قائمة (2009) أسوأ عشرين ديكتاتور في العالم/ تصنيف مجلة باراد [الأرشيـــــف]

محور الخير

19/06/2009, 09:44

نشرت مجلة باراد تصنيفها السنوي الجديد لأسوأ عشرين ديكتاتور في العالم وأبرز ما طرأ من تغيير في القائمة الجديدة عن العام الماضي هو خروج كلٌ من الرئيس الباكستاني برويز مشرّف ورئيس جمهورية لاوس تشومالي ساياسوني من القائمة ودخول كلٌ من الرئيس الكاميروني بول بيا والرئيس التركمنستاني غربانغولي إلى المنافسة في قائمة أسوأ عشرين ديكتاتور في العالم فاحتل الرئيس الكاميروني المركز التاسع عشر بينما احتل الرئيس التركمنستاني المركز التاسع ، وأبرز ما يلاحظ على القائمة هو تراجع الرئيس المصري من المركز السابع عشر في العام الماضي إلى المركز العشرين بينما قفز كلٌ من الرئيس الكوبي راؤول كاسترو ورئيس زيمبابوي روبرت موغابي خمسة مراكز إلى الأعلى ليحل راؤول كاسترو المركز الثالث عشر بينما تربع روبرت موغابي على قمة الترتيب في هذه السنة ليحتل المركز الأول كأسوأ ديكتاتور في العالم ، هذا وقد احتفظ كلٌ من الرئيس السوري والديكتاتور السوداني والإيراني بمراكزهم التي كانوا عليها في السنة الماضية وفيما يلي قائمة الترتيب:

1- روبرت موغابي/ زيمابوي

2- عمر البشير/ السودان

3- كيم يونغ ايل/كوريا الشمالية

4- ثان شوي/ ماينمار

5- عبد الله عبد العزيز/ السعودية

6- هو جين تاو/الصين

7- علي خامنئي /إيران

8- أسياسي أفورقي/إريتريا

9- غربانغولي/تركمنستان

10- معمر القذافي/ليبيا

11- إسلام كريموف/ أوزبكستان

12- بشار الأسد/ سوريا

13- راؤول كاستورو/ كوبا

14- تيودورو أوبيانغ نغويما/غينيا الاستوائية

15- الكسندر لوكاشينكو/ روسيا البيضاء

16- مليس زيناوي/ أثيوبيا

17- إدريس ديبي/تشاد

18- الملك مسواتي الثالث/سوازيلاند

19- بول بيا/الكاميرون

20- حسني مبارك/ مصر

المصدر

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

memomando

19/06/2009, 10:07

لو ممكن توضح لنا علي اي اساس يتم تصنيف رئيس الدولة كدكتاتور ,لاني فهمت من واقع الترتيب وجود معايير يتم القياس عليها

ابو نجبو

19/06/2009, 10:19

اي ياسيدي عقبال ال2010 نتقدملنا كم خطوة.....وبركي بيجرّ معو المنتخب ..خوش المنتخب ترتيبو بالاربعميات عالمياً...:lol:

abo aljoud

19/06/2009, 13:48

يعني بكل شي نحنا السوريين مظاليم .والله ترتيب سوريا لازم يكون أحسن من هيك ، يعني ع الأقل من الخمسة الأوائل.....؟؟؟؟؟؟؟؟؟؟؟؟؟؟؟: D بس مين هي مجلة باراد ما عرفتا ........

Elephant And Castle

19/06/2009, 18:52

مبروك لسوريا ..قيادةً و حكومةً و شعباً ...و مبروك للأشقاء السعوديين و المصريين ..و مهما كانت المنافسة شرسة بينّا ..بس منبقى اشقاء و بتبقى المنافسة " شريفة !!!! "

Elephant And Castle

19/06/2009, 18:57

abo aljoud

19/06/2009, 19:10

يلي عم يقول انو بشار بيستاهل مرتبة اعلى ,,بحب قلو ,,انو البطولة لسا ما خلصت ..و بحب كمان بشرك انو الدوري طويل ...ما منعرف ...احتمال بشار يسرق اللقب من موغابي باللحظات الأخيرة ...لأنو الواضح انو الفريق السوري عم يطور مستواه بالسنين الأخيرة ......ما حدا بيعرف ..يمكن اللقب يتحدد بجولة اخيرة بين موغابي و الأسد بلاهاي

بس برجع بقول كنا منستاهل مرتبة أعلى يعني نحنا بلشنا الدوري بطريقة ممتازة من خلال اعتقال أعضاء ربيع دمشق وكم الأفواه وووو المهم بتمنا الدوري ما يطول أو ع الأقل نطلع نحنا من هالدوري ......

saman

19/06/2009, 21:23

انو مو السنة الماضية نزل نفس الموضوع ونفس الاسماء؟ :?

mhsen77

19/06/2009, 23:42

لو ممكن توضح لنا علي اي اساس يتم تصنيف رئيس الدولة كدكتاتور ,لاني فهمت من واقع الترتيب وجود معايير يتم القياس عليها

يمكن مو دافعين المعلوم

بس فعلا على اي اساس هالتقييم؟
و منين هي المجلة وشو مصداقيتها و مين بيمولها؟

ayhamm26

20/06/2009, 00:52

يمكن مو دافعين المعلوم

بس فعلا على اي اساس هالتقييم؟
و منين هي المجلة وشو مصداقيتها و مين بيمولها؟

ما فهمت شو اعتراضك على التقييم؟؟

يعني لانو مذكور انو بشار الاسد من ضمن اسوأ عشرين ديكتاتور؟؟ ولا لانو محطوط اصلا بقائمة الدكتاتوريين بالعالم؟؟

لاتنسى انو نص القائمة هني حلفاء لامريكا , يعني ما فيك تقول انها بس موجهه للي على اساس عاملين حالن معادين لامريكا

ayhamm26

20/06/2009, 00:58

بس برجع بقول كنا منستاهل مرتبة أعلى يعني نحنا بلشنا الدوري بطريقة ممتازة من خلال اعتقال أعضاء ربيع دمشق وكم الأفواه وووو المهم بتمنا الدوري ما يطول أو ع الأقل نطلع نحنا من هالدوري ......

بس بتعرف شو اللي بيزعجك هون , انو طلعوا انصاف الرجال بالمرتية الخامسة ونحني ب المرتبة 12

يا فضيحتنا

mhsen77

20/06/2009, 01:23

ما فهمت شو اعتراضك على التقييم؟؟

يعني لانو مذكور انو بشار الاسد من ضمن اسوأ عشرين ديكتاتور؟؟ ولا لانو محطوط اصلا بقائمة الدكتاتوريين بالعالم؟؟

لاتنسى انو نص القائمة هني حلفاء لامريكا , يعني ما فيك تقول انها بس موجهه للي على اساس عاملين حالن معادين لامريكا

موكل شي بيلائم افكارنا صح ولا كل شي بيخالفها غلط و بظن انك معي بهالشي

بس لازم نتاكد من يلي بيوصلنا لنعرف شو ممكن تكون ابعادو

تحياتي :D

ayhamm26

20/06/2009, 02:19

موكل شي بيلائم افكارنا صح ولا كل شي بيخالفها غلط و بظن انك معي بهالشي

بس لازم نتاكد من يلي بيوصلنا لنعرف شو ممكن تكون ابعادو

تحياتي :D

اي مظبوط مو اي شي بلائم افكارنا لازم ناخدو

بس انت عم تحكي وكانوا اللي عم يوصلنا ( واللي هو هون التقرير المذكور) عم يوصف حالة ما منعرفها منيح بسوريا

انا رح قلك برايي شو المعايير العالمية اللي على اساسها عم تتقيم الدول الدكتاتورية

حقوق الانسان
حرية التعبير
خلو البلد من التعذيب بكافة انواعو
قضاء مستقل عن السلطة التنفيذية
صحافة و اعلام حر
انتخابات حرة
تداول سلمي للسلطة
ضمان حقوق الاقليات

هدول اللي طلعوا معي بس اكيد لسا في معايير تانية

طيب بتقدر تقلي بسوريا في عنا شي معيار واحد من هدول؟؟
هلق بتقعد من هون لبكرا تبررلي انو وضعنا الداخلي والخارجي وما بعرف شو هو اللي بيفرض علينا هيك , طيب بس بالنهاية نحن عايشين بظل حكم دكتاتوري , سواء هالشي برايك مبرر ولا برايي انا مو مبرر .

:D

abo aljoud

20/06/2009, 13:10

بس بتعرف شو اللي بيزعجك هون , انو طلعوا انصاف الرجال بالمرتية الخامسة ونحني ب المرتبة 12

يا فضيحتنا

هههههههههههه ملعوبة بتستاهل عليا وردة :D:D

wile

21/06/2009, 12:10

الله أكبر الحمد لله الي طلعنا من أسوأ الدكتاتوريين بالعالم وطبعا هادا برأيون

بس إيمتى رح نفهم أنو رأيون لازم ما يعنيلنا شي

يعني ما بصير ننسى إنو هي - مجلة - يعني شو فهم الحمير بأكل الكستنا؟؟؟؟؟

kosayka2

24/06/2009, 01:51

ما فهمت شو اعتراضك على التقييم؟؟

يعني لانو مذكور انو بشار الاسد من ضمن اسوأ عشرين ديكتاتور؟؟ ولا لانو محطوط اصلا بقائمة الدكتاتوريين بالعالم؟؟

لاتنسى انو نص القائمة هني حلفاء لامريكا , يعني ما فيك تقول انها بس موجهه للي على اساس عاملين حالن معادين لامريكا
يعني قد ما كان السيد الرئيس بشار الأسد

بيضل رئيس سوريا

و بيستاهل منك شوية أحترام

مو هيك .............

kosayka2

24/06/2009, 01:53

مبروك لسوريا ..قيادةً و حكومةً و شعباً ...و مبروك للأشقاء السعوديين و المصريين ..و مهما كانت المنافسة شرسة بينّا ..بس منبقى اشقاء و بتبقى المنافسة " شريفة !!!! "

يلي عم يقول انو بشار بيستاهل مرتبة اعلى ,,بحب قلو ,,انو البطولة لسا ما خلصت ..و بحب كمان بشرك انو الدوري طويل ...ما منعرف ...احتمال بشار يسرق اللقب من موغابي باللحظات الأخيرة ...لأنو الواضح انو الفريق السوري عم يطور مستواه بالسنين الأخيرة ......ما حدا بيعرف ..يمكن اللقب يتحدد بجولة اخيرة بين موغابي و الأسد بلاهاي

انا بعتقد انك مالازم تاخد الحكي على مستوى رئيس سوريا

السيد الرئيس بشار الأسد

بهي المسخرة

Elephant And Castle

24/06/2009, 02:12

انا بعتقد انك مالازم تاخد الحكي على مستوى رئيس سوريا

السيد الرئيس بشار الأسد

بهي المسخرة
ممكن اعرف ليش ...??

ayhamm26

24/06/2009, 10:23

يعني قد ما كان السيد الرئيس بشار الأسد

بيضل رئيس سوريا

و بيستاهل منك شوية أحترام

مو هيك .............

طيب بس عندي الك سؤال, انت برأيك كمواطن سوري انو السيد الرئيس عندو الك شوية احترام كانسان؟

بعدين انا يا معلم شفتني سبيتو؟؟:shock:

لما بقول عنو ديكتاتور وبيستاهل يكون ضمن قائمة اسوأ 20 ديكتاتور هدا اسمو انتقاد لطريقة حكمو مو شتيمة شخصية

انا قلت بمشاركة سابقة انو اهم المعايير اللي على اساسها صنفوا بهالقائمة هيالتالي

حقوق الانسان
حرية التعبير
خلو البلد من التعذيب بكافة انواعو
قضاء مستقل عن السلطة التنفيذية
صحافة و اعلام حر
انتخابات حرة
تداول سلمي للسلطة
ضمان حقوق الاقليات

اتفضل اقنعني انو هو مو ديكتاتور وانو موفر لشعبو ربع شغلة من هدول اللي فوق لاعتذرلك الك ولكل المؤيدين لسيادتو عن الخطأ الرهيب بوصفو ديكتاتور

يازلمة لك خربت البلد فوق روسنا ونحني كل اللي هاممنا ما حدا ينتقد سيادتو

Abu ToNi

24/06/2009, 10:50

كيف زبطوا مع بعض هدول ؟
قائمة (2009) أسوأ عشرين ديكتاتور في العالم
7- علي خامنئي /إيران

kosayka2

24/06/2009, 11:35

ممكن اعرف ليش ...??
لان بكفي هو رئيسك

و هو كرامتك و شرفك بالعالم كلوا

و انت إذا كنت سوري فأنت مرتبط مباشرة بالرئيس

يلي هو تمثيل مباشر إلك بالعالم كلو

و إحتراموا ليس واجب بل شرط

مع انو بحقلك تنقدو و تنقد كل الأشياء الغلط و لكن ضمن إطارات معينة

يعني مو الفكرة أنو أطلع و احكي و خبص بالحكي

و فقط للحكي

بدك تحكي أحكي لقضية معينة

و انت من حالك لما تحكي لأجل قضية و ليس لأجل الكلام فقط

بتشوف انك ما عم تحكي بهاد الأبتذال

kosayka2

24/06/2009, 11:45

طيب بس عندي الك سؤال, انت برأيك كمواطن سوري انو السيد الرئيس عندو الك شوية احترام كانسان؟

بكفي اني عايش ببلدي ما حدا يمنعنمي من اني سوي أي شي

بعدين انا يا معلم شفتني سبيتو؟؟:shock:

لما بقول عنو ديكتاتور وبيستاهل يكون ضمن قائمة اسوأ 20 ديكتاتور هدا اسمو انتقاد لطريقة حكمو مو شتيمة شخصية

لا ابدا .............................. ؟؟؟؟؟؟؟؟؟؟؟؟؟؟؟؟؟؟؟

انا قلت بمشاركة سابقة انو اهم المعايير اللي على اساسها صنفوا بهالقائمة هيالتالي

حقوق الانسان
حرية التعبير
خلو البلد من التعذيب بكافة انواعو
قضاء مستقل عن السلطة التنفيذية
صحافة و اعلام حر
انتخابات حرة
تداول سلمي للسلطة
ضمان حقوق الاقليات

طيب انا بدي أسألك انت شو نافصك بهالبلد

انا ما بنكر انو في كتير أخطاء و انا بعتقد انو معها معها عم تزبط

يعني فينا نقول أنو الصحافة عم تبلش تنفتح

و بالنسبة للأقليات انا يلي متأكد منو انو ماحدا عم يمنعها تسوي اي شي بدها ياه في ضمن حدود الدولة و سماحياتها

اتفضل اقنعني انو هو مو ديكتاتور وانو موفر لشعبو ربع شغلة من هدول اللي فوق لاعتذرلك الك ولكل المؤيدين لسيادتو عن الخطأ الرهيب بوصفو ديكتاتور

يازلمة لك خربت البلد فوق روسنا ونحني كل اللي هاممنا ما حدا ينتقد سيادتو
[/QUOTE]

يا حبيب بدك تحكي احكي

بش شو كل يلي عم يحكو ................... مثلا الحزب الديمقراطي السوري هو بالأساس حزب معارض و رافض للاخطاء
بس بعمرو كلو ماحدا من رؤساؤو أو أعضاؤه طلع منن كلمة واحدة بتهين الرئيس أو البلد و ليكهم في إلهم نشاطات كتيرة و خصوصا بحلب و صوتهم واصل بس بكل أحترام ................

ayhamm26

24/06/2009, 12:12

بكفي اني عايش ببلدي ما حدا يمنعنمي من اني سوي أي شي

بالله ما حدا مانعك تسوي شي, طيب هي لاتعليق عليها خلي اي واحد عايش بسوريا يحكم عليها

طيب انا بدي أسألك انت شو نافصك بهالبلد

صح شو ناقصنا؟؟ مي وفي وكهربا وفي وفوق هالجخ كلو صار عنا موبايل و انترنت ابو 4 كيلو بايت كمان

بربك هدا سؤال بينسئل؟؟ شو ناقصنا ؟؟ لك شوية كرامة ناقصنا , نحس انو نحني بشر وعم نتعامل متل البشر

ناقصنا نتمتع بحقوق تعتبر عند بشر تانيين من الاساسيات وهي الحقوق نحني مو سمعانين فيها ولا منعرف شو معناتها مشان هيك مفكرين حالنا عايشين ومو ناقصنا شي

ناقصنا نقدر نعبر عن راينا بحرية مو ما نخاف من عنصر الامن

ناقصنا يصير عنا قضاء عادل يعطي الانسان ابسط حقوقو, مو محاكم تبع اضعاف الشعور القومي

ناقصنا الدولة تعامل البني ادم كانو بني ادم, مو كحيوان ما بيفهم غير بالكبل الرباعي و بالشحط على فرع فلسطين

ناقصنا يوقف النهب المنظم لاموال الدولة و اللي ما وقف من 40 سنة

ناقصنا يبطل رامي مخلوف رجل الاعمال الوحيد اللي بالع القطاع الخاص

وشو بدي عدلك لعد

يعني فينا نقول أنو الصحافة عم تبلش تنفتح

و بالنسبة للأقليات انا يلي متأكد منو انو ماحدا عم يمنعها تسوي اي شي بدها ياه في ضمن حدود الدولة و سماحياتها

ايوا هلق كل هالقائمة طلع معك انو الصحافة عم تنفتح, لك اي شايفلك المواطن هو اللي عم .......

وبسوريا يا حبيب لا الاقليات ولا الاكتريات الن حقوق , كلو نفس الشي

يا حبيب بدك تحكي احكي

بش شو كل يلي عم يحكو ................... مثلا الحزب الديمقراطي السوري هو بالأساس حزب معارض و رافض للاخطاء
بس بعمرو كلو ماحدا من رؤساؤو أو أعضاؤه طلع منن كلمة واحدة بتهين الرئيس أو البلد و ليكهم في إلهم نشاطات كتيرة و خصوصا بحلب و صوتهم واصل بس بكل أحترام ................[/quote]

فلتلي احكي باحترام , شلون الواحد بدو يحكي باحترام؟؟؟؟؟؟

كل هالعالم اللي انشحطت من هالمنتدى ومن براتو بس انشحطوا لانن ما بيحكوا باحترام؟؟

لك اي شو هالرئيس الحساس اللي عنا ولوووو ؟؟ :lol:

ayhamm26

24/06/2009, 12:22

و انت إذا كنت سوري فأنت مرتبط مباشرة بالرئيس

يلي هو تمثيل مباشر إلك بالعالم كلو

شلون يعني انا مرتبط في؟؟؟ يعني تخيل لو طار هلق واجى واحد تاني غيرو على عكسو تمام كمان بصير مرتبط في
يعني البني ادم السوري لازم يضل حاطط راسو بالارض ومين ماصار رئيس يرتبط في

الرئيس موظف, المفروض انو يتغير ويجي غيرو بسياسات احسن منو , بس نحني صرنا هيك نفكر لانو الرئيس عنا ما بيتغير ملزق تلزيقة بنت حرام

اما قصة التمثيل , ونعم التمثيل رح احكيلك هالقصة اللي صارت معي بزمانو ( انشاء الله ما كون حاكيها من قبل وعم تنعاد:lol:)

بزماني بمعهد غوتة بالشام لتعليم اللغة الالمانية كان في انسة المانية جديدة عم تعطينا الكورس , مدري شو خلاها تفتح سيرة الانتخابات وبلشت تحكيلنا عن الانتخابات بالمانيا و شلون انو للاسف النظام السياسي تبعن بيسمح بس بمرشحين لمنصب المستشار, قامت سالتنا بعدها انو كم مرشح عندكن بانتخابات الرئاسة؟ قلنالها واحد ما في غيرو , قامت اطلعت هيك باستغراب وقالت شلون يعني واحد؟؟ وشو بصير اذا الشعب ما انتخبوا؟؟؟؟

فشايف شلون هالتمثيل وهالسمعة اللي اخدينها بالعالم من سيادتو

شلون العالم بدو يحترمني كسوري لما بشوف دولتي هيك بتعاملني؟؟

شلون العالم بدو يحترمني لما بشوف انو الرئيس عنا بينجح ب 99 بالمية؟؟

شلون العالم بدو يحترمني لما بشوفوا انسان تحاكم لانو نشر مقال بمدونة او لانو انتقد الفساد ؟؟

شامي للنخاع

24/06/2009, 12:41

لان بكفي هو رئيسك

و هو كرامتك و شرفك بالعالم كلوا

و انت إذا كنت سوري فأنت مرتبط مباشرة بالرئيس

يلي هو تمثيل مباشر إلك بالعالم كلو

و إحتراموا ليس واجب بل شرط

مع انو بحقلك تنقدو و تنقد كل الأشياء الغلط و لكن ضمن إطارات معينة

يعني مو الفكرة أنو أطلع و احكي و خبص بالحكي

و فقط للحكي

بدك تحكي أحكي لقضية معينة

و انت من حالك لما تحكي لأجل قضية و ليس لأجل الكلام فقط

بتشوف انك ما عم تحكي بهاد الأبتذال
يا رجال أنا طول عمري ما بحب أحكي بهيك اشيا.....بحسها بترفع ضغطي.......وبتعملي أسهال مزمن
اي يابو.......رئيسي.......من وين لوين.......مين الي نصبو ومين الي حطو......بشرفي لانتخبوتو........ولابعرف من وين طلعنا
أعوذ بالله يا رجال يا زلمة شو شرفي ما شرفي من وين لوين.....ليكون من باقي كمالة العيلة ومو دريان؟؟؟!!!!
شرط؟؟؟؟؟؟ليش هوي محترمني لحتى كون محترم.......يعني بظن لازم يكون الاحترام متبادل.......فل ذلك ئد ما بيحترمني سيداتو أنا بحترم.........يا يلطيف شو بحترمو بنوب
بس سؤال فني في أعرف شو الاطارات الي مسموحة في ننتقد سيادتو؟؟؟؟؟!!!!!!!
وعا راسي يا خااااااااااااال:D

Elephant And Castle

24/06/2009, 22:36

لان بكفي هو رئيسك

و هو كرامتك و شرفك بالعالم كلوا

و انت إذا كنت سوري فأنت مرتبط مباشرة بالرئيس

يلي هو تمثيل مباشر إلك بالعالم كلو

و إحتراموا ليس واجب بل شرط

مع انو بحقلك تنقدو و تنقد كل الأشياء الغلط و لكن ضمن إطارات معينة

يعني مو الفكرة أنو أطلع و احكي و خبص بالحكي

و فقط للحكي

بدك تحكي أحكي لقضية معينة

و انت من حالك لما تحكي لأجل قضية و ليس لأجل الكلام فقط

بتشوف انك ما عم تحكي بهاد الأبتذال

الرئيس هو بالأخير موظف بالدولة ...

ثانيا ...شرف و كرامة المواطن مو هو رئيس الجمهورية ..ما بعرف كيف طلع معك الكلام الأنشائي هاد ...فكيف اذا رئيس الجمهورية مغتصب السلطة اغتصاب ! ..بالحالة هي ..الرئيس ممثل لنفسو فقط ..كان كلامك بأنو الرئيس هو اعلى شخصية سياسية بالدولة لهيك وجب احترامو ممكن يتناقش في حال وصولو للسلطة بأنتخابات حرة ...مو بعد ما عدلو الدستور على قياسو و عملو انتخابات مهزلة و سجنو و قتلو ...بتجي بتقلي انو لازم تحترم رئيسك لأنو رئيسك !! ..انا ما بفرض عليك عدم احترامو ...بس كمان انت لا تفرض علي احترامو ,,,ببساطة لأنو ما في ديكتاتور بيستاهل الأحترام ....

اخيرا ....انو انزعجت ليش اتمنيت لرئيسك الحصول على الصدارة ..و ما انزعجت لأنو اسمو مذكور بين اسوأ عشرين ديكتاتور !!

MOHAMMED JIGSAW

30/06/2009, 01:21

VivaSyria

30/06/2009, 05:36

أنا داخل ع المنتدى ع أساس انو فيه شباب سوريين
بس الظاهر اني مخربط
أنتو بتعتبرو حالكن سوريين .وكل واحد فيكن ما صدق يطلع موضوع وسخ بجريدة أوسخ مشان يقعد يحكي ويتفلسف ههه
ليش ما حدا ذكر انو السيد الرئيس بشار حافظ الأسد طلع تاني شخصية بيحبوها الناس والها شعبية بعد شافيز يعني لو طلع شي حدا تاني كنتو ما صدقتو تحكو مشان تمدحو فيه وبشخصيتو
لك أنا بفتخر انو رئيسي بشار حافظ الأسد لك حاج انو ما حدا فيه يحكي ع مواقف سوريا العظيمة
أنا سوري وبفتخر بوطني سوريا وبرئيسي بشار حافظ الأسد

شو بدك بالحكي يا معلم انت الوحيد يلي فشيتلي قلبي بهالموضوع... بالفعل هدول مو سوريين إسألني أنا بعرفون واحد واحد

هدول يلي هيك عم يكتبو جماعة خونة وعملاء لوليد جنبلاط وسعد الحريري :p... ولا مابعرف لتكون هي التهمة ماعد تزبط لأنو سمعت إنو الشباب رجعو تصالحو وجايين عالشام وبكرا الشباب بيرجعو بيعلقو صورهن متل مافلت بزمناتي

هدول أكيد عملاء لإسرائيل :?... ولا كمان هي ماعد تزبط لأنو المفاوضات شغالة

أكيد عملاء لأميركا :lol:... ولا صحيح هي كمان ماعد تزبط لانو الامور مع اميركا بخير ورايحين جايين لعند بعض وماعادت تهمة هالعلاقة...

أخي شو بدنا نحنا هدول أكيد خونة وبهالكم يوم منجتمع أنا وياك ومنقرر خونة وعملاء لمين... ماتشغل بالك مندبرها بمعرفتنا ومنركبلون تهمة..

والخلود لرسالتنا

Syrian_love

30/06/2009, 05:43

و انا مع الاخ MOHAMMED JIGSAW

بدي خبركون شي الدولة الوحيدة تقريباً الي ما انضربة بالازمة العالمية هي سوريا

ابو نجبو

30/06/2009, 08:54

و انا مع الاخ MOHAMMED JIGSAW

بدي خبركون شي الدولة الوحيدة تقريباً الي ما انضربة بالازمة العالمية هي سوريا
هع ....
علي الحلال ضحكتني......
قلتلي ما انضرب اقتصادنا بالازمة العالمية......
ليش بالاصل في اقتصاد حتى ينضرب....!!!!!
وفي حال ازا كان في اقتصاد ....شو بدو يصير فيه ...أكتر ماهو صاير هلاء.....
عجز و ركود .....استيراد كل شئ .....تصدير غير متوازن .....
وأهم شي ...الشراكة الاستراتيجية مع الحليف الاستراتيجي.....ايران
لتكون فرحان على مصفاية النفط المتهالكة و مجمّع السيارات ...!!!

حبيب ...الشغلات اللي عمتصير ببلدنا هلاء ....باقي البشر عمبينسوها......
سوق الاوراق المالية اللي فتحو من كم شهر .....موجود ببعض البلدان القريبة ...متل مصر.....من 100 سنة تقريباً....
عن اينا اقتصاد عمتحكي كرمال الانبيا ......
لك نحن ماشيين عالتوكل و عالبركة ......بتجي بتقللي اقتصاد !!!!

ذكرتني بكلام الدردري من كم يوم قال.....ان سورية لم تتأثر بالازمة العالمية....لانها اقتصادها مبني على اسس متينة ......:o

مسخرة ......

wile

30/06/2009, 11:10

شامي للنخاع

30/06/2009, 11:32

و انا مع الاخ MOHAMMED JIGSAW

بدي خبركون شي الدولة الوحيدة تقريباً الي ما انضربة بالازمة العالمية هي سوريا
مينو هاد أقتصاد سوري......أول مرة بسمع فيو!!!!!:shock:

ayhamm26

30/06/2009, 11:35

معلم وأنا وراك

الشباب الي هون بدون الرئيس يبيع الوطن مشان المصاري
ومشان يحسنو يشترو سيارة آخر موديل

هادا هو هم الشعب هلأ

الشعب هلأ مفكر إنه الرضوخ لأمريكا وإسرائيل رح يكون أنسب شي مشان هالكم فرنك

والله يا حبيب هي هي الحقيقة المرة بس هادا هو الحاصل
و:Dللجميع

والله الحاصل يا معلم انو الك كل تعليق ولا التاني نهفة

هلق لما الواحد بقول بدو حريتو بكون بدو يبيع بلدو بالمصاري

لما الواحد بقلك بلد ما فيها حقوق انسان , ما فيها عدل ما فيها مساواة ما فيها غير القمع وتكميم الافواه بيطلع معك انو الشعب بدو الرئيس يبيع البلد بالمصاري

الصمود والتصدي تبعك ما بيمشي الا اذا كنا اذلاء بوطنا, ما بيمشي الا بقوانين الطوارئ , الا اذا كان النهب باسم الممانعة شغال

بعدين وين العيب اذا تمنيت اشتري سيارة اخر موديل, شو بس الرئيس وعيلتو وحاشيتو و ضباط امنو و جيشو عندن الحق يتمتعوا بالرفاهية وعلى حساب الشعب وانا شو مو بني ادم ؟؟

عن جد شي غريب

wile

30/06/2009, 12:08

والله الحاصل يا معلم انو الك كل تعليق ولا التاني نهفة

!!أحرجتني!!:oops::oops::p
هلأ أنا بعرف إنو في أخطاء عم تصي بالبلد بالكيلو

بس الي بعرفو كمان إنو الفساد مستشري ببلدنا لأنو رواتب الي بيشتغلو مع الحكومة زفت... ليش؟؟

لأنو مافي ميزانية

وبعرف كمان إنو كل الإقتصاديين والعلماء تركو البلد مشان ياخدو رواتب أحسن وما ضل غير الفاسدين

يعني من وين بدو يجبلك الرئيس وزير فهمان بالإقتصاد إذا راتبه تحت الأرض

لك هالوزير بروح يشتغل برا أشرفلوه

يا معلم القصة مو بهالسهولة الي عم تحكي عنها كأنه في عنها كم واحد فاسد بنقلعون وبتخلص المشكلة

إذا قلعت هالفاسد.. من وين رح تقدر تجيب واحد فهمان ومخلص بهالراتب؟؟

و:D

المحارب العتيق

01/07/2009, 01:21

و انا مع الاخ MOHAMMED JIGSAW

بدي خبركون شي الدولة الوحيدة تقريباً الي ما انضربة بالازمة العالمية هي سوريا
لك على حب الأوليا . وين عايش وشو رب تفكيرك . لك من شهرين لافي بيعة ولا شروة بالبلد . في أزمة عقارية ( بطريقة تانية ) العن من أزمة أميركا ب100 مرة

المحارب العتيق

01/07/2009, 01:36

أخي شو بدنا نحنا هدول أكيد خونة وبهالكم يوم منجتمع أنا وياك ومنقرر خونة وعملاء لمين... ماتشغل بالك مندبرها بمعرفتنا ومنركبلون تهمة..

والخلود لرسالتنا
هدول يا من جماعة أعلان دمشق يا خدام يا الأخوان يا فتح الأاسلام يا القاعدة يا كوكب زحل :pos:

ابو نجبو

01/07/2009, 08:54

لك على حب الأوليا . وين عايش وشو رب تفكيرك . لك من شهرين لافي بيعة ولا شروة بالبلد . في أزمة عقارية ( بطريقة تانية ) العن من أزمة أميركا ب100 مرة

على قولتك ......

هو الظاهر و الله العليم .....انو من كتر الازمات الي ملاحقتنا من 40 سنة لهلاء ...
فما بقى يقدر الزلمة يفرق بين الازمة و الوضع الطبيعي ....

Dndoshy

01/07/2009, 22:29

ما في شك على انو سوريا من أكثر البلدان يلي فيها قمع للحريات..
بس متل ما بتعرفو أنو في شي اسمو النظام..وهني يلي الون الكلمة الاولى والاخيرة

وحتى لو اجى اي رئيس..مين ما كان حتى لو من اكبر المنادين بحقوق الانسان..
ما رح يقدر يعمل شي يذكر لأنو النظام راسم شكل السياسة السورية لحوالي تلاتين سنة لقدام

فما فينا نعتبر أنو الرئيس هوي الدكتاتوري والظالم والجلاد الوحيد والرئيسي...

:bye:

syrian 1st

05/07/2009, 12:28

ayhamm26

05/07/2009, 13:07

معلش بس بدي زكركون و زكر هالمجلة مدري الجريدة انو في مجلة مدري جريدة امريكية من فترة قريبة عملت استبيان لأكثر الرؤساء شعبية .

بالعالم طلع السيد الرئيس بشار الاسد بالمرتبة الثانية بعد الرئيس تشافيز ( مع انو مافي هالفرق الكبير ) .

و عالمستوى العربي طلع بالمرتبة الاولى مع انو الاستفتاء شمل دول معادية لمواقف سورية .

فما فيك توقف على شي كاتبتو مجلة سخيفة مدري من وين

اقرا هدا الموضوع ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////

تمت مناقشة هالفكرة اللي طرحتها هون مطولا بهدا الموضوع, مشان يعني ما نرجع نعيد نفس اللعي مرة تانية

wile

05/07/2009, 15:19

هلأ إذا قلنا الرئيس السوري من أكثر الرؤساء العرب شعبية بقولو الشعب العربي متخلف

طيب إذا الشعب العربي متخلف شلون بدنا نساوي إنتخابات إذا هدول حمير وما بيفهمو رح يصوتوا للمرشح الخاطئ

صراحة

أنا برأيي أسامة بن لادن + صدام حسين + بشار الأسد + حسن نصرالله + أحمدي نجادتعرضو لحروب إعلامية مشان تتشوه صورهن وهادا أكيد وما فيه شك

ولذلك أنا من أكبر المؤيدين إلهن مع إنهن في بينون فروق منيحة بس هدول هني الي ماباعو أوطانون وهادا بكفيني

وسيبقون أعلاماً في التاريخ شاء من شاء وأبى من أبى

zeenaa

05/07/2009, 17:54

شلون يعني انا مرتبط في؟؟؟ يعني تخيل لو طار هلق واجى واحد تاني غيرو على عكسو تمام كمان بصير مرتبط في
يعني البني ادم السوري لازم يضل حاطط راسو بالارض ومين ماصار رئيس يرتبط في

الرئيس موظف, المفروض انو يتغير ويجي غيرو بسياسات احسن منو , بس نحني صرنا هيك نفكر لانو الرئيس عنا ما بيتغير ملزق تلزيقة بنت حرام

اما قصة التمثيل , ونعم التمثيل رح احكيلك هالقصة اللي صارت معي بزمانو ( انشاء الله ما كون حاكيها من قبل وعم تنعاد:lol:)

بزماني بمعهد غوتة بالشام لتعليم اللغة الالمانية كان في انسة المانية جديدة عم تعطينا الكورس , مدري شو خلاها تفتح سيرة الانتخابات وبلشت تحكيلنا عن الانتخابات بالمانيا و شلون انو للاسف النظام السياسي تبعن بيسمح بس بمرشحين لمنصب المستشار, قامت سالتنا بعدها انو كم مرشح عندكن بانتخابات الرئاسة؟ قلنالها واحد ما في غيرو , قامت اطلعت هيك باستغراب وقالت شلون يعني واحد؟؟ وشو بصير اذا الشعب ما انتخبوا؟؟؟؟

فشايف شلون هالتمثيل وهالسمعة اللي اخدينها بالعالم من سيادتو

شلون العالم بدو يحترمني كسوري لما بشوف دولتي هيك بتعاملني؟؟

شلون العالم بدو يحترمني لما بشوف انو الرئيس عنا بينجح ب 99 بالمية؟؟

شلون العالم بدو يحترمني لما بشوفوا انسان تحاكم لانو نشر مقال بمدونة او لانو انتقد الفساد ؟؟
هلا بس للمعلومات نحنا اللي بصير عنا مو انتخابات اللي بصير اسمو استفتاء يعني لوإني النسبة طلعت اقل من حد معين "اللي انا مو متأكدة منه فمارح حطوا" ساعتها بينفتح باب الترشيح وبكون وقتها مجلس الشعب مسؤول عن ترشيح حدا تاني

بس في سؤالين اذا كان في ناس ماعاجبتها سياسات رئيسنا ليش ماحطت لأ بالاستفتاء

بعدين الصراحة انا مو شايفة المشكلة من القيادات المشكلة شعبنا هو اللي تعود هيك يعني اذا الرئيس قال بدو يحارب الرشوة والمحسوبيات وكل واحد بدو يطالع هوية بيدفع بس مشان مايوقف عالدور
اذا بدنا البلد نطيفة ونحنا عمنكب زبالتنا من البلاكين
بدنا نحارب الواسطة ونحنا كل واحد حتى على دور الخبز بيستخدم واسطاتو "لو في وظيفة شاغرة والكل قدم بدون مايجيب واسطة اكيد رح ياخدو الافضل"وهيك ...
يعني بالمحصلة "لايغير الله مابقوم حتى يغيروا مابأنفسهم"
هي صدام راح واستلمت اميركا العراق هلا بر ايكون صار العراقي الو قيمة وصار العراق ديمقراطي
بكفي اني رئيسنا محافظ على كرامتنا بين الناس ولو قالوا سوريا متخلفة ودكتاتورية المهم اني ماحدا في يقول سوريا بلا كرامة

ayhamm26

05/07/2009, 19:09

هلا بس للمعلومات نحنا اللي بصير عنا مو انتخابات اللي بصير اسمو استفتاء يعني لوإني النسبة طلعت اقل من حد معين "اللي انا مو متأكدة منه فمارح حطوا" ساعتها بينفتح باب الترشيح وبكون وقتها مجلس الشعب مسؤول عن ترشيح حدا تاني

طيب ليش ما بصير عنا انتخابات متل باقي البشر؟؟

ما المصيبة انو النسبة ما عم تنزل عن 99 بالمية

بس في سؤالين اذا كان في ناس ماعاجبتها سياسات رئيسنا ليش ماحطت لأ بالاستفتاء

فعلا سؤال حلو, ليش صحي ما حدا بيصوت لاء؟؟

يا ريت حدا من الشباب يكون عندو فكرة ليش؟؟ وبيربح معنا اقامة لمدة شهرين في قبو فندق فرع فلسطين اكل شارب نايم ببلاش مع فرصة يومية لمشاهدة فيلم نجوم الضهر

بعدين الصراحة انا مو شايفة المشكلة من القيادات المشكلة شعبنا هو اللي تعود هيك يعني اذا الرئيس قال بدو يحارب الرشوة والمحسوبيات وكل واحد بدو يطالع هوية بيدفع بس مشان مايوقف عالدور

طيب مشان الله اذا الوضع هيك والرئيس طلعت روحو مع هالشعب الجدبة , اخي ليش ملزق بالحكم؟؟ ليش قبل يورث السلطة من ابو؟؟ يا اخي يستقيل ويترك هالشعب الجاهل لمصيرو

اذا بدنا البلد نطيفة ونحنا عمنكب زبالتنا من البلاكين

هلق ما عد عنا بهالبلد مشكلة خطيرة الا مشكلة الزبالة

هي صدام راح واستلمت اميركا العراق هلا بر ايكون صار العراقي الو قيمة وصار العراق ديمقراطي

ما العراقي لانو من ايام صدام ما كان الو قيمة مشان هيك بين يوم وليلة ما رح يصير الو قيمة

بكفي اني رئيسنا محافظ على كرامتنا بين الناس ولو قالوا سوريا متخلفة ودكتاتورية المهم اني ماحدا في يقول سوريا بلا كرامة

كفو والله

المواطن اللي بينشحط على فرع الامن و بطيرو رجلي بالهوا على بساط الريح هدا اكتر واحد بحس بالكرامة

المواطن الطفران اللي راتبو ما بيكفي لعشرة الشهر هدا رح يطق من الكرامة

الطالب الجامعي اللي بيتخرج ليلاقي بانتظاروا يا اما وظيفة ال 10 الاف بالشهر يا اما الهجرة , هدا عم يغني كل يوم انا سوري اه يا نيالي

الجامعي اللي بيشحطوا على الجيش ليمسحوا الارض بكرامتو , هدا كمان من ضحايا الكرامة اللي محافظلنا عليها سيادة الرئيس

بقى ما بدك ليكون بالاول عنا كرامة لحتى حدا يحافظ عليها

ayhamm26

05/07/2009, 19:16

أنا برأيي أسامة بن لادن + صدام حسين + بشار الأسد + حسن نصرالله + أحمدي نجادتعرضو لحروب إعلامية مشان تتشوه صورهن وهادا أكيد وما فيه شك

ولذلك أنا من أكبر المؤيدين إلهن مع إنهن في بينون فروق منيحة بس هدول هني الي ماباعو أوطانون وهادا بكفيني

وسيبقون أعلاماً في التاريخ شاء من شاء وأبى من أبى

بتعجبني هي عبارة شاء من شاء وابى من ابى , حطها بتوقيعك سماع مني

يازلمة من الاول احكي انك من انصار الشيخ المجاهد اسامة بن لادن حفظه الله ورعاه

بس بدك الصراحة , القائمة تبعك بدها تحديث انت يبدو نسيت القذافي وعمر البشير و كيم ايل جونغ و جمال عبد الناصر و هتلر وموسوليني وستالين

zeenaa

05/07/2009, 21:53

بس اكيد كلنا بنعرف اني رئيسنا باستبيان تاني طلع تاني اكثر رئيس شعبية بالعالم والاول عربيا فاذا كل العالم بتحبه الاولى نحنا نحبه :D

wile

06/07/2009, 12:45

بتعجبني هي عبارة شاء من شاء وابى من ابى , حطها بتوقيعك سماع مني

يازلمة من الاول احكي انك من انصار الشيخ المجاهد اسامة بن لادن حفظه الله ورعاه

بس بدك الصراحة , القائمة تبعك بدها تحديث انت يبدو نسيت القذافي وعمر البشير و كيم ايل جونغ و جمال عبد الناصر و هتلر وموسوليني وستالين

والله معك حق

لازم حط البشير

بس القذافي؟؟؟ لاء ما بظن

وجمال عبد الناصر أكيييييييييييييييد

هتلر تقريبا الحقائق المزورة عنو خيرات الله مشان هيك لا بضيفو ولا بقلعو

بس موسيليني وإستالين؟ الله يسامحك شلون بدي حطون مع أسامة ؟؟؟

Bonita

15/07/2009, 15:00

يا ريت حدا من الشباب يكون عندو فكرة ليش؟؟ وبيربح معنا اقامة لمدة شهرين في قبو فندق فرع فلسطين اكل شارب نايم ببلاش مع فرصة يومية لمشاهدة فيلم نجوم الضهر

طيب مو أحسن ما يضل الواحد بيبيتو زهقان لا شغله ولا عمله,,,بعدين هدول اللي عما يندفعلهم رواتب بالفروعه مو لازم يشتغلوا شوي !!! و هيك الواحد بيمر بتجارب ...:p

مبروك عليهم رئيسهم و الله يهنيهم :D أنت ليش متعب حالك :shock::shock:

couba

20/07/2009, 06:54

هدي تالت سنه بتصدرو هالدوري

شو هالقائمه الي مابتتغير

i m syrian

30/08/2009, 03:30

يعني والله انا ما عارف قرعة ابو هالمجلة منين
انو حاطين يلي بيعادو اميركا و إسرئيل ديكتاتوريين و مطعمين المجلة بشوية حلفاء إلهون قال يعني منشان المصداقية

و الترتيب هاد ابدا مو صحيح لأن الرئيس حسني مبارك بيستحق الاول بجدارة بيكفي يلي بيصير بمخافر مصر
و الملك عبدالله بيسكتون بالمصاري بس مدري شلون نفدت منو هالمجلة

لاحظو اني حطيت الرئيس مبارك و الملك عبدالله
لأني بحترم شعب البلدين مو منشان شي