-
دخول

عرض كامل الموضوع : بلا ولا شي

صفحات : [1] 2 3 4
Reemi
08/09/2006, 17:34
حدا شفلي البورت كليه تبعي؟...برمت الدنيا ماتركت بلاطة ما دورت تحتها، المشكلة مليان مفاتيح مهمة؛ يعني مثلاً: مفتاح البيت ومفتاح الخزانة ومفتاح البراد، كان معي كمان مفتاح إنجليزي وفرنسي وكوري ....شو فيه كمان؟ ...آه كان فيه كم لقمة هيك بتعرف مفتاح المعدة وكم كيلو سيليكون مفتاح الشهرة....كان فيه كمان صبر، أهم شي الصبر...يعني قديش صرلي مستنية الفرج، بس إجاني...ضيعت البورت كليه!!
* كنت مفتكر حالي عندي قوة وطاقة لا بأس بها..ومعظم الناس بيفكروا مرتين وقت يشوفوني...إنو العلقة معي..مو علقة بنوب...بس لوتلي دراعي.... الظروف ...
بيقولولي لازم أكون أقوى من الظروف...بس ما قدرت..الظروف هي اللي أقوى مني...مع إنها مصنوعة من ورق غير مقوّى...بس الأحكام اللي بتنشأ عنها...مع الظروف...صاروا 2 على البطل..
يعني مو قصة ورق...
*ما بعرف شو عم بيصير معي، يعني كأن في حدا متقصدني ...مبارح ضاع البورت كليه، اليوم ضيعنا الجزدان...كلشي إلا الجزدان...كل أوراقي الثبوتيه فيه ...يعني أنا هلق بلا ثبوتية ، المشكلة مو هون؛ المشكلة كيف بدي إمشي بلا ثبوتية...بطير بعدين، بيصير بدي مين يثبتني!!
* مع إني عملت دوزان للسيارة...وغيرت النوابض...وعيّرت الدواليب...ونفختون...وانتفخ قلبي من المصاريف ...بس الثبوتية...ضايعة...والاختلال صار ملاحظ على حركتي وتحركاتي...والطامة الأنكى هو إنو مرقت السيارة من فحص ميكانيكي شامل بالكمبيوتر والعين المجردة...من قبل الدوائر المختصة والمعنية...ومع ذلك...أفتقد للثبوتية...
يا خوفي يكون إلها علاقة بالمواقف...
*سامعين شي بمرض الشقيقة...نص البلد صايرلها شقيقة ...النص التاني وحيد لأهلو ...بس يشكل عام الكل متضايق من الشقيقة لأن اكتشفنا أخيراً إنو وجع الراس ما بيجيك غير من الدول الشقيقة...وأدام الله عليكم أشقائكم وشقيقاتكم.
* هي بالعموم الشقيقة ووجع الراس...كلو واحد...ضلينا نقول سوا ربينا...لك سوا ربينا...بس الهيئة ربينا لحالنا...مدري وين عبتسرح الشقيقة...أنا خمّنت إنها فورة غضب...بتصيب أي حدا في سن المراهقة وقت يتخن صوتو ويفتكر إنو صار...كبير...
بس ما كنت بتصور إنو في كبير بدو يطبطب ويدلّع...الله العليم على مين يدلع؟؟
على اللي كايدهم...ولا مكايدهم...!!


