-
دخول

عرض كامل الموضوع : الطفل مسؤولية من .؟؟؟

جاد81
23/05/2009, 00:11
ثمة مقولة في المجتمع الغربي تقول : ( الطفل إبن المجتمع و ليس إبن والديه فقط )

موضوعي هنا فكرة كل شخص من مجتمعنا العربي عن فحوى هذه المقولة و فهمه ِ لها


أرجو مناقشة المقولة و اسقاطها مباشرة على قوانيين بلداننا العربية و على عاداتنا و تقاليدنا الموروثة و

علاقتها بعمل المرأة و دور الوالدين ( أب و أم ) في محاكاة فكرة الأطفال ..... وشكرا ً
Reemi
23/05/2009, 00:25
اكيد الطفل بعمر معين بحاجة لتوعية وارشاد من الاهل بس بالنهاية اكيد الاهل مابيقدرو مهما حاولو انو يفرضو الشخصية يلي هنن مختارينا على الابن باعتبار المجتمع والوسط يلي عايش فيه الطفل بيكون الو التأثير الاكبر


موضوع حلو جاد :D
suzaan
23/05/2009, 01:16
المسؤلية على الوالدين وبعدين على المجتمع
ألي هو عايش فيو يعني من خلال الدراسة والعمل
جاد81
23/05/2009, 01:30
شكرا ً لكن صديقتاي على تناول الموضوع ......

لكن أرجو من الزملاء الباقين أجراء عملية الأسقاط و التوسع بالموضوع

جاد
جاد81
23/05/2009, 01:39
شكرا ً لكن صديقتاي على تناول الموضوع ......

لكن أرجو من الزملاء الباقين أجراء عملية الأسقاط و التوسع بالموضوع

جاد
homam85
23/05/2009, 02:05
شو ما لقّنا الطفل رح يلقط وينطبع بذهنو بسرعة من اهلو والجيران والأقارب ......الخ

معناها لعمر معين -يبلش يوعى- رح يكون مرآة ل هالمجتمع أو البيئة المصغّرة لي عم يربى فيها.

لانو المرآة ما بتكذب بتعكس الصورة متل ما هي...وهيك الطفل(طبعا لحتى يوعى وتبلش هالمرآة تتكسر)

لهيك ضروري يكون في وعي من قبل الكبار كيف يتعاملو مع الطفل من جهة..
ومن جهة تانية أمامو حتى لو مو معو مباشرة..يعني بين بعض
قمح
23/05/2009, 02:18
الطفل ... هو الشب لما يكبر .... وهاد الشب هو الشعب ... والشعب رح يكون البلد .. وبالتالي لازم نعتني بالطفل !

هلأ مسؤلية مين ؟ أكيد الأهل هما اللي ببلشوا يأسسوا الأفكار والانطباعات الأولى والثقافة وشوي طريقة التفكير بس سرعان ما رح يحتك الطفل بالمجتمع اللي ممكن يتلاقى او يصطدم معو , بس بحالة المجتمعات العربية فغالباً الانسان المثقف أو المميز هو اللي بلاقي اختلاف كبير مع المجتمع ومش بس هيك ممكن يحاولوا المنع وما يكتفوا بالمعارضة نظراً لوجود ثقافات مختلفة .

يعني المجتمع كمجتمع مش مسؤول بمعنى الكلمة ... هو مؤثر كبير !!
بس بشوف أنو المسؤول الآخر بجانب الأهل هي الحكومة لأنو هاد شعبها ف لازم يكون بأحسن حال .. !!
وهاد الموضوع بالوطن العربي مش مهم للحكومات , بالعكس الشعب اذا وعي وتثقف وشبع ... هاي مصيبة ....

يا رب .... :D
Abu ToNi
23/05/2009, 02:23
الطفل مسؤولية الأم والأب ووغير هلحكي بكون اسمه جمل انشائية برأي
طبعا بيقصد بالأم والأب الأشخاص المسؤولين على تريبة الطفل .. هي مشان ما حدا ينط يقلي ( وإذا الأهالي متوفقين :lol: )

مقولة الطفل أبن المجتمع ما بتعطي معنى التربية والمسؤولية
معناها بأن نشأة الطفل - عاداته - طريقة تفكيره مو بس بيكتسبا من أهله اللي عم يربوه انما كمان بيكتسبا من مجتمعه اللي عم يحتك معه
بس كتربية ومسؤولية بحط كل الحمل على الأهل وفقط على الأهل


ما بعرف ليش كتير كتير حبيت الموضوع ...:D
saman
23/05/2009, 02:34
الطفل مسؤولية الاهل شي طبيعي وبالخصوص الاب والام (يعني اولياء الاموريلي مستلمين تربيتو مو بالضرورة ابو وامو الحقيقيين )
لأنو كل سلوك الطفل ومزاجو وطريقة تفكيرو بيكتسبها وقت يكون بحض اهلو ...قبل المدرسة وققبل كل شي وبعد لمدرسة وبعد كل شي .. المسؤول الاول وليس الوحيد هم الاهل


اما بالنسبة للمقولة .. فا صح هوي ابن المجتمع .. بيكتسب منو بعض الاشيا بغض النظر عن صحتها او خطأها .. بس مو المجتمع هوي يلي بيربيه ! المسؤول هم الاهل وفقط الاهل على قولة بو طوني :larg:

الي رجعة :D
mhsen77
23/05/2009, 02:56
الطفل قطعة لينة سهلة التشكيل
تقتبس شخصية الطفل من كل من حوله و هنا تاتي اهمية دور الاهل بالتوعية و التوجيه دون الاكراه و الاجبار لان ذلك يولد رد فعل عكسي
بطبيعة الحال في مجتمعنا الاهل و خصوصا الام هي اقرب شخص للطفل و عليها تقع اكبر المسؤلية
ولا نستطيع انكار دور المجتمع الذي يلعب دور في توجيه شخصية الطفل بالاتجاه السائد بين اقرانه ولكن يبقى في هذا الدور في المرتبة الثانية
Sun Shine Art
23/05/2009, 07:56
اي مظبوط ...الطفل هو مسؤوليه الاب والام ...من ناحيه التربيه والاهتمام والتوعيه ..

