مرحباً أصدقائي في هذا الموقع المميز
هذه أول موضوع أطرحه للنقاش في هذا المنتدى
أرجو ممن يحب المشاركة أن يفكر ملياً قبل أن يجيب على التساؤل التالي؛ علنا نجد جواباً شلفياً عنده:
هل الله عادل؟؟


مع كل الحب

طيب شو المقصود بالسؤال إذا بدنا نتعمق بالموضوع بدنا نوصل لمرحلة الكفر هدا راي فشو رأي الشباب

أنا برأيي أنو الواحد لما بدو يطرح هيك موضوع
بيقدملو بكم كلمة تفتح آفاق للعالم ليفكروا فيها
عكلن الله عادل
وأهلا وسهلا فيك بالموقع

بدنا نتعمق بالموضوع بدنا نوصل لمرحلة الكفر هدا راي فشو رأي الشباب


انا ما بتخيل انو اذا تعمقنا رح نوصل لمرحلة الكفر أبدا

قليل من العلم يبعد عن الله ....
كثير من العلم يوصل إلى الله

أولا أهلا وسهلا فيك بالموقع ...

انا رأيي انو الله كتييييييير عادل ...( وعلى فكرة أنا ما بحب النقاش بهالفكرة :D :D :D )

أول شي بحب أشكركم على المشاركة

اللي بحب قولو لrowaf -على فكرة موقعك كتير حلو- أنو إذا كان التفكير نتيجته الكفر فمعلش خلينا نكون كافرين.... والعكس صحيح...
المهم برأيي تكون آراءنا وقناعاتنا والأهم أفعالنا ناتجة عن تفكير بالمواضيع فما بالكن إذا كان الموضوع مهم وحساس وبيمس كل واحد فينا متل موضوع: عدل الله أو عدم عدله

يمكن كل واحد فينا سأل حالو بمرة من المرات:

ليش فلان أغنى مني؟ (مع أني بتعب و بشقى وهو لأ) وسأل: وينك يا الله؟

ليش علتانة أحلى مني؟ شو ما في عدل يا رب؟

ليش فليتان أعمى وأنا بشوف؟ ليش علان يمرض وغيره لأ؟ وليش وليش وليش؟


بهاد المعنى شو رأيكن: الله عادل أم غير عادل؟



مع كل الحب

أولاً مشكورة على وصفك للموقع
بالنسبة للموضوع أنا برفض التفكير إذا كان هدفنا الكفر ....صح؟؟ ..... :x
معك حق القناعة أهم شي بس إذا الشخص ما عندو قناعة فليس لله علاقة فمثلاً أنا مقتنع بوجود الله و عدالته
و بالنسبة للأسئلة المطروحة هي شغل حياة و تدبير عقل الإنسان و ظروف الحياة و ليس لله علاقة سوى منقول أنو مشيئته هيك
إنما من خرب الحياة هو الإنسان و شغلة ليش هدا غني و لهدا فقير و هديك أحلى مني و أنا أحلى منا فهي شغلة قناعة
فالقناعة كنز لا يفنى و على الإنسان أن يكون مقتنع بنفسه كما خلقه ربه
.............. :angel:

ليش فلان أغنى مني؟ (مع أني بتعب و بشقى وهو لأ) وسأل: وينك يا الله؟

ليش علتانة أحلى مني؟ شو ما في عدل يا رب؟

ليش فليتان أعمى وأنا بشوف؟ ليش علان يمرض وغيره لأ؟ وليش وليش وليش؟

الحقيقة كل هال الأشياء هي من صنع الإنسان ،والله لما خلق الإنسان خلقه حر و عطاه حق الاختيار بكل شي بيعملو بالحياة ، فظروف حياتنا هي من صنع ايدينا و ايدين بقية الناس . وما بجوز نلوم الله عليها.

هل الله عادل؟؟

جوابي على هاد السؤال هو أنو ما بهم اذا الله عادل . لأنو الله عندو شي أهم من العدل: :D *المحبة* :D

ولك يا عيني عليك يا استاذ .. يعني ما بك اتغير هال العادي وتحكي الجملي عني ..

في أية بالانجيل بتقول.. ولقد خلقنا على صورة الله ومثاله ..
هاي الاي تحديدا استوقفتني شي كام سني .. يعني انتا شوف الله شقد عادل ما خلقنا مساوين الواحد للاخر .. لا خلقنا على صورته هو نفسه وعلى مثاله .. وشابهنا بنفسه .. اتخيل .. شو بدك اكتر من هيك عدل .. بس هادا عدل رباني(بمفوهم الله ) عشان متل ما علمونا احنا وصغار انو العدل عند الله يختلف مفهومو عن العدل عند البشر ..
فلما يسوع اعطى الي اجى الساعة سبعة المسا بما يعادل الي اجى الساعة ستة الصبح اي هوي كان عادل بمفهومو الشخصي ..

بس شلنا من هال الحكي هلق ومنرجع لصلب الموضوع يعني انو والله مو معقول .. يعني انا بتعب وبشقى كل النهار و هداك ورتان مدري كام مليون دولار من جدو .. يعني بالله وين العدل :P

تحياتيييييييييي :D

يا سيدي أنا من رأي الاستاذ....

الله محبّة: "الله محبّة": هذا تحديده، هذه طبيعته. ومن ادّعى تحديده على غير وجه فقد حدد إلهاً كاذباً ونحت صنماً.
لا شكّ في أن الله قادر وحكيم وقدّوس وعادل، وما إلى ذلك.. هكذا شعرَ به قلب الإنسان. إنما "قادر وحكيم وقدّوس" هي صفات لا أسماء ويجب ألاّ نجعل منها أسماء. لا يجب أن نقول: "الله قوّة وحكمة وعدل". إذ لا يمكن أن نحدد الله بالقوّة والحكمة والقداسة والعدل. فلا الفلاسفة فهموا هذا، ولا حلمَ به قلب الإنسان بعد.

إنّ الحبّ ليس صفة من صفات الله، لكن صفات الله كلّها هي صفات الحب.. فلننتقد تصوّراتنا إذاً، ولنرفض بشجاعة الإله الكلّي القدرة، ولنندهش "بالأب الكلّي القدرة" الذي يوحيه الكتاب، ونعترف به في قانون إيماننا.