:pos: :cry:
***تعديل اداري*** (Majood)
- منقول من أحد المواقع السورية الصديقة -
Reemi
08/09/2006, 17:39
ممنوع تحكي بالدين، ممنوع تحكي بالسياسة، ممنوع تحكي بالجنس شو ماكان جنسو، وإذا بتحكي عن الفنانين بتكون سطحي وتافه، إذا بتحكي عن حدا...بتصير عم تجيب بسيرة العالم... إذا بدي إحكي عن الرياضة بطلع مسترجلة وإذا حكيت بالثقافة بكون عم نظّر...شو رأيكم إحكي عن ولا شي ...
ولا شي كان بيخاف الله وبيخاف على البلد من كلشي من الفساد من الطائفية من وضع الشباب يلي ما بيعرف من وين جايه ولوين رايح
من الناس يلي بلشت تاكل بعضا من.........................له على مهلكون يا شباب له له!!!...
إذا حدا سألكون عني...قلولو عفطوها ...كانت عم تحكي عن ولا شي. ((اهداء لمجود))
* أنا من زمان مقتنع إنو كل مشاكل الشباب..هي بسبب الفراغ...
الفراغ هو المسؤول عن ضياع الشباب واهتمامون بلعب الورق وصيحات الموضة والسيارات والتطبيق والجغلنة والتشخيص والتقسيم ...
ومسؤول عن كل شي مالو قيمة حقيقية لبناء المستقبل....
ومسؤول عن ابتعاد الشباب عن الثقافة والمطالعة والاهتمام الدراسي والتحصيل العلمي...
ومسؤول عن تراجع الوعي الاجتماعي والصحي...والله مو بس الشباب...المجتمع ككل...عبيعاني من الفراغ...أنا بصراحة أدعو لقتل الفراغ....
وقت وصلنا على المحكمة...وجهوا لي تهمة الشروع في جريمة قتل مع سبق الاصرار والترصّد...
لمسؤول كبير..
*غريبة الدنيا...منضل عم ننطر شي وما بيجي...يمكن لأن نحنا أصلاً ما منعرف شو ناطرين... بتروح فرصة منقول سيدي معلش الجايات أكتر من الرايحات...من قليلة عجقة السير بالبلد...بعدين مين قال الجايات أكتر من الرايحات...على شو العالم طوابير قدام السفارات الأجنبية ...وعلى شو نص الشعب إذا مو أكتر صار إسمو" جالية سورية"...فضيت البلد ونحنا لسه منقول الجايات أكتر من الرايحات...الله يجيرنا من سكة اللي بيروح ما بيرجعش!!
* يا أختي نحنا شعب ثوري...من يوم يومنا الثورة تجري في دمائنا...وبتلاقي كل مفرداتنا إلها علاقة بهالشي... ما بتسمعي
غير...انتفض الشعب على طغيان المستعمر...وانتفض السيف في يده....وانتفض بدني من قد ما عصّبت...وانتفض على إجريه ووقف على حيلو....ونفضتلك ياه هاداك البوكس خليتو يدور بمطرحو...وحتى صحن السجاير بيقولو عليه نفّاضة...
لأ...هون يمكن غير شي..هاي بينفضوا فيها...همومون... بس مدري نحنا مين نافض همومه فينا....
* مبارح انحطيت بموقف مزعج...مو لأنو كان معجوق ولا لأن الميكروباصات ما بتوقف عندو...بس لأن صدفت صديق قديم
صرلي شليون سنة مو شايفتو...هلق المشكلة وين؟
المشكلة إنو الذاكرة ما اسعفتني لأتذكر اسمو... قال ما لون طريق لعندي!! الظاهر كان في حدا واسطّو تقيلة نسيان كم مليون دولار
صار عندو مضطرين يسعفوه!!
* قررت أسكن بالمطار....وأشتغل وأكل وأشرب وأتزوج وأجيب ولاد وأربيون...بالمطار...
مو لشي..بس بدي أقلع عن التدخين


