نصيحة



زرار الورد..

لو شفتها بـِ كمّها

لا تكتفي بـْ شوفة جمالا..

شِمّها..

واقطفا..

وفلفِش وراقا..

وضِمّها..

وارشف رحيق مخضّب عْلى تمّها..

تدبل بإيدك بعد ما بتبوسها..

أحسن ما تدبل وحدها ع إمّها

.

حــرّة


لا تخافي لولا خوّفوكي بالجحيم..

ولا تبدّلي بْحريّتك وعد النعيم..

ولا تسألي اللي قال عن حالو فهيم..

عندك عَقل..

قَد الدني..

وكلاّ حياتك.. كَم سنة..

ما العمر..

-يا عمري أنا-

هدية لئيم

.

ضلي اضحكي


يا بنت عمّ الشمس دخلك شو بكي
ت تبدّلي ضحكة عيونك بالبكي

توب الأسى يا تقبريني مش لكي
ومش لابق لـ هالعنق يحني ويتّكي

الله خلق للحزن غيرك بالبشر
وانتي انخلقتي للفرح ضلي اضحكي


.

حلاوة الموت



خافوك يا موت

وأنا شوقي إلك..

شوق الغريب..

لـ وجّ شخص بيعرفو..

رغبة فقير..

بيحلم بتاج الملَك..

تَوق الضرير..

يشوف

شو عم يوصفوا..

كتير حلو خصوصي أول وحده
تحياتي

شكراً يا نبيل :D

كتير حلوين وفيهن موسيقى حلوة ومعاني حلوة

كتير حلوين وفيهن موسيقى حلوة ومعاني حلوة

شكراً يا ماروشكا


هيدي لإلك :)



وجه



بـَـتـْـلة قمر ياسمين

صفحة خدّها

بيضا..

بـْ نـَـمْـشات شِـقْـر

مرشرَشة

وعيون شِـهـْل..

و تـِـمّ لوزة قـَـدّها

وأنف كربوج

قد حِـصّ المشمشة

.

كلهم حلوين

تدبل بإيدك بعد ما بتبوسها..

أحسن ما تدبل وحدها ع إمّها بس هاي بالذات لفتت نظري :)

متابعة معك :gem:

كلهم حلوين

بس هاي بالذات لفتت نظري :)

متابعة معك :gem:

كلك زوق يا ريتكا :D


بيطلعلك هدية (إن شالله تعجبك كمان)




حلم



يا ريت..


لو إنتي وأنا منرجع


بنت وصبي..


عَ كـِـتف نهر صغير..


نتعفرت ونوقــَـع..


ونكمّـش بْـشَـاشير


نضحك سوى..


ومن بعض ما نشبع



و عَ تراب..


نرسم حلم.. فيه نصير..


عصافير..


نبرم هالكون الكبير..


ولمّا المَـسا..


كِحْل العَتم يــِشْــقـَـع..


ويبلّشوا النجمات..


بهالسما مْـشاوير..


شوفِك صبيّة


نايمة حدّي..


وزندي لـَـعـِـنـْـق الأبيض مْـخدّة..


ونغفى تحت شجـْـرة..


وببعضنا نـِـقـْـنـَـع


.

لأول مره أعرف ان الشعر المحكي؛ بهدا القدر من الشفافية والبساطه...
وان له هده الموسيقى الهادئة المتناغمة مع الكلمات ...
معبره جدا .
:D

لأول مره أعرف ان الشعر المحكي؛ بهدا القدر من الشفافية والبساطه...
وان له هده الموسيقى الهادئة المتناغمة مع الكلمات ...
معبره جدا .
:D

هلا بالوردة.. :D


بالمناسبة..

الشعر المحكي متلو متل الشعر الفصيح.. في منو شعر يـُـكتب على البحور المعروفة.. متل:

* المعنّى والميجانا: وهيدول يُكتبوا على بحر الرجز

* القصيد والعتابا: وهيدول يُكتبوا على البحر الوافر

وأنواع تانية تكتب على بحور أخرى


وفي منو شعر محكي حديث.. ما بيلتزم بـ بحر معيّن.. ولا بقافية واحدة فقط.. ولكن بتحكموا موسيقا أو لحن.. يعني متل شعر التفعيلة الفصيح

كمان.. الشعر المحكي فيه يتطرّق لمواضيع فكرية مهمة.. وما يكتفي بالغزل والوصف والهجاء والمدح..

فيه شعراء كتار.. كتبوا بالمحكي عن الموت.. الوجود.. الله.. الدين.. الحياة.. العدالة.. وكتير مواضيع تانية


شكراً ع المرور اللطيف

كلك زوق يا ريتكا :D


بيطلعلك هدية (إن شالله تعجبك كمان)

حلوة كتير .. شكرا شكرا *

عـ فكرة .. اكتر شي حبيتو .. انو كلهم بعاد عن السوداوية .. كل وحدة وقت بتقراها بتبتسم :)



____________
* بالمناسبة, حلوة فكرة الهدية .. هيك بيزيدو الزباين :p

عـ فكرة .. اكتر شي حبيتو .. انو كلهم بعاد عن السوداوية .. كل وحدة وقت بتقراها بتبتسم :)


طيب.. هاي وحدة فيها "سوداوية".. بس أنا لما بتذكرها.. كمان ببتسم.. لإني كتبتها على سبيل "الأنـGـلة" :)



نــحــس


يا نـَـحْـس يا حاصد جـَـنايي بمنجلك

دخلك عليي قول مين موكـّـلك؟

عندك بشر غيري، اعتقني يا نحس

ولا بد ما تلقى شي صاحب يحملك


لا بد ما تلقى بدالي شي رفيق

تشلح بوجـّـو حجار ع طول الطريق

تسهر معو وتنزع صباحو بس يفيق

وتجاوبو بالعكس لمـّـا يسألك


وتجاوبو من الشرق لو بالغرب كان

وتنكّد بعَيشو إذا راق الزمان

وتبعّد دروبو عن دروب الأمان

وتكتب نحس حظـّـو على براج الفلك


تكتب نحس حظو على طول الحياة

وحتى إن خلق مرّات من بعد الممات

يولد شخص ملعون مكروه الصفات

بيفشل بسعيو كيف ما دربو سلك


بيفشل بسعيو كيف ما وجهو برم

ويحصد ندالة بوقت ما زارع كرم

ويخفت ضيا شمعة شبابو ع الهرم

والعتم يطفي النور ويسود الحلك


والعتم يطفي النور ويسوء المصير

ويصير أعمى الكان بالأول بصير

وبتتركو يا نحس معدوم وكسير

وبقلب غيرو تروح تبني منزلك

.

ليش اسمو شعر محكي ؟

ليش اسمو شعر محكي ؟

جاية من مصطلح غلط هو "اللغة المحكية" وقصدهن العامية (على أساس الفصحى ما بتنحكى! :) :)

هاي بتشبه مصطلح "الموسيقى الصامتة".. وبيقصدوا فيها الموسيقى البحتة اللي بدون كلام..

بس إنو في موسيقى صامتة!! شلون يعني صامتة؟


فـ هيك.. إنو مصطلح سائد :)

وما حبّيت قول "شعر زجل" مشان ما يفتكروا الناس إنو رح أعمل زغلول الدامور!

ولا حبّيت قول "شعر عامي" مشان ما يخطرلهن شي "بدوي"

جاية من مصطلح غلط هو "اللغة المحكية" وقصدهن العامية (على أساس الفصحى ما بتنحكى! :) :)

هاي بتشبه مصطلح "الموسيقى الصامتة".. وبيقصدوا فيها الموسيقى البحتة اللي بدون كلام..

بس إنو في موسيقى صامتة!! شلون يعني صامتة؟


فـ هيك.. إنو مصطلح سائد :)

وما حبّيت قول "شعر زجل" مشان ما يفتكروا الناس إنو رح أعمل زغلول الدامور!

ولا حبّيت قول "شعر عامي" مشان ما يخطرلهن شي "بدوي"


يسلمو يسلمو عالتوضيح :D

يا ريت


ولد



يا ريت..

هالدّنية ترجّعني صغيرْ..

ما في ببالي هـَـمّ..

ولا بَعرِف كتير..

وإمّي تهدهِدني

بحضنا ع الهَدا

إغفى..

وتسهر إيدها

تهزّ السرير


.

مرحبا خيو
شوف حبيب ،مجرد أنو أنا أدخل عليك معناه أنو اللي كاتبو عاجبني ومو بس عاجبني , وعاجبني غصب عنّي
بتملك شاعرية وشفافية , وبتملك أدوات العمل وبتسيطر على اللغة بسلاسلة
بتحب تسمع نصيحة ؟ أو وجهة نظر أنا جاهز
بس جميل !؟ جميل

بتحب تسمع نصيحة ؟ أو وجهة نظر أنا جاهز
أففففففف.. أنا اللي بحب

تفضّل

نهاد حداد



صوتِـك نـِهاد..

بـْ دَينة العالـَم..

حـَـلـَـقْ

مَا جاب متلو..

بَعْد الله..

ولا خـَـلـَـق

كلما صَـبَـاحي..

عَ دَهَـب صَوتـِـك وِعِي..

بشوف العطر..

عَ ورْقة نْـهاري..

انـْدَلـَقْ

.

نهاد حداد


هاي "شغلة" ذات علاقة..

غيداء وفيروز

فنانة جميلة.. لم أكن أعرف سوى اسمها و"رسمها".. -التقيتها وشكرتها فيما بعد- اسمها غيداء..
بعثتُ إليها -إلى حمص- بالصورة الفوتوغرافية الجميلة التالية للسيدة فيروز


////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////


وبعد يومين فقط كانت لدي -في دمشق- لوحة مستوحاة من الصورة الأصل تحاكيها جمالاً .. رسمتها الفنانة غيداء أحمد..

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////


ومن شدة إعجابي بما "خَلَقَتْهُ" أنامل غيداء وريشتها.. كتبتُ لها الأبيات القليلة التالية تعبيراً عن امتناني:


نَحلِة بقَطْف الشَّهْد مِخْتَصّة
إلْهَا مع زْهُور العَسل قِصّة

مَرْقِت عَ كِلْ شِي وْرُود فَاحِت بالعَبيرْ
مَا داقِتَا.. ولا قِبْلِت تْمِصّا

ودَارِت الدنيِة.. بسّ ما لِقْيِتْ غَديرْ
مِسْتَاهل تخَصِّص إلُو حِصّة

يِئْسِت النّحلة بْهالعُمُر تعمُل قَفيرْ
وصَارِت تنُوص بْنَارْهَا البَصّة

واحْتار ألله.. وبَعْد مَا فَكَّر كْتيرْ
وحتى مَا تِخنُق نَحلتُو الغَصّة

غيداء.. عِمْلِك ربّنا بْأرضو سَفِيرْ
وتَـ تِخلْقِي للنّحل ورد.. وْتِرِسْمي
ألله بْخَلِق صَابيعك توَصَّى

.

شآم



يا شام..

إسم الشام..

ع جبيني اكتبي

إبنـِك أنا..

سوري..

دمشقي..

ويَعرُبي..

و..

لولا نبع بردى

مِياهو نشّفت

قلبي إلـِك..

من دمّ شرياني

اشربي

.