هي الصورة مين بيتذكرها ووين كانت هي الحادثة وشو بتعني هي الصورة للناس يلي عم تبحث عن الحرية

طبعا الموضوع مابنتهي عند الصورة بس حابب أعرف أرائكون ونبلش نحي شوي عن الحرية
وعن الثورات يلي صارت بدول الكتلة الشرقية

كريمبو وطارق بتمنا أول رد يكون منكون لأنو أنا مشانكون عملت هل الموضوع وحابب نحكي شوي بعدا عن وجع الراس

ببتزكروا هي الصورة شي وقديش كان عمركون وقتيلي شفتوها وشو بتعنيلكون

سلام

هاي الصورة بتذكرني بالاستبداد ما بالحريي
ريمبو وطارق بتمنا أول رد يكون منكون
بس أنا رديت قبلون
:tomtom: :tomtom: :tomtom: :tomtom: :tomtom:

انو انا اول مرة بشوف هالصورة

يا ريت تشرحلنا عن الصورة شوي

هذه الصورة شهيرة جدا.. حدثت في الصين و تحديدا في بكين في الثمانينات من القرن الماضي على ما أعتقد.
الموضوع جميل جدا و أشكر أبو النسيم على طرحه.
سأبدأ بماذا تعني لي هذه الصورة, صورة رجل أعزل يواجه رتل دبابات (المشهد يستمر بأن الدبابة تغير مسارها لتتفادى الرجل و لكن الرجل يتحرك باتجاه الدبابة و يحاول أن يصعد على متنها) . في الحقيقة المشهد تقشعر له الأبدان, كصورة فارس عودة أمام الدبابة الاسرائيلية ... ان هذا التشبث والاصرار على الأفكار الذي يجعلك تستسهل الأخطار مهما كبرت محط اعجاب شديد فعلا.
الآن نبدأ بالكلام عن الحرية, الحرية بكل أنواعها و تفرعاتها هي العمود الفقري و أهم أركان الحياة الانسانية الكريمة . من الضروري جدا أن نكون أحرارا بمصيرنا , بأفكارنا و ميولنا , بانتماءنا و مشاعرنا و معتقداتنا....كذلك من الضروري أيضا حرية العمل وفقا لكل ما ذكر سابقا , اذ أن الحرية ليست فقط أن تفكر كما تريد , الحرية تكمن في أن تفكر كما تريد و أن تتوفر لك الفرصة بأن يكون لك منهج عمل وفق هذه الأفكار .
الحرية للأسف مفهوم براغماتي لأبعد الحدود, اذ أننا يمكن أن نأخذ عينة من مئة شخص مثلا و نطلب منهم من يعرفوا لنا الحرية...سوف نجد مئة تعريف مختلف تقريبا, و البعض قد يعجز عن التعريف.
الحرية كمصطلح يمكن أن نضعها مع مصطلحات أخرى مثل : الاله, الوطن, الدين , العقيدة ...الخ, جميع هذه المصطلحات صعبة التعريف , لذلك تم الاستفادة منها لأغراض بغيضة, لو نظرنا الى الوراء لوجدنا أن أغلب الحروب و الجرائم , ان لم نقل كلها, قد استفادت من احد هذه المصطلحات كمبرر .
بالنسبة لثورات أوروبا الشرقية , هذه الثورات كانت طبعا نتيجة حتمية لحكومات قمعية فاسدة و ديكتاتورية , و للأسف في بلدنا حكومة ليست الا عبارة عن تقليد سيء لهذه الحكومات...و أتمنى أن يكون مآلها كمآل نظام تشاوتشكو في رومانيا, و أن تقام حكومة وطنية ديمقراطية حقيقية بنظام أحزاب حقيقة و بمجلس نيابي حقيقي...عندها فقط سأقول أنني حر, سياسيا على الأقل .

هيدي صورة الجندي المجهول أو المحارب المجهول الصيني
ما بعرف اي سنة بس ماخدين عنها بمادة التربية الوطنية

وهيدا شبيهو فارس عودة


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

ببتزكروا هي الصورة شي وقديش كان عمركون وقتيلي شفتوها وشو بتعنيلكون

أنا هاي الصورة بتعنيلي أنو ذا كان في واحد واقف لحالو قدام شي 6 دبابات احسنلو انو يبعد :lol:

لأنو اذا ما بعد ...رح يشحطو الشباب ..و الدبابات رح تكفي مافي شك

و متل ما بقلك ابو عاصي...لا تقلي انو معك حق...لأنو هو معو مدفع 8) يعني بهيك حالة ...تروك الحق من ايدك و نزيل بسرعة ع الطوابق السفلية

قال معو حق قال .....مدفع هاد :(

أنو شو مشان صار الموضوع بصفحة التالتة ومارد لا كريم ولاطارق

شكرامن كل قلبي يا ياس وإلي تعليق

لا تواخزني عمي ابو النسيم بس كنت مرضان هاليومين شوي و مبارح كان النت بيعجبك

و الف مبروك خروج رياض يسف و مأمون الحمصي من غياهب السجون الموزمبيقية و عقبال البقية

بتصور انو رأي ياس مشكور مكفي و مووفي عن "شو هيي" الحرية ... مشان هيك رح احكي عن "شو هوي المش حرية"
برأيي الحرية ليست برشامة او تحميلة مندحشها بيقوم بيمشي الحال و منطيب من مشاكلنا الاجتماعية
ولا اغنية وطنية و لا عاطفية... حتى لو صدحت ام كلتوم من هون ليوم الدين "اعطني حريتي اطلق يديا" ما رح نحصل على غرام حرية
و لا هيي قوالب جاهزة من العقائد و الايديولجيات .. منتبناها بيقوم منصير احرار
و لا هيي مجموعة من المقالات و الكتب ازا قريناها منصير منعرف كيف نمارس الحرية
مشان هيك ... حتى لو صار طول الموضوع عشرين كيلو متر، ما بيكفي انو نقراه لحتى نصير نفهم الحرية
و ما بيكفي لحتى تكون حر انك تولد من ام حرة و اب حر، و لا حتى هوي شرط من شروط التحرر

الحرية -قبل كل شي- مسؤولية
لا تحرم غيرك مما تبيحه لنفسك و لا حتى من كل ما تحرمه على نفسك
بل عامل الناس كما تريدهم ان يعاملوك

و الحرية -بعد كل شي- تربية و ممارسة

كيف بدك من شعب كامل مفعوس من 2500 سنة بما هب و دب من الجيوش من الاشوريين للاميركان، مرورا بالاغريق و الرومان و الفرس و العرب و التتر و الصليبيين و الترك و الاوروبيين و اليهود و البعثيين و الناصريين و الشيوعيين (يعني مو بقيان غير الهنود و الحبشيين ما احتلونا) انو يقدر يحكي عن الحرية ؟؟؟
كيف بدك من شعب "نصو انبيا" على قولة شكري القوتلي انو يتحرر من وصاياهم ؟؟؟؟
كيف بدك من شعب "اخترع الله" بالالوان انو ما يشوفو شخصي 32 بت؟؟؟؟؟

الحرية بدأت من عنا (أمارتا) بس مع الاسف خلصت من عنا (البعث)

ما بيمشي الحال انو نستورد حرية ماركس و جان دارك و لوثر كينغ و غاندي

لازم نرجع نحيي "أمارتا" لحتى نرجع الحرية لمسقط رأسها

و دمتم :7asheesh:

معافة كريم أشتقنالك يا زلمة شو قصة المرض يلي راكبك من أول السنة لتكون أنفلونزة الطيور :clap: :clap: :clap:
بايخة


المهم

كلام كريم وياس مكفي و موفي وبالفعل حطيتوا النقاط على الحروف تماما بس بدي ضيف شوي على موضوع هي الصورة أو القطة
أول ما شفتها كان عمري شي 10 سنوات سئلت أبي شو بدو هاد الزلمة لحتى عم يخاطر بحياتوا ويوقف بوش رتل من الدبابات (طبعا توجه أبي السياسي بعثي بس قريب لشيوعي أكتر)
المهم قلي بوقتها هاد زلمة علاك متآمر على الاتحاد السوفيتي وبدو حرية و ديمقراطية بدو أمريكا و الإمبريالية تفوت على روسيا وتخربها

طبعا هي الصورة عمرها هلق 15 سنة وقت يلي نهار الإتحاد السوفيتي وعملوا الشيوعيين انقلاب على يلتسن ونزلوا الجيش على الساحة الحمراء وحاصروا مبنى الكرملن وبعدين فرط الانقلاب
هاد مفهوم الحرية يلي ربونا عليه البعثين و الشيوعين و الجماعات الشمولية أنو الحرية هي تأمر على الثورات والفكر الاشتراكي وهاد غلط وقمة الغلط هي الصورة كل ما بشوفها يقشعر بدني وشعر جسمي بيوقف شخص أعزل يواجه رتل من الدبابات من أجل الحرية و من أجل العيش الكريم طبعا لح تقول الناس أنو وقت لي كان الإتحاد السوفيتي موجود كان في شغل والناس عايشة ومبسوطة وكل عم ياكل و يشرب وكان في خير بكل البلاد السوفيتية هاد الكلام مزبوط بس في شغلة بينساها هدول الناس أنو هي الشعوب تفضل الحرية على لقمة السوفيت المغمسة بذل
هلق أنا بسئل طيب ليش شعبنا ما بيقوم وبيثور على الجلادين يلي حاكمينا شو سبب كل هذل لي بيرضاه شعبنا على حالوا
ونحنا عم نعاني بكل النواحي الاقتصادية والسياسية والاجتماعية ليش ما بنقوم وبنوقف بوجه هذا الطغيان متل مو واقف هاد الزلمة بوش الدبابة ليش

شو هو سبب ثقافة الذل يلي بيرضاها شعبنا على حالوا
هل السبب هو الدين
هل السبب هو البعث
هل السبب هو انحدار الثقافة في مجتمعنا
ولا السبب هو أنو نحنا أذلاء وطول عمرنا عايشين بذل من أيام محمد و الخلافة الأموية و العباسية وصار الذل بدمنا

في نقطة مهمة

كلام أبو نهلة جميل
لأنو كمالة المشهد هو أنو الزلمة بيحاول يوقف الدبابة ما بيقد بيقوم بيبعد عنها بس بيتم يقاوم

أيمت بدو يصحا شعبنا من هل السبات أو الأزبط الموت يلي هو فيه


متى تثور يا شعبي على جلاديك
متى نحطم القيود التي وضعوها في رقابنا وأيدينا وأرجلنا


مثل ما قال كريم الحرية ولدت عندنا (أمارتا ) الحرية الحقيقية من بلادنا ولدت قبل كل الناس وقبل جماعة العتابة والميجنة والعلاك المصدى للبنانية جماعة الحكيكا



سوريا بلد الحرية بس للأسف المغتصبة

شو هو سبب ثقافة الذل يلي بيرضاها شعبنا على حالوا

مو بس شعبنا اي شعب

up up up

شو هو سبب ثقافة الذل يلي بيرضاها شعبنا على حالوا

مو بس شعبنا اي شعب

up up up

ما فهمت الكلام اللي بالأحمر. ممكن تشرح؟

ما فهمت الكلام اللي بالأحمر. ممكن تشرح؟

شو سبب ثقافة الذل اللي بيرضاها شعوب العالم وخاصة العالم الثالث والعالم العربي هل هوي الدين القوةالمجتمع تركيبة الناس

شو سبب ثقافة الذل اللي بيرضاها شعوب العالم وخاصة العالم الثالث والعالم العربي هل هوي الدين القوةالمجتمع تركيبة الناس

ثقافة الذل جاية يا أما من الجهل أو من الجوع أو من كليهما

ثقافة الذل جاية يا أما من الجهل أو من الجوع أو من كليهما

وليش الجوع هون بيولد الذل وبمحلات تانية بيولد المواجهة بين الشب والدبابة متل اللي بالصورة وشو دخل الجهل ؟

وليش الجوع هون بيولد الذل وبمحلات تانية بيولد المواجهة بين الشب والدبابة متل اللي بالصورة وشو دخل الجهل ؟

ليش مين قالك انو الشب هاد جوعان؟؟ مانك شايفو حامل كياس بيض شغل كباب و مشاوي :lol:

هلأ نجي عالجد... الشب هاد جامعي و متعلم.. لاحظ هو اللي واجه و ليس الفلاح الصيني اللي بيقضي 18 ساعة باليوم بتعاونية الدولة يشتغل كرمال هاللقمة الناقصة...

الاستبداد شو بيعمل؟ ما بيقتلك من الجوع انما يكاد... يخلّي هاللقمة عامص عليك و تضطر تشغل كل وقتك بالبحث عنها و ما يضللك وقت مو بس منشان تواجه... ما عندك وقت ولا عقل حتى مشان تفكّر انو صح و للا غلط

بالنسبة للجهل.. طبعا الجاهل ( أو المجهّل) ما عندو افق يشوف انو يا ترى هالشي اللي عم يصير جيد و للا سيئ, صح و للا غلط... و هكذا

ليش مين قالك انو الشب هاد جوعان؟؟ مانك شايفو حامل كياس بيض شغل كباب و مشاوي :lol:

هلأ نجي عالجد... الشب هاد جامعي و متعلم.. لاحظ هو اللي واجه و ليس الفلاح الصيني اللي بيقضي 18 ساعة باليوم بتعاونية الدولة يشتغل كرمال هاللقمة الناقصة...

الاستبداد شو بيعمل؟ ما بيقتلك من الجوع انما يكاد... يخلّي هاللقمة عامص عليك و تضطر تشغل كل وقتك بالبحث عنها و ما يضللك وقت مو بس منشان تواجه... ما عندك وقت ولا عقل حتى مشان تفكّر انو صح و للا غلط

بالنسبة للجهل.. طبعا الجاهل ( أو المجهّل) ما عندو افق يشوف انو يا ترى هالشي اللي عم يصير جيد و للا سيئ, صح و للا غلط... و هكذا

ليش بالصين في مشاوي وكباب؟
:lol:

سيدي ياس ليش الشب الجامعي كمان مو واعي انو هاد مستقبله اللي ممكن يضيع بضربة دبابة او اعهتقال؟
بعدين ليش باوربا بيلتعن نفسه الواحد بالشغل ومع ذلك بيحتج
وسؤال انو مثلا جيراننا بلبنان طلعوا وخربوا الدني لما دعوهن السياسيين ب14 او8 اذار بس لما غلي المازوت وفضي بعبدا وماضل خبز وماحدا طلع احتج
برايك ليش وجيرانهون شو وضعون برايك ؟;)

ليش بالصين في مشاوي وكباب؟
:lol:

سيدي ياس ليش الشب الجامعي كمان مو واعي انو هاد مستقبله اللي ممكن يضيع بضربة دبابة او اعهتقال؟
بعدين ليش باوربا بيلتعن نفسه الواحد بالشغل ومع ذلك بيحتج
وسؤال انو مثلا جيراننا بلبنان طلعوا وخربوا الدني لما دعوهن السياسيين ب14 او8 اذار بس لما غلي المازوت وفضي بعبدا وماضل خبز وماحدا طلع احتج
برايك ليش وجيرانهون شو وضعون برايك ؟;)


طبعا الشب واعي انو هاد مستقبلو و ممكن يضيع بضربة دبابة أو اعتقال..... بس شلون بدك ياني أحلل هالشي؟؟ يعني تعا معناتو كمان على نفس المنوال نناقش ليش الفدائيين بفلسطين عم يخاطرو, أو ليش فار س عودة وقّف كمان قدام الدبابة..... أنا ما فيني أسميها غير وقفة عز, و وقفة العز ما ممكن تتحلل اذا مخاطرة و للا الها جدوى. يعني فارس عودة لما كان يضرب الدبابة بحجر كان عم يأثر شي بالدبابة؟؟ طبعا لأ و أكيد اذا بدنا نحلل تصرفو من حيث عمل-نتائج راح نلاقيه مش نافع..... بس يازلمة صورتو كل ما بشوفها تخليني أقشعر

سؤالك عن اوربا غير دقيق.. ممنوع بـأوربا عامل يشتغل أكثر من 35 ساعة اسبوعية, و العامل باوربا ما يشتغل منشان يا دوب يعيش( هاي القاعدة... في استثناءات غير قانونية قليلة جدا

لبنان و جارو برجعلهون في فرصة تانية..... منشان ما نبعّد عن الموضوع

طيب بنحكي عنون بعدين

بس تعا لقلك قلبها من منظار تاني
المواجهة غير متكافئة لا بالصيني ولا مع فارس
وصحيح المنظر بيخلي الواح بيقشعر

بس بالمقابل شو اللي بيضمن انو هالموقف يثبت فعلا بالذاكرة وما يروح لجيوب المسؤولين او يتم استثماره

بعدين بخصوص اوربا او الخليج
لكن ليش كلون بيصرعونا انو هونيك بيمصوا دمك بالشغل وممنوع تعمل شي غير الشغل الشغل الشغل وما بيحقلك تحكي ؟

بعدين بخصوص اوربا او الخليج
لكن ليش كلون بيصرعونا انو هونيك بيمصوا دمك بالشغل وممنوع تعمل شي غير الشغل الشغل الشغل وما بيحقلك تحكي ؟

بأوربا؟؟؟ مين قايلك هيك؟ مو صحيح و ستين مو صحيح. قانون العمل تبع الاتحاد الاوربي قانون ممتاز و حضاري جدا, و حتى حق الاضراب مضمون

الخليج ما رحتلو أنا و لا مفكر اروح... خلي اللي هنيك يحكيلك

معقول ؟
عم قول لحالي ليش بيطلعوا اضراب ؟

بس لكن ليش كل ما بنجيب سيرة اوربا هون وكانو ارتكبنا جريمة واياكون وهونيك بيلعنوا ابو الساعة اللي طلعتو فيها وبيدبحوكون بالشغل

تركلي الخليج لجنب

معقول ؟
عم قول لحالي ليش بيطلعوا اضراب ؟

بس لكن ليش كل ما بنجيب سيرة اوربا هون وكانو ارتكبنا جريمة واياكون وهونيك بيلعنوا ابو الساعة اللي طلعتو فيها وبيدبحوكون بالشغل

تركلي الخليج لجنب

جبلي كلام مني انو التعن ابو الساعة يللي طلعت فيها... هات لنشوف, أي نعم الشغل جدي... راتبك عن شغل 8 ساعات بتشتغل 8 ساعات عالتكّة. بس أكتر من 8 ساعات ما فيهون اساسا يشغلوك, و لو اضطرو يشغلوك لحد 12 ساعة خلال مدة أقصاها 3 أسابيع راح تقبض تقريبا الضعف و عندك اجازة بقد أيام العمل الاضافي مدفوعة و كأنك عم تشتغل.

و ليش يطلعو اضراب؟؟ لأنو دايما يحاولو يحسنو أمورهون, بشكل عام اذا مو اضراب عام عالدولة ما حدا بيأضرب بالعادة, في بالشركات الخاصة مثلا اذا ما اتفقو على تحسين الرواتب التقاعدية و هيك شغلات, و ممكن يكون الاضراب لأسباب غير حرفية مثل حرب العراق.. هون الجامعات و النقابات أضربو

انا قلت انت؟
عم بحكي بشكل عام
من كم يوم استاذ عنا بالجامعة استشرناه الطلاب انو بدنا نطلع بالصيف نعمل استاجات بين فرنسا والمانيا
حتى وقتها سالت حسان عن الموضوع

قام انبحت علينا وقال لا تطلعوا لانو رح تنرموا متل الكلاب هونيك وبيلتعن نفسكون بالشغل واقل غلطة ولو بترجمة كلمة ممكن تطيركون للشارع
ورح تندموا على الطلعة خليكون هون احسن

انا قلت انت؟
عم بحكي بشكل عام
من كم يوم استاذ عنا بالجامعة استشرناه الطلاب انو بدنا نطلع بالصيف نعمل استاجات بين فرنسا والمانيا
حتى وقتها سالت حسان عن الموضوع

قام انبحت علينا وقال لا تطلعوا لانو رح تنرموا متل الكلاب هونيك وبيلتعن نفسكون بالشغل واقل غلطة ولو بترجمة كلمة ممكن تطيركون للشارع
ورح تندموا على الطلعة خليكون هون احسن


أكيد أول فترة رح تلاقو صعوبات من ناحية التأقلم وتأمين عمل وهالشي طبيعي
بس برأيي هالأستاذ قال هيك لأن نحن عنا الاستاذ ما بيقبل يكون طالبو أحسن منو بالمستقبل
فكيف إذا رايح تجيب شهادة او استاج من اوروربا !

انا قلت انت؟
عم بحكي بشكل عام
من كم يوم استاذ عنا بالجامعة استشرناه الطلاب انو بدنا نطلع بالصيف نعمل استاجات بين فرنسا والمانيا
حتى وقتها سالت حسان عن الموضوع

قام انبحت علينا وقال لا تطلعوا لانو رح تنرموا متل الكلاب هونيك وبيلتعن نفسكون بالشغل واقل غلطة ولو بترجمة كلمة ممكن تطيركون للشارع
ورح تندموا على الطلعة خليكون هون احسن

روح لعند استاذك هاد وقلو طالب سنة خامسة طب باسبانيا بيقول عنك كذّاب. و عطيه ايميلي :sly:

أكيد باوربا في قانون كتير حضاري بخصوص العمل
بس اكيد مش للكل
يعني انا هلاء بطلع ع أروبا ما راح يكون وضعي متل أبن البلد
وبالذات إذا ما كان وضعي نظامي 100%
يعني وهي أغلب العرب بأوربا غير شرعيين
أما بظن أو حتى متأكد أنو بالنسبة للمواطن االأوربي وضع ممتاز
وبالنسبة للمهاجر أو المسافر للشغل هونيك ووضعو نظامي
كمان القانون بيكون معو
:D

روح لعند استاذك هاد وقلو طالب سنة خامسة طب باسبانيا بيقول عنك كذّاب. و عطيه ايميلي :sly:
و عطيه رقم تلفوني كمان و قلو بيقلك وسيم انك كذاب :lol:
منين جايب هالحكي هاد؟؟ :?

معقول ؟
عم قول لحالي ليش بيطلعوا اضراب ؟

بس لكن ليش كل ما بنجيب سيرة اوربا هون وكانو ارتكبنا جريمة واياكون وهونيك بيلعنوا ابو الساعة اللي طلعتو فيها وبيدبحوكون بالشغل

تركلي الخليج لجنب
ليك بالفعل متل ما حكالك ياس بالضبط
بس تكون امورك نظامية و مو ع الاسود ;)
كاجنبي ما بيحقلك تشتغل الا ضمن شروط معينة قانونية
يعني معك فيزا عمل
مو معك فيزا سياحة و رايح تشتغل و تروح تقلن بدي حقوقي ك عامل :shock:
بما انو كل شي بالنظام و القانون بتاخد حقك كاملا
وقت بتطلع برى القانون ساعتها حكي تاني :lol:

مو معك فيزا سياحة و رايح تشتغل و تروح تقلن بدي حقوقي ك عامل ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
بما انو كل شي بالنظام و القانون بتاخد حقك كاملا




كلام سليم جدا... بقانون العمل الأوربي و جميع القوانين الثانية المهاجر الشرعي له بالضبط نفس حقوق المواطن ما عدا حق التصويت اللي يكتسبو لما ياخد اقامة دائمة

راتبك عن شغل 8 ساعات بتشتغل 8 ساعات عالتكّة. بس أكتر من 8 ساعات ما فيهون اساسا يشغلوك, و لو اضطرو يشغلوك لحد 12 ساعة خلال مدة أقصاها 3 أسابيع راح تقبض تقريبا الضعف و عندك اجازة بقد أيام العمل الاضافي مدفوعة و كأنك عم تشتغل.

يا صاحبي الإضرابات كلنا شفناها كيف طلعت بفرنسا احتجاجا على القانون اللي بده يطلعوا ساركوزي لحتى ينال من مكاسب العمال بقوانين التقاعد المبكر .مثلا
او حتى قانون العشر ساعات اللي طالبوا فيه قبلها بفترة
وكمان اضراب العمال بألمانيا لتحسين ظروف العمل .
لو انها كانت مثالية كما تدعي فلما نرى ظاهرة الأضراب العمالي تظهر في اوروبا .
تحياتي الحارة
ظل جيفارا

يا صاحبي الإضرابات كلنا شفناها كيف طلعت بفرنسا احتجاجا على القانون اللي بده يطلعوا ساركوزي لحتى ينال من مكاسب العمال بقوانين التقاعد المبكر .مثلا
او حتى قانون العشر ساعات اللي طالبوا فيه قبلها بفترة
وكمان اضراب العمال بألمانيا لتحسين ظروف العمل .
لو انها كانت مثالية كما تدعي فلما نرى ظاهرة الأضراب العمالي تظهر في اوروبا .
تحياتي الحارة
ظل جيفارا

يا أخي ما حدا عم يحكيلك مثالية.. أنا عم قول انو العامل عندو الحق القانوني بانو يعمل اضراب لما في شي بدو يحسنو أو في قانون راح يطلع و مو موافق عليه

و ظاهرة الاضراب هي ظاهرة تحسب لصالح نظام العمل الاوربي و ليس ضده..انو كعامل عندك حق تحتج اذا في شي مو عاجبك..

قولتك يعني بالبلاد اللي مافيها اضرابات يكون لأنو كلو تمام؟

و على فكرة..ظاهرة الاضرابات كما تسميها ما عم تظهر هلأ...موجودة طول عمرها بأوربا

يا أخي ما حدا عم يحكيلك مثالية.. أنا عم قول انو العامل عندو الحق القانوني بانو يعمل اضراب لما في شي بدو يحسنو أو في قانون راح يطلع و مو موافق عليه

و ظاهرة الاضراب هي ظاهرة تحسب لصالح نظام العمل الاوربي و ليس ضده..انو كعامل عندك حق تحتج اذا في شي مو عاجبك..

قولتك يعني بالبلاد اللي مافيها اضرابات يكون لأنو كلو تمام؟

و على فكرة..ظاهرة الاضرابات كما تسميها ما عم تظهر هلأ...موجودة طول عمرها بأوربا
تحياتي صديقي :D
طبعا تحسب لصالح الدول الأوروبية منحها العامل حق الإضراب
بس ما بعرف شو الفائدة من اضراب ما بيجيب نتيجة .
انا طبعا مو ضد كلشي عم يصير بأوروبا بس شايف بالجوهر اللي عم يصير هو شركات كبرى تعمل لاجل مصالحها والدول بقوانينها تعمل لأجل تلك الشركات ولأجل تأبيد سيطرتها على العامل الذي لا يعطى إلا اجزاء ضئيلة جدا من حقوقه .
تحياتي الحارة
ظل جيفارا

بس ما بعرف شو الفائدة من اضراب ما بيجيب نتيجة .

ما بتزكر صار اضراب بلا نتيجة في أوربا... يعني هو آلية الاضراب بأوربا حضارية جدا... النقابات تعلن اضراب 24 ساعة مثلا في اليوم الفلاني, بمجتمع الى حد ما رأسمالي (أأكد على الى حد ما) توقّف العمل 24 ساعة في شركة و خصوصا في شركة من الكبار ممكن الو آثار سلبية جدا بالبورصة مو بس على هالشركة انما على جميع المتعاملين معها, و النقابات تعرف تلعب على هالوتر بشكل ممتاز و خصوصا انو مو فارقة معهون هنن لأنو قانونا الشركات لا تستطيع اتخاذ اجراءات من أي نوع بحق العمال المضربين و لا حتى خصم رواتب أيام الاضراب (رغم انو هنن ما انتجو بهالأيام).

غالبا النقابات تكون مسيّسة و ذات فكر يساري صرف و متأثرة جدا بالأحزاب اليسارية, و انت حطيت مثالين:فرنسا و ألمانيا, المحكومات الآن من قبل اليمين.... اذا بتدقق بالسياسة المحليّة راح تشوف انو أغلب الاضرابات مالها علاقة كبيرة بسبب الاضراب المعلن (يعني كتير أحيان يصير اضرابات قبل انتخابات محلية أو أي شي شبيه لأنو مافي شي يضر بسمعة حاكم محلي أكثر من أنو يصير في اضراب بمنطقتو... و الانتخابات تأمر)...ماعم نقّص من أهمية الاضراب اللي أعتبرو حق طبيعي للعامل, اللي ما أحبّو أنو حق أنا كيساري مؤمن فيه يتم استخدامو لأهداف غير اللي وجد من أجلها.

انا طبعا مو ضد كلشي عم يصير بأوروبا بس شايف بالجوهر اللي عم يصير هو شركات كبرى تعمل لاجل مصالحها والدول بقوانينها تعمل لأجل تلك الشركات ولأجل تأبيد سيطرتها على العامل الذي لا يعطى إلا اجزاء ضئيلة جدا من حقوقه .


أنا بعتبر هالكلام ظلم كبير..عنجد مو هيك, يعني بأوربا ما في شركة كبرى الها هالنفوذ القاطع!! لا شك انو الاقتصاد يلعب دور ضخم و البورصة تأمر كتير لكن في شغلة:

أوربا (عم أحكي عن الدول المنتمية بشكل كامل للاتحاد الأوربي و موافقة على القوانين الاقتصادية الموحدة, يعني بريطانيا على طرف) عملت اقتصاديا شي أنا بعتبر انو جيد, أكيد مو مثالي لأنو مافي مثالية, بس اسقاط الوضع الاقتصادي على الرخاء الاجتماعي بالمقارنة مع باقي مراكز العالم و حتى الأغنى منها اقتصاديا رابح جدا لصالح اوربا

بالنسبة للاقتصاد على مستوى البورصة, نعم في سوق بورصة نوعا ما ليبرالي, لكن محكوم جدا بسياسة الدولة الاجتماعية و الاقتصادية, و في وكالة مراقبة لسوق البورصة تابعة مباشرة لرئاسة الدولة عندها قدرة انو تمنع أي صفقة ممكن ما تتوافق مع سياسة الدولة, هالشي بالدولة الرأسمالية النموذجية مو موجود و حتى منافي للافكار الليبرالية. و كل الشركات مجبورة تقدّم كشوف شهرية و فصلية بجميع عملياتها بهالوكالة الحكومية, و ممكن حتى في حالات خاصة و خطيرة انو يثبت تلاعب أو شي و قضائيا تستلم الدولة ادارة الشركة مرحليا

الشركات الاسبانية مثلا معروف انو نفوذها بأميركا اللاتينية أكبر بألف مرة من نفوذها باسبانيا نفسها. هنيك يعملو صفقات بحياتهون ما يحلمو يعملوها هون.

يظل في حكي كتير عن مفهوم مجتمع الرخاء لكن ما بدنا نقلبها و كأنو أنا الناطق باسم الاتحاد الاوربي:lol: أكيد مافي نظام اجتماعي- سياسي-اقتصادي كامل و مثالي, لكن ضمن ظروف العالم الحالية و الهيمنة الرأسمالية على الاقتصاد العالمي لا شك أبدا انو اجتماعيا و اقتصاديا النظام الاوربي أكثرها عدلا......

على الاقتصاد العالمي لا شك أبدا انو اجتماعيا و اقتصاديا النظام الاوربي أكثرها عدلا......
انا اللي شفته انو ابدا ... لربما كان هامش الحرية المعطى ضخم جدا ولكن حرية لاشيء برأيي دون عدالة اجتماعية
والعدالة الإجتماعية بالشكل الممسوخ الأوروبي منها عبارة عن جرعات مسكنة للشعوب وحملات هروب إلى الوراء ليس أكثر .
ما بعرف كيف بيطلع معك النظام الاوروبي هو الأكثر عدلا .
بس ما بشاركك بالرأي ابدا .
اوروبا : توزيع غير منصف ابدا للدخل القومي .
بعتذر جدا عن التأخير كنت بأجازة تلات ايام بدمشق وما قدرت اعمل شي هنيك
تحياتي الحارة
ظل جيفارا

ما بعرف كيف بيطلع معك النظام الاوروبي هو الأكثر عدلا .


ما عندي عادة أحكي بالمطلق أبدا.... أنا قلت:

أكيد مافي نظام اجتماعي- سياسي-اقتصادي كامل و مثالي, لكن ضمن ظروف العالم الحالية و الهيمنة الرأسمالية على الاقتصاد العالمي لا شك أبدا انو اجتماعيا و اقتصاديا النظام الاوربي أكثرها عدلا......



أنا حكيت انو النظام الأوربي هو الأفضل من بين الموجودين حاليا هو الأفضل رغم مساوئو و أخطائو و نقاط ضعفو. و هاد رأيي و رأي نتيجة عيشي بأوربا... أما انو كيف يطلع و كيف ما يطلع........ و الله يا صديقي الرأي حتى اذا أخدتو و رميتو ع راس حدا ما بيأذي.. مو؟

:D

هون بقى بتفرق بين افضل الموجودين حاليا . وبين المطلوب .وبتفرق بكل انسان كيف بيقيم الوضع .وكيف بيحدد موقفه من انظمة معينة
وع كل خلاف الرأي لا يفسد للود قضية
تحياتي الحارة:D
ظل جيفارا

هي الصورة مين بيتذكرها ووين كانت هي الحادثة وشو بتعني هي الصورة للناس يلي عم تبحث عن الحرية

طبعا الموضوع مابنتهي عند الصورة بس حابب أعرف أرائكون ونبلش نحي شوي عن الحرية
وعن الثورات يلي صارت بدول الكتلة الشرقية

كريمبو وطارق بتمنا أول رد يكون منكون لأنو أنا مشانكون عملت هل الموضوع وحابب نحكي شوي بعدا عن وجع الراس

ببتزكروا هي الصورة شي وقديش كان عمركون وقتيلي شفتوها وشو بتعنيلكون

سلام
عراسي أبو النسيم، إزا كان قصدك عني انا طارق، فمشان الله ما تآخزني لأن ما رديت لهلأ، حاكم كان عندي امتحانات وعمحضر للرسالة. أما مشان الصورة مدري ليش عميطلع إنو مو مسموح شوفها :x:x، وأنا أطالب حكومة أخوية الرشيدة بإعطاء مبررات مقنعة لمنعي من مشاهدة الصورة!!!!! "عراسي حكومة :clap::oops:"
بس قدرت افهم من ردود الشباب وبالذان من رد "ياس" إنو الصورة معبرة عن إرادة الحرية، وللأسف هادا آخر شي بفكر فيه المواطن العربي بعد التخدير يللي عميتعرضلو ابتداءا بالموبايلات وصرعتها وانتهاءا بالقنوات الفضائية الهابطة والمادية، وما بقللك بالآخر إنو مثلما كنتم يولى عليكم، هالحكي ما إجا من فراغ، والدليل حكامنا مقارنة بحكام الغرب، يعني حكامنا للأجانب بيعبدوهن وللمواطن العربي بذللوه قد ما بيقدروا، بينما الحكام الأجانب للعربي بذللوه بينما المواطن تبعهن بعزوه وبيكرموه، يعني نحنا مولى علينا الحكام العرب والأجانب، والتنين عمبذلونا، بينما المواطن الأجنبي كل حكومة بالعالم بتعزو وبتعتبرو بني آدم، فأنا برأيي الطريق إلى الحرية ببلش فينا، لما بتكون نوايانا ونفوسنا صافية رح يكون علينا حكام متلنا.
أبو النسيم شكرا مرة تانية عالموضوع، ومرة تانية إزا كان قصدك عني مشان رد على الموضوع، فبعتذر شديد الاعتذار لأن ما انتبهت لهلأ لضيق الوقت، وإزا ما كان قصدك عني، فيا سيدي ما تواخزنا. وهي أحلى وردة للورد :D

عراسي أبو النسيم، إزا كان قصدك عني انا طارق، فمشان الله ما تآخزني لأن ما رديت لهلأ، حاكم كان عندي امتحانات وعمحضر للرسالة. أما مشان الصورة مدري ليش عميطلع إنو مو مسموح شوفها :x:x، وأنا أطالب حكومة أخوية الرشيدة بإعطاء مبررات مقنعة لمنعي من مشاهدة الصورة!!!!! "عراسي حكومة :clap::oops:"
بس قدرت افهم من ردود الشباب وبالذان من رد "ياس" إنو الصورة معبرة عن إرادة الحرية، وللأسف هادا آخر شي بفكر فيه المواطن العربي بعد التخدير يللي عميتعرضلو ابتداءا بالموبايلات وصرعتها وانتهاءا بالقنوات الفضائية الهابطة والمادية، وما بقللك بالآخر إنو مثلما كنتم يولى عليكم، هالحكي ما إجا من فراغ، والدليل حكامنا مقارنة بحكام الغرب، يعني حكامنا للأجانب بيعبدوهن وللمواطن العربي بذللوه قد ما بيقدروا، بينما الحكام الأجانب للعربي بذللوه بينما المواطن تبعهن بعزوه وبيكرموه، يعني نحنا مولى علينا الحكام العرب والأجانب، والتنين عمبذلونا، بينما المواطن الأجنبي كل حكومة بالعالم بتعزو وبتعتبرو بني آدم، فأنا برأيي الطريق إلى الحرية ببلش فينا، لما بتكون نوايانا ونفوسنا صافية رح يكون علينا حكام متلنا.
أبو النسيم شكرا مرة تانية عالموضوع، ومرة تانية إزا كان قصدك عني مشان رد على الموضوع، فبعتذر شديد الاعتذار لأن ما انتبهت لهلأ لضيق الوقت، وإزا ما كان قصدك عني، فيا سيدي ما تواخزنا. وهي أحلى وردة للورد :D
مرحبا صديقي ..........
قرات ايمت الموضوع بال ب 14-1-2006 يعني وقت اللي كان طارق غوراني لساته موجود ....
تحياتي الحارة " بس للتوضيح "
تحياتي الحارة
ظل جيفارا