بس بالاخير هو وليد المجتمع ...الي عايشين فيه ..ان كان من خلال الوالدين او المجتمع الي حوليه ...من خلال العلاقات والمدرسه ..والخ ....

وماننسى انه الوالدين هما كمان انتاج هل المجتمع ..فا الطفل لح يكون مسؤول من اهله بس بالاخير مسؤوليه المجتمع هي اكبر..وع قوانين المجتمع الي عايشينو .. .

والمجتمع مسؤول .بتقديم كتير امور لترعاه ..والي طفل لح يكتسبها من خلاله ....ان كان فكريا ..ثقافيا ..تعلمي..دينيا ..من كافه النواحي ...

:D
Nay
23/05/2009, 18:25
عندي صديق بيحمل منظومة من الافكار غاية في الجمال وأحيانا غاية في الغرابة.. عنده ابن عمرة خمس سنين..
صديقي مصر انو ابنو ما يدخل المدرسة.. هوي حابب انو يدرسو بالبيت ويختارلو اصدقاؤه وعلاقاتو.. ويشتريلو الالعاب والقصص اللي بتناسبو هوي "الاب بقصد".. لانو ماعندو رغبة انو ابنو يتعلم اية ايديولوجية او ثقافة من اي حدا غيرو ..
انا محتارة كتير.. أديش ممكن يكون قرار صديقي سلبي على ابنو..
برأيي رغم سلبيات المجتمع ورغم وجود قيم منختلف معها.. الا انو من المهم ان الطفل يشوف كلشي.. ويتعلم من كلشي.. لانو ابن صديقي رح يتربى بغرفةبلورية وجو مثالي الى حد المبالغة وأمام اي صدمة ممكن يتأثر كتير..
جاد81
23/05/2009, 18:27
الأهل هم المسؤولون بشكل مباشرة عن رعاية الطفل و تربيته لسن معين ..
طيب ما هي معايير قدرة الأهل على تربية أطفال ...و نحن نعلم أن الشريحة الواسعة من مجتمعنا العربي تربي أطفالها على ما تعلمته من أهلها...الأسرة العتيدة تسأل أ ُسر أهلها على ما عليها أن تقوم بهِ... و الشريحة الواسعة من الأسر العربية لا تلجأ للعلم و أصول التربية مع تدني نسبة القراءة في المجتمعات العربية لحد مخيف....يـُلاحظ للجميع أن الطفل يـُلقن أفكار أبويه ...يعني لو رجعنا للمثل القائل أن كل إناء ينضح بما فيه...فهذا يعني أن الطفل سيكون كوالديه و بالتالي حالة من الثبات و عدم التغيير...أنا مدرك أن هذا الموضوع نسبي .....

ما دور الحكومات العربية في سن قوانين ترعى حقوق الأطفال و قوانين تـُلزم الأهل بتحمل فكرة إنجاب الأطفال على قواعد سليمة و ليس لمجرد التكاثر العددي الذي له رواج كبير في واقعنا العربي تبعا ً لخلفية عشائرية و مدلولات دينية ...أي إنجاب الأطفال و تربيتهم إعتمادا ً على الكيف (الصفات الجوهرية) و ليس على الكم (المقاديير العددية ) حيث أن الأطفال هم المجتمع بفترات زمنية متلاحقة ....

و كما نعلم أن تربية الأطفال مرتبطة بشكل مباشر بالمستوى العلمي و الثقافي للأبوين و بالتالي عملهما و مساحة الوقت المتروكة لتعليم الأطفال أسس الحياة و قواعد النشوء الصحيح المفيد للمجتمع ككل .... مركز الأب في الأسرة و ما يمثله في عين طفله و مركز الأم و ما تمثله في عين طفلها ...و هل عمل المرأة رادع أمامها من الإنجاب ونحن نعلم أن كثير من النساء تقرر الإستغناء عن عملها مقابل تربية أطفالها ...أو فكرة مشاركة الأب للأم أعمالها في التربية ...
في الواقع الإقتصادي الراهن كثيرات الامهات العاملات و اللواتي يعملن من أجل المكسب المادي و كذلك يعملن من أجل إنجاح أسرهن كأعمال منزلية و تربية لأطفالهن ...ما دور الأب هنا في تحمل مسؤولية العمل التربوي لأطفاله و العمل المنزلي كشريك للأم العاملة التي تأتي بالمال و ترعى اسرتها كزوج و أطفال..

الطفل هو جزء من الأسرة و الأسرة جزء من المجتمع ألا يعني أن المجتمع ككل و الحكومات مسؤولة بشكل مباشر عن الطفل و تربيته و القواعد التي سينشأ عليها
mhsen77
23/05/2009, 23:31
عندي صديق بيحمل منظومة من الافكار غاية في الجمال وأحيانا غاية في الغرابة.. عنده ابن عمرة خمس سنين..
صديقي مصر انو ابنو ما يدخل المدرسة.. هوي حابب انو يدرسو بالبيت ويختارلو اصدقاؤه وعلاقاتو.. ويشتريلو الالعاب والقصص اللي بتناسبو هوي "الاب بقصد".. لانو ماعندو رغبة انو ابنو يتعلم اية ايديولوجية او ثقافة من اي حدا غيرو ..
انا محتارة كتير.. أديش ممكن يكون قرار صديقي سلبي على ابنو..
برأيي رغم سلبيات المجتمع ورغم وجود قيم منختلف معها.. الا انو من المهم ان الطفل يشوف كلشي.. ويتعلم من كلشي.. لانو ابن صديقي رح يتربى بغرفةبلورية وجو مثالي الى حد المبالغة وأمام اي صدمة ممكن يتأثر كتير..

:shock::shock::shock::shock:
ناي ليش حتى تكوني محتارة ماني عارف يعني هيك شي اكيد مو منطقي و غير قانوني كمان اذا بدك لانو الزامية التعليم \اذا صديقك سوري \ نتفرض عليه يدخل ابنو المدرسة
تانيا صديقك اكيد عم يمارس تسلط بشكل كبير على ابنو و هالابن بالاخير رح يوقع تحت حكم ديكتاتوري بكل معنى الكلمة و هالشي رح يلغي شخصية الابن بكل تاكيد ويخليه دايما بحاجة لشخص ياخد عنو قراراتو بكل كبيرة وصغيرة بتواجهو مع الايام وهيك بتوقع انو الاب عم يتجنى على الابن ما عم يفيدو
بعدين في مثل بيقول \ ما حدا بتعلم غير من كيسو \ و بما انو الاب لغى تجارب الابن بالحياة اكيد هالطفل ما رح يتعلم اي شي
Nay
24/05/2009, 00:13
:shock::shock::shock::shock:
ناي ليش حتى تكوني محتارة ماني عارف يعني هيك شي اكيد مو منطقي و غير قانوني كمان اذا بدك لانو الزامية التعليم \اذا صديقك سوري \ نتفرض عليه يدخل ابنو المدرسة
تانيا صديقك اكيد عم يمارس تسلط بشكل كبير على ابنو و هالابن بالاخير رح يوقع تحت حكم ديكتاتوري بكل معنى الكلمة و هالشي رح يلغي شخصية الابن بكل تاكيد ويخليه دايما بحاجة لشخص ياخد عنو قراراتو بكل كبيرة وصغيرة بتواجهو مع الايام وهيك بتوقع انو الاب عم يتجنى على الابن ما عم يفيدو
بعدين في مثل بيقول \ ما حدا بتعلم غير من كيسو \ و بما انو الاب لغى تجارب الابن بالحياة اكيد هالطفل ما رح يتعلم اي شي
iهلأ محسن بما انو الشب مثقف كتير فهوي ما بيحكي الموضوع بنفس الطريقة اللي انا عم اعرضها هوي بيحكي القصة من وجهة نظرو هوي.. "طبعا انا معك بكل كلمة قلتها" بس هوي بيعتقد انو مانو مستعد يعرض ابنو لأي تأثير سلبي من المجتمع..
مشان التعليم الالزامي .. في طريقة انو الواحد بيقدر انو يخلي ابنو يقدم الفحوص اخر السنة.. ويكون مواكب لاقرانو بالدراسة..
هي الطريقة بقصد طريقة صديقي متبعة من قبل بأمريكا.. في كتير ولاد بأمريكا ما بيروحو على المدارس لاسباب متعددة أغلبها دينية.. وبيعتمدو على تدريس منزلي وامتحانات منتظمة.. يعني متل الجامعة الافتراضية
mhsen77
24/05/2009, 00:43
هوي بيعتقد انو مانو مستعد يعرض ابنو لأي تأثير سلبي من المجتمع..

انا عندي رأي بخصوص هي الجملة بالتحديد
يلي ما بيشوف الشي السلبي و بيتعلم منو ما رح يقدر قيمة الشي الايجابي
طبعا انا مع انو بالمجتمع شي سلبي ممكن ياخدو الطفل بس بحسن التصرف و الوعي من الاهل \ صديقك بهالمثال \ ممكن نبعد هالطفل عنو و نفهمو انو هالشي ما بيسوى و رح يوصلنا بالنتيجة لشي غلط و ممكن يكون ضار

رح اثبتلك انو تفكير صديقك غلط 100%: مبدأ اللقاح هو انو منعطي للشخص جرعة خفيفة من الجرثومة الممرضة حتى يتشكل بالجسم مضادات الها و هيك رح نكتسب منعتنا ضد هالجرثومة و المرة الجاي لما تصيبنا رح يكون بجسمنا مضادات الها و هيك بيصير ما الها اي تأثير علينا

:D:D:D
Abu ToNi
24/05/2009, 02:38
الطفل هو جزء من الأسرة و الأسرة جزء من المجتمع ألا يعني أن المجتمع ككل و الحكومات مسؤولة بشكل مباشر عن الطفل و تربيته و القواعد التي سينشأ عليها
انا ضد تحميل الحكومة مهمة التربية الأسرية
يمكن نحملها دور بتوعية الأهالي وارشادن لطرق تربية أولادن .. بس ما كانت بحياتها من مسؤولية الحكومة تربية الطفل !!
sandra
24/05/2009, 02:49
الطفل مسؤولية الأب والأم بس !! يا ريت !!
بعلمي بمجتمعنا الجد والست والخال والخالة والعم والعمة كلو بيتدخل وبيحشر أنفو بتربية الولد
Abu ToNi
24/05/2009, 02:57
الطفل مسؤولية الأب والأم بس !! يا ريت !!
بعلمي بمجتمعنا الجد والست والخال والخالة والعم والعمة كلو بيتدخل وبيحشر أنفو بتربية الولد

