عم شوف بالبي بي سي عاملين استفتاء حول "هل تعرّضت لتمييز عنصري قبلاً", شفت النتيجة كاسحة لصالح الـ "نعم"... لكن يا ترى مثلاً... شو يعني تمييز عنصري؟ كيف مثلاً تتعرّض لشي و تعتبرو تمييز عنصري بسبب دينك أو عرقك أو جنسيتك ... أو جنسك ؟ قصدي شو هو الحد بين احتكاك طبيعي بين الناس و بين انو تعتبر انو هالشخص عاملك بشكل مختلف (أسوء.. بشكل عام) لأنك مختلف عنو بإحدى المذكورات سابقاً..


حبيت افتح هالموضوع كرمال اذا حدا من الشباب و الصبايا مثلاً بيعتبر حالو تعرّض لتمييز عنصري للأسباب السابقة في مكانٍ و زمانٍ ما.. يحكيلنا شو صار معو, و هيك نتناقش حوادثنا و خبراتنا و هيك أمور


بانتظاركم :D

التمييز العنصري . ومتل ماتلقمناها .. وئت يلي سمعنا هلكلمة لأول مرة .. واجينا بكل برائة وغباء ( وكان وئتا كلعادة شعري منكوش وشارة مخطي .. والهبل سيد الموقف .. فا تخيل البرائة يرعاك الله :lol: ) واجينا سألنا الأهل والخلان .. عن المعنا لهلكلمة .. طبعاً الجواب كان حاضر .. انو التمييز العنصري هو تمييز لوني بحت . أبيض وأسود .. وئامو وئتا طرحولي مثال : انو زلمي أبيض .. بكون بيكره التمييز العنصري .. بس كمان بيكره السود :lol: .. وبزكر وئتا لحمسولي ع شعراتي وئالولي يلا .. ئوم كفي لعب بلطابة برا . :lol:

أما المهم .. شخصياً تعرضت لهلمشكلة بهلبلد يلي حاضني وراعيني .. كـ مقيم . بزكر كنت رايح علبنك مشان استفسر عن قرض سيارة .. كان في مراجع ئبلي جنسيتو لبنانية .. وانا بعدو .
طبعاً لمست وستشعرت الإحترام يلي حصل علي هلشخص اللبناني .. من قبل موظف البنك .. ئمت بيني وبين حالي .. ئلت خييي .. يعني بئدر آخد راحتي مع الموظف واستفسر منو علمزبوط عن الوراق المطلوبة وهيك .

اجا دوري .. سألني شو رقم حسابك عنّا .. عطيتو الرقم .. ئام ئلي حضرتك سوري ؟ ئلنالو .. مابليد حيلة شو بدنا نساوي . وهون عاد .. صار في جفاصة بلتعامل والتعاطي .. بشكل رهيب . يعني حكي معي من روس مناخيرو .. وبزكر وئتا حكا شي مافهمتو .. ئلتلو عفواً ممكن تعيد .. ئام زورني وعاد الحكي بس بطريقة حسيتو فيا عشوي تانيي رح يئوم ويليحني كف .

هادا طبعاً ,, ماحكيت عن التمييز يلي بيحصل بين ابن البلد بشكل عام وبين المقيمين بطريقة التعامل والتعاطي .. يمكن لأنو تعودت عليا .. بس هي الئصة زعجتني كتير .. لهيك حبيت احكي عنا .

اي صراحة زيادة .. وانا مدري كم الف مليون مرة معاني من هالقصة .. انو مالي معاني منا من شخص زاتو اجا عمل تمييز عنصري معي .. بس بعاني منا من خلال قانون البلد وهيك انو مثلا ازا بدي سجل بشغلة او بدي اعمل شغلة معينة فالافضلية لصحاب البلد .. وبقلك ياها بالعلني
حتى اخر مرة انعمل فيني دق تمييز عنصري :o(حلوة هي ) كانت من شي شهر لما رحت بدي سجل بالجامعة المهم ع اساس ادارة اعمال والله وسما الله المهم والله مشي حالنا بس طلعت ادارة الاعمال بس للقطريين وبدك تستنى لبين مايخلصو القطريين وازا زدلك بمشي الحال مع انو المواطنين معدلاتن في منن اقل مني + كمان لما فترة كنت عبدور ع شغل وهيك الجنسية بتلعب دورا .. ومتل مازكر الاخ اعلاه .. انو مثلا المواطن غير تمام عن المقيم .. واللبناني غير عن السوري وهيك يعني ..
بس انو عادية الشغلة الواحد تعود عليها .. وانو الشغلة صار تنحكى قبل كل شغلة انو اخي الافضلية لصحاب البلد والاجانب .. فانو عادي بتتعود .. طبعا هادا ماعدا ازا بدك تاخد قرض مثلا من البنت او بدك تشتري شي شغلة كبيرة او او او .. كلو فيو تمييز عنصري عادي

أكتر حالة بشوفها من التمييز العنصري هي حالة مطار دبي يلي بيعتبر الاهم على صعيد المنطقة.. هاد ياشباب بالأمن العام محل مابيختمو الجواز وبيطابقو التأشيرة والفيزا وهيك في حوالي التلاتين ديسك قاعد عليون موظفين.. هالمكاتب هدول موزعين على الشكل التالي:
4 للمواطنيين الإماراتيين
4 لكل الجنسيات العربية ماعدا دول الخليج العربي
4 لمواطني دول الخليج العربي حصراً
4 لمواطني الولايات المتحدة الأمريكية حصراً
4 لدول أوروبا عدا بريطانيا
2 لمواطني بريطانيا حصراً
3 لكل مواطني دول آسيا من غير العرب
2 لكل مواطني دول افريقيا من غير العرب
1 لأستراليا
2 لرجال الأعمال

يعني بتطلع هيك بتشوف كاونترات الأميركان والأوربيين فاضية وكاونتر تبع دول أسيا وصلان لأخر المطار... وكاونترات الدول العربية ما عم تلحق وكاونتر بريطانيا فاضي

فانو المهم نزل الشيخ محمد بن راشد على المطار السنة الماضية فقالولو يا أبو الشباب هيك هيك القصة فعمل اجتماع مع ادارة المطار يلي بقدرة قادر قنعتو انو توزيع الكاونترات بيتم حسب عدد الوافدين... يلي بالحقيقة وبحسبة بسيطة لازم يطلع انو كل الكاونترات تكون للأسيويين والعرب ويتركو كاونترين لباقي الجنسيات.