( محبة إلهي هي الأولى، إنّها مجّانيّة، لا دافع لها ولا شرط. لا باعث لها سوى رغبة الله في أن يحبّني. )

يسلم هالتم يا أستاذ (الله محبة) و انا معك بالحكي :) :)

مرحبا
بصراحة موضوع جميل جدا و معقد جدا. و صحيح انو هادا موقع أخوية مسيحية... بس انا ما بوافق على نقاش الموضوع من ناحية دينية مسيحية... لسبب بسيط انو الله خلق كل العالم و ما كل العالم بتؤمن بكلام الانجيل و ما كل العالم وصلتها كلمة الانجيل و في كتير ناس رح تموت بدون ما تعرف عن كلمة الانجيل و حب الله للإنسان المعلن بالانجيل

انا بفضل لو اردنا نقاش الموضوع بطريقة موضوعية... انو نبتعد شوي عن الكلام المذكور بالانجيل... لانو حتى لو كان فيه جملة من الانجيل بتقلك بكل وضوح... ان الله عادل... هذا لا يعني انها ذات مصداقية للجميع

الانجيل هو البشارة صح؟ يعني حسب فهمي... الكلام في الانجيل يجب ان يكون معزي و يدخل الفرح في قلوب الناس.. و من هنا كان من الطبيعي ان يؤمن المسيحي ان الله عادل و الله يحب جميع البشر.... فتخيلوا كم سيكون عزاء الرجل المريض الفقير الذي يقرأ كلام الانجيل الذي يقول له انه مخلوق على صورة الله و ان الله يحبه كثيرا... الخ. لكن لو نأتي الى الحقيقية.. و بعيدا عن كلام الانجيل... فالفقير مازال عاريا مريضا و الغني موفورا سعيدا (السعادة شيء نسبي نعم... لكن حتى لو لم تكتمل سعادة الغني... او على الاقل الاكثر حظا ان لم نقل غني المال... فهو اكثر سعادة في هذه الحياة من الشخص الاقل حظا)
فماذا غير الانجيل من الواقع المر اذا؟
و ماذا لو آمن جميع الناس.. و قضوا حياتهم قنوعين (بدون تفكير خوفا من الكفر و بدون الكثير من الجهد ايمانا بعدل الله و ان هذا هو مراده).. و من ثم ماتوا و تحولوا الى تراب و انتهى الامر و طلع مافي لا الله و لا جنة؟

ثم اسمحوا لي ان اقول انه ليس جميع المصائب من عمل الانسان... فتغير نشاط البقع الشمسية (و لا اعرف ان كان هذا اسمها بالعربية) .. يغير من طقس الارض .. فيبدأ عصور جليد أو ينهي عصور قحط.. و هذا كله يؤثر على الانسان كثيرا و على ثروة الانسان... فهل الانسان هو المسؤول عن فقره في هذه الحالة؟

و ما ذنب الطفل الغير شرعي, الذي تكون في لحظة شهوة غير محللة دينيا, و الذي سيظل يعاني من التفرقة طيلة حياته (نعم هذا عمل الانسان الذي خلقه الله و خلق فيه الحاجة البيولوجية للتكاثر... لكن هذه المعاملات مستقاة من بعض الكتب السماوية... التي يؤمن بها الملايين من البشر)

انا أؤمن بالله... حاليا... و تنتابني فترات من الايمان و فترات من الكفر... و صرت الاحظ ان فترات الكفر تلك... تظهر كلما حاول احدهم ان يثبت ان الله يطغى على العالم البشري...فأجد اوتوماتيكيا انحاز الى الطرف الملحد... فهذا شيء اجد من الصعوبة تقبله من خلال معطيات هذا العالم من حولي... و لكن عندما يبقى الدين كرجاء في نهاية افضل من تحلل في التراب.. و كهوية اعتز بها.. و بعض المعزيات الاخرى... فليس لدي مشكلة.. و لكن الان لا ارى اي عدل في هذا العالم...

سلامات

مرحبا
أنا رأي: بما أن الله محبة فهو عادل و لكن قناعتنا و إيماننا بالله هي التي تجعلنا عادلين تجاه الله و أنفسنا و الآخرين

بصراحة موضوع جميل جدا و معقد جدا

معك حق

بس انا ما بوافق على نقاش الموضوع من ناحية دينية مسيحية...

هون انا بدي قلك أنو مناقشتو من ناحية عمومية بتفقد السؤال كامل محتواه ، لأنو مين هو الله يلي بدي ناقش عدلو او عدم عدلو: هل هو اله خالق أم اله محاسب أم اله غيرو او غيراتو، ما عاد في تحديد، لأنو تعريف الانسان لله بيتلخص بكيفية ايمانو فيه.
أي وقتا رح يتحول السؤال مباشرة للتالي:
هل هناك عدل في هذا العالم
و هون اذا كان الجواب لا، وقتا لازم نتساءل :شو كان دورنا بجعلو أكتر أو أقل عدل، اي كل واحد فينا شو عمل ليحسن حياة الناس التعبانة و لينشر العدل بين الناس
بس يمكن أهون أنو ننسب الظلم و الغبن بهالعالم ل(الله) و كفى الله المؤمنين شر القتال :wink:
ما بعرف
أنا هاد رأيي
و الله اعلم :D

هون انا بدي قلك أنو مناقشتو من ناحية عمومية بتفقد السؤال كامل محتواه ،


تمام يا أستاذ
أنا عم اتكلم عن الله أنا هيك بعرف الله
ما فيك تقلي ما تحكي عن الله متل ما بتعرفوا ......
لكن عن شو بحكي عن ايو الله ... فهمتو قصدي

منرجع لموضوعنا
يا سيدي من ناحية انو

و ما ذنب الطفل الغير شرعي,


يعني أكيد مالله اللي خلا أهلو يزنو فيه ولا الله هوي اللي خلا المجتمع يطلع لهيك ظاهرة بعين عدم الرضى

الواضح انو انت عم تحمل الله شغلات مالو دخل فيها (الله ليس ساحرا)
نحنا منعرف انو المجتمعات اتطورت ورح تستمر بالتطور و ما فينا نقول انو الله هوي سبب التطور او التخلف
الله حطلنا عقل وهاي اكبر نعمة عطاها
يا نحنا منستخدمها يا منكبها بالزبالة
الله ما عطانا عقل لحتى نجي نحنا نقول هالمشكلي الحق على الله فيها
أو هالمشكلة الحق ع الشيطان فيها او الحق على جاري او او او ....
الله عطانا عقل لحتى نفكر بحل للمشكل ...
وهيك منكتشف انو كتير عادل لانو عطى عقل لكل البشر
هلق بتجي الظروف ما مواتية ... هادا شي تاني .. مالو علاقة فيه الله
لانو اذا بتفكر مظبوط بتلاحظ انو هالظروف هي إما من صنع البشر اللي هني حواليك او من صنع الطبيعة وهاي الطبيعة الانسان قدر يغلبها
بقى الله عادل ومكتر عدل ,,,, وووووو محبييييييييييي

والله يا كيكو .. انا كتبت الكلام الي انا كنت حقولو بالظبط .. بس انا كسلت اقولو .. انتا انشط مني .. الله ربك يا بيبي :P

اول شي شكرا للاستاذ و انا بوافق على المنطق تبعك. يعني انت برأيك لازم يتناقش الموضوع بطريقة مسيحية بحتة؟


الاخ كيكو

انا في البداية ما بوافق انو الانسان تغلب على الطبيعة. كيف تغلبنا عل طبيعة؟ اذا عم ندمر الطبيعة من كون تغلبنا عليها؟ و شو عن الاعاصير و الفيضانات و الجفاف يلي عم تدمر البشرية كل سنة و كل فصل؟ هاي مو طبيعة و نحنا مو قدرانين نسيطر عليها؟ على كل حال هادا مانو موضوعنا هلق

شباب من الناحية المسيحية... منؤمن انو الله عادل و ما بظن في كتير نقاش حول الموضوع

بس انت أخ كيكو ذكرت كتير شغلات.. ما في غير المسيحيين بيامنوا فيها... انو الانسان مخير و ليس مسير.. الاسلام مثلا بيآمنوا بإنو الانسان مسير لدرجة أكبر مما انه مخير. و في ديانات بتآمن بالتقمص... و هي بهل حالة بتعطيك الجواب عن لماذا بعض الناس تولد فقيرة أو مشوهة... بينما المسيحية ما بتعطيك الجواب... انت قلت الله ما دخلو... طيب ماهوي خلقني يا عمي؟ ما هوي مسؤول عني.... انا معقول اعمل شغلة.. و ارميها بالشارع قلها روحي دبري حالك بدون ما اعطيها الادوات اللازمة... بس بعطي غيرها ادوات ممتازة و حظ اوفر... أين العدل في ذلك؟

يعني ما فيك تقول... انو اذا خلقت كامل و صحيح و بأسرة غنية.. معناتا لازم اشكر الله... بس اذا خلقت مشوه و معاق و فقير... ما بحقلي العن حظي و اتذمر! أنا كإنسان احتاج جواب شافي يخبرني ليس انا خلقت هيك و ليش غيري خلق هيك ما دام إلنا نفس الخالق

و مشان موضوع الطفل غير الشرعي... الناس عم تستمد معظم افعالها و اخلاقها من الدين... يعني من عند الله.... و ما فينا ننكر انو ضمير الانسان الفطري متأثر كتير بالدين.. حتى لو كان نفسه غير مؤمن بالدين... فالمجتمع المتدين حوله سيأثر عليه

سلام

هلق نقطة نقطة عشان ما انتوه .. منشان موضوع التخيير والتسيير .. احنا مناقش هون بعقلانية منطقية بغد النظر عن الدين .. قد يكون بصيغة او اخر بتاثير تبريبتنا صار افكارنا مبلورة بطريقة متوازية مع الدين .. لكن النقاش عقلاني هلق ..

التسيير والتخيير .. طب رح افرض معك انو الكطبيعة الحوالينا رهيبة مثالية ما في اعاصير مكوارث ولا في شي .. وكل الناس معون مصاري قد بعض وما حدا طماع بمصريات غيرو ولا حدا زعلان على القدر الي معو كلون مبسوطين .. طب وين الحياة بالموضوع ووين دورنا احنا وويمن الجهد والتفكير الي بيميزني عن غيري .. كلو متل بعضو ..

لو هال المجوعة نفسها انتا خلقتهم وعطيت للكل قد بعض بالظبط وكلشي مثالي متل ما قلت سابقا .. طب واحد طمع وبدو يتميز عن غيرو راح اشتغل اكتر وواحد صار كسول قام صار افقر .. هادا من عمل الانسان او الله .. من الانسان طبعا يعني لو ابي مفلس وانا خلقت مفلس هاذا زنب الله !!

طيب انتا عندك ولد .. انتا مفلس بس ربيت ولدك بطريقة منيحة صار انسان منتج و معو فلوس كتير .. انتا شو الي عملتو !!
انتا اعديت هال الشخص ليكون منتج لو ابنك كان فاشل مش مشكلتك انتا انتا اعديتو .. ولو ابنك كان ناجح او بمعنى اخر استغل التربية الي انتا ربيتو ياها وصار ناجح حتتبصط ..
وبالنسبة لله نفس الموضوع بعتقد .. الله عطانا عقول انفكر فيها .. لو احنا اسأنا استخدامها مشكلتنا مش مشكلة الله .. مش هوي الي مو عادل هدول نحني ..
ولو ابي رباني بطريقة سيئة مش مشكلة الله ولا انو الله غير عادل .. ابي هوي الي غير عادل .. ه

ولو انتا ربيت ابنك كتير منيح وصار ناجح وهوي ربا ابنو بطريقة ما منيحة وصار حفيدك فاشل هل هذه مشكلتك او انك غير عادل .. لا ابنك هوي الغير عادل ....


