شاركونا الرأي:شو رأيكن بالعيشة برا وبالذات بالسعودية [الأرشيـــــف]

شام1989

20/06/2006, 06:24

بسم الله الرحمن الرحيم
أنا جاي ع بالي كتير أعرف رأيكن بالعيشة بالسعودية حلوة للي جربوها؟؟
واللي ما جربوها ياترى عم يفكّروا يروحوا ولا لأ ؟؟وشلون بتتوقعوها؟؟
كتير ناس بتحبّ تجي وبتقولك يلا منسترزق ومنغير شكل
وفي ناس بيعملو قوميات وبقولولك متل ما عملت خالتي(إي والله لو بطوبولي إياها من بابها لمحرابها ما بجي)
أما نحنا (المعترين) أول ما جينا قعدنا نبكي ونعيط قال ع فراق سوريا
وآخر شي جينا عم نقول الله يعوض منقوم منتفاجئ بناس لا بتحلل ولا بتحرّم واختصاصن النصب والاحتيال
من يوم ما جينا ودمعتنا ما نشفت
هنن المشكلة عندن إنو لازم يكون في كفيل يكفل الواحد وهدول الكفلا أغلبن (إلا ما رحم ربي) عاطلين
وعاد بيستفردو بالواحد ليشلحوا حقه ,, والمعتر بكون جاي عم يبني أحلام وحاطط الفطير والخمير ليجي
وكل اللي قبلنا شلحون مصارين وطالعون بليلة ما فيا ضو قمر وقالو هالمعترين للكفلا صحاب المستوصف(سع...)بجدة قالولن مندعي عليكن قاموا قالولن ما فارئة ادعوا لتشبعو
وكفايتكن لتعرفو عن أصحاب (سع...)
إنن هنن 3أشخاص صاحب المستوصف وموكله ومديره
صاحبه ابنو فات عالسجن بتهمة تزوير عملة
ومديره بنتو إجاها انهيار عصبي من ورا العلاقات العاطلة
وموكله ولادو الاتنين بأميركا احترقت أموالن وجوازاتن وسرحو بالشوارع

وكل ما حكيت لحدا هوني بينتعلي قصة مأساوية بتبكي صارت معو بقول يا محلا اللي صرلنا
لدرجة وحدة قالتلي في أصعب من إني شوف دمعة أبي ع خدو وما إقدر إتحرك ..لو عشت 100سنة ما بسامحن
بس الواحد يحكي ضميرو يعني أنا عم بحكي عالكفلا ما ع العالم .. العالم حبابين وشفنا كتير عالم أكابر حرام والله الواحد يقول الحق
بس ما بيقدروا يساعدوك لإنو لو علقت مع الكفيل ما بطالعك غير ربك ثم الأمير

هو نحنا عنا ظلم بس ما في كفيل يعني ما في نظام استعباد للعباد
بتعرفوا إنو هون أعلى شي الأميركان والبريطانيي ,بعدين السعوديين بعدين العرب,بعدين الهنود والباكستان المعترين عالآخر(قلو شو حاجك للمر قلو الأمرّ)
ونحنا بقولولنا (العرب) أجانب ليش ما بعرف
بس برجع بقول الحكي عالكفلا وما كلن بس كتييييييييير منن
أما العالم فمتل عنا في الصالح وفي الطالح
بس بصراحة نصيحتي اللي ناوي يجي ما بنصحو لك خليكن مستورين بسوريا
لك شبها سوريا ؟؟ وشبها حووووووووووومص
والله طلعنا من سوريا عم نسبها ونقول تضرب هالبلد
وهلأ عم نوقف ع الأطلال كل يوم ونقول يا محلا أيامك يا سوريا
بس شو آخرة الظلم؟؟
بس إنتو شو رأيكن شاركوني؟؟
ولا تؤاخذونا لو تهجمنا سامحونا ..ولو في سعوديين يسامحوني ترى ما بقصد بس لو شفتو حالنا لعذرتونا وحكيت برجع بقول عالكفلا
أنا ما بكره السعوديين ومن فترة كان في احتمال كبير إتزوج شب سعودي بس ما صار نصيب
وآآآسفة ع الإطالة بس إنتو شو رأيكن؟؟؟

Nirvana

20/06/2006, 09:04

أنا رأيي إنو السعودية ما بينعاش فيها، نحنا بالدول العربية التانية ويادوب قادرين نعيش، عكل حال ألف نعمة للعايش بسوريا، لو بجرب يعيش بدول عربية تانية بطق.

ابومزيد

20/06/2006, 10:45

في كتير شغلات حلوة بالسعودية مو موجودة عنا وفي كتير شغلات سيئة عنا مو مو جودة بالسعودية
بس شو بدكم بالحكي السعودية ما تنعاش الا الواحد يروح يحج ويرجع

محمد طباش

20/06/2006, 10:55

هاد الحكي المزبوط أنا اجاني واحد سعودي على حلب وعرض علي العمل في السعودية وانا رفضةلنفس أولجزء من الأسباب يلي كاتبتيا:D

صياد الطيور

20/06/2006, 11:11

أنا مقيم بالسعودية من 4 سنين :pos:

وكل يوم كان ابشع من الي قبله ...

اذا بدك اي استفسار او سؤال انا جاهز :D

adler

20/06/2006, 11:45

انا ياللي بعرفو عم السعودين انو الهم ريحة و دايما بيلعبوا باصابيع رجليهم

ابومزيد

20/06/2006, 12:02

انا ياللي بعرفو عم السعودين انو الهم ريحة و دايما بيلعبوا باصابيع رجليهم

ههههههههههههههههه كيييف؟!
شو هالملاحظة الغريبة

handsome

20/06/2006, 13:45

انا ياللي بعرفو عم السعودين انو الهم ريحة و دايما بيلعبوا باصابيع رجليهم

ياجماعة الله وكيلكون اهدا اكتر رد عجبني ...
انو هوي ما غلط الشغلة ... اخواتنا السعودين ما عندون شغلي يتسلو يا غير اصابيع رجليون ... بس ما بعرف اذا بتكون ريحتون طالعة ولا لاء . بس اكيد ما بيشهي السلام بعد جولة لعب ...
وانا كنت بالسعودية مرات كتير واخر مرة كانت من شي تلت تشهر ...ومتل ما كاتب او كاتبي شام انو فيا كتير شغلات بشعة وفي اوقات الواحد بيحس انو حرام يضيع عمرو هنيك .. بس كمان ما حدي بيغترب عن بلدو وبيكون مبسوط ...
هلق وجهة نظري الشخصية بالسعودية انو الواحد اذا راح علية زيارة شغل شهر مكسيموم بتكون مقبولي .. بغض النظر عن بعض الاوقات الي بتخلي الواحد يكره سما من وراها .. بس انو الواحد بيشوف ابنية ما في بمحل تاني حدي بيدفع هيك مصاري بس مشان شكل معين بيناي والمغزة منا ما كتير كبير .. والاسواق كمان شغلة كتير حلوي كبيري ومرتبة ونظيفي .. لانو كل العالم بيهتمو فيا بعتبارا الشغلي الوحيدي الي العالم بيقدرو يساووا ... والطرقات تبعيتا كمانت كانت شغلة كبيري وما في احلى منا وانو اتوستراد جوات المدينة واضرب واطرح .. بس كلو هلق صار بلا طعمي اذا الواحد بدو يتحرك بالرياض مثلا اد ما كان المشوار صغير بدو يحسب حساب اكتر من ساعة على الطريق هي اذا ما كان في زحمة ... بس انو المشكلي هدول الشغلات بحياتا ما بتخلي الواحد يحبة لا بالعكس بتخلي يكرهة بزيادي ... وكل الشباب الجداد الي عما يروحو لهنيك بيلعنو الساعة الي خلتون يفكرو بالموضوع .. بس انو متل ما قلتي شو جبرك عالمر غير الامر ...
فيعني بالنهاي انو الواحد بحياتو ما بيلاقي بلد متل سورية .. لا باهلة ولا بطبيعتة ولا بمشاكلة .. نحن متعودين هيك نعيش .. وما فينا بولا محل تاني بالعالم نقدر نعيش هيك عيشة ... بس وقت بيكون مافي غير مجال فالواحد ما بيطلع بقيدو يعمل شي ..
وعفكرة باخوية صاير كتير مشاكل من ورة هالموضوع وصاير من وراها خناقات الا اول وما الا اخر ...
واذا انت كنت بالسعودية هلق فبس بدي قلك الله يصبرك ويصبر كل الي متلك عالعيشي هنيك ...

Nirvana

20/06/2006, 13:52

أنا مو من سوريا بس زرت سوريا وعاشرت أهلها ، وبالرغم من كل السيئات والحسنات، أنا رأي انو انا بحبها كتير كتير والها مكان خاص كتير بقلبي، وفي شي مليون سبب يخليني أحب سوريا اكتر واكتر عندون بقية الدول.
هالحكي تعقيب على حكي handsome

شام1989

20/06/2006, 15:23

واذا انت كنت بالسعودية هلق فبس بدي قلك الله يصبرك ويصبر كل الي متلك عالعيشي هنيك ...[/quote]

أنا بالسعودية حاليا ومسعودين كتير متل ما أسلفت بس السنة أخدت البكلوريا وانشالله راجعة ع حوووووووومص الله يخليها بس ما باركتولي ع النجاح جبت 99.55%
عم يقولولي انشالله بمفاضلة المغتربين بيطلعلي طب

بس ياريت تقنعولي بابا يرجع .هو دائما بقول هاي أزفت بلد بس صعب نتركها ..قال لإنو بسوريا معم نسترزق ادعولنا الله يختار الخير ويصبرنا لا ننجلط

ابن الرياض

20/06/2006, 15:26

احب كل اللي شاركوا بارائهم عن السعوديه والسعوديين

الموضوع ياشام 1989
ان السعودية مثلها مثل اي بلد في العالم فيها الاشياء الحلوة وفيها الاشياء الايجابية وفيها العكس تماما
السعوديين فيهم طيبين جدا وفيهم الوقح جدا
يعني مثلها مثل الشام
اذا كنتي تقصدي التقدم العمراني فالسعودية افضل من سوريا
اذا كنتي تقصدي المستوى الامني فالسعودية وسوريا متساويتين
اذا كنتي تقصدي الطبيعة والجو المتميز فسوريا افضل من السعودية
اذا كنتي تقصدي المستوى المعيشي فالسعودية افضل من سوريا
اذا كنتي تقصدي مستوى دخل الفرد فالسعودية افضل من سوريا
اذا كنتي تقصدي الغلاء فالسعودية اكثر غلاء من سوريا

