي العالم

وحسيت بقيمتو فعلا وقت شفتو بعيون الحاسدين

ابتسمو فأنت سوريون.............
ودعو الحاقدين يموتون في غلهم

تحيا :hart: سوريا :hart:

سؤال صغير:

هلء انت قومي سوري شي؟

فلسطينية الشتات

13/09/2006, 16:09

سؤال صغير:

هلء انت قومي سوري شي؟

ممكن اعارضك هون شوي ؟؟

هلا انتا بسؤالك عارضت حالك

كيف بتسأله انه قومي وبتتبه بسوري ؟؟

لأني بعرف انه القومي بيلغي كل الحدود الصورية ما بين الدول العربية

بالتالي ما في معنى لسؤالك انه قومي سوري ؟

المفروض تحكي قومي عربي

شو رأيك ؟؟؟

jazz_music

13/09/2006, 16:20

ممكن اعارضك هون شوي ؟؟

هلا انتا بسؤالك عارضت حالك

كيف بتسأله انه قومي وبتتبه بسوري ؟؟

لأني بعرف انه القومي بيلغي كل الحدود الصورية ما بين الدول العربية

بالتالي ما في معنى لسؤالك انه قومي سوري ؟

المفروض تحكي قومي عربي

شو رأيك ؟؟؟
لأ انا قصدي انك كتبت ( تحيا سوريا )

و ابتسم فأنت سوري و الخ ..........

بس هيك ...

بس فكرة انك قومي عربي صعبة شوي و خصوصا بهل الوقت .. مو هيك يا صديقي ... ؟!

هلء بما انو انك قومي عربي فأنت بدك وحدة عربية .. مو هيك ؟!
هلء انا رح اعتبر هيك و احكي على اساس حكيك انت ..

هلء الوحدة العربية مفروضة علينا فرض يعني من وقت ما وعينا على الدنيا و في وحدة عربية و هي ضرورة من ضروراتنا .. و ايام عزنا كعرب ( متل انت ما بتقول) كانت وقت وحدتنا ..

هادا صح بس هلء مستحيل لأنو من ضروريات الوحدة على حكي مشيل عفلق ان يكون البلد منظم و في حرية سياسية و الأهم منها الحرية الأقتصادية ...

و هيك ؟

فلسطينية الشتات

13/09/2006, 16:28

لأ انا قصدي انك كتبت ( تحيا سوريا )

و ابتسم فأنت سوري و الخ ..........

بس هيك ...

بس فكرة انك قومي عربي صعبة شوي و خصوصا بهل الوقت .. مو هيك يا صديقي ... ؟!

هلء بما انو انك قومي عربي فأنت بدك وحدة عربية .. مو هيك ؟!
هلء انا رح اعتبر هيك و احكي على اساس حكيك انت ..

هلء الوحدة العربية مفروضة علينا فرض يعني من وقت ما وعينا على الدنيا و في وحدة عربية و هي ضرورة من ضروراتنا .. و ايام عزنا كعرب ( متل انت ما بتقول) كانت وقت وحدتنا ..

هادا صح بس هلء مستحيل لأنو من ضروريات الوحدة على حكي مشيل عفلق ان يكون البلد منظم و في حرية سياسية و الأهم منها الحرية الأقتصادية ...

و هيك ؟

يا سيدي على ميشيل عفلق

ارجع لورقة كتبها ميشيل عفلق رح تشوف رد على كلامك هذا كله

وهي ذكرى الرسول العربي، ميشيل عفلق بنادي بالعروبة والاسلام سوا
بعدين القومية العربية الصحيحة مش والله اني ادعي لشي وانا ما بعمله

القومية العربية اذا كانت مبنية بمنهجية سليمة فأكيد رح نصل للوحدة
يعني الشعور بالقومية العربية بين كل الشعب العربي هو الاساس للنهوض بوحدة عربية

الوحدة العربية ما بتنفرض بالفرض، لازم يكون في قناعة ذاتية عند الفرد حتى تنتشر بالمجتمع
انتا ما بتبدى من راس الهرم وبتنزل للقاعدة

في تمكين اساس وبعدين ارتقاء للقمة، والوحدة العربية نفس الشي
اذا الكل صارت عنده قناعة تامة انه القومية العربية ضرورية وانه كل الوطن العربي وطني مش بالضرورة فلسطين لحالها او لبنان لحالها او سوريا لحالها، وقتها بكون هذا الاساس لبناء الوحدة العربية الحقيقية.