انا ما بدي انفي شي اسمو القدر ولا شي اسمو الحظ ولا شي اسمو هيك من غير سبب ,, بس ما رح حط السبب على الله .. ولا حقول لو انا غامرت بصفقة وفشلت بسبب حظى او اي ظروف انو الله غير عادل معي .. قد يكون في لا عدل بالموضوع بس ليش السبب الله بهال الا عدل هذا ..
انا شخصيا بامن انو في اقدار او بمعنى اصح في اشيا خارجة عن ارادتنا قد تتحكم بمصائر او احداث
وأومن بان كل شخص بهذي الحياة سيأخذ ما يستحق تماما بمنتهى العدل
الغني هو بيستحق فلوس ومصري .. حتى لو كان نصاب حتى لو كان حرامي بس هوي بيستحق انو يكون معو مصاري
والسعيد و حالتو معدومة او متوسطة .. هوي بيستحق السعادة فحسب ما بيستحق فلوس هوي بيستحق السعادة
والتعيس هوي بيستحق هال اشي وهيك ..

بك اتقلي اني عم ناقض حالي كيف هوي بيستحق التعاسي .. طب مهما فعل حيفضل تعيس عشان هذا ما يستحقه
نعم انا ارى بالظبط هيك .. وارى هذا منتهى العدل ..

اخيرا قد يكون بطريقة او باخرى في حالة لا عدل .. قد اختلف معك او اتفق عن المسول عن حالة هال الا عدل الله .. الانسان .. او اخر
لكن لا اتفق مع احد انو لو مافي عدل فالسبب هو الله

انا برايي انو الله عادل لانو خلق كل الناس وما بيصير نحنا نقول انو ما نو عادل
لانو هوي الله وهوي الي خلق كلشي وبيعرف كلشي ولانو هوي كامل ونحنا مان كاملين
بس حكيكون مفهوم ومعكون حق فيه بس ما بعرف كيف بس الله عادل هيك انا بحس

رح أحكيلكن قصة صغيرة............. وهي من محض الخيال
لكنني لا أستغرب حدوثها..........

يقال أنه في يوم القيامة الأخير، وقف الرسول بولس والرسول بطرس على باب الجنة لإدخال أو عدم إدخال الناس إلى الجنة.....
إن كان اسمك موجود ضمن الائحة، تدخل الجنة. وإلا نحن نعتذر منك... ليس لك مكاناً مع الله.......
وبينما هما على هذه الحالة وإذ بهم يرون من بعيد شخصاً قد خرب سور الجنة وهو يقوم بإدخال الناس للجنة سراً..
غضب الرسولان وأخذوا بعض الملائكة لمعاقبة هذا الشخص........
اقتربوا من الشخص.....






اقتربوا أكثر












وأكثر










ياللمفاجأة








أنه المسيح، يسوع المسيح..............












ما رأيكم

ت ح ف ة .... ت ح ف ة
اتأثرت :cry:

انو الانسان مخير و ليس مسير.. الاسلام مثلا بيآمنوا بإنو الانسان مسير لدرجة أكبر مما انه مخير. و في ديانات بتآمن بالتقمص... و هي بهل حالة بتعطيك الجواب عن لماذا بعض الناس تولد فقيرة أو مشوهة... بينما المسيحية ما بتعطيك الجواب... انت قلت الله ما دخلو... طيب ماهوي خلقني يا عمي؟ ما هوي مسؤول عني.... انا معقول اعمل شغلة..

السلام عليكم

من قال لك ان الانسان في الاسلام مسير
الانسان مسير في الامور التي لا علاقة له بها فانا لم اختار والدي ووالدتي ولم اختر جنسي ذكر ام انثى
ولكن اختار اشياء كثيرة
قال تعالى "" إنا هديناه السبيل إما شاكرا وإما كفورا ""

وقال رسول الله صلى الله عليه وسلم" فالحلال بين والحرام بين وبينهما أمور مشتبهات ومن اتق الشبهات فقد استبرأ لدينه وعرضه " ""
فيجب على المؤمن تحري الحلال وترك الحرام ، وحري به أن يتورع عما اختلف فيه من المشتبهات .
:D

الإنسان الشيء المخيَّر فيه ما نسميه الأعمال الاختيارية التي يعملها الإنسان بإرادته يفكر فيها ويختارها وينفذها، الله سبحانه وتعالى أعطى الإنسان عقلاً به يفكر وإرادة بها يرجّح وقدرة بها ينفّذ فهذه الأعمال مثل الإنسان يصلي أو يزكي أو يكتب أو يقرأ أو يعمل خلاف ذلك يشتم يسب يشرب الخمر يعني الأعمال الصالحات والأعمال السيئات هذه هي الأعمال الاختيارية التي يحاسَب عليها الإنسان لأنها صادرة عن علم منه وعن إرادة واختيار و قدرة.

:)

هلا سامر ..
الموضوع الاساسي كان عن هل الله عادل !!
برأيك بموضوع المال مثلا .. لما شخص فقير وشخص غني .. من الموكد ان ليس له خيار في هذا كما ليس له خيار في ان يولد شب او بنت ..
بهال النقطة تحديدة .. كان النقاش اين عدل الله في هذا !!
كيف منشوف عدل الله في هذه النقطة ..
:D

that is the answer
This is beautiful.......
"A man went to a barbershop to have his hair cut and his beard trimmed. As the barber began to work, they began to have a good conversation. They talked about so many things and various subjects. When they eventually touched on the subject of God, the barber said:

"I don't believe that God exists."

"Why do you say that?" asked the customer.

"Well, you just have to go out in the street to realize that God doesn't exist. Tell me, if God exists, would there be so many sick people? Would there be abandoned children? If God existed, there would be neither suffering nor pain I can't imagine a loving a God who would allow all of these things."

The customer thought for a moment, but didn't respond because he didn't want to start an argument. The barber finished his job and the customer left the shop. Just after he left the barbershop, he saw a man in the street with long, stringy, dirty hair and an untrimmed beard. He looked dirty and unkempt.

The customer turned back and entered the barber shop again and he said to the barber: "You know what? Barbers do not exist."

"How can you say that?" asked the surprised barber."I am here, and I am a barber. And I just worked on you!"

"No!" the customer exclaimed. "Barbers don't exist because if they did, there would be no people with dirty long hair and untrimmed beards, like that man outside."

"Ah, but barbers DO exist! What happens, is, people do not come to me."

"Exactly!"- affirmed the customer. "That's the point! God, too, DOES exist! What happens, is, people don't go to Him and do not look for Him. That's why there's so much pain and suffering in the world."

والله حلوي .. وكلام منطقي ونضيف !!
شكرا اب عضل :D

مشكلة هل ان الله عادل ام لا فهذا يرجع فى الدرجة الاولة الى الشخص ذاتة
المشكلة هي ان الانسان حر فى ما يفكر
وليس هناك فرق بين من يتعرف فى العدالة السماوية كما يسمونها ام فى العدالة الدنيوية
المهم
هو ان يكون هناك عدل للجميع ولا فرق بين الغني والفقير سواء عند الله او عند الحكومة
والمشكلة كلها بدها واسطة ومن معة واسطة ممكن ان يروح للجنة فى الصاروخ :arrowl:

بالنسبة لكلمة انو هل الله عادل او لاء ما بعرف بظن انو حرام هالسؤال انو يجي ببالنا لانو الله ارحم الراحمين واعدل الناس
بالنسبة لكلامكن عن انو بالنسبة لانو الانسان مسير او مخير الانسان متل ما حكى سامر خالد انو مسير باشيا واشيا مخير فيها وهاي حكمة ربنا وهاي الشغله بتدل عانو في رب كريم وعادل وبيستحق العباده والشكر
يعني مثلا متل ما انتو كنتو عم تحكو عن موضوع المصاري
هل لو انو الانسان كان هالشي بايدو لكان ما ضل فقير بالدنيا صح ولا انا غلطان
طيب بهالحاله ما راح يكون في توازن بالمجتمع
متل ما انو الله سبحانه خلق الرجل وخلق مقابل لئلو المرا
كمان الله خلق الفقير وخلق مقابل لئلو الغني
يعني هلاء لو كل الناس اغنيا مين الي راح يشتغل عند مين
ووين راح يكون التوازن بالمجتمع ؟
ما بتحسو انو هيك فيها سر
ايواا عارف كلكن عم تفكرو بهالشي
فهاي كلو حكمه من عند ربنا
وعالعموم ما في شي عند ربنا بيضيع
وسدئني انو اهم شي بالحياة لحتى تكون سعيده انو الانسان يرضى ويقنع بالشي الي الله كتبلو ياه
لانو واتها راح تتحقلو كل مقوامات السعاده
ومتل ما كان يئول جدي
الي بيطلع على فوء كتير بتنكسر رئبتو
فالواحد دايما يطلع على الي متلو او الي تحتو ويشكر الله على نعمتو
تحياتي الكن جميع
:D

بسيطة ما تزعلو
هناك مشكلة مين الى خلق البشعين فى هل الكون
حسب علمي ان مشكلة ان تصدق ان الله عادل عليك اتباع الاتي
روح على البيت وشوف مرتك شو طابخة لك
وبعدين بتعرف الحقيقة

يعني لو كان في الله بالاساس فأكيد رح يكون عادل , لانو لو كان في شي الله مانوا عادل فمشكلة كبيرة , يعني بتصير الحياة متل الاساطير تبع هيركيليس .
طبعا الله بمقاييس كل دين بالنسة لللي بيتبعوا ها الدين عادل , بس بالنسبة لدين تاني فمانوا عادل
و بيتأكد ها الشي بوضوح بمفهوم الخلاص بكل دين يعني شلون بدوا يكون الحساب
فاليهود بيقولوا انو اذا ما كنت يهودي فراحت عليك , و اكيد هاد مانوا عدل
الايمان المسيحي كمان بيقصر الخلاص على المسيحين, بس ما قالها بالكلمة , يعني بيقولوا انو الخلاص يتم بس بقبول المسيح مخلص شخصي لحياتك و ايمان الانسان انو المسيح اجا منشانو و فداه على الصليب و بيفسروا كل حالة تانية بالف تفسير , يعني شو ذنب البني ادم اذا خلق بالصين سنة 40 ميلادية مثلا وللا الناس اللي قبل المسيح و اللا اللي ما عندن انترنت و ما بيفوتوا على موقع الاخوية :) يعني بالنهاية الخلاص قاصر علىالايمان بالمسيح ( انا هو الطريق و الحق و الحياة , من امن بي و ان ما فسيحيا ) ( انا هو باب لخراف ) يعني المسيح اساس الخلاص و هاد مانو عدل بالنسبة لبقي الناس , و حتى الافعال المنيحة اللي على اساس انو بتنجي فبالمسيحية لا تعني شيئ بدون الايمان بالمسيح , و اذا ما حلت الروح القدس فاعمالك على الزبالة لو كنت ملاك غير مسيحي , يعني كمان ما في عدل

بالاسلام تطورت النظرة شوي , يمكن لانو ما كان بيقدر انو يكفر كا البشر اللي قبلوا ( اهل الكتاب ) فالمسلمين و اهل الكتاب و الشباب الطيبة يعني البشر المنيحة بتفوت على الجنة , يعني بتخلص , بس كمان قصر الخلاص على الايمان بالله
من وجهة نظري فالاسلام كان متطور من ها الناحية لانو ما ربط بين الخلاص و النبي محمد متل المسيحية اللي ربطت بين الخلاص و الايمان بالمسيح فالقران بياكد انو الناس اللي بتامن بالله و اعمالها منيحة فهاي على الجني دايركت
(( ......... ومن امن بالله واليوم الاخر و عمل صالحا فلا خوف عليهم ولا هم يحزنون ) )

هلاء الشغلة اللي بتفوت بالحيط انو وين العدل اذا انشرط عليك تامن بحدا ولا تامن بمبدا لحتى تعيش , اي هاي الله ما قالها , يعني اذا كنت منيح و بس راحت عليك

الحياة بدون مفهوم الله اريح بكتير , بتحل كتير عقد
يعني انو هيك كل البشر متساوين تحت القانون , و حاجة ,


الهي هو ضميري


و اسلموا

ديموزي رب الارباب :D

يا عمي الى بدة يروح على الجنة يروح شو ناطر
والى بدة عادلة فوقانية يجب عليه ان يتزوج وحدة حلوة كتير حتي تكون هي مفتاح الجنة

يعني لو كان في الله بالاساس فأكيد رح يكون عادل , لانو لو كان في شي الله مانوا عادل فمشكلة كبيرة , يعني بتصير الحياة متل الاساطير تبع هيركيليس .