هناك العديد من المقارنات المختلفة وكذلك المتشابهة بين السعودية وسوريا
اذا كنتي ترغبين العمل في السعودية واجاك عقد عمل فهذا يعتمد على حسب المزايا اللي فيها
اذا كنتي ترغبين الزواج من سعودي فيجب السؤال عنه قبل الارتباط من حيث اخلاقة وسلوكة وكذلك وظيفتة دون اعتماد على اي كلام او سلوك يبديه الخاطب وقد يظهر عكس ذلك
اما مسألة الكفلاء فالاصابع ليست واحدة فمنهم الطيب ومنهم الردئ
ونظام الكفالة ليس عبوديا كما ذكر انما هو لضبط انظمة العمل لا اكثر ولا اقل واي خلاف بين العامل وصاحب العمل فهناك وزارة (وزارة العمل) هي المعنية في الفصل في مثل هذه الخلافات واي شرط بين العامل وصاحب العمل يخضع للانظمة والقوانين لكي لايكون هناك ضرر للطرفين
اما من قال هناك حركة في اصابع القدم او رائحة
فالقرين بالمقارن يقتدي ويجب عليك ان يكون نظرك الى الاعلى دائماولا تنظر الى الاقدام لان من ينظر الى الاقدام لا يتقدم خطوة واحدة
وهناك سوريين عايشين في السعودية منذ اكثر من ثلاثين سنة ولم يرو اي شي مما ذكره الاخوان .
ولكل شي ثمن والغربة قاسية بكل ماتحملة الكلمة من معنى
فعلى سبيل المثال عند سفري للسياحة في اي بلد ومنها سوريا لا استطيع ان ابقى خارج بلدي لاكثر من شهرين

واذا اردتي اي استفسار او مساعدة فانا على استعداد لك ولكافة اعضاء اخوية
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ودمتم بخير
محبكم
ابن الرياض:hart:

ابومزيد

20/06/2006, 15:38

ابن الرياض

20/06/2006, 16:02

الغريب بالسعودية انو الاجانب اللي بنعتبرهم احنا اجانب بيتعاملوا احسن معاملة
على عكس العرب الاشقاء (على اساس)
بقى كيف هي زبطت معك يا ابن الرياض
السعوديين قبل النفط كانو يتغربوا متل السوريين هللأ واسأل الكبار عندك اذا مو مصدق
بس ما كانت العرب تعاملهم هيك
السعودية بتمثل اطهر ارض عند المسلمين بقى ليش ما بيعاقب المسئ فيها لتكون على مستوى الطهارة
ليش الامريكية بتطلع متل ما بدها والمطوع ما بيقدر يفتح تمو معها
والعربيات بيلحقهم وبيقول انستري يا حرمة وهيي مو مبين منها شي
_____________________________
من قال لك بان السعوديين لم يتغربوا وحتى الان هناك سعوديين متغربين
وعلى اي اساس ذكرت بان الاجانب يتعاملوا احسن من العرب
يا اخي انت من يفرض على الناس احترامه وليست جنسيتك
بارادتك تجعل جميع الناس يحترمونك ويحبونك من خلال تعاملك معهم (كن سفيراً لنفسك)
ومن قال لك بان المسئ لا يعاقب في السعودية او اي بلد في العالم
من يخالف الانظمة والقوانين من الطبيعي ان يعاقب
وعلى اي اساس يتم التفرقة مع الامريكية او غيرها من العرب
فعند ذهابك الى اي بلد في العالم تسير وفق انظمة وقوانين هذا البلد وليس قوانين بلدك
المجتمع السعودي له خصوصية تختلف عن باقي الدول واذا سبق لك العيش في السعودية فانت تعرف ذلك جيدا

دمت بخير
محبك
ابن الرياض:hart:

ابومزيد

20/06/2006, 16:07

انا ما رحت على السعودية وبصراحة بتمنى الله يرزقني روحتها حاجا لبيت الله الحرام
بس يا صديقي ما في بالسعودية قوانين تحد من صلاحيات الكفيل
يعني الشغلة معلقة بضمير الكفيل وهاد لتلاقي كفيل ما يستغللك

ابن الرياض

20/06/2006, 16:17

حبيبي ابومزيد
ان شاء الله تزور السعودية حاجا ومعتمرا وسائحا
وحتكون ضيف عندي ثلاثة ايام ومابعدها اكون انا الضيف وانت رب المنزل
وصدقني ابو مزيد
احنا العرب مشكلتنا شعب لا يقرأ
لدينا انظمة واضحة وضوح الشمس
ولكن من يحاول ان يعرفها
لدي اصدقاء من سوريا من حمص واللاذقية ودرعا وغيرها من المناطق السورية وعندما اسالهم عن انظمة العمل في السعودية يقولون لا نعرف رغم انهم مقيمين اقل واحد صار له سبع سنوات ؟!