***تعديل اداري***
- منقول من أحد المواقع السورية الصديقة -
ابراهيم الندم
08/09/2006, 17:43
شو هالكلام هاد Reemi

والله محنا قدووو

بس الدنيا حظوظ ..
Reemi
08/09/2006, 17:45
- يعطيك العافية
- اذا رايح عالبلد ما بروح.. الساعة تنتين الضهر والناس فوق بعضا والطريق عالقلعة ...
وقاطعته قائلا
- لا خيو ماني رايح عالبلد
- وين رايح... عدادي معطل
- مو مشكلة أخي
...
...
صوت فرامل شديد... كدنا أن نصطدم بميكرو
ورغم أن الخطأ كان خطأه وقد حاول التجاوز من اليمين فإنه لم يستطع السكوت وقال بعد أن تبادل مع سائق المكرو بعض عبارات الغزل
- شوف الحيوان شوف... الله يلعن ابوكن على ابو اللي عطاكن الشهادات...
- اي هو حيوان.. بس انت ليش دوبلتو من عاليمين.. ما بتعرف الميكرو بيمشي متل الرقاصات... شي يمين و شي يسار
- كلن دواب خيو.. اش بدك بهالحكي... أصلا هدول المكرويات نزعو البلد والسير كلو... كلن حوادث وتلوث... بعدين الواحد فيون ببيع امو منشان راكب... شفلي هالحلو ما احلاه... يا عيني على ***** شو حلوة. هالنسوان حضارة يا خيو حضارة.
- .... صمت
- طلع ابن عمي طلع... شي بيشهي والله... تفضلي يا حلوة.. ريتك تعبري على قبري. شي نضيف وشكلا بتروح عالسريع.. (ويغمزني) ... لكا متل الي عنا بالبيت.. شي بيقطع الرزق...
- الله لا يقطع رزق حدا...
- والله طالما عنا نسوان بتقرف بالبيوت وشرطة حرامية بالشوارع... وهادا حيوان بيخبطك.. وهادا ما بيعرف يسوق بينكشك.. ولحق تصليح... **** اخت هالمصلحة.... من وين بدو يجي الرزق...
- الله بيعين...
- لسا قال بدن يزيدولن الرواتب.. ما حاجتن نهب ... مال الحرام ما عم يكفيون... برا حدا بيسترجي يرتشي.. والله بيفرموه.. حضارة عندن بس شعبنا دواب.
- يا سيدي لازم يبطلو هالعادة البهدلة..
- باوروبا اذا الوزير بيخالف بيحاسبوه... ما عندن مزح بنوب... يا أخي حضارة.. طلع البهيمة.. ميشية بنص الشارع على اقل من مهلها.. تلحلحي يوم... (ويصيح بوجه فتاة تقطع الشارع على أقل من مهلها) وجعين بوجهك انشالله. فترد عليه: وحتفة ولا حيوان.. قليل الأدب.
- دخيل الأدب أنا... يا خيو النسوان شغلة . بس بيمشو بالشارع متل البهايم.. شي حلو بس بهايم...
نقف على الإشارة فيشاهد الشوفير بعض الاولاد بدقون ويخبطون على سيارة.. ويصيح بهم...
- ولاك... يلعن ابوك منك الو.. روح ولا.. لو سيارة ابوك بتعمل هيك؟
(يتقدم أحد الأولاد ويبصق في وجه الشوفير ويركض هاربا.. يجن الشوفير وينزل من السيارة ليلحق بالولد ...لكنه يعود بسبب زماميز السيارات التي وراءنا)
- **** اختن قليلين التربية... تفي عليهن وعلي رباهن.... بعدين هدول اللي وراي العمى شو دواب.. اشبن فلتو متل البقر.. خيو نحنا شعب ما بيلبقلو زمور... باليابان فكو الإشارات ونحنا عم نزمر.. حضارة خيو.
- اي نعم
بعد أن وصلت أعطيته خمس ليرات زيادة على حسابه لأنه لا يملك عدادا ولم أرد أن يطلب مني ومع ذلك قال
- اشو هاد خيو.. بس هدول.. صرلنا ساعة عالاشارات... توصيلتك اكتر من هيك يخليلي ياك... اي حطيت بنزين أكتر من هيك...
شو بدكن بهالحكي.. شوفير حضارة...



***تعديل اداري***
- منقول من أحد المواقع السورية الصديقة -
Reemi
08/09/2006, 17:47
شو هالكلام هاد Reemi

والله محنا قدووو

بس الدنيا حظوظ ..
شكرا لمرورك...
لسا عندي حلقات .... :D
Nirvana
08/09/2006, 17:47
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// متابعة ..

ويا ويلاه ..
ابراهيم الندم
08/09/2006, 17:47
لا تعليق



:pos:





NO comment
Reemi
08/09/2006, 17:58
برنامج اذاعي ما بعرف شو اسمو على محطة كمان ما بعرف شو اسمها فتحت عليها بالصدفة ...المذيعة بصوتها الحنون كانت عم تنتظر اتصالات ليحكوا فيها الناس عن مشاكلهم العاطفية وخصوصا مسألة الخيانة ...

منستقبل اتصال ...ألووووو (بنبرة عاصفية مؤثرة) ...
فاطمة: أنا حبيت واحد وهو رفيق أخي ...يعني أنا ما كنت بعرف انو رفيقو وهيكه بس بعدين بين معي عرفتي شلون؟ يعني أنا مو حبيتو بس زعلت عليه لأنو كان معو هداك المرض وهو كان دائما يقلي انو معو هداك المرض وهيكه وأنا ازعل عليه كتير ...بعدين عرف أخي بس ما قلي لأني ما بحكي أنا وياه بس قال لاختي آمت اختي آلتلي آم أنا كتير اتدايقت واجا أخي ألي بعدين انو لا عد تحكي مع هادا الشب أبدا لأنو كذاب ومو منيح وهيكه ...مو منيح يعني عرفتي شلون؟ وقلي انو اذا بدك تحكي مع شباب لا تحكي مع رفقاتي وهيكه لأنو بدايق، قمت أنا التلو ايه خلص ما عد احكي معو وعلمتلو عالموباي آم رجع دقلي وقلتلو اني ما عد احكي معو لأنو أخي هيك قلي وقلتلو لا عد يجي عالحارة وهيكه، آم هو كتير زعل لأنو كتير بيحبني وما عد اتصل فيني منوب بس ضل يجي عالحارة ...بعدين مرة اتصل فيني وقلي منشان الله سمعيني أنا عملت حادث بالجيش وهيكه ومعي هداك المرض قمت أنا زعلت عليه كتير ورجعت احكي معو وكلما اطلع ارجع عالبيت ابكي لأني مدايقة وحاسة حالي عم خون أخي عرفتي شلون ؟
بعدين أنا شكيت فيه وحبيت اختبره آم خليت رفيقتي تتصل فيه وآم حكا معها وأنا كتير استغربت! وما قلها انو عم يحكي معي وصارت تعلملوا عالموباي وهو يحاكيها، آم أنا التلها تسألوا اذا مرتبط آم قلها انو كان مرتبط بوحدة مطلقة وعندها بنت بس هلأ تجوزت آم أنا كتير استغربت وهيكه وخليتها توعده آم هو راح بس رفيقتي ما راحت، وهلأ أنا مالي عرفانة شو بدي ساوي يعني اتركه ولا شو ؟
المذيعة بعد ما فاقت: طيب فاطمة ما بعرف ...انت شو عم تستني هلأ؟
فاطمة: يعني أنا بدي انتقم منو، مو انتقم منو بس حطها على عينو عرفتي شلون؟
المذيعة: طيب وما فكرت انو ليش ما عم يحكي معك بالخطبة؟
فاطمة: هو ألي انو معو هداك المرض منشان هيك ما بيقدر يخطب لأنو بيحبني وبيخاف علي وبدو يموت بعد 3 سنين وهيكه..
المذيع: طيب مو ممكن يكون كذاب؟
فاطمة: مبلى حسيت وسألت جارتنا هي آنسة بمدرسة ابتدائي انو شو أعراض هداك المرض؟ آمت التلي انو كذاب لأنو يلي معو ياه بيهر شعره وبينحف وهيكه... قمت أنا عرفت انو كذاب..
المذيعة: طيب فاطمة خليكي عالسمع منشان تسمعي رأي المستمعين بقصتك ...

((معلاق هالفاطمة ما حد يقلي..:lol: .)


***تعديل اداري***
- منقول من أحد المواقع السورية الصديقة -
ابراهيم الندم
08/09/2006, 18:00
والله هالقصة هالفاطمة بدها حصة !!
ري مي
08/09/2006, 18:34
ريمي ......... ما قلتيلي كيفو مي تو من صوبك
والله هالحكي شغلة ولك ريمي
فلتة العادة
كتريون:D :D :D
Reemi
08/09/2006, 18:36
ريمي ......... ما قلتيلي كيفو مي تو من صوبك
والله هالحكي شغلة ولك ريمي
فلتة العادة
كتريون:D :D :D
مي تو... منيح....;-)
هنن منقولين...بس ححطهن حلقات :D
Nirvana
08/09/2006, 18:39
ذكرتونا بـ Me2 .. يا خسارة ..


كملي ..
Reemi
08/09/2006, 18:42
ذكرتونا بـ Me2 .. يا خسارة ..


كملي ..
اييييييييييه عليك يا علي..هالموضوع ما نقصو غيرو....:cry:
شو كملي.... ما كملي...:x
بلى كمع...حاجتكن اليوم..الباقي لبكرى ;-)
ري مي
08/09/2006, 18:49
شكرا الك وسلميلي عليه مع انو ما منعرف بعض بس يا خيتو موضوعو تبع الثوابت الوطنية...
يعني شي بيمجد الخالق
Nirvana
08/09/2006, 18:55
اييييييييييه عليك يا علي..هالموضوع ما نقصو غيرو....:cry:
شو كملي.... ما كملي...:x
بلى كمع...حاجتكن اليوم..الباقي لبكرى ;-)

أخخخخ ... :cry:

طيب ما شي لبكرا .. لبكرا .. منستنى .. :D
leoprad
08/09/2006, 19:08
انو هيكي شو بدي قلق
يسلمو كتير على الموضوع هيكي
و هاي الفاطمة هبلى
و الشوفير اهبل
و شو هو هاداك المرض؟
و بلا و لا شي احسن الشي
فيروزة
08/09/2006, 22:27
عم ننتظر الحلقات المقبلة :shisha:
lucifer
08/09/2006, 22:41
كتاب هذه المواضيع أصدقاء شخصيون لي، وهذه الكتابات منقولة من موقعي ... أرجو توضيح الأمر من الإدارة .. هذه سرقة لحقوق الكتابة والنشر.
أرجو أيضا توضيح سياسة الموقع فيما يتعلق بهذه الأمور.
لكم الشكر
leoprad
08/09/2006, 22:43
كتاب هذه المواضيع أصدقاء شخصيون لي، وهذه الكتابات منقولة من موقعي ... أرجو توضيح الأمر من الإدارة .. هذه سرقة لحقوق الكتابة والنشر.
أرجو أيضا توضيح سياسة الموقع فيما يتعلق بهذه الأمور.
لكم الشكر
روووووووووق
اهداااااااا
عااااادي
سرسورة
08/09/2006, 22:46
ريمي,....و أنا كمان تسجيل متابعة....بس مو حايلله متابعة هه.....;-)
وروحي...شايفتلك:D
فيروزة
08/09/2006, 22:48
مي تو... منيح....;-)
هنن منقولين...بس ححطهن حلقات :D

كتاب هذه المواضيع أصدقاء شخصيون لي، وهذه الكتابات منقولة من موقعي ... أرجو توضيح الأمر من الإدارة .. هذه سرقة لحقوق الكتابة والنشر.
أرجو أيضا توضيح سياسة الموقع فيما يتعلق بهذه الأمور.
لكم الشكر
هي قالت أنون منقولين 8)
admiral
08/09/2006, 22:49
;-) ;-) :pos: :pos: ;-) ;-)
Reemi
08/09/2006, 23:28
كتاب هذه المواضيع أصدقاء شخصيون لي، وهذه الكتابات منقولة من موقعي ... أرجو توضيح الأمر من الإدارة .. هذه سرقة لحقوق الكتابة والنشر.
أرجو أيضا توضيح سياسة الموقع فيما يتعلق بهذه الأمور.
لكم الشكر
عفوا كتير
بس انا وضحت انه الموضوع منقول....:D
Reemi
08/09/2006, 23:31
عفوا كتير
بس انا وضحت انه الموضوع منقول....:D
:D :D وهاي المشاركة كمان....
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

....:D
lucifer
09/09/2006, 00:07
على حد علمي فإن التنويه بنقل المواضيع يتم بالموضوع نفسه وليس برد عليه.
على كل لا مشكلة. حصل خير.
layla
09/09/2006, 00:12
ام الريم يسلم ايديكي