وأحلى شي انو لوحات توزيع كاونترات الدول ديجيتال وبيغيروها من عندون فإذا الله قدر ونزل 3 طيارات من أوروبا وأميركا سوا بيقلبو كل الكاونترات لإلون وبتشوف الأسيويين صافين بطوابير وصلانة لآسيا... مع العلم انو من الأساس في فرق بتأشيرة الدخول بين الأسييون والأوربيين والأمريكان يلي تأشيرتون أسهل بمراحل من باقي الجنسيات.

الحقيقة ملفت للنظر انو أول 3 مشاركات كانت عن دول خليجية !


شخصياً حسيت بتمييز عنصري مرتين (يعني ضدي كشخص), و تنيناتون بمطارات... وحدة بمطار دمشق لما واحد طلب مني "اكرامية" لأنو الساعة أربعة الصبح و رديت عليه انو و الله يا معلم هاد شغلك.. ازا مناوبتك ليل أنا شو ذنبي... فكان ردو انو ظل شي ساعة بيفتش فيني, و سمّعني كلمة حلوة و هي: " الحق مو عليكون, الحق عاللي طالعكون من لواح الحنطة و من بين الغنم و فوتكون مطارات".. و الصراحة بيوميتا حسيت بالمهانة لأنو ما قدرت رد عليه خوفاً على أبوي من لحظة غضب (والدي مريض قلب و كان بالصالة برا ناطر طيارتي تطلع).

المرة الثانية بمطار مدريد... موظف شركة أمنية خاصة مسؤولة عن التدقيق قبل الدخول إلى صالات الترانزيت, أصلو مغربي (شكلو سبتاوي أو هيك شي).. قعد يتفزلك على سمايي لما شاف بطاقتي باسم عربي و فتحلي اللابتوب و فك البطارية و بدو يفتح الشنطة الصغيرة و بدو يشلّحني الصندل اللي لابسو.. فلما قلتلو حل عن سمايي طلع بالعالي و طلب مني الجواز, فقلتلو ينادي شرطي رسمي يطلب جوازي لأنو مو من صلاحياتو يطلب جوازي... و كان كذلك.. و اشتكيت عليه (على الأقل مشان تاني مرة ما يعمل حالو أبو عنتر على "المشرقيين" متل ما يسمونا بعض الاخوة المغاربة اللي يبدو الهون ثأر عنا أو هيك شي..)


غيرو مواقف اعتيادية ضمن سورية... لما يسمعو اللهجة الجزاوية, منرجعلها بعدين

تميز عنصري.. بعرفو منيح لهالمخلوق :lol:

ايام السعودية.. كان في لجنة اسمها لجنة السعودة.. هاي كان شغلتها الاساسية.. تشيل المقيمين و تحط بدالهم سعوديين.. طبعا بدك تحط العمال اللي بيشغلو المكينات و بينضفو و هيك ع جنب.. بيجوز السعودي ع راسو ريشة و غير البشر.. فمش من "البرستيج" انو يشغلو شي عامل بحيالله مصنع !!

المهم.. ابوي كان مدير مصنع هناك.. و اذا بلجنة السعودة تطلع عليه.. و تقلو "كمشتك يا اجنبي" هيك بالحرف الواحد :lol: بابا قلهم بشو كمشتني يا اخو العربان؟.. قلو هات اقامتك..(هاي شي متل الهوية.. بما انو "الاجنبي" جوازو مش معو ولكن مع كفيلو:? ) بيكون مكتوب فيها المهنة.. والله و شاف المهنة قام قلّو تبع اللجنة شو هاد؟.. قلو بابا اسمع انا شايف عمّان اقرب من خلقتك..:pos:

و عليه جينا ع كندا :lol:

يي هلا استنى اعصرلك مخي.. بيطلع معي حكايا و حكايا ع هاد تميز عنصري :lol:

الحقيقة ملفت للنظر انو أول 3 مشاركات كانت عن دول خليجية !


شخصياً حسيت بتمييز عنصري مرتين (يعني ضدي كشخص), و تنيناتون بمطارات... وحدة بمطار دمشق لما واحد طلب مني "اكرامية" لأنو الساعة أربعة الصبح و رديت عليه انو و الله يا معلم هاد شغلك.. ازا مناوبتك ليل أنا شو ذنبي... فكان ردو انو ظل شي ساعة بيفتش فيني, و سمّعني كلمة حلوة و هي: " الحق مو عليكون, الحق عاللي طالعكون من لواح الحنطة و من بين الغنم و فوتكون مطارات".. و الصراحة بيوميتا حسيت بالمهانة لأنو ما قدرت رد عليه خوفاً على أبوي من لحظة غضب (والدي مريض قلب و كان بالصالة برا ناطر طيارتي تطلع).

المرة الثانية بمطار مدريد... موظف شركة أمنية خاصة مسؤولة عن التدقيق قبل الدخول إلى صالات الترانزيت, أصلو مغربي (شكلو سبتاوي أو هيك شي).. قعد يتفزلك على سمايي لما شاف بطاقتي باسم عربي و فتحلي اللابتوب و فك البطارية و بدو يفتح الشنطة الصغيرة و بدو يشلّحني الصندل اللي لابسو.. فلما قلتلو حل عن سمايي طلع بالعالي و طلب مني الجواز, فقلتلو ينادي شرطي رسمي يطلب جوازي لأنو مو من صلاحياتو يطلب جوازي... و كان كذلك.. و اشتكيت عليه (على الأقل مشان تاني مرة ما يعمل حالو أبو عنتر على "المشرقيين" متل ما يسمونا بعض الاخوة المغاربة اللي يبدو الهون ثأر عنا أو هيك شي..)

غيرو مواقف اعتيادية ضمن سورية... لما يسمعو اللهجة الجزاوية, منرجعلها بعدين


ياس، أنا المرات اللي رحت فيها على مطار مدريد، ما في مرة إلا وشلحوني فيها السباط:frown::jakoush:!! وكنت كل مرة بيشلحوني اياه بغيرو، بحكي بلكي من الكعب، بلكي ما بعرف، ولا مرة سلمت، إلا ما يشلحوني، وكانوا الموظفين في هاي الحالة، على الأقل اللي أنا متذكرتون من أمريكا اللاتينية. طبعا عدا أي شيء معدني لازم تشيلو واللابتوت اللي بيتفتش، هلا اللي بقصدو، انو في المطارات ها الإجراءات المشددة بتنعمل مع الكل، بس طبعا مش من حقو يطلب منك الجواز لأنو مش من صلاحياتو، بس والله ما النا ثأر عندكو ولا شي، بالعكس، الإخوة المشارقة على الراس من فوق :lol:

هلأ إذا بدي أحكي عن تجربتي الخاصة، كتير صايرة معي مواقف حسيت فيها بإهانة بشكل غير مباشر أو مباشر، أغلبها كان بسبب تعليقات سيئة أو عنصرية عن المغاربة، بتنحكى بنص خلقتي، لأنو ما ببين أنو مغربية :lol:
جد، ما بقدر احسب عدد المرات اللي تحطيت في هيك موقف (بقصد انو حدا يخبص بالحكي من غير ما يعرف أصلي)
بس رح أحكي موقفين كتير أثرو فيني، الاتنين صايرين معي فترة الدراسة، وقت ما كنت بدور على بيت في غرناطة: أول واحد، لما كنت بدور على بيت، جمعت عدة إعلانات، حكيت تلفون مع صاحب البيت، عملت موعد معو و رحت مشان يفرجيني اياه، لحد الآن، كلو تمام والتعامل راقي جدا، المهم، طلع البيت كبير، فيه شي 4 غرف، فبيحكيلي الزلمة هاي مش مشكلة، بتسكني أنت وبعدين بتدوري على ناس يسكنو معكي، بس ديري بالك، لأنو هون مليان "مسلمين":?!
قمت حكيتلو، سوري، يعني، بس أنت عم تحكي مع واحدة مسلمة :cry:، طبعا صاير بيتأتأ وانو ما عندو مشكلة مع المسلمين إطلاقا وما بعرف شو.. طبعا أنا ما ورجيتو وشي بعدا

الموقف الثاني كان أسوأ: برضو كنت بدور على شقة (بس مش نفس السنة)، رحت البيت شفتو، شفت البنات اللي فيه (كلهن طالبات اسبانيات)، سألوني شو بعمل، حكيتلهن بدرس، (بس ما اجا على بالهن يسألوني من وين أنا) خلاص، مشي الحال، عطوني رقم صاحبة البيت، اتصلت فيها، عملنا موعد، دفعت المصاري وكلشي، على أساس بدي اجيب أغراضي المسا، اتفقنا، طبعا، في إطار الحديث سألتني عن اسمي، حكيتلها، سألتني من وين، حكيتلا من المغرب (استغربت هي شوي، بس ما لاحظت استياء أو اشي). المسا لما جيت اجيب أغراضي، إلا وما في حدا، اتصلت عليها، إلا وهي بتحكيلي، أنا آسفة جدا، بس البنات لما عرفو انك مغربية، حكو ما بدون، وأنا ما بقدر أعمل شي، لأنهم هددو بأنهم رح يطلعو من البيت:shock::shock:، وهلا بجي وبرجعلك المصاري، وفعلا هيك كان.
هذا الموقف كان أسوأ موقف تعرضتلو في حياتي، بعرف انو في خلفية وانو في كتير مغاربة مش كويسين، بس هذا مش مبرر انو نتعامل مع الناس على أساس جنسيتون، لك أنا عندي إحساس انو الجريمة هون الها جنسية وعرق: السرقة الغجر، السطو الرومان، الحشيش، المغاربة، الدعارة، الروسيات، إلخ..
وها الشي كتير بيحز فيني، بحاول وين ما أروح أغير ها الفكرة، ومن كتر ما صاير "مواقف بايخة" صايرة بحكي أنا مغربية، قبل ما حدا يخبصلو بشي كلمة :pos:

اه، هذا غير عدد المرات اللي سمعت فيها أو انسألت إذا في المغرب بيبيعو نسوان أو بيبادلوهن بجمال:shock:

على اساس قومي ..لأ كمان على اساس ديني و مناطقي و الفرق بين التمييز بالدول التلاتة سوريا و انكلترا و مصر يلي انا شفتو ..

اول شي بحكم انو سوريا هي بلدي لهيك شي طبيعي جدا انو حتى التفاصيل الصغيرة بكون على اتطلاع عليها و من هون بيجي الأحساس انو اكتر انواع التمييز صار معي و انا بسوريا ..

ما بيخفى على حدا الأنقسام الحاد بالمجتمع السوري سواء كان ديني او عرقي او مادي ..من الشغلات يلي كانت تزعجني مثلا ,,انو بمدينتي بحس انو كل حارة هي عبارة عن مدينة مختلفة بالعادات و اللبس و الكلام و غيرو و هاد شي منطقي جدا جدا ,,بس الشي غير المنطقي هو حالة العزلة الصايرة بين المجتمعات الصغيرة هي ضمن المدينة الواحدة بحيث انو بسمع كلام شب مثلا من منطقة معينة عن اهل مناطق تانية متل " يا رجل بتحسون يهود !! " او مثلا " بتشوف الحقد بعيونون !! " او " متخلفين و فقرا !! " ..متل هيك عبارات بتعطيك احساس انو هدون بعمرون ما صار احتكاك بين بعض ...و هون بتتولد الكراهية و شغلات تانية سيئة ..هلئ الكلام هاد ضمن مدينة واحدة ,,ما بعدت نحو الأرياف و المدن التانية . من الشي يلي بيزعجني كمان كلمة " شوايا " ..الكلمة هي بتدل على المكان يلي وصلنالو كسوريين شي خ*ا عالأخير ...اول شي انا ما من المناطق يلي بينقال عنها الكلمة هي ..بس بتضايق انو الناس يلي بيحكوها هني عنجد ما بيختلفو شي عن الناس هدوك بغض النظر عن طبيعة الناس هدوك ,,,يعني صدقوني ..الأجنبي ما بيشوف فرق بين المدن السورية وقت بيمشي فيها ,,,يعني كلنا النا نفس الطبيعة ,,هلق ما بتفرق اذا كنت لابس بنطلون جينز مشرط او جلد اسود ضيق او لابس بنطلون قماش موديل الخمسينات ..صدقوني نفس المرض ..لهيك بتضايق وقت بسمع سوري عم يحكي عن سوري تاني بالشكل هاد ..ما كلنا بالهوا سوا ...

بذكر انا بالبكالوريا بعد ما اصدقائي الأرمن اصرو انو سجل معون بمعهد شتوي هو جزء من كنيسة رحت و درست معون ,,و انا كنت شكلي متل الجوكر بين الطلاب ..على حال الأساتذة كنت بعرفون كلون من مدرستي القديمة لهيك حبيت سجل بالمعهد هاد ,,المهم ..كان في عنا استاذ ملحد نظامي كان عم يحكي عن اسطورة ادم و حوا ,,طلب رأي الطلبة بالأسطورة هي ..انا رفع ايدي و جاوبت " كتير تعلمنا اساطير من لما كنا صغار ..و بعدين لما كبرنا شفنا انو هي مو اكتر من اساطير سخيفة .."
تاني يوم مديرة المعهد طلبت مني انو ما بقى اجي لأنو الطلبة فهمو من كلامي انو مو بس ادم و حوا اسطورة ..لأ المسيح كمان ,,انا كنت بقصد الشي هاد بالفعل بس كلامي كان اوسع يعني كنت بقصد كل الأنبياء الأديان ,,بس لأني جوكر بالمعهد ..انفهمت على انو انا عم شكك بالمسيح !! ...بس الأستاذ المسيحي هاد ما تركني و فرغلي ساعتين يوميا بيبيتو لنكمل المنهاج مع بعض ..يعني هون مسيحيين اذوني ..و هون كمان في مسيحي عمل معي معروف ,,لهيك القصة ابدا ما عملتلي مشكلة .

بأنكلترا الوضع بيختلف ..ما رح قول انو ما في تمييز عنصري ..لأ في بالطبع ..بس دايما بيفرجوك الأحترام و حتى ولو انو بقلبون ما محترمينك ,,,و هاد اكبر فرق شفتو بين انكلترا و سوريا ..يعني انو يفرجوك تمييز عينك عينك انا ما شفتها ,,,هلى البعض بيجادلني انو انا ما عشت ب بورتسموث مثلا او ليفربول الأماكن يلي فيها تمييز ,,و انو بلندن ما بيظهر فيها تمييز لأنو فيها كتير مجتمعات ..بس كمان في دراسة بتقول انو اكتر المجتمعات المحرومة ببريطانية بتعيش بلندن و هاد الشي انا برأيي لازم يعزز التمييز يلي بيصير ,,,بس مع الشي هاد انا ما لأحظت في تمييز عينك عينك ..و انا ما عم اتكلم عن ناس بتمشي بالشارع ,,لأ عم احكي عن ناس بالجامعات او ببيئة عمل او اماكن عامة متل بارات مسارح ملاعب او حتى مطارات . ..المغزى انو التمييز موجود و هاد بطبيعة البشر ,,بس الناس هنيك ما بيظهرولك ياه بشكل وقح ...و اذا كنت بتستاهل شي فلازم تحصل عليه اذا عجب الناس او ما عجبها .

بمصر ما بسمع غير كلمة وحدة لما بقول انو انا سوري .." احسن ناس ! " هههه ..هلئ عم يجاملو عم يكذبو .. ما بعرف ..بس خلي نيتي طيبة و قول انو الجماعة عنجد بحبونا .

مشان موضوع المطارات ...انا ما بتهزأ غير بمطار دمشق ..رح اكتب بعدين عن الشي هاد لأني تعبت من الكتابة عن طريق موقع كيبورد عربي


و احسن ناس ..

أنا سوري وأرضي عربية وشعبي بطل الحرية سمائي وأرضي ومائي أبيا أبيا ابياااااااااااااااااااااا اااااااه
أنا بدي أحكي عن التمييز العنصري هون بسوريا
اول شي بدي إحكي عن التمييز بالمكان اللي أنا بشتغل في
يعني انو المدير حاطط( ولاد جماعتو ) بالمكان الممتاز واللي في مردود منيح ومهمات خارجية وتعويضات طبيعة عمل بتوصل لحد ال100 بال100
أما البائيين فشالحن بأقسام تانية ينتظرو الراتب بآخر الشهر طبعا أنا عمبحكي عن وظيفة حكومية
وفي شغلة تانية
لمن راح أحد زملائي لحتى يشتغل بجريدة الوسيلة التابعة لليونايتد غروب
طبعا عمل انترفيو الزلمي مع مدير المبيعات وطبعا الشب اسمو بيدل على دينو فاضرب المدير بووووز شي تلت امتار واستشاط غيظا وراح ناترو هديك الكلمة أنو شكلك الخارجي لا يليق بالمهنة التي ستوكل اليك وطبعا صار طوشي ولوشي كبيرة وكان صاحبنا بدو يرتكب جريمة في لولا التدخل السريع
هاموش :::: العما أبو الغيث انت عمتحكي عن النفسية يا نفسية عمبمزح يا عصنري

هلأ اول شي الموضوع كتير مهم ..
تاني شي يمكن انا بدي احخكي عن تمييز عنصري هوي صحيح ما بيطلع شي قدام اللي قالوه الشبيبة والشبيبات بس برضو يعتبر تمييز وشي بيدايق الواحد كتير ...

هلأ انا اكتر شي عانيت منو من ناحية التمييز هوي بالجامعة يعني التمييز بين البنت والشب .. يعني انا باول فصل الي بالجامعة كنت انا وبنت نفس العلامات تقريبا يعني هي اعلى مني بشي بسيط يعني ازا بتاخد هي علامة انا باخد اقل منها بدرجة .. المهم ولانو الدكتور نسونجي درجة اولى ولانو بيعرف خطيبها للبنت نزلتلها اعلى علامة وانا اقل منها بتلات درجات يعني فرق كبير وواضح انو في تمييز وكتير كبير ... هلأ غير هيك انو فعلا فعلا بكل الجامعة تقريبا ما بتطلع اكتر منت 3 دكاترة مش نسونجية يعني بس تروح عليه وتضحكلو شوي بتصير علامتها فوق الريح ونحنا تحت الارض يعني فعلا انو كتير مواد انا وغيري من الشباب انظلموا فيها لانو عن جد في تمييز كتير كبير بهالموضوع يعني احيانا الواحد بيتمنى انو بنت ..:jakoush:

من باب التمييز العنصري فهون ببنوك الإمارات هاد شي صايريشكل رسمي يعني متل قائمة الدول الداعمة للارهاب عندون قائمة الدول اللي مابتنعطى قروض وبالطبع السوريين على راس القائمة وهاد يرجع على حد قولتهم إنو أكبر نسبة من الأشخاص اللي ماسددت قروضها هنن سوريين:?