محبك ابن الرياض

ابومزيد

20/06/2006, 16:26

دامت المحبة بالله اخي ابن الرياض
ربي انشر المحبة بين العرب وخللي قلوبهم على بعض وليخرج الكفار من جزيرة العرب
ادامها الله طاهرة
وليصلح الله حال المسلمين
عاد كل خلافاتنا دنيوية حقيرة ما تستاهل الواحد يقاتل اخوه مشانها
عسى ربي يصفي القلوب وتعمر البلاد

ابن الرياض

20/06/2006, 16:56

وليخرج الكفار من جزيرة العرب
ادامها الله طاهرة

ابو مزيد حبيبي ماذا تقصد بهذه العبارة هداك الله
الكفار في الجزيرة العربية وجدو للحاجة فلهم الفضل بعد الله في العديد من الاشياء

ابومزيد

20/06/2006, 17:17

ابو مزيد حبيبي ماذا تقصد بهذه العبارة هداك الله
الكفار في الجزيرة العربية وجدو للحاجة فلهم الفضل بعد الله في العديد من الاشياء
انا ما عم احكي على تبعون الحاجة هدول جايين يشتغلوا الله يعطيهم العافية

المجاهد في سبيل الله

20/06/2006, 17:18

farbella

20/06/2006, 17:44

يقال على السعودية(اسفة على هالكلمة) انجس ناس باطهر ارض
انا ما زرت السعودية بس هيك بيقولو

ابن الرياض

20/06/2006, 18:02

oula
اختي الكريمة
النجاسة نجدها في مخالفات البشر وانحراف سلوكهم وتجمعهم في اماكن الرذيلة في كل بلدان العالم كالملاه الليلية وبيوت الدعارة اعزكم الله.
ومشكلة الكثيرين الحكم على الناس واصدار احكام فيهم دون معاشرتهم او معرفتهم او حتى الاختلاط بهم بعدها نصبح ببغائيين نردد مالا نعي ولا نعرف
وندخل في دوامة بيقولو او يقولون
طهر السعودية اختي الكريمة مستمد من وجود الحرمين الشريفين في مكة المكرمة والمدينة المنورة وهذا ماجعل للسعودية مكانة في غير قلوب اهلها
اما نجاسة ( بعض )شعبها فاحيانا تكون انسان طيبا تتعامل مع الناس وفق تربيتك الصالحة ولكن يؤخذ حقك او تستغفل ومن الاصلح لك التعامل بالمثل ولكل فعل ردة فعل

دمتم بخير
اخوك
ابن الرياض
لمعرفة المزيد عن الغالية السعودية////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

شام1989

20/06/2006, 18:09

لو كنت بعرف إنو رح تصير هيك خناقات ما كنت نزلت الموضوع ..لك شبكن نحن أخوة منضل أد ماكان,,والله خايفة تصير فتنة وكون أنا سببها وندمت كتير ع الموضوع لأنو خايفة تعلق حرب
لو سمحتو اللي بدو يضيف رأيو يضيفه باحترام ودون تهجم عالآخر
وبقول كلنا بلأخير رغم عيوبنا أخوة
مشكورين ع الردود والله يجزيكن الخير بس هدولي حالكن الشغلة ما مستاهلة
بعدين لسا ما حدا باركلي بالنجاح:gem:

ابن الرياض

20/06/2006, 18:23

اختي الكريمة شام1989
اختلاف الرأي لايفسد للود قضية
ومهما نختلف في ارائنا فنحن اخوان وحبايب
وصدقيني مافيه اي فتنة ولكن هناك ضبابية على عيون بعض الاعضاء ويجب اعادة تصحيحها
فقط لا اكثر

ابن الرياض

20/06/2006, 18:24

اسف اختي الكريمة شام 1989
الف مليون مبروك النجاح وعقبال الشهادات العليا باذن الله
وتستاهلي اكبر واكثر

HOSAM4U

20/06/2006, 18:30

والله الموضوع كتير فكرتو حلوة بس مابيتناقش بهيك طريقة
اخت علا هيك حكي موبمحلو لانو كل بلد فيها المنيح وفيها العاطل
والله يعينك اخ ابن الرياض لانو ماحدا نازل معك
وعلى فكرة انا بدي اطلع عالسعودية من اكتر من شهرين وماكنت امن كفيل اوثق فيه لانو مظبوط متل ماحكيتي اخت شام مابدي اطلع ووجع راسي بدي اطلع مرتاح
وبعدين اللي جابرنا على التغرب هي عدم اهتمام الدولة بالكفاءات اللي عنا وعدم استثمار الموارد البشرية بشكل جيد
وعلى فكرة عنا بسورية أشخاص بيرفعوا البلد لفوق اذا تامنت لهم الفرصة بس المشكلة انو أي واحد متغرب بدو يجي عالبلد مابيقعد شهر زمان بدو يقوم بمشاريع الا بلعن الساعة اللي رجع فيها عالبلد
الله يعينا أحسن شي

ابن الرياض

20/06/2006, 18:58

mosam4u
الله يحييك بين اخوانك واحبابك في السعودية
ولكن ماهي مواصفات الكفيل الذي تثق به
وفيما يخص عدم اهتمام سوريا بالكفاءات فهذا شأن اغلب الدول العربية