مو الفكرة ان هل الله عادل او غير عادل على قد ما هيي هل انت حاسس انو الله عادل .. مو موضوع رأي منطقي
وانما احساس الشخص بظل الظروف المحيطة ..

بالنسبة لتساولك الاخير حول ارتباط بشخص لحتى اتفوت الجنة ..
انا قناعتي وايماني انو كل شخص بالنهاية بيتحاسب على حسب ايمانو ..
-- بغد النظر عن ايمانو بمين --
يعني الي البوزي الي بيأمن انو لما يموت حيتحد بالاالهة فعلا لو كان انسان صالح حيحصل معو هيك لانو هوي بيأمن بهيك
والمسيحي الي بيأمن انو حيكون بقرب الله فعلا حيكون بقرب الله
والمسلم الي موعود بجنته كما في القرأن كمان حيلاقي جنة كما في القرأن ..

والي بيأمن انو حيعود لاسعد لحظات حياته ويقف الدهر فيها .. فعلا حيتحقق له هال الشي

كل بحسب ايمانه .. وهذا منتهى العدل

كلامك حلو كتير يا حكيم ....... بس إذا كان حكينا أنو ( بنحس الله عادل) ولا لاء فمعناها أنو نحنا أصلا معتبرين الله موجود ....
و بالتالي حكمنا على عدلوا او عدم عدلوا بيعتمد على الافكار الموجودة بالمجتمع عن الله , و بما انو في اكتر من فكرة و اكتر من مبدئ بالموضوع , فعدل الله رح يكون بحسب كيف رح يعامل هالانسان بالنهاية و هل ها التعامل عادل بالنسبة لجميع الناس و بيحكم بينن بالتساوي على اسس موضوعية ولا لاء.
و بتصور انو حسب الاديان التلاتة بمجتمعنا الله مانو عادل لانو ما بيعامل الناس بالتساوي .

يعني الخلاصة لو انا حاسس انو في الله و ها الله هو يا تبع اليهودية او تبع المسيحية او تبع الاسلام , فرايي انو الله مو عادل لانو ما بيحاسب كل الناس متل بعضا ..

على كل فكرتك عن الثواب بها الحالة عظيمة ( عادلة) بس بدها الله مختلف عن اللي بنعرفن
يمكن هاد الهك انت بس
او يمكن هاد ضميرك




و اسلموا


ديموزي :D

هلا ديموزي ..
حبيب .. انا هذا الجواب (كل مين بحسب ايمانه)
هال الفكرة هيك بانسبة لي دواء لكثير من القضايا الشائكة او اي ما بوصل فيها لنتيجة محددة .. منطقية
بعتمد هال القناعة منشان ما اسيب الموضوع ملبكني مثلا او هيك

بس انو نقطة انو هاي تحتاج الله غير الموجود
هاي كمان بقدر قلك (كل بحسب ايمانه)
انا ايماني انو الله الصح والي بحبو انا والي بتمنى يكون هيك طبعو

وبعتقد انو هوي الموجود كمان
هذا ايماني انا

يعني ما بعرف عم انفكر .. :angel:

من هو الذي ابدع
شيء اسمة الله
وكيف الله بيكون عادل واليهود محتكرينة على حسابهم
وكل واحد فيكم بيتبع اهلة واسرتة
ولا يوجد واحد فيكم يقدر ان يشز على اهلة ومجتمعة
يعني متل ما ابي اكون انا وليس عندكم فعلآ حرية القرار
ومحكومين فى المجتمع الذي انتم به
لذلك كل الكلام ليس له معني اذا لم يكن الشخص مقتنع فى الحق الذي هو يؤمن به

?مرحبا هالموضوع كتير حلو بس مابعرف اذا كنا لازم نناقش بعض في لانو يمكن او اكيد عم نناقش بشي
اكبر بكتير من انو عقلنا يستوعبو لانو عم نناقش ب موضوع بيتعلق ب الله
بس حبيت اعطي رأيي الشخصي يلي يمكن يكون غلط او صح
انا برأيي انو الله عادل كتير كنت كل ما أسأل الأسئلة يلي طرحتوون يجاوبوني الله عندو حكمة بهالحياة و ما حدا بيعرفا
حتى بطلت اسأللون :)
لا حسيت انو انا عم اتطلع بنظرة سطحية لانو مثلا يمكن يكون في 2 واحد بشع و واحد حلو (هيدا أسخف مثال) بس
مثلا اهل هيدا الحلو ماتو اي انا بفضل كون ما بنشاف على انو افقد حدا بحبو
بقا انا برأيي انو غلط كتير نقارن كل وا حدفينا ببعض لانو ما حدا بيعرف كل تاني شو عم بيعيش لازم نقارن حالنا ب حالنا قصدي انا
يمكن ماعندي شي معين بس بالمقابل عندي كتير اشياء مامنتبهتلا اهم بكتير
بقا الله عادل مع كل واحد فينا بس نحنا ننتبه ونشوف اما بالنسبة ل شو رح يصير بعد حياتنا هون ف ما رح اتفلسف من عندي لانو يلي بيصير

هونيك ما حدا بيعرفوا ولا حدا شايفو ولا سمعان في (نسيت شو كانت هيديك الأية )
وطلب ما بقا تفتحو مواضيع حلوة لانو عندي بكالوريا وحاسة بدي ارسسسسسسسسسسسسسسسسسسسسسسب :cry:

مرحبا هالموضوع كتير حلو بس مابعرف اذا كنا لازم نناقش بعض في لانو يمكن او اكيد عم نناقش بشي
اكبر بكتير من انو عقلنا يستوعبو لانو عم نناقش ب موضوع بيتعلق ب الله


هوي بيجوز (يعني ممكن اي وممكن لا) يكون اكبر من عقولنا .. بس ما بيعني هال الشي انو ما اناقشو .. لما يكون في شي اكبر من عقولنا مناقشو بعقولنا ومنشوف لوين حتوصل عقولنا ..