jazz_music

13/09/2006, 16:33

يا سيدي على ميشيل عفلق

ارجع لورقة كتبها ميشيل عفلق رح تشوف رد على كلامك هذا كله

وهي ذكرى الرسول العربي، ميشيل عفلق بنادي بالعروبة والاسلام سوا
بعدين القومية العربية الصحيحة مش والله اني ادعي لشي وانا ما بعمله

القومية العربية اذا كانت مبنية بمنهجية سليمة فأكيد رح نصل للوحدة
يعني الشعور بالقومية العربية بين كل الشعب العربي هو الاساس للنهوض بوحدة عربية

الوحدة العربية ما بتنفرض بالفرض، لازم يكون في قناعة ذاتية عند الفرد حتى تنتشر بالمجتمع
انتا ما بتبدى من راس الهرم وبتنزل للقاعدة

في تمكين اساس وبعدين ارتقاء للقمة، والوحدة العربية نفس الشي
اذا الكل صارت عنده قناعة تامة انه القومية العربية ضرورية وانه كل الوطن العربي وطني مش بالضرورة فلسطين لحالها او لبنان لحالها او سوريا لحالها، وقتها بكون هذا الاساس لبناء الوحدة العربية الحقيقية.
هلء اذا انا ( ركز على كلمة اذا) فكرت بوحدة بين الدول العربية ما رح فكر بقيام هي الوحدة الا بين سوريا الكبرى ( يعني سوريا . فلسطين . الأردن . لبنان) و بس ... و ممكن فكر بتونس و بس ..

فلسطينية الشتات

13/09/2006, 16:37

يا حبيبي على هيك وحدة

هلا هاي الوحدة بتربطها الجغرافيا والتقارب بين السكان فيها

لكن هاي مش قومية عربية، القومية العربية وحدة الوطن العربي ككل بدون حدود وهمية مفتعلة هاي هي الوحدة المطلوبة

مش وحدة بلاد الشام، بلاد المغرب العربي

jazz_music

13/09/2006, 16:39

يا سيدي على ميشيل عفلق

ارجع لورقة كتبها ميشيل عفلق رح تشوف رد على كلامك هذا كله

وهي ذكرى الرسول العربي، ميشيل عفلق بنادي بالعروبة والاسلام سوا
بعدين القومية العربية الصحيحة مش والله اني ادعي لشي وانا ما بعمله

القومية العربية اذا كانت مبنية بمنهجية سليمة فأكيد رح نصل للوحدة
يعني الشعور بالقومية العربية بين كل الشعب العربي هو الاساس للنهوض بوحدة عربية

الوحدة العربية ما بتنفرض بالفرض، لازم يكون في قناعة ذاتية عند الفرد حتى تنتشر بالمجتمع
انتا ما بتبدى من راس الهرم وبتنزل للقاعدة

في تمكين اساس وبعدين ارتقاء للقمة، والوحدة العربية نفس الشي
اذا الكل صارت عنده قناعة تامة انه القومية العربية ضرورية وانه كل الوطن العربي وطني مش بالضرورة فلسطين لحالها او لبنان لحالها او سوريا لحالها، وقتها بكون هذا الاساس لبناء الوحدة العربية الحقيقية.

يا اخي انا اذا ( ركزلي على كلمة اذا ) بفكر بوحدة بين دول عربية ما بفكر غير بسوريا الكبرى
و معهن تونس .. ( يعني سوريا . لبنان. فلسطين . و الأردن ) و تونس ..... و بس هيك ..

سلام
..

jazz_music

13/09/2006, 16:42

يا حبيبي على هيك وحدة

هلا هاي الوحدة بتربطها الجغرافيا والتقارب بين السكان فيها

لكن هاي مش قومية عربية، القومية العربية وحدة الوطن العربي ككل بدون حدود وهمية مفتعلة هاي هي الوحدة المطلوبة

مش وحدة بلاد الشام، بلاد المغرب العربي
اي هههههههههه

حط بالخرج ,,,,

فلسطينية الشتات

13/09/2006, 16:47

اي هههههههههه

حط بالخرج ,,,,

انا بحكي بالمفروض

ما بحكي انه هذا الواقع، بكل الاحوال هاي قناعات وانتا حر بقناعاتك وانا حرة بقناعاتي

بس انا بوافق معك بشغلة انه اكثر وحدة ممكنة وقابلة للتحقيق
هي وحدة سوريا الكبرى :yahoo: بس وحياتك خلي الاردن :jakoush: :jakoush: :jakoush: برة الموضوع
لأنه الأردن نقطة فساد دائم وين ما كانت