سؤال بيطرح نفسو على طول ... شو طبيعة علاقتنا مع اهلنا ... وكيف هني بنظرولنا ؟ يا ترى علاقتنا معن بينطبق عليها عبارة ( صراع الأجيال ) ؟!
او في تفاهم متبادل بينك وبين اهلك ؟ كل واحد مننا صار اكيد عندو تجربة بالعلاقة مع اهلو .. وما بيخلى من الأمر من المشاكل .. يا ريت تشاركونا بآراءكم ... :سوريا:

وعن هالشي بقول جبران شي حلو كتير...
إن أولادكم ليسوا أولادا لكم ..
إنهم أبناء وبنات الحياة المشتاقة إلى نفسها .. بكم يأتون إلى العالم ولكن ليس منكم ..
ومع أنهم يعيشون معكم فهم ليسوا ملكا لكم ..
نتم تستطيعون ان تمنحوهم محبتكم ولكنكم لا تقدرون ان تغرسوا فيهم بذور أفكاركم ..
لأن لهم أفكارا خاصة بهم ..
وفي طاقتكم أن تصنعوا المساكن لأجسادهم ..
ولكن نفوسهم لا تقطن في مساكنكم ..
فهي تقطن في مسكن الغد الذي لا تستطيعون أن تزوروه ولا في أحلامكم..
آن لكم أن تجاهدوا لكي تصيرو مثلهم ..
ولكنكم عبثا تحاولون ان تجعلوهم مثلكم ..
لأن الحياة لا ترجع إلى الوراء .. ولا تلذ لها الإقامة في منزل الأمس
أنتم الأقواس وأولادكم سهام حية قد رمت بها الحياة عن اقواسكم ..
فإن رامي السهم ينظر العلامة المنصوبة على طريق اللانهاية ..فيلويكم بقدرته لكي تكون سهامه سريعة بعيدة المدى ..
لذلك فليكن التواؤكم بين يدي رامي السهام الحكيم لأجل المسرة والغبطة ..
لأنه كما يحب السهم الذي يطير من قوسه .. هكذا يحب القوس التي تثبت بين يديه .. :cry:

سؤال بيطرح نفسو على طول ... شو طبيعة علاقتنا مع اهلنا ... وكيف هني بنظرولنا ؟ يا ترى علاقتنا معن بينطبق عليها عبارة ( صراع الأجيال ) ؟!
او في تفاهم متبادل بينك وبين اهلك ؟ كل واحد مننا صار اكيد عندو تجربة بالعلاقة مع اهلو .. وما بيخلى من الأمر من المشاكل .. يا ريت تشاركونا بآراءكم ... :سوريا:



انو موضوع حلو كتير
شو طبيعة علاقتنا مع اهلنا انو طبيعة علاقة اهل مع ولادن يعني اكيد مو متل علاقتي مع رفقاتي في شي اسمو احترام وطاعة من قبلنا نحنا تجاهن وفي حب من ناحية هني تجاهنا
هلأ هني كيف بينظرولنا هني بينظرولنا على طول انو نحنا صغار يعني قد ما كان عمرنا (طبعا هاي بتختلف من عيلة لعيلة حسب طريقة تفكير الاهل وعلاقة مع ولادن ) بس انو هالشي ناتج من خوفن علينا وعلى مصلحتنا بيضلو مفكرين انو نحنا ما منعرف مصلحتنا وهالشي ناتج من طبيعة الاهولة اللي فين واللي قد ما حاولنا نغيرا ما رح نقدر
يا ترى علاقتنا فين بينطبق عليها عبارة صراع الاجيال ؟ انو اي ممكن لانو بدك تعتبر انو هني من جيل ونحنا من جيل واكيد انو كل جيل الو افكارو والو معتقداتو وطريقة افكارو اللي بتختلف من جيل لتاني وهادا الشي هوي اللي بيسبب هالشوية مشاكل بين الاهل والولاد
بالنسبة الي في تفاهم بيني وبين اهلي بس مو تفاهم مطلق اكيد بيضل في شوية مشاكل بسبب متل ما قلت انو هني عندن افكار نحنا منعتبرا متخلفة بعض الشي ونحنا عنا افكار هني ما بيتقبلوا بسهولة (انا هون عم احكي على الاهل يعني العيلة مو بس البي والام )

انو موضوع صعب وبدو تجميع افكار لحتى الواحد يحكي في بس انا حطيت هالرد من باب تسجيل المتابعة ولنا عودة قريبة انشالله بس لنشوف ردود الشباب

سؤال بيطرح نفسو على طول ... شو طبيعة علاقتنا مع اهلنا ... وكيف هني بنظرولنا ؟ يا ترى علاقتنا معن بينطبق عليها عبارة ( صراع الأجيال ) ؟!
او في تفاهم متبادل بينك وبين اهلك ؟ كل واحد مننا صار اكيد عندو تجربة بالعلاقة مع اهلو .. وما بيخلى من الأمر من المشاكل .. يا ريت تشاركونا بآراءكم ...
اول شي مشكور ابو السيم عالموضوع الحلو كتير بس اللي قهرني انو انا مارديت مبارح على اساس ناطرة لشوف الردووووود انو معقول من بين مدري كم واحد فات شاف الموضوع ماحدا رد غير واحد :cry:
شبكون ولو؟
ماعلينا منرجع للموضوع

