يبدو انو سوريا هي الطرف القادر على وضع نهاية " للحرب الباردة "


الحرب العربية الباردة ابتدت من ايام عبد الناصر و حالة الخصام بين مصر و سوريا من جهة و السعودية و الأردن و العراق من جهة تانية . يعني الحالة هي مو جديدة علينا كعرب و لو بتتغير خريطة التحالفات العربية المعادية لبعضها من فترة لتانية و بيدخل فيها اطراف متل الأتحاد السوفيتي سابقا و الولايات المتحدة و غيرها , بس بتبقى الخصومات موجودة دايما .

مؤخرا ..الشي الملفت للأنتباه من حولي سنة المحاولات السعودية بالتقارب نحو الشام ..من ايام عاد الديبلوماسين الأمريكيين لدمشق تمهيدا لتنفيذ قرار اوباما بأعادة سفير لواشنطن بالشام ..و السعودية عينت سفير جديد الها بالشام بمحاولة لتعزيز عملية التصالح مع سوريا على حد قول السعوديين .


من هون بدي احكي عن مخاوف كل طرف بالمنطقة متل ما انا بشوفها

السعودية واضح متل عين الشمس انو عندها تلات نقاط بتعتبرها غاية بالأهمية لما بتجي للحديث عن علاقتها بسوريا باختصار شديد هني ايران و التعامل مع ملفها النووي و ابعاد سوريا عن المحور الأيراني لمنعها و حليفها اللبناني من اي ردة فعل في حال امريكا او اسرائيل وجهت ضربة لأيران . هلئ سمعنا عن ضؤ اخضر سعودي لأسرائيل بضرب ايران بس الكلام هاد بيبقى اشاعات بس المؤكد انو اسرائيل في حال ضربت ايران فالسعودية ما رح تزرف الدموع عأيران !

النقطة التانية المهمة للسعودية هي لبنان ,,ولو حليفها التاريخي بلبنان انتصر بس بيبقى للمعارضة التابعة لسوريا دور مهم بالسماح للحكومة اللبنانية العتيدة بالعمل و من هون الحوار مع بشار الأسد ضروري بالنسبة للسعوديين

النقطة التالتة هي العمل على جر سوريا للأنتظام بخط اوباما يلي السعودية بتشوف فيه مشروع الحل للمنطقة على عكس سلفو يلي كان عم يحكي عن شرق اوسط جديد و مابعرف شو من الشغلات يلي خلت المملكة تتحفظ على كتير من سياساتو ..

هي كانت اهم مخاوف الشقيق السعودي ..طيب شو مشان سوريا ,,سوريا يلي كتير بشوفو انو ايران اعتطها وزن بالمنطقة و زخم اكبر لتروح بعيد بحالة الخصومة مع الأشقاء بالحقيقة هي طرف ضعيف مقارنة بالتحديات يلي وضعت نفسها امامها و من هون كان الحاجة للدعم الأيراني و انشاء تحالف بيجعل منها قوة اكبر بالمنطقة و ضم حماس و حزب الله للتحالف هاد للتحكم بأكتر عدد ممكن من الأوراق بالمنطقة ..بالحقيقة سوريا اكبر مخاوفها هي تهديد وجود نظامها لأنو بعد العراق و قرار عزلة سوريا و المحكمة الدولية ابتدا بشار الأسد يرسم سياساتو ليضمن و يعزز من قوتو بالمنطقة و شاف انو ايران هي الحل ..الشي هاد ما بيخفى على حدا ..



المصريين و الأردنيين بعد معاهدة السلام صارو قوى اضعف عربيا يعني منشوف مصر كل الأخد و العطى بصير فيها مشان فتح او اغلاق المعبر مع غزة او احيانا بتعمل اجتماعات بين حماس و فتح بس بيبقى دورها محدود مقارنة مع حليفتها السعودية ولو انو اوباما اختارها منبر للتوجه للعرب و المسلميين بخطاب تاريخي ..بس بالحقيقة المصريين مربطيين بكتير امور ..و الأردنيين كمان نفس الشي يعني غير انو اتحفنا بمصطلح " الهلال الشيعي " .و دور الملك الأردني كرسول بين السعودية و سوريا ما كتير هني لاعبيين مؤثر عربيا ..

هدي هي خريطة الشرق الأوسط العربي سياسيا متل ما بشوفها انا ,,

بكلمتين .. سوريا هي القفل ,,و السعودية عم تجرب تفك القفل هاد الواقف بوجهها

اخيرا ..انا اتكلمت عن بلدان بيحكمها رؤساء ما تم اثبات وصولون للسلطة برغبة الشعب ,,يعني ما في عداء او حرب باردة بين الشعوب ,,لعبة انظمة ...مو اكتر



و لبين ما يرجع العراق كقوة مؤثرة عربيا ..حبب اسمع نقاط الشباب و رؤيتون للحرب الباردة هي ..و اذا في توصيف تاني للصورة العربية


و عاشت الأمة العربية ..من المحيط للخليج !

هلأ أنا بختلف معك شوي . بالتحليل . والي رجعة الموضوع مهم وحلو :D

اول شي بحب قلك انو سورية هيي اللاعب الاساسي بالمنطقة والتعامل معا كان وما زال المفتاح لحل اي مشكلة بالشرق الاوسط ,بس دتئما الغرب بحاول يترك سورية الخيار الاخير يلي بيضطلر يرجعلوا دايما.


بخصوص السعودية انا بشوف انو مشكلتا مو مع سورية او ايران ,مشكلة السعودية يا صاحبي بلشت توضح بعد 11 ايلول لما زادت الضغوط عليها بحجة الارهاب الاسلامي والاصولية وكان من الممكن اميركا توجه ضربة للسعودية اذا ما لاقوا بديل وطبعا كان البديل ايران لانو اسلامية اولا , وبسبب مواقفا المعادية بشدة للغرب ولاميركا بشكل خاص , وتمت الاستفادة من الخلاف السني الشيعي و حاولوا يأججوه فاخترعوا مشكلة الهلال الشيعي يلي عم يهدد العالم العربي ومن بعدو العالم الغربي,مشكلة السعودية اذا هيي انو تلاقي حدا يشيل عنها كتف وينلزق بتهمة الارهاب
وبلبنان السعودية عم تلعب الدور الاكبر بضخ الاموال (وما حدا في يفكر ينكر) وبتاجيج الصراع باعتبار المعارضة وعلى راسها المقاومةالحليفة الاكبر لسورية وايران (الارهابيتين)


موقف سورية مانو ضعيف ابدا بالمنطقة متل ما قلت ومانا بحاجة لحدا يدعما بدليل انو سورية تبنت المقاومة والصراع بل الثورة الايرانية , وخاضت حرب تشرين يلي كتير بيحاولوا يققلوا من شانها) سنة ال73 والثورة اليرانية اجت بال 79 متل ما الكل بيعرف , بعدين سورية يلي دعمت الثورة من الاول مو العكس , ولاحقا صار التواصل والاتفاق على المقاومة واشتغلوا بمسرين متسايرين, بس سورية دولة مواجهة لهيك مو ضروري كل ما وصلها سلاح جديد او امتلكت منظومة دفاعية تصرع العالم, لهيك خلينا نكون عقلانيين شوي وما نحتول نصغر سورية ونعملها الطفل المدلل لايران , القدرات السورية ما بتقل عن القدرات الايرانية حتى فيك تقول انو هيي نسخة مشابهةتقريبا , والخوف من التحالف مع حزب الله وحماس ما الو مبرر , بالعكس سورية بتتمنى مشاركة مصر والسعودية وهنن عم يرفضوا , وحدة بتفتح القناة للغواصات الاسرائيلية وبتبعت المؤن لليهود بالوقت اللي تسكر معبر رفح بوجه المرضى والطلبة وحتى السلاح , والتانية عم تفكر تسمح للطائرات( الاسرائيلية) بعبور فوق اراضيها ,
اخيرا الخلاف بين العرب هو خلاف بين ارادة المقاومة اللي بيمثلها المحور السوري الايراني المتكامل,وبين الاستسام اللي سموه الاعتدال واللي هو بالاصل جوهر التطرف.
ما رح طول ,بس رح قلك :خيارات المقاومة عم تثبت يوم بعد يوم صوابيتها , وحرب تموز وعمليات المقاومة الاسلامية والوطنية من ال80 لهلق بتثبت هالشي , وللكلام بقية .

تحيا سورية
(

هلأ أنا بدي قول أنو قريبا لح نشوف تقارب مصري ولبناني مع سوريا . بيشمل زيارة أهم اركان المعارضين لسوريا بلبنان الى دمشق . وربما نشهد عودة الحج بأتجاه دمشق بعد فترة ولو بنسبة أقل .
أما الموقف المصري فمصر عبر الرئيس والدبلوماسيين والمخابرات ( ماعم أعرف تحديدا مين بالفترة الأخيرة يلي عم يتحكم بالسياسة الخارجية ) .فهو بات ضعيف جدا على المسرح العربي والاقليمي . وقطر بصغر حجمها باتت أقوى بكثير سياسيا . بفضل حركة وذكاء دبلوماسيتها .
اما السعودية فتقاربها مع سورية . كان بعد بوادر الأنفتاح الاميركي على دمشق . خاصة أنو السياسة العائلية بالمملكة كتير متأثرة بالسياسة الأميركية . والسعودية مهتمة دائما بمحاولة أظهار نفسها كأختصار للعرب أو المسلمين .
بالنسبة للأردن فهو مو أكتر من حجر شطرنج باللعبة . ومحاولة تصويرو كبديل لسورية في القمم الثلاثية مضحكة جدا . باستثناء محاولة أفهام دمشق أحيانا أن هناك عدو اخر في هذه الخاصرة .

ايران بتوقع بالفترة القادمة يقل تدخلها بالوطن العربي بسبب مشكلة الملف النووي . مع دخول الأاوضاع الداخلية مرحلة حساسة بالمستقبل القريب . وهو ماسيجعل ألاهتمام الايراني منصب بأتجاهات اخرى . طبعا لن يقل التحالف بين سوريا وأيران . لكني اتسائل ماذا سيكون شكله بالمستقبل خاصة بعد الأاوضاع في أيران

بالمحصلة انا شايف بالوطن العربي مرحلة ركود أو استراحة . ومالي شايف نهاية للحرب الباردة مالم تتغير الامور على الارض بتحولات اخرى

syrian 1st
موقف سورية مانو ضعيف ابدا بالمنطقة متل ما قلت ومانا بحاجة لحدا يدعما بدليل انو سورية تبنت المقاومة والصراع بل الثورة الايرانية , وخاضت حرب تشرين يلي كتير بيحاولوا يققلوا من شانها) سنة ال73 والثورة اليرانية اجت بال 79 متل ما الكل بيعرف

قوة سوريا بحرب تشرين كانت بتحالف العرب يعني مصر و السعودية ايام الملك فيصل ..و شفنا كيف جيشنا كان ابتدا يعاني بعد اسبوع من الحرب و خروج مصر كطرف عسكري مهم ..


في ما يخص المقاومة .. انا برأيي انو أطراف الحرب الباردة جميعا غير معنيين بشي اسمو مقاومة او ممانعة او حتى اعتدال بس عم يتم استخدامها كحجة لتبرير حالة الخصومة يلي من غير الممكن انو الأطراف علنو اسبابها بصراحة ..و انا حسب ما بشوفها ,,هي ابتدت مع بداية المشكلة اللبنانية بعهد الأسد الأبن و ارتماء سوريا بحضن الأيراني و احساس السعوديين بخطر الغاء دورهم بالمنطقة

اذا كنت بتعتبر انو الكم ساعة يلي شاركت فيهن مصر بالحرب انجاز ساعد السوريين معناها بلا الحديث من اصلوا , جيشنا واي جيش بالعالم اجباري بدو يعاني وقت يقاتل كيان متل هالكيان- كل الدنيا داعمتوا بالسلاح والاعلام والسياسة -بدو يعاني بالاخص انو النظام كان جديد والدولة باول تكونها, وهون بيجي الانجاز السوري بانو قدر يوقف بوجهوا ويحرر ارض بدون اتفاقيات ذل , بعدين السعودية ما عملت هالشي العظيم وكل اللي عملتوا انو سجلت عالعرب وحدة انو هه انا دعمتكون ورجونا شو بدكن تساووا .


حالة الخصومة ما بدها تبرير من جهتنا , نحنا منضل نمد ايدينا ومنضل نقول اخوة وبيمونوا بس هنن مو مقدرين واكبر دليل الاتصالات السعودية السورية الاخيرة يلي اججهضتا الادارة الاميركية فورا , يعني بشكل او باخر فضلوا مصالحهن الانية مع اميركا علينا وهاد بيأكد كلامي انو السعودية عم تدور عدا يشيل عنها كتف حتى لو على حساب الاخوة, وباكلك انو رح يرجعوا كلن وعلم على كلامي , أخي ما في حل من دون سورية, بعدين شو يعني اعتدال ؟ يعني تترك اخاتك بفلسطين والعراق ولبنان يواجهوا لحلهن على اساس نحنا ما النا علاقة ؟

المشكلة قديمة , وما رح تنحل لانو اذا الحكومات رضيت بسياسة الرضوخ الشعوب ما بترضا , واللي بيرضا بالناقص منو نحنا وايران وحزب الله وحماس منكفي .


بعدين شو قصدك باللون الاحمر يعني؟ وضح لافهم عليك ونعرف نحكي.

شكراااااااااااااااااااااا اااا