شغلة بيجننو

حاسة ايام اخوية القديمة عم ترجع شوي شوي :yahoo:
Reemi
09/09/2006, 00:13
على حد علمي فإن التنويه بنقل المواضيع يتم بالموضوع نفسه وليس برد عليه.
على كل لا مشكلة. حصل خير.
:D انا صاحبة الموضوع واناقدمت اعتذاري...
ويا سيدي انا نسيت حطه بالاخر...بس المهم حطيته...يعني انا ما سرقت اقتبست...;-)
شكرا الك ولتفهمك...واهلين فيك عنا...وان شاء الله بنفيد وبنستفيدك...
نورتنا :D
Reemi
09/09/2006, 00:13
ام الريم يسلم ايديكي

شغلة بيجننو

حاسة ايام اخوية القديمة عم ترجع شوي شوي :yahoo:
يا اختي هاد الي بدنا اياه يا ام اللول...
معها معها بترجع....:clap: :clap:
سرسورة
09/09/2006, 00:52
يا اختي هاد الي بدنا اياه يا ام اللول...
معها معها بترجع....:clap: :clap:
يللا الله و ايدك ام الريم........و ناطرينك تكملي الحلقات:D :D
ghazool
09/09/2006, 01:18
موضوع حلو :D ..
Reemi
09/09/2006, 10:38
موضوع حلو :D ..
يعني انا الي عاملته تخيلي ما يكون حلو :pos: :p
Reemi
09/09/2006, 11:51
يعني ليش بتزعل إذا بيقولولك رجل كرسي؟... شبها رجل الكرسي؟! ليش بيصير كرسي ولا طاولة بلا رجل... بيصيرو للكب....لك إذا رجل أقصر من رجل ما بيمشي الحال فما بالك بكرسي بلا رجل!
بس أنا بعرف إنت ليش زعلان؛ لأنك لسه رجل كرسي ما صرت رجل الساعة... أيه لا تزعل حبيبي ما معظم رجال الساعة كانو أساساً... رجل كرسي.
*هلق إذا إجيتي للصراحة...أنا بيعجبني شوفير الباص...الزلمة رجل مواقف..بكل معنى الكلمة.....ومنتشر....يعني الزلمة إلو خطوة بمعظم مناطق البلد...
بس عندو تباين بحالتين...
وقت يتوقف عند المواقف تبعونو...بيتوقف بقوة ....يعني الفرامل عندو ممتازة...وما شاء الله بسبب وقفتو بيتطربشو الناس يمنة ويسرة....
بس بنفس الوقت وقت بدو يأقلع نحو الموقف التالي...بيكون بطيء...
إذا فكرنا بالسبب...بنلاقي إنو السبب هو الاعتماد على المازوت....وعلى علمك...المازوت بطيء الاحتراق...
فمشان هيك بتلاقي حركة رجل المواقف...بطيئة...
بس وقوفه ضاري ومؤثر...
*بيقولولك قربت تنحل.... أيه شو هالمادة العجيبة يلي ما عم تنحل، جربنا المي وكل أنواع الكلور... حتى الأسيد جربناه وما كانت تنحل! انحل وسطي وما كانت تنحل.... يمكن عن جد صار لازمنا... حل.
*ما بنقدر ...ما خرجنا حل نحنا...لأنو يا عيني ما عنا غير اللون الأبيض...يا الاستسلام للواقع..يا الكفن...والأبيض ما بيحل...بس بينحل عليه...



***تعديل اداري***
- منقول من أحد المواقع السورية الصديقة -
leoprad
09/09/2006, 12:00
بدنا حل ما هيك
Nirvana
09/09/2006, 12:14
شي مرتب .. انا بحب هيك اسلوب.
MR.SAMO
09/09/2006, 12:20
المهم الزبدة
تحياتي
Reemi
09/09/2006, 12:26
شي مرتب .. انا بحب هيك اسلوب.

المهم الزبدة
تحياتي
تابعونا تجدو ما يسركم :D
MR.SAMO
09/09/2006, 12:30
تابعونا تجدو ما يسركم :D

نحن نتابع وسرنا ما وجدنا وأكيدون بأننا سنسر بما سيأتي لاحقا
وفقك الله وسدد خطاكي
تحياتي
Barleb
09/09/2006, 14:57
بشو بيذكرني هل حكي .. بشو بشو بشو ؟؟


اي تذكرت ... زياد الرحباني ..

