سلام،

أكيد معظمكن رح يأيدني لما قول أنو مستوى النت العربي من حيث المضمون ومن حيث عملية البحث عن المعلومات هوي بالحضيض!
بتطلع روح الواحد لبين ما يوصل لمعلومات موضوعية ووافية أثناء عملية البحث بالكووكل. يا ترى السبب هوي قلّة المواقع التخصصيّة إما كترة المنتديات الخليجية واسلوبها في طرح المعلومات؟
عملية البحث ونتائج البحث هيي عامل مهم كتير كتير بالنت، بس للأسف نتائج البحث يلي عم تطلعلنا بالنت العربي مانا موضوعيّة أبداً أبداً وبتكون متأثرة غالباً بالدين او ببلد معين أو بيطغى عليها طابع الآراء الشخصيّة عن طريق المنتديات الكتيرة.
صحيح أنو الواحد لابد أنو يتعب شوي ليوصل لمعلومة منيحة أو قناعة معينة بس في كتير شغلات بسيطة أو أسئلة بسيطة المفروض الواحد يحصل على أجابتها بسرعة عن طريق النت. ومن هالناحية النت العربي مقصر كتير كتير.
مثال بسيط، من شوي حاولت اعرف شو رح يجاوبني الكووكل بالعربي اذا سألت عن معنى رقم الآي بي.
أول مرّة كتبت بخانة البحث "آي بي" وطلعلي بالمرتبة التانية (طرق كيفية كشف آي بي عبر المسنجر) وبالمرتبة الرابعة تعريف الآي بي بالويكيبيديا!
كتبت "ماهو الآي بي" وطلعتلي أول نتيجة بحث من منتدى عربي بيشرح كيفية الاختراق والحصول على رقم الآي بي لمستخدم آخر وكاتبين ببداية الموضوع "ملاحظة لاتستخدم هذه الاساليب مع اخوك المسلم
وانما مع غير المسلم جزاك الله خير" !

بالنت الانكليزي وبلغات تانية بتكون نتائج البحث الأولى عالأغلب من الويكيبيديا أو من معاجم وموسعات تانية أو من مواقع مختصّة بالأسئلة والأجوبة، على سبيل المثال answers.yahoo

جربت شوف إذا في هيك خدمات بالعربي ولقيت موقعين:
ejabat.google
seenjeem.maktob
تنيناتون مقدّمين من شركات كبار بس للأسف فتت عليهون ولقيت المسخرة على أبو موزة!!! فوتو بنفسكن وتاكدوا.


سؤالي: فيها إدارة أخوية تقدّم هيك خدمة؟
ممكن مثلاً تفتحوا "مبدئيّاً" منتدى خاص بالأسئلة والأجوبة؟ طبعاً هالخدمة لازمها برمجية خاصّة أو موقع خاص وأهم شي هيي عملية تقييم الأجوبة ورفع أفضل جواب للأعلى وكمان عملية أرشفة الأجوبة بحسب الموضوع أو category. بس شو رأيكون تعملوا كتجربة قسم خاص بالمنتدى مع وضع قوانين صارمة لضمان موضوعيّة ودقة الأسئلة والأجوبة، مثلاً طريقة طرح السؤال (ماهو، ماهي كيف، لماذا ....إلخ) ومنع أي مشاركة لاتقدم جواب إلخ إلخ فينا نناقش هالقوانين هون إذ بدكون.
ممكن السماح لأي سؤال كان مهما كان "تافه" أو إجابتو سهلة، لأنو الغرض مانو تقديم معلومات جديدة وبس، الغرض هوي تسهيل الحصول على المعلومات بشكل بسيط ودقيق. أخوية بحكم قدمها بتصور ألها فرصة كبيرة بأنو تطلع المعلومات الي فيها ببداية نتائج البحث بالكووكل وغيرو.
عندي قناعة شخصيّة أنّو (مافي سؤال غبي أبداً، بأسوأ الأحوال رح يكون في جواب غبي).

بعد وضع هالقوانين بتصور مشرف واحد أو منسق واحد فيه يتولى عملية التنظيم بدخولو مرّة وحدة باليوم او كل يومين عالمنتدى.

إذا نجحت التجربة ممكن بالمستقبل تقوموا بتفريع هالقسم الخاص لأقسام ثانوية بحسب موضوع السؤال، أو تنشؤا موقع خاص لهالخدمة تابع لأخوية.

في شغلات واقتراحات تانية كنت حابب أكتبها بس انتبهت أنو النص صار طويل كتير! مشكلتي مابعرف أكتب مختصر مفيد :hashish:
بس بجد النت العربي جلطة :sick:

يالله يتبع...