مرحبا شبيبة
اليوم من باب الصدفة طلع براسي نوع من التجارب اللي ما كان براسي هدف أو غاية لأعملها وطبقتها بشكل مباشر على أطفال أعمارن تحت الـ 14 ومجموعة أطفال تانية تحت الـ 18
النتائج كانت شبه واحدة واللي هية انه الانسان وقت بكون عم يكذب أو عم يحكي شي منافي للحقيقة اللي هوي بيعرفها بواجه صعوبة بمهمته وبحاول يقرب الكذبة للواقع قدر الامكان ليقدر يقنع حاله فيها .

هلشي فتح كتير بواب بالنسبة الي اولها هوي انه هل الانسان ميال للصواب ؟ وهل فعلا بالشكل الطبيعي بكون الانسان موجه نحو الفكر الصحيح والخيّر ؟

بالنسبة الي انفى احتمال وجود شخص بطبعه المباشر صفات سيئة متل الكذب والسرقة ، هلشي غير كتير بقناعاتي وشكلي صدمة كتير كبيرة خلتني ارجع فكر بكيتر مواقف

انتوا كيف بتشوفوا القصة من زاويتكم
الانسان فعلا موجه بالصواب ولا فكرة التوجه نحو الخير والتوجه نحو الشر وجهان لعلمة واحدة الانسان ما بيقدر يحددها وما بيقدر يتعامل معه ؟

سامحوني على لخبصة الفكرة وضبابيتها بس عم حاول عبر عن فكرتي بالكلمات بأفضل شكل ممكن :D

بمدينة مونتريال بالتمانينات قررت شرطة المدينة تعمل اضراب عن العمل نصف نهار طبعا الكل قفل محلاتو و قعد بالبيت و بنهاية النهار كانت النتيجة انو عشرات المحلات انسرقت و حولي ست بنوك و كتير من التجاوزات ...طيب ..هلئ هون فينا نقول انو غابت القوة الرادعة يوم راحت الناس سرقت و نهبت و ما بعرف شو ...منقدر نقول انو هي طبيعتنا كبشر,,بس ...شو مشان باقي سكان المدينة يلي ما استغلو غياب الشرطة و قضوا النهار ببيتون و ما ارتكبو اي جريمة ..كمان فينا نقول انو هي طبيعتنا ...القصد من كلامي انو الأنسان ما الو طبيعة واحدة ( سواء كانت فطرية او غير فطرية )

مثال تاني عن الأطفال بالحضانة ...بتلاقي طفل عم يضرب رفقاتو و يسرق غراضون و يحاول يأذي بس للأذى ,,,و كمان بتلاقي اطفال تانيين بحالون ما الون بالمشاكل ...مع العلم انو الأطفال بيتصرفو بفطرية اكتر من مجرمين مونتريال بالمثال الماضي ...

لهيك بظن انو في اختلاف بطبيعتنا كبشر و ما فينا قول عن اي شي انو فطري باستثناء الأختلاف بحد ذاتو ...

البشر بحاجة قوة رادعة ,,و هي حجة كتير من الدينيين يلي بيشوفو انو الدين هو ممكن يضبط البشر ...او يلي اللادينيين بيقولو انو بالمجتمع المدني الحديث بالأمكان العيش بمنظومة قوانيين حديثة بتضمن حقوق الأفراد جميعا

اسف اذا ذكرت الأديان بالموضوع ,,,بس الخير و الشت هني كانو اهم الأسّس يلي قامت عليها الأديان ..

مثال تاني عن الأطفال بالحضانة ...بتلاقي طفل عم يضرب رفقاتو و يسرق غراضون و يحاول يأذي بس للأذى ,,,و كمان بتلاقي اطفال تانيين بحالون ما الون بالمشاكل ...مع العلم انو الأطفال بيتصرفو بفطرية اكتر من مجرمين مونتريال بالمثال الماضي ...

انا كنت مقتنع تماما بهاد الحكي لوقت ما لمست عكسه

شو السببب اللي خلّا تقريبا 20 شخص اعمارن بين الـ 18 والـ 14 يتصرفوا بنفس الاسلوب ويتبعوا نفس المنهج بمحاولة اخفاء عملية الكذب اللي طلبت منن يمارسوها بطريقة أو بأخرى ؟

شو اللي دفعن ليمشوا بنفس الطريق مع أنن ما كانوا متفقين على شي وما بعتقد انن عرفانين الشي اللي كنت عم لعبن ياه ؟

بشكل عام الإنسان مخلوق عالفطرة السليمة بس المؤثرات يللي حولو من ولادتو بتولّد نزاع بداخلو .. نزاع بين الخير و الشر .. و أنا ما بعرف مصداقية بعض البحوث يللي بتقول بأنو الإنسان في عندو مستقبلات بدماغه لكل شي بالطبيعة .. يعني البعض بيكون عندهن ميول للمخدرات أكتر من غيرهن و البعض ما بيخطر على بالهن أصلاً تجربتها .. ليش؟ بالرغم من أن كتير من هدول يللي أدمنو او تعاطو المخدرات كانوا ناجحين بأعمالهن ..
و البحوث بتدرس مستقبلات مثلاً للمورفين بتكون كبيره و متطورة عند أشخاص بينما عن الآخرين بتكون خاملة مثلاً .. أنا ما كتير مقتنع بهالحكي مع أنو بتلاقي البعض مثلاً عندهن ميول للقهوه بشكل جنوني و البعض الآخر ما بيطيقها من أصلها .. يا ترى هل هي البيئة يللي أنشأت هالميول؟ يعني الطفل بينشأ و بيحاكي أبويه و بيكتسب منهن ادمان القهوة مثلاً .. طيب ليش الأخ التاني أو الأخت التانية ما بيحبو القهوة؟
يعني ممكن السبب بيكون المستقبلات يللي بالدماغ يللي حكيت عنها بالأول؟ أو ممكن ملازمة الطفل لأحد أبوية يللي بيشرب قهوة كتير و هيك بتصير البيئة هي السبب و هاد الأرجح.
أنا ذكرت المثال هاد منشان ندخل بفكرة أنو هل ممكن الإنسان بيكون بداخلو خير و شر مع بعض؟ و إن كان .. هل الخير هو العنصر المسيطر؟ .. و الشر أحياناً بيغلب و يسيطر نتيجة لبعض مؤثرات خارج الفكر البشري بتعمل على السيطرة على فكره و بتوجهو بغير اتجاه؟

طيب كيف بدّو يكون الحكي إذا قلنا بأنو الانسان مفطور عالخير و يُسعَد بعمله .. هي من الأمور المسلّمة .ز يعني كلنا منحب الخير و كمان منتنافس على عمله .. بس الشر صيغة دخيلة عالنفس البشرية و البرهان هوي ..
إذا كان الإنسان و هاد واقع بيحب عمل أي شيئ مفطور عليه متل المساعدة .. جمع المال .. النساء:lol: " قصدي الميول للمرأة للدفئ و ما هنالك " طيب ليش الإنسان ما بيسعد عند فعل الشر؟ يعني بتلاقي النفس البشرية " طبعاً السليمة " بتتكدر إذا ظلمت او عملت خطأ .. إذا و ببساطة النفس البشرية كتكوين بعيدة عن الكذب أو الخطيئة .. بس كمان من منظور إسلامي في خبر النفس البشرية .. مذكور بالقرآن بسم الله " و نفس و ما سوّاها* فألهمها فُجورها و تقواها " و باختصار التنشئة و الخلق كانت سويّة سليمة و من ثم ألهم الله البشر " الإلهام هون يعني التبيان يعني المعرفة " الخير و الصواب و باعتبار الإنسان مُخيّر فأكيد رح يكون في نفس أمّاره بالسوء متل ما بدو يكون في نفس أمارة بالشر و الكذب و الرذيلة.
البيئة عامل رئيس بتشكيل الشخصية و ميولها .. أفكارها و اعتقادها و صفاتها و هاد الأرجح يعني إذا كنت عايش ضمن مجتمع سليم أكيد رح تكون سليم و العكس صحيح .

بتوقع انو الانسان بطبيعتو بيعرف الصح من الخطا
بس البيئة يلي بيعيش فيها الا الدور الاكبر بانعكاس الحالة او تغيرها احيانا
يعني الاطفال الميالين للكذب او العنف غالبا بيكون هالشي انعكاس لحالة اجتماعية او اسرية عم تمارس هالنوع من التعامل او يكون العنف شيء داخل بشكل كبير ضمن تعاملها معو
بالاخير الطفل هوي كتل طينة الاسرة بداية والمجتمع بعدين هني الهون الدور الاساسي بتشكيلها
لما منكذب وعنا خوف من الكذب بتوقع البيكون السبب من خوفنا من العقوبة يلي جايية نتجة عمل ما او تصرف وبيضاعف هالخوف لما منعرف انو رح تتضاعف العقوبة اذا انكشف كذبنا

يعني ان ماني مع فكرة في ناس اشرار وناس لا ... بلاخير الانسان كائن بيمر بكتير مراحل وكل مرحلة بتعطيه جانب للتصرف بالحياة ..
ايد الصفات السلبية موجودة ... يعني بتوقع انها انو ميولنا لعمل شيء سلبي تعتبر جزء من مكون شخصيتا الانسانية .. بس كمان العقل موجود للتمييز بين صح وخطا .. يلي بشوه هالتمييز برايي هوي الوسط المحيط اولا واخيرا ....

هممم ..
بذكر مرّه تفرجت على دايكيومنتري (( فلم وثائقي )) بيحكي عن اجراء تجارب على عدد من الناس .. بخبروهم انـّو في شخص بحاجه يعترف بأمر ما بحاجه لصدمات كهربائيه أمـّا للعقاب او العلاج أو يمكن بيطلعلهم مبلغ مالي من القصه او شي مشابه صراحه ما عاد كتير اتذكر الفلم صرله اكتر من 3 سنين .. المهم .. بيطلبو من اشخاص كتير تضرب الكهربا بتبدا خفيفه و بتبلّش يزيدوها .. الهدف من الداكيومنتري كان يشوف قديش الناس مستعده تأذي بعضها .. الشخص اللي قاعد بالغرفه بيصرّخ و بيحكي و بيقول حاج و وقفوا و ما عاد فيّ اتحمـّل لكن بالرغم من هيك في ناس وصلت لأعلى درجات الكهربا .. بالآخر بيطلع الشخص اللي بالغرفه و بقلهم انـّو هي كانت مجرّد دراسه لعلم النفس ليشوفو قديش الانسان عنده استعداد يأذي شخص مابيعرفه / ما بيعرف مظلوم ولا ظالم / سمعانه عم يتألـّم و يتوجع .. و بالآخر بيقلولك انـّو اذا فيك توصل لتأذي شخص هالقد بدون ما يكون عندك ادنى معلومات عنـّه فقديش عالمنا بخطر اليوم ..

هي الدراسه أنا وقت سمعت عنها آلمتني .. لأني انا بؤمن بانـّو الانسان مفطور عالخير .. بغض النظر عن اي ّ شي بالدنيا اذا بتقابل طفل صغير ( بمحل بالشارع ، وين ما كان ) رح بيضحكلك غالبا ً .. في شي اسمو انسانيه داخل الانسان انا شخصيا ً بآمن بوجودها و بآمن انو حاليا ً عم نعاني أزمه بانو نحافظ عليها ..



مثال تاني عن الأطفال بالحضانة ...بتلاقي طفل عم يضرب رفقاتو و يسرق غراضون و يحاول يأذي بس للأذى ,,,و كمان بتلاقي اطفال تانيين بحالون ما الون بالمشاكل ...مع العلم انو الأطفال بيتصرفو بفطرية اكتر من مجرمين مونتريال بالمثال الماضي ...

هون أنا بدي قول شغله .. مش دفاعا ً عن قناعتي بأنـّو الانسان مفطور على الخير و لكن لأني بشتغل مع الأطفال و عندي خبره بالموضوع ..
الطفل اللي بيسرق اغراض رفقاته و بحاول يآذيهم بكون عم يطلب انتباه ، او ممكن أهله بالبيت حارمينه من انو يلعب الألعاب فبيسرق العاب رفقاته ليحرمهم متل مو هو محروم و هالشي مش عن تخطيط انما لا شعوريا ً .. أو في احتمال عنده أخ اكبر منه بمارس عليه نفس الشي اللي هو بمارسه .. أو ممكن ابوه بمارس هالشي على امـّه أو أو أو .. في اسباب كتيره بتخلي الطفل يتصرّف بعنف و لكن ولا وحده منها راجعه للفطره على الشر او للنفس الشريره ..
حتـّى الأطفال اللي بحالهم ايضا ً عندهم دوافع و اسباب خفيه تخليهم يكونو بحالهم ..

ظريف الموضوع غابي :gem:

التقرير الجوال
و أنا ما بعرف مصداقية بعض البحوث يللي بتقول بأنو الإنسان في عندو مستقبلات بدماغه لكل شي بالطبيعة ..

بالفعل ..المستقبلات الدماغية بتلعب دور مهم بتحديد شخصية الأنسان و سلوكو, جميع انواع الأدوية المخدرة و المضادة للقلق او الخوف و مضادات الأكتئاب و غيرها من الأدوية المؤثرة عالجملة العصبية بتعتمد عتحفيذ عمل مستقبل ما او تثبيط عملو.. نسبتها للمستقبلات هي متل ما عم تقول ,, بتختلف بين انسان و اخر و هدا شي بيفسر اختلافنا كبشر ..هلئ في مين راح لبعيد كتير و قال انو المستقبلات هي و انتاجها بالدماغ البشري بتخضع لأوامر موجودة بجينات بيتم نقلها من جيل لتاني و هاد شي مؤكد ..بس المبالغة كانت انو الجينات هي عبر تاريخ البشر خضعت لفلتر "الأصطفاء الطبيعي" ..يعني انو أخلاق البشر و عاداتون و سلوكون كلو كان موجه ضمن سياق اكبر للحفاظ على نوع البشر ( يعني بأختصار انو الدين انتاج داروني )

The morning
هون أنا بدي قول شغله .. مش دفاعا ً عن قناعتي بأنـّو الانسان مفطور على الخير و لكن لأني بشتغل مع الأطفال و عندي خبره بالموضوع ..
الطفل اللي بيسرق اغراض رفقاته و بحاول يآذيهم بكون عم يطلب انتباه ، او ممكن أهله بالبيت حارمينه من انو يلعب الألعاب فبيسرق العاب رفقاته ليحرمهم متل مو هو محروم و هالشي مش عن تخطيط انما لا شعوريا ً .. أو في احتمال عنده أخ اكبر منه بمارس عليه نفس الشي اللي هو بمارسه .. أو ممكن ابوه بمارس هالشي على امـّه أو أو أو .. في اسباب كتيره بتخلي الطفل يتصرّف بعنف و لكن ولا وحده منها راجعه للفطره على الشر او للنفس الشريره ..
حتـّى الأطفال اللي بحالهم ايضا ً عندهم دوافع و اسباب خفيه تخليهم يكونو بحالهم ..

بتشتغلي مع الأطفال ..لازم يكون عندك اعصاب من حديد :gem: ..لقلك شي ..انا ما كتير بحتك مع اطفال ..بس بما انو عيلتنا كبيرة لهيك دايما بكون عندي فرصة لأحتك مع ولاد خواتي خصوصا انو الكل بيجتمع بالبيت بالأعياد
مع انو خواتي بعيشو ببلدان مختلفة و ولادون متربايين بثقافات مختلفة بس بندهش بأنو كل ولادون بيشتركو بشغلة وحدة هي حب الأذى يعني دايما بيغارو من بعض و بيكرهو بعض لحد صرت آمن انو الطمع و الشجع هني الفطرة البشرية ...مجانيين عنجد ..باستثناء ابن اختي ..بيبقى ساكت و صافن طول النهار ...بس ما بينلام ,,,والدو فلسطيني :lol:

الانسان بيولد وهو شي خام و ابيض.. بعدين مع الوقت و الزمن يعني.. بيصير في مؤثرات كتير بتكون شخصيتو و "مقدار الشر" فيها..
يعني ما في انسان شرير بالفطرة.. ولكن في انسان اثرت عليه ظروفو (شو ما كانت هالظروف)


مثال تاني عن الأطفال بالحضانة ...بتلاقي طفل عم يضرب رفقاتو و يسرق غراضون و يحاول يأذي بس للأذى ,,,و كمان بتلاقي اطفال تانيين بحالون ما الون بالمشاكل ...مع العلم انو الأطفال بيتصرفو بفطرية اكتر من مجرمين مونتريال بالمثال الماضي ...

الحكي اللي قلتو بينطبق ع الاطفال كمان.. و بيجوز الاطفال بيتأثرو بالظروف ( من اهل.. بلد ساكنين فيه..الخ) اكتر من غيرهم.. كون اساس شخصية البني ادم بينبني هالفترة.. بعدين بيصير الواحد من تجاربو بالحياة يبني شخصيتو ع هالاساس (وجهة نظر.. فيها تصيب و فيها تخيب)

النتائج كانت شبه واحدة واللي هية انه الانسان وقت بكون عم يكذب أو عم يحكي شي منافي للحقيقة اللي هوي بيعرفها بواجه صعوبة بمهمته وبحاول يقرب الكذبة للواقع قدر الامكان ليقدر يقنع حاله فيها .


كون الانسان مخلوق ع الخير.. لما يكذب بيكون عم ينافي فطرتو..
عليه.. الانسان بواجه صعوبة في الكذب..
+
الخوف كمان بالفطرة البشرية.. هالشي بيفسر كلام sona78
انو الواحد بيواجه صعوبة لاكذب خوفا من العقاب .. بعتقد كمان هالشي صحيح

:D