مين وردة لـ أحلى وردة
Reemi
09/09/2006, 15:15
بشو بيذكرني هل حكي .. بشو بشو بشو ؟؟


اي تذكرت ... زياد الرحباني ..

مين وردة لـ أحلى وردة
سلامة ذاكرتك معلم.... :lol: :gem: ;-)
شكرا ع الورد....:D
Reemi
10/09/2006, 12:20
تم تعليق الموضوع...لحد ما نحل مشكل صغير....:cry:
شكرا لكم لانتظارنا.....:D :D :D
bigbaby
10/09/2006, 12:34
هيك ما بيصير ...الموقع يلي عم تنقل منو المواضيع فيك من خلاله تراسل الكتاب وتاخد اذن النشر ...أما انك تطرش كل المحتويات هون لحالك فهادا الشي مو مقبول حتى لو كتبت "كتر خيرك" عبارة منقول ...أنا كمان وحدة من كتاب هدول المشاركات وفعلا زعجني الشي يلي ساويته ...
Reemi
10/09/2006, 13:16
هيك ما بيصير ...الموقع يلي عم تنقل منو المواضيع فيك من خلاله تراسل الكتاب وتاخد اذن النشر ...أما انك تطرش كل المحتويات هون لحالك فهادا الشي مو مقبول حتى لو كتبت "كتر خيرك" عبارة منقول ...أنا كمان وحدة من كتاب هدول المشاركات وفعلا زعجني الشي يلي ساويته ...
يا ستي ارجعي صفحة لورا وشوفي شو صار.....
بعدين انا كتبت...انه تم تعليق الموضوع لبين ما نحل الموضوع...وانا راسلت الادارة وناطره الرد....

طولي بالك بس ليفوت الحكيم اذا بتريدي...
وارجعي اقري الصفحات الي ورا...
وشكرا الك...:D
scorps22a
10/09/2006, 13:23
مرحبا
يمكن رفقاتي اللي فوق قالوا أنو الموضوع كلو على بعضو ملطوش و من موقع واحد و أصحاب الكتابات الأصلية رفقاتي و أكيد هالشي ما بيصير
و متل ما قال لوسي:
التنويه بنقل المواضيع يتم بالموضوع نفسه وليس برد عليه

اسمحولي رح أقتبس جملة لواحد من رفقاتي بالمنتدى الي فيه المشاركات الأصلية.
لسنا هنا لنلعب دور القضاء ونوزع الجرائم على اصحابها بل نتمنى ان نخلق جواً صحياً - في ظل منتدى - اقل ما يقال عنه رادع للذين استسهلو الاستيلاء على انتاج عقول الآخرين
Reemi
10/09/2006, 13:27
مرحبا
يمكن رفقاتي اللي فوق قالوا أنو الموضوع كلو على بعضو ملطوش و من موقع واحد و أصحاب الكتابات الأصلية رفقاتي و أكيد هالشي ما بيصير
و متل ما قال لوسي:


اسمحولي رح أقتبس جملة لواحد من رفقاتي بالمنتدى الي فيه المشاركات الأصلية.
يا جماعه شبكن....؟
عملتوا هجوم غير معهود...قلنالكن حقكن ع راسنا... وانا امبارح فات صاحب الموقع تاعكن...وتقريبا اتفقنا معو....وهلا طرحت الموضوع ع الادارة...
ليش بصلتكن محروقة...
علقنا الموضوع.... لبين ما نحل المشكل...
هلا اذا انحل كان بها ...
اذا ما نحل ... بنوقف الموضوع
وشكرا لتفهمكن يا جماعه:D
Aghalation
10/09/2006, 13:27
شكرا كتير لنقلك مواضيعنا الي كتبناها بإيدنا وبدون ما تعطي ولو ادنى اشارة لمنتدانا الي اخدت هالحكي منو
وبدون ما تذكر أسمائنا حتى
وكلفت خاطرك بعد كذا رد وتحياتك للعالم (باعتبار المواضيع من بيتك..وعبتقول للناس توقعوا ولسه عندي حلقات..وتابعوا تجدوا ما يسركم) وقلت انو منقول بعد كذا رد..
هادا الشي ما بيجوز وعلى الأقل بما انك بتعرف وين موجودين هالمقالات هاي كان بتقدر تكلف خاطرك وتطلب من صاحب الموضوع انو تنقل مواضيعو...
شي مؤلم جدا إنو يصير هالشي بمنتدى سوري...بدل ما نشد على إيدين بعضنا يقوم يصير فينا هيك.
أنا من كتاب هالمواضيع وبصراحة شي حز بنفسي جدا.
وعل كل بانتظار الرد

معلش تعديل صغير
مين صاحب الموقع اللي فات مبارح وحكى معكم؟؟
Reemi
10/09/2006, 13:31
يا جماعه شبكن....؟
عملتوا هجوم غير معهود...قلنالكن حقكن ع راسنا... وانا امبارح فات صاحب الموقع تاعكن...وتقريبا اتفقنا معو....وهلا طرحت الموضوع ع الادارة...
ليش بصلتكن محروقة...
علقنا الموضوع.... لبين ما نحل المشكل...
هلا اذا انحل كان بها ...
اذا ما نحل ... بنوقف الموضوع
وشكرا لتفهمكن يا جماعه:D

يا ستي ارجعي صفحة لورا وشوفي شو صار.....
بعدين انا كتبت...انه تم تعليق الموضوع لبين ما نحل الموضوع...وانا راسلت الادارة وناطره الرد....

طولي بالك بس ليفوت الحكيم اذا بتريدي...
وارجعي اقري الصفحات الي ورا...
وشكرا الك...:D


تم تعليق الموضوع...لحد ما نحل مشكل صغير....:cry:


شكرا لكم لانتظارنا.....:D :D :D


شكرا كتير لنقلك مواضيعنا الي كتبناها بإيدنا وبدون ما تعطي ولو ادنى اشارة لمنتدانا الي اخدت هالحكي منو
وبدون ما تذكر أسمائنا حتى
وكلفت خاطرك بعد كذا رد وتحياتك للعالم (باعتبار المواضيع من بيتك..وعبتقول للناس توقعوا ولسه عندي حلقات..وتابعوا تجدوا ما يسركم) وقلت انو منقول بعد كذا رد..
هادا الشي ما بيجوز وعلى الأقل بما انك بتعرف وين موجودين هالمقالات هاي كان بتقدر تكلف خاطرك وتطلب من صاحب الموضوع انو تنقل مواضيعو...
شي مؤلم جدا إنو يصير هالشي بمنتدى سوري...بدل ما نشد على إيدين بعضنا يقوم يصير فينا هيك.
أنا من كتاب هالمواضيع وبصراحة شي حز بنفسي جدا.
وعل كل بانتظار الرد

معلش تعديل صغير
مين صاحب الموقع اللي فات مبارح وحكى معكم؟؟

بعد ردودي الي فوق ما عندي رد...ولو سمحتوا نوقف الموضوع...لبين ما توصل ادارتنا....:D
Reemi
10/09/2006, 13:33
معلش تعديل صغير
مين صاحب الموقع اللي فات مبارح وحكى معكم؟؟

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////


:D :D :D
ويا ريت تشوف صفحة 2.....:D
leoprad
10/09/2006, 17:07
طولو بالكم على البنت صحيح انكم هبلان
اي شو دبحت شي واحد منكم؟؟؟
اللعمى
Reemi
10/09/2006, 17:10
طولو بالكم على البنت صحيح انكم هبلان
اي شو دبحت شي واحد منكم؟؟؟
اللعمى
حاسه حالي عملت خيانه للوطن.....:cry: :cry: :cry:
leoprad
10/09/2006, 17:23
حاسه حالي عملت خيانه للوطن.....:cry: :cry: :cry:
يمكن ماعندهم غير هادا الموضوع متل الخلق لهيك قبو هالقبة