وللمعلومية تخيل ان سوريا قوتها اقتصاديا كالسعودية مثلا
ومواردها المادية عالية كالسعودية
والبلد في حاجة الى ايدي عاملة في كافة المجالات والتخصصات .
هل تعتقد بان سوريا ستفتح الباب امام الجميع دون اي شروط
فالكفيل هو صاحب العمل
اي عندما تفتح مشروع تجاري على سبيل المثال تتقدم للحصول على عمالة لانك لن تلاقي سعودي يعمل في مطعم او حلاق او بائع او فني او اي مهنة من المهن
يتقدم بطلب استقدام هذه العمالة من الخارج بحسب حاجتة ويكون هو المسؤول امام الدولة عن هذه العمالة ومايترتب عليها
اي يكون مسؤلا عن اقامتهم وعن علاجهم وسكنهم وكذلك عمهلم وتسليمهم الرواتب دون تأخير وحتى تذاكر سفرهم خلال اجازاتهم
وحتى قبل سفرهم يمضي معهم مخالصة نهائية بان ليس لديهم اي حقوق او واجبات وكذلك استلامهم جميع حقوقهم كاملة دون نقصان
ومن يختلف مع كفيلة او يشكو كفيلة من اي نقص فهناك وزارة العمل يتقدم لها ويحصل على كافة حقوقة اذا ثبت ذلك
يعني لا عبودية ولا كلام فاضي

Kakabouda

20/06/2006, 19:32

يعني عدم المؤاخذة الواحد بقول لبنان سورية بنجلادش ماشي الحال بس السعودية :shock: :shock:

والله ضيّعت ( حسافا ) كل شبابي بالسعودية ...
مشان السعوديين و السعوديات ما يتدايقوا على كلمة حسافا ( يعني بالمشرمحي ضيعان هالعمر اللي راح )
رح احكيلكم موقف واحد من 1000 صار معي ..
أنا كنت عم بشتغل بالشيراتون ( الدمام) Reservation Supervisor مسؤول قسم الحجوزات المهم بيوم من الايام متصّل واحد من مكتب أمير بالمنطقة الشرقية ... و بما أنو أنا كنت مستلم الشخصيات المهمة حولولي المكالمة ( هلأ بنظام الفنادق لازم الواحد يعرّف عن حالو ... ) فأنا قلت أنو جورج عم بيحكي كيف بقدر ساعدك ..
قام نط البهيم ( أي البهيم و صدقاً ماني ظالمو ) قال بكل تفاهة ( أستغفر الله العظيم مافي أحمد مسلم احكي معو ...) بقا هاد ييد من الطبقة الراقية بالمجتمع كونو أمير أضرب و اطرح ... بقا شو رايكم ؟؟؟؟؟
ظالم حدا أنا ....
و لسا كتييييييييييييير قصص على هالشاكلة ...
بقا بتقولولي سعودية :x

صياد الطيور

20/06/2006, 23:35

اهلين بكاكا بودا ....

شام مبروك النجاح .... وروحي كفي دراستك بسوريا أفضلك

YaSeR

21/06/2006, 00:06

اذا كنتي تقصدي المستوى الامني فالسعودية وسوريا متساويتين

هلا كلون صح ما عدا هي
شو جاب لجاب
فرق كبير الامن بين سوريا والسعوديه
لعلمك سوريا هي تالت أامن بلد بالعالم

تحياتي الك

handsome

21/06/2006, 00:33

هلا كلون صح ما عدا هي
شو جاب لجاب
فرق كبير الامن بين سوريا والسعوديه
لعلمك سوريا هي تالت أامن بلد بالعالم

تحياتي الك
اخ ياسر بدي اعتزر منك .. بس انو شلون طلعت سوريا تالت اامن بلد بالعالم ... وشو هني اامن بلدين ...
او ممكن عالقليلة بس توضح شوي عن اي امن انتي عما تحكي ..

YaSeR

21/06/2006, 00:47

handsome

21/06/2006, 01:04

هلا اامن بلد هو سنغافوره
تاني اامن بلد نسيان شو هو :?
والتالت سوريا
هلا انا سمعان هالشغله كتير وحتى عالتلفزيون طلعت
بس المصدر ما بعرفو بس هلا بحاول اتاكد منو

عم احكي عالامن بشكل عام
انو الواحد مثلا يطلع باخر الليل ويشوف شرطه ومخابرات عم تفتل
والعالم عادي كانو الدنيه الضهر
هلق انا اسا ما رحت عسنغلفورة .. مشان هيك مافيني احكي عنا شي ..
بس انو بسوريا انتي ايمت اخر مرة ماشي بالليل بش حارة شعبية .. وقت كنت انا مر الصبح وانا رايح عالمدرسة من حارات باب سباع الديقة يوقف قلبي قبل ما وصل عالمدرسة او ابل ما وصل عالحارة مرة تاني ...
او اذا انتي عما تحكي عن الحارات الراقي شوي ... فمعك حق انو في شويت امن والواحد ما بيحس بشي غريب ... بس انو كمان لهلق اسا عما يصير سرقات وعلقات ومن هالحكي ...
ومشان الشرطة والمخابرات فهي قصة تاني ... اذا انتي عما تحكي عن شرطة المرور الي بتكون بالليل فمعك حق انو ما بيساو شي بنوب . متلون متل قلتون ... انا اخواتنا جماعت المخابرات .. فما بعتقد انون كتير حبابين وعاقلين وخاصة اذا كان مزاجون معكر .. وانا في عندي تجربة بهالموضوع من لما كنت بالسابع .. وما كنت وقتا حتى اعرف شو شكل سيارة المخابرات .. فهي شغلة المخابرات ما كتير بأيدك فيا ...
ما بعرف انا ليش هيك حاسس .. بس انو ما كتير القصة راكبي معي مظبوط على بعضا .. بس انو بدك ما تأخذني ...

محمد طباش

21/06/2006, 01:54

[quote=صياد الطيور]أنا مقيم بالسعودية من 4 سنين :pos:

وكل يوم كان ابشع من الي قبله ...

