بداية يجب توضيح أنه وبنص الموضوع الأساسي هنا سأحاول أن أتجنب إبداء أي رأي شخصي رغبةً مني أن تكون المشاركات هي التي تعبر أن الأراء الشخصية:

سنناقش الموضوع على صعيد الأوضاع الداخلية والخارجية..

إستلم الرئيس بشار الأسد الحكم في العام 2000 بعد وفاة والده الرئيس حافظ الأسد واعداً بالعديد من الإصلاحات على الصعيدين الداخلي والخارجي... فمالذي حصل من يومها وحتى اليوم:


داخلياً:


إبتدأ عهد الرئيس بعدة خطوات بعثت الأمل في نفوسنا كسوريين أن هناك إصلاح وتطوير حقيقيان يلوحان في الأفق ومن هذه الخطوات أذكر:


رفع شعار مكافحة الفساد والشفافية ومحاسبة بعض النافذين في الحكومة على أعمالهم...

السماح لبعض هيئات المجتمع المدني والمنظمات الحقوقية بالعمل والبدء ببعض النشاطات العلنية...

عدة زيادات في الرواتب والأجور للقطاعين العام والخاص بنسبة 30% لكل زيادة تقريباً...

بعض الإصلاحات الإقتصادية كالترخيص للمصارف الخاصة وشركات التأمين وإنشاء سوق للأوراق المالية وإصدار القوانين لتشريع أعمال صرف العملات والحوالات الداخلية والخارجية...


الترخيص لبعض وسائل الإعلام "المقروأة والمسموعة" للعمل في سوريا...

وغيرها العديد من الخطوات...


وسأترك مناقشة هذه الخطوات التي لم يكتمل البعض منها وتم التراجع عن بعضها الآخر وعاد الوضع ببعضها إلى أسوء من ماكان "رأي شخصي" للمداخلات...


خارجياً:


الإستمرار بدعم الفصائل المقاومة لإسرائيل كحزب الله وحماس...


تقوية الحلف الإستراتيجي مع إيران والذي أزعج البعض من العرب لعدة إعتبارات...الإستمرار في لعبة حافة الهاوية مع الغرب وأمريكا...


اللعب ببعض الأوراق الإقليمية "فلسطين.العراق.لبنان.." لتحقيق بعض الطلبات التي لاتكون واضحة المعالم غالباً بالنسبة للشعب السوري...


وغيرها...


سنرتكز بالنقاش على هذه النقاط وغيرها لنقيم مالذي أثمر منها ومالذي لم يثمر ومالذي عاد بالفائدة على الوطن ومالذي عاد بالضرر... حتى نستطيع أن نعرف أين هي سوريا في عام 2009 .. ولنعرف المؤيدين لهذه الحكومة ماهي أسبابهم والمعارضين ماهي أسبابهم...


هامش:

قررت مسبقاً وبعنوان الموضوع أن كل أطراف الحوار ومهما بلغ إختلافهم في الرأي هم أشخاص وطنيون محبين لبلدهم... فأرجو الإلتزام بهذا المبدأ في النقاش من الجميع...




ودمتم.

داخلياً:

إستمر قانون الطوارئ ولم نشاهد أي تعديل أو تغيير في سلوك أجهزة الأمن اتجاه المواطنين وخاصة منهم المثقفين والمهتمين في الشأن العام... بل استمرت الاعتقالات وارتفعت وتيرتها... بل وتم اعتقال أغلب من شارك في أي من منظمات المجتمع المدني أو الهيئات الحقوقية " ربيع دمشق .اعلان دمشق.منتدى الأتاسي.." واعتقل كل من تجرأ على توقيع أي بيان يدعو لتغيير ديموقراطي أو رفع حال الطوارئ وحتى إلى تصحيح العلاقة بين سوريا ولبنان... حتى ظننا أن نشر جو التفاؤل في العام 2000 كان كميناً محكماً من أجهزة الأمن... أما المواطن العادي فبقي تحت مفاعيل قانون الطوارئ وتغييب القضاء وسيطرة أجهزة الإستخبارات على كل مناحي حياته ومفاصل وطنه...

أما على صعيد الحياة السياسية مجلس الشعب استمر "إنتخابه" بنفس الطريقة الهزلية واستمر دوره على طريقة مسرح الدمى... واستمر رموز السلطة في مراكزهم"سليمان قداح.مصطفى ميرو.." ومنهم من ارتقى في المركز "فاروق الشرع.ناجي العطري.." ومنهم من أقصي وأعيد لمنصبه أو أعلى "نجاح العطار .عبدالله الأحمر.." ومجلس الوزراء استمر بعيداً عن مراقبة الشعب وبعيداً عن مطلباته... باختصار استمر نفس النهج المتبع منذ 40 عاماً برموزه أو بروحه...

إقتصادياً وبعد كل التشريعات لاحظنا أن بعض الأٌقرباء والمنتفعين تابعو سيطرتهم بل ورسخوها على كل القطاعات الإقتصادية في البلد "إتصالات .نفط. مصارف.سياحة.أسواق حرة.نقل جوي وبري وبحري..." وظلوا خارج أي نطاق للمحاسبة ...

أما بالنسبة لدخل المواطن فظل وبعد الزيادات في الأجور هو الأدنى في المنطقة رغم وجود كل الموارد الطبيعية والاقتصادية في سوريا والتي تتيح ان يكون دخل الفرد في سوريا أعلى من دول الجوار... ورافق هذه الزيادات دائماً إرتفاع في الأسعار أفقد هذه الزيادات أي جدوى...

أما الإعلام المقروء والمسموع والمرئي فقد بقي موجهاً ومحاصراً ومراقباً ووسائل الإتصال وتبادل المعلومات كالإنترنت بقيت مقيدة تحت سوط ثالث أسوء رقابة في العالم "حسب أخر تقرير للأمم المتحدة" فأغلب المواقع مراقبة ويستمر الإغلاق لأي موقع قد يحتوي أو لايحتوي على أي كلمة غير موجهة كماتريد أجهزة الأمن... ونذكر من المواقع التي حجبت بأخر سنوات " فيس بوك. ويكيبيديا.أغلب مواقع الصحف العربية والعالمية.يوتيوب...."

خارجياً:

إستمرت حالة اللاحرب واللاسلم مع إسرائيل واستمرت حجة دولة المواجهة "التي لم تأتي منذ36 عاماً" والتي تنعكس سلباً على حياتنا...

دعم حزب الله اللبناني والذي استعاد أرضه المحتلة لكن نحن من يعيد لنا أرضنا؟؟

تقوية الحلف "الإستراتيجي" مع إيران على حساب العلاقات العربية العربية والمحور "المصري السوري السعودي"...

استمرت طريقة التعاطي مع الغرب يوم منسب ويوم منمدح والشعب يصفق في كلتا الحالتين... فلم نستفد من الغرب ولم نستفد من العرب...

ولي عودة للتوسع بالملف الخارجي.

بداية شكرا على هذا الموضوع

في ظل نظام بشار الأسد أصبحت الأوضاع كافة داخلية و اقتصادية و خارجية أسوء مما كانت عليه في تسعينيات القرن الماضي اي اواخر عهد حافظ الأسد.


فعلى الصعيد الداخلي بقي قانون الطوارئ وازدادت الاعتقالات التعسفية والجديد الخطير في الأمر هو نصب النظام الافخاخ للايقاع بأبناء الشعب السوري, فعلى سبيل المثال قبل فترة اصدرت اجهزة النظام بيانا دعت فيه جميع المغتربين السوريين المنفيين او الذين اتخذوا مواقف معارضة للنظام الى العودة الى الوطن الامن وعليهم الامان, فصدق البعض هذا البيان وعادوا واذ بالمخابرات تعتقلهم في المطار.


اضافة لذلك يتبع النظام السوري الحالي سياسة الكذب لتضليل الخارج وايقاف الحراك الداخلي الديمقراطي بانتظار التطبيق الذي لن يكون.

فعلى سبيل المثال دائما يردد رموز النظام بما فيهم بشار في المقابلات التلفزيونية والصحفية عندما يتم سؤالهم عن اوضاع الحريات في سورية ان هناك قانونا للأحزاب سيتم اصداره قريبا, طبعا هادا الحكي من 2005 ورغم ان هذا القانون في تقييد كبير وشروط تعجيزية فلم يتم اصداره حتى الان ولن يتم.

سمح بشار الأسد لبعض منظمات المجتمع المدني ببعض الانشطة العلنية وفي احدى مقابلاته مع احدى القنوات التلفزيزنية الاجنبية وردا على سؤال الصحفية عن وضع الحريات في سوريا قال بشار الأسد ان هناك حياة ديمقراطية حقيقية في سورية والدليل ان منتدى الاتاسي برئاسة سهير الاتاسي يعقد المؤتمرات والندوات في قلب العاصمة دمشق بدون اي مضايقة.

وبعد هذه المقابلة بأيام تم اعتقال جميع أعضاء الأتاسي واغلاقه نهائيا.