بس بيقدروا يأثروا بشخصية الطفل وبمبادئه وافكاره ؟
يعني اذا اهلوا عندن رأي بموضوع معين ولنفرض ( الموبايل ) انه الولد ما بدنا نخليه يشيل موبايل لحد يصير بعمر معين
شو ما عملت الخالة والعمة والست والجد والصهر ما رح يقدر يأثر بشخصية الطفل متل ما الأهل بيقدروا يقنعوا ابنن ويأثروا بشخصيته

حتى وضع حدود للأقارب فينن الأهل يتحكموا فيه ويوجهوه على كيفن
sandra
24/05/2009, 03:04
بس بيقدروا يأثروا بشخصية الطفل وبمبادئه وافكاره ؟
يعني اذا اهلوا عندن رأي بموضوع معين ولنفرض ( الموبايل ) انه الولد ما بدنا نخليه يشيل موبايل لحد يصير بعمر معين
شو ما عملت الخالة والعمة والست والجد والصهر ما رح يقدر يأثر بشخصية الطفل متل ما الأهل بيقدروا يقنعوا ابنن ويأثروا بشخصيته

حتى وضع حدود للأقارب فينن الأهل يتحكموا فيه ويوجهوه على كيفن
اي هالحكي صار عن جديد أنو الأهل عم يحطو حدود لباقي الأطراف ومع هيك لما الطفل بيلاقي أنو من الأقارب بيوقف لصفو ولرغباتو وبيحرج الأهل بتدخلو من باب "كرمالي مرقولو ياها هالمرة " فهالشي رح يعزز متطلبات الطفل ويلجأ دايما لهالشخص وهيك الأهل بينحطو بموقف ما بينحسدو عليه ولهيك من الأفضل وضع حدود
بس يا زلمة شعبنا حشور
يعني إذا الأهل اقتنعو بأنو ابنهم يدرس عكيفو بالجامعة بتلاقي الناس بتتدخل أنو له يا زلمة كيف قبلت ابنك يدرس بهالكلية وبيطلعلو أحسن ما بيصير لا ترضى
إذا البنت أو الشب بدو يتزوج الشاطر بدو يدلي بدلوو ويعطي رأيو إذا هالجازة لازم تصير ولا لا
حتى لو ما كان الأقارب أصحاب القرار بالنهاية .. لكن تدخلون بيأثر كتير على الأهل والابن وللأسف عم يكون سلبي أكتر ما يكون ايجابي
:D
Abu ToNi
24/05/2009, 03:10
اي هالحكي صار عن جديد أنو الأهل عم يحطو حدود لباقي الأطراف ومع هيك لما الطفل بيلاقي أنو من الأقارب بيوقف لصفو ولرغباتو وبيحرج الأهل بتدخلو من باب "كرمالي مرقولو ياها هالمرة " فهالشي رح يعزز متطلبات الطفل ويلجأ دايما لهالشخص وهيك الأهل بينحطو بموقف ما بينحسدو عليه ولهيك من الأفضل وضع حدود
بس يا زلمة شعبنا حشور
يعني إذا الأهل اقتنعو بأنو ابنهم يدرس عكيفو بالجامعة بتلاقي الناس بتتدخل أنو له يا زلمة كيف قبلت ابنك يدرس بهالكلية وبيطلعلو أحسن ما بيصير لا ترضى
إذا البنت أو الشب بدو يتزوج الشاطر بدو يدلي بدلوو ويعطي رأيو إذا هالجازة لازم تصير ولا لا
حتى لو ما كان الأقارب أصحاب القرار بالنهاية .. لكن تدخلون بيأثر كتير على الأهل والابن وللأسف عم يكون سلبي أكتر ما يكون ايجابي
:D
بس التربية وتكوين الشخصية ما بيعتمد علـ نص ساعة أو الساعة اللي عم يشوف هلطفل أقربائه فيها
جو البيت وطريقة تصرف الأهل داخل هلبيت هية أهم عوامل التربية

لهيك قلت بأول رد إلي بان المجتمع بأثر على خصوصيات معينة وتقاليد معينة وافكار معينة بهاد الجو
بس الدور الاول والأخير للأهل بتحديد نمط التربية

هاموش :
ما بدي حط سمايلي ابو وردة .. جكارة يعني :p
sandra
24/05/2009, 03:20
بس التربية وتكوين الشخصية ما بيعتمد علـ نص ساعة أو الساعة اللي عم يشوف هلطفل أقربائه فيها
جو البيت وطريقة تصرف الأهل داخل هلبيت هية أهم عوامل التربية

لهيك قلت بأول رد إلي بان المجتمع بأثر على خصوصيات معينة وتقاليد معينة وافكار معينة بهاد الجو
بس الدور الاول والأخير للأهل بتحديد نمط التربية