انا برأيي انو الله عادل كتير كنت كل ما أسأل الأسئلة يلي طرحتوون يجاوبوني الله عندو حكمة بهالحياة و ما حدا بيعرفا
حتى بطلت اسأللون

:P :P :P عمك بيسكتوكي لانو ما بيعرفو يجاوبو ..
ها اسالوني انا انا بعرف هال النوع من الاجابات كتيييييييير منيح وحافظها عن ظهر قلب
من قبيل
هاي اشياء اكبر من عقلنا البشري
وهاي شغلات لحكمة غير معلومة هلق وبعدين بتبين
و سنشكر الله كثيرا على الصلوات غير المستجابة اكثر من الصلوات المستجابة
وقيسو

ما في شي اسمو هيك .. ولانو هيك .. و لساتك ظغير وعقلك ما بيقدر يستوعب هال الاشياء الخارقة
ان بفهم شي واحد انو عندي عقل .. لا الي منحني العقل بيرضي اني ما شغلو ولا انا كشخص عندي عقل برضي ما شغلو

هونيك ما حدا بيعرفوا ولا حدا شايفو ولا سمعان في (نسيت شو كانت هيديك الأية )
اي هاي بدها كيكو .. هوي خبير الايات هون (اخ قديم معتق واكل عليه الدهر بالاخويات)


وطلب ما بقا تفتحو مواضيع حلوة لانو عندي بكالوريا وحاسة بدي ارسسسسسسسسسسسسسسسسسسسسسسب

سيبك من البكلوريا هلق البكلوريا ما بتهرب .. :P
خليكي بالموقع ركزي هون -- قال بكلوريا قال :x

سيبك من البكلوريا هلق البكلوريا ما بتهرب ..
خليكي بالموقع ركزي هون -- قال بكلوريا قال


هاد الحكي الصح ...وهاد الحكي اللي بيجي منو بالفحص ...درر يا حكيم

أكيد رح يكون اخر كل نقاش بهيك مواضيع انو كل واحد رح يقول ( خيو انا هيك و انت هيك و الكل مرتاح هيك فخلينا هيك ) :o
طيب .......
حلو انو سمعنا صوتكن ......
و خليكي انسة نانا عم تتسألي لانو اذا الانسان بطل يتسائل بيبطل يفكر و اذا بطل يفكر ببطل انسان 8)
يمكن الاية ( ما لم تره عين و لم تسمع به اذن )
موفقة يا حجة بالباكالوريا :angel:


طيب انا شو بدي اعمل بشوال ها المواد اللي ما عم يخلص ؟؟؟؟؟ يا ريت ارجع بكالوريا :( :cry: :cry: :cry:


و اسلموا



ديموزي :D

والله حلوي .. وكلام منطقي ونضيف !!
شكرا اب عضل :D
اخي حسام أنا كان كمبيوتري معطل منشان هيك أنا أسف لأنو ما رديت عليك وكلامك هاده شهادة بعتز فيها :D

جواب الاستاذ جواب كله صحة

لك يا جماعة بعدكم عما تحكو فى هل الموضوع والاميركان احتلو السما والان عما يحتلو الارض ونحن عما ندور على شيء اسمة الله عادل موجود مش موجود طيب اريد منكم برهان واحد فعلى هل فعلآ ان الله موجود ام كلة حكي فى حكي وليس هناك شيء يصبت ذلك
ما بدي حدا يتهمني انه انا شيوعي لحيث العرب عندهم شيء حلو كتير التهمة جاهزة بس بدها تمشي شوي
انا وبكل حياتي لم اشهاد ولم اري اي معجزة من الله او من القدسين او المشايخ وكل واحد فيهم بيحكي على حسب ما بيفهم
\انا اتحدي اي واحد فيكم ان يثبت ان الله عادل واذا كان عادل ليش الشعوب المسكينة هي الى بتروح فى المغليطة
يا عمي نحن ما عندنا غير تلك الاحاديث الفاضية
نحن العرب نقتل بعضآ البعض على السماء والارض عما تروح من ايدينا ولم نزل منفكر فى الجنة وجهنم وانا حتي الان لم اعرف واحد مات وعاد وخبرنا اذا كان فعلآ يوجد جنة وجنهم
بقي الواحد اذا بدة يموت يبقي يرسلنا من هناك شي رسالة ويشرح لنا فى التفاصيل كيف بيتحاسب
وشكرا الى الشباب والصباية وارجوكم تعقلو وشوفو الدنيا والعالم ماشي كيف فى جو العلومة والمصاري
والى معة مصري انا اكيد رح يروح على ىالجنة لحيث ممكن يشتري كم متر هناك مع جنينة مرتبة
وليد

سورة الزلزلة :
( فمن يعمل مثقال ذرة خير يره * ومن يعمل مثقال ذرة شر يره ) ... برأيي ما في أعدل من هيك
ولا تعليق ....

سورة الزلزلة :
( فمن يعمل مثقال ذرة خير يره * ومن يعمل مثقال ذرة شر يره ) ... برأيي ما في أعدل من هيك
ولا تعليق ....

فعلا عدل.. بس وين عم نشوف هل شيء بالعالم؟؟

تحياتي

مرحبا
كيفكن يا اخوة
رأي الكبير في الموضوع انو اللي بيحضر القداس الالهي يوم الأحد وبيسمع منيح يدقق بجملة:
صالح الاعتراف للرب والاشادة باسمك أيها العلي
لأن الرب الهنا عادل وليس فيه ظلم
كتير حلوة مش هيك
:D :D :D :D :D

شو رأيكن نعيد الحوار بهالموضوع ؟؟؟؟

اي يا ريت هالموضوع مهم كتير ...... وبحب اتكلم عنو

يا زلمة

ما سدقنا خلصنا من طارق بشغلة النكوشة طلعت أن لك صياد


عم أقرء ومستغرب أنو نص العالم ما بعرفها

والله وماالله

أصلا عطونا دليل علمي واحد على وجود الله بعدين خلونا نتناقش :jakoush: :jakoush:



أخي يستر عرضك شغلة النكوشة بلاها



وهي ألك مني وردة :D :D

حبيبي يا أبو النسيم
بس المنبر بارد هالكم يوم ... وكنت عم دور بالأرشيف القديم ...شفت هالموضوع ...عجبني ..
قلت لنشوف الشباب شو رأيهم ..


