بين سوريا وإسرائيل... من الأولى بحسابات المواجهة !!! [الأرشيـــــف]

عرض كامل الموضوع : بين سوريا وإسرائيل... من الأولى بحسابات المواجهة !!!

VivaSyria

15/06/2009, 00:56

منذ عام 1948 وحتى يومنا هذا خاض الكيان الصهيوني عدد هائل من الحروب وشن العديد من الإجتياحات ولم تمر عليه فترة قصيرة دون شن عدوان على أحد من العرب...

خاض حروباً بمعدل حرب كاملة كل سنتين كان لبعضها أثر تدميري على نفسية شعبه كحرب تشرين وعدوان 2006 على لبنان... هذه الحروب أوهنت فعلياً من نفسية الشعب "الإسرائيلي" فزادت معدلات الهجرة وإنهارت أحزاب ونشأت أخرى...

يحد هذا الكيان نظرياً أربع جبهات من الممكن أن تشتعل في أي وقت اذا تغيرت أي معادلة ولو بشكل طفيف كما ويتداخل مع كيانه من الداخل جبهتين إضافتين من غزة والضفة ويجاهره العداء والكراهية النظام الإيراني... أي مامجموعه سبع جبهات نظامية تقلصت لثلاث جبهات حالياً...

محور موضوعي هنا أن هذا الكيان العدواني ومع كل الحروب التي خاضها والتي يخضوها ومع كل التهديدات الوجودية التي تواجهه لم نسمعه يوماً يعلن قانون الطوارئ أو الأحكام العرفية على شعبه... لم أسمع يوماً عن إعتقالات تعسفية في صفوف مواطنيه بحجة أنه دولة مواجهة وهو من يحق له أن يسمى دولة مواجهة...

هذا الكيان المجرم وفي ذروة اجتياحه للبنان كان يحاكم إبن رئيس وزرائه بتهمة اختلاس 50000 دولار "رئيس بلدية مابيقلبون رشوة عنا" ... وفي ذروة اجتياحه الهمجي لغزة كان يحاسب ويحقق بل ويعزل رئيس وزرائه لتلقيه تبرع للمساهمة في حملته الإنتخابية... هذا الكيان الغاصب الذي يحتل أرضاً ليست بأرضه ولايعترف به كل المحيطين به عزل رئيس دولته لأنه تحرش بسكرتيرته...

هذا السرطان على أرض فلسطين يجري انتخابات حرةً ديمقراطية نزيهة ويصل فيه للحكم من يختاره "شعبه"... هذا الشعب المرتزق الذي تجمع من أقاصي الأرض ومغاربها في مكان لايملكه يحق له أن يتمتع بالديمقراطية وأن يعيشها ويقرر مصيره بنفسه ويحاسب المقصر ويكافئ الناجح...

أما نحن فنعيش في دولة مواجهة لم تأت منذ أربعين عاماً ونطبق قوانين الطورائ والأحكام العرفية على شعبنا مع أنه لايوجد لنا إلا جبهة واحدة أخجل من تسميتها جبهة لأنها أهدئ من البقعة التاسعة بالقطب الشمالي...

نحن تتدخل في حياتنا عشرات الأجهزة الأمنية ويحاكم مثقفونا ويعتقل من يجرأ على نقد الحكومة أو النظام حتى وإن كان هذا النقد نابع من حب الوطن وأبنائه...

نحن من يخونوننا ويتهموننا بوطنيتنا إذا طالبنا بأقل حقوق شعبنا...والكيان الصهيوني المجرم الغاصب يعطي الحرية لمواطنيه ليعيشو حياة كريمة بعيدة عن المحسوبية والفساد وأجهزة القمع مع أن مهارته بقمع أي أحد غير مواطنيه لامجال لوصف بشاعتها وقذارتها...

كيف يحق لمجموعة من شذاذ الأفاق أن يعيشوا بحريتهم وكرامتهم على أرض ليست بأرضهم وعلى دم أهلها ولايحق لنا أن نأخذ حقوقنا ونقوم بواجباتنا على أرضنا وفي وطننا !!!

من هو الأولى بأن يخاف على وجوده وأن يطبق القوانين الإستثنائية على مواطنيه "إن سلمنا جدلاً أن الصهاينة المحتلين يرقوا لمرتبة مواطنيين" !!! ومن هو الأولى بأن يغض النظر عن كل تجاوزات حكوماته وأجهزتها!!!

نحن من نستقوي على شعوبنا بالباطل ونهادن أعدائنا...

وهم من يفتكون بأعدائهم زوراً وبهتانا ويطبطبون لشعوبهم...

نحن من توهن نفسية أمتنا من أقل كلمة من مثقف أو وطني وهم من لم تستطع كل حروبهم أن توهن نفسيتهم...

ودمتم.

ayhamm26

15/06/2009, 01:03

Joe

15/06/2009, 02:08

انا ضد هذا الطرح و بشدة لاننا لا نعرف تفاصيل و اخبار المجتمع الاسرائيلي بدقة و سيصلنا فقط الأخبار المثيرة للجدل و التي قد يصب غالبها في مصلحة اسرائيل في النهاية
بينما الواقع ان اسرائيل عنصرية تجاه مجموعات كبيرة من مواطنيها و هم عرب48 و ايضا لا يتفق كل اليهود مع ممارسات اسرائيل ان كانوا يهودا داخل اسرائيل او خارجها.. و هم يستعملون المحرقة لمصادرة الكثير من الحقوق.. يعني لديهم تهمة معاداة السامية جاهزة و هي كمبدأ, لا تفرق كثيرا عن قوانين الطوارئ العربية. لان اي موضوع يخرج عن سيطرتهم الامنية يمكنهم توجيه تهمة معاداة السامية و اقفال الموضوع على طريقة قانون الطوارئ و على طريقة ال Patriot Act الأمريكية
كل شعب لديه فوتاته و طلعاته... و العدو الصهيوني عدو غاشم جدا و ظالم و لا يوجد نقاش في هذا و كل اصحاب الكلمة الحرة و العقل الحر في اوروبا و اميركا يعون ذلك.. هي حقبة مؤقتة من الدعم اللامتناهي لهذا الكيان و لكن يوما ما الدعم سيتوقف (و هذا ليس بالخيال العلمي.. الساكن في اميركا يعلم ان الامريكان لا يحبون اليهود و لا الاسرائيليين و قد سئموا من كذبهم المتواصل و من هذه المسؤولية المالية و الامنية الكبيرة التي تشكلها اسرائيل)... اضافة إلى ان العنصرية و الجرائم الانسانية الكثيرة التي ارتكبتها اسرائيل و ترتكبها يوميا بحق مواطنيها العرب و بحق البشر الواقعين تحت احتلالها (هدول مسؤوليتها اولا و اخيرا كقوة محتلة).. كل هالمشاكل رح ترجع و تعض اسرائيل بمؤخرتها

نحن لدينا مشاكل كثيرة جداااا لا تحصى في بلادنا.. و لكن هذا النوع من المقارنة لا يفيد بشيء إلا تلميع صورة اسرائيل و هذا مرفوض تحت اي ظرف.. فلا أحد منا هنا اسرائيلي او يعيش داخل الاراضي المحتلة حتى يستطيع ان يقدم صورة حقيقية عما يجري في السياسة و وراء الكواليس في حكوماتهم... و انا متاكد ان الفساد و الابتزازات تعشش فيهم كما تعشش فينا و لربما اكثر... هل تعلم انت ان كان الاسرائيليون يدفعون ضرائب ام لا؟ و ما حجم هذه الضرائب؟ ماذا عن الخدمة العسكرية الالزامية لكل الشباب و الشابات؟ نحن نجهل الكثير و كلامك هذا لا يمكن تقديمه بهذا الشكل البسيط

تحياتي

VivaSyria

15/06/2009, 02:38

انا ضد هذا الطرح و بشدة لاننا لا نعرف تفاصيل و اخبار المجتمع الاسرائيلي بدقة و سيصلنا فقط الأخبار المثيرة للجدل و التي قد يصب غالبها في مصلحة اسرائيل في النهاية

يعني مثلاً إسرئيل وضعها العسكري والأمني مو بالدقة يلي أنا حكيت عنها ولا كيف؟؟ والديموقراطية والمحاسبة عندون متل ما حكينا عنها ولا أنا غلطان؟

بعدين صعبة شوي هي قصة الاعلام الموجه بايام الفضائيات لانو بالنهاية بدو يكون في حدا عم ينقل الحقيقة...