في عام 2004 اجرت قناة تلفزيونية امريكية مقابلة مع بشار الأسد حيث قال فيها ان الانتخابات الديمقراطية الحرة قادمة الى سورية وانا ممكن ان اترك منصبي في اي لحظة, وطبعا كلنا عايشنا هذه الانتخابات الحرة عام 2007 !!!
////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)






اما من ناحية الاعلام الخاص فإن هذا الاعلام في رأيي هو مصيبة اخرى على الشعب السوري.
فعدا انه يطبل و يزمر للنظام اكثر من الاعلام الحكومي, فإنه أيضا يعطي للعالم الخارجي صورة كاذبة غير حقيقية عن واقع الشعب السوري, فمن يتابع قناة الدنيا او المشرق يرى ان معظم البرامج تهدف لتصوير ان الشعب السوري يعيش حياة ترفيهية يومية فالشباب السوري كل يوم بعد العودة من جامعاتهم ( التي اصبحت حلما بفعل العلامات العالية ) يذهبون الى night club ( من كتر مو جيوبنا مليانة مصاري !! ) للرقص والترويح عن النفس او يحضرون حفلات لمطربين سوريين او يشاركون في مخيمات للكشافة ( لأنو عندنا وقت نحن !! ) هادا عدا مسابقة ملكة جمال سوريا والبرامج اليومية عن shopping وامور اخرى كثيرة.

وانا لا اقول ان هذه الاشياء غير موجودة نهائيا , نعم هناك طبقة من المجتمع السوري تعيش برفاهية ولكنها قليلة جدا لا تقارن مع الاغلبية التي لا تجد لقمة العيش , ومن يتابع هذه القنوات الخاصة من العرب غير السوريين او الأجانب حقيقة سيظن ان الشعب السوري عايش بألف خير.






وهناك ايضا اضطهاد شديد يمارس على الاقليات القومية الغير العربية في سورية من أكراد وتركمان.
فأنا كتركماني سوري ممنوع علي حتى تشكيل جمعية خيرية لمساعدة الفقراء من ابناء قوميتي وممنوع تأسيس مراكز لتعليم اللغة التركمانية حفاظا عليها من الضياع وكل شيء تقريبا هو ممنوع , كذلك حال الأكراد, اما باقي الاقليات القومية من ارمن وسريان و شركس فهم يتمتعون بقدر من الحقوق القومية و الثقافية وهنا يحق لي ان أسأل سؤالا , لماذا يسمح النظام للسرياني و الارمني والشركسي ان يشكل مدارس تدرس بلغته الام , فيما يمنع التركماني و الكردي من ذلك؟؟؟؟





وهناك امور كثيرة اخرى على الصعيد الداخلي من قانون الطوارئ الى الاعتقالات التعسفية اعود اليها فيما بعد.


على الصعيد الاقتصادي:
ايضا الأمور تسير من سيئ لأسوء فالدخل الفردي هو الأدنى في المنطقة والفساد في زيادة والبطالة ترتفع معدلاتها ثم تأتي غلاء الأسعار لتكون رصاصة الرحمة على المواطن السوري, ففي تقرير منشور على موقع سوريا نيوز ( على فرض ان الارقام صحيحية وان كنت اظن انها اعلى من ذلك بكثير ) ان نسبة البطالة عام 1999 كانت 8,2 % ارتفعت عام 2004 الى 12,3 % وان 35 % من خريجي الجامعات السورية يعملون في مجالات لا تتناسب مع اختصاصاتهم مثل قيادة التكاسي والسرفيس او العمل في محلات الالبسة!!

////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -/////////////// (////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////)







ويتحفنا مؤيدوا النظام بأخبار كل فترة عن اعتقال الموظف الفلاني واخر علاني بتهمة الفساد وتلقي الرشاوي, ولكن هذا ليس علاجا على الاطلاق فالنظام يقوم بتقديم الفاسدين الصغار قرابينا ويغض الطرف عن الفاسدين الكبار لأنهم من صلب النظام.
ان الفساد في سوريا هو ظاهرة سياسية بامتياز ولا يمكن حلها الا ضمن اطار حل سياسي شامل من ازالة لقانون الطوارئ الى فصل السلطات الثلاث و والسماح للسلطة القضائية بممارسة عملها بعيدة عن النفوذ و التأثير السياسي.







على الصعيد الخارجي:

علاقات سورية اصبحت سيئة مع معظم دول العالم في عهد بشار الاسد عكس ما كان عليه الحال في عهد حافظ الاسد وان كان هناك دول لديها علاقات جيدة مع سورية فانما ذلك لمصلحتها مثل تركيا التي وجدت في سورية سوقا كبيرا لبضاعتها من البسة و اغذية واجهزة الكترونية ساعدها على الرفع من مستوى الاقتصاد التركي كثيرا.
النظام السوري نعم يدعم الميليشيات في فلسطين ولبنان ولكن ليس ايمانا منه في حق الشعوب بالحرية انما لتحسين شروط التفاوض مع اسرائيل و الدول الكبرى و لو اراد دعمها فعلا من اجل تحرير اراضيها المحتلة لكان الاجدر به تحرير الجولان قبل التوجه للبنان و فلسطين وكانت النتيجة خراب بلد جميل مثل لبنان و حرب اهلية في فلسطين , فبدل ان يوجه سلاح حماس الى اسرائيل يتم توجيهه الى شركاء الوطن وكذلك سلاح حزب الله , فأينما يتدخل النظام السوري حاليا تجد الحرب الاهلية و الميليشيات و الخراب.


　
　


انا من ناحيتي معياري في حدوث تقدم في الاصلاح الداخلي او عدم حدوثه هو مقدار الجرأة او الشجاعة التي تطرأ على شعبنا.
انا عايش بسوريا و مازلت الى حد الآن أشعر بوجود رعب هائل لدى الشعب من السياسة و المخابرات بعد 9 سنوات من حكم بشار
يعني لهلئ ما حدا بسترجي يعلي صوتو وهو عم يحكي بالسياسة , ولك بالله قديش نسبة المعارضين للنظام بمنتدى اخوية اللي عم يكتبوا من داخل سورية؟؟؟
اكيد قليل جدا وهادا بدل على خوف كبير وعلى عدم وجود أيتقدم في مجال الحريات و الاصلاح.





　

حبب قول شغلة عن الحوار نفسو قبل ما ندخل بالتفاصيل ..انا بميز بين الحور يلي بيصير هون بأخوية بين الموالين و المعارضين و الحوار يلي الكل بطالب في بين الحكومة السورية و المعارضين ...الحوار الأول ممكن جدا و مفيد للمتحاورين بما انو بظن الموقع هاد بيشمل على عينة من السوريين اصحاب عقل منفتح سواء كانو معارضين او موالين ,,
بس الحوار التاني غير ممكن ابدا بما انو في شي اسمو قانون طوارئ و بما انو الحاكمين بسوريا اصحاب عقليات ما بتتقبل الأنتقاد و عندون استخفاف غريب بالمواطن و حقوق المواطن و بنا انو ايضا ما في شخصيات داخل سوريا او حتى خارجها قادرة انو تقوم بالحوار باسم المعارضة و هدا بيعود لأسباب منها غياب النشاط السياسي بسوريا لفترة طويلة جدا جدا بسبب الأحتلالات المتتالية و حكم العسكر من سبعين سنة للوقت هاد ...يعني انا ما بشوف انو في امكانية للحوار مع الحكومة بظل الوضع هاد ,,و انا شخصيا برفض اي شخص يحاور بالنيابة عني مع الحكومة لأنو الحوار هاد رح يكون مسخرة و معروفة نتائجو مستقبلا ...

قبل ستين سنة كانت تسعين بالمية من دول العالم عم تعيش تحت حكم ديكتاتوري ...طيب ..كام دولة من هدون طردت الطغاة من مركز المسؤلية عن طريق الحوار ...ولا دولة !! كلو اخد حريتو بأيدو ...ليش !! لأنو ما في ديكتاتوري ممكن يخوض حوار مع رعيتو اذا بالأساس هو مفكر حالو اله عليون ...هلئ يمكن بقي شي عشر دول بالعالم عم تعيش تحت حكم ديكتاتوري و سوريا وحدة منون اذا ما اسوؤن ! لهيك بشوف انو الحور مو هي الطريقة للتعامل مع اشخاص مفكرين حالون آلهات و تاريخون شي اسود ..شو هي الطريقة ..صار هيك موضوع تاني ...

عندي فقط تعليق تاني على كلمة معارضة وطنية و موالاة وطنية ..الصفة الوطنية بتنوصف فيها المعارضات و الموالات بالدول يلي الخلاف بين المعارضة و المولاة ما بتكون على هوية الدولة او الوطن . بسوريا بظن انو الخلاف بين المعارضة و الموالاة مو على سياسات..بل على اساسيات ! ..لهيك صفة الوطنية مو مكن تجمع المعارضة مع الموالاة مع بعض .اكتر من هيك يمكن صفة الوطنية ما تنطبق حتى ولا على اي طرف من الطرفين !! لأنو صرنا بوضع من غير الممكن انك تبقى محافظ على وطنيتك طول الوقت اذا بدك تمارس الموالاة او المعارضة و كمان الشي هاد بيعود للأسباب يلي كلنا منعرفها و بتتعلق بغياب العمل السياسي من قرون ...

