تزويج الفتاة من مغتصبها ... [الأرشيـــــف]

marioma alghzayala

14/05/2009, 15:43

مرحبا ..

كل اليوم الصبح بتجيني جريدة بلدنا عالمكتب .. بس مبارح لفتني العنوان ...اللي كان :
تزويج الفتاة من مغتصبها ..(عفوا ايها القانون ) ...:

كتير انطرح مواضيع بخصوص جرائم الشرف .... وكتير في نقاط خلاف صار وحوارات واحاديث ..

بس من القصة اللي مكتوبي واللي هيي عبارة عن انو بنت ما كانت تاخد شكل جدي كيف بينظرلا ابن جيرانا ..انو عادي متلو متل اي شب ..بس بيوم من الايام وهيي راجعة عالبيت بيغتصبا..وبترجع عالبيت مكسورة ومحطمي وحالتا بالويل ... وقت اللي راحوا عالمخفر .. قالولوا قدامك حلين ..
يا بتنسجن 15 سني
يا اما بتتزوجا ..

يعني كتير خيارات ..مكتّرين :lol:...حسيتن عم يساعدوه:?...

.. انو شفت وقت اللي زوجوا البنت اللي اعتصبا هداك الحيوان ... اي صارت جريمتين .. طيب شو زنبا هيي؟؟... نفسيتا كيف رح تكون ؟؟؟ كيف رح تطلع فيه ؟؟ مين بيتحمل المسؤولية؟؟ هيي ؟ اهلا ؟ الشب ؟ العالم ؟

وتفضلوا :D

أإأبو العبد

14/05/2009, 15:54

بس يعني لو ماتزوجا المغتصب مين رح يتطلع فيها بمجتمعنا؟؟؟؟؟؟؟؟؟؟

عطر الايام

14/05/2009, 16:04

الموضوع بيفتح مجالات كتيرة للمناقشة
طيب ازا البنت ما رضيت تتزوج الشاب يللي اغتصبها حينحبس 15 سنة( انا يللي بعرفوا 20 سنة )
بس بهالحالة لازم اهل البنت والمجتمع يوقف معها للبنت لانو هي ضحية هاد لانو كانت مأدبة البنت وما أخدت وعطت مع الشاب
بس انا بنظري مو لازم ينحبس الشاب لازم ينشنق لانو هيك حيوان لازم ما يعيش. وساوى معها هيك حيساوي مع غيرها
وازا تزوجتوا مشان ما يصير فضايح حتعيش بإهانة طول عمرها معو
انا برأيي خليه ينحبس

أإأبو العبد

14/05/2009, 16:06

انا برأيي خليه ينحبس
حلو الكلام بس البنت بمجتمعنا شو رح يصير فيها
قولك العرسان رح يوقفو طوابير على باب بيتن؟؟

عياش

14/05/2009, 16:07

بس يعني لو ماتزوجا المغتصب مين رح يتطلع فيها بمجتمعنا؟؟؟؟؟؟؟؟؟؟

معناها الحل نزوجها لمغتصبها لأنو هية براد أو غسالة أحسن ما ينسرق منبيعو........

يعني بالله عليك حيوان بشري اغتصب بنت شلون بدك يعاملها كزوج.......

بس للتوضيح الاغتصاب ليس عملية سهلة يعني غير منطقي إنو رجل واحد يقدر يغتصب بنت هيك بدون ماحدا يساعدو أو يستخدم مخدر أو تهديد بسلاح يعني المغتصب بيكون إما عم يستغل ضعف البنت نتيجة مرض أو علة نفسية أو عصبية أو مخطط مع سبق الاصرار إنو يغتصبها ومهئ الظروف ومستخدم سلاح أو متفق مع أشخاص آخرين يساعدو يعني مو متل ما بيصوروها إنو ساعة طيش وشباب وفورة جنسية نتيجة اغراء لا يقاوم لانو في كتير ناس بتتعامل مع المغتصب إنو ضحية الاستفزاز والاغراء الجنسي خصوصا نجوم الفضائيات من المشايخ المتلفزيين.

marioma alghzayala

14/05/2009, 16:10

طيب هدّوا شوي ...

لنفرض تجوزا ... كم مرة رح يرجع يغتصبا ؟؟... لك هيي من الاساس ما بدا ياه .. لاء وجوزوها ياه ؟؟ اي و الله فظاعة:shock:

عطر الايام

14/05/2009, 16:10

البنت المغتصبة ضحية ولازم كل العالم يفهم هالشي
لانو يللي صرلها ماكان بإيدها ولا موافقة عليه كانت

عطر الايام

14/05/2009, 16:11

انا ضد انو يتزوجها
لانو هيك شاب لازم ينفضح وخليه ينحبس

أإأبو العبد

14/05/2009, 16:15

معناها الحل نزوجها لمغتصبها لأنو هية براد أو غسالة أحسن ما ينسرق منبيعو........

يعني بالله عليك حيوان بشري اغتصب بنت شلون بدك يعاملها كزوج.......

بس للتوضيح الاغتصاب ليس عملية سهلة يعني غير منطقي إنو رجل واحد يقدر يغتصب بنت هيك بدون ماحدا يساعدو أو يستخدم مخدر أو تهديد بسلاح يعني المغتصب بيكون إما عم يستغل ضعف البنت نتيجة مرض أو علة نفسية أو عصبية أو مخطط مع سبق الاصرار إنو يغتصبها ومهئ الظروف ومستخدم سلاح أو متفق مع أشخاص آخرين يساعدو يعني مو متل ما بيصوروها إنو ساعة طيش وشباب وفورة جنسية نتيجة اغراء لا يقاوم لانو في كتير ناس بتتعامل مع المغتصب إنو ضحية الاستفزاز والاغراء الجنسي خصوصا نجوم الفضائيات من المشايخ المتلفزيين.
ياعمي انا والله معك بس يعني لو انحبس والتعن دين اهلو (وانا مع هالشي) البنت \\\(بمجتمعنا)\\\ شو حتستفيد
ياجماعة انا مو مع تزويجها لهالوحش البشري بس انا بدي ناخد بعين الاعتبار مجتمعنا (المتخلف) كيف بيفكر؟؟؟

وقضايا من هالنوع مابتنحل الا اذا تغيرت طريقة تفكير المجتمع فالتغير مابيبدا بتغير القوانين قبل مايبدا بتغير طريقة تفكير هالمجتمع

Noah

14/05/2009, 16:23

موضوع محيّر فعلاً .. يزيد تعقيده ما يقيّد ساعدينا من عادات

هلْ البنت المغتصبة قادرة عى رؤية مغتصبها .. يدعوها للفراش ثانية ؟ باللين؟

وعليها حق الاجابة ؟

أإأبو العبد

14/05/2009, 16:25

حاجتنا احلام وردية وانو الجاني رح ينال عقابو (هاد اذا ماكان مدعوم وطلع منها)وانو البنت رح تعيش بسعادة وهناء والناس رح تتعاطف معها
وانا بشوف مافي حل للبنت حاليا الا بزواجها من مغتصبها
بس نبقى هيك نوصل لمرحلت الانسانية ونفهم شو معنى كائن بشري ونخلص من جعل القضايا الجنسية اول اولوياتنا بهالحياه ونتخلى عن مفهوم الشرف التنكي المقرف الي جعل اساس شرف البنت بغشاء البكارة وهاد المفهوم البدوي المتخلف هو الي جايبنا ستين الف سنة لورا
ساعتها بس ممكن يتغير هالمجتمع ويمكن وقتا نقدر نغير بهالقوانين

أم الجود

14/05/2009, 16:25

أإأبو العبد

14/05/2009, 16:27

أنا أرى أن عمليات ترميم البكارة هي الحل درئاً للفضيحة .. وليُرمى ذاك المتوحش في غياهب السجن سنوات وسنوات
كيف رح يرمى بالسجن والبنت ماتنفضح اساسا هيك كلب مسعور لما ينسجن بيكون شغلو الشاغل كيف ياذي البنت ويفضحى فكيف رح تزبط هالشغلة حتى لو ترمم غشاء البكارة

أم الجود

14/05/2009, 16:29

حلو الكلام بس البنت بمجتمعنا شو رح يصير فيها
قولك العرسان رح يوقفو طوابير على باب بيتن؟؟

صديقي أبو العبد
انو تعنّس هالبنت أحسنلا من انو تتزوج هالحقير و تعيش معو بعذاب كل يوم هي و عم تسترجع هديك اللحظات المؤلمة .. لأنك لما بتتزوج بتكون عم تعمل عيلة و من حق ولادك عليك تنقيلون أم منيحة .. و أنا لو محل هالبنت -الله لا يقدر طبعاً- ما برضى لولادي هيك أب ...

أإأبو العبد

14/05/2009, 16:34

شكرا ام الجود لانك قدرتي تفهمي قصدي

يعني باختصار رايحه عالبنت بالحالتين اذا تزوجتو رح تعيش بمأت وهم وغم ونكد
واذا لا رح تنفضح ويمكن حتى اهلها يقرفو عيشتا وماحد رح يتطلع فيها مهما كانت اخلافا ومهما كان جمالا

..Jimy

14/05/2009, 16:58

بس يعني لو ماتزوجا المغتصب مين رح يتطلع فيها بمجتمعنا؟؟؟؟؟؟؟؟؟؟
أنا... ليش هي شو فيها نقص حتى ما اطلع فيها أو بشو اذنبت هيي.. أو بشو غلطت؟؟
وابو العبد متل ما قالت ام الجود انو تعنس افضل بكتير من انو يتكافئ المجرم الحيوان عجريمتو:pos:..

طيب هدّوا شوي ...
لنفرض تجوزا ... كم مرة رح يرجع يغتصبا ؟؟... لك هيي من الاساس ما بدا ياه .. لاء وجوزوها ياه ؟؟ اي و الله فظاعة:shock:
ولأ وشو كمان بقانونا العتيد الصنديد.. اغتصاب الزوجي امر قانوني..عادي يعني :frown:..

Noah

14/05/2009, 17:15

هالموضوع مطروح بحلقتين من مسلسل سيرة الحب .. و القصة هي نفس القصة اللي حكتها مريومة بالأول بالضبط ..
الحلقة بعنوان 508 و هو رقم القانون يلي بيسقط العقوبة عن المغتصب في حال الزواج ...
أنا لما شفتها بكيت لتنهنهت :cry:

قد رأيتها .. الفتاة المظلومة نالت مايكفي من الظلم ..

من المغتصب

من المجتمع

ثم الاهل

لم المجتمع لا ينظر اليها .. كما ينظر لامراة مطلقة مثلا؟

او اجنبية ؟ من بلاد الحرية ..!

عياش

14/05/2009, 17:32

ولأ وشو كمان بقانونا العتيد الصنديد.. اغتصاب الزوجي امر قانوني..عادي يعني :frown:..

بحب أضيف بهل الصدد إنو بقانونا العتيد الصنديد بالمادة 491 جاء ما يلي للعاهرة الحق بأن تمنع نفسها عمن شاءت ومتى أرادت.
يعني القانون ضمن حماية العاهرة من الاغتصاب ولم يحمي الزوجة من الاغتصاب ملاحظة بتعريف الاغتصاب بالقانون السوري يعاقب من جامع امرأة غير زوجته قسراً .....يا أخي القانون ما بيدخل بين المرأة وجوزها شو يدك بالحكي.

بنفسجة

14/05/2009, 17:34

انا ضد تزويجا لهيدا الشخص
بيكفي يلي عملو فيها
مارح تقتدر تتقبلو ابدا كزوج لانفسيا ولاجسديا لانو شخص اعتدى على روحها قبل جسدها
انا مع السجن اقصى مدة ممكنة وخطا واكبر خطا ان يتم تزويجها له لان هيك بنكون قدمنالو مكافاة ما عاقبناه

أإأبو العبد

14/05/2009, 17:34

أنا... ليش هي شو فيها نقص حتى ما اطلع فيها أو بشو اذنبت هيي.. أو بشو غلطت؟؟
ياجيمي افكارك يمكن مابتمثل اكتر من 1 بالمية من المجتمع يعني انت مستعد تتزوجن كلن
وابو العبد متل ما قالت ام الجود انو تعنس افضل بكتير من انو يتكافئ المجرم الحيوان عجريمتو:pos:.. مابظن انو افضل بالعكس يمكن اسوا لانو اهلا وجيرانا وكل الي حواليها رح ينبذوها صحيح يعني انو تتعامل مع وحش واحد افضل من انها تتعامل مع مجتمع كلو وحوش مابترحم

ولأ وشو كمان بقانونا العتيد الصنديد.. اغتصاب الزوجي امر قانوني..عادي يعني :frown:..بالعكس المرا فيها تشتكي على زوجها وهاد من اهم مبررات الخلع

sweetbaby

14/05/2009, 18:00

quote]
أول الشي يعدمني ياكي ع هالصباح اللي صبحتيني ياه بهالموضوع:frown:

ياعمي انا والله معك بس يعني لو انحبس والتعن دين اهلو (وانا مع هالشي) البنت \\\(بمجتمعنا)\\\ شو حتستفيد
ياجماعة انا مو مع تزويجها لهالوحش البشري بس انا بدي ناخد بعين الاعتبار مجتمعنا (المتخلف) كيف بيفكر؟؟؟

وقضايا من هالنوع مابتنحل الا اذا تغيرت طريقة تفكير المجتمع فالتغير مابيبدا بتغير القوانين قبل مايبدا بتغير طريقة تفكير هالمجتمع

حاجتنا احلام وردية وانو الجاني رح ينال عقابو (هاد اذا ماكان مدعوم وطلع منها)وانو البنت رح تعيش بسعادة وهناء والناس رح تتعاطف معها
وانا بشوف مافي حل للبنت حاليا الا بزواجها من مغتصبها
بس نبقى هيك نوصل لمرحلت الانسانية ونفهم شو معنى كائن بشري ونخلص من جعل القضايا الجنسية اول اولوياتنا بهالحياه ونتخلى عن مفهوم الشرف التنكي المقرف الي جعل اساس شرف البنت بغشاء البكارة وهاد المفهوم البدوي المتخلف هو الي جايبنا ستين الف سنة لورا
ساعتها بس ممكن يتغير هالمجتمع ويمكن وقتا نقدر نغير بهالقوانين
أبو العبد انا معك انو المجتمع ممكن يتطلع عليها بطريقة دونية...وأنو العرسان مارح يوقفو طوابير ع بابا...
بس ياعمي اشرفلها لـ للبنت تكون منبوذة بـ بيت أهلها عن أنو تكون مزوجة لهيك واحد...
الاثار النفسية اللي ممكن تتضاعف مع هالبنت حتكون وخيمة...يعني أنت تخيل هيك بنت وصار معا هيك امور ازا مابدي قول انو صابها شي بعقلا حيكون عندا ردة فعل قوية...ومزال المجتمع حتكون نظرتو الها دونية فالمعنى هيي بنظر المجتمع انها مانها منيحة..وهالشي حياثر عليها سلبا..فـ ولادا وطريقة تربايتهم كيف حتكون...هي اذا اتطلعنا ع الموضوع من وجهة نظر شو العيلة اللي رح تعملها...بغض النظر عن انو هيي انسانة وحقوقا وكل هالامور

بحب أضيف بهل الصدد إنو بقانونا العتيد الصنديد بالمادة 491 جاء ما يلي للعاهرة الحق بأن تمنع نفسها عمن شاءت ومتى أرادت.
يعني القانون ضمن حماية العاهرة من الاغتصاب ولم يحمي الزوجة من الاغتصاب ملاحظة بتعريف الاغتصاب بالقانون السوري يعاقب من جامع امرأة غير زوجته قسراً .....يا أخي القانون ما بيدخل بين المرأة وجوزها شو يدك بالحكي.
لك ياعمي هني بقدسو العلاقة الزوجية...يعني مطبقين ياداخل بين البصلة وقشرتها..

انا ضد تزويجا لهيدا الشخص
بيكفي يلي عملو فيها
مارح تقتدر تتقبلو ابدا كزوج لانفسيا ولاجسديا لانو شخص اعتدى على روحها قبل جسدها
انا مع السجن اقصى مدة ممكنة وخطا واكبر خطا ان يتم تزويجها له لان هيك بنكون قدمنالو مكافاة ما عاقبناه
ممم أنا مع اطول فترة ممكنة من العذاب لالو

ميغسي عالموضوع مريومتي:D

قمح

14/05/2009, 19:20

السؤال أنو .... بهاي الحالة أو بدونها البنت لازم تتزوج يعني ؟؟؟؟

ليش تفكيرنا دايماً أنو يا عمي البنت المغتصبة المجتمع المتخلف ما رح يطلع عليها .... عمرو ما اطلع
مش مضطرة تتزوج وتدعك رجلين الزوج العظيم بالمي وتحكيلو تقبرني ابن عمي متل باب الحارة النووي ...

يعني بنت مغتصبة أكيد حالتها النفسية خلتها تعمم وتكره كل دين الرجال المنيح والعاطل ....
فكيف منزوجها اللي اغتصبها ... شو رح تكون العلاقة بينهم وشو رح تكون هي الاسرة المعطاءة !!!!

يا عمي أنا بقول خلي هالبنت قاعدة ببيتها وتألف كتاب عن الاغتصاب وتعمل رواية احسنللها ...
خليها يا عمي مش لازم النهاية دايماً الزواج ....

وبدون عمل حبكة درامية حوالين القصة ... أنو الأهل والمغتصب ما رح يسكت ورح ينتقم ومدري شو !!!!

بس النكشة ....
أنو المغتصب هو المخير بين السجن أو الزواج .... يعني كأنو الزواج أقل من السجن بشوي بالنسبة الو
أنو كيف يتزوج بنت مغتصبة حتى لو هو المغتصب ... يا عمي :lol:

والبنت قاعدة بالبيت بتدعي يا رب يختار السجن ....
وأكيد ما رح يختار ....

:D ..... وردة

saman

14/05/2009, 21:52

بس النكشة ....
أنو المغتصب هو المخير بين السجن أو الزواج .... يعني كأنو الزواج أقل من السجن بشوي بالنسبة الو
أنو كيف يتزوج بنت مغتصبة حتى لو هو المغتصب ... يا عمي ////////////// الروابط الي بيحطوها الأعضاء بيقدر فقط الأعضاء يشوفوها ، اذا مصرّ تشوف الرابط بك تسجل يعني تصير عضو بأخوية سوريا بالأول -///////////////
على حسب علمي .. انو بقانوننا بيصير العكس .. هيي يلي بتتخير مو هوي ! :?

عياش

14/05/2009, 21:58

على حسب علمي .. انو بقانوننا بيصير العكس .. هيي يلي بتتخير مو هوي ! :?

أنا كمان بعتقد قانونيا إنو البنت مخيرة بس بظن قصد قمح كان قصدو إنو المغتصب ما بيقبل يتزوج بنت مغتصبة وكون أهل البنت بدون السترة فبصير الخيار بيد المغتصب بهل الحالة...... أظن.

شمس سوريا

14/05/2009, 22:11

قمح

14/05/2009, 22:11

أنا كمان بعتقد قانونيا إنو البنت مخيرة بس بظن قصد قمح كان قصدو إنو المغتصب ما بيقبل يتزوج بنت مغتصبة وكون أهل البنت بدون السترة فبصير الخيار بيد المغتصب بهل الحالة...... أظن.

صح .... :D

sweetbaby

14/05/2009, 22:25

أنا كمان بعتقد قانونيا إنو البنت مخيرة بس بظن قصد قمح كان قصدو إنو المغتصب ما بيقبل يتزوج بنت مغتصبة وكون أهل البنت بدون السترة فبصير الخيار بيد المغتصب بهل الحالة...... أظن.

ماعندي معرفة بالقانون..فسؤالي انو بيخيروها بشو بالضبط؟؟ انو تتجوزو او ماتتجوزو...ازا ماتجوزتو ومارضيت شو بيصير فيا؟؟

شمس سوريا

14/05/2009, 22:29

saman

14/05/2009, 22:37

بس يا جمااااعه صح انو هوه ندل لانو اغتصبها ومن حئها انها ترفضو
بس انتو عايشين بمجتمع كبيييييييير كتيييير
يعني انا لو مكانها (الله لا يقدر)
بالعكس بتوزوجو وانا اللي بذلو لاني لما بتجوزو ما بعمل اي شي بيعجبو لو بدو ياه
بضل ضدو ما بسمع كلمتو
بفرجي اني طريئة البنت اللي مو مرباايه
عشان بالاخير هوه يندم ليش اختاار الزواج مني وما ختار السجن
رح يكون بوئتها السجن ارحملو :p
ولو حاول انو يضربني او يهيني بهاد الوئت المراه من حئها انو تطلب الطلاق بحجة عم يهيني او عم يضربني
وبهاد الموقف رح يكون القانون معي :p

بس انت برأيك لو لا سمح الله كان صاير معك هالشي .. رح تقدري تكوني بهالنفسية القوية ! :shock:

sweetbaby

14/05/2009, 22:39

ما بصير فيها شي بس بترجع لاهلها وبتنذل من حكي الناس والعالم :D
بيئولو نارو ولا جنة اهلي ;)
يعني رح تضل مهما عملت ومهما ساوت عاليه عالمجتمع يعني مع كل اسفي لهالجمله
بنــــــــــــت مغتصبه :x
هاد اللي رح يصير :x
هيدا مو حكي...اذا البنت ماعليها حق وهيي ماغلطت حيبان هالشي..
ومافي شي نارو ولاجنة هلي..هيدا الحكي بيصير صح لما بتكون هيي بدها ياه وقاتلة حالها عليه

وليش عالة عالمجتمع؟؟؟ يعني خلص ازا ماتجوزت ماحيطلع بقا معا شي؟؟

وبعدين صح نسبة كبيرة من مجتمعنا لسا عندو تخلف من هالناحية، بس معلش العالم عم تتوعى

saman

14/05/2009, 22:42

ماعندي معرفة بالقانون..فسؤالي انو بيخيروها بشو بالضبط؟؟ انو تتجوزو او ماتتجوزو...ازا ماتجوزتو ومارضيت شو بيصير فيا؟؟

بيخيروها انو تتجوزوا او لأ ...
ازا تجوزتوا هوي بينفد من عقوبة السجن وهيي بتنفد من حكي العالم ومن العار (بحسب المفهوم المتخلف :pos:)
وازا ما تجوزتوا ما بينفد من السجن (ما بعرف اديش مدتو بالضبط ) وهيي ما بتنفد من من حكم الناس عليها ومن العار(حسب المفهوم المتخلف كمان :pos:) .. وبجوز كمان ما تنفد من جريمة شرف !:frown:

sweetbaby

14/05/2009, 22:53

بيخيروها انو تتجوزوا او لأ ...
ازا تجوزتوا هوي بينفد من عقوبة السجن وهيي بتنفد من حكي العالم ومن العار (بحسب المفهوم المتخلف :pos:)
وازا ما تجوزتوا ما بينفد من السجن (ما بعرف اديش مدتو بالضبط ) وهيي ما بتنفد من من حكم الناس عليها ومن العار(حسب المفهوم المتخلف كمان :pos:) .. وبجوز كمان ما تنفد من جريمة شرف !:frown:

ليش ماممكن تكون مانفدت من جريمة الشرف حتى لو تجوزتو؟

ritka

14/05/2009, 22:53

امممممم
انا قرات اول شي كل الردود وكتيير حلو الحكي ...
بس يا جمااااعه صح انو هوه ندل لانو اغتصبها ومن حئها انها ترفضو
بس انتو عايشين بمجتمع كبيييييييير كتيييير
يعني انا لو مكانها (الله لا يقدر)
بالعكس بتوزوجو وانا اللي بذلو لاني لما بتجوزو ما بعمل اي شي بيعجبو لو بدو ياه
بضل ضدو ما بسمع كلمتو
بفرجي اني طريئة البنت اللي مو مرباايه
عشان بالاخير هوه يندم ليش اختاار الزواج مني وما ختار السجن
رح يكون بوئتها السجن ارحملو :p
ولو حاول انو يضربني او يهيني بهاد الوئت المراه من حئها انو تطلب الطلاق بحجة عم يهيني او عم يضربني
وبهاد الموقف رح يكون القانون معي :p

انا هيك رايي يعني احسن ما اني ضل مع اهلي والناس والمجتمع كلو رح يحكي ويئول
اكييد هيه عامله شي حركه مخليتو يطلع عليها وبيحلئو مثل (اللي ما بيدلي زنبيلو ما حدى بيعبيلو )
هاد انا بالنسبه لالي ويمكن في غيري بيختلف رايو عني
...ويسلموو على طرح الموضوع :D

اول شي لو كان الموضوع بهالبساطة..
كان في كتير عالم لا انقتلت و لا انتحرت

تاني شي ما خطرلك انو ازا جيتي تذلي وتحكيلو تجوزتك و مدري شو
ممكن يقلك انا رضيت فيكي و سترك وو..الخ (يعني واحد مغتصب شو بدو يطلع منو؟)

تالت شي وحدة انجبرت تتجوز مغتصبها
ما بتخيل بيكون عندها القدرة الكافية انو تخلي حياتو جحيم و السجن ارحملو

بمجتمعنا اولا واخيرا الخسران الوحيد هو البنت :pos:

شمس سوريا

14/05/2009, 22:55

رح تقدري تكوني بهالنفسية القوية

لما بشوف الذل من الناس والعالم اللي حوليي
بينولد جواتي الكره وبئوي حالي لحتى اثبت اني انا عايشه
انو الله خلئني متل ما خلئهن :jakoush:
انساااااااانه والها حقوقها :adal:

suryoyo

14/05/2009, 23:03

بفرجي اني طريئة البنت اللي مو مرباايه
عشان بالاخير هوه يندم ليش اختاار الزواج مني وما ختار السجن
رح يكون بوئتها السجن ارحملو :p
ولو حاول انو يضربني او يهيني بهاد الوئت المراه من حئها انو تطلب الطلاق بحجة عم يهيني او عم يضربني
وبهاد الموقف رح يكون القانون معي :p

يعني مثل قالوا الشباب .. الاغتصاب مو سهل و جريمة كبيرة

و مستحيل يطلع حباب مستقبلا ... و لذلك اي عنف ضده رخ يقابل بعنف اكثر

القانون بكل الاحوال هو ضد المرأة ... لان اثبات الضرب يحتاج اثباتات كثيرة و يمكن بعد دخول الزوجة المستشفى تتأكد المحكمة بقضية الضرب :lol:

و مجتمعنا ما يتحمل كشف المستور .... ضرب الزوجة و غير شغلات

و بكل الاحوال رح تتحول حياة المظلومةجحيم كبير و طبعا حياة الاولاد جحيم ... و يستمر المسلسل ...

احسن شي لا زواج و لا بطيخ :D

sweetbaby

14/05/2009, 23:06

لما بشوف الذل من الناس والعالم اللي حوليي
بينولد جواتي الكره وبئوي حالي لحتى اثبت اني انا عايشه
انو الله خلئني متل ما خلئهن :jakoush:
انساااااااانه والها حقوقها :adal:

لك حبيبتي مين بدو يذلك؟؟ امك وابوكي؟؟
الاثار النفسية من عملية الاغتصاب بتكسرها للبنت..
بس بعتقد مستحيل تكون بالطريقة اللي عم تحكي عليها انتي..
لانو متى ماتزوجك وانتي اصبحتي زوجته فانتي صار عليكي كمان واجبات لازم تقدميلو ياها متل ماالك حقوق...

شمس سوريا

14/05/2009, 23:09

احسن شي لا زواج و لا بطيخ :D

ما بتئدررر البنت انها تعيش بدون زواج ابدااا
رح تضل حسره بألبها انو تشوف هالناس فرحانه بولادها
وهداك الندل حرمها من هالشي :cry:

بس رح تضل يعني هالقضيه مفتوحه ومع هالناااس والعالم مارح يلتئالها حل :frown:
لانو مجتمعنا بالخط العريض
متخلـــــــــــــــــــــ ـــــــــــــــــــــــــ ـــــــــــــــــــــــــ ــــــــــــــــــف:cry:

saman

14/05/2009, 23:24

ليش ماممكن تكون مانفدت من جريمة الشرف حتى لو تجوزتو؟

هيي عالاغلب بهالحالة رح تنفد ...لأنو خلص اهلها ما عاد الهن سلطة عليها .. السلطة صارت عالزوج (برجع وبقول بالمفهوم المتخلف :pos:)
لما بشوف الذل من الناس والعالم اللي حوليي
بينولد جواتي الكره وبئوي حالي لحتى اثبت اني انا عايشه
انو الله خلئني متل ما خلئهن :jakoush:
انساااااااانه والها حقوقها :adal:
شو وين عايشة انتي ؟ :shock:
اول شي جريمة الاغتصاب آثرها النفسية لا تعد ولا تحصى ... وهالشي ما بتوقع انو يخلي الانسان مروق .. ولا فوق هيك بدو يتحكم بالمغتصب ! :?
يعني متوقعة انو تعملي حياتو سجن ... ؟ اي هوي بكل بساطة ممكن يسجنك ببيتك ويقفل عليكي البواب والشبابيك وما يخليكي تتنفسي وازا استنجدتي باهلك .. ما رح يردوا عليكي ..لأنو بالاصل هني زوجوكي ليخلصوا منك بما انو انتي تعتبري عار عليهن (حسب مفهوم البجم:frown:) !
وين عم تقوليلي قانون وبطيخ ... عنا القانون بالنسبة لهالناحية وناحية جريمة الشرف .. اخـ** و اسوأ قانون بالدنيي واكتر قانون بيظلم المرأة .. وبينفخ الرجل المتوحش يلي بيعمل هالجرائم ! :frown:
ئال قانون ئال .. لتكوني عايشة بالمدينة الفاضلة ! :?

sweetbaby

14/05/2009, 23:33

ما بتئدررر البنت انها تعيش بدون زواج ابدااا
رح تضل حسره بألبها انو تشوف هالناس فرحانه بولادها
وهداك الندل حرمها من هالشي :cry:

بس رح تضل يعني هالقضيه مفتوحه ومع هالناااس والعالم مارح يلتئالها حل :frown:
لانو مجتمعنا بالخط العريض
متخلـــــــــــــــــــــ ـــــــــــــــــــــــــ ـــــــــــــــــــــــــ ــــــــــــــــــف:cry:

ليش بقا ماتقدر تعيش بدون زواج شو ناقصها؟؟
مم معلش بس الولاد مو كل شي بالحياة..
ومانها اول وحدة حتكون بلا ولاد...
وفي مليون طريقة تقدر تثبت حالها...وبيضل افضل من انو تجيب ولاد ويتربو بطريقة غير صالحة
هيي عالاغلب بهالحالة رح تنفد ...لأنو خلص اهلها ما عاد الهن سلطة عليها .. السلطة صارت عالزوج (برجع وبقول بالمفهوم المتخلف :pos:)

شو وين عايشة انتي ؟ :shock:
اول شي جريمة الاغتصاب آثرها النفسية لا تعد ولا تحصى ... وهالشي ما بتوقع انو يخلي الانسان مروق .. ولا فوق هيك بدو يتحكم بالمغتصب ! :?
يعني متوقعة انو تعملي حياتو سجن ... ؟ اي هوي بكل بساطة ممكن يسجنك ببيتك ويقفل عليكي البواب والشبابيك وما يخليكي تتنفسي وازا استنجدتي باهلك .. ما رح يردوا عليكي ..لأنو بالاصل هني زوجوكي ليخلصوا منك بما انو انتي تعتبري عار عليهن (حسب مفهوم البجم:frown:) !
وين عم تقوليلي قانون وبطيخ ... عنا القانون بالنسبة لهالناحية وناحية جريمة الشرف .. اخـ** و اسوأ قانون بالدنيي واكتر قانون بيظلم المرأة .. وبينفخ الرجل المتوحش يلي بيعمل هالجرائم ! :frown:
ئال قانون ئال .. لتكوني عايشة بالمدينة الفاضلة ! :?
اها يعني انو مافي ولاحدة انقتلت بعد ماتجوزت؟؟
لما حتصير جريمة الشرف حتصير بغض النظر وينها هيي للاسف طبعا

suryoyo

14/05/2009, 23:37

شمس سوريا

14/05/2009, 23:42

الزواج غاية ... و لكن اذا اسيئ الاختيار .... له عواقب كبيرة جدا

اول شي كلو قسمه ونصيب :D

وتاني شي يعني منرجع لموضوعنا بدك تئوليلي انو في شب بيرضى يتجوز بنت مغتصبه ;)
وانا التلك من ناحيتي تتجوزو احسنلها بمليووون مره من انها تعيش مع العالم
تنذل من واحد احسن من مليووون واحد
ودخيييلك اجت عالولاد يعني انتي رح تئوليلهن ابوكن اغتصبني وتحكيلهن
سيرة حياتك.......................
بالعكس بتجيبي ولاد وبتربيهن على انو ما يعملو او ما تتكرر هالغلطه الشنيعه اللي عملها ابوهن (اللي الله ياخدو وئتها )
:D

sweetbaby

14/05/2009, 23:49

اول شي كلو قسمه ونصيب :D

وتاني شي يعني منرجع لموضوعنا بدك تئوليلي انو في شب بيرضى يتجوز بنت مغتصبه ;)
وانا التلك من ناحيتي تتجوزو احسنلها بمليووون مره من انها تعيش مع العالم
تنذل من واحد احسن من مليووون واحد
ودخيييلك اجت عالولاد يعني انتي رح تئوليلهن ابوكن اغتصبني وتحكيلهن
سيرة حياتك.......................
بالعكس بتجيبي ولاد وبتربيهن على انو ما يعملو او ما تتكرر هالغلطه الشنيعه اللي عملها ابوهن (اللي الله ياخدو وئتها )
:D
عم تحكي جد انتي؟؟

اي ياستي في مليون واحد بياخد وحدة مغتصبة...لانو هيي ماغلطت..
لك حبيبتي...وحدة حتكون مريضة نفسيا كيف حتقدر تربي ولادها تربية سليمة؟؟

بعدين من مين بدها تنذل؟؟ من امها وابوها واخواتها؟؟

sandra

14/05/2009, 23:52

يا حرام على البنت بمجتمعنا
كيف بتنقلب الموازين ضدها حتى وهي مظلومة وما بتخلص من شر حدا

saman

14/05/2009, 23:55

ليش بقا ماتقدر تعيش بدون زواج شو ناقصها؟؟

مم معلش بس الولاد مو كل شي بالحياة..
ومانها اول وحدة حتكون بلا ولاد...
وفي مليون طريقة تقدر تثبت حالها...وبيضل افضل من انو تجيب ولاد ويتربو بطريقة غير صالحة

اها يعني انو مافي ولاحدة انقتلت بعد ماتجوزت؟؟
لما حتصير جريمة الشرف حتصير بغض النظر وينها هيي للاسف طبعا

لأ مو هيك القصة ... بس عالواقع منشوفها ازا تجوزت .. ع الاغلب هيي رح تنفد من عقوبة الاعدام تبع الاهل والمجتمع .. يعني تخفف الحكم للسجن المؤبد مع الاشغال الشاقة عند الزوج :frown:
يعني حالات جرائم الشرف بعد ما تتجوز المغتصب نادراً و انا ما سمعت عنها ولا مرة بصراحة .. ما بقلك انو هيي مو موجودة .. بس بتوقع انو نادرة ... !

اول شي كلو قسمه ونصيب :D

وتاني شي يعني منرجع لموضوعنا بدك تئوليلي انو في شب بيرضى يتجوز بنت مغتصبه ;)
وانا التلك من ناحيتي تتجوزو احسنلها بمليووون مره من انها تعيش مع العالم
تنذل من واحد احسن من مليووون واحد
ودخيييلك اجت عالولاد يعني انتي رح تئوليلهن ابوكن اغتصبني وتحكيلهن
سيرة حياتك.......................
بالعكس بتجيبي ولاد وبتربيهن على انو ما يعملو او ما تتكرر هالغلطه الشنيعه اللي عملها ابوهن (اللي الله ياخدو وئتها )
:D
من كل عئلك عم تحكي ! :shock:
ازا بدك في حل تالت وانا بايدوا .. انو تهرب وتطفش لايا مكان بدها ياها بس ما توقع لا برحمة الاهل ولا برحمة الزوج المغتصب :frown:
بعدين شو هي تربيهن انو ما يغلطوا .. ليش برأيك هني حيتربوا تربية صالحة بوجود اب مجرم وام محطمة ؟؟
وكأنو انتي عم تحكي عن عائلة طبيعية فاضلة ! :?

--------------------------------
زكرتوني بالحلقة تبع سيرة الحب .. وقت آخر شي بترفض تتجوزو .. بس بالاخير بيقتلوها .... بجريمة شرف من اخوها يلي عمرو 10 سنين ! بجد حلقة مؤلمة :cry:

جاد81

15/05/2009, 01:04

ولأ وشو كمان بقانونا العتيد الصنديد.. اغتصاب الزوجي امر قانوني..عادي يعني :frown:..

ممكن تشرح معنى هل العبارة

هدوء البحر

15/05/2009, 01:12

هي فيها تختار يعني بيخروها للبنت بدك ياه ولا لاء

suryoyo

15/05/2009, 01:19

اول شي كلو قسمه ونصيب :D

وتاني شي يعني منرجع لموضوعنا بدك تئوليلي انو في شب بيرضى يتجوز بنت مغتصبه ;)
وانا التلك من ناحيتي تتجوزو احسنلها بمليووون مره من انها تعيش مع العالم
تنذل من واحد احسن من مليووون واحد

:D

اقلك دخيل كلشي غالي بخياتك ... اي قسمة و اي نصيب ؟؟

بنت تتعرض للاغتصاب و بعدين تنكسر عينها للمرة الثانية و تتزوجو ... و يطلع قسمة و نصيب و مقدر و مكتوب :shock:

ثانيا .. لا تتزوج .. و بعدين ؟؟
كثير نسوان ما تزوجوا و صحيح عانوا ... بس ما زالوا يعيشوا بشكل طبيعي و الهم قيمة بالمجتمع

ثالث شي .. قلنالك المغتصب فعلى كبيرة و تدل على عقل مجرم ...

تتصوري ممكن يعاملها بشكل طبيعي خصوصي انو بعد ما عمل جريمة تزوج الضحية و صار بطل القصة ؟
تضمني ما رح يعتدي عليها جسديا او يعتدي على الاولاد

ودخيييلك اجت عالولاد يعني انتي رح تئوليلهن ابوكن اغتصبني وتحكيلهن
سيرة حياتك.......................
بالعكس بتجيبي ولاد وبتربيهن على انو ما يعملو او ما تتكرر هالغلطه الشنيعه اللي عملها ابوهن (اللي الله ياخدو وئتها )

اي مو الاولاد .. قطط او ارانب حتى ممكن تخفي عليهم سر بهذا الحجم عدة سنوات !

بعدين نحنا حكينا على وضعية العلاقة بين شخص قام بجريمة و تكافئ ... و بنت تعرضت لاسوأ موقف بالحياة و بعدين صارت زوجة بالاكراه بسبب الظروف العائلية ....

اكيد رح يطلع اولاد بقمة السعادة

بالمناسبة الاغتصاب مو مثل السرقة ... الاغتصاب شغلة كبيرة و ما تدل على مستقبل سوي للجاني

جاد81

15/05/2009, 01:34

قبل معالجة الحالة كحالة منفردة ....يجب أن يعالج المجتمع ككل و بالبداية القوانين التي تحمي الجاني و الأعراف و التقاليد البالية التي ضاقت أخلاقنا منها و من يلي حاميها و عما يتبناها....

بالنسبة للحالة كرأي شخصي يـُحاسب المغتصب على فعلته بإرساله الى المصح العقلي لتلقي العلاج المناسب ...لانه إنسان مريض و المصحات العقلية أحرى به....

أما بالنسبة للفتاة المـُغتصبة تحمى من قبل الدولة و الأهل و يجرى لها العملية الجراحية المناسبة لإسترجاع عذريتها ..... و تتابع حياتها مع تلقي العلاج النفسي للخروج من الحالة بأقل الخسائر

نطالب القضاء بأن يكون هناك قوانين عادلة تحمي الجميع و كل أفراد المجتمع من كل أنواع الجرائم

توم و جيري

15/05/2009, 06:27

اذا بنجي من ناحية المنطق حتى لو ما تزوجها مغتصبها فيها تكفي حياتها وعادي تتزوج من شخص تاني ...
بس بالنسبة لمجتمعنا صعبة شوي ...

achelious

15/05/2009, 08:33

بس من القصة اللي مكتوبي واللي هيي عبارة عن انو بنت ما كانت تاخد شكل جدي كيف بينظرلا ابن جيرانا ..انو عادي متلو متل اي شب ..
مافي دخان بلا نار!! في متل عنا بيقول " الي ما بتمد ايديا ماحدا بيسلقاها" ..

اي مزبوط!!
بس بيوم من الايام وهيي راجعة عالبيت بيغتصبا..
وين اغتصبا؟؟:?

وبترجع عالبيت مكسورة ومحطمي وحالتا بالويل ... وقت اللي راحوا عالمخفر .. قالولوا قدامك حلين ..
يا بتنسجن 15 سني
يا اما بتتزوجا ..

اي والله أهلها متحضرين لحتى وصلوا عالمخفر!!

بعدين ماعرفنا إذا كان هي مابدا ياه لابن الجيران .. الي قبلت تروح معو أول مرة ..

برأيي القانون هون حل المشكلة, وكان في حلول أخرى ممكن تصير بالسر بدونه -وعم تصير بالواقع-

ومابتروح غير عالي مادري القانون فيه:lol: