الحجاب جريمة والي بيحكي يا ويلو ...اي وين حق التعبير والحرية ؟! [الأرشيـــــف]

السورية المشتاقة

03/03/2006, 16:32

تركيا: 25 ألف طالبة منعن من دخول الجامعات بسبب الحجاب
تفيد معطيات رسمية أن السلطات التركية منعت أكثر من 25 ألف طالبة من دخول الجامعات والكليات بسبب ارتدائهن الحجاب ورفضهن خلعه، وذلك خلال العامين الماضيين، وفق إحصائية نشرتها منظمات حقوق الإنسان في تركيا.

السورية المشتاقة

03/03/2006, 16:36

ونقلت صحيفة "واشنطن بوست" الأمريكية في عددها الصادر الأحد عن هذه المنظمات الحقوقية أن المئات من موظفي الحكومة الإسلاميين فُصلوا من أعمالهم، وأن الحكومة التركية بادرت إلى إغلاق عدد من المدارس الإسلامية .

السورية المشتاقة

03/03/2006, 16:38

وكانت الطالبة نورة بيزرجان قد فُصلت من الجامعة قبل أسبوع فقط من موعد الامتحانات النهائية، وحُكم عليها بالسجن لمدة 6 أشهر بسبب رفضها خلع الحجاب. وقالت نورة: "لا أستطيع أن أُكمل مشواري التعليمي؛ لأني أرتدي الحجاب".

السورية المشتاقة

03/03/2006, 16:39

وتحظر الحكومة على النساء اللواتي يعملن في سلك التدريس أو الوظائف الحكومية الأخرى أيضا لبس الحجاب، كما مُنعت النساء من التقاط صور بالحجاب في معاملات رخص القيادة، أو جواز السفر، أو التسجيل في الجامعة. الله يطعمنا هيك حق بالتعبير والحرية !!!

محمد ابراهيم

03/03/2006, 16:39

عالم تجهل معاني الحريه .
فهل الحريه والديموقراطيه ان افرض نظامي ومبادئي على غيري .
وكمان بالقوه ووسائل الاكراه المعنويه والماديه .

السورية المشتاقة

03/03/2006, 16:42

الجامعات التركية ترفض متفوقة بسبب الحجاب

رفضت إدارة قيد وقبول أوراق التقديم للجامعات التركية قبول أوراق طالبة تركية حصلت على المرتبة الخامسة على مستوى تركيا بين الطلاب الناجحين في امتحان القبول بالجامعات التركية لهذا العام 2003 بسبب ارتدائها الحجاب، وذلك بحسب جريدة "وقت" التركية

السورية المشتاقة

03/03/2006, 16:42

وقالت الجريدة التركية إن الطالبة "عائشة أرجون" التي نجحت في امتحان القبول من خلال نظام التعليم المفتوح لثانويات الأئمة والخطباء بمحافظة قونيا التركية، والتي كانت قد فصلت من قبل أيضا من "ثانوية الأئمة والخطباء المركزية" بمحافظة قونيا لنفس السبب، حصلت على 288 درجة من مجمل 300 درجة.

السورية المشتاقة

03/03/2006, 16:44

أصدرت محكمة أمن الدولة بمحافظة ملاطيا جنوب تركيا قرارًا بحبس ثلاث طالبات محجبات لقيامهن بـ "التظاهر غير القانوني" للدفاع عن حقهن في ارتداء الحجاب.

السورية المشتاقة

03/03/2006, 16:45

محكمة أمن الدولة بملاطيا قررت حبس الطالبات الشقيقات "زهرة نور الحق ساعتجي أوغلو" (19 عاما) لمدة عامين وستة أشهر، و"نورجهان" (17 عاما) لمدة عام واحد وثمانية أشهر، !!!

شادي رام الله

03/03/2006, 16:49

الله يسترها معنا

يالطيف

السورية المشتاقة

03/03/2006, 16:52

:gem: :gem: :gem:

السورية المشتاقة

03/03/2006, 16:54

:jakoush: :jakoush: :jakoush: :jakoush: :jakoush:
حرية

Majood

03/03/2006, 17:56

الدولة التركية دولة علمانية.. قامت الدولة بقيادة كمال اتاتورك .. حيث انهى نفوذ الدولة العثمانية.. و بدأ عهد جديد... الدولة الها دستور و قوانين .. .

كل الاخبار يلي حاطتيتها غالبا صحيحة.. و معظمها مدبرة من قبل جماعات شغلتها الشوشرة و الاستفزاز ... ممكن كتار ضحية متل البنت المتفوقة...
الدولة التركية مو غبية.. و اي قرار او حركة بتعتبر فيه بكون الو اسبابو...
لا تفكري انو الوضع بتركيا متل سوربا و باقي الدول الاسلامية ..
انا بالبداية كتير تحسست من الموضوع و لهلأ بزعل على ناس مالها ذنب .. بس هيك افضل صدقيني ..
كلام الجرايد مو دايما بتصدق .. لأنهن دايما بكبرو الامور ...
انا عايشة بهالبلد و بعرف منيح الوضع فيها...
و بشكل حيادي و علما اني مع حرية الاعتقاد و المذهب عم قلك هيك افضل ...

بعدين مسألة الحجاب مو شغلة جديدة من وقت قامت الدولة التركية هالقضية موجودة..

أبو النسيم

16/03/2006, 16:54

الدولة التركية دولة علمانية.. قامت الدولة بقيادة كمال اتاتورك .. حيث انهى نفوذ الدولة العثمانية.. و بدأ عهد جديد... الدولة الها دستور و قوانين .. .

كل الاخبار يلي حاطتيتها غالبا صحيحة.. و معظمها مدبرة من قبل جماعات شغلتها الشوشرة و الاستفزاز ... ممكن كتار ضحية متل البنت المتفوقة...
الدولة التركية مو غبية.. و اي قرار او حركة بتعتبر فيه بكون الو اسبابو...
لا تفكري انو الوضع بتركيا متل سوربا و باقي الدول الاسلامية ..
انا بالبداية كتير تحسست من الموضوع و لهلأ بزعل على ناس مالها ذنب .. بس هيك افضل صدقيني ..
كلام الجرايد مو دايما بتصدق .. لأنهن دايما بكبرو الامور ...
انا عايشة بهالبلد و بعرف منيح الوضع فيها...
و بشكل حيادي و علما اني مع حرية الاعتقاد و المذهب عم قلك هيك افضل ...

بعدين مسألة الحجاب مو شغلة جديدة من وقت قامت الدولة التركية هالقضية موجودة..