اي يا ريت هالموضوع مهم كتير ...... وبحب اتكلم عنو

يالله ...بلش

خيو أبو النسيم ........... في موضوع مهم كتير لازم تعرفوا ........ أنوالعقل البشري صعب يتصور قدرة الله تعالى أو ماهية الله
رح قربلك اياها .......
أكيد أي شخص ألو أن الله تعالى وجد منذ الأزل بألك صعب شوي ....... كلشي ألو بداية وكلشي ألو نهاية ... يعني تخيل شي مالو بدايه .. صعبة مو ..... أو موضوع الخلود ... كمان صعب العقل البشري يتصوره .......

طيب اذا انت شخص عاقل تخيل هالموضوع معي

رح نأول أن الله تعالى وجد من قديم الأزل ... رح حاول أثبتلك هالشي ..........................
على فرض أنت ألتلي عمرو 10000000 سنه .. حتى تشعر بشيئ حقيقي أو بداية ................. يعني - 10000000.
أنا بألك لسه في عندك أرقام ... ناقص 10000000000000000000000000000000000000000000 يعني هيك عمرو
بيجي خي الأسمر بألك .. فين راحين يا شباب ........ عمرو ناقص 10000000000000000000000000000000000000000000000000 0000000000000000000
لاحظ موضوع الأرقام بتقدر توصل للناقص لا نهاية ........ يعني هو عباره عن رقم .. يعني بتقدر توصل للأزليه ......

واعتمد نفس مبدأ الأرقام الموجبه .... بتلاحظ ف شي اسمو خلود ..... يعني اللانهايه

هذا تفسيرمبدأي ..وللموضوع بقيه

الزميل الغزيز SAA بما أنك فتحت موضوع وجود الله

أنا حابب أطرح حقيقة علمية تاريخية عن فكرة نشوء الله

لقد ظهر الله مع تطور الإنسان واستقرار الإنسان الأول في المرحلة التي تلت عصر الصيد وسكن الكهوف والتشرد عند الإنسان الأول أو إنسان ما قبل التاريخ وهناك أبحاث ودراسات عدية في هذا المجال لا يمكن حصرها وجميع هذا الدراسات تصب في خانة أنا الله ظهر مع أستقرر الإنسان الأول أو إنسان مقبل التاريخ وإنتقله من مرحلة الصيد إلى مرحلة تكوين مجموعات ومرحلة الزراعة وتدجين الحيوان
لقد نشاء عند الإنسان فراغ روحي أو خوف من المجهول وخوف من الظواهر الخارقة التي لا يجد لها تفسير وبدء يملئ هذا الفراغ الروحي بقصص وأساطير عن أشخاص خارقون لهم قوه عجيبة أو حيوانات لها قوة مدمرة تسكن في أماكن مجهولة تستطيع القضاء على كل شيء أذا غضبت وتستطيع أن تعمر كل شيء أذا رضيت

تطورت هذا الفكرة عند الإنسان ، ومع توسع الإنسان في مجتمعاته ومع بدئ ظهور الحضارة تطوره فكرة هذا العوالم الخارقة إلى فكرة الآلهة التي يجب عدم إزعاجها ورضاها وأصبح كل شيء يعجز عن تفسيره عقل الإنسان ينسب إلى الله أو الرب الذي كان مسئول عن تلك الظاهرة مثال البرق والرعد كان البابليون يعتقدون أنه صوت بكاء الرب حزنا عليهم الفينيقيون كانوا يعتقدون أن الرعد هو صوت غضب الإله وعليم تقديم القرابين لكي لا يغضب أكثر وهكذا تطورت فكر الآلهة وت وتعددها واختصاصاتها
مثلا الرب أمون عند الفراعنة كان أله الظلام الذي يجب أن يعبد لكي يسمح لأخناتون أله النور أن يضئ العالم في اليوم التالي
وكانت الآله في تلك الأيام تتصارع وتتناحر في ما بينها وكان كل أله له عداوة مع أله أخر ومن هذا القصص الممتعة كثير أنها ثقافة شعوب وحضارات أمم مازلت أثارها التي تدل على عضمتها قائمة إلى يومنا هذا

مختصر الكلام

لقد جاءت الديانة اليهودية و رقت الرب و وحدت الإلهة في أله واحد له قدرات جميع الآله التي سبقته يمكن وتطورت هذا الفكرة و نشئت منها ديانات عديدة وأنبياء كثر من إبراهيم إلى لوط إلى نوح

على فكر قصة طوفان نوح مأخوذة من الحضارة السومرية ملكن تم أعادة صياغتها بثوب أسلامي والقصة موجودة في المكتبات يمنك أن تقراها أسمها (ملحمة غلغامش ) عندما تقراها ترى أن محمد سرق القصة وصاغها بشكل شعري أقوى و أنزلها في القران

وقصص كثيرة مأخوذة من حضارات قبل الإسلام بألف السنين ولكن تم أعادة صياغتها بما توافق العقل العربي البدوي المتحجر في تلك المرحلة

حتى كلمة الله أكبر كانت مستخدمة من قبل العرب قبل الإسلام

أكبر أله منطقة في الجزيرة العربية ( لا يستحضرني أسمها الآن)


الخلاصة يا سيد SAA ولكل الزملاء المؤمنين


أن الله من صنع البشر


ولا يجوز نسب الظواهر الغير طبيعية إلى الله لأن الله غير موجود العلم سوف يثبت هذا الكلام عاجلا أم أجلا

وكما قال الفيلسوف والمفكر والكاتب الذي سبق عصره (فريدريك نيتشه)


لقد مات الله وعلى الأمم التي لم تقتله المسارعة في قتله :gem: :gem: :gem: