رضا الأم / موسى زغيب




كان في شَبّ من عَيله عريقه


ما عندو لا شَقيق وْ لا شَقيقة


رِبي بِعْواطِف الإمّ النبيله


يتيم الْبَيّ وْ ظْرُوفو دَقيقة


حَبّ رْفِيقتو السَمرا الجميله


وْ تَزَوّجْها على صَخْب الموسيقا


قالتلو: تَرى بظْروف جِيلي


ما بِقْعُد أنا وْ إمَّك دَقيقة !




وْ بَدَلْ ما يقول يا إمّي اسمحيلي


هُوّي وْ زَوْجْتو عِملوا طَبِيقة


وْ طَرَدْها بْلَيل عَ الدرب الطويله


بْكُفر مفضوح وْ بْأعْنف طريقه


وْ ما تَرْكِت لِلتَرَجِّي أيّ حِيله


تَ يِتركْها بِشي أُوضه عتيقة


طَرَدْها طَرْدة المرأة الذليله


وْ جَرَح بالوالده شْعُور الرَّقيقة







وْ غِضِب ألله , وْ بَعد فترة قليله


بَعَتْلُو داء مِن جُوع الحَريقة


طَبِيبو ما وَجَدْلو وْلا وسيله


مَضَالو لِلْعَدَم آخر وَثيقة


منّو مَلِّت الزوجه الثّقيله


وْ ظَنِّت حالْها حُرّة طَلِيقة


وْ ما عادِت تخْدُم الْ نَفْسو عليله


وْ نَقَلْها الحظّ من زوجه لْعشيقة




وْ بِقي يْعاني وْجاعو المُستحيله


وْ بِلَيْله لْظُلْمة المَدْفَن رْفيقة


شَعَرْ عَ جانْبو مَرْأة جميله


إجِتْ تَ تْساعدو بِهَيْك ضيقة


وْ تُخْدُم دون ما تْرَبِّح جْمِيله


انحنى عَ إيدْها بْغَصّة غَميقة


وْ لَثَمْها وْ قال يا إمّي اغفريلي


ما عِندي غيرِك بْوقت الحقيقة


إنتِ للوفا أشْرف مَثيله


وْ قلبِك .... قَدّ ما الآلام تِكْتر


بْيِحمُل كِلّ آلام الخَلِيقـــة