في عبارات منسمعها مثلا من بعض المواليين متل انو الشعب المتخلف هاد ما بتلبقلو الديمقراطية !! ,,,,يعني انو نوصل لهيك مستوى بدل انو نحنا بعمرنا ما عرفنا كيف نمارس اللعبة الديمقراطية ...و انا ما بلوم يلي بقول هيك شي و كمان ما بلوم الشعب يلي ما بتلبقلو الديمقراطية !!

نقطة اخيرة ....لما اهل البلد ما بكونو مارسو الدور التاريخي المطلوب منون لأنشاء هوية معينة للبلد بتشمل كل اهلها بدن استثناء الأحفاد يلي هني نحنا ما رح نقدر الوطن متل ما بيتوجب و ما رح نعرف نحافظ عليه ....لازم نحنا السوريين قبل الحوار نبني هوية شاملة للوطن ..اجتماعيا و فكريا و سياسيا منتفق عليها بعدين مندخل بالحوار ...هيك كل الدول الديمقراطية عملت حتى وصلت للمرحلة المتقدمة

اخوتي الكرم سلام من الله عليكم ورحمته والبركات

اول شي في مجال حقوق الانسان يعني شو بئي احسن من هيك حقوق لك حتى سمعت سمعة انو بدون يفتتحو جمعية حقوق الحيوان ( الانسان يلي اكل هوا وساكت وبيشتغل متل الحمار 16 و 18 ساعة باليوم ) .

تاني شي الدخل ( اليوم قوم اسئل مواطن قلو بدنا نعمل زيادة رواتب بتلاقيه عمل اجتماع مجلس الادارة الالهية من الكفر طبعا المجلس بيضم الله و طاقم الانبياء و طاقم الملائكة ) ليش بدنا الزيادة الشعب عم يكب المصاري كب ما بيعرف وين بدو يحط هالمصاري ولا وين يصرفها يا زلمة ارحمو المواطن من المصاري الزايدة .

الاصلاح السياسي : مابقي اكتر من هيك اصلاح مابقي شي اسمو موالاة كلو معارضة بقي اكتر من هيك اصلاح معهون معهون عليهون عليهون شوبكم الناس معبية الشوارع من المظاهرات والاضرابات .

اما الاصلاح الاقتصادي يا زلمة لا تحدث اي اصلاح حيكنا بالفقرة السابقة الناس تاركة اشغالها وعاملة اعتصامات بالشوارع يعني اي اقتصاد بدو يتحرك لذلك يجب على النظام السوري قمع المعارضة من اجل اصلاح الاقتصاد يا جماعة افهموهم بئا شوبكم نازلين سلخ بهالنظام ارحمو النظام شوية .

بعدين عن الفساد يعني مابقي شي اسمو فساد غير الصغار لانو هدوليك الحيتان عم يتحاكمو بمحاكم سرية مشان ما يصير عليهون اي ضغوطات دولية يعني بتعرفو انتو القضاء السوري نزيه .

لك شو بدنا نحكي شو بدنا نحكي هالمرة بدي احكي جد بئا
على الصعيد الدولي
النظام عم يلعب لعبة قذرة صعب كتير انو يتم الضغط عليه
يعني العلاقات السورية الايرانية وبعدين اصبح النظام السوري هو الوسيط الحصري بين النظام الايراني وامريكا

اما مع امريكا فكان ادخال تركيا على خط المفاوضات السرية مع اسرائيل يعني مشان يقولو لاميركا روحي هويها السلام مو بس عن طريقك انتي وهي اسرئيل باعتك يا امريكا

وطبعا اسرائيل الها حصة من اللعبة يعني الفصائل الفلسطينية وحزب الله وخاصة لما سوريا بتقول نحتفظ بحق الرد هي بتعني اني ارد السوري رح يكون قوي بس من جهة الفصائل او من جهة حزب الله .

طبعا نسينا انو سورية يمكن تنازلة عن اراضيها المغتصبة من قبل تركيا ( لواء اسكندرونة - غازي عنتاب - كليكيا ومرسين وكتثير من الجنان السورية هناك )

أنا بإنتظار أراء الشباب يلي حاملين لواء الدفاع عن النظام لنعرف رأيون بالنقط المطروحة ولنعرف وين عم نغلط نحنا بتقييمنا لأداء الحكومة وتحديداً بالملف الداخلي...

بالنسبة للحوار يا اصدقاء أنا برأيي يجب أن يكون ايجاد حلول أكثر من توصيف للحالة

يعني الوضع بسوريا لا يخفى عن المواطن السوري و لا عن المراقب الخارجي

ننحدد نقاط الضعف و من ثم نتكلم عن الحلول ...هيك النقاش بيكون مثمر

لنا عودة

أعزائي وأخوتي

ما تركتوا شي الواحد يحكي وانا عنجد دمعت عيوني لما قريت المكتووب وكنت متمني اتعرف عالموقع من زمان

أعزاءي ما بتوقع حدا من طرف النظام يرد بعد الاحصائات اللي ذكرتوها لاني لغة الارقام بتحسم كل شي ومشكوورين عالجهد الي عبتعملو ابهال المنتدى .

أنا من رايي الاخ انوا نبللش نشووف شو هي الحلول او نتناقش عن سينا ريوهات ممكنة الحدوث

يعني ممكن نتخيل نطرح سؤال بحياتوا ما صار بسوريا شو بتعمل لو كنت رئيسا " يعني يا شباب بعتقد بخياتووا ما انطرح علنا هيك سؤال " ونبدا نشووف هالحلم .

أو نتخيل اشخاص معروفين عالساحة السورية واللي بعادة عن الحكومة الخالدة وننتهك حريتون ولو انا بفضل الاقتراح الاول
وسعيدة شباب :yahoo:

بالنسبة للحوار يا اصدقاء أنا برأيي يجب أن يكون ايجاد حلول أكثر من توصيف للحالة

يعني الوضع بسوريا لا يخفى عن المواطن السوري و لا عن المراقب الخارجي

ننحدد نقاط الضعف و من ثم نتكلم عن الحلول ...هيك النقاش بيكون مثمر

لنا عودة

اي ما بدك يا صديقي بالاول لحتى نتفق على المشكلة واسبابها بعدين لنتكلم عن الحلول

شو رايك انو في ناس بتنكر كل هالتوصيف اللي الشباب وصفوا للواقع المر في سوريا , وبتعتبر انو سوريا ماشية على الطريق الصحيح وكل شي تمام

شو رايك انو في ناس بتعتبر انو كل هالفساد والقمع والفقر هي شغلات بسيطة

شو رايك انو في ناس بشوفوا انو الحل الوحيد انو يعطوا السيد بشار الاسد فرصة اولى وتانية وفرص لانهائية لحتى يطبق برنامجو الموعود اللي ما رح يتطبق

يعني بالاول خلي المؤيدين للنظام وللوضع الحالي يشرحولنا شو راين باللي حكوا الشباب هون وليش هني رغم هيك حالة مزرية وصلها الوطن مؤيدين لاستمرار الحال على ما عليه , وبعدها ممكن ينحكى بالحل

أنا بالبداية غير معارض وغير موالي وبعتبر أنو الرئيس والحكومة وحتى أدنى موظف بالدولة هم مسخرون لخدمة المواطن وهاد شي بظن أنو عمبالغ في كتير وقريب جدا من الماركسية .
ولكن على اعتبار أننا نريد نشر الديمقراطية في سوريا أليس علينا أولا من نشر ثقافة الديمقراطية والحريات الشخصية ونشر مفاهيم الديمقراطية ومبادئ الديمقراطية بين طبقات الشعب التي في معظمها تعتبر من الطبقة الوسطى والمتدنية بالنسبة للحالة التعليمية
هل سيكون هناك ضمانات للأقليات الدينية في بلدنا وهذا هو الوتر الحساس الذي ستضرب عليه معظم الدول الخارجية وهل سيكون هناك ضمانات بعدم قيام النظام الديمقراطي الجديد بتقديم التنازلات لإسرائيل أم أننا سنقع تحت نظام دكتتوري آخر كما وصفتموه
من يضمن أنه لن يكون هناك انقسام وحرب أهلية وشخصيات متنفذة جديدة حتى ولو كانت منتخبة انتخاب ديمقراطي
إننا يا جماعة في بلد عربي ووطن عربي أصبح الإنقسام فيه ركن من أركانو وجزء منو متعدد الطوائف ولا أحد يتقبل وجود الآخر والكل على راسن ريشة
وإذا أنا وانت متفاهمين على شي اسمو ديمقراطية وكيفية ممارسة الديمقراطية تأكد أنو بنفس الوقت في كتير ناس من خارج حدود النظام ما عندن أي تفهم لهاد الموضوع
تخيل أنو لحد اليوم أنو في بعض الشوارع ما عندي الشجاعة أنو مر فيها بس لأنو أنا من غير طائفة واعتبر كافر بنظرهم
فلمن منتخلص من سياسة التكفير لبعضنا ومن الكره والحقد ساعتا تعالو حكوني بالديمقراطية
أما موضوع ما انجز على عهد بشار الأسد فأنا بعتبر أنو مقبول إلى حد ما
فبالوقت اللي كانت في السيارة حلم أو حكر على طبقة معينة صار أي مواطن يقدر يشتري سيارة يلي بيدل أنو الوضع الاقتصادي مقبول وبظن أنو صار في شوية انفتاح على سوريا أكتر من عهد حافظ الاسد من قبل الدول الأوربية وخاصة بعد أزمة لبنان وصار في فهم مختلف شوي لقضايانا
وأكيد أنو في كتير أمور بحاجة لإصلاح وترميم
وفي موضوع حابب عرج علي وهوي موضوع خدمة العلم يلي تعتبر من الأمور المقدسة بالنسبة لنا لكن أنو أنا بعتبر أنو الواحد في يحمي وطنو مو بس بالسلاح وبالعلوم كمان يعني لمن بيجي شب متخرج جديد من الجامعة عمرو 24 سنة على اعتبار أنو ما وقف ولاسنة بالجامعة وبعد عندو سنتين عسكرية وبعد\ا سنتين يد\ور على شغل وخمس سنين لحتى يقدر يأمن بيت بيكون صار عمرو شي 53 سنة هي إذا فرضنا خلو حياته من المطبات
ويلاااااااااااااااه أكتر من القدر الله ما مسخ

