الخطبــة الحمصية [الأرشيـــــف]

Abo3zo

27/02/2006, 17:56

أبطال القصة شخصيات منتقاة من الواقع
الوقت الساعة 12 ظهرا
المكان مدينة حمص في أحد الأحياء الشعبية
الحوار:

الخطابة: تطلب الرقم.....عم يرن التلفون.....قريضة انشالله ليش ما حدي عم يرد؟شو نايمين لهلأ؟
ارتفعت السماعة ......ألو
الخطابة : مرحبا خالي
البنت : أهلين
الخطابة : شلونك
البنت : الحمد لله ماشي الحال
الخطابة : الماما هون خالي؟
البنت : أي هون مين بدو ياها؟
الخطابة : قوليلا وحدة
البنت : دقيقة شوي
البنت تنادي أمها: مامااااااااااا يا ماماااااااااااااااا
الام : شبيك
البنت : تعي احكي عالتلفون
الام : مين؟
البنت : وحدة ما بعرف مين
الام : هاتي لشوف هالسماعة ......ألو
الخطابة : مرحبا يا خيتو
الام : اهلين وسهلين
الخطابة : شلونك
الام : الحمد لله
الخطابة : ما أم عبدو؟
الام : أي نعم......مين حضرتك؟؟
الخطابة : يه ما عرفتيني؟
الام: لا والله
الخطابة
: يه انا أم فاروق اللي كانت بصمدت بنتا لأم فيصل وكنتي انتي حاضرة كمان
الام : والله يا خيتو ما تذكرتك
الخطابة : وقتا قلتلك هاي بنتك اللي عم ترقص ؟؟قلتيلي أي ....شو ما تذكرتي؟
الام : أي أي ييي صحي...........اهلين وسهلين يا أم عبدو
الخطابة: بالمأهل ..........وقتا سألتك اذا بتخطبي بنتك قلتيلي أي اذا بيجي نصيبا
الام : أي والله
الخطابة : خلص خيتو......اليوم شو عندك بعد العصر
الام: ييي والله اليوم عندي دوارة انا وسلفتي بعد العصر
الخطابة : طيب منجي هلأ
الام :والله يا خيتو عم سقّط الرزات هلأ بيجي أبو عبدو جوعان خطي بدو يتغدى
الخطابة : بكرا لكان بعد العصر
الام : أي اهلا وسهلا بتشرفوا
الخطابة : يزيدك شرف يا أم عبدو.......والله قلبي انفتحلك وحبيتك كتير
الام : الله يسلمك ويحفظك
الخطابة : خاطرك خيتو ......
الام : الله معك مع السلامة
تاني يوم الساعة 5 بعد العصربتجي الخطابة على بيت الجماعة هيي وأختا أم أحمد وكل وحدة جايبي معها كيس نايلون وحاطا فيه الكندرة
الجديدة
شلحو كنادرون عالدرج ولبسوا الكنادر الجديدة اللي بالكيس ( أهيب قدام الجماعة )
رنو الجرص وفتحت الام الباب: وبعد السلام و الاهلا والسهلا وطق البوسات الحميمية
فاتو هالجماعة وقعدوا بالصالون
الام : انتو من بيت مين ؟
الخطابة : والله يا خيتو نحنا من بيت (...........)
الام : والله والنعم والسبع تنعام منكون...............عن اذنكون شوي
وبتقوم الام وبتروح بتقول لبنتا : يالله قومي لبسي وفوتي ضيفي القهوة وعديلك دقيقتين مشان يشوفوكي ووقت بغمزك بتقومي بتمشي
البنت : طيب ماما
في هذه الاثناء في الصالون
الخطابة لاختها ام احمد : شفتي ولك اختي؟ بيتون مرتب وأكابري.......ليكي على هالصالون ما احلا
ام احمد :أي والله يا اختي.....والام مبين عليها اكابرية كمان .....شفتي على هالكتف الراكز اللي الها ؟
الخطابة : أي والله............بركي ولك اختي بيكون نصيبنا عند هالجاعة..........اي والله مليت من التكحيف من هون لهون وانا عم دق بواب
ام احمد : انشالله
بترجع الام : اهلا
وسهلا
بعد 5 دقائق بتجي البنت لابسة ومتهندسي وشايلة صينية القهوة وعم تمشي شوي شوي
البنت : مرحبا خالي
الخطابة : اهلين وسهلين بنور العين اسامي الله حولك وحواليكي
البنت عم تقدم القهوة: تفضلي خالي
الخطابة : يسلمو هالديات يا أميرة
ضيفت البنت القهوة وراحت قعدت مقابيل أمها
الخطابة لاختها ام احمد همسا: حلوة ولك يا اختي
ام احمد همسا : ما كل هالاد ولك اختي.....مانك شايفي شلون الها شترة وتمها كبير هاي شلون اذا ضحكت؟
الخطابة : لك اختي منيحة ...هاي احلا وحدة منشوفا لهلأ
ام احمد : شو اسمك خالي؟
البنت وهيي خجلانة : اسمي سوزان
ام احمد: عاشت الاسامي يا خالي
الخطابة : شو عم تدرسي خالي؟ بكاروليا؟؟
البنت : لا خالي لساتني حادي عشر
الخطابة : ايه الله يوفقك يا خالي
البنت : شكرا خالي
الام غمزت بنتا مشان تقوم فبتقوم البنت وبتطلع لبرا
الخطابة عم تهمس بأذن اختا ام احمد : رح اطلبا لك اختي هلأ
ام احمد : بكير لك اختي لسا ما سألنا عالجماعة منيح
الخطابة : لا
يا اختي المكتوب مبين من عنوانو
الخطابة :أي اختي ام عبدو.....نحنا طالبين القرب منكن وانتو والهي دخلتو قلبنا بسرعة وحبيناكون كتير
الام : أديش عمرو ابنكون؟
الخطابة : ياستي ابني عمرو 28 سنة شب طول بعرض يخزي العين
الام :وشو بيشتغل ابنك؟
الخطابة : ييييه مشارك ابن عمو على سرفيس مشغلينو على طريق الشام وابوه عندو محل خضرة بسوق الحشيش
وابني خادم جيش ومخلص وصرلو سنة عم ينئ عليي بدو يتجوز...يقبر قلبي
الام : عندو بيت لحالو؟؟
الخطابة : لا والله يا خيتو عندو بيت آجاربجورة الشياح 3 أوض ومنافعون
الام :وين ساكنين يا خيتو؟
الخطابة : يييي بيتنا بباب هود
الام :والله ياخيتو لازم شوف ابو فاروق وآخد شورو .......ولازم نسأل عن ابنكون كمان والله يقدم اللي فيه الخير
الخطابة : ايه متل ما بدك اختي ام عبدو......وبهاليومين بحكي معك تلفون
الام :بيصير خير انشالله
الخطابة: خاطرك
الام : الله معكون مع
السلامة

طبعـا منقوول

silin

27/02/2006, 18:35

شو هيداااااااااااا ضليت ساعة أقرا واخر شي !!!

شو يعني شو صار؟؟؟!!!!

تزوجت ولا لا؟؟

ما بــــــــــــــــــــــــ ــــــــــــــــــــــ لازم اعرف ـــــــــــــــــــــــــ ـــــــــدي

المستحيل

27/02/2006, 20:05

شو يعني هل الحكي كلو حكي نسوان بنسوان
شو قصدك يعني هي الخطبة التقليدية بكل مكان انا كتير بعارضها

باشق مجروح

27/02/2006, 20:31

والله يا اختي يا ام عزو بدنا نعرف شو صار بئى بهالخطبة
تجوزو خزات العين حولون وحواليهن ولا ما صار نصيب
يله كل شي قسمة ونصيب والله يقدم اللي فيه الخير
خوش أنا وما الك عليي يمين عم ادعيلن بالتوفيق لك اختي ما بصير
:clap: :clap: :clap: :clap: :clap:
:lol: :lol: :lol: :lol: :lol:

Daiski

27/02/2006, 20:36

ما بفهم :pos:
بدي اكل ملبس :o و بوظة :o :o :o

Mado0o0

27/02/2006, 20:47

tayyeb shoo sar b3den
bass hek

سرسورة

28/02/2006, 01:26

ايييييييي.....بس مو كل الحماصنة هيك............................................ ......ززز:aah: :aah: :aah: :x :mad:

(((الجنرال أبوجعفرالورد)))

28/02/2006, 03:54

أبوعزووووووووووو يعني في حلقات مقبلة ولا شو ......................
على قولت أبن الخالدي بدنا ناكل بوظة ومحلاي ............... ظريفة هي محلاي ..

MarieSou

28/02/2006, 06:09

شكلا هلخطابة حلبية خيو وخيتو
وما بتفوت هيك عريس لقطة :lol:

Abo3zo

28/02/2006, 11:02

طولـــوا بالكم علينــا يا جمــاعة

هلأ القصة و ما فيها أنه أحسن ما أسئلكم

شو رأيكم بهدا النوع من الخطبة

قلت لحالي هيك بتقـــروا و بتعترفوا لحالكون

:?

شكلها الآراء بلشت تظهر على الساحـة

:pos:

Abo3zo

28/02/2006, 11:05

ابومزيد

28/02/2006, 11:23

انا ماني موافق على العروس لانو تمها كبير

اميرة الظلام

28/02/2006, 19:41

انا ماني موافق على العروس لانو تمها كبير

هههههههه ليش انتا العريس ...

Kakabouda

28/02/2006, 19:47

يا ريت ترجع هيك ايام زمان ...

هلأ بروح الشب عند البنت ( لأ بالأحرى البنت بتروح عن الشب بتقلو بحبك بقلها بحبك اي بدنا نتجوز غصب عن أهلك و أهلي .. و بتلاقيهم تجوزوا ..

بالفعل ضحكني هالموضوع قصدي طق الحنك عن الحريمات الحمصيات ههههههه

SIR RORO

28/02/2006, 19:48

انا ماني موافق على العروس لانو تمها كبير

يحرق حريشك لك روح نستر ما يشوفك نزيه لا يعدمك مو عاجبتك تمها كبير

Abo3zo

01/03/2006, 15:57

يحرق حريشك لك روح نستر ما يشوفك نزيه لا يعدمك مو عاجبتك تمها كبير

مين نزيـه ؟؟

:shock:

marioma alghzayala

01/03/2006, 17:10

يا ريت ترجع هيك ايام زمان ...

هلأ بروح الشب عند البنت ( لأ بالأحرى البنت بتروح عن الشب بتقلو بحبك بقلها بحبك اي بدنا نتجوز غصب عن أهلك و أهلي .. و بتلاقيهم تجوزوا

هللا مو الكل هيك ....;-) ;-) ... اما بالنسبة للغصب اي مزبوط دارجة الخطيفة بهالايام ..:shock: :shock:

silin

01/03/2006, 17:32

مساكين الحماصنة دايما بيطلع شي بضحك عنن يعني او متل هلموضوع او شي نكتة
مع انو انا بعرف كتير من حمص وما هيك
يعني ما كل شي مزح عندن