أنا ما بتذكر غير موقف واحد حصل معي من حوالي السنة تقريباً, كان في محاضرة عنا بالجامعة محاضرة عامّة يعني عنوانها هل الإسلام والمسيحية يؤمينون بنفس الإله, وتحت عنوان المحاضرة مكتوب النقاش ممنوع, يعني بدو يكون المتلقي متل الخاروف شو بينحكالو لازم يهز راسو بالموافقة
وبما إنو المتلقين بس ألمان يعني مانون عرب والحقائق غالباً مابتوصل كاملة فعملنا حوصة بالجامعة لحتى نلم الشباب والصبايا العرب ويلي بيطلعوا حوالي العشرين شب وصبية من جنسيات مختلفة
بس مافي سوريين غير أنا وشخص تاني وصبية من حلب والصراحة يلي عمل هالحوصة كلها بنت سورية من حلب ساكنة وبتدرس بفرع الجامعة يلي بعيد حوالي الساعة عن إلقاء المحاضرة (محدا حضر المحاضرة غير السوريين, العرب كالعادة اخترعوا حجج من خوفون على حالون وعلى إقامتن),
الشخص يلي عم يلقي المحاضرة مصري آخد إقامة عن طريق الكنيسة يعني هالشخص شغلتو يبشر لحتى تضل الإقامة معو, المُحاضر بلّش محاضرتو بالمشاكل يلي بين الأقباط والمسلمين بمصر طبعاً بهالحالة الأقباط نازلين من السما مابيغلطو و حكى أشياء منها الصح ومنها الغلط وصار يبهر فيها كتير.
بآخر المحاضرة طلبنا نحنا كمسلمين إنو ندافع عن الأشياء الخطأ يلي حكاها المُحاضر ونوضح وجهة نظرنا بيلي نقال ولأنو الناس يلي حضرانة المحاضرة حابة تسمع سمحلنا المحاضر انو نناقشو حتى ماينحرج بعدم قبوله...
أول كلمة حكيناها إنو إنتو أكيد بعد هالمحاضرة صار عندكون فكرة انو الإسلام دين سيء جداً وعندكون رغبة إنو نطلع لبرا القاعة,
واحد قاعد ورايي مباشرة قال صحيح وياريت تطلعو انّو طنت بإدني طن, أنا حسيت الأرض بدها تنشق وتبلعني إنو كتير تدايقت من الموقف, وأحد الأشخاص الموجودين بالمحاضرة ساكن معي بنفس السكن قبل المحاضرة كانت علاقتنا جداً عادية مرحبا وأهلين ومن هالحكي عالخفيف بعد المحاضرة لما صرت سلّم عليه بطّل يرد عليي السلام.
__________________________________________________ _________________________

هلأ عندي وجهة نظر تانية بالنسبة لبعض الآراء الي وردت بردود الشباب, موضوع تفضيل المواطن ببلدو عالغريب بالشغل بغض النظر لأي بلد بينتمي بعتقد انو هالشي مابيندرج تحت إطار التمييز العنصري حسب رأيي المتواضع لأنو ببساطة أهل البلد هنن أحق من غيرهن, يعني لو هالشي بيصير عنّا بالبلد لو كنّا نحنا مكان السعودية أو قطر أو الإمارات مابظن انو بنقبل شخص غريب جاية لعنّا عالبلد لحتى يشتغل ياخد فرصتي بالشغل إذا أنا عندي نفس المؤهلات أو حتى أقل بس بقدر اشتغل نفس الشغل يلي هو بدو يشتغلو خصوصي إذا أنا عاطل عن العمل.
:D

أوّل مرّه كانت بتعرض فيها لتميز عنصري بمطار شيكاغو .. كنت مسافره عسوريا أوّل زياره بعد حوالي سنه من اقامتي هون و نازله بجواز سوري .. و بناء على انو جوازي سوري انختمت بطاقتي بختم غير الختم اللي عم ينختمو فيه باقي البطاقات و رحت على نقطه تفتيش مختلفه متل ما قال ياس ايضا فكو اللاب توب تبعي و جزمتي حطوها بجهاز غريب عجيب :lol: و دخلت عغرفه فتشتني فيها وحده متل ما بفتشو المجرمين بانها تتحسس جسمي من فوق لتحت :pos: .. و نكتولي اغراضي فوقاني تحتاني .. و آخر شي لما قلي الشخص اللي رجعلي جزمتي انو صار فيكي تروحي .. حسيت انو ما عاد بدي روح .. أنـّو اغراضي منكوتين و كل هالبهدله هي لأنو الواحد رايح سياحه ..
و هالحادثه تتكرر كل مرّه بسافر فيها بجواز سوري من اميركا ..

المرّه التانيه اللي حسيت فيها بالتميز ضد الدين كانت من فتره شي كم شهر فقط .. و من وحده صديقتي .. عندي صديقه كانت عايشه بالباكستان بصغرها و هيّ مسيحيه لكن كانو بالمدرسه يضربوها عايديها مشان تقرا قرآن و تصلي :? !! طبعا ً هالشي حسب ما بتقول .. و بذلك هي عندها نوع من التعصب ضد الأسلام - اذا صح التعبير - و اللي صار انو من فتره بشغلي ( أنا بشتغل مع الأطفال ) خبرت هي الصديقه أحدى الاطفال بالشغل انو شوش مسلمة .. فالبنوته بعفويه و اللي بتعرفه و بتسمعه عن الأسلام جاوبت : يعني ما قرّب عليها؟؟ بتموتني ؟؟ في خطر من اني العب معها ؟؟

فعليا ً هالحكي ممنوع و بامكاني اعمللها مشكله لرفيقتي بالشغل لكن كونه في صداقه بيناتنا ما ريبورتيد ايت ..

غير هيك ما بتذكر .. أكيد بكون صاير مواقف متفرقه بس غير هالحادثتين ما بذكر شي علقان براسي حول التميز العنصري ضدي شخصيا ً ..

شخصياً حسيت بتمييز عنصري مرتين (يعني ضدي كشخص), و تنيناتون بمطارات... وحدة بمطار دمشق لما واحد طلب مني "اكرامية" لأنو الساعة أربعة الصبح و رديت عليه انو و الله يا معلم هاد شغلك.. ازا مناوبتك ليل أنا شو ذنبي... فكان ردو انو ظل شي ساعة بيفتش فيني, و سمّعني كلمة حلوة و هي: " الحق مو عليكون, الحق عاللي طالعكون من لواح الحنطة و من بين الغنم و فوتكون مطارات".. و الصراحة بيوميتا حسيت بالمهانة لأنو ما قدرت رد عليه خوفاً على أبوي من لحظة غضب (والدي مريض قلب و كان بالصالة برا ناطر طيارتي تطلع).



تقريبا كل القصص اللي انحكت صارت برا سوريا, بس الها طعم أمر الشغلة لما واحد ضمن بلدو هيك بيتعامل بس لانو من منطقة معينة.




أنا لحد هلق محظوظ ما اتعرضت بالمانيا ولا مرة لتمييز عنصري شخصي مباشر.


بس الشغلتين اللي صاروا معي وفين تمييز عنصري , الن علاقة بقانون طبقوا بعد 11 سبتمبر ببعض ولايات المانيا بيخص الاجانب اللي من الدول العربية و الاسلامية وهو انو كل ما بدو الواحد يروح يمدد اقامتو لازم يعبي استمارة مكافحة الارهاب.

و القرف كان بالاسئلة المطروحة بالاستمارة , من قبيل عندك خبرة بالمتفجرات؟؟ بتعرف تستخدم سلاح؟ سبق انك قتلت حدا او ادانوك بشي جريمة من هالنوع؟ و أسئلة تانية كتيرة, يعني الواحد بحس حالو عن جد مجرم او مشتبه في انو مجرم بس لانو بينتمي لبلدان معينة.

الشغلة التانية اللي بتشبه الاولانية, انو مرة لما كنت طالب بالجامعة لقيت شغل بالجامعة نفسها بفترة العطلة يعني اقل من شهرين , لما قدمت علي قالولي كونك سوري وبحسب القانون رقم كذا لولاية كذا , وعلى اعتبار الجامعة تابعة للدولة لازم بالاول قبل ما نوافق على تعيينك نبعت نسأل عنك جهاز المخابرات الداخلي
وبعتولي هالشي برسالة ولهلق بتذكر هالعبارة " بناء على امكانية انتماء القادمين من بلدان محددة , سوريا من اولن طبعا, لحركات اسلامية ارهابية فنحن ملزمون باستشارة جهاز المخابرات اولا"

طبعا بالاخير اشتغلت هالشهرين , وهي كانت اصلا شغلة روتينية بس شقد بحس الواحد حالو ذليل , والله تخيلت حالي عم قدم على وظيفة بسوريا وعم استنى موافقة الامن السياسي :lol:

أنا غير الكل
بالسعودية بنصير ناكل هوا ونقفل على السعوديين ونكسر عليهون ( بالسيارات وهي أحلى الشي وأكتر شي ) ونتقاتل معون ( وهي ياما صارت معي )ونسبون ( وهي ظريفة ..بتسب أصل الواحد وإنتا بالسيارة وخليه يلحقك ...) ويعني أنا ورفقاتي إذا بنسمع إنه في شب سعودي دغري بنروح نقفل ونتمصخر وناكل هوا عليه

هي عدا إننناه بنرفع مناخيرنا على المحاسب السعودي ... وإذا إجا على بالي فش خلقي بطلع بالسيارة وبكسر على السيارات الأمريكية الي بلاقيها بالشارع ( لأن السعوديين بطير عقلون بالسيارات الأمريكية )

وما في حدا من الشباب الطيبة بصاحب سعودي ( لأنون مو من مستوانا ).... وبنقعد نقفل على الطلاب السعوديين بالصف وبنتمصخر عليهون كمان

بس العنصرية ضدنا شغالة عال24

وكلوه فايت ببعضوه ... يعني نحن بنمارس العنصرية ضدون وهنه بمارسوها ضدنا ولنشوف مين بفوز بالآخر


[/SIZE]

تقريبا كل القصص اللي انحكت صارت برا سوريا, بس الها طعم أمر الشغلة لما واحد ضمن بلدو هيك بيتعامل بس لانو من منطقة معينة.
تماماً...

بصراحة أنا باسبانيا ما تعرّضت بحياتي لشي ( ما عدا الحادثة مع السيكيوريتي المغربي)... و يعني بسوريا متل ما تقول مواقف, مخجلة..

يعني مثلاً, جزراوي انت.. لهجتك جزراوي, حسكاوي رقاوي ديري ما بتفرق, بتروح على محل بإحدى المدن الكبرى (بشكل عام, و عام جداً).. أول شي رح يتعامل معك كأهبل, انو انت خلص أهبل لأنك شاوي.. تاني شي, بيفكرك غبي لدرجة انو ما رح تفهم على لهجتو فيحاول يقلّد لهجتك بطريقة سخيفة قميئة, و مو بس هيك.. بيرفع صوتو شي طبقتين تلاتة (يعني فهمنا مفكرني غبي.. بس مين قلك انو كمان أطرش؟)

أو حدا يجرّب ينزل عالشام بسيارة نمرتها الرقة أو الحسكة... كل دورية شرطة رح توقفك (معروف عنا انو من سمعنا الصفارة بنمد ايدنا ع جيوبنا بدون ما نسأل ليش.. و للأسف هالحكي بشكل عام صحيح).

اللي صار انو اعتدنا.. و يعني حتى ما نفكر فيها كتمييز... يمكن بتصير بكل دول العالم

كمان ع سيرة التمييز العنصري ببلدنا .. ولللي هو اوسخ وادق رقية من التمييز العنصري اللي برا .. وبكون بطريقة همجية اكتر بكتير من اللي برا ..
هي مرة من شي تلت سنين كنت جاي من قطر ع الشام المهم وصلت طيارتنا ونزلنا ع مطار الشام .. المهم ع اساس طيارة حلب شي ساعتين موعدا مشان نكملا فيا ع حلب .. ولا مابعرف شو صار وقتا المهم اتأجلت الطيارة لمدة 13 ساعة ومافينا نسافر ع حلب الا لتدبر شي طيارة ع حلب بعد 13 ساعة او انو بدك دبر حالك .. انا هون اكلت هوا رسمي انو 13 ساعة وماخرج اعد بالشام بعدين يوم كنت انا واهلي وانو شناطي وقصة صعبة كتير تطلع بالباص وبدك حلم الله لتقدر تحمل هالشناطي وهالغراض وتلم هالعيلة وتنزل فين ع كراجات الشام .. ومابتزبط بالمرة .. المهم ولا فجأة بنط واحد انو ياجماعة اللي صارت معن هالمشكلة يتفضلو معنا مشان يعدو هال13 ساة بفندق المطار .. :shock: انو نحن هون استغربنا انو مافي بالعادة بس والله ماكزبنا خبر .. رحنا انو وخلص عبياخدو اسمينا مشان نروح ع الغرف ولا بعدين بسالونا حضرتكن من وين جايين
قلنالن والله من قطر .. سالونا انتو سوريين مو قلنالن اي وهني بيعرفوا طبعا .. المهم والله واحد بقلنا والله يامعلم بدنا نعتزر ع هالغلطة قصة الفندق هي بس للاجانب (لانو كمان في اجانب كانو رايحين ع حلب وصار معن نفس القصة لانو طيارتن معنا) وانتو مومالكن شي .. وبدك تضلو بالترانزيت .. طبعا يوما ضلينا قاعدين ع مقاعد الترانزيت 13 ساعة .. بس هالشي ما اثر فيني شخصيا
قدام الزل والاهانة اللي حسيت فيا من ورا قصة الفندق هي ..
يعني شقد مابتعرض لتمييز عنصري بحياتي مامكن انو انسى هالموقف لانو اكتر موقف بحسسك بالزل ممكن يمر علي !!

تمميز عنصري؟؟ :?
اممم اتعرضت الو اكتر من مرة
بالبداية بالشام لما سكنا فترة فيها
يعني اول انطباع انو اذا البنت من الساحل فيي بنت (سهلة ) يعني بتحكي مع ايا شب بيجي لعندها ومرة قالها واحد هيك بالمشرمحي انو انا بضل شو ما عملت بنت من الساحل وبالتالي صايعة !!!! وهيدي لمستها كمان من كتار من الداخل او الشمال السوري ... يعني لما كنت اشتغل كانت تصرفاتون وكانو بنت الساحل معناها بكلمتين بتروح معون زيارة ع البيت!!!!...
اما بعد سفري فالتمييز كوني سورية وبالتالي ارهابية لمستو اكتر من مرة لما بدي مدد القيزا .. يعني لما عرفت الموظفة اني سورية برمت بوزا ونظرة نظرة دونية انو هع سورية !!! وكمان لما اجا صديقنا وكنا بدنا نفتحلو حساب بالدويتشه بنك يعني بعد ما استقبلونا بالمرحبا وما بعرف كعرونا انو والله السوريين ما عاد بيحقلون يفتحو بهيدا البنك !!!!
اي وطبعا بيضيف كلام ايهم عن الاستمارة مكافحة الارهاب وانو لما بدي مدد لفيزا لازم جاوب ع 250 سؤال من شكل الي علاقة مع جماعة بن لادن او ابو سياف.. وشي ما عرف قديش منظمات بحياتي ما سامعة فيها
وشغلة تانية بعانيها هيي اتمييز الديني من هالناحية انو لا اسمي ولا شكلي ولا لهجتي بالحكي بيعطي انطباع مباشر عن الدين المسجل .. ولهيك بيضل في اخد وعطا سواء مع مسيحيين او اسلام .. لحتى يعرفوا اني ملحدة .. وبالتالي بتنقطع العلاقة مع اللاتنين !!!! وهيدي عم تكون مع العرب بشكل اساسي سواء ضمن سورية او براتها ما فرق واقل بكتير بكتير مع الاجانب .. بس لما اتعرفت ع بولونية ما قدرو يستوعبو شغلة انو ملحدة .. وما عاد في تواصل بيناتنا
:shock::shock::?:jakoush:

وكمان لما اجا صديقنا وكنا بدنا نفتحلو حساب بالدويتشه بنك يعني بعد ما استقبلونا بالمرحبا وما بعرف كعرونا انو والله السوريين ما عاد بيحقلون يفتحو بهيدا البنك !!!!


لك مظبوط, انا ضليت مع الدويتشه بانك من ال 2001 لل 2006 وفجأة بعتولي رسالة انو قال لاسباب داخلية بتخص البنك مضطرين نسكرلك حسابك, بتعرفي ما خطرلي نهائيا انو السبب ممكن يكون لاني سوري , بس هلق ما بستبعد يكون للقصة علاقة بالعقوبات اللي عم تطلع من اميركا ضد السوريين, عن جد تفو علين وعلى هيك بنك ( ولا يهمك ال Sparkasse بيسوى ابون :lol:)

تعرضت لتمييز عنصري بسوريا كتير
والسبب الاكبر هو اللي قاله ياس اهل المناطق الشرقية
هلا بيجوز اوقات ما كون انا المقصود فيها لانو الحكي بشكل عام
مثلا من يومين كنت بمعرض السيارات اللي كان صاير بالشام بزيارة لجناح صاحبي وقاعدين عم نحكي عن الجيش السوري بلبنان وتعامله
بيقلي واحد من القاعدين بتلاقي العسكري اللبناني جنتل ولبق بتعامله والسوري شاوي جاي من دير الزور وزالرقة اجدب ما بيفهم كلمتين مفتاحه باكيت حمرا و اللي بين رجليه ( عدم المؤاخذة)

هامش: من فترة نزل موضوع عنا كان واضح التمييز فيه بين عوائل الشام العريقة ونور باقي المحافظات

أنا دائما بتعرض للتميز العنصري بسوريا . وعلى فكرة لأسباب عكس يلي ذكروها الشباب . واكتر شي صار معي هاد الشي بالجيش . أنو كان يقولولي انو أنت شامي حتعملي خواجة . وكنت أخد معاملة خاصة غير البقايا . عدا انو كان ينظرلي على اني شامي فأنا بشكل طبيعي خاروف أو جاجة بياضة لازم ينمص دمها . هاد الشي بشوفو حتى بغير أماكن يعني بالمطار بس يشوف بسبوري أنو شامي . بصير عندو كاني من جماعة 14 اذار وبيصير همو يثبت بانو هو ناجح بالحياة . وصاحب منصب كتير عالي .بيصير يصرخ ويلتئم . وانو انت بحاجتو ولازم تراضيه . واذا بدك تشوف هاد الشي بصورة واضحة جدا . فيك تروح لمباراة كرة قدم بالدوري السوري ز وتشوف التعامل الحضاري جدا لشرة حفظ النظام مع الجمهور . مجرد ماتنتهي المباراة ويصير اقل مشكلة . بتفجر عندة النقص وبيبلش لبط وضرب بالناس الطالعة وكأنهم يهود . وبيحس حالو أنو بطل من هذا الزمان

هلأ عندي وجهة نظر تانية بالنسبة لبعض الآراء الي وردت بردود الشباب, موضوع تفضيل المواطن ببلدو عالغريب بالشغل بغض النظر لأي بلد بينتمي بعتقد انو هالشي مابيندرج تحت إطار التمييز العنصري حسب رأيي المتواضع لأنو ببساطة أهل البلد هنن أحق من غيرهن, يعني لو هالشي بيصير عنّا بالبلد لو كنّا نحنا مكان السعودية أو قطر أو الإمارات مابظن انو بنقبل شخص غريب جاية لعنّا عالبلد لحتى يشتغل ياخد فرصتي بالشغل إذا أنا عندي نفس المؤهلات أو حتى أقل بس بقدر اشتغل نفس الشغل يلي هو بدو يشتغلو خصوصي إذا أنا عاطل عن العمل.
:D





معك بهالنقطة انا :D بس رح اعطيك مثال صغير لحتى وضح وجهة نظري.. كان عنا ابن جيران خلص جامعة من شهرين.. و اجا عروض عمل منيحة بعدة مصانع.. بس هو ما رضي يشتغل لانو "المسمى الوظيفي" ما خرط مشطو!!
هلا اللجنة اللي عم بحكي عنها.. بتشيل عالم معهم خبرات و شهادات اعلى بمية مرة من اللي تخرج قبل شهرين.. و مع ذلك بتشيل هالعالم هاي و بتحط بدالها مين؟؟ بتحط اشكالو لابن جيراننا هاد.. اللي لو بدو يشتغل بيشتغل.. بس كرمال البرستيج ما بيسمحلو ما شتغل :?بتخيل هيك شي ما بيلعب بمصلحة الوطن و تطورو ابدا :D

و قصة تانية.. ما صارت معي انا بس صارت من واحد منعرفو.. المهم هالشخص كان ساكن بالامرات و نقل ع السعودية.. بعد شهرين اجا واحد سعودي.. شب صغير .. و صار يخفف دم ع الطرقات فكانت النتيجة حادث
هلا الحق ع الشب السعودي متل الله واحد.. فصار في محكمة و مدري شو.. مشان الاضرار اللي لحقت بـ السيارة و هيك اشيا يعني.. فقام القاضي طلع الحق ع الشب اللي بعرفو انا.. و قلو "يا غريب كون اديب" :shock: هيك بالحرف الواحد :lol:

قد تمارس التمييز ضد نفسك
ربما تتجاهل مؤخرة رأسك وتهتم بِغرة شعرك أثناء تسريحه

موضوع حلو كتير كتير ومهم النا كسوريين

مفهوم التمييز العنصري ماعاد محصور فقط باللون أو بالانتماءات المختلفة.
بالنسبة لبعض المواقف يلي بنعايشها بسوريا، بعتقد بكل دولة بالعالم في هيك شي وغالبا بيندرج ضمن إطار الاحكام المسبوقة الناتجة عن جهل أو عن معلومات خاطئة أو تقصير من الدولة، ممكن تكون تقصير من قبل المجموعة نفسا أو قصص تاريخية واحياناً فكاهية، ممكن نمل ونقرف منا بس مع هيك ما بالضرورة تكون تمييز عنصري ...
المؤسف لما يكون التمييز عنصري عن حق وحقيق، محمل كره وحقد وتعالي متل ما أغلبنا ذكرو وعاشو ضمن بلدنا.

التمييز يلي عم يصير بدول الاغتراب بخصوص أفضلية العمل وأفضلية ابن البلد بشكل عام مانها أبدا عنصرية، ليكو متل ماذكر Government عنا بالبلد بيفضلو الغريب علينا!


برات سوريا تعرضت للتمييز العنصري المباشر بس من قبل العرب!!!
وأكتر شي من قبل اللبنانيين، على قد مابعرف لبنانيين حبابين على قد مابعرف غيرون عنصريين وطائفيين للعضم... رح اذكر بس موقف واحد وهوي اظرف موقف على الاطلاق.
كنت واقف بالجامعة مع خليطة طلاب من كتير دول، والتحق واحد لبناني للشلة كان بيعرفو احد اصدقائي. الافندي بلش بالعالي لما عرف بوجود واحد سوري بالجَمعة. وعلى حكي متل "السوري متخلف والسوري متعصب والسوري عنيف" وبلش يفتخر بكون اللبنانيين أجمل وأذوق شعب بالعالم والبغل كان لابس بنطال رسمي خرج حفلات على بوط رياضة ببسامير وقميص نص كم.. أنا ما من طبعي استهزء بحدا بسبب لبسو او شكلو، بس وقتا ريحت ضميري عالمزبوط، زعلت على الصفات يلي نعتني فيها كسوري بس بنفس الوقت فرحت لما شمتت فيه وشفت التانيين عم يشمتو فيه كمان.. على فكرة هالشغلة موجودة من بين العرب أكتر شي عند اللبناني والسوري (حسب خبرتي الشخصية!).. الواحد اذا مابيمثل الصفات الطيبة لبلدو مابيحقلو يفتخر بهالصفات!

من قبل الالمان مامريت بهيك موقف لحسن حظي، بس بكتير أحيان اتعاملت مع أشخاص حسيت الكره للأجانب عم يطير من عيونن مع هيك كانو يضبطو اعصابن ويتحملو هاللقاء المرعب معي كاجنبي:sly:. بس بعرف ناس اتورطوا واتاثرت حياتن كتير خصوصاً لانو التمييز العنصري كان من قبل موظفين أو أساتذة. هي أصعب شغلة.


بسوريا بتذكر بمرحلة الاعدادي اجانا استاذ رياضيات من غير محافظة (مع أنو عنا كتير اساتذة من البلد عم تدور على وظيفة!) واخونا بيكره المنطقة يلي جاي يشتغل فيها ومحسب حالو تحت الله بشوي، لأ وشو؟ ما حابب اللهجة وياما عاقبنا وأذلّنا بكل ما للذلّ من معنى بسبب اللهجة :?، الانكى من هيك انو أحياناً إذا الطالب حاول يرضيه ويحكي فصحى فكان يطلب منو ويقنعو أنو يلفظ الكلمات على حسب لهجتو لهالاستاذ البغ/عظيم :sick:

بس آآآآآه يابلد... صدقاً الواحد بيخجل يذكر هيك أشياء وبيخجل بوجودا بس للأسف هيي حالتنا..

طيب كل واحد فينا ذكر مواقف صارت معو واغلبها كانت ببلدنا، اكيد سوريا مانا الدولة الوحيدة الي فيها هيك أمور، وإذا تركنا الطائفية الدينية على جنب (هي موضوع تاني)
ليش في عنا ببلدنا تمييز عنصري؟ شو سببو؟

اي نعم عم نتعرض لتمييز عنصري بسوريا
لما نشوف الأرمني والسرياني والشركسي بسوريا عم يدرس بلغته الام ويعمل جمعيات وفرق كشافة ومجلات بدون اي مضايقة , وبنفس الوقت يتم منع التركماني حتى من افتتاح دورة لتعليم اللغة التركمانية في احدى قراهم والعمل الدؤوب على تذويبنا وقتل لغتنا وثقافتنا , فهذا تمييز حتى في القمع والظلم.