تحية للكل وخاصة للأخ فادي صاحب الموضوع :
بداية عندي اقتراح كتير صغير الك فادي وهوة انا شايف انو الموضوع كتييييير كبير يعني اذا الواحد بدو يرد ع كل النقاط بدو جريدة وشفنا هالشي بالردود السابقة ف شو رأيك بما انك صاحب الموضوع تخصص نقطة وحدة للمناقشة لكل اسبوع مثلا وبالاسبوع التاني بننتقل لنقطة تانية بحيث انو انت اللي تحدد النقاط اسبوعيا وبالنهاية بنوصل لخلاصة عن الموضوع ككل ، وشكرا الك مقدما ، طبعا هادا مجرد اقتراح .
بالعودة للموضوع ، عم لاحظ في كتير اخوان (بهالموضوع ومواضيع سابقة ) بيتهموا المواطن السوري انو ما عندو ثقافة ديمقرطية وما بيعرف يمارسا (انا ضد ) طيب كيف رح تجي الثقافة الديمقراطية والبلد محكوم بقانون طواريء من 45 سنة والسجون والمعتقلات فاتحة أبوابا لكل واحد بيفتح تمو ضد النظام مهما كبر أو صغر وكلنا شايفين الكتاب والمفكرين السوريين المعارضين شو صاير فيون يعني خلال 9سنين ما شفنا أي تقدم بمجال حرية الرأي.
معيشيا : صح ما عدنا نصف ع الدور مشان السمنة والزيت وكيلو الخبز وصار في سيارات بالبلد بس بمقارنة بسيطة مع الدول المجاورة والدول الفقيرة البعيدة بنلاحظ انن قطعوا اشواط احسن مننا بكتير وهالشي بيعني نحنا رجعنا لورا ما تقدمنا ومازلنا الأقل على مستوى دخل الفرد السنوي بمنطقتنا .
سياسة خارجية وبالرغم من اللعب بالأوراق اللبنانية والعراقية والفلسطينية لكننا الدولة الأكثر عزلة بالمنطقة .

ولنا عودة تفصيلية .
تحياتي:D:D:D

في عبارات منسمعها مثلا من بعض المواليين متل انو الشعب المتخلف هاد ما بتلبقلو الديمقراطية !! ,,,,يعني انو نوصل لهيك مستوى بدل انو نحنا بعمرنا ما عرفنا كيف نمارس اللعبة الديمقراطية ...و انا ما بلوم يلي بقول هيك شي و كمان ما بلوم الشعب يلي ما بتلبقلو الديمقراطية !!

تحية طيبة..
- لما بيكون الشعب "متخلف ديمقراطياً" يعني ما بيفهم شو بتعني كلمة الديمقراطية وأسلوب ممارستها لذلك يفضل توعية الشعب أولاً بـ"الحوار" معه قبل توجيهه للنزاع مع الفئة الحاكمة بالقوة بغض النظر إذا كان "قبل ستين سنة كانت تسعين بالمية من دول العالم عم تعيش تحت حكم ديكتاتوري ...طيب ..كام دولة من هدون طردت الطغاة من مركز المسؤلية عن طريق الحوار ...ولا دولة !! كلو اخد حريتو بأيدو ...ليش !! لأنو ما في ديكتاتوري ممكن يخوض حوار مع رعيتو اذا بالأساس هو مفكر حالو اله عليون"..
- النقطة الثانية بظن ما في شي اسمو "حزب الموالاة" لأنو اللي شايفو انا انو هدول الناس كمان بدون تغيير وهنن على وعي تام بالفساد المستشري بالمؤسسات الحكومية لكن يبقى الأمر دائر حول أسلوب هذا التغيير بظن انو هادا هو الخلاف بين الحزبين على طرفي النهر رغم اني ما بشوف انو في خلاف جوهري بالأساس..
مستمع أنا..
شكراً..

تحية طيبة..
-- النقطة الثانية بظن ما في شي اسمو "حزب الموالاة" لأنو اللي شايفو انا انو هدول الناس كمان بدون تغيير وهنن على وعي تام بالفساد المستشري بالمؤسسات الحكومية لكن يبقى الأمر دائر حول أسلوب هذا التغيير بظن انو هادا هو الخلاف بين الحزبين على طرفي النهر رغم اني ما بشوف انو في خلاف جوهري بالأساس..
مستمع أنا..
شكراً..

لا اسمحلي قلك انو في خلاف جوهري, في ناس بدها استمرار الوضع الحالي مع مطالب خجولة بالاصلاح و على مبدا شو ما اجى احسن من بلا.

توصيف الوضع القائم بيقود برايي لنتيجة وحدة, انك انت امام نظام يستحيل اصلاحو ويستحيل يقدر يقدم للوطن الا مزيد من التخلف والفساد و القمع

لا اسمحلي قلك انو في خلاف جوهري, في ناس بدها استمرار الوضع الحالي مع مطالب خجولة بالاصلاح و على مبدا شو ما اجى احسن من بلا.

توصيف الوضع القائم بيقود برايي لنتيجة وحدة, انك انت امام نظام يستحيل اصلاحو ويستحيل يقدر يقدم للوطن الا مزيد من التخلف والفساد و القمع

الناس اللي بدها استمرار الوضع الحالي هنن من توابع السلطة أو المستفيدين من قمامة الحكومة وعددهم قليل مقارنة بعامة الشعب اللي بدون تغيير ملموس وحقيقي باوضاع البلد..
وأما الخوف من التغيير على مبدأ شو ما اجى احسن من بلى فهالشي موجود وهالشي طبيعي جداً، رح حطلك نص من تدوينة قادمة إلي بنفس الحديث تقريباً: " - ما خرجتُ به من هذه الرواية هي أن لكل ثورة ولكل تغيير ثمن قد يكون باهظاً وهو ما يتخوف منه عادةً معظم الشعوب.. فغياب السلطة المسيّرة لحياة الشعب يترك فراغاً مقلقاً في الأذهان والنفوس، ورغم أن هذا الثمن قد يكون باهظاً إلا أن النتائج ستكون كفيلة بمعالجة الجروح والتئامها.. فكل ثورة لابدّ أن تمر بمراحل معينة لا مفرّ منها.."..
بالنهاية طالما انو إصلاح النظام مستحيل لهالدرجة لازم يكون في بدائل حقيقية ويكون الشعب قادر على التعامل مع هالبدائل لانو كمان مو معقول اللي عايش بالظلمة ينتقل عالضو فجأة. بينعمي ما.. !!

تحية للكل وخاصة للأخ فادي صاحب الموضوع :
بداية عندي اقتراح كتير صغير الك فادي وهوة انا شايف انو الموضوع كتييييير كبير يعني اذا الواحد بدو يرد ع كل النقاط بدو جريدة وشفنا هالشي بالردود السابقة ف شو رأيك بما انك صاحب الموضوع تخصص نقطة وحدة للمناقشة لكل اسبوع مثلا وبالاسبوع التاني بننتقل لنقطة تانية بحيث انو انت اللي تحدد النقاط اسبوعيا وبالنهاية بنوصل لخلاصة عن الموضوع ككل ، وشكرا الك مقدما ، طبعا هادا مجرد اقتراح .


صديقي صدقني كنت بتمنى انو هالموضوع يفوت عليه الشباب يلي بيتهمونا وبيخونا ونتناقش بالمحاور ونحط النقط على الحروف...
بس يبدو اذا الموضوع مو غوغائي وزت الحكي فيه ببلاش مابيمشي الحال.. يمكن اقرار باضعف ونقص الحجة أو يمكن لأنو بيعرفو الحقيقة ومابيقدرو ينكرو...

اذا بتقرا المشاركات هون بتلاحظ انو الكل من الشباب يلي بينتمو للفكر المعارض وبالفعل طرحو النقط بطريقة حضارية وبدون ازعاج حدا... وهالشي ماناسب الطرف الأخر يلي متعود يسب ويخون ويتهم وبهيك موضوع مارح يقدر يعجق الأمور...

اي شخص راح يجا عالحكم راح يتابع بنفس سياسة القمع حتى لو كان من أبرز المعارضين والمثقفين والشرفاء لأنو الشعب عنا ما بيمشو حالو غير هيك والشغلة مو بس لت وعجن وتفنيص على بعضنا
وين بدك تنشر ثقافة الديمقراطية عند واحد ما بيسمع غير كلمة الشيخ تبع الجامع وما بيخلي مرتو أو أختو تطلع عالشارع غير إذا كانت لابسة الخمارالكامل وما عندو أي تقبل للديانات التانية ويتهمهم بالكفر والالحاد ومستعد لأنو يقوم بأي عمل ضد هي الطوائف

نحنا شعب جاهل ديمقراطيا
طيب شو هوي النظام اللي لازم يحكمنا هل هوي الشيوعي أم الرأسمالي أم الفدرالي ؟؟؟؟؟
تأكد أنو نحنا العرب من المستحيل تطبق عنا الديمقراطية لأنو عنا الدين والسياسة ولدو ببطن واحد وكل عمليات فصل التوأمين سوف تفشل
والسلاااااااااااااااااااا اااااااااااام
وبرجع وبقول المعارضة مانها موضة يا شباب
واللي بيعتبرا مو موضة يشرف ويتكرم علينا بالحلول لأنو أنا حاولت أوجد حلول بس للأسف ما طلع معي شي
انا بصراحة بعتبر حالي جاهل ديمقراطيا
فا إذا في مجال هيك تثقفوني ديمقراطيا غير أنو انتخب رئيس غير بشار الأسد وغير أنو امشي بالشارع وسب الرئيس وبدون ما حدا يحكي معي

بدايةً ..

انا ما بعتبر حالي من الموالاة ولا من المعارضة لسبب بسيط ,,كيف فيني مارس الموالاة او المعارضة ببلد انا ما بعرف شو ماهيتو ..!! شباب معلش ..سوريا بالنسبة الي بتختلف عن سوريا بالنسبة لشخص تاني سواء كان موالاة او كان معارضة ...معلش بدي وضح فكرتي مشان ما بين اني عم زد كلام و بس

جميع دول العالم اليوم تبلور فيها منظومة الحكم بالوقت الراهن بعد صراعات طويلة بين عدة افكار ..و الفكر يلي انتصر هوي يلي وضع معيار الوطنية ..الفكر الليبرالي انتصر بعد تلات جمهوريات بفرنسا و صارت اليبرالية الفرنسية هي الفكر السليم للجمهورية التالتة و الأفكار اليمينية اتحجمت و لو انو بتحصل على بعض الأصوات بالأنتخابات ,,بس بتبقى ذات ثقل صغير و بتضطر لأنو تخفف من يمينيتها ...

بأمريكا ..المدافعين عن افكار متل السماح بالعبودية و غيرها خسروا المعركة مع الليبراليين و صارت امريكا بعد قرن و نصف بالشكل هاد ..

هلئ في دول تانية انتصرت فيها الشيوعية و صارت افكارها هي المعيار للوطنية ..و دول تانية انتصرت فيها الحركات الدينية ...متل ايران ,,

الفكرة يلي عم حاول وصلها انو نحنا بسوريا ما صار عنا السجال هاد يعني الوضع تماما عنا متل وضع فرنسا قبل خمس قرون ..كل شخص صاحب قوة بيستلم الحكم و بيفرض فكرو المتخلف على شعب كامل هي اذا اعتبرنا جدلا انو صاحب فكر !

انا كيف بدي حاور شخص بيدافع على النظام لأنو معتبرو السبيل لحماية وجودو كعلوي ..و كأقلية اخرى ..هلئ من جهة تانية المخاوف عندو مبررة الى حد ما بما انو تاريخنا ما كتير ابيض ..هون منوصل لحيط مسدود ...اعتبار ديكتاتوري الوسيلة لحماية الوجود هو اسؤ شي وصلنالو بسبب الغلط يلي كنا عم نعيشو من قرون لهلئ ...

انا بشوف انو قبل الحوار لازم نتفق على ماهية لسوريا و لو هيك خطوط عريضة..كيف منتفق و شو الوسيلة هي لازم نعيش التجارب يلي غيرنا عاشها ..ما حدا يفهم من كلامي هي دعوة لهيجان داخل المجتمع السوري ..لأ بالعكس ..انا قصدي انو لازم نوقف كلنا وقفة رجل واحد و بأيد جميع الأطياف السورية نرسم لبلدنا صورة منتفق عليها جميعا و بعدين منشوف شو اراءنا ببعض التفاصيل الصغيرة باللوحة ,,هون منكون دخلنا بالحوار ...

اما انو نجي نفاوض النظام على سعر رغيف الخبز و تخفيض دقيقة الأتصال و زيادة الرواتب انا من جهتي ما بعطي الديكتاتور شرف انو يتحكم بتفاصيل حياتي و يمن عليي من الشي يلي كان حقي و حق اخواتي السوريييين .


و شكرا

الناس اللي بدها استمرار الوضع الحالي هنن من توابع السلطة أو المستفيدين من قمامة الحكومة وعددهم قليل مقارنة بعامة الشعب اللي بدون تغيير ملموس وحقيقي باوضاع البلد..
وأما الخوف من التغيير على مبدأ شو ما اجى احسن من بلى فهالشي موجود وهالشي طبيعي جداً، رح حطلك نص من تدوينة قادمة إلي بنفس الحديث تقريباً: " - ما خرجتُ به من هذه الرواية هي أن لكل ثورة ولكل تغيير ثمن قد يكون باهظاً وهو ما يتخوف منه عادةً معظم الشعوب.. فغياب السلطة المسيّرة لحياة الشعب يترك فراغاً مقلقاً في الأذهان والنفوس، ورغم أن هذا الثمن قد يكون باهظاً إلا أن النتائج ستكون كفيلة بمعالجة الجروح والتئامها.. فكل ثورة لابدّ أن تمر بمراحل معينة لا مفرّ منها.."..
بالنهاية طالما انو إصلاح النظام مستحيل لهالدرجة لازم يكون في بدائل حقيقية ويكون الشعب قادر على التعامل مع هالبدائل لانو كمان مو معقول اللي عايش بالظلمة ينتقل عالضو فجأة. بينعمي ما.. !!



صديقي كلامك بخصوص تخوف الشعوب من التغيير سليم تماما, التغيير لازم يكون الو تمن بس بالنهاية رح يقود للخروج من الحلقة المفرغة اللي عم تدور البلد فيها , ونحني مو اجبن من الشعب الروماني اللي قدم عشرات الاف الضحايا لحتى تخلص من تشاوشيسكو و لا شعوب اوربا الشرقية اللي تخلصت من الحكم الشمولي افضل مننا

مشكلة التغيير انو النظام اشتغل كتير على تدمير الحياة السياسية بسوريا , وجعل كلمة سياسة مرعبة للانسان السوري بس تخيل معي انو رغم كل هالقمع لسا في ناس بسوريا مستعدين يدخلوا السجن مقابل كلمة حكوها او موقف سياسي تبنو او مقابل توقيع على بيان رفضوا الانسحاب منو , وبتلاقين بيطلعو من السجن وبيدخلوه وبتهم اسخف من بعضها وهني مصرين على فكرة التغيير السلمي الديمقراطي

وجود هيك ناس هو الامل برايي, الامل بتشكيل حكومة ليبرالية مؤلفة من ناس غير منتمين لاي حزب و ولاءن لسوريا الوطن وهدف هيك حكومة تبني برنامج اصلاحات سياسية حقيقية بتأهل الشعب بفترة زمنية محددة لممارسة حقو بانتخاب برلمان متعدد ورئيس بيمثل كل الشعب
ولاتنسى كمان انو بالدولة نفسها في ناس مركونين على جنب لاسباب كتيرة منها رفضن المشاركة بلعبة الفساد و سوء استخدام السلطة, وهدول اكيد ممكن الاستفادة منن بعملية التغيير

هلق بينط واحد بيقلك اي واحد رح يوصل للحكم رح يعمل متل اللي عملوا حافظ الاسد, بس يا شباب نحني هون ما عم نحكي عن ضباط جيش متعطشين للسلطة و مستعدين يعملو اي شي بالبلد مشانها , هون الحديث عن ناس مثقفين ليبراليين متل عارف دليلة و ميشيل كيلو وفداء حوراني وغيرن ولاننسى انو بالاربعينات والخمسينات كان في بسوريا ناس متل شكري القوتلي وهاشم الاتاسي و غيرن اشتغلوا لمصلحة البلد

طبعا مع الاشارة انو هيك سيناريو بيتطلب ظروف دولية مناسبة بالظبط متل ما كان انهيار الاتحاد السوفيتي بداية التغيير بدول اوربا الشرقية, وللاسف الظروف الدولية حاليا كلها مواتية للنظام الحاكم و اللي عم يستغلها للحفاظ على بقاءه بس ما في شي بيدوم.


تحياتي :D

انا شاركت في هذا الموضوع على اساس نقاش بين طرف يقول ان بشار الاسد يسير في الطريق الصحيح للاصلاح الداخلي وانه حقق الكثير من الانجازات , وبين طرف يقول ان الامور اصبحت اسوء من قبل ولم يتحقق شيئ من الامور التي وعد بها في خلال القسم قبل 10 سنين.
خلونا نحصر نقاشنا في هذه الامور حاليا ونتفق فعلا هل هناك تقدم في الاصلاح ام لا بعدين يمكن طرح المخاوف ما بعد التغيير, لأنو متل قال الاخ ايهم انو هناك ناس لهلأ بتقول انو نظام الاسد ديمقراطي واحسن منو مافي!!!


