قصيدة حلبية غير شكل [الأرشيـــــف]

butterfly

13/06/2006, 16:29

قصيدة حلبية غير شكل

شفت عيونا فسط الكاسة
فسط الكاسة
شفت عيونا فسط الكاسة
عم تقدح متل الونّاسة
حلوة متل مربّى المشمش
ونظراتا بتعبّي الطاسة
يخرب بيتا
يخرب بيتا شقد حبّيتا
قلعتلي قلبي من جرنو
ساوتني بيضة فقّاسة
كسرتتني متل البطّيخة
حتى صرت ...حزوز حزوز
هالمخلوقة...ينعن طيخا
حلوة متل "العنبر بوظ"
فيزونا
شمّطلي عيوني
وطيّرلي من راسي الظوظ
أخدتلي واحد شرشوح
وهي حالة دنيتنا..حظوظ
راحت حبّت واحد غيري
جبلا بيتين وسيارة
ودشدوش
وجبلا سنّارة
مابعري شقد كان عيارا
بس البعرف
إنّي كل نسوان الحارة
غاروا منّا
وشالوا عالمستشفى الجارة
فطسانة...وما منّا شارة
لمّا شافت هالسنّارة
فلّس جوزا
وصارت متل الجيجة العوزا
على طول مهرهر شحوارا
ورجعت لعندي زعلانة
باستلي إيدي من الكوع
وقالت : سامحني ...ندمانة
قلتلا : روحي من وشّي
حاجة تنّقي يا كرارة
كنتي عندي متل الوردة
وهلّق ...صرتي متل القردة
كم كاسة قهوة ضيّفتك وكم سيكارة
وكم درّاجة نجّرتلك
روّحت عليها سحّارة
وكم رفسة طعماني أبوي
وكم طيّارة
وكم حرب علقنا وكم غارة
كلّو مشانك يا فصعونة
وبالآخر ...عردشتي عضامي
وتركتيني متل الفارة
وحياة ترابك يا جدّي
وحياة الأركيلة الكانت ستّي بتشغلاّ النارة
مالك عندي عضّة خبزة
وقصّتنا مالا دوبارة
أنا شعّلتك
وأنا طفّيتك
وآخرتك ...فلتر سيكارة

butterfly

13/06/2006, 16:30

شرح المفردات:
1- الطاسة: هو ذلك الجزء من الجمجمة الذي يشبه غطاء الطنجرة.
2- جرنو: أي المكان الذي يتوضع فيه كجرن طابة الماوس مثلاً.
3-العنبر بوظ : هو الآيس كريم باللهجة الحلبية القحّية.
4-الظوظ: المخ...ويعمل عمل المعالج في الجسم البشري.
5-مابعري: أي لا أعرف...أو كما تقول العرب " في الموكامبو" جو نيسيببا "
6-شارة:بلفظ الشين كشين "الشي" العائدة لسائقي عربات الخيول . وتعني الأمل
7-الجيجة العوزا: هي الجيجة التي تنيّم صيصانها يوم الخميس...ويكون ديكها عمال يتفرّج على برنامج أكثر من رأي.
8-درّاجة: هي الطراز الأول من سيارات الكاديلاك وكانت تصنع بلوح خشب وأربع بيليلات.
وإذا استعصت عليكم بعض المفردات الأخرى...فأحيلكم إلى معجم "الديك الفصيح" لمؤلفه محيو الحميماتي

YaSeR

13/06/2006, 17:03

كتيير حلووه :lol:
مشكووره

نادين

13/06/2006, 17:20

:lol: ميرسي فراشي على القصيدي المهضومي

david 4all

13/06/2006, 17:54

ميرسي على القصيدة المهضومة
:gem: :gem: :gem:

sakoo

13/06/2006, 18:30

ههههههههههههههههههههههههه هههههههههههههههه
حلو يمنك تسلميلي ادي اخدد عقلي وراسي وماخلت شي بالطاسي :lol:

Liu Kang

13/06/2006, 18:51

:lol: :lol: :lol: :lol: :lol: حلوة كتيير :clap: يسلمووووو كتير كتير :clap: :clap:

وكم رفسة طعماني أبوي
وكم طيّارة ههههههههههههههههههه

MR.SAMO

13/06/2006, 19:22

اهم شي انك مترجمي القصيدة
ميرسي مرمر

lolo2_3

13/06/2006, 19:24

:o :o :o :o كتير حلوة شكرا الك

Kakabouda

13/06/2006, 19:40

أشو هاد يا بتاتا انت :lol: :lol: :lol:

marioma alghzayala

13/06/2006, 19:43

ههههههههههه شكرا مرسو .:king: ... بس منيح حاطة شرح مفردات حاسبة حساب نفوت بالبطاطا ..:lol:

Kakabouda

13/06/2006, 19:45

ههههههههههه شكرا مرسو .:king: ... بس منيح حاطة شرح مفردات حاسبة حساب نفوت بالبطاطا ..:lol:
بتاتا اذا بتريدي يا أمورة ;-) :lol: :lol:

marioma alghzayala

13/06/2006, 19:47

بوتيتو ... ..بتاتا .... كللو واحد ....:lol: :lol:

Kakabouda

13/06/2006, 19:53

بوتيتو ... ..بتاتا .... كللو واحد ....:lol: :lol:
مشان البريستيج الحلبي ;-) :lol: :lol: :lol:

marioma alghzayala

13/06/2006, 19:57

قولتك ...;-) :lol: :lol:

butterfly

13/06/2006, 20:37

:shurup: :shurup:

أشو هاد يا بتاتا انت :lol: :lol: :lol:
لك هس بليز ؟؟؟ بلا فضايح :cry: :cry:

butterfly

13/06/2006, 20:37

مشان البريستيج الحلبي ;-) :lol: :lol: :lol:
الله لا يعلق حدا بلسانكون :cry: :cry: :cry:

marioma alghzayala

13/06/2006, 20:40

:p :p :p

hanny dagher

13/06/2006, 21:44

7-الجيجة العوزا: هي الجيجة التي تنيّم صيصانها يوم الخميس...ويكون ديكها عمال يتفرّج على برنامج أكثر من رأي.

هاي عجبتني اكتر الشي :lol: :clap:

سكـ بليـس ــرتيرة

14/06/2006, 15:43

:lol: :lol: :lol: :lol: :lol: حلوة كتيير :clap: يسلمووووو كتير كتير :clap: :clap:

وكم رفسة طعماني أبوي
وكم طيّارة ههههههههههههههههههه

مجربهااا !:clap: :clap: :p

hany_77

15/06/2006, 15:46

اسماء الاشارة

كُه(بضم الكاف) او كُهنه======هذا هو (للمذكر القريب المفرد)

كِه (بكسر الكاف) او كِهنه=== هذه هي (للمؤنث القريب المفردة)

كُهاك( بضم الكاف) ======هذا هو (للمذكر البعيدالمفرد)

كِهاك(بكسر الكاف) =====هذه هي للمؤنث البعيد المفرده)

كُهاكين(بضم الكاف)=====هؤلاء هم( لأكثر من واحد للمذكر)

كِهاكين(بكسر الكاف) ====هؤلاء هم(لأكثر من واحد للمؤنث)

مجموعة من الكلمات الخاصة بحلب:

جنق ... هي الصحن

جمجايه . هي يعني معلقه السكب المقعرة

سكرتون.... يعني خزانة

لا تجقجق .... يعني لا تدوس على الماء ( هي إذا كانت الأرض ممسوحة)

عَوْجِة ... كوع

اشبك ؟ --- سؤال استفسار

عَلوّا ... أي يا حبذا

اشلك فصتون ؟ .... يعني بالشامي شو بدك فيون

تَعَوَّقِت ... يعني تأخرت (وبقلك المتل بحلب المتعوق حجتو معو )

باتشاية ... غطاء الوتش ===> الوجه

عجب . . أداة تعجب حلبيه المنشأ (عجب خيو محمد را يجي اليوم ولا لا ؟ )

كنجفة و سكمبيل ... تنيناتن مرادف لورق الشدّة

آط .... هي مرادف لكلمة طابق (يعني فلان ساكن بالطابق الخامس أو خامس آط )

فَرْشْخَانِة......هي اللي بيلتم فيا الوسخ..(السفاية)

خِطَّار .... يعني ضيوف

باب السقاق(السآء).....يعني باب الدار

جوجحانة .. معناها المرجوحة

قفه .... سله من خيزران يوضع فيها التين عادة .....

سَئَّاطَة او سَقَّاطَة و هي القطعة المعدنية اللي بندق فيها باب الصئَاء أو باب البيت

و بتجي كمان بمعنى سَئَّاطة الكبة ، و هي قطعة الكبة بصينية ......

انْصْرَة ..... يعني اغتنم الفرصة (مثال--- انصرة انتو عنا يعني نغتنم فرصة وجودكم عندنا )

فصط ... يعني وسط

ديوانة ... كناباية

وأخيراً أقدم لكم هذا اللقش مع الشرح و إعراب المفردات

"إشْ عم تِلْقُشْ أبوي .. ؟؟ تُقْبُشْ قلبي صرلي عايش طول عمري بفصط حلب وطاول طاول ماسمعت كلمة أَخَرْمِشْ السما . دي حاج تقسيم علينا حج أبو عبدووو "

شرح المفردات :

طاول طاول .... يعني أبداً أبداً

دي بالحلبي أداة تحريكيه .. يعني دي خيو .. خلصنا (هي بالمشرمحي)

وتُعرب هذه الكلمة كالتالي ..دي أداة فَجْلَقَه حلبيه لا محل لها من الإعراب

مصطلحات حلبية عن أسلوب الاختصار:

تاااا ... بدل من تعال

رووو ... بدل من روح
ما راي .... بدل من مالي رايح
ابخالتي ... بدل من ابن خالتي
شأساعه ... بدل من شقد الساعة

صَعِي ... أداة استدراك بمعنى صحيح

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////وســـــــلا متكن

اميرة الظلام

16/06/2006, 00:16

لك بتجنن هالقصيدة :lol:
مشكورة

فلاش باك

16/06/2006, 00:55

:shurup: :shurup:

لك هس بليز ؟؟؟ بلا فضايح :cry: :cry:

اليوم اول مرة بعد 6 اشهر بحلب بدوق شراب اللوز

ياعيني شوهاد فعلا شي ناهي

كتير طيب

passerby_intime

03/10/2008, 22:18