مجود من كل قلبي هل الوردة:سوريا: :سوريا:

على طول متميزة :سوريا: :سوريا:

Majood

16/03/2006, 16:58

شيكران :oops: شيكران

krimbow

16/03/2006, 23:45

ما بعرف مجود بس ما شرحتيلنا ليش هيك افضل ؟؟؟

هلأ بشكل شخصي انا ضد اني كون علبة بسكويت على قولة حكيمنا الدكتور حسام عبود
البسكويت بس ينطبخ بيتعلب بعلب عليها ماركة
انا برفض انو يكون الانسان علبة بسكويت عليه ماركة مسيحي او مسلم او او الخ
و يللي برفضو تماما هوي انو طج هيك ماركة ع البني ادم
يعني برفض انو في حال كان في بسكويتة مسيحية روح طج صليب عليها و كأنها ماركة مسجلة و اللوغو محفوط عند جمعيات حقوق النشر
او ازا كنت بسكويتة مسلمة مؤنثة روح البس حجاب ... و هيك

هلأ بنفس الوقت يللي حابب يكون علبة بسكويت ما بقدر امنعو
و ما بحب انو حدا يمنعو .. و يللي عم يصير بتركيا امر لا يمكن ان اقبلو

السورية المشتاقة

17/03/2006, 11:41

حبيبتي مجود كلامك كلو ع عيني وراسي ...

انا قصدت من موضوعي ورجي البعض نقطة معينة...

هيك دول متل تركيا وغيرها

بتدعي حقوق التعبير والحرية يعني متلا سب الرسول في الدنمارك حرية ...

ارتداء الحجاب تعدي عالحرية !!!

انا ما حطيت الموضوع لسبب منع الحجاب ...

بتوقع انو موضوع الحجاب موضوع قديم ومعروف...

لكن حبيت حط هالموضوع لنشوف مفهوم الحرية عند الغرب... او بعض دول الغرب...

التعدي عالرسول هو التعدي عالحرية لانو بهالشكل هنه عم يتعدو عغيرهن...

لكن هل الحجاب يؤذيهن ؟؟؟ ما بعتقد

طيب اذا كانت الدوله دولة علمانية ...ليش بتمنع الحجاب والصليب لا ؟؟؟

بتوقع انو وضحت المعايير المزدوجة ضد الاسلام ...

تحياتي الك مجود

السورية المشتاقة

17/03/2006, 11:48

انا برفض انو يكون الانسان علبة بسكويت عليه ماركة مسيحي او مسلم او او الخ
وانا كمان ...يعني بتوقع انو الدين واختلافو بين الناس عم يعمل مشاكل واحقاد كتيرة
الدين لله ...يعني كل واحد حر بمعتقدو ...المهم اننا نكون اخوة بالانسانية
لانو محمد صلى اله عليه وسلم كان يشارك بجنازات وافراح اليهود...وكان البعض يستغرب ويقلو :هدول يهود
يقللهن الرسول : اليسو بشرا مثلنا ؟؟!!!

................
لكن كريمبو انا كمسلمة ما بتوقع انو الحجاب عبارة عن ماركة تكتب على الفتاة المسلمة
الحجاب عنا واجب ...وهو فخر لالنا ...

بعض علماء الاسلام قالو للبنات الي بالغرب
قاعدة سهلة علمنا ياها الرسول "الضرورات تبيح المحظورات"
لكن بدول اخرى يسمح بها الحجاب فهيك بيكون الحجاب فخر لكل مسلمة
مو مجرد ماركة بتبين انتمائها الديني...

يمكن انت كمسيحي بتتوقع انو الحجاب ماركة وبس
لكن بالنسبة لالنا الحجاب شئ سامي كتير والو معاني كتير...

وسبق وقل موضوعي توضيح لمفهوم المعايير المزدوجة ضد المسلمين ..

تحياتي

Majood

17/03/2006, 11:57

ارتداء الحجاب تعدي عالحرية !!!
ارتداء الحجاب كتير منتشر بس خارج نطاق الابنية الحكومية..

على فكرة الرجل كمان ممنوع انو يربي ذقن .. و مستنكر انو يربي شوارب كمان ..
مثلا موظفي الدوائر الرسمية هيك..

لكن هل الحجاب يؤذيهن ؟؟؟ ما بعتقد

الحجاب هون بقى رمز يستخدم لامور اخرى .. اهمها استفزاز الحكومة ..
يعني كما يقال .. ولاد الحرام ما تركو شي لولاد الحلال ..

طيب اذا كانت الدوله دولة علمانية ...ليش بتمنع الحجاب والصليب لا ؟؟؟

مين قلك انو الصليب مسموح ..
اي شي له علاقة بالدين ممنوع فقط داخل نطاق المباني الحكومية...
يعني مبدأ .. برا لبيس و تصرف متل ما بدك بس طالما انت موجود بمكان عائد للحكومة فبدك تتقيد بقوانين الحكومة

تحياتي الك مجود
اهلا يا حلوة اشتقنالك

السورية المشتاقة

17/03/2006, 12:04

على فكرة الرجل كمان ممنوع انو يربي ذقن .. و مستنكر انو يربي شوارب كمان ..
هي مو بس عندهن ...عنا كمان

وعفكرة انا قصدت لما قلت هل الحجاب رح يؤذيهن كان قصدي انو حجاب بنت متفوقة متل الي بالمقالة السابقة...

طيب ازا كانوا دول بتنادي بالحرية
ليش منعو البنات الي تظاهروا بكل هدوء من انهن يبدو رايهن ...؟؟!!!

اهلا يا حلوة اشتقنالك
المنتدى ماكان عم يفتح عندي
فكرتهن حجبو الكويت
:blusted: :blusted:

Majood

17/03/2006, 12:21

طيب ازا كانوا دول بتنادي بالحرية
ليش منعو البنات الي تظاهروا بكل هدوء من انهن يبدو رايهن ...؟؟!!!

:blusted: :blusted:
اى مسيرة او مظاهرة او اعتراض .. لازم ياخدو تصريح بالموافقة للقيام .. و الا بتعرضو للتحقيق .. و بمنعوهن من المتابعة ...
هلأ رح قلك بالنسبة لتركيا .. البلد كبير كتير بذللك الاديان كتيرة ... و الاحزاب كتيرة و القوميات كتيرة .. و هيك ازا كل ما نط واحد و قال انا حر و بساوي متل ما بدو .. معناها سلامتك .. البلد بيخرج عن السيطرة .. مشان هيك وجدت القوانين .. و الحرية موجودة بس الها معايير و احكام ..

السورية المشتاقة

17/03/2006, 12:46

وضحت وجهة النظر حبيبتي مجود :سوريا:
لكن الحكم بالسجن لمدة طويلة بسبب هيك مظاهرة حكم ظالم كتير

:سوريا: بس بوسيلي بنوتك الصغيرة

Majood

17/03/2006, 13:02

وصل :سوريا: .. يالله بيكونو البوسات بمناسبة كمان (اليوم عيد ميلادها):king:

toocoolfriend

17/03/2006, 19:53

انا مش فهمان شو بضرهم الحجاب
مزبوط القوانين وجدت للتنظيم وتركيا دولة كبيرة ما لازم تخلي كل واحد يتصرف كأنو حر عالأخير.
بس مش بهالأشيا, يعني هني شو فرقن معهن بين شعرها او ما بين. اي عم يضهرو عراة ويمارسو الجنس كالبهايم على الأرصفة والشواطىء وكله من باب الحرية. يعني شو بضرهم الحجاب, شو هوي الشي اللي بخليهم يمنعو, حجة وحدة لأجل الله بركي منقتنع انو هيدي مش هجمة عالاسلام.
بشرفي شي بيحير

السورية المشتاقة

17/03/2006, 22:38

لك يسلم تمك يا عباس

انت الي وصلت تماما للمطلوب من موضوعي

موضوعي كتبتو توضيحا لمفهوم الحرية الزائفة عند بعض الغربيين

توضيحا لازدواجية معاييرهن
وللحرية بنظرهن لمن اخذ الحرية لقب ...

krimbow

18/03/2006, 04:36

مرحبا سورية

وانا كمان ...يعني بتوقع انو الدين واختلافو بين الناس عم يعمل مشاكل واحقاد كتيرة
الدين لله ...يعني كل واحد حر بمعتقدو ...المهم اننا نكون اخوة بالانسانية

هاد الكلام سليم مية مية

لانو محمد صلى اله عليه وسلم كان يشارك بجنازات وافراح اليهود...وكان البعض يستغرب ويقلو :هدول يهود
يقللهن الرسول : اليسو بشرا مثلنا ؟؟!!!

لأ مو لأنو محمد كان يشارك بجنازة نحنا منشارك
لأنو محمد كان انساني متلنا مشان هيك كان يشارك

قصدي انو مثلا انا ما بحب مقلوبة البيتنجان ... مو ازا طلع يسوع او محمد او دافينشي كان يحب المقلوبة رح صير حبها مثلا

يمكن انت كمسيحي بتتوقع انو الحجاب ماركة وبس
لكن بالنسبة لالنا الحجاب شئ سامي كتير والو معاني كتير...

انا عم ناقشك كانسان اسمو كريم عندو براسو مخ بيعرف الصح من الخطأ
و ع فكرة كريم هاد انسان متفرد الو خصوصيتو ... مو لأنو "انا" عم قول هالشي
متل ما السورية المشتاقة انسان متفرد الها خصائصها المتفردة
متل ما الشحاد ابو زهدي انسان متفرد الو خصوصيتو
متل ما هيفا وهبي انسان متفرد الها خصوصيتها

مو من حقك ابدا انك تحذفي كل تفردي و تعتبريني مجرد مسيحي متلي متل سمير جعجع مثلا
و لا من حقي اني اعتبرك مجرد مسلمة متلك متل عبد الحليم خدام مثلا

كانسان بشوف انو الحجاب مجرد ماركة تجارية مسجلة باسم الدين الاسلامي

بس لاحظي شغلة
انا ضد انو ينمنع لبس الحجاب سواء بتركيا او بغيرها
بنفس الوقت انا ضد انو ينفرض لبس الحجاب سواء بالسعودية او بغيرها
هي حرية شخصية لاي انسانة
بتحب تلبس الحجاب ما بتحب تلبس الحجاب هي مشكلتها الشخصية و مو من حق حدا يفرضو او يلغيه

محمد ابراهيم

18/03/2006, 05:40

لأ مو لأنو محمد كان يشارك بجنازة نحنا منشارك
لأنو محمد كان انساني متلنا مشان هيك كان يشارك
هو الموضوع صعب فعلا انك تفهمو بكل وضوح .بس انا ححاول اوضح شوي
في عقيدة المسلمين وفي قرأنهم واحاديثهم
مجموعه من الاوامر الواضحه والمباشره الموجهه للمسلمين باتباع رسولهم وتقليده في كل كبيرة وصغيرة .
لان الدين الاسلامي يختلف عن غيره في انه يقيد المسلمين في افعالهم واقوالهم وفي المقابل لهم الجنه .
وما هو طبيعي بالنسبه لك (ان محمد بالنسبه لك انسان )وهذه نظره صحيحه ولكنها من جانب واحد .
فهي ليست نفس النظرة للمسمين (فالمسلمين ينظرون له على انه انسان بالاضافه الى انه رسولهم ومعلمهم وشفيعهم يوم القيامه كما انه مفضل على غيرو بالرساله .كرسول يعني لا يصح ان يكون مثل اي انسان عادي)

قصدي انو مثلا انا ما بحب مقلوبة البيتنجان ... مو ازا طلع يسوع او محمد او دافينشي كان يحب المقلوبة رح صير حبها مثلا
اصلا مش معقول ولا هينفع
لان الحب والكره مو بيد الانسان
وانا معاك فكلامك

انا عم ناقشك كانسان اسمو كريم عندو براسو مخ بيعرف الصح من الخطأ
الصح والخطأ مسأله نسبيه
لان ما في عندنا مرجع واحد او اتفاقيه معينه .نرجع الها في تحديد وتعريف الصح والخطأ
يعني جايز و اكيد انا وانت وغيرنا نختلف في موضوع معين
انت تشوفو صح وانا اشوفو غلط والعكس صحيح .

مو من حقك ابدا انك تحذفي كل تفردي و تعتبريني مجرد مسيحي متلي متل سمير جعجع مثلا
و لا من حقي اني اعتبرك مجرد مسلمة متلك متل عبد الحليم خدام مثلا
كلام مظبوط جدا
لان كل انسان بيختلف عن غيرو
وكمان مهما تشابه اتنين اكيد في بينهم اختلافات.
حتى ان في مسيحي متدين واخر لايعرف عن الثالوث شيء
زي ما في مسلم متدين واخر لا يعرف في صلاة المغرب كم ركعه

كانسان بشوف انو الحجاب مجرد ماركة تجارية مسجلة باسم الدين الاسلامي
بصراحه مش فاهم يعني ايه ماركه تجاريه .
يعني بتقصد علامه للمسلمين بس ولا حاجه تانيه

بس لاحظي شغلة
انا ضد انو ينمنع لبس الحجاب سواء بتركيا او بغيرها
بنفس الوقت انا ضد انو ينفرض لبس الحجاب سواء بالسعودية او بغيرها
هي حرية شخصية لاي انسانة
بتحب تلبس الحجاب ما بتحب تلبس الحجاب هي مشكلتها الشخصية و مو من حق حدا يفرضو او يلغيه
تمام كل كلمه مظبوطه
ودليل على انك فعلا مع الحريه بجد مو مع طرف على حساب الاخر

krimbow

18/03/2006, 06:48

مرحبا مجود
عايديللي بنوتتك و انشالله عقبال المية سنة و عقبال ما نشوفها بالروب و الطربوش الاسود و نفرح فيها

يا مجود في انسانة متفوقة انرفضت بالجامعات بسبب حجابها
هي جريمة بحق الانسانية
الاعلان العالمي لحقوق الانسان بيقول بحق كل انسان بالاعتقاد و الاعتناق
هي الانسانة يمكن تكون احسن من فولتير و داروين
كيف ممكن باسم الحرية امنعها عن شي بسبب مواقفها الدينية ؟؟؟

مرحبا محمد

هو الموضوع صعب فعلا انك تفهمو بكل وضوح .بس انا ححاول اوضح شوي

شكرا ع توضيحك بس انو ليش صعب افهمو ؟؟؟
حسب علمي الاسلام ما هوي دين باطني
و مو معقول اني اعتنق الاسلام لحتى افهمو
يعني عار على الاسلام و المسلمين اصلا انو يخلوا واحد يعتنق دينهم بدون ما يكون فاهمو
بستوعب بالاول و بعدين بقرر اعتنق او لأ

عقيدة المسلمين وفي قرأنهم واحاديثهم
مجموعه من الاوامر الواضحه والمباشره الموجهه للمسلمين باتباع رسولهم وتقليده في كل كبيرة وصغيرة .
لان الدين الاسلامي يختلف عن غيره في انه يقيد المسلمين في افعالهم واقوالهم وفي المقابل لهم الجنه .

طيب هاد الشي انا فاهمو و عارفو كويس كتير كمان
و انتوا احرار تتبعوا يللي بدكم
متل ما النباتيين احرار ياكلوا او يمتنعوا عن اكل يللي بدهم
لكم دينكم و لي دين

وما هو طبيعي بالنسبه لك (ان محمد بالنسبه لك انسان )وهذه نظره صحيحه ولكنها من جانب واحد .
فهي ليست نفس النظرة للمسمين (فالمسلمين ينظرون له على انه انسان بالاضافه الى انه رسولهم ومعلمهم وشفيعهم يوم القيامه كما انه مفضل على غيرو بالرساله .كرسول يعني لا يصح ان يكون مثل اي انسان عادي)

اي هون بختلف معك
انت من حقك تعتبرو متل ما بدك
بس مو من حقك تفرض نظرتك عليي
يعني انا بشوف محمد انسان عظيم متلو متل هالعظماء و نقطة انتهى (و حطلي خط تحت نقطة انتهى)

يعني كيف بدك ياني اعتبرو "شفيع" ازا انا اصلا غير مؤمن بالجنة و النار و يوم الحساب ؟؟؟
حسب معلوماتي الحصان هوي من يجر العربة و ليس العكس

الصح والخطأ مسأله نسبيه
لان ما في عندنا مرجع واحد او اتفاقيه معينه .نرجع الها في تحديد وتعريف الصح والخطأ
يعني جايز و اكيد انا وانت وغيرنا نختلف في موضوع معين
انت تشوفو صح وانا اشوفو غلط والعكس صحيح .

ها ها
هون اتفقنا تمام
الصح و الخطأ مسألة نسبية
و لحتى زيدك من الشعر بيت
كل موقف اخلاقي هوي موقف فريد و مستقل بذاتو عن غيرو من المواقف الاخلاقية

و العقل وحدو (و ليس السنن و لا الكتب المقدسة) هوي القادر على تفسير و تقييم الامور الاخلاقية النسبية متل الصح و الخطأ
و ما كان يعتبر صحيحا من 1400 سنة (متل العبودية) اليوم منعتبرو جريمة منكرة
مشان هيك عقلك وحدو هوي يللي بيعرف الصح من الخطأ

بصراحه مش فاهم يعني ايه ماركه تجاريه .
يعني بتقصد علامه للمسلمين بس ولا حاجه تانيه

ماركة تجارية
متل شعار شركة مرسيديس .. عارفو ؟؟ لما تشوف هالشعار على باب شي مكتب ... بتعرف مباشرة انو هالمكتب الو علاقة ما مع شركة مرسيديس
ذات الشي الحجاب
لما تشوف امرأة لابسة حجاب ... رح تعرف انها مسلمة
طيب ما هيي قبل كل شي انسان ... بكل ما تحوي هالكلمة من معاني سامية
بعدين هيي انثى ... بكل ما تحوي الانوثة من معاني
بعدين قد تكون ام، و قد تكون طالبة، و قد تكون طبيبة او ممرضة او ....او رقاصة او حتى عاهرة
و بالاخير هيي بتتبع تعاليم محمد
لكن هيي قلبت كل المفاهيم
و رفضت كل المعايير السابقة و قررت انها تفهمني اولا و اخيرا انها بتتبع تعاليم محمد (و غالبا متل ما قلت انت يمكن تكون ما بتعرف صلاة المغرب كم ركعة) ..
طيب اساسا انا ما بيهمني هالشي
بيهمني انها انسان، بيهمني انها انثى، طبيبة طالبة مهندسة ام.... الخ
و ما بيهمني اطلاقا مين بتعبد و شو بتعبد و كيف

السورية المشتاقة

18/03/2006, 17:47

وصل :سوريا: .. يالله بيكونو البوسات بمناسبة كمان (اليوم عيد ميلادها):king:

:سوريا: :سوريا: :سوريا: :سوريا:

مرحبا سورية

:سوريا: :سوريا: :oops:

لأ مو لأنو محمد كان يشارك بجنازة نحنا منشارك
لأنو محمد كان انساني متلنا مشان هيك كان يشارك

كريم بس حبيت قلك قصدي من ذكر القصة عن الرسول الكريم محمد...

لنفترض انني انعزمت عحفلة لصديقة مسيحية او مسلمة او حتى يهودية

رح لبي دعوة الحفلة مشاركة مني بالفرح

ورح تكون هالتلبية بعد تفكير مني يعني بشاور :هل الافضل اني روح او لا ؟؟؟

والعقل هو الي رح يعطيني الجواب الي انا بشوفو صح حسب كل دعوة..هدا اولا

تانيا في دافع رح يعزز تلبيتي للحفلة وهو شئ عند المسلمين يسمى "السنة"

السنة هون لا اقصد بها الطائفة السنية

قصدت عقيدة يتبعها المسلم اقتداء منه بالرسول ومتاكدة انك بتعرفها

يعني الي كان يعملو الرسول نحنا مو منقلدو دون فهم بل نقتدي به عن فهم واقتناع :oops:

وللمسلم حرية الاقتداء بالسنة يعني مو ضروري ولا اجباري الاقتداء بالرسول

لكن من الافضل ....لهالسببب ذكرت القصة سابقا بتمنى تكون وضحت وجهة النظر :سوريا:

انا عم ناقشك كانسان اسمو كريم عندو براسو مخ بيعرف الصح من الخطأ

كانسان بشوف انو الحجاب مجرد ماركة تجارية مسجلة باسم الدين الاسلامي

اسفة كرسم ازا فهمتني غلط
انا قصدت شئ اخر لما قلتلك "انت كمسيحي " بس الظاهر اسأت التعبير
المهم رح اشرحلك برد لاحق القصد من كلامي ...:سوريا:
وليش تختلف وجهة نظري عنك بتشبيه الحجاب بماركة ...:سوريا:

انا ضد انو ينمنع لبس الحجاب سواء بتركيا او بغيرها

:سوريا: :سوريا: :سوريا:

بنفس الوقت انا ضد انو ينفرض لبس الحجاب سواء بالسعودية او بغيرها
هي حرية شخصية لاي انسانة

بس حبيت صحح اعتقاد البعض بالحجاب السعودية

انا ضد فرضه لانو لهالسبب السعوديات بس يطلعو لبرا عم يشلحوه

لكن لا تنسى انو السعودية هي الدولة الوحيدة الي عندها هالقانون

وعفكرة هالقانون عم يتلاشى بشكل سريع و بهالوقت هالقانون يطبق بعض المناطق فقط...

و هالقانون موجود في السعودية من باب انها دولة اسلامية بحتة ومن حقها الحفاظ على المظهر الديني د اخل اراضيها ...و انا مو مع فرض اي شئ طبعا

و صحيح انو السعودية تفرض الحجاب لكنها لا تمنع لبس الصليب

والدول الاسلامية الاخرى لا يوجد بها اي شئ من هالحكي ...

بالعكس انا مقيمة بالكويت وفي كتير كنائس وكل واحد حر بلبسو ...

انا بالنهاية ارفض اي شئ بييجي بالقوة اتباعا للقاعدة الشرعية "لا اكراه في الدين"

السورية المشتاقة

18/03/2006, 17:52

الاعلان العالمي لحقوق الانسان بيقول بحق كل انسان بالاعتقاد و الاعتناق
هي الانسانة يمكن تكون احسن من فولتير و داروين
كيف ممكن باسم الحرية امنعها عن شي بسبب مواقفها الدينية ؟؟؟

اه يا كريم فتقت جروحاتي بس يسلم تمك وانشاء الله يضل هالتم يقول الحق ويطلب الحرية دون لاصق وطني :gem: :سوريا:

حسب علمي الاسلام ما هوي دين باطني

صحيح هو دين واضح
وبتوقع شرحتلك "السنة"بردي السابق :سوريا:

بس حبيت صحح للاخ محمد غلط بسيط : الاسلام لا يقيد المسلم باتباع السنة النبوية
ولا يفرضها عليه .. هي السنة للمسلم حرية اختيار سواء اتباعها ام لا :سوريا:

السورية المشتاقة

18/03/2006, 18:07

هلق كريم رح اشرحلك قصدي "انت كمسيحي تعتبر الحجاب ماركة وانا كمسلمة لا اعتبره كذلك"
وانو انت عم تحكي كانسان مو كمسيحي وبس ...:سوريا:

قصدي كان انو الحجاب في الاسلام يختلف تماما عن المفاهيم الخاطئة المزروعة بالناس ...

المفهوم الخاطئ للناس عن الحجاب :

في ناس بتتوقع انو الحجاب هو عبارة عن قطعة قماش بتشتريها المسلمة وبتلبسها وبس ...:pos:

وبتتوقع انها بهالشكل بتكون خلوقة ومحترمة ومافي منها ...

المفهوم الاسلامي الصحيح للحجاب :

ان الحجاب هو مو بس هالقطعة الي بتغطي الراس بالعكس.. الحجاب مفهومه اوسع بكتير
الحجاب هو تغطية الشعر واللبس المحتشم الي بيظهر البنت بشكل مؤدب ...
والحجاب لا ينفع دون زينة الاخلاق والقلب الصالح ...كما قال الرسول : ألا في الجسد مضغة اذا
صلحت صلح الجسد كله واذا فسدت فسد الجسد كله ، ألا وهي القلب ...
ما قال الحجاب هو الي بيصلح والي بيخرب
وفي قصص كتير عن موضوع اهمية نقاء القلب بس مارح ادخل فيها ...

بهالشكل بيكون الحجاب في الاسلام مو مجرد علامة تطبع على البنت لتبين انها مسلمة
هو فعلا انو الي متحجبة رح يعرف انتمائها الديني للاسلام
لكن تعا للواقع ...الاسلام يعنى بالخلق قبل المظهر هل هيي طبقت هالشي ؟؟؟
اذن هل تستحق لقب مسلمة حقيقية ؟؟؟ الله اعلم

الحجاب عبادة مو عادة
مو عادة روتينية للبنت المسلمة متلو متل الفطور والغدا والعشا
الحجاب الو معاني سامية كتير ترقى عن كونه مجرد علامة تميز المسلمة :سوريا: :سوريا:

اما بالنسبة لاني خاطبتك كمسيحي

اسفة مرة تانية ما قصدت هيك :سوريا:

الانتماء الديني مو هو الي بيحدد العلاقات بين الافراد والناس

وانا غير متحجبة لكني ادافع عن كل فتاة سلبت من حريتها بممارسة معتقداتها باسم الحرية
متل ما زكرت انت :سوريا: بدافع عنها لانها انسانة وبتهمني قضيتها
لانو بيوم من الايام بازن الله لما رح ارتدي الحجاب مابدي هالمشكلة تؤذيني :سوريا:

تحياتي وشكري لالك كريم :سوريا:

toocoolfriend

18/03/2006, 20:27

خلاصة الموضوع
نحنا أبدا أبدا مش مع فرض الحجاب لا بالسعودية ولا بغير السعودية. وبنفس الوقت ضد منع الحجاب أو أي مظهر ديني لا يضر بالآخرين. وهيك قلنا عقلنا وأخلاقنا وديننا, مش محمد ولا غير محمد.

محمد ابراهيم

19/03/2006, 03:34

بس حبيت صحح للاخ محمد غلط بسيط : الاسلام لا يقيد المسلم باتباع السنة النبوية
ولا يفرضها عليه .. هي السنة للمسلم حرية اختيار سواء اتباعها ام لا :سوريا:

كيفك ؟؟ايه اخبارك:سوريا: :سوريا:
ندخل عالموضوع ....
فهمتي كلامي باي طريقه؟؟؟؟؟؟؟؟؟:shock:
انا ما جبت سيرة السنه النبويه في حد ذاتها:سوريا:
انا قلت
في عقيدة المسلمين وفي قرأنهم واحاديثهم
مجموعه من الاوامر الواضحه والمباشره الموجهه للمسلمين باتباع رسولهم وتقليده في كل كبيرة وصغيرة .
لان الدين الاسلامي يختلف عن غيره في انه يقيد المسلمين في افعالهم واقوالهم وفي المقابل لهم الجنه .

يعني يا اختي الكلام واضح (قرأن واحاديث)
اوامر واضحه ومحدده ..اما من الله واما من الرسول ..وكلاهما امر واجب التنفيذ وغير قابل المناقشه ..
فهل يجوز لكي مناقشه اوامر الله ورسوله؟؟؟؟حتى لو لم تقتنعي ...

ممكن اوضحلك اكتر لو عايزه(انا بس وضحت اني مش قاصدي السنه النبويه )

محمد ابراهيم

19/03/2006, 04:05

مرحبا محمد
مرحبا كريم
كيفك؟؟

شكرا ع توضيحك بس انو ليش صعب افهمو ؟؟؟
العفو
كمل السؤال للاخر
انا قلت فالاخر بكل وضوح (يعني صعب تفهمو بكل وضوح )
حسب علمي الاسلام ما هوي دين باطني
تمام كلامك صح
الاسلام واضح في مصحف في 114 سورة بيكلمو بصفه عامه عن حاجات كتير(هو ده الاسلام)
و مو معقول اني اعتنق الاسلام لحتى افهمو
كمان كلامك صح
بس كمان انا ما قلت انك مش فاهم الاسلام عشان مو مسلم
بس كان واضح انك ما عندك معلومات عن سبب تقليد المسلمين لرسولهم
ولا انا فهمت غلط؟؟؟؟
او انك مستغرب..
وف الحالتين حبيت اوضح الك السبب.
فهمن قاصدي ايه؟؟؟؟؟:سوريا:
يعني عار على الاسلام و المسلمين اصلا انو يخلوا واحد يعتنق دينهم بدون ما يكون فاهمو
بستوعب بالاول و بعدين بقرر اعتنق او لأ
كمان كلامك صح
بس انا ما كان في كلامي شيء بهالمعنى:shock: :shock: :shock:
ولا فارقه معي (دخول اي شخص للاسلام )
شوف دلوقتي يجي واحد ويقلي انت مو مسلم...
لانو لن يزيد من ملك الله في شيء ولن ينفع الله في شيء
ربع العالم مسلمين ..وفي رأيي ليس لهم قوة حقيقيه
على الرغم من ان مثلا في احد حروب المسلمين(مؤته) كان المسلمين 3000 وكان الروم والغساسنه 200000 ولم يستطيعوا ان يهزمو المسلمين بس هالكلام كان من 1400 سنه;-) ..يعني الموضوع مو بالعدد
انا قاصدي اوضحلك ان مهما زاد عدد المسلمين ما بتفرق معي
حتى لو العالم كلو قرر انو يحاربهم والله ما بتأثر ولا فارقه معي
(كفايه كده احسن الاعضاء المسلمين حيفكرو اني هتركهم فالحرب):o :o

محمد ابراهيم

19/03/2006, 04:38

اي هون بختلف معك
انت من حقك تعتبرو متل ما بدك
بس مو من حقك تفرض نظرتك عليي
ياخي هو انا فرضت عليك نظرتي
انا قلت
وما هو طبيعي بالنسبه لك (ان محمد بالنسبه لك انسان )وهذه نظره صحيحه ولكنها من جانب واحد .

يعني لانك تقف في جانب واحد هو النظرة الانسانيه .وقلت لك ان نظرتك صحيحه
ولكن الموضوع هو لانك لا تؤمن بمحمد كرسول . لن تنظر له كرسول ..
وليس دعوة مني لك ان تنظر له كرسول
ولكن اوضح لك لماذا نختلف في جوانب الرؤيه(فمن الطبيعي ان نختلف في النظر اليه فانت تنظر له كانسان وانا انظر اليه كانسان و رسول )
ولكني اردت ان اوضح ما هو الاختلاف في جوانب الرؤيه لكل منا
والاهم اني قلت لك ان نظرتك طبيعيه لانك لا تؤمن به كرسول
ولم ارغمك على ان تنظر له مثلي ...بس

يعني انا بشوف محمد انسان عظيم متلو متل هالعظماء و نقطة انتهى (و حطلي خط تحت نقطة انتهى)
من غير ما احط خط
خلاص انا مقتنع ان كل واحد حر فرأيو ومعتقداتو بشرط انو ما يعتدي على حريه غيرو
يعني كيف بدك ياني اعتبرو "شفيع" ازا انا اصلا غير مؤمن بالجنة و النار و يوم الحساب ؟؟؟
بنرجع لنفس النقطه من جديد
مش هاكلم تاني
بس بوضح اني كنت بقصد ان فيه نظرة للمسلمين تختلف عن نظرتك
كيف ما المسلم بينظر لسيدنا المسيح على انو رسول وكلمة الله
بتيجي نظرة المسيحين الو على انو ابن الرب
(الغرض توضيح انو من الطبيعي انو تختلف نظرتنا طالما اختلفت معتقداتنا)

ماركة تجارية
متل شعار شركة مرسيديس .. عارفو ؟؟ لما تشوف هالشعار على باب شي مكتب ... بتعرف مباشرة انو هالمكتب الو علاقة ما مع شركة مرسيديس
ذات الشي الحجاب
لما تشوف امرأة لابسة حجاب ... رح تعرف انها مسلمة
اه كده فهمت
ورأيي ان لحد هون ما في مشكله
طيب ما هيي قبل كل شي انسان ... بكل ما تحوي هالكلمة من معاني سامية
بعدين هيي انثى ... بكل ما تحوي الانوثة من معاني
بعدين قد تكون ام، و قد تكون طالبة، و قد تكون طبيبة او ممرضة او ....او رقاصة او حتى عاهرة
و بالاخير هيي بتتبع تعاليم محمد
لكن هيي قلبت كل المفاهيم
و رفضت كل المعايير السابقة و قررت انها تفهمني اولا و اخيرا انها بتتبع تعاليم محمد

شوف بقى يا اخي انا عن نفسي مش متأكد من كلامك
يعني مين قالك ان اللي بتلبس الحجاب عايزة تفهم اللي بيشوفها انها بتتبع تعاليم محمد
وعشان المسلمين يفهموا ايه المقصود خلينا نقول
انها بتتبع تعاليم الاسلام.(ولو في اعتراض على تعديلي وضحو)
(و غالبا متل ما قلت انت يمكن تكون ما بتعرف صلاة المغرب كم ركعة) ..
عشان نتفق خلينا نغير غالبا بممكن :سوريا:
ولو ما غيرتها ما بنتفق:o

السورية المشتاقة

20/03/2006, 18:04

شكرا محمد :سوريا:

krimbow

20/03/2006, 18:54

شكرا محمد و سورية ع التعليق

مشكلة المسملين انو باي حوار بيتعلق و لو من بعيد بالاسلام بييجوا بيفترضوا حالة اليوتوبيا الالهية يللي المفروض يكون الاسلام عليه (و لم يطبق بأي مجتمع من المجتمعات)

طيب عال كتير ... رح امشي معكم
خلونا نفترض جدلا انو كل محجبة عم تطبق التعاليم تبع الحجاب متل ما الله خلقها و الآشية معدن على قولة المصريين
هل هذا يعني انو فقط المحجبات من يتمتع بالعفة و الطهارة ؟؟؟

الجواب رياضيا اكيد لأ
اكيد في غير المحجبات من المسلمات من يتمتع بالعفة و الطهارة، و انا شخصيا بعرف انسانة ... مع الاسف لازم قولكم انها مسلمة (و تأسفت لأنو ما بحب ازكر دين الشخص) و غير محجبة و بحطها بزمتي انها شريفة جدا و طاهرة
و مثال تاني ازا بدكم ... السورية المشتاقة ايضا غير محجبة ... بس اكيد هيي شريفة و عفيفة

هلأ خلونا نرجع شوي ع الكرة الارضية
حسب تجربتي ... اغلب بنات الهوا بمجتمعنا السوري .. بس يطلعوا من بيوتهم بيحطوا الحجاب و بينزلوا ع السوق فيه ... يعني بتلاقوهم الصبح شي بيجنن مما هم عليه من العفة و الطهارة ... بس هالشي ما منعهم انو يمارسوا الدعارة

لاحظوا انو هدول لا يمثلوا سوى عينة زغيرة من مجتمعنا ... بس هالعينة موجودة فعليا
هالعينة بتنزل ع الشارع و بتظهر قدام الناس و هيي لابسة الحجاب ...
ليش يا حزركم ؟؟؟
لأنو مجتمعنا اول ما يشوفها محجبة رح يتعامل معها على اساس انها عم تطبق تعاليم الدين
يعني عملية خداع و احتيال واضحة

طيب هلأ خلونا نحاول نوحد نظرتنا للمحجبة
شو المطلوب مني لحتى صير شوف المحجبة من وجهة نظر اسلامية ؟؟؟
اني لما شوف اي صبية محجبة ابصم انها عم تطبق تعاليم الدين ؟؟؟

اي ما حزرتوا

ما بحكم ع اي انسان سلف و خصوصي من مظهرو
على الرغم من اهمية المظهر ... إلا انو ما بيعطي غير اشارات قد تصح و قد لا

شو رأيكم تطبقوا نظرتي ؟؟؟ اكيد بهالحالة رح اضمنلكم انو اولا ما توقعوا بشرك الخداع تبع المحجبات الكاذبات
و كمان بضمنلكم انو تطبقوا الحكمة القائلة "اذا جاءكم فاسق بنبأ فتبينوا ان تصيبوا قوما بجهالة"

بالنهاية متل ما قالت السورية
الحجاب عبادة مو عادة
بس مع الاسف
هالشي ما عم يتم تطبيقو

حاولوا تخلوا حواراتنا بعيدة عن اليوتوبيا
يعني لما بدكم تناقشوا ناقشوا بعيد عن الحالة المثالية ... لأنو ما سجل تاريخ البشرية اي تطبيق لألها

السورية المشتاقة

20/03/2006, 20:51

معك حق كريم الحجاب ليس رمز للعفة وياما بنات مخبين تحت الحجاب اخلاق رديئة
واعمال بتشيب شعر الراس وهالشي معروف

يا كريم في قصص بالاسلام بتقول انو راقصة تدخل الجنة بسبب رفقها بالحيوان
و بسبب تعاملها الحسن مع الناس

وفي مسلمة متعبدة متبتلة بكامل حجابها تدخل النار بسبب
سوء خلقها بالكلام وظلمها للناس
وظلمها للحيوانات وتعذيبها للقطط ...تخيل انو كل عبادتها ما نفعتها

و اما المثالية معك حق
وبصراحة انا بتفاجا بالناس الي بتعمم وبتعتبر شعب باكملو مثالي

لهالسبب انا بوافقك برايك ومن فترة طرحت هالموضوع بقسم التاريخ
بيتناول موضوع المظهر والقلب وانو هل المظهر يوحي عن القلب ؟؟؟

وهدا الرابط بتمنى تتطلع عليه لانو بيهمني رايك فيه

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

MarieSou

21/03/2006, 06:24

عن جد رد محمد ابراهيم وسوريا مشتاقة كتير مهذب و بتقدر تقول عقلاني بدون تعصب, بالعادة ما بقرا كتير هالمواضيع واذا بدخل ما بكمل الصفحة بفز عصبي وبطلع من الحكي اللي كلو صد و رد بس هون في سلاسة بالردود من كريم ومحمدوسورية
اسفة اني دخلت هيك لا احم ولا دستور بس النقاش هون كان بالعقل
حبت قول رايي ودمتم ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

محمد ابراهيم

21/03/2006, 15:27

شكرا محمد :سوريا:
العفو :سوريا: :سوريا:

محمد ابراهيم

21/03/2006, 15:32

عن جد رد محمد ابراهيم وسوريا مشتاقة كتير مهذب و بتقدر تقول عقلاني بدون تعصب, بالعادة ما بقرا كتير هالمواضيع واذا بدخل ما بكمل الصفحة بفز عصبي وبطلع من الحكي اللي كلو صد و رد بس هون في سلاسة بالردود من كريم ومحمدوسورية
اسفة اني دخلت هيك لا احم ولا دستور بس النقاش هون كان بالعقل
حبت قول رايي ودمتم ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
شكرا:سوريا: :سوريا: :سوريا:
وطالما رأيك هيك دايما
ادخلي على طول وانا بضمنك :oops: :oops: :oops:
هو الكلام هون باحترام سواء كان من السوريه او كريم ولو ماكان هيك ما كنت كتبت
انا عادي عندي انو نختلف في الرأي ..المهم يكون النقاش محترم ويقدر كل واح يقول رأيو ويوضحو كمان ..من غير ما حد يشتم حد او يسخر من دينو ....

محمد ابراهيم

21/03/2006, 16:02

شكرا محمد و سورية ع التعليق
العفو :سوريا:

مشكلة المسملين انو باي حوار بيتعلق و لو من بعيد بالاسلام بييجوا بيفترضوا حالة اليوتوبيا الالهية يللي المفروض يكون الاسلام عليه (و لم يطبق بأي مجتمع من المجتمعات)
ما في كلامي شيء بيدل على مصطلح اليوتوبيا الالهيه(ما بقصد نصا فقط :سوريا: ولكن معنا كمان)

طيب عال كتير ... رح امشي معكم
خلونا نفترض جدلا انو كل محجبة عم تطبق التعاليم تبع الحجاب متل ما الله خلقها و الآشية معدن على قولة المصريين

لا يا خيي ما تمشي معنا :سوريا:
انا بمشي معاك:سوريا:
ليس كل محجبه تتحجب من اجل تطبيق تعاليم الاسلام ..بل هناك من تتحجب وهي غير مقتنعه (اي يفرض عليها)وكذلك هناك من تتحجب كي يقول عنها الناس انها متدينه ;-)
بس هادول مو الكل ...
في متحجبات مقتنعات بالحجاب وكتير ..