بالنسبة لطبيعة العلاقة مع الاهل هي بالحقيقة فيها نوع من التنافس اذا فيك تقول كل واحد من الطرفين بدو يحاول يثبت انو هو الصح بس بيضل انو الولاد بيخجلو من انو يعارضو الاهل او احترامون بيمنعون وبأغلب الوقت بيضطرو للكذب او التصرف بشي عكس ماهني مقتنعين فيه والشغلتين مو مناح بنوب
كيف هني بينظرولنا؟ برأيي هني بينظرولنا كأطفال مو عرفانين وين مصلحتون ( مصروعين :jakoush: ) وعقلنا طاقق واهتماماتنا سخيفة وبيخافو علينا كتير بس كلو من المحبة الزايدة واكيد في كتير اهل بيحترمو او بيعرفو مظبوط شو في طاقات بالجيل تبعنا وعرفانين مظبوط كيف يوجهو ولادون
بالنسبة اذا بينطبق عليها جملة صراع الاجيال ف أكيد بينطبق ولو انو كلمة صراع ماحلوة كتير لانو بتبين انو لازم يكون في غالب ومغلوب بس بهالحالة فيك تقول انو في مناحرة او تنافس ( متل تبع تنافس الاوائل ) يعني كل واحد بدو يأثبت وجودو بدون مايأذي التاني
في تفاهم بيني وبين اهلي؟ اكيد في تفاهم واكيد في مشاكل
الامر بيختلف لانو عيشة الغربة مانها سهلة وفي ضغوط عليي وعليهون وبالتالي هني كأهل مابيلاقو غير ولادون ليتفششو فيهون بدون مايحسو والولاد كتير احيان مابيستوعبو الموضوع وبتبلش بس بعدين عالعادة الواحد بيتمسح :p او بيصير يتفهم وهني كمان مع مرور الوقت بيتعودو وبتخف المشاكل
مافي اهل ماعندون مشاكل مع ولادون واذا مافي مشاكل معناتا في شي غلط بتركيب العيلة او الاهل مامهتمين بنوب بولادون او الولاد كتير عاقلين :p

الموضوع حلو كتير وبتمنى شوف ردود ومشاركات

تصرفات الأهل مو دايماً نابعة من المحبة الزايدة متل ما عم تقول ليلي
برأيي غالباً نابعة من رغبة الأهل بتربيتنا على نفس الأسس اللي تربوا عليها هني
لسبب وحيد هوي إنن بيقارنوا بين الجيلين وقديش هني تمرمروا بصغرن ، وبينا نحنا جيل النت قديش مرتاحين... ف بينط عرق التخلف اللي الله دخيل اسمو :angel: زرعو بكل جنس العرب والشرقيين لينبه الأهل إنو "انتبهوا ... الولد رح يضيع من بين إيديكن إذا ما فرضتوا القيود المناسبة " من عقوبات لتنبيهات .. حسب تحضر الأبوين...
لأنو متل ما بتعرفوا في ناس بينط عندن عرق الحيونة فبتكون ردة فعلن على "الخطأ المفترض للإبن " هيي الضرب ؟؟؟ واللي صار الكل بيعرف آثارو السلبية جداً جداً جداً على نفسية الطفل.

يعني قصدي:
الأهل عندن تصور مسبق و فكر مزروع براسن إنو التربية اللي نشأوا هني عليها مع كل سلبياتها والقمع اللي فيها ... أفضل من أساليب التربية الحديثة اللي بتفترض تفهم واستيعاب الأبناء وعدم القسوة بالعقاب !!!

هلأ تفسيري لسبب هالإعتقاد عند الأهل هوي إنن بينظروا لحالن على إنن "صالحين" و "مستقيمين" و "محترمين" من كل الناس ... طبعاً ما حدا بيشوف عيوبو للأسف !!!
مشان هيك لازم يعاملو مع ولادن متل ما أهلن عاملوهن.

يعني ما بعرف ليش هالموضوع ما اخد حقو مع انو كتير مهم بحياتنا

اخ انا مافيني علق ع هاد الموضع ابدا لانو مابعرف شو احكي من كتر ما يئست اني افهم اهلي بعد ما هني ماقدروا يفهموني او يستعبوا الشي الي عم امرق او حس في طبعا انا عم احكي عن كل عيلتي الا امي لانها بتستوعبني وبتفهم شعوري والشي الي عم امرق في.هاد هوي تعليقي البسيط بس الي بقلبي اكبر بكتير:jakoush: :cry:

حلو الموضوع وهي انا اول مرة بشوفو يمكن ما اخد حقو لانو في كتير مواضيع ما الها طعمة عم تنزل بنهار واحد بصير الموضوع الحلو بتاني صفحة ما حدا بشوفو
المهم العلاقة بين الاهل والولاد طبعا بتختلف من عيلة لعيلي بس ما اختلاف كبير هلا في عالم مثلا واحد صار عمرو فوق العشرين تاريبا اهلو معد الون علاقة فيه وفي عالم بضل متل وقت كان عمرو 10 سنين وانا بعرف من النويعين طبعا العلاقة يعني هون بالشرق الاوسط بتختلف عن الغرب طبعا والكل بيعرف هالشي بظن..
بس اهم الشغلات اللي بيتناقروا عليها الاهل والولاد هي مثلا الموضة انو هني جيلون كتير اديم يعني غيرنا بقى كلشي منعملو جديد صعب يتابلو الا بعد حرب مثال الشعر الطويل او الدقن (السكسوكة) بظن انو كل اللي جرب لاقى رفض من الاهل حسب معرفتي ...
بس المهم انو في حب متبادل واحترام كبير من الاولاد للاهل بشكل خاص...ولو شو ما صار وشو ما عملوا انو احيان صحي هني الكبار بس احيان بيغلطوا بحق الولد مفكرين الشغلة لمصلحتو بس احيان بيكونوا فهمانين الشي غلط بس بالاخير هني اهلنا ومنحبون ومنحترمون اكتر من كلشي...
والله يخليلكن اهاليكن ومشكور ابو السيم عالموضوع الحلو ..