ولكن على اعتبار أننا نريد نشر الديمقراطية في سوريا أليس علينا أولا من نشر ثقافة الديمقراطية والحريات الشخصية ونشر مفاهيم الديمقراطية ومبادئ الديمقراطية بين طبقات الشعب التي في معظمها تعتبر من الطبقة الوسطى والمتدنية بالنسبة للحالة التعليمية


ومن كلامك فوق يا سيد سيجارة واضح انك تعترف بأنه لا يوجد ديمقراطية حاليا في سوريا , وبكلام آخر النظام السوري غير ديمقراطي اي ديكتاتوري, وهذا الشيء يكفينا حاليا.

انا شاركت في هذا الموضوع على اساس نقاش بين طرف يقول ان بشار الاسد يسير في الطريق الصحيح للاصلاح الداخلي وانه حقق الكثير من الانجازات , وبين طرف يقول ان الامور اصبحت اسوء من قبل ولم يتحقق شيئ من الامور التي وعد بها في خلال القسم قبل 10 سنين.
خلونا نحصر نقاشنا في هذه الامور حاليا ونتفق فعلا هل هناك تقدم في الاصلاح ام لا بعدين يمكن طرح المخاوف ما بعد التغيير, لأنو متل قال الاخ ايهم انو هناك ناس لهلأ بتقول انو نظام الاسد ديمقراطي واحسن منو مافي!!!



ومن كلامك فوق يا سيد سيجارة واضح انك تعترف بأنه لا يوجد ديمقراطية حاليا في سوريا , وبكلام آخر النظام السوري غير ديمقراطي اي ديكتاتوري, وهذا الشيء يكفينا حاليا.
أنا ما قلت انو مافي ديمقراطية بسوريا والنظام السوري ديكتاتوري
ورجاء لا تقولني شي ما قلتو
أنا بحط كل العتب واللوم على الشعب والمجتمع والدين قبل ما حطو على النظام
والانجازات أنا حكيت عنا فهي مقبولة إلى حد ما ولكن لسا بدنا
لكن أهم انجاز ممكن نحنا نسوي هوي تغيير طريقة تفكير المجتمع قبل تغيير النظام وهي لازم تكون الأولوية

لكن أهم انجاز ممكن نحنا نسوي هوي تغيير طريقة تفكير المجتمع قبل تغيير النظام وهي لازم تكون الأولوية

لمّا بتقول هيك بتكون نقضت قوانين التاريخ و الجغرافيا و الفيزياء ..لأنو اي تغيير بفكر المجتمع او غيرو ..غير ممكن بظل النظام هاد و حالة القلق و الخوف و القمع يلي بيعيشها السوري

هاد النظام الديكتاتوري موجود من زمان إذا بدنا نرجع للتاريخ والجغرافيا بس بدون فيزياء
يعني فيك تراجع التاريخ من أيام الرسول محمد صلى الله عليه وسلم يعني من بعد موتو بتشوف كيف صارو يتناحرو على الحكم والسلطة وصار في قمع وحروب وقتل ولحد الآن لساتنا عمنحصد نتائجها للأسف ولهيك كنت عمبحكي عن الاستحالة

بس تأكد أنو لمن بيريد المجتمع والشعب يطور ما في أي قوة يتردو حتى لو كانت فروعة المخابرات بكل العالم
يعني بسيطة على فرض أنو مجتمعنا كان مسيحي كلو أو مسلم سني أو مسلم علوي أو شيعي تأكد أنو ما راح يكون عنا مشكلة مع الرئيس أو النظام تبعنا
لكن بمجتمع متعدد الأطياف والديانات وتنتشر فيه ثقافة عدم القبول للطرف الآخر بدل ثقافة التآخي تأكد أنو من المستحيل العيش بظل نظام ديمقراطي بحت


بيجوز اطلعنا كتير عن الموضوع بس وجب التنويه

هاد النظام الديكتاتوري موجود من زمان إذا بدنا نرجع للتاريخ والجغرافيا بس بدون فيزياء
يعني فيك تراجع التاريخ من أيام الرسول محمد صلى الله عليه وسلم يعني من بعد موتو بتشوف كيف صارو يتناحرو على الحكم والسلطة وصار في قمع وحروب وقتل ولحد الآن لساتنا عمنحصد نتائجها للأسف ولهيك كنت عمبحكي عن الاستحالة

بس تأكد أنو لمن بيريد المجتمع والشعب يطور ما في أي قوة يتردو حتى لو كانت فروعة المخابرات بكل العالم
يعني بسيطة على فرض أنو مجتمعنا كان مسيحي كلو أو مسلم سني أو مسلم علوي أو شيعي تأكد أنو ما راح يكون عنا مشكلة مع الرئيس أو النظام تبعنا
لكن بمجتمع متعدد الأطياف والديانات وتنتشر فيه ثقافة عدم القبول للطرف الآخر بدل ثقافة التآخي تأكد أنو من المستحيل العيش بظل نظام ديمقراطي بحت


بيجوز اطلعنا كتير عن الموضوع بس وجب التنويه

اي نعم طلعنا كتير عن الموضوع ولكن يجب التنويه ان الطائفية في سورية تم اشعالها بشكل رئيسي بعد استلام البعث و حافظ الاسد للحكم.



ومازلنا بانتظار الموالاة للدخول للموضوع

اي شخص راح يجا عالحكم راح يتابع بنفس سياسة القمع حتى لو كان من أبرز المعارضين والمثقفين والشرفاء لأنو الشعب عنا ما بيمشو حالو غير هيك والشغلة مو بس لت وعجن وتفنيص على بعضنا

أول شي سؤال صغير: ليش هالكلمات تبع لت وعجن وتفنيص؟؟ يعني انت من خلال سياق المشاركات شفت في داعي لهالكلام والإهانات؟؟

بجي لحكيك مين قلك إنو أي شخص حيجي على الحكم بدو يمشي على نفس النهج؟؟ جربت شي؟؟ بتعرف شو يعني تكون حكومة البلد مختارة من قبل الشعب بطريقة ديموقراطية حضارية؟؟ يعني بس قلي كيف قررت هالقرار حتى إفهم كيف بدي ناقشك...

لعلمك أي حكومة بتكون جاية بقرار شعبي بتكون قمة بالخوف على مصالح الشعب لأنو قرار بقائها أو تغييرها بيكون بإيد الشعب وهالشي وحدو كافي لأنو الحكومة تعمل ألف حساب لأي غلط بترتكبوا...


وين بدك تنشر ثقافة الديمقراطية عند واحد ما بيسمع غير كلمة الشيخ تبع الجامع وما بيخلي مرتو أو أختو تطلع عالشارع غير إذا كانت لابسة الخمارالكامل وما عندو أي تقبل للديانات التانية ويتهمهم بالكفر والالحاد ومستعد لأنو يقوم بأي عمل ضد هي الطوائف

نحنا شعب جاهل ديمقراطيا


كمان كيف إكتشفت هالشي؟؟ جربت خيار هالشعب وماعجبك ولا هيك بيقولو المخابرات مشان يخوفونا؟؟ بشرفك فكر بهالفكرة تبع نحنا شعب جاهل وقلي أديش واثق من هالكلام بضميرك؟؟

في شعب بالدنيا خلق عالم ديموقراطياً؟؟ أما نتيجة الممارسة وتدوال السلطة والشراكة الوطنية اتعلمت الشعوب الديموقراطية وطبقتها بالشكل السليم؟؟

طيب شو هوي النظام اللي لازم يحكمنا هل هوي الشيوعي أم الرأسمالي أم الفدرالي ؟؟؟؟؟

هو أي نظام بيختاروا الشعب بكامل حريتو... لا أنا ولا إنت منقدر نقرر بس متل ماقلتلك شو ماكانت طبيعة النظام إذا عن جد جاية نتيجة خيار شعبي حر بدو يخاف على مصالح الشعب ويعتمد الإنجازات والإصلاح والحرية حتى يضمن إستمرارو بالحكم وما رح يقدر يستعمل الجزمة والمعتقل لإستمرارو بالسطة...

تأكد أنو نحنا العرب من المستحيل تطبق عنا الديمقراطية لأنو عنا الدين والسياسة ولدو ببطن واحد وكل عمليات فصل التوأمين سوف تفشل

شو دخل الدين بالموضوع؟؟ حاسس انك ماعم تربط الأفكار مزبوط.. يعني هل هذا النظام هو حامي حمى الدين أو هو مناهض للدين حتى مستمر؟؟ جد مافهمت شو الفكرة

وبرجع وبقول المعارضة مانها موضة يا شباب

وين شفت بحكينا غير رصد للواقع ومحاولة للتوصل لقناعات وطنية مشتركة حتى تتهمنا انو مجانين وماشيين على الموضة؟؟ بعدين لعلمك لو منتبع الموضة كنا اتبعنا موضة " بالروح بالدم" لأنها موضة أقوى نتيجة القمع...