اذا بدك اي استفسار او سؤال انا جاهز :سوريا: مشكور كتير أنا ماعاد بدي سافر عندي مشروع وبدي حلي ينجح

SABE

21/06/2006, 13:09

هلأ و أنا عمبقرا الموضوع صار عندي كتير كتير ردود وما بعتقد رح إقدر حط الردود كلها هون ..

أول أول شغلة و أنا عمبقرا الموضوع الأصلي تبع شام1989 إستغربت إنو كانت رح تتجوز و سنت الماضي كمان .. يعني كان بيكون عمرك 15 سنة !!

و مشان قصة الرجلين (( هاي نكتة بس ما بدي حدا ينزعج لأنو أنا حمصي و ما بنزعج لما حدا بيحكي نكت عن الحماصنة ))
قال واحد سعودي قطعولو قصابيع رجليه, بعد كام يوم مات من ديقة خلاقو :yahoo:
كمان شغلة .. مشان الأمن بسوريا للأخ هاندسوم .. إنو سوريا عنجد الأمن فيها قليل لحتى تلاقي هيك بالعالم .. و هالشغلات اللي حكيت عنها أنا بقلك إنو غلط, شو يعني حواير قديمة و ما قديمة .. الأمن موجود و الكل شايف هالشي و ما حدا بينكر هالواقع هاد

هلأ ماني ناوي رد أكتر .. عندي درس:pos:

butterfly

21/06/2006, 13:16

هلأ ماني ناوي رد أكتر .. عندي درس:pos:

أي يطلع عقبري غندرة الشاطر الدريس :yahoo: :lol:

ِAbu Alzooz

21/06/2006, 17:34

العيشة بالزريبة احسن

ابن الرياض

21/06/2006, 20:19

المشكة انو اكثر الردود من ناس يقولو ا عن انفسهم انهم عاشوا بالسعودية ولسنوات طويلة
اذا ما انت مرتاح نفسيا طوال هالسنوات ايش اللي جابرك تعيش فيها وتروح ايام عمرك هدر
واذا كان صبرك علشان الفلوس او المصاري فما اعتقد ان فيه رجل يقدر يعمل حاجة تمس كرامتة او تسئ له علشان الفلوس .
واذا كان هناك تصرفات او سلوك سيئ من بعض السعوديين فما هوصحيح ان كل السعوديين مثل بعض .
وللاخ اللي يقول ان سوريا الله يحفظها ويحفظ اهلها وامنها ثالث بلد على مستوى العالم من حيث الامن فهذي صعبة شوي تنبلع مع احترامي لكل سوريا
هناك كوالمبور لندن بكين طوكيو باريس مدريد جنيف واشنطن
اما على المستوى العربي هناك دبي القاهرة بيروت مسقط
جميعها افضل من سوريا رغم ان سوريا ليست سيئة ولكن هناك افضل
وعلى فكرة هالكلام اقوله من واقع تجربة وزيارة سابقة
وتظل سوريا من افضل البلدان العربية التي زرتها لاكثر من خمسة عشر مرة ولم اندم على زيارتها ولو لمرة واحدة ، فهي من افضل خمس دول عربية سياحيا
اختلاف الرأي لايفسد للود قضية

شام1989

22/06/2006, 00:35

أول أول شغلة و أنا عمبقرا الموضوع الأصلي تبع شام1989 إستغربت إنو كانت رح تتجوز و سنت الماضي كمان .. يعني كان بيكون عمرك 15 سنة !!

لك يا أخي نحنا أهل باب السباع شغلتنا شغلة..واللي من باب السباع يفهموك شلون يعني..لك كل أهاليي من هدول اللي ع القديم وفي منن ما بيشلحوا الشروال
على فكرة ماعمري 15 صح أسلوبي طفولي ولسا بلعب دندوشة وفتحي ياوردة بس صار عمري خزيت العين قريب ال 18

أما بالنسبة لإنو سوريا تالت أأمن بلد فهاد ممكن كتير شو شوفتو من البلاد ..أنا أمي بسوريا دكتورة كان يجيها بنص الليل عملية إسعاف تروح لحالها ما تخاف غير من ربها شنو بابا ما يفيق معها

أما إنو ليش لما منجي يا أخي ابن الرياض ما منترك لما ما بيعجبنا لإنو الواحد ما بيقدر يطلع وكفيله مارح يفتحلو الباب ..شوف نحنا قبلنا نطلع خروج نهائي وبدفع مبالغ بالألفات وما مشي الحال
وكتير منن بقولو بركي بيتحسن الوضع اسمو إنو جينا وجينا

أما بالنسبة للتحلاي فحفلتي انشالله بحمص ومعزومين بس الحرملك تفضلو:clap:
بس الحرملك هااا

COSTA

22/06/2006, 01:00

يا شباب والله خوفتوني :shock:

انا جايتني فيزا عمل عالسعودية

اي ما راح اطلع وعلى قولت الشاعر

بلادي وان جارت علي عزيزة:gem:

واهلي وان ضنو علي كرام :gem:

ليالي

22/06/2006, 08:57

يقال على السعودية(اسفة على هالكلمة) انجس ناس باطهر ارض
انا ما زرت السعودية بس هيك بيقولو.....................................� �تير فرحانين بهالكلمة وكان ماعندكم غيرها؟؟

واللي بيقول..........العيشة بالزريبة احسن...............خيو عيش مين ماسكك ومترجيك حتى تيجي لعندنا

واللي بيقول.........وكل يوم كان ابشع من الي قبله ...وشو اللي جبرك تتحمل افرقنا وخلي غيرك يستفيد........

واللي بيقول

الغريب بالسعودية انو الاجانب اللي بنعتبرهم احنا اجانب بيتعاملوا احسن معاملة
على عكس العرب الاشقاء (على اساس)
بقى كيف هي زبطت معك يا ابن الرياض
السعوديين قبل النفط كانو يتغربوا متل السوريين هللأ واسأل الكبار عندك اذا مو مصدق
بس ما كانت العرب تعاملهم هيك
السعودية بتمثل اطهر ارض عند المسلمين بقى ليش ما بيعاقب المسئ فيها لتكون على مستوى الطهارة
ليش الامريكية بتطلع متل ما بدها والمطوع ما بيقدر يفتح تمو معها
والعربيات بيلحقهم وبيقول انستري يا حرمة وهيي مو مبين منها شي

المشكلة انكم تقولو الكلام هذا لانكم انحطيتو في هالموقف..........

ماراح أدخل معكم في تفاصيل ودفاعات مالها طعم...........بس كل بلد فيه الصح وفيه الغلط.........وكل انسان مستحيل يعيش الا في وطنه
والغريب انو ماحد جبركم تجو للسعودية.........في الف بلد أغنى منها..........واذا كنتو كارهين البلد بس لأنو اسلامي فهذا شئ آخر

وبعدين احنا زرنا سوريا اكتر من مرة...........وتعرضنا للاذلال من بعض الناس ومع كذا ماعملنا زحمتكم اللي انتو عاملينها وأخذناها من قاصرها وبطلنا نزور سوريا.........

شئ واحد كنت أتمنى تذكروه...............على الأقل وأكيد انتو عارفينه

بس هذا مش بس كلامكم اصلا هالمنتديات مانوجدت الا لتفرغو الحقد اللي داخلكم اتجاه بعضكم.......سواء كانت سوريا او السعوديو او مصر والكل

بس فعلا مستواكم الثقافي عالي...................والكلام صفة المتكلم

ابومزيد

22/06/2006, 12:01

يعني اذا بنت بتصيري تتنطوطي علينا ونحكي متل ما بدك
بعدين موقف شو انا لا رحت ولا جيت على السعودية وعم نحكي متل ما سمعنا من البشر اللي راحوا
معك حق تجكي على اللي غلطو بالسعودبة بكلام جارح بس في ناس حكت وما غلطت ومنهون انا
بقى ليش التعصب

غربة الروح

22/06/2006, 15:14

بسم الله الرحمن الرحيم
احم احم
صارلي اكتر من ساعه وانا عم اقرأ الموضوع والردود
بس مافهمت شي
يعني كلو حكي بحكي
بس اللي بدي قولو انو انتو ليش محملينها كتير القصه
والله مو مستاهله
يعني خليكن رايقين مابدها تعصيب وتكبير
انا هون صحيح حالي على قدو بس ماني متضايق
وبحب العيشه هون بالسعوديه وبحبها كمان بالشاااام
كلو نفس الشي
انا بعتبر حااالي رايح سيران مشوار انا وصحابي حتى غير جوو
ومتل ماذكرو الشباب اصابع اليد مو كلها متل بعضها وفي الصالح وفي الطالح وين ما كان
مابصير نحكم على بلد كامل ونبني احكامنا بمجرد تعاملنا مع شخص واحد او كم واحد مو مناح
يعني انا هلأ بالوضع اللي بينا وبين البنان كتير متضايق لانو اللبنانين عم يسبونا ع الطالعه والنازله
عم يسبو بلد كامل شعبو 17 مليون بس ال شو لانو مات الحريري طيب ياخي بس تمسكو اللي قتل الحريري سبوه ليش عم تسبو سوريا وشعبها هاد الشي غلط وين ماكان مابصير نحكم هيك
وصدقوني الدنيا مافيها شي عيش ويومك واللي بيجي بكرا يامحلاه
وبالاخير اتمنى للي بالسعوديه التوفيق والنجاح بعملهن وللي بالشام كمان وكلنا اخر شي عرب جنس واحد ولغه وحده وجزورنا وحده
تحياااااااااااااااااتي الكم جميعآ

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ابن الرياض

22/06/2006, 15:26

غربة الروح
كلام يكتب بمداد من ذهب
سلمت اخي الكريم

ابومزيد

22/06/2006, 15:46

بسم الله الرحمن الرحيم

احم احم
صارلي اكتر من ساعه وانا عم اقرأ الموضوع والردود
بس مافهمت شي
يعني كلو حكي بحكي
بس اللي بدي قولو انو انتو ليش محملينها كتير القصه
والله مو مستاهله
يعني خليكن رايقين مابدها تعصيب وتكبير
انا هون صحيح حالي على قدو بس ماني متضايق
وبحب العيشه هون بالسعوديه وبحبها كمان بالشاااام
كلو نفس الشي
انا بعتبر حااالي رايح سيران مشوار انا وصحابي حتى غير جوو
ومتل ماذكرو الشباب اصابع اليد مو كلها متل بعضها وفي الصالح وفي الطالح وين ما كان
مابصير نحكم على بلد كامل ونبني احكامنا بمجرد تعاملنا مع شخص واحد او كم واحد مو مناح
يعني انا هلأ بالوضع اللي بينا وبين البنان كتير متضايق لانو اللبنانين عم يسبونا ع الطالعه والنازله
عم يسبو بلد كامل شعبو 17 مليون بس ال شو لانو مات الحريري طيب ياخي بس تمسكو اللي قتل الحريري سبوه ليش عم تسبو سوريا وشعبها هاد الشي غلط وين ماكان مابصير نحكم هيك
وصدقوني الدنيا مافيها شي عيش ويومك واللي بيجي بكرا يامحلاه
وبالاخير اتمنى للي بالسعوديه التوفيق والنجاح بعملهن وللي بالشام كمان وكلنا اخر شي عرب جنس واحد ولغه وحده وجزورنا وحده
تحياااااااااااااااااتي الكم جميعآ

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
كلام بنسمع مو متل بعض عالم
وتحية لابن الرياض رغم بعض الاختلافات بوجهات النظر بس على الاقل في احترام متبادل

ليالي

22/06/2006, 18:08

بسم الله الرحمن الرحيم

احم احم
صارلي اكتر من ساعه وانا عم اقرأ الموضوع والردود
بس مافهمت شي
يعني كلو حكي بحكي
بس اللي بدي قولو انو انتو ليش محملينها كتير القصه
والله مو مستاهله
يعني خليكن رايقين مابدها تعصيب وتكبير
انا هون صحيح حالي على قدو بس ماني متضايق
وبحب العيشه هون بالسعوديه وبحبها كمان بالشاااام
كلو نفس الشي
انا بعتبر حااالي رايح سيران مشوار انا وصحابي حتى غير جوو
ومتل ماذكرو الشباب اصابع اليد مو كلها متل بعضها وفي الصالح وفي الطالح وين ما كان
مابصير نحكم على بلد كامل ونبني احكامنا بمجرد تعاملنا مع شخص واحد او كم واحد مو مناح
يعني انا هلأ بالوضع اللي بينا وبين البنان كتير متضايق لانو اللبنانين عم يسبونا ع الطالعه والنازله
عم يسبو بلد كامل شعبو 17 مليون بس ال شو لانو مات الحريري طيب ياخي بس تمسكو اللي قتل الحريري سبوه ليش عم تسبو سوريا وشعبها هاد الشي غلط وين ماكان مابصير نحكم هيك
وصدقوني الدنيا مافيها شي عيش ويومك واللي بيجي بكرا يامحلاه
وبالاخير اتمنى للي بالسعوديه التوفيق والنجاح بعملهن وللي بالشام كمان وكلنا اخر شي عرب جنس واحد ولغه وحده وجزورنا وحده
تحياااااااااااااااااتي الكم جميعآ

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ومع هذا كله بيحبو لبنان ............والسعودية على قولتكم الزريبة احسن منها..........فعلا القط مابيحب الا خناقه...............:x

YaSeR

22/06/2006, 21:21

وبعدين احنا زرنا سوريا اكتر من مرة...........وتعرضنا للاذلال من بعض الناس ومع كذا ماعملنا زحمتكم اللي انتو عاملينها وأخذناها من قاصرها وبطلنا نزور سوريا.........

شئ واحد كنت أتمنى تذكروه...............على الأقل وأكيد انتو عارفينه

بس هذا مش بس كلامكم اصلا هالمنتديات مانوجدت الا لتفرغو الحقد اللي داخلكم اتجاه بعضكم.......سواء كانت سوريا او السعوديو او مصر والكل

بس فعلا مستواكم الثقافي عالي...................والكلام صفة المتكلم

على فكره هاد كمان منتدى سوري
فينك ما تفوتي اذا مو عاجبك

YaSeR

22/06/2006, 21:31

وللاخ اللي يقول ان سوريا الله يحفظها ويحفظ اهلها وامنها ثالث بلد على مستوى العالم من حيث الامن فهذي صعبة شوي تنبلع مع احترامي لكل سوريا
هناك كوالمبور لندن بكين طوكيو باريس مدريد جنيف واشنطن
اما على المستوى العربي هناك دبي القاهرة بيروت مسقط
جميعها افضل من سوريا رغم ان سوريا ليست سيئة ولكن هناك افضل

بيروت : كل كم يوم تفجير وما صرلون طالعين من الحرب الاهليه زمان واصلا لما كان الجيش السوري فيها كان في شويه امن هلا اكيد مافي

دبي : عمليات نصب وسرقه ما الها حل وما في اكتر منها

القاهره : الاخوان المسلمين ( عليهم لعنه الله ) مو تاركينهون من شرون كمان تفجيرات وقتل

باريس : ما صرلون زمان لما كل يوم يطلعو يحرقو سيارات ودواليب والشرطه مو قادره تعمل شي

مدريد : كمان هدول جماعه نسيان شو اسمون كل فتره بساوو تفجيرات بعدين ما تنسى التفجيرات يلي ساووها القاعده فيها

لندن : اكيد انت عم تمزح انو لندن فيها امن .. لك لندن بعد الساعه 9 بالليل ما فينك تطلع من بيتك

واشنطن : حالها من حال كل اميركا كمان الامن سايب والقتل والسرقه ما الون حل

باقي المدن ما بعرف عنون كتير بس كمان اكيد نفس الشي