بينما الواقع ان اسرائيل عنصرية تجاه مجموعات كبيرة من مواطنيها و هم عرب48

حتى المأخذ يلي لقيتو عليون كان ضد العرب... المهم عيني انت عم تقول انو اسرائيل عنصرية اتجاه مجموعات معناها في حدا مو عنصريين اتجاهو وعاطيينو حقوقو... أنا بدي اسألك حكومتنا مين الفئة يلي عاطيتها حقوقها من فئات الشعب؟؟

و ايضا لا يتفق كل اليهود مع ممارسات اسرائيل ان كانوا يهودا داخل اسرائيل او خارجها..

ياسلام إثبات أخر انو بهالكيان الإرهابي في مين بيحقلو يعارض حتى ممارسات حكومتو بدون مايلتعن سماه...

و هم يستعملون المحرقة لمصادرة الكثير من الحقوق..

إثبات تاني انون بيستغلو أي شي ليصادرو حقوق الأخرين ويعطو شعبون أكتر من حقوقه...

يعني لديهم تهمة معاداة السامية جاهزة و هي كمبدأ, لا تفرق كثيرا عن قوانين الطوارئ العربية.

إثبات تالت أن تهمهم الكاذبة توجه فقط لأعدائهم أو دول أخرى بغية استغلال أي قضية لمصلحة شعوبهم... بس ما سمعنا انو اعتقلو أي حدا عندون اذا شكل حزب معارض أو انتقد رئيس الجمهورية أو الحكومة...

لان اي موضوع يخرج عن سيطرتهم الامنية يمكنهم توجيه تهمة معاداة السامية و اقفال الموضوع على طريقة قانون الطوارئ و على طريقة ال Patriot Act الأمريكية

أخي حكيك كلو على ممارسات اسرائيل على الصعيد الخارجي وأنا مقارنتي بين وضعين لدولتين على الصعيد الداخلي... دولة مغتصبة همجية عدوانية مع الأخر وضامنة وكافلة لحقوق شعبها ودولة تانية تتمتع بكل الشرعية ومهادنة الخارج وحارقة شعبها...

كل شعب لديه فوتاته و طلعاته...

مابدنا شي غير انو يسمحولنا يكون إلنا تطلعات بدون مايحطزنا بالسجن...

و العدو الصهيوني عدو غاشم جدا و ظالم و لا يوجد نقاش في هذا و كل اصحاب الكلمة الحرة و العقل الحر في اوروبا و اميركا يعون ذلك..

شفت بموضوعي تشكيك بهالشي هاد؟؟ بالعكس هاد سبب بيخليون يتجاوزوا على الصعيد الداخلي ومع هالشي هنن ملتزمين مع "شعبون"

هي حقبة مؤقتة من الدعم اللامتناهي لهذا الكيان و لكن يوما ما الدعم سيتوقف (و هذا ليس بالخيال العلمي.. الساكن في اميركا يعلم ان الامريكان لا يحبون اليهود و لا الاسرائيليين و قد سئموا من كذبهم المتواصل و من هذه المسؤولية المالية و الامنية الكبيرة التي تشكلها اسرائيل)... اضافة إلى ان العنصرية و الجرائم الانسانية الكثيرة التي ارتكبتها اسرائيل و ترتكبها يوميا بحق مواطنيها العرب و بحق البشر الواقعين تحت احتلالها (هدول مسؤوليتها اولا و اخيرا كقوة محتلة).. كل هالمشاكل رح ترجع و تعض اسرائيل بمؤخرتها

إنو برجع بقول موضوعي مقارنة بين حقوق إنسان بمكانين متناقضين... أكيد ما حتجاوبني انو اسرئيل مستبيحة الدم الفلسطيني لأنو برجع بقلك النقاش حول طريقة التعاطي مع السوريين والإسرائيلين من قبل حكوماتون...

نحن لدينا مشاكل كثيرة جداااا لا تحصى في بلادنا.. و لكن هذا النوع من المقارنة لا يفيد بشيء إلا تلميع صورة اسرائيل و هذا مرفوض تحت اي ظرف..

هوب هوب دخيلك هي حكمها إعدام دخيلك... مابتصور بحكيي في أي تلميع لصورة إسرائيل أو تبرير لإجرامها بل بالعكس حكيي بيحمل عنصر مفاجئة انو ذئب بهالإجرام هيك بيعامل شعبو !!!

رجاءً ما تاخد النقاش لمكان تاني وتفوتنا بقصص مالنا فيها لأنو الموضوع واضح والهدف واضح فمافي داعي تتهمني بشي أو تقولني شي أو تقرا بين سطوري شي مانو موجود...

فلا أحد منا هنا اسرائيلي او يعيش داخل الاراضي المحتلة حتى يستطيع ان يقدم صورة حقيقية عما يجري في السياسة و وراء الكواليس في حكوماتهم... و انا متاكد ان الفساد و الابتزازات تعشش فيهم كما تعشش فينا و لربما اكثر... هل تعلم انت ان كان الاسرائيليون يدفعون ضرائب ام لا؟ و ما حجم هذه الضرائب؟ ماذا عن الخدمة العسكرية الالزامية لكل الشباب و الشابات؟ نحن نجهل الكثير و كلامك هذا لا يمكن تقديمه بهذا الشكل البسيط

الفساد معشش بس في مين عم يحاسب عليه... وقت رئيس وزراء بينعزل وبيتحقق معو "بقسم الشرطة" ووقت أحزاب المعارضة بتفوت على الانتخابات وبيصير تناوب للسلطات بيكون وضعون الداخلي صحي بكيان سرطاني غير صحي...

يعني كنت بتمنى منك لو ناقشتني بحقيقة وحدة مين الأولى بتطبيق قوانين الطوارئ والأحكام العرفية والإعتقالات.. نحنا ولا إسرائيل؟؟

تحياتي

100 هلا

yass

15/06/2009, 03:33

هلأ هو صح... مواطني اسرائيل عايشين في ظل, خلينا نقول "رفاهية" (مش بس اقتصادية), لكن بعتقد انو المبادئ اللي ع أساسها قائمة هالرفاهية و تقرير من يستحقها تقف على قاعدة معقّدة جداً و آخر همها هو المفهوم الديمقراطي للمواطنة...

المواطنة بإسرائيل مرهونة بالولاء (بدهون يعملوها قانون هلأ بس مافي داعي.. هي هيك أولريدي, أو إن فاكت), اذا انت موالي لليهودية و للحركة الصهيونية رح تعيش منيح, مانك موالي رح تشوف الويلات... و الطبيعي انو عملياً كل اليهود المقيمين باسرائيل موالين للصهيونية, لأنو لو مش هيك كان ما عاشو بأرض ما بيعتقدو انها الهم بحق إلهي...

كيف ماشية السياسة الصهيونية؟ ماشية ببساطة على مبدأ "ألتانيا"..

ألتانيا جاية من اسم باخرة صار مشانها حادثة شهيرة وقت إعلان قيام الدولة.. و مختصرها انو هالباخرة استأجرها مناحيم بيغن لحتى تنقل سلاح للعصابات الصهيونية, بس خلال فترة شحن السلاح و هيك كانت الدولة قامت و انحلو العصابات.. و بن غوريون رئيس

بعت بيغن من البحر انو أنا جايكون مع سلاح... رد عليه بن غوريون انو ارجع بالسلاح محل ما جبتو نحنا صرنا دولة و عنا جيش و ما بيصير يفوت سلاح لحدا غير الجيش, أصر بيغن انو يفوت و فات... و قصفولو الباخرة و هو نجا بأعجوبة...

بيغن من الآباء المؤسسين للكيان.. و مع ذلك قصفولو سفينتو لأنو ما أطاع انو الدولة قامت و هو دورو انتهى...

مغزى الكلام انو الشخص, مهما كان مهم, هو لا شيء أمام القضية, و مافي مشكلة بتصفيتو أبداً اذا ولاءو الها مشكوك فيه... الملاحظة انو مو لاشيء أمام الدولة انما أمام القضية...

و ع هالأساس ماشيين... تمشي عكس القضية منعرف وديتك قديه, تمشي مع القضية انت حبيبنا... بغض النظر عن القانون اللي ممكن نطنشو اذا شفناك مفيد

هل اسرائيل بتحاكم كل المخالفات القانونية؟ طبعاً لأ... بيحاكمو فساد لأنو بيعتبروه سوس ينخر و بيعتبرو الفاسد هو شخص غير نظيف ولائياً لأنو لاحق مصلحتو مش مصلحة القضية, بيحاكمو بشدة قضايا التحرّش الجنسي بالمجندات لأنو ما بدهون انو الفتيات يخافو من الجيش, و عدا ذلك تتراوح مساءلتك بحسب ولاءك للقضية...

أولمرت حرقوه لأنو خسر حرب لبنان, و لو ربحانا كان قوة سحرية طيّرت كل شي ضدو من فساد و غيرو... بس عندك بالمقابل شارون

شارون باجتياح الـ 82 خرق كل القوانين و الاعراف الاسرائيلية من عصيان أوامر عسكرية لتجاهل رئيس الوزراء بشكل كامل و مطالعتو بالخجلة و تصويرو كأهبل و آخر من يعلم بأي شي... بس مين قدر يحاسب شارون اللي حقق حلم صهيوني باحتلال عاصمة عربية و إبعاد منظمة التحرير إلى الأبد من لبنان؟ لو شارون خسران هداك الاجتياح كان حرقوه بتطبيق القانون عليه, و يجوز ما كان رجعنا سمعنا باسمو بحياتنا... بس لأنو نجح عملو مسرحية لجنة تقصّي حقائق حول صبرا و شاتيلا و ما طلع منها شي.. و صار بعدا شارون رئيس وزرا

بعمرو باسرائيل ما رح يتحاكم مستوطن بجريمة اطلاق نار أو قتل.... حتى لو ضد يهودي آخر

باسرائيل كتير من حقوق المواطن مرهونة بخدمة الجيش... لبين ما تخدم جيش و تفيد القضية انت ناقصلك كتير حقوق ( و هاد المخرج القانوني لحتى عرب الـ48, اللي هنن مواطنين اسرائيليين, ما يحصلو على حقوق.. عمي ما تخدم جيش مالك حقوق, روح اخدم جيش بتاخد حقوق)

أما بخصوص انو باسرائيل مافي قانون طوارئ... أنا بقول انو في, و قانون شديد جداً, ما نشوف آثارو لأنو بطبيعة الحال مافي تقريباً يهود مضادين للصهيونية داخل اسرائيل (مسموح بطيف محدد من الرأي لا يمكن أن يتجاوز حدود الصهيونية السياسية). و باسرائيل في مساجين رأي, و في مضايقات مباشرة من المخابرات أو لا مباشرة عن طريق جمعيات المستوطنين متل بعض الصحفيين كـ أميرة هاس اللي اعتقلوها أو حطوها بالإقامة الجبرية عدة مرات.. او الحالة الأشهر تبعيت عالم الذرّة مردخاي فعنونو, عملو عملية مخابراتية رهيبة لجابوه, خطفوه بإيطاليا و انسجن شي خمسطعس سنة و قريت من فترة انو رح يرجعو يحاكموه بسبب مقابلة صحفية مع النيويورك تايمز حول مفاعل ديمونة... و هالزلمة كان مرشح للنوبل للسلام و هو مسجون (طبعاً ما ربح).

بالمحصلة هنن عندون انو ضمن طيف شوي فضفاض لكن كلو يصب في إطار الصهيونية و أمة اليهود انت فيك تتحرّك و تعيش معزز مكرّم, لكن الطلعة من هون مصيبة كبيرة.. مرحبا مواطن و مرحبا حقوق... و كرأي شخصي أنا بشوف انو ما بيفرقو كتير بهالأسلوب التفكيري (كأسلوب, كطريقة قياس المواطنة و الولاء) عن الواقع العربي... الفرق الوحيد انو هنن عندون عصبة حول "القضية" و كل ما عدا القضية لا أهمية له, بينما عنا العصبة هي حول شخص أو مجموعة أشخاص بمصالح محددة

و يطول الحديث..

VivaSyria

15/06/2009, 03:57

هلأ هو صح... مواطني اسرائيل عايشين في ظل, خلينا نقول "رفاهية" (مش بس اقتصادية), لكن بعتقد انو المبادئ اللي ع أساسها قائمة هالرفاهية و تقرير من يستحقها تقف على قاعدة معقّدة جداً و آخر همها هو المفهوم الديمقراطي للمواطنة...

المواطنة بإسرائيل مرهونة بالولاء (بدهون يعملوها قانون هلأ بس مافي داعي.. هي هيك أولريدي, أو إن فاكت), اذا انت موالي لليهودية و للحركة الصهيونية رح تعيش منيح, مانك موالي رح تشوف الويلات... و الطبيعي انو عملياً كل اليهود المقيمين باسرائيل موالين للصهيونية, لأنو لو مش هيك كان ما عاشو بأرض ما بيعتقدو انها الهم بحق إلهي...
.

يعني ظاهرة صحية أو مرضية انو يكون مقياس احترام الفرد وأخدو لحقوقو هو مقياس ولائه لقضية وطنية "وجودية" بينما بالطرف الأخر المقارن به مافي مقياس لإحترام المواطن قد ماكان ولائه حتى للأشخاص... يعني على قد ما الشعب السوري نزل مسيرات للقيادة والله لازم يعاملوه أحسن معاملة إذا في عندون شي مقياس احترام للمواطن...

كيف ماشية السياسة الصهيونية؟ ماشية ببساطة على مبدأ "ألتانيا"..

ألتانيا جاية من اسم باخرة صار مشانها حادثة شهيرة وقت إعلان قيام الدولة.. و مختصرها انو هالباخرة استأجرها مناحيم بيغن لحتى تنقل سلاح للعصابات الصهيونية, بس خلال فترة شحن السلاح و هيك كانت الدولة قامت و انحلو العصابات.. و بن غوريون رئيس

بعت بيغن من البحر انو أنا جايكون مع سلاح... رد عليه بن غوريون انو ارجع بالسلاح محل ما جبتو نحنا صرنا دولة و عنا جيش و ما بيصير يفوت سلاح لحدا غير الجيش, أصر بيغن انو يفوت و فات... و قصفولو الباخرة و هو نجا بأعجوبة...

بيغن من الآباء المؤسسين للكيان.. و مع ذلك قصفولو سفينتو لأنو ما أطاع انو الدولة قامت و هو دورو انتهى...

مغزى الكلام انو الشخص, مهما كان مهم, هو لا شيء أمام القضية, و مافي مشكلة بتصفيتو أبداً اذا ولاءو الها مشكوك فيه... الملاحظة انو مو لاشيء أمام الدولة انما أمام القضية...

يعني الشخوص مهما علا شأنها تبقى قضية إسرائيل هي الأهم وإلها الأولوية... وضمن هالقضية عم نشوف انو جاية احترام شعبهون "المختار" واحترام خيارات هالشعب... يعني في تداول سلطة ولا لاء؟ في حكومات بتنحجب عنها الثقة ولا لاء؟؟ حتى لو كلو ضمن اطار المشروع العام بس بيبقى في ممارسة ديموقراطية وحقوق مواطن على الأرض...

و ع هالأساس ماشيين... تمشي عكس القضية منعرف وديتك قديه, تمشي مع القضية انت حبيبنا... بغض النظر عن القانون اللي ممكن نطنشو اذا شفناك مفيد

طيب عطيني القضية يلي ممكن المواطن السوري ممكن يمشي معها حتى يكون حبيب النظام وياخد حقوقو..

هل اسرائيل بتحاكم كل المخالفات القانونية؟ طبعاً لأ... بيحاكمو فساد لأنو بيعتبروه سوس ينخر و بيعتبرو الفاسد هو شخص غير نظيف ولائياً لأنو لاحق مصلحتو مش مصلحة القضية, بيحاكمو بشدة قضايا التحرّش الجنسي بالمجندات لأنو ما بدهون انو الفتيات يخافو من الجيش, و عدا ذلك تتراوح مساءلتك بحسب ولاءك للقضية...

كل جريمة بيتحاسب عليها أكيد إلها انعكاسات سلبية على المجتمع وإلا ما كان إسمها جريمة... بس السؤال هل هالإنعكاسات بتختلف بين المجتمعات ولا هي وحدة؟؟ بمعنى الفساد كمان عنا عم يأثر عالمجتمع وعالقضية ولا فسادنا "العلني الوقح" وضعو طبيعي وما إلو هالانعكاسات على المجتمع؟

أولمرت حرقوه لأنو خسر حرب لبنان, و لو ربحانا كان قوة سحرية طيّرت كل شي ضدو من فساد و غيرو... بس عندك بالمقابل شارون

شارون باجتياح الـ 82 خرق كل القوانين و الاعراف الاسرائيلية من عصيان أوامر عسكرية لتجاهل رئيس الوزراء بشكل كامل و مطالعتو بالخجلة و تصويرو كأهبل و آخر من يعلم بأي شي... بس مين قدر يحاسب شارون اللي حقق حلم صهيوني باحتلال عاصمة عربية و إبعاد منظمة التحرير إلى الأبد من لبنان؟

منرجع للفكرة انو في قضية بسبيلها بيهون كل شي وهالقضية بيتفرع عنها ضمان استقرار الشعب الاسرائيلي ودولتو على حساب الاخرين دائماً ودون أن يرف جفن لمواطنينهم...

بعمرو باسرائيل ما رح يتحاكم مستوطن بجريمة اطلاق نار أو قتل.... حتى لو ضد يهودي آخر

باسرائيل كتير من حقوق المواطن مرهونة بخدمة الجيش... لبين ما تخدم جيش و تفيد القضية انت ناقصلك كتير حقوق ( و هاد المخرج القانوني لحتى عرب الـ48, اللي هنن مواطنين اسرائيليين, ما يحصلو على حقوق.. عمي ما تخدم جيش مالك حقوق, روح اخدم جيش بتاخد حقوق)

كمان هون بقلك شو يعمل المواطن السوري لياخد حقوقو؟؟ جيش وبيخدم وظلم وبينظلم ومسيرات وبيطلع وكزب على حالو وبيكزب... فيعني شو يعمل كمان؟؟

أما بخصوص انو باسرائيل مافي قانون طوارئ... أنا بقول انو في, و قانون شديد جداً, ما نشوف آثارو لأنو بطبيعة الحال مافي تقريباً يهود مضادين للصهيونية داخل اسرائيل (مسموح بطيف محدد من الرأي لا يمكن أن يتجاوز حدود الصهيونية السياسية).

يعني بسوريا قانون الطوارئ والإجراءات التعسفية وامتهان كرامة الإنسان عم تطبق على المعارضين للنظام فقط؟؟!! يازلمة بسوريا مافي سبع أشخاص بيسترجوا يجاهروا بمعارضتون للنظام فهالارهاب هاد مانو موجه أبداً لمعارضين للنظام...

و باسرائيل في مساجين رأي, و في مضايقات مباشرة من المخابرات أو لا مباشرة عن طريق جمعيات المستوطنين متل بعض الصحفيين كـ أميرة هاس اللي اعتقلوها أو حطوها بالإقامة الجبرية عدة مرات.. او الحالة الأشهر تبعيت عالم الذرّة مردخاي فعنونو, عملو عملية مخابراتية رهيبة لجابوه, خطفوه بإيطاليا و انسجن شي خمسطعس سنة و قريت من فترة انو رح يرجعو يحاكموه بسبب مقابلة صحفية مع النيويورك تايمز حول مفاعل ديمونة... و هالزلمة كان مرشح للنوبل للسلام و هو مسجون (طبعاً ما ربح).

انت عم تحكي عن أمثلة هنن شافو فيها تهديد حقيقي لشي بيخص قضيتون... بس بتبقى حالات استثنائية ضمن ظرف استثنائي...

بس نحنا اذا بياع الفول يلي على الزاوية ماعلق صورة الرئيس بيكون عم يوهن نفسية الأمة ويحارب النظام الإشتراكي...

بالمحصلة هنن عندون انو ضمن طيف شوي فضفاض لكن كلو يصب في إطار الصهيونية و أمة اليهود انت فيك تتحرّك و تعيش معزز مكرّم, لكن الطلعة من هون مصيبة كبيرة.. مرحبا مواطن و مرحبا حقوق... و كرأي شخصي أنا بشوف انو ما بيفرقو كتير بهالأسلوب التفكيري (كأسلوب, كطريقة قياس المواطنة و الولاء) عن الواقع العربي... الفرق الوحيد انو هنن عندون عصبة حول "القضية" و كل ما عدا القضية لا أهمية له, بينما عنا العصبة هي حول شخص أو مجموعة أشخاص بمصالح محددة

عم حاول لاقي طيف فضفاض لإلنا وبيصب بمصلحة شي عام بس مالقيت..

yass

15/06/2009, 04:24

بعتقد أنا فتت أعطي رأي... ما فتت أخانق و أتساءل و كأني بتحقيق عسكري...

يعني ظاهرة صحية أو مرضية انو يكون مقياس احترام الفرد وأخدو لحقوقو هو مقياس ولائه لقضية وطنية "وجودية" بينما بالطرف الأخر المقارن به مافي مقياس لإحترام المواطن قد ماكان ولائه حتى للأشخاص... يعني على قد ما الشعب السوري نزل مسيرات للقيادة والله لازم يعاملوه أحسن معاملة إذا في عندون شي مقياس احترام للمواطن...

مفهوم المواطنة بالتعريف انك انت عندك كل حقوقك ضمن وطنك مهما كانت ولاءاتك...أو حتى اذا ما عندك ولاءات حتى للدولة اللي عايش فيها...

و هالشي مش موجود باسرائيل... هنن الانتماء للدولة مبني عنهون عالولاء, و خارج الولاء الشخص عالة على الدولة

و كوني عم قول انو باسرائيل مافي مفهوم مواطنة لا يعني انو عم احمد بنظامنا, شي عن شي يفرق جداً...

يعني الشخوص مهما علا شأنها تبقى قضية إسرائيل هي الأهم وإلها الأولوية... وضمن هالقضية عم نشوف انو جاية احترام شعبهون "المختار" واحترام خيارات هالشعب... يعني في تداول سلطة ولا لاء؟ في حكومات بتنحجب عنها الثقة ولا لاء؟؟ حتى لو كلو ضمن اطار المشروع العام بس بيبقى في ممارسة ديموقراطية وحقوق مواطن على الأرض...

هاي قشور... حجب ثقة و تداول سلطة هاي مجرد قشور... في شي فوق القانون و في شي فوق الديمقراطية و في شي فوق أي شي... و من لحظة صار في شي فوق التطبيق الأعمى للقانون ما عد فينا نحكي عن ديمقراطية مهما كان هالشي ليكون, إن كان شخص أو إن كان فكرة...

مفهوم انو الغاية تبرر الوسيلة يتناقض بالتعريف مع الديمقراطية.. يتصادم معها بشكل كامل, و وحدة من أساسيات الصهيونية انو في سبيل أمّة اليهود كل شي ممكن, حتى لو احترقت نص أمة اليهود ليعيش النص التاني...

طيب عطيني القضية يلي ممكن المواطن السوري ممكن يمشي معها حتى يكون حبيب النظام وياخد حقوقو..

برجع قول انو مافينا نقارن بين صنفين مختلفين تماماً.. نحنا عنا حكم استبدادي قمعي لكن بلدنا (كمفهوم وطن) واقف على أساس منطقي إنسانياً و هنن لأ...

عنا اذا المواطن كان موالي للمنظومة, و عرف يدخل بدوامة مصالحها.. و نجح... بيصير ملياردير

كل جريمة بيتحاسب عليها أكيد إلها انعكاسات سلبية على المجتمع وإلا ما كان إسمها جريمة... بس السؤال هل هالإنعكاسات بتختلف بين المجتمعات ولا هي وحدة؟؟ بمعنى الفساد كمان عنا عم يأثر عالمجتمع وعالقضية ولا فسادنا "العلني الوقح" وضعو طبيعي وما إلو هالانعكاسات على المجتمع؟

الفساد جريمة بكل المعايير و عند كل الدول..

ما أقصد انو هنن القانون ما يمشي عالكل و للكل مهما كان, و كمثال: ناشط من أجل السلام بيطلع مظاهرة ضد مستوطنة و يجي مستوطن يفتح عليه النار.. بأكدلك انو هالمستوطن بيطلع من التوقيف قبل ما يمضي أسبوع, و بيعملولو استقبال أبطال

بالمقابل يجي الناشط يشيل بلوكة و يخبطها براس المستوطن و بيقتلو, أو بيعمللو عاهة مستديمة... هاد بعمرو ما يرجع يشوف الضو.. حتى لو يهودي, و حتى لو كان حفيدو لبن غوريون بذاتو

التطبيق الفضفاض للقانون حسب ملائمتو للقضية هو أمر لا ديمقراطي, و ينافي أي معنى من معاني الديمقراطية.

منرجع للفكرة انو في قضية بسبيلها بيهون كل شي وهالقضية بيتفرع عنها ضمان استقرار الشعب الاسرائيلي ودولتو على حساب الاخرين دائماً ودون أن يرف جفن لمواطنينهم...

هاي براغماتية اسمها... هاي غاية تبرر الوسيلة, انو معليه أخرق القانون لحتى أحقق حلم صهيوني, هون القانون مالو مكان و ما حدا بيحاسبني عليه

و هذا أمر لا ديمقراطي...

كمان هون بقلك شو يعمل المواطن السوري لياخد حقوقو؟؟ جيش وبيخدم وظلم وبينظلم ومسيرات وبيطلع وكزب على حالو وبيكزب... فيعني شو يعمل كمان؟؟

و انا برجع جاوب نفس الشي... عنا استبداد... لكن نحنا تركيبة مختلفة تماماً مافينا نقارنها أبداً, و مداخلتي ما كانت لإثبات انو نحنا احسن أو هنن أحسن, أساساً أنا عاجز عن المقارنة.. انا كل ما أريد الوصول إليه انو اسرائيل ليست واحة الديمقراطية المزعومة و أنو المواطنة فيها محكومة بمعايير إنتمائية و ولائية لقضية... و هنن أساس مشكلتهون انو بلدهون قضية.. و لا يمكن نزع القضية عن الدولة, و ما رح يوصلولو ليوقعو سلام مع جيرانهون و ينتهي الهاجس الوجودي تبعون... و جزء من الفكر الصهيوني قائم ع انو هالهاجس الوجودي ما ينتهي, لأنو من انتهى انتهت اسرائيل, رح يدبحو بعض...

و لذلك بعمرهون ما رح يوقعو سلام حقيقي

يعني بسوريا قانون الطوارئ والإجراءات التعسفية وامتهان كرامة الإنسان عم تطبق على المعارضين للنظام فقط؟؟!! يازلمة بسوريا مافي سبع أشخاص بيسترجوا يجاهروا بمعارضتون للنظام فهالارهاب هاد مانو موجه أبداً لمعارضين للنظام...

هنن عايشين بداخل اسرائيل بمنظومة رعب نفسي لا تقل أبداً عن الرعب اللي عايشينو نحن, لأسباب مختلفة لكن الجوهر بتصوّر هو نفسو...

من الطفولة بيعملو غسيل الدماغ اللعين هاد تبع كلو بدو يدبحك و لازم تدبحهون قبل ما يدبحوك, و يزرعو بذرة الكراهية ضد كل شي ممكن يكون لا صهيوني... الدولة ليست أرض و ناس بمفهوم اسرائيل, الدولة قضية..

المواطن الإسرائيلي مسخّر لخدمة القضية لحظة ينطلب منو و مافينو يقول لأ.. حتى لو خدم جيش, بيظل كل سنة بيروح يتدرّب, و اذا صار و حبو يفوتو ع لبنان بتروح و انت بتضحك, عجبك أم لم يعجبك... هاد كمان منظومة رعب من طراز آخر

انت عم تحكي عن أمثلة هنن شافو فيها تهديد حقيقي لشي بيخص قضيتون... بس بتبقى حالات استثنائية ضمن ظرف استثنائي...

بس نحنا اذا بياع الفول يلي على الزاوية ماعلق صورة الرئيس بيكون عم يوهن نفسية الأمة ويحارب النظام الإشتراكي...

لأ مانا كتير استثنائية, هاي الأشهر!

و كمان عندون في مظاهر كتيرة من الرقابة على الفكر و الصحافة و حتى الملبس, و عندون قصة التقارير, و مش بس على العرب

كتير من أساسيات الحياة محكومة بورقة تثبت ولاءك... و هي ورقة انك خدمت بالجيش و انك ما زلت تحت تصرّف الجيش, من دونها انت انسان بلا حقوق... عالة على القضية و عالة على البلد

عم حاول لاقي طيف فضفاض لإلنا وبيصب بمصلحة شي عام بس مالقيت..

عنا الطيف أضيق و يصب فقط في مصلحة الحاكم

VivaSyria

15/06/2009, 04:52

بعتقد أنا فتت أعطي رأي... ما فتت أخانق و أتساءل و كأني بتحقيق عسكري...

وأنا كان إلي تساؤلات حول رأيك ضمن إطار نقاش عام مابيحتوي أبداً على أي خناق أو استفزاز أو وتيرة عالية...

وأول مرة بعرف انو اذا حدا حط رأيو ممنوع حدا يناقشو فيه أو يعتبر هجوم وتحقيق هالنقاش...

المهم إذا صار النقاش والحوار يعتبر تحقيق وخناق ولسا أنا ما حدا خبرني... فعندك حلين يا أما ماتحط رأيك بموضوع أنا طارحو بهدف النقاش والحوار منعاً من التعليق عليه... يا أما تتحمل النقاش مع البشر وما تعتبرو تحقيق وخناق...

ماقدرت رد على الأفكار الواردة بمشاركتك التانية منعاً من المساس بمضمونها وخوفاً من إعتباره هجوم شخصي أو تحقيق أو إتهام أخر...

yass

15/06/2009, 04:52

وأنا كان إلي تساؤلات حول رأيك ضمن إطار نقاش عام مابيحتوي أبداً على أي خناق أو استفزاز أو وتيرة عالية...

وأول مرة بعرف انو اذا حدا حط رأيو ممنوع حدا يناقشو فيه أو يعتبر هجوم وتحقيق هالنقاش...

المهم إذا صار النقاش والحوار يعتبر تحقيق وخناق ولسا أنا ما حدا خبرني... فعندك حلين يا أما ماتحط رأيك بموضوع أنا طارحو بهدف النقاش والحوار منعاً من التعليق عليه... يا أما تتحمل النقاش مع البشر وما تعتبرو تحقيق وخناق...

ماقدرت رد على الأفكار الواردة بمشاركتك التانية منعاً من المساس بمضمونها وخوفاً من إعتباره هجوم شخصي أو تحقيق أو إتهام أخر...

طيب ماشي....

Joe

15/06/2009, 05:28

يعني مثلاً إسرئيل وضعها العسكري والأمني مو بالدقة يلي أنا حكيت عنها ولا كيف؟؟ والديموقراطية والمحاسبة عندون متل ما حكينا عنها ولا أنا غلطان؟

بعدين صعبة شوي هي قصة الاعلام الموجه بايام الفضائيات لانو بالنهاية بدو يكون في حدا عم ينقل الحقيقة...

حتى المأخذ يلي لقيتو عليون كان ضد العرب... المهم عيني انت عم تقول انو اسرائيل عنصرية اتجاه مجموعات معناها في حدا مو عنصريين اتجاهو وعاطيينو حقوقو... أنا بدي اسألك حكومتنا مين الفئة يلي عاطيتها حقوقها من فئات الشعب؟؟

ياسلام إثبات أخر انو بهالكيان الإرهابي في مين بيحقلو يعارض حتى ممارسات حكومتو بدون مايلتعن سماه...

إثبات تاني انون بيستغلو أي شي ليصادرو حقوق الأخرين ويعطو شعبون أكتر من حقوقه...

إثبات تالت أن تهمهم الكاذبة توجه فقط لأعدائهم أو دول أخرى بغية استغلال أي قضية لمصلحة شعوبهم... بس ما سمعنا انو اعتقلو أي حدا عندون اذا شكل حزب معارض أو انتقد رئيس الجمهورية أو الحكومة...

أخي حكيك كلو على ممارسات اسرائيل على الصعيد الخارجي وأنا مقارنتي بين وضعين لدولتين على الصعيد الداخلي... دولة مغتصبة همجية عدوانية مع الأخر وضامنة وكافلة لحقوق شعبها ودولة تانية تتمتع بكل الشرعية ومهادنة الخارج وحارقة شعبها...

مابدنا شي غير انو يسمحولنا يكون إلنا تطلعات بدون مايحطزنا بالسجن...

شفت بموضوعي تشكيك بهالشي هاد؟؟ بالعكس هاد سبب بيخليون يتجاوزوا على الصعيد الداخلي ومع هالشي هنن ملتزمين مع "شعبون"

إنو برجع بقول موضوعي مقارنة بين حقوق إنسان بمكانين متناقضين... أكيد ما حتجاوبني انو اسرئيل مستبيحة الدم الفلسطيني لأنو برجع بقلك النقاش حول طريقة التعاطي مع السوريين والإسرائيلين من قبل حكوماتون...

هوب هوب دخيلك هي حكمها إعدام دخيلك... مابتصور بحكيي في أي تلميع لصورة إسرائيل أو تبرير لإجرامها بل بالعكس حكيي بيحمل عنصر مفاجئة انو ذئب بهالإجرام هيك بيعامل شعبو !!!

رجاءً ما تاخد النقاش لمكان تاني وتفوتنا بقصص مالنا فيها لأنو الموضوع واضح والهدف واضح فمافي داعي تتهمني بشي أو تقولني شي أو تقرا بين سطوري شي مانو موجود...

الفساد معشش بس في مين عم يحاسب عليه... وقت رئيس وزراء بينعزل وبيتحقق معو "بقسم الشرطة" ووقت أحزاب المعارضة بتفوت على الانتخابات وبيصير تناوب للسلطات بيكون وضعون الداخلي صحي بكيان سرطاني غير صحي...

يعني كنت بتمنى منك لو ناقشتني بحقيقة وحدة مين الأولى بتطبيق قوانين الطوارئ والأحكام العرفية والإعتقالات.. نحنا ولا إسرائيل؟؟

100 هلا

أبو الشباب ما بعرف ليش حسيتك استنفرت كتير. انا ما قصدي شي ضدك. و انا, متل ياس, ماني حاول اثبت انو سوريا احسن من اسرائيل او العكس... المقارنة شبه مستحيلة. بهيك قصص مافيك تفصل جانب من حقوق الانسان عن جانب تاني.. من ناحية, بسوريا مثلا كلياتنا عنا نفس الحقوق و يلي هيي انو ما حدا عندو حقوق :p... باسرائيل.. في خيار و فقوس متل ما شرح ياس بالتفصيل.. اسرائيل كقضية كفكرة لوجود دولة يهودية اهم من اي شيء تاني... بالتالي رح يكون في عندك غسيل مخ و استدعاء للجيش و في ناس بتاكل حقوق ناس تانين... و هادا كلو ضمن نفس الكيان
بس حتى لو طنشنا كل الحكي المتعلق بالعناصر غير اليهودية... انا كلامي عن استغلال المحرقة و معاداة السامية حكيتو بخصوص اليهود بالذات مو بخصوص الجهات الخارجية.. لانو اليهود متلهم متل غيرهم بيتأثروا بهي القوانين القمعية الفكرية... في كتير مفكرين يهود عندهم اهل باسرائيل بس بيتعرضوا فورا لتهمة معاداة السامية لمجرد انو عم ياخدوا و يعطعوا بالقضية الفلسطينية.. و هادا بدون ما يجيبوا سيرة المحرقة بالاساس.. مثلا micheal neumann

انا كل يلي حبيت قوله هو التالي... انت بدون اي شك مانك مضطلع على تفاصيل المجتمع الاسرائيلي من الداخل. يلي عم تشوفه هو عبارة عن سياسة ضمن الحكومة الاسرائيلية بسبب تعدد الاحزاب.. بقى حزب بيضغط من هون و حزب بيضغط من هون و يلي نحنا منشوفو بالخارج هو عبارة بقى عن فضايح مالية و حجب ثقة و كذا... بس هادا كله ما بيعني انو علاقة الدولة بالمواطن الاسرائيلي طبيعية و نظامية... غير قصص الجيش, في موضوع الولاء المطلق و الف قصة... ثم مو كل يهود اسرائيل صهاينة.. يعني نقطة مهمة. في يهود اسرائيليين بالمولد بس ما بقى بيآمنوا بالافكار الصهيونية لسبب او لاخر متعلق فيهم.. بس اسرائيل هو الوطن الوحيد يلي بيعرفوه.. يعني ما رح يطلعوا من اسرائيل لمجرد عدم ايمانهم بالصهيونية.. لانو المفروض.. كدولة.. اسرائيل تكون منفصلة عن الايديولوجية. الايديولجية كانت عامل مساعد لبناء الدولة بس ما المفروض تضل مرسخة كل الوقت... بس الواقع مو هيك.. بقى اي يهودي غير صهيوني ما رح يتلقى نفس المعاملة... المستوطنين فوق القانون مثلا بكتير مواضع

ثم ما تنسى انو كل هالشي و الخدمات الامنية يلي عم تقدمها اسرائيل مو ببلاش... المصاري بتنضخ بالهبل لاسرائيل من قبل يهود الخارج... بدون هالمصاري اسرائيل مافيها تعيش. اي هادا كلو بيعني انو سياسة الدولة ما بقت تابعة لقانون الدولة.. بل للمصاري و للامن و للقضية يلي ذكرها ياس..

باختصار... نحنا ما منعرف شو عم يصير يوميا و شو نوع المحاكم و القوانين يلي عم تتطبق عمليا vs القوانين بالكتب... و كل الامثلة يلي انت طرحتها هي عبارة عن القشرة الخارجية الظاهرة للعيان فقط و بالامور الضخمة جدا... اما الخفايا فهي بنظري و اعتقادي رح تكون اكبر و بدها شخص مختص ليجبلك امثلة من المواقع و من صلب المجتمع... بس لحين هاد الوقت انا ما بظن انه هيك مقارنة ممكنة او إلها معنى.. انت عم تقارن دولتين وضعهم مختلف تماما...

يمكن لو تقارن اسرائيل بجنوب افريقيا السابقة كان بيكون احسن لانو النظام و الوضع مشابه

Elephant And Castle

15/06/2009, 11:49

انا شايف انو الفكرة و اضحة جدا بالموضوع ..و اكتر من هيك منطقية ايضا ,,و من خلال الردود الماضية ما لاحظت اي تناقض بين اراء الشباب ( على الأقل من خلال فهمي للنقطة يلي قاصدها و شرح طبيعة الكيان الصهيوني )

انا حبب بعد شوي عن اسرائيل و سوريا و احكي عن اماكن تانية كان من الممكن انو نستنتج العبر منها ...واضحة جدا ليش اتفكك الأتحاد السوفيتي و امريكا بقت ..لما كان المواطن بالأتحاد السوفيتي عم ينازع مشان لقمة عيشو و عم يتمنى الهجرة من وطنو مشان يخلص من القمع الشيوعي و استبداد الفكر الستاليني كان المواطن الأمريكي عم يعيش حالة من الرخاء حتى دول اوروبا الغربية كانت تحسدون عليه و حالة من الأمن و الليبرالية خلت الأمريكي يقدر النعمة يلي عايش فيها و زادت من ترابط المجتمع هنيك ....مجتمع فقير و مظلوم و ملتهي بلقمة عيشو و الحفاظ على نفسو و عائلتو خارج سجون الديكتاتور ..ما رح يستطيع ينتصر على شعب الى حد ما حر و مكتفي ماديا ...ليش ..شو الأسباب ,,عنجد ما بعرف ,,بس من كتر القاعدة هي انطبقت على كتير صراعات فصرت مقتنع انها قانون تاريخي ....يمكن لأنو متل ما ذكر ياس ..مجتمع بيحارب للفكر القومي ( ولو حتى الضيق ) بيبقى افضل من مجتمع بيحارب مشان الحفاظ على فكر شخصي (يلي هو الديكتاتور) ..لأنو الفكر القومي لمجتمع ما مهما كان ضيق بس قادر يستوعب حرية ابناؤو بحدود كبيرة جدا ..بعكس الفكر الديكتاتوري يلي مهما كان واسع بيبقى ضيق جدا على حرية ابناؤو ...
مشان هيك اسرائيل انتصرت على العرب مجتمعين

صديقي فيفا ...الأنظمة العربية الديكتاتورية بالوقت الراهن ..هي افضل هدية تقدمت لأسرائيل من وقت وعد بلفور ...هدا شي ما في اي شك ..

منتمنى من النظام السوري يلغي حالة الطوارئ و يلغي سجون الفكر الظالم و يسمح بأعادة بناء مجتمع قادر على مواجهة اسرائيل ,,,حاجتنا لسا ملتهيين برب اساسيات ,,الأنسان الحجري خلص منها من زمان

شكرا فيفا على الفكرة الحلوة من الموضوع هاد

ayhamm26

15/06/2009, 11:49

يا شباب طولو بالكن يعني ليش فهمتو انو المغزى من الموضوع الدعاية للديمقراطية الاسرائيلية

واضح انو هو صاحب الموضوع مو هدفو نقعد نتناقش اذا الديمقراطية باسرائيل حقيقية ولا لاء

النقطة اللي ما حدا برايي بيقدر يجادل فيها, انو هالمجتمع الصهيوني المسخ قدر رغم كل تناقضاتو يهزم محيطو العربي من 60 سنة لحد هلق.

في ناس رح تقول الدعم الغربي و المصاري اللي بتجين من يهود العالم وغيرو, بس كمان انو بين بعضن في قدر معين وواضح من احترام حقوق الانسان, الله وكيلكن يا جماعة مرة قابلت فلسطيني من عرب 48 قلي بالحرف الواحد انو بيحمد ربو لانو اهلو ما هربوا على الاردن او سوريا او لبنان لانو عم يشوف ويسمع شو عم يصير باخوانو الفلسطينيين وحتى من ابناء هالبلدان هي اللي عايشين هنيك.

يعني هي لحالها بتكفي, انو الصهاينة المغتصبين للارض وللتراث وللثقافة الفلسطينية بيعطوا عرب 48 حقوق ما بيسمع فيها حتى المواطن السوري, بتقولوا حقوق منقوصة في تمييز ضدن ,مواطنين درجة تانية في وفي ..........

بس بعد كل هالنواقص بيضل عندو حقوق عند اللي محتل ارضو اكتر من اي واحد فينا ببلدو, فشوفوا نحني لوين واصلين بالتطور.:pos:

Joe

15/06/2009, 17:01

يعني هي لحالها بتكفي, انو الصهاينة المغتصبين للارض وللتراث وللثقافة الفلسطينية بيعطوا عرب 48 حقوق ما بيسمع فيها حتى المواطن السوري, بتقولوا حقوق منقوصة في تمييز ضدن ,مواطنين درجة تانية في وفي ..........

بس بعد كل هالنواقص بيضل عندو حقوق عند اللي محتل ارضو اكتر من اي واحد فينا ببلدو, فشوفوا نحني لوين واصلين بالتطور.:pos:

ابو الشباب في شي اسمو سلسلة هرمية بالحقوق. المواطن السوري عندو كل الحقوق الطبيعية للإنسان إلا حق الاقتراع و الانتخاب يعني الحقوق السياسية و الفكرية.. بس حق انك تعيش و تروح و تجي و تنبسط و تسافر و تهاجر و ترجع و انك تغير دينك و و و كلها حقوق اساسية مصانة... ما حدا رح يجي يشـخ على سطح بيتك و يرمي عليكم زبالة و يكون فوق القانون لانه مستوطن او يهودي... و هادا جزء من المعاناة اليومية يلي بيعيشوها كتير من غير اليهود ضمن الاراضي الاسرائيلية.. هلق بيجي صاحب الموضوع بيقول عم نحكي على اليهود.. صح ما اختلفنا و هوl انا عم احكي على هي النقطة. او لما تفيق الصبح تلاقي الجرافات قلعت اشجارك من جذورها او هدمت بيتك.. الفكرة انو صحيح هي الممارسات مو على اليهود... بس دولة بتقوم بهيك ممارسات.. شو بيضمنلك انها فجأة رح تتحول لملاك انساني لما يصير الموضوع متعلق باليهود؟ متل ما حكى ياس... اذا اليهودي بيخرج عن البرنامج الاساسي تبع القضية يمكن يتعامل متلو متل الفلسطيني

ما بظن فيك تقول الفلسطيني بسوريا مانو اخد حقو و زيادة.. بيتعلم و بيروح على المدارس و الجامعات و بيحقله يتملك و يشتغل و كلشي.
بينما عرب48 لازم هلق يوقعوا على وثيقة ولاء ليهودية اسرائيل و بتمنعهم يحتفلوا بيوم النكبة.. مو احتفال احتفال يعني :pos: بس فهمت شو قصدي

خلاصتو... فكرة صاحب الموضوع واضحة و point taken ... اسرائيل عم تشتغل لمصالح قضيتها بالنهاية بينما موارد بلدنا ماشية لخدمة مصالح الفئات الحاكمة
بس انك تقول انو اسرائيل عم تشتغل لمصلحة يهود العالم.. فهادا مانو حكي صحيح و كتير يهود رح يختلفوا معك

syrian 1st

06/07/2009, 13:28

له يا أبو الفيف ما هيك كان العشم
وقت تحكي عن الكيان الصهيوني ما بتكو ن عم تحي عن دولة قد ما بتكون عم تحكي عن جبهة طويلة عريضة .

عيشة اليهود (واسمحلي سميهن اليهود ) مو عيشة لانوالواحدمنن مابيعرف منين بيطلعلوا فلسطيني ابن حلال يخرطوا هديك السكين(وهي عمتصير كتير)او متل حادثة التركس , اومتل ما عملوا احرار اللد من يومين.

بعدين كل هالحوافزللي م تحكي عنها تبويس رجلين مشان يضلوا(وفي منن ما عم يرضى).
احمدوا ربكن وخفوا عهالبلد يا جماعة ,والله الحرية مصيبةمع هيك شعب ,مو ناقصنا نصير متل لبنان (مع احرامي الكبير للبنانية) بس الحرية عندن ساوت 3الاف جبهة ضد التقسيم وعطت الحق لكل مواطن بتسكير الطرقات ولنزلة عالشارع بالسلاح بدون ما حدا يقدر يقلوا مااحلا الكحل بعينك.
القمع اذاكان موجود متل ما عمتقول فهو ضروري كتير لانو اللي ما بيردعوا حب البلد بدو ردع بالصرامي .
ومنشان برودة الحدود فهاد اكبر نصر انك قدران توقف (اسرائيل) عندحدا وتمنعها انوتتمقطع فيك كل ما اجا عبالو باراك يصيد بني ادمين متل ماكان صير من زمان .
ولا تنسى التجهيز السوري العسكري لاي حرب (اوتحريك للبقعة التاسعةمتل ما عمتقول).
وعلى كل ما بقول غير انو اذا في مشاكل او منغصات فما رح تنحل باللعي الفاضي تبع دعاة الثقافة والحرية المزعومة .وتعيش وتتغزل باليهود.

Nihal Atsiz

06/07/2009, 15:25

طرح سليم جدا وغاية بالمنطقية

وقبل ايام لفت انباهي بقناة الجزيرة خبر انو باسرائيل متظاهرين دروز وشركس عم يتظاهروا احتجاجا على اوضاعهم الاقتصادية المتردية وبعد المظاهرة قام رئيس الوزراء الاسرائيلي بنيامين نتياهو باللقاء مع وحهاء الدروز والشركس وأعلمهم أنه على دراية بالمشاكل التي تواجههم وأنه سيبذل "جهودا فائقة" لمساعدتهم.

هدول المتظاهرين مو يهود, الدروز هن عرب و الشركس هن مسلمين سنة وهم يتظاهرون ويعبرون عن اوضاعهم المعيشية المتردية بكل حرية وفوق ذلك كله رئيس الوزراء بحد ذاته يلتقي بهم بعد المظاهرة.
والسؤال هل حدا بسوريا يسترجي يرفع صوتو ليعبر عن وضعه المتردي من كل النواحي؟؟ ولك يا اخي ما بدنا لا الرئيس ولا غيرو يلتقي فينا , بس انو حدا يسترجي يعبر عن رأيو بدون خوف؟

wile

07/07/2009, 22:19

بالروح بالدم أفديك يا بشار!

ayhamm26

07/07/2009, 23:04

احمدوا ربكن وخفوا عهالبلد يا جماعة ,والله الحرية مصيبةمع هيك شعب ,مو ناقصنا نصير متل لبنان (مع احرامي الكبير للبنانية) بس الحرية عندن ساوت 3الاف جبهة ضد التقسيم وعطت الحق لكل مواطن بتسكير الطرقات ولنزلة عالشارع بالسلاح بدون ما حدا يقدر يقلوا مااحلا الكحل بعينك

اي قلتلي الحرية مصيبة, شلون بقى؟؟ طيب برايك ايمتى اخر حرب اهلية بسوريا كانت ؟ ايمتى كان الشعب بسوريا متل لبنان؟؟ هيك قدامك التاريخ من 1918 ل 1963 بحبش وردلي خبر.

الحرية شيئ سامي لايمكن تكون مصيبة , لانو اي تقدم حقيقي باي مجال لا يمكن يتم من دون حرية .

القمع اذاكان موجود متل ما عمتقول فهو ضروري كتير لانو اللي ما بيردعوا حب البلد بدو ردع بالصرامي .

.

نعم؟؟ شلون يعني يردعوا حب البلد؟؟ ليش دخلك القمع موجه للي ما بحبو البلد ولا للي ما بحبو بشار الاسد؟؟
بعدين ما في حدا ما بحب بلدو وحب البلد ما بدو صرماية, الا اذا كنت رابط حب البلد بحب الرئيس.

ومنشان برودة الحدود فهاد اكبر نصر انك قدران توقف (اسرائيل) عندحدا وتمنعها انوتتمقطع فيك كل ما اجا عبالو باراك يصيد بني ادمين متل ماكان صير من زمان .
ولا تنسى التجهيز السوري العسكري لاي حرب (اوتحريك للبقعة التاسعةمتل ما عمتقول).
.

اي دخيل الله على هالانتصار المبهدل , شو انت مانك سمعان بغارة دير الزور؟؟ بالطلعات الاسرائيلية فوق اللاذقية ب اغتيال عماد مغنية, بغارة عين صاحب , وهدا الشي اللي سمعنا في وما خفي اعظم , بقى شلون اسرائيل ما عم تتمقطع فينا؟؟ اي يا زلمة لبنان اللي منضحك علي صارت اسرائيل تحسبلو حساب اكتر مننا.

برودة الحدود يامعلم اتنين مستفيدين منن, اسرائيل اللي حولت الجولان لجنة للمستوطنين و جماعة الصمود والممانعة اللي اغلاق جبهة الجولان بالنسبة الن بيشكل اهم ضامن لوجودن.

وعلى كل ما بقول غير انو اذا في مشاكل او منغصات فما رح تنحل باللعي الفاضي تبع دعاة الثقافة والحرية المزعومة.

ايوه قلتلي لعي فاضي؟؟ اللي بطالب بحقو لعي فاضي و حرية مزعومة , لك شلون بتتوقع من شعب ذليل محكوم بالصرماية متل ما حضرتك عم تطالب ينتصر باي معركة؟؟

عوجا.........

ayhamm26

07/07/2009, 23:06

بالروح بالدم أفديك يا بشار!

الله حيو

وانا كمان بضم صوتي لصوتك وبفدي للمذكور, شاء من شاء وأبى من أبى :lol:

syrian 1st

09/07/2009, 16:52

اي قلتلي الحرية مصيبة, شلون بقى؟؟ طيب برايك ايمتى اخر حرب اهلية بسوريا كانت ؟ ايمتى كان الشعب بسوريا متل لبنان؟؟ هيك قدامك التاريخ من 1918 ل 1963 بحبش وردلي خبر

الحرية شيئ سامي لايمكن تكون مصيبة , لانو اي تقدم حقيقي باي مجال لا يمكن يتم من دون حرية .

ما هاد هو حكيي لولا قوة النظام و ضبطو للناس ( المناح و العاطلين ) كان صار عنا بدال الحرب الاهلية الوحدة عشرة لأنو الشعب السوري و الشعب اللبناني واحد و بدون بحبشة .

نعم؟؟ شلون يعني يردعوا حب البلد؟؟ ليش دخلك القمع موجه للي ما بحبو البلد ولا للي ما بحبو بشار الاسد؟؟
بعدين ما في حدا ما بحب بلدو وحب البلد ما بدو صرماية, الا اذا كنت رابط حب البلد بحب الرئيس.

ليش كل تعب الرئيس و تحمله للضغوط الخارجية و الداخلية مو مشان البلد ؟؟؟

و لاتنسى انو اغلب المعارضة للحكم طابعها مذهبي يا اما ناس كل واحد منهن بدو دولة عكيفو و الدليل الجماعات المعارضة اغلبها اصولي .

اي دخيل الله على هالانتصار المبهدل , شو انت مانك سمعان بغارة دير الزور؟؟ بالطلعات الاسرائيلية فوق اللاذقية ب اغتيال عماد مغنية, بغارة عين صاحب , وهدا الشي اللي سمعنا في وما خفي اعظم , بقى شلون اسرائيل ما عم تتمقطع فينا؟؟ اي يا زلمة لبنان اللي منضحك علي صارت اسرائيل تحسبلو حساب اكتر مننا.

اصلا غباء اسرائيل و اميركا توضح بهالغارات و الطلعات النادرة و نحنا اكتر مين استفاد

بغارة دير الزور كانو اربع مروحيات بأبسط سلاح دفاع جوي بينزلو بس كل العالم اضطر يجي معنا ضد اميركا بهالشي اما مشان قصف ( الكبر ) فكان بدون يانا نرد مشان تثبت علينا تهمة النووي

بعدين ما عم اضحك علبنان بالعكس انا بفتخر بالمقاومة بكل اطيافا , وخوف اسرائيل من المقاومة اللبنانية اجا من دعم سوريا و ايران يعني نحنا بس بشكل غير مباشر

برودة الحدود يامعلم اتنين مستفيدين منن, اسرائيل اللي حولت الجولان لجنة للمستوطنين و جماعة الصمود والممانعة اللي اغلاق جبهة الجولان بالنسبة الن بيشكل اهم ضامن لوجودن.

و نحنا كمان مستفيدين من برودة الحدود لأنو اي تحريك لأي قطعة عسكرية سورية بتقوم الدنيا و ما بتقعد , و اي مسؤول غربي بيجي بيعلن وقوف بلاده مع سوريا لاستعادة الجولان .

و هيك نحنا بيحقلنا ادام العالم نمتلك سلاح بشكل علني و نحمي حالنا و نساعد حلفاؤنا

ايوه قلتلي لعي فاضي؟؟ اللي بطالب بحقو لعي فاضي و حرية مزعومة , لك شلون بتتوقع من شعب ذليل محكوم بالصرماية متل ما حضرتك عم تطالب ينتصر باي معركة؟؟

عوجا.........

شلون محكوم بالصرماية و ذليل ؟ انا قلت انو اللي ما بيحب بلدو ( و رئيسو اللي بيمثل البلد و كرامتها ) هو الللي بينحكم بالصرماي لحتى مو كل ما طلع ببالو يتسلى يعمل مظاهرة ,والحرية عم تتمارساذا قلت اي واذا قلت لاء , ما الجرايد مليانة علاك فاضي ,شي عن جورة بشارع باخر الدويلعة وشي عن سيارة حكومية معطلة ما الا شغل
جالسة وحياتك جالسة بس انتو بدكن تشوفوها عوجا , أخي شوفوها متل ما بدكن ,لكم دينكم ولي ديني

تحيا سورية

wile

09/07/2009, 23:52

أنا سوري آه يا نيالي