واللي بيعتبرا مو موضة يشرف ويتكرم علينا بالحلول لأنو أنا حاولت أوجد حلول بس للأسف ما طلع معي شي

طيب إذا انت حاكم على شعبنا مسبقاً إنو جاهل ومابيستاهل ديموقراطية شو بدك بالحلول؟؟ بس خليني إرجع عدلك الحل يلي هو خيار الشعب.. دائماً خيار الشعب بيكون صح حتى لو خيارو غلط فبيكون غلطو صح لأنو هو الشعب وهو القرار وهو يلي بيطبق عليه القرار... فما حدا بيستفيد وبينضر غيرو وهالشي بيخلي قرارو صح دايماً...

انا بصراحة بعتبر حالي جاهل ديمقراطيا

طيب في مجال تبقى على إعتبار حالك لأنو حقك بس مو حقك تعمم على كل الشعب...


فا إذا في مجال هيك تثقفوني ديمقراطيا غير أنو انتخب رئيس غير بشار الأسد وغير أنو امشي بالشارع وسب الرئيس وبدون ما حدا يحكي معي


شفت جدا بالموضوع سب بشار الأسد أو قلك انتخب غيرو؟؟ ياعمي اذا ضار انتخابات حقيقية وأعيد انتخاب بشار الأسد صدقني لكون أول المؤيدين لإلو...
الديموقراطية هي ممارسة الشعب لحقو بالإختيار وتقرير مصيرو.. هي بلدو وحقو الطبيعي يحدد مين بدو يحكمها ويحاسب هالحاكم إن أخطأ ويتابع معو إن أصاب... الديموقراطية هي يلي بتطور البلاد وبتعطيها أسمى وأرقى الصفات... الديموقراطية هي بناء الأوطان بإيدين أبنائها وبخيار أبنائها.

[quote=VivaSyria;1274142]


داخلياً:
للأسف مشروع مكافحة الفساد وملاحقة الفاسدين ..بغض النظر عن الصدق في الرغبة توقف لإن المشروع الذي طرح لم يكن متكاملا بل كان قائما على ترقيع الموجود ما أمكن ..بينما التغيير الحقيقي يحتاج إلى مقاربات كاملة في شتى الميادين الإقتصادية الإجتماعية الديمقراطية الوطنية ...إقتصرت محاولات التغيير على ترقيع الموجود


وفي قضية المجتمع المدني فهناك عوامل خارجية ساهمت في القضاء على تلك البداءات ..وهي معروفة للجميع
أما فيما يتعلق بتلك المنظمات فلم أرى -برأيي الشخصي- أي منها قادر على إنقاذ سوريا لإنها كانت ترى التغيير بقرار سياسي ولم تعمل لتحقيق التغيير على الأرض وبين الفئات ..إضافة إلى جو التكتلات والتيارات السائد داخل كل جماعة على حدى مما جعلها ممزقة وعرضة للإنقسام وهذا ما حصل فعلا...فلم تكن تلك الجمعيات قادرة على تقديم أي جديد
رفع الأجور كان رهانا خاسراً بل لعله كان الأكثر خسارة لإن زيادة الرواتب ليست من الأدوات الإقتصادية في علم الإقتصاد هذا أولا ثانيا لإنها ترافقت بتضخم على صعيد معظم السلع والخدمات فلم تكن الزيادة في الأجور مجزية ..ولكي تكون مجزية عليها أن تتناسب مع زيادة مستوى التضخم
الإصلاح في هيكل الإقتصاد نحو إنشاء سوق أوراق مالية ومصارف خاصة وشركات تأمين خاصة كانت الضربة القاضية لإن سياسة الفريق الإقتصادي في الحكومة أظهرت أنها تميل نحو تحرير رأس المال ...ولنفترض جدلا أن تحرير رأس المال هو الحل ..فإنه لا يعدو عن كونه ترقيعا تحرير العمل مع إبقاء القيود على حركة قوة العمل ..
بمعنى ما زال حق الإضراب والتظاهر والإحتجاج والمقاطعة ممنوعة للعمال ..مع أن تحرير قوى رأس المال كان حريا به أن يحرر قوى العمل ...لكي يكون فيه مصلحة للوطن والمواطن
الترخيص لوسائل الإعلام كان خطوة إيجابية نتمنى تعزيزها ...



خارجياً:
على صعيد الدعم للقوى المقاومة في المنطقة فإن هذا ما لا يمكن المساس به في سوريا ...هو الضمان الأساسي لوجود الدولة ...
وتقوية الحلف الإستراتيجي مع إيران هو مصلحة وطنية إقليمية وانا مع تعزيز هذا الحلف وإضافة قوى إضافية على هذا الحلف إقليمية كانت أو عالمية مع ضرورة التركيز على نقل الحلف من المقاومة السلبية " الممانعة" إلى المقاومة الإيجابية والهجوم ما أمكن لإن التغييرات العالمية تدفع بهذا الإتجاه
أما اللعب على الأوراق فهو نتيجة طبيعة لسياسة اللا عداء ولا سلام ..وتلك البلبلة في الموقف الوطني ...وهذه سياسة يجب أن تلغى لصالح تعزيز المقاومة الإيجابية والهجوم ما أمكن كما سبق وذكرنا

دمت بحب
مع إشتياقي الكامل
تحياتي الحارة
ظل جيفارا

اي نعم طلعنا كتير عن الموضوع ولكن يجب التنويه ان الطائفية في سورية تم اشعالها بشكل رئيسي بعد استلام البعث و حافظ الاسد للحكم.



ومازلنا بانتظار الموالاة للدخول للموضوع
وانت شو برأيك سبب الطائفية االي ظهرت على عهد البعث
مو هني جماعة الخونجيي المتشددة واللي ثبت بالنهاية أنو متعاملة
هاد بيأكد كلامي أنو نحنا ما ممكن نتقبل بعض
يعني السني ما بيقبل يكون علوي هوي زعيمو
وتاني مرة دروس الحقائق بتجرد أكتر

أول شي سؤال صغير: ليش هالكلمات تبع لت وعجن وتفنيص؟؟ يعني انت من خلال سياق المشاركات شفت في داعي لهالكلام والإهانات؟؟
أنا بقصد اللي جاي يلت ويعجن بس وماني قاصد اللي جاي يحكي بموضوعية وتجرد من كل شي

بجي لحكيك مين قلك إنو أي شخص حيجي على الحكم بدو يمشي على نفس النهج؟؟ جربت شي؟؟ بتعرف شو يعني تكون حكومة البلد مختارة من قبل الشعب بطريقة ديموقراطية حضارية؟؟ يعني بس قلي كيف قررت هالقرار حتى إفهم كيف بدي ناقشك...
أنا ما جربت بس اعطيني تجربة وحدة بالوطن العربي تكون ديمقراطية ناجحة وبدي اسألك نفس السؤال انت بتعرف شو يعني تكون حكومة البلد مختارة من قبل الشعب علما أن الحكومة تختار من قبل رئيس الجمهورية ورئيس مجلس الوزراء المكلف بتشكيل الحكومة بتكليف من رئيس الجمهورية
لعلمك أي حكومة بتكون جاية بقرار شعبي بتكون قمة بالخوف على مصالح الشعب لأنو قرار بقائها أو تغييرها بيكون بإيد الشعب وهالشي وحدو كافي لأنو الحكومة تعمل ألف حساب لأي غلط بترتكبوا...
هاد الحكي بتحكي لمن يتكون عايش بأوروبا أو أميركا مو عايش بسوريا لأنو هون بالبلد راح يكون السبب الوحيد لنجاحو بالانتخابات الرئاسية هوي انتمائه لطائفة معينة بتشكل أغلبية وهاد الواقع ولا تحاول تقلي أنو كلامي مو مظبوط يعني بتتوقع شخص مسلم سني ينتخب رئيس علوي مثلا أو علوي ينتخب سني أو مسيحي ينتخب مسلم هاد محض خيال
كمان كيف إكتشفت هالشي؟؟ جربت خيار هالشعب وماعجبك ولا هيك بيقولو المخابرات مشان يخوفونا؟؟ بشرفك فكر بهالفكرة تبع نحنا شعب جاهل وقلي أديش واثق من هالكلام بضميرك؟؟
أنا واثق جدا من كلامي وعن تجربة وتنتين وتلاتة ومن خلال عملي اللي بحتك في يوميا مع أكتر من 200 شخص استخلصت هي النتيجة اللي كتير أنا منزعج منا لأنو وضع محزن فعلا
في شعب بالدنيا خلق عالم ديموقراطياً؟؟ أما نتيجة الممارسة وتدوال السلطة والشراكة الوطنية اتعلمت الشعوب الديموقراطية وطبقتها بالشكل السليم؟؟
بأكثر دول العالم ديمقراطية عأساس واللي هيي أمريكا صار في تلاعب بالانتخابات على عهد الرئيس بوش والكل بيعرف هاد الشي وكان في كتير من الاعتقالات التعسفية وعمليات الاغتيال يعني أكتر دول العالم ديمقراطية وتحضر وعلم وثقافة منلاقي اختراقات للديمقراطية والحريات فكيف بالنسبة لبلد المشاكل راكبتو من ساسو لراسو



هو أي نظام بيختاروا الشعب بكامل حريتو... لا أنا ولا إنت منقدر نقرر بس متل ماقلتلك شو ماكانت طبيعة النظام إذا عن جد جاية نتيجة خيار شعبي حر بدو يخاف على مصالح الشعب ويعتمد الإنجازات والإصلاح والحرية حتى يضمن إستمرارو بالحكم وما رح يقدر يستعمل الجزمة والمعتقل لإستمرارو بالسلطة...
محض خيال لأنو العلة صارت مستشري فينا نحنا ومنشان الله نزيل عالشارع واحتك بلناس


شو دخل الدين بالموضوع؟؟ حاسس انك ماعم تربط الأفكار مزبوط.. يعني هل هذا النظام هو حامي حمى الدين أو هو مناهض للدين حتى مستمر؟؟ جد مافهمت شو الفكرة
حبيب انا هون صار عندي فكرة كاملة عن الشخص اللي عمناقشو من خلال سؤالك شو علاقة الدين بالموضوع أو بالدولة
بدي اسألك سؤال انت عايش بالبلد ولا برات البلد ؟؟؟؟؟؟؟؟؟؟


وين شفت بحكينا غير رصد للواقع ومحاولة للتوصل لقناعات وطنية مشتركة حتى تتهمنا انو مجانين وماشيين على الموضة؟؟ بعدين لعلمك لو منتبع الموضة كنا اتبعنا موضة " بالروح بالدم" لأنها موضة أقوى نتيجة القمع...
لمعلوماتك موضة بالروح بالدم بطلت من زمان يعني من التمانينات والتسعينات وموضة المعارضة هي اللي دارجة هالايام


طيب إذا انت حاكم على شعبنا مسبقاً إنو جاهل ومابيستاهل ديموقراطية شو بدك بالحلول؟؟ بس خليني إرجع عدلك الحل يلي هو خيار الشعب.. دائماً خيار الشعب بيكون صح حتى لو خيارو غلط فبيكون غلطو صح لأنو هو الشعب وهو القرار وهو يلي بيطبق عليه القرار... فما حدا بيستفيد وبينضر غيرو وهالشي بيخلي قرارو صح دايماً...

وين الشعب ؟؟؟؟؟؟؟؟؟؟:deal:

طيب في مجال تبقى على إعتبار حالك لأنو حقك بس مو حقك تعمم على كل الشعب...

أنا واحد من الشعب اللي عمتحكي عنو يا حبيبنا
شفت جدا بالموضوع سب بشار الأسد أو قلك انتخب غيرو؟؟ ياعمي اذا ضار انتخابات حقيقية وأعيد انتخاب بشار الأسد صدقني لكون أول المؤيدين لإلو...
الديموقراطية هي ممارسة الشعب لحقو بالإختيار وتقرير مصيرو.. هي بلدو وحقو الطبيعي يحدد مين بدو يحكمها ويحاسب هالحاكم إن أخطأ ويتابع معو إن أصاب... الديموقراطية هي يلي بتطور البلاد وبتعطيها أسمى وأرقى الصفات... الديموقراطية هي بناء الأوطان بإيدين أبنائها وبخيار أبنائها.
الديمقراطية لم تخلق لنا نحن العرب طوال عمرنا متفرقين متناحرين ولم نتحد إلا في حالة العدو المشترك يعني اتحدنا ضد الحكم العثماني واتحدنا ضد الاحتلال الفرنسي والآن افترقنا في عدائنا لاسرائيل حتى من أصبح يحارب اسرائيل أصبح يتهم بأنه ذيل من ذيول ايران وسوريا
وتصبحون على وطن يا اابناء ال؟؟؟؟؟؟؟؟وطن

وانت شو برأيك سبب الطائفية االي ظهرت على عهد البعث
مو هني جماعة الخونجيي المتشددة واللي ثبت بالنهاية أنو متعاملة
هاد بيأكد كلامي أنو نحنا ما ممكن نتقبل بعض
يعني السني ما بيقبل يكون علوي هوي زعيمو
وتاني مرة دروس الحقائق بتجرد أكتر

بس بما انك عم تحكي عن ذكر الحقائق بتجرد, بتقدر تقلي شلون هيك سطحت حرب اهلية طويلة عريضة راح ضحيتها عشرات الالاف بانك حطيت الحق على طائفة وحدة؟؟

بتقدر تشرحلي شلون من 1918 ل 1963 كانت كل الطوائف بسوريا عايشة مع بعضها , ياترى لما استلم حافظ الاسد الحكم كان في حرب اهلية مثلا وهو اوقفها؟
بعدين لو السني ما بيحب العلوي يصير رئيسو بتقدر تقلي ليش لما استلم حافظ الاسد الحكم وعمل جولة على كل محافظات سوريا طلعوا الالاف ومن كل الطوائف ليستقبلوا لانن صدقوا وعودو واللي صار بعدين مو احتجاجا على علوية الرئيس وانما على اساليب حكمو.



على كل الموضوع مو عن الطائفية ولا عن الشعب بس انت عم تحاول متل عادة كتيرين تحط الحق على الضحية مو على الجلاد , وهي نفسها على فكرة عقلية, لما امراة بتتعرض للاغتصاب بيحملوها هي المسؤولية ولما واحد يعتقل بسبب نقد ممارسات السلطة بيحملوا الو المسؤولية وهيك

بعدين خيو اذا انت مؤمن انو ما خرج الشعب ديمقراطية, مو مشكلة رايك وانت حر في, بس في كتيرين غيرك مؤمنين انو خرجن ديمقراطية وانو شعوب افريقيا و اوربا الشرقية و امريكا الجنوبية مو احسن ولا اكتر تحضرا مننا.

وانت شو برأيك سبب الطائفية االي ظهرت على عهد البعث
مو هني جماعة الخونجيي المتشددة واللي ثبت بالنهاية أنو متعاملة
هاد بيأكد كلامي أنو نحنا ما ممكن نتقبل بعض
يعني السني ما بيقبل يكون علوي هوي زعيمو
وتاني مرة دروس الحقائق بتجرد أكتر

لا مو هن جماعة الخونجية المتشددة فقط بل الدكتاتورية البعثية الاسدية ايضا
قبلما يستلم حزب البعث و الديكتاتور حافظ الاسد الحكم _يعني في زمن الديمقراطية في سوريا_ كان الاخوان مع حزب البعث و باقي الاحزاب ممثلين في البرلمان السوري وما كان في اي مشاكل تذكر وذلك لان الجو كان ديمقراطي.
المشاكل اجت مع الدكتاتورية التي جابا حافظ الاسد.

بعدين صرعت ربنا بشغلة انو الشعب السوري ما تلبقلو الديمقراطية والحرية, طيب يا سيدي راجع تاريخ سورية قبل البعث ورح تشوف انو كان هناك فترات سوريا كانت انموذج للديمقراطية وتقبل الآخر.
يعني ما عندك علم انو المرحوم فارس الخوري ( مسيحي ) كان رئيس للبرلمان السوري عام 1936 وكمان عام 1943 وبعدين صار رئيس وزراء سوريا عام 1944 وأعاد تشكيل وزارته ثلاث مرات في ظل تولي شكري القوتلي رئاسة الجمهورية السورية, وكمان مرة شكل حكومة في زمن الاتاسي.

وكمان المرحوم سعيد اسحاق ( مسيحي) كان رئيس للبرلمان السوري و اصبح فيما بعد رئيس سورية بالوكالة .
بقى ممكن تفهمني كيف هدول استلموا هيك مناصب اذا كان السني السوري ( حسب رأيك ) لا يقبل بالآخر.

الديمقراطية هي الحل, اما في الدكتاتورية فهي حطب لنار الطائفية, وبالنهاية الشعب هو صاحب القرار , وصدقني اذا صارت انتخابات حرة نزيهة وفاز فيها بشار الاسد , رح نحطو عالعين و الراس ونكون معو حتى نهاية ولايتو الدستورية, اللي بختارو الشعب يا ما احلاه.

[quote=VivaSyria;1274142]





خارجياً:
على صعيد الدعم للقوى المقاومة في المنطقة فإن هذا ما لا يمكن المساس به في سوريا ...هو الضمان الأساسي لوجود الدولة ...
وتقوية الحلف الإستراتيجي مع إيران هو مصلحة وطنية إقليمية وانا مع تعزيز هذا الحلف وإضافة قوى إضافية على هذا الحلف إقليمية كانت أو عالمية مع ضرورة التركيز على نقل الحلف من المقاومة السلبية " الممانعة" إلى المقاومة الإيجابية والهجوم ما أمكن لإن التغييرات العالمية تدفع بهذا الإتجاه
أما اللعب على الأوراق فهو نتيجة طبيعة لسياسة اللا عداء ولا سلام ..وتلك البلبلة في الموقف الوطني ...وهذه سياسة يجب أن تلغى لصالح تعزيز المقاومة الإيجابية والهجوم ما أمكن كما سبق وذكرنا

دمت بحب
مع إشتياقي الكامل
تحياتي الحارة
ظل جيفارا

كلام جميل عندما نكون على حلف ....ألا ترى أننا أصبحنا ضمن تبعية عمياء لإيران

, اما في الدكتاتورية فهي حطب لنار الطائفية, .

أنا أرى بالعكس....الطائفية هي وقود الديكتاتورية....

أنت بالعبارة الأولى قلبت الحقائق و أصبح الشعب مـُدان