هل هذا يعني انو فقط المحجبات من يتمتع بالعفة و الطهارة ؟؟؟
الجواب رياضيا اكيد لأ
مو رياضيا بس وعمليا كمان
لاني متلك بعرف بنات مو متحجبين ومتل ما بتقول تتمتعن بالعفه والطهارة..

طيب هلأ خلونا نحاول نوحد نظرتنا للمحجبة
طيب وليه ؟؟؟
ايه السبب؟؟؟
ما في داعي
شو المطلوب مني لحتى صير شوف المحجبة من وجهة نظر اسلامية ؟؟؟
اني لما شوف اي صبية محجبة ابصم انها عم تطبق تعاليم الدين ؟؟؟
مو مطلوب شيء ..بس انت حكمت ..
ارضى بحكمك مشان تكبر بنظر اللي يقرى كلامك
حكمك تحت ..يلا اقراه
اي ما حزرتوا

ما بحكم ع اي انسان سلف و خصوصي من مظهرو
على الرغم من اهمية المظهر ... إلا انو ما بيعطي غير اشارات قد تصح و قد لا
فهمت من حكمك انك
مش حتحكم على المحجبه انها لابسه الحجاب مشان تثبت الك او لغيرك انها انسانه محترمه وطاهرة ..وكمان مش حتحكم انها انها طاهرة ومحترمه ..
يعني هتستنى لما تتاكد من اخلاقها وتصرفاتها (الاشارات اللي ممكن تكون صح او غلط)

شو رأيكم تطبقوا نظرتي ؟؟؟ اكيد بهالحالة رح اضمنلكم انو اولا ما توقعوا بشرك الخداع تبع المحجبات الكاذبات
شوف الصدف :سوريا: :? :سوريا: انا كمان بطبق هالنظرة من ابل ما اعرفك بزمن طويل..
يظهر اننا تفكيرنا قريب من بعضو ..

و كمان بضمنلكم انو تطبقوا الحكمة القائلة "اذا جاءكم فاسق بنبأ فتبينوا ان تصيبوا قوما بجهالة"
هالحكمه ما الها علاقه بموضوعنا وهي موجوده في كتاب المسلمين ضمن اياتته ...

بالنهاية متل ما قالت السورية
الحجاب عبادة مو عادة
بس مع الاسف
هالشي ما عم يتم تطبيقو

حاولوا تخلوا حواراتنا بعيدة عن اليوتوبيا
يعني لما بدكم تناقشوا ناقشوا بعيد عن الحالة المثالية ... لأنو ما سجل تاريخ البشرية اي تطبيق لألها
ياخيي صدقني بيتم تطبيقو وموجود بنات كتير مقتنعه بالحجاب
وما تسميه مثاليات ولم يسجل في التاريخ موجود واقع حاليا وهذا دليل على انو ممكن تطبيقو
وكمان كان موجود فالماضي بس انت بتقرا فاي كتاب تاريخ؟؟؟:سوريا: :سوريا:

السورية المشتاقة

22/03/2006, 13:42

الموضوع يا محمد ويا كريم مو موضوع هل الحجاب يفرض على البنت ام لا
ام هل الحجاب رمز لاخلاق البنت ام لا
بنظري ازا كانت البنت المتحجبة لابسته منظر وبدون اخلاق او ازا كانت لابستع تعبد لربها وخلوقة
بالحالتين لا يحق لاحد حرمانها من ارتداء الحجاب
انا فتاة مسلمة وافتخر بذلك واحمد الله
الحجاب واجب عليي ارتداؤه و
رح طبق هالشي قريبا باذن الله
وما برضى حدا يمنعني لانو هاد شي بيخصني
وبفتخر فيه
لهيك الموضوع يتحدث حول نقطة معينة
الحرية الزائفة في الغرب ضد المسلمين

krimbow

22/03/2006, 18:46

الموضوع يا محمد ويا كريم مو موضوع هل الحجاب يفرض على البنت ام لا
ام هل الحجاب رمز لاخلاق البنت ام لا
بنظري ازا كانت البنت المتحجبة لابسته منظر وبدون اخلاق او ازا كانت لابستع تعبد لربها وخلوقة
بالحالتين لا يحق لاحد حرمانها من ارتداء الحجاب
انا فتاة مسلمة وافتخر بذلك واحمد الله
الحجاب واجب عليي ارتداؤه و
رح طبق هالشي قريبا باذن الله
وما برضى حدا يمنعني لانو هاد شي بيخصني
وبفتخر فيه
لهيك الموضوع يتحدث حول نقطة معينة
الحرية الزائفة في الغرب ضد المسلمين

اي بس نحنا متفقين حول هالنقطة ..
عموما تركيا ليست دولة تؤخذ كمقياس حرية التعبير و الاعتقاد

Majood

23/03/2006, 11:00

اي بس نحنا متفقين حول هالنقطة ..
عموما تركيا ليست دولة تؤخذ كمقياس حرية التعبير و الاعتقاد

انا كمان معك بهالنقطة ...
بس الرمد احسن من العمى كمان

المعذب

23/03/2006, 11:44

انا اريد يا سادتي وانتم تريدون والله عز وجل يفعل مايرد من المؤسف سماع متل هي الاخبار يا اخوان ولكن لا حول ولا قوة الا بالله

المعذب

23/03/2006, 11:47

انا المعذب من بلد الصمود سوريا اقول :اختاه يا ذات الحجاب تحية كم في حجابك انت رائعة مهولة

Daiski

23/03/2006, 12:16

انا بصراحة حابب اشكر كريم و محمد و كنانة على هالحوار العاقل الرايق :سوريا:

شكراً ......;-)

السورية المشتاقة

23/03/2006, 14:47

بصراحة كريم ومجود انا ما بعرف الوضع بتركيا يعني من ناحية الحرية

لكني جبت مقالات بتتعلق بمنع الحجاب فيها لانو منع الحجاب بتركيا ما صرلو ضجة متل فرنسا متلا

يعني مجود انتي عايشة بتركيا وعارفة الوضع انو ازا هيي فيها حرية اولا

لكن شو منقول عن فرنسا بلد الحرية ؟؟؟؟!!!!!!

وبفرنسا صارت شغلات افظع من هيك بكتير

فيروزة

23/03/2006, 16:07

المرأة عليها أن تجمع بين الاثنين معا ...
بين حجابها وحشمتها وسترتها ... وبين عفتها وحيائها واحترامها