هاموش :
ما بدي حط سمايلي ابو وردة .. جكارة يعني :p
لا أكيد ما بيعتمدو عالنص ساعة بس التربية بتكون مشوشة مش ثابتة على مبادئ وحدة
يعني الطفل ما فيه يعرف دايما شو الصح وشو الغلط إذا مرة تنبه على فعل وم لما قام فيه رة تانية ما تنبه عليه بحجة وجود خالتو ولا ستو يلي بتزعل إذا الأهل حاكو الولد بحزم ادامها على سبيل المثال
أنا ما عم انكر انو الفضل الأول والأخير هو للأهل وهنن يلي بيلعبو الدور الرئيسي بتربية الطفل بس عم أحكي على ظاهرة بتزعجني جداً وهي تدخل الأقارب بتربية الطفل
والـ :D للكل مش بس الك :p
بنفسجة
26/05/2009, 17:09
مسؤلية من اتى به الى اليحاة
امو وابوه مجتمعين
بمجتمعنا الشرقي بيقول تربية الطفل مسؤلية الام وهاد خطا فادح
الطفل كما انو بحاجة حنان وعطف والدته فهو بحاجة صلابة وقوة والده
كل من الوالدين يقدم لطفله جانب من شخصية انثوية او ذكرية وبالتالي رح يكون في توازن بشخصية الطفل يلي اتربى على يدي ابواه كلاهما
ولو فات الولد عالمدرسة وصارت التربية مشتركة بين المدرسة والاهل بيبقى للاب والام الدور الاكبر والمسؤلية الكبرى في فشل او نجاح الطفل اجتماعيا وغير مجالات
وشم الجمال
26/05/2009, 17:13
قناعتي الخاصة يللي بتتعارض مع كتير من الدراسات
انا بشوف انو اول عشرين سنة من عمرو بيتقاسمها اهلو واصدقاءوا ومجتمعو
بس بعد العشرين ببلش يكون حالو ومعتقداتو وافكارو يللي ممكن تتناقض تماما مع معتقدات اهلو
فيعني شو ما الاهل ربو بهالزمان كل حدن بربي حالو
بنفسجة
26/05/2009, 17:18
قناعتي الخاصة يللي بتتعارض مع كتير من الدراسات
انا بشوف انو اول عشرين سنة من عمرو بيتقاسمها اهلو واصدقاءوا ومجتمعو
بس بعد العشرين ببلش يكون حالو ومعتقداتو وافكارو يللي ممكن تتناقض تماما مع معتقدات اهلو
فيعني شو ما الاهل ربو بهالزمان كل حدن بربي حالو
التربية مش بالضرورة تكون زرع افكار ومعتقدات تبقى ثابتة
التربية برايي بذرة من كل شي وهالبذرة يا بتكبر وبتثمر ثمار حلوة او مرة يا بتموت وبينمو غيرها بظروف ملائمة
وشم الجمال
26/05/2009, 17:19
او مرة يا بتموت وبينمو غيرها بظروف ملائمة

اعتقد انو هاد يللي بصير دائما او اغلبا :D
توم و جيري
26/05/2009, 17:20
الطفل مسؤولية الوالد والوالدة ...
ومحدا بيقدر يربيه عالصح او الغلط غيرن ...
بنفسجة
26/05/2009, 17:25
اعتقد انو هاد يللي بصير دائما او اغلبا :D
وهيدا الشي الصحي والمفروض يصير ولو كل اسرة بتلتزم ما تقيد ابنا بافكار مسبقة وتحطلو البزرة بس كان المجتمع غير هيك


الطفل مسؤولية الوالد والوالدة ...
ومحدا بيقدر يربيه عالصح او الغلط غيرن ...

لي حق الاختلاف ما في اسرة الا بتحلم انو تكون تربية ابنا احسن تربية وخالية من الغلط ( يلي هوو مفهوم نسبي جدا)
بس يكبر الولد شوي بيصير مجتمعو ياثر عليه وتصير افكارو الخاصة كمان تاثر عليه
الاهل يتحملون مسؤلية الاشباع النفسي والروحي اكثر شي برايي
اما خصال الطفل فهي مسؤلية الاهل بالبداية ومسؤلية مشتركة للاهل والولد والمجتمع فيما بعد
sweetbaby
26/05/2009, 19:05
الطفل مسؤولية الاهل والاهل بس، ولازم يعرفو يحوطو من التاثيرات الخارجية...
لانو المجتمع والاصدقاء رح يكونو تاثير كتيير ع الطفل وتاثيرو...بس مسؤولية صقل هالتاثيرات هي مسؤولية الاهل:D
جاد81
27/05/2009, 02:04
الطفل مسؤولية الاهل والاهل بس، ولازم يعرفو يحوطو من التاثيرات الخارجية...

:D


طيب اذا الأهل متوقعين على حقبة زمنية مهترئة و التأثيرات الخارجية متقدمة تحاكي النهضة التربوية

لماذا الاحاطة واجبة من الأهل على الطفل ؟؟؟؟؟؟
بنفسجة
27/05/2009, 14:04
الطفل مسؤولية الاهل والاهل بس، ولازم يعرفو يحوطو من التاثيرات الخارجية...

لانو المجتمع والاصدقاء رح يكونو تاثير كتيير ع الطفل وتاثيرو...بس مسؤولية صقل هالتاثيرات هي مسؤولية الاهل:D

اكبر خطا بيوقعو فيه الاهل هو الاحاطة التامة للطفل بحجة حمايتو من المؤثرات الخارجية
الطفل رح يربى فاقد الثقة بمحيطو خائف متوتر من كلشي جديد بيشوفو
بالتالي برايي بيكون سريع التاثر والسرعة بالتاثر غالبا بتكون غير مدروسة وغير مرتكزة على تفكير عميق وعي
ودائما بيكون الها تاثيراتها السلبية
boozy
27/05/2009, 23:45
في مثل يؤمن بي ويتداوله الناس اللي ما راح اطلق عليهم تسمية ما..
" الطفل لما يجي يجي رزقة وياه"!!!!
طيب هو الطفل بس اكل وشرب؟
مسؤلية من هاي اولا يتحمل عاتقها الابوين طبعا
لان هم الي راح يتبنو مسؤلية انتقاء اجواء نشأته حتى يكبر.
وبعدين يجوا الاجداد والاخوال والاعمام والمحيط الخاجر الي تبتعد قرابة الشخص كلما زاد اتساع الدائرة المحيطة.
ولو ان محيط الدفء العائلي صار بعيد بهذا الزمن مع الاسف.
بنفسجة
27/05/2009, 23:59
في مثل يؤمن بي ويتداوله الناس اللي ما راح اطلق عليهم تسمية ما..
" الطفل لما يجي يجي رزقة وياه"!!!!
طيب هو الطفل بس اكل وشرب؟
.
شو دخل هالعبارة
اصلا هالجملة ما بتنفي التربية ولا بتنفي الاشيا التانية
الرزقة القصد فيا الاكل والشرب ليلي بيخاف انو ابنو يجوع
مادخل التربية او التنشئة فيها لهي الجلمة
sweetbaby
28/05/2009, 00:11
طيب اذا الأهل متوقعين على حقبة زمنية مهترئة و التأثيرات الخارجية متقدمة تحاكي النهضة التربوية

لماذا الاحاطة واجبة من الأهل على الطفل ؟؟؟؟؟؟
الاحاطة واجبة من الاهل لانو تربية الطفل لازم تتماشى مع العصر اللي عايشين فيه، ولما نكون عم نحكي بالمفروض فمن المفروض ع الاهل قبل مايجيبو اي ولد يكونو متثقفين ع كيفية تربية الابن...


اكبر خطا بيوقعو فيه الاهل هو الاحاطة التامة للطفل بحجة حمايتو من المؤثرات الخارجية
الطفل رح يربى فاقد الثقة بمحيطو خائف متوتر من كلشي جديد بيشوفو
بالتالي برايي بيكون سريع التاثر والسرعة بالتاثر غالبا بتكون غير مدروسة وغير مرتكزة على تفكير عميق وعي
ودائما بيكون الها تاثيراتها السلبية
لموش انا ماجبت سيرة الاحاطة التامة...بالعكس انا ضدها تمام..بس الاهل بحاجة انو يحيطو ابنون لانو نحنا عم نحكي عن الطفل والطفل بشكل عام سريع التاثر بس الاهل هني المفروض يعرفو كيف يحورو هالتاثر لشي منيح ليفيد الطفل بمستقبلو
جاد81
28/05/2009, 23:45
انو أوكي بس ما حدن خبرنا ما مدى تأثير عمل المرأة ( الأم ) على مستوى التربية

و ما مدى تأثير علاقة الزوجين و تقسيم العمل التربوي بينهما على مستوى التربية
sweetbaby
29/05/2009, 22:11
انو أوكي بس ما حدن خبرنا ما مدى تأثير عمل المرأة ( الأم ) على مستوى التربية

و ما مدى تأثير علاقة الزوجين و تقسيم العمل التربوي بينهما على مستوى التربية


ماهلا بالتربية طبعا الدور الاكبر واقع ع المرأة مابعرف انت عم تقول مدى تأثير عمل المرأة انو خارج البيت؟؟
مابعتقد في تاثير لعمل المرأة خارج البيت لانو اللي عم تربي ولادا رح يكون في تقسيم لوقتها واكيد طريقة التربية مارح تختلف اذا كانت بتشتغل او لاء...
علاقة الزوجين كتير مهمة.. وكتر المفروض يكون العمل التربوي مقسم بيناتن ومانو مركز ع شخص واحد
بنفسجة
30/05/2009, 16:23
الطفل في مراحل حياته الاولى بيكون بحاجة الى تواجد كبير لامه في حياته
المراة العاملة تقضي اكثر من 7 ساعات بعيدا عن طفلها
هيدا بيقتضي ترك الطفل بهي ال7 ساعات اما عند حدا من الاقارب احدى الجدتين غالبا او في دار رعاية اطفال
وبكل الحالتين الطفل لن يعوض غياب الام عاداك عن التاثيرات يلي بتتركها تربية الجدة او الناس يلي ما بتربطون فيه اي علاقة (دور الحضانة) هالحكي بينطبق تماما على ترك المراة لابنها تحت رعاية الخادمة (يلي بتكون بالغالب اجنبية)
والانعكاسات السلبية يلي ماحدا بيقدر ينكرها او ما يوقف عندا
انا مع توقف المراة عن العمل لفترة لا تقل عن 3 سنين وهيي فترة نمو الطفل العقلي والجسدي والنفسي يلي بيكون بالذروة
الطفل بحاجة لكل لحظة حنان من والدته وما بيعوضو عنا لاجدة ولا خادمة وفيه
حتى لو فرضنا انو الام قدرت توفق بين عملها وتربية طفلا فاكيد عملا بهي الفترة رح يادي الى ارهاق جسدي ونفسي عليها وممكن يقل مردودها العاطفي وغيرو بالنسبة لابنها
علاقة الرجل بزوجته شي كتير مهم طبعا الاسرة المتماسكة يلي بتعرف تقسم العمل وبتعرف واجب كل فرد فيا هي اسرة رح تربي ابنا بطريقة كتير موفقة ومتل ما للام دور اساسي بحياة طفلا كمان الاب الو دور اساسي وما في داعي نعطي نسبة ال50% لكل زوج
الطفل بحاجة لرعاية وحنان امه وابوه سوا وكتير جميل نشوف الاب مع الطفل في حال غياب الام والعكس صحيح
لانو كتير ضروري تواجد احد الوالدين مع الطفل وغياب الاثنين الو انعكاسات نفسية على الطفل:D
جاد81
03/06/2009, 01:07
الطفل في مراحل حياته الاولى بيكون بحاجة الى تواجد كبير لامه في حياته
المراة العاملة تقضي اكثر من 7 ساعات بعيدا عن طفلها
هيدا بيقتضي ترك الطفل بهي ال7 ساعات اما عند حدا من الاقارب احدى الجدتين غالبا او في دار رعاية اطفال
وبكل الحالتين الطفل لن يعوض غياب الام عاداك عن التاثيرات يلي بتتركها تربية الجدة او الناس يلي ما بتربطون فيه اي علاقة (دور الحضانة) هالحكي بينطبق تماما على ترك المراة لابنها تحت رعاية الخادمة (يلي بتكون بالغالب اجنبية)
والانعكاسات السلبية يلي ماحدا بيقدر ينكرها او ما يوقف عندا
انا مع توقف المراة عن العمل لفترة لا تقل عن 3 سنين وهيي فترة نمو الطفل العقلي والجسدي والنفسي يلي بيكون بالذروة
الطفل بحاجة لكل لحظة حنان من والدته وما بيعوضو عنا لاجدة ولا خادمة وفيه
حتى لو فرضنا انو الام قدرت توفق بين عملها وتربية طفلا فاكيد عملا بهي الفترة رح يادي الى ارهاق جسدي ونفسي عليها وممكن يقل مردودها العاطفي وغيرو بالنسبة لابنها
علاقة الرجل بزوجته شي كتير مهم طبعا الاسرة المتماسكة يلي بتعرف تقسم العمل وبتعرف واجب كل فرد فيا هي اسرة رح تربي ابنا بطريقة كتير موفقة ومتل ما للام دور اساسي بحياة طفلا كمان الاب الو دور اساسي وما في داعي نعطي نسبة ال50% لكل زوج
الطفل بحاجة لرعاية وحنان امه وابوه سوا وكتير جميل نشوف الاب مع الطفل في حال غياب الام والعكس صحيح
لانو كتير ضروري تواجد احد الوالدين مع الطفل وغياب الاثنين الو انعكاسات نفسية على الطفل:D


كلام جميل و آراءك تنم عن فهم و تحليل صحيح برأيي الشخصي... مع العلم أن معظم الأسر المتكونة حديثا ً تفتقر لثقافة الأنجاب و تتمسك بحتمية الإنجاب في السنوات الأولى من الزواج تبعا ً لرواسب اجتماعية ذات خلفيات دينية ..الفكرة تكمن بالقرار بالإنجاب مع حلول الوقت المناسب و الوضع النفسي و الإجتماعي و الإقتصادي للزوجين
لأن قرار الإنجاب هو قرار مهم بأهمية الزواج و لا يأتي كقرار ثانوي مكمل لرحلة الزواج...أي قدوم الطفل إلى الحياة في ظل اسرة مرتاحة نفسيا و اجتماعيا و اقتصادي يعزز الثقة بين الطفل ووالديه...و هنا تأتي أهمية فهم الزوج لتكوين الأسرة و دوره الأساسي في العامل النفسي لزوجته الحامل و المربية في السنوات الاولى من الأنجابو بنفس الوقت تأتي اهمية الزوجة (الأم ) في اصول التربية الصحيحة مع العلم أن الخبرة نسبية و تختلف من عمر لعمر و من بيئة اجتماعية لأخرى....
جاد81
03/06/2009, 21:16
فيعني شو ما الاهل ربو بهالزمان كل حدن بربي حالو

يعني يمكن هيك عما نروج لرفع المسؤولية عن الأهل ...
xxlarge
03/06/2009, 21:33
طفولة - صدق- شفافية- طيبة- تعني طهارة وبراءة . كل ذلك يتجسد في عجينة مصنوعة من خام نقي لا تشوبه شائبة ولكن ماذا لو وجدت في زمن خانه الزمن- أيامنا هذه التي يتخلى فيها الأكثرون عن أصلهم ومجدهم وتاريخهم وثقافتهم بل يحاربون كل من يدعو

للتثقيف والوعي بالوقوف مع الصهينة والأمركة الغازية للعقول والقلوب والبيوت بأساليب وطرق عدة عبر العولمة والفضائيات المغرضة التي تسيطر على عقول أطفالنا بشكل إجرامي مخطط ونحن نشارك بتلك الجريمة البشعة بالتستر والتغاضي وذلك من خلال السماح بمشاهدة ومتابعة تلك الفضائيات وللتذكير والمقارنة ففي السابق كنا عندما نلتقي طفلاً وبعد التعرف على اسمه وسنه وسنة دراسته وبشكل بديهي نسأله أن كان يحفظ شيئاً ما فيرد بنعم وعندما نطلب منه اسماعنا كان يبادر علي الفور بترديد نشيد بكلمات موزونة وفصيحة ذات معنى عميق قريبة للقلب والعقل وتدل على أصالة اللغة والتاريخ فتهذب حافظها وتضبط مخارج حروفه وتزرع الثقة في نفسه وتحسن تأديبه وتثقيفه أما الآن وللأسف الشديد أن التقينا بطفل ومهما صغر سنه وطلبنا منه الطلب ذاته فتراه على الفور يتلوى ويتمايل ويبدي حركات تدعو للسخرية وهو يردد إحدى تلك الأغاني الهابطة التي تبثها المحطات الفضائية وقتها تدرك حجم الكارثة لما فيها من تشويه وتضييع للبراءة والشفافية والإنسانية والأعظم والأفظع أن الطفل يحفظها كلمات وحركات واسم المطرب أو المطربة والشكل حتى أنه أصبح يتجه إلى السوق عند حصوله على مصروفه اليومي ليس من أجل شراء الحلوى أو القصة بل لشراء صورة صاحب أو صاحبة الأغنية ولربما لإلصاقها في غرفة نومه وعلى سريره أو على دفاتره الدراسية.‏
المسؤول الأول هم الأهل الذين يصفقون له عند غنائه ويتراقصون طرباً لذلك ويتباهون ويتابعون تلك الأغاني مع أطفالهم عند عرضها وهنا لب الموضوع لأن الأهل وأخص الوالد فهو في نظر ولده (سوبرمان) الرجل الأقوى والأعظم والقادر على فعل كل شيء وإن كل ما يفعله صحيح ويجب الاقتداء به لأنه مثله الأعلى.‏
فرفقاً بطفولتنا وأطفالنا وعلينا ألا ننسى أنهم ليسوا أكبادنا فحسب بل هم عماد المستقبل ورجال الغد فلنؤسس كما أسس لنا ولنكن أهلاً للمسؤولية لأننا بحاجة لهم و الوطن كذلك فلنعمل جميعاً بمقولة القائد الرمز الدكتور بشار الأسد (بقدر ما نزرع بذوراً صالحة نجني ثماراً ناضجة).‏
جاد81
03/06/2009, 21:49
ما دور السلطات الرسمية في توعية الأسر على التربية الصحيحة ، كما نعلم أن معظم الأسر المتشكلة حديثا ً تستقي معلوماتها عن أصول التربية من خلفيات عائلية أو من المجتمع القائم على العادات البالية ...

ما دور الحكومة في سن قوانين حماية الطفل و حق الطفل على الأهل من رعاية و علم و غيرها من الحقوق
sona78
05/06/2009, 10:33
عندي صديق بيحمل منظومة من الافكار غاية في الجمال وأحيانا غاية في الغرابة.. عنده ابن عمرة خمس سنين..
صديقي مصر انو ابنو ما يدخل المدرسة.. هوي حابب انو يدرسو بالبيت ويختارلو اصدقاؤه وعلاقاتو.. ويشتريلو الالعاب والقصص اللي بتناسبو هوي "الاب بقصد".. لانو ماعندو رغبة انو ابنو يتعلم اية ايديولوجية او ثقافة من اي حدا غيرو ..
انا محتارة كتير.. أديش ممكن يكون قرار صديقي سلبي على ابنو..
برأيي رغم سلبيات المجتمع ورغم وجود قيم منختلف معها.. الا انو من المهم ان الطفل يشوف كلشي.. ويتعلم من كلشي.. لانو ابن صديقي رح يتربى بغرفةبلورية وجو مثالي الى حد المبالغة وأمام اي صدمة ممكن يتأثر كتير..


بتوقع انو صديقك عندو شي خطا بالنفسية ....... هي الانعزالية يلي فارضها ع ابنو رح يدفع تمنها الاتنين الاب والابن ....... الا اذا رح يحتفظ فيه كل العمر ..طبعا اذا ما صار شي حادث استثنائي ( وفاة الاب او الابن )..:jakoush:

الطفل اكيد مسؤولية الاهل بالدرجة الاولى .. بس هيدا لايعني الانعزالية عن المجتمع .. وحتى لما بتكون نظرتنا للمجتمع يلي حولنا انو غير كفو .. بتوقع الاهل قادرين انو ينمو بالطفل حس الاختيار .. يعني ينمو فيو شخصية تقدر تحاكم الامور بشكل متوازن .. وبالاخير لازم يكون قادر يختار بنسبة كبيرة خط حياتو ..
والا يا رح نعملو نسخة مكررة من انفسنا ( يعني من الاهل ) يا رح يطلع شخصية مشوهة بالنسبة للمجتمع
mary_55
05/06/2009, 11:59
( الطفل إبن المجتمع و ليس إبن والديه فقط )




بما أنو الطفل رح يبلش يختلط بالمجتمع الخارجي عن طريق المدرسة أول شي
وبعدين الشغل وما إلى ذلك وطبيعي المجتمع يترك الأثر الأكبر بالطفل مما يأدي إلى تكوين الشخصية
لانو الطفل بتكون محصورة معرفتو بالأهل لحد ال5 سنين بالكتير
وخلال هل خمس سنين لازم يتعلم الأدب التعامل وبعدين لما بينتقل للمدرسة بيصير يطبق إلي تعلمو بشكل تلقائي
وبما أنو فترة أختلاطو بالعالم الارجي بتكون أكبر من فترة بقاؤو بالبيت يلي هي 5 سنين رح يكتسب شخصية منفردة
إلا إذا كانت الأم او الأب بيحبو يفردو سيطرتهم على الولد وبيخلوهم دايما قريب منهم ويحاولو يصيطرو على إرادتو مارح يقدر يكون شخصية منفردة تماما ومستقرة عن الأهل..وبالتالي رح يكون تعاملو مع المجتمع أصعب...
كتير عم أتفلسف:p
شكرا على الموضوع
كتير حلو يسلمو :D
جاد81
06/06/2009, 17:22
كتير عم أتفلسف:p


ما بتعرفي إنو الفلسفة أم العلوم....إتفلسفي أدي ما بدك و لاقيلنا حلول

